رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل السابع و الاربعون 47
هدايه / انا اهلى فى مصر كدا برده اول ما شوف رقم اى حد من عمامى بفهم علاطول حاجه من تلاته يا فلوس يا شغل يا ادويه
حسام / هو بالرغم من انى معاكى جدا بس لا مش فلوس و دى مامتى
هدايه / لا كدا اقلق كدا المشكله كبيره لان شكلك كان مضايق اوى لو على الفلوس تتحل انما
حسام / انتى ماوراكيش شغل يا هدايه
هدايه / كوفى بريك
حسام / طبعا
حسام يبص الناحيه التانيه و يشرب
هدايه / على فكره لو مضايق اوى كدا من وجودى انا ممكن اطلب نقلى فرع تانى
حسام يبتسم و يبص فى الساعه و يبصلها
حسام / نهائي … الموضوع مش فيكي انا بجد مش ف المود تمام … الكوفى بريك بتاعى خلص هستاذنك اكمل شغلى
هدايه / وراك ايه بالليل مش يمكن اقدر اظبطلك مودك
حسام يمسك نفسه بالعافيه و يبصلها
حسام / هروح اكل لقمه مع مراتى و اللعب شويه مع بنتى و انام بدرى عن اذنك
حسام يمشي و هدايه متبعاه
…………………
فى شقه ندى
ندى مشغله التليفزيون على برنامج رياضي و بتعمل معاهم تتعب تروح تنام جنب بيبوا
ندى / يا لهوى على التعب بقي دا منظر واحده فى اول العشرينات امال لما اوصل للخمسينات هبقي ازاى … خمسينات ايه دا انا طموحه اوى انا لو قفلت التلاتين بالمنظر ده هيدخلونى موسوعه جينيس
ندى تنام على بطنها و تمسك ايد حبيبه و تبتسم
ندى / بكره لما تكبرى ان شاء الله هنبقي نشغل فيديوهات الزومبا دى و نرقص عليها سوا .. دا احنا هنخربها … بس اوعى تفضلي عليا شويه عيال من سنك و تسبيني و تروحى تلعبى معاهم … و بعدين تكبرى حبه كمان و تعجبى بحد و
ندى عنيها تدمع
ندى / لا حبى يا حبيبه الحب مش وحش حبى و انا هحميكي و هحمى حبك
ندى تمسح دموعها
ندى / انتى مش هتشوفى اى حاجه من اللى شوفتها مش هتتجوزى غير اللى قلبك اختاره و بس و دا وعد
ندى تقوم تقعد على طرف السريرو تبص على حبيبه
ندى / على فكره مفيش حاجه اسمها حب … مجرد وهم بنعذب بيه نفسنا بنعلق روحنا بأحلام مش موجوده بحبك و مش عاوز غيرك و كلام كتير كله كلام و اديك شايفه اهو عادى كل حاجه عادى هو عادى و هى عادى و حتى ابوكي عادى انا بس اللى مش عادى انا بس اللى تعبانه … ما تبقيش زيي ما حدش يستاهل … لو هتحبى حبى نفسك نفسك و بس … و حبينى
ندى تعيط
ندى / عشان انا بعت الدنيا كلها و بعت نفسي عشانك … و عمرك ما هتعرفى ده … عمرك ما هتعرفى انا عملت ايه و لا ضحيت بايه
ندى تمسح دموعها
ندى / تيجي نخرج ؟ قومى نخرج
ندى تقوم تفتح الدولاب و تطلع هدوم و تلبس
ندى / البيت ده كئيب جدا و خنيق تعالى نتمشي فى الشارع شويه نروح السوبر ماركت نشترى حاجه حلوه و نرجع علاطول ايه رايك
ندى تسرح شعرها
ندى / مش هنتاخر احنا كدا كدا خلصنا اللى ورانا هنا نفك بقي بلاش الحبسه اللى هتضيع عمرنا دى
ندى تشيل حبيبه و تفتح الباب و تمشي و تنسي المفتاح متعلق ورا الباب
…………………….
فى شقه عمر
عمر / يا عم كنت خليتك يومين كمان
على / طب و الشغل
عمر / قال يعني الشغل واقف عليك
على / ههههههههههههه مقبوله منك
عمر / طب ايه رايك نخرج نتغدى بره النهرده و تسافروا من بره بره انا وعدت ايه انى هخرجها
على / مفيش مشكله بس انا اللى عازم
عمر / جيت فى جمل يا خويا اعزم يا خويا اعزم يا حبيبي دا انا قتيل العزومه دى
نور تطلع شايله صينيه عليها شاى
نور / الشاى
على / تسلم الايادى … اخبار الشنط ايه
نور / التكه الاخيره
عمر / انجزى بقي و قولى لايه تلبس عشان هنتغدى بره
نور / ثوانى حاضر
نور تدخل
عمر / الا صحيح خروجه الياخت دى كعاعيكتك كام
على / ايه ناوى و لا ايه
عمر / عادى يعني بسال بس
على / هبعتلك رقم الراجل عشان يوم ما تنوى اهو يبقي معاك
عمر / مصلحه برده ابعت
…………….
فى السوبر ماركت
ندى تحاسب و تاخد الحاجه و تطلع بره تبص يمين و شمال و ترجع تبص يمين و شمال و تمشي يمين و تكمل و هى عماله تدور على البيت مش لقياه
ندى / هو راح فين المفروض … الله
ندى تفتح سوسته فى الشنطه و تطلع ورقه و توقف واحد ماشي
ندى / لو سمحت لو سمحت
الشاب / اؤمريني
ندى / بليز العنوان ده فين
الشاب يبص فى الورقه
الشاب / مش بعيد هتمشي طوالى هتلاقيه على شمالك علاطول
ندى / شكرا
ندى تاخد الورقه و ترجع و الشاب يسبقها و هى تمشي وراه تعدى على السوبر ماركت تانى و تكمل
ندى / غباء السنين كان زمانا وصلنا يا بنتى من بدرى … بس الحمد لله ان ابوكى عامل الورقه اللى فيها العنوان دى و حاطتها فى كل الشنط اهو نفع فى حاجه … عادى يعني كنت اتصلت بيه كان قالى العنوان مش حوار يعني … دلوقا بقي نروح و نقعد انا و انتى فى البلكونه كدا و افرتك الحلويات دى كلها قال زومبا قال … وصلنا الحمد لله
ندى تطلع و تدور فى الشنطه على المفتاح مش موجود تحط كيس الحلويات فى الارض و تفضل تدور مش موجود
ندى / راح فين ده داهيه ليكون وقع منى و انا بطلع الورقه و لا و انا بحاسب الراجل فى السوبر ماركت … يوووه هنمشي كل ده تانى
ندى تاخد الكيس و تنزل بحبيبه تروح السوبر ماركت تلاقي الشاب بيحاسب
ندى / لو سمحت ما شوفتش مفتاح فى ميدالية هنا
الشاب يبص تحت رجليه و الكل يبص تحت رجليهم
الراجل / ليكي تكون اشطت منك جوه و لا نسيتيه قبل ما تضهرى من البيت
ندى / طب بعد اذنك ادخل ابص جوه … مع انى ما فتحتش الشنطه غير هنا
الشاب / يكون وقع منك هناك مكان ما كنتى واقفه
ندى / ممكن هروح ابص عليه شكرا
الراجل يكلم حد من العمال
الراجل / ليك ابنى بصلها حدك جوه على المفتاح
العامل / تكرم امعلمى حالا
الشاب / كانت تايهه من ثوانى و بتسال عن العنوان
الراجل / ايه والله مبين عليها حايصه الله يردلها اياها كرمال البيبي اللى حملته
الشاب / شكرا
الشاب ياخد حاجته و يطلع من المحل و يبص يمين و شمال و يروح ناحيه ما قابل ندى يلاقيها بتدور فى الارض
الشاب / لقيتيها ؟
ندى / لا مش عارفه راحت فين
الشاب / يمكن نسيتيها فى البيت
ندى / ممكن
ندى تمد ايدها فى الشنطه و تطلع تليفون
الشاب / اشيل عنك شويه
ندى / شكرا مش تعبانى
ندى تتصل بحسام
حسام / قلبي
ندى / حسام انا اتحبست بره الشقه
حسام / ايه و حبيبه فين
ندى / معايا معايا ما تقلقش اكيد مش هسيبها لوحدها وانزل يعني
حسام / طيب الحمد لله بصي فى كافيه قدام شويه اسمه مرسال باين اقعدى هناك على ما اجى
ندى / تمام بس حاول ما تتاخرش
حسام / معاكى فلوس
ندى / معايا بس مش كتير
حسام / معاكى شنطه حبيبه
ندى / اه معايا
حسام / طيب يا ندى معلش استحملى الساعتين دول مش هينفع بجد اخد اذن النهرده انتى عارفه
ندى / تمام هستناك هناك
حسام / هبقي اكلمك كل شويه اطمن عليكي انا مش عارف اصلا ايه اللى نزلك
ندى / سلام يا حسام سلام
ندى تقفل و تحط الموبايل فى الشنطه الشاب لسه واقف باصصلها
الشاب / ايه بعيد ؟
ندى / قدامه ساعتين قالى استناه فى كافيه مرسال
الشاب / حلو جدا انا رايح هناك تعالى اوصلك
ندى / انا تقلت عليك اوى شكرا … حضرتك بس قولى مكانه من هنا ولا من هنا و انا هروح لوحدى عطلتك كفايا
الشاب / انا والله رايح هناك اصلا انا بشتغل هناك
ندى / طب همشي ازاى
الشاب يشاورلها تمشي يمشي جنبها
الشاب / لسه مش عوزانى اشيل منك
ندى / مش تقيله شكرا
الشاب / زياد فتح الله
ندى / افندم
زياد / انا زياد اسمى زياد او زيزو او زوز
ندى / اهلا و سهلا
زياد / جديده انتى هنا صح من مصر انتى مش كدا
ندى / اه
زياد / اصل انا قديم فى المنطقه و تقريبا حافظ معظم سكانها
ندى / اهلا و سهلا
زياد/ انا هنا من زمان طلعت رحله تبع الجامعه و حبيتها اول ما اتخرجت دورت على شغل وجيت عشت هنا تقريبا ما نزلتش مصر غير مره واحده اجازه اسبوعين و رجعت تانى
ندى / هى بلد جميله فعلا
زياد / انتى جايه دراسه ؟
ندى / لا مع جوزى شغال هنا
زياد / شكلك صغير اوى مش عارف
ندى / زياد صح
زياد / اه
ندى / انا غريبه عن البلد و بحاول ما اكونش قليله الزوق مع شخص ساعدنى و خصوصا لو زوق زي حضرتك
زياد / تقلت عليكي انا فهمت
ندى / لا ما اقصدش بس انا مش ناويه اكون صداقات هنا
زياد / على العموم وصلنا هنعدى الشارع بس
ندى / شكرا بجد
ندى تعدى الشارع يعدي وراها و يسيب مسافه و هو متابعها
……………….
فى شقه تهانى
تهانى / يا اختى تنورى بيتك و مطرحك
امانى / عارفه يا اختى عارفه تعيشي وتسلمى تصدقى و تؤمنى بايه
تهانى / لا اله الا الله
امانى / انتى لو اختى ما كنت هحبك كدا دا انتى الحاجه الوحيده اللى مصبرانى على جوازتى من اخوكى
تهانى / محمد !! دا غلبان
امانى / غلبان و اهبل اقولك ايه بس هى هناك و مشغلانا خدامين لابوها هنا
تهانى / هو عامل ايه صحيح
امانى / كويس الحمد لله جايبنله ناس يخدموه بالشئ الفلانى و يوم اه ويوم لا بياخد جلسات علاج ربنا يباركله حسام متغرب عشان يشتغل و يبعت فلوس لعلاج عمه
تهانى / يلا على الله بس يجيب نتيجه
امانى / اقولك ايه بس الوضع في البيت بقي لا يطاق و لا التانى اللى اتعشمت فيه خير و قولت عوض من ربنا
تهانى / تانى مين ؟ على !!
امانى / هو .. ما اعرفش امه طلعتلنا من اى داهيه و خدها معاه يفسحها يومين تغير جو انما انا … انا مين انا … انا مين يعبرنى انا
تهانى / نهاره ابيض ليه هو كان واخد امه معاه على الياخت
امانى / ياريتها جت على قد كدا شوفى على قلبه قد ايه و ما هانش عليه ياخد للبت شقه حاشرها مع امه فى اوضه فى شقه اخوه
تهانى/ يخيبه قال و هو اتجوزها عشان ينيم البت جنب امه !! و نور ازاى تقبل بكدا
امانى / يا اختى انتى هتوهى عن نور ؟ غلبانه و عاوزه تعيش و راضيه بقاليلها قال رضينا بالهم و الهم مش راضي بينا … الا يا اختى اروى فين
تهانى/ الا انا ما قولتلكيش
امانى / لا يا اختى ما قولتليش خير
تهانى / اروى ربنا فتحها عليها و اشتغلت فى شركه كبيره
امانى / الف مبروك و الله فرحتلها … بس يا اختى تخبى عن اختك ليه هو انا هحسدها
تهانى / و انتى كنتى فاضيه لحد يا امانى و بعدين الموضوع لسه جديد النهرده لسه تالت يوم
امانى / ربنا يكرمها من وسع ان شاء الله اصلها طيبه و غلبانه و بنت حلال
تهانى / الحمد لله اصل قعدتها فى البيت كانت هتجيبلها اكتئاب بعد اللى .. و لا ما لوش لازمه بقي
امانى / قولى يا قلبي معاكى حق فى كل اللى هتقوليه بس على يدك ادى الله و ادى حكمته منها لله
تهانى / اروى بنتى اشتغلت سكرتيره مدير مكتب رئيس مجلس واحده من اكبر شركات الاستيراد و التصدير دى بتقبض بالدولار
امانى / الله اكبر الله اكبر
تهانى / دا انا اللى كنت منعاها تشتغل عشان بقفل عليها لحد ما تتجوز لكن طلعت غلطانه قفلت بزياده لحد ما خليتها هبله و غبيه و بينضحك عليها بكلمه حب و لا نظره قولتلها لا بقي اخرجى و اشتغلى و اشغلى نفسك
امانى / خير ما عملتى يا اختى طبعا خير ما عملتى بقولك ايه انا هقوم ادخل الحمام لحسن اتزنقت فجاه
تهانى / بيتك انتى مش غريبه
امانى تقوم و تدخل و تهانى تتنهد
………………….
فى كافيه مرسال
الكافيه على شكل مكتبه و القعدات كنبات صغيره كل اتنين قدام بعض و بينهم ترابيزات ندى قاعده على كنبه بتقرا فى كتاب و حبيبه نايمه على باقى الكنبه زياد يدخل شايل مجين كابوتشينو يحطلها واحد و يحط التانى على الكنبه اللى قدامها و يقعد ندى تبصله
زياد / كومبليمو من المكان
ندى / و حضرتك كومبليمو برده
زياد / ههههههههه انا اسف
زياد ياخد مجه و يقوم يروح يقعد على ترابيزه تانيه و ندى تكمل قراءه ثوانى و زياد يرجع يقف جنبها تبصله
زياد/ والله ما كنت بعاكس انا بس كنت بحاول اكون لطيف معاكى
ندى / شكرا
زياد / تمام انا هروح اقعد هناك
ندى / هو انت بتشتغل ايه هنا معلش اصلك من الصبح بتلف فى المكان و انا مش فاهمه طبيعه شغلك
زياد يبتسم و يجرى يجيب المج بتاعه و يقعد مع ندى تبصله باستغراب
زياد / انا بقي يا ستى مدير المكان العظيم اللى انتى قاعده فيه ده
ندى / مش شكل مدير يعني
زياد يبص على نفسه باستغراب
ندى / يعنى المدير بيبقي فورمال اقصد
زياد / دا كافيه مش شركه استثماريه
ندى / وجهه نظر
زياد / حلو الكتاب ده على فكره انا اصلى دوده كتب تعرفى انى قريت كل الكتب اللى هنا
ندى / انا ما ليش اوى فى القراءه
زياد / غريبه مع انى متابعك لقيتك مندمجه اوى
ندى / اسلوبه حلو و كمان موضوع القدر و النصيب سهل الكلام عنه لكن القصص اللى بيحكيها فى النص حلوه اوى و بتفرق مش مجرد كلام مرسل
زياد / لا الجميل انه بيقول نفس القصه اكتر من مره من منظور كل واحد و برده نفس القصه من منظور كل واحد لو كان رد فعل اى حد فيهم اتغير
ندى / فعلا عاجبتنى اوى الحكايه دى هو بيحاول يثبت ان كل خطوه فى حياتنا هى اللى وصلتنا للخطوه اللى بعدها و ان لولا الحاجات الوحشه اللى مرت فى حياتنا ما كناش وصلنا للى احنا فيه
زياد ياخد بق
زياد / عندى روايه هنا تحفه بتناقش نفس الموضوع ما دام الكتاب عجبك الروايه دى هتعجبك اوى
ندى / ما افتكرش حتى هلحق اخلص الكتاب عشان ابدء فى الروايه
زياد / تقدرى تستعيريها
حسام يدخل و يشوف ندى و يروحلها و هى بتتكلم بحماس
ندى / بجد ممكن
زياد / طبعا انتى تؤمرى … هى اسمها ايه ؟
حسام / حبيبه
زياد يبصله
ندى / كل ده تاخير يا حسام
حسام / نتكلم فوق يا قلبي بس الاول مش تعرفيني
زياد يمد ايده
زياد / زياد فتح الله
حسام / حسام زغلول
زياد / اهلا و سهلا اتفضل
زياد ياخد المج بتاعه و يقوم
زياد / هجبلك الروايه
ندى / و الحساب بليز
زياد / المرادى انتى ضيفتنا
حسام / لا معلش الجيات اكتر
زياد / اكيد ان شاء الله احنا حتى جيران عن اذنكوا .. تحب تشرب حاجه
حسام / لا شكرا
زياد يبتسم ويمشي و حسام يقعد
حسام / و انا اللى كنت قلقان انك تبقي زهقانه انك قاعده لوحدك
ندى / كنت فعلا قاعده لوحدى دا يادوب جابلى الكابوتشينو من مفيش حتى هتلاقيه سخن اهو
حسام / لما نطلع فوق ابقي احكيلى اللى حصل
ندى / تمام
حسام / كملى الكابوتشينو
ندى / ما ليش مزاج ليه انا حتى ما طلبتوش هو جابهولى كومبليمو من المكان
حسام يبتسم و يبص على زياد بيجيب كتاب من على رف و يقلب فى الصفح و يرجعلهم
زياد / اتفضلي
ندى / بس انا لسه ما خلصتش الكتاب
زياد / خديهم الاتنين
ندى تبتسم و تاخدهم وحسام متابع
حسام / ممكن الحساب بقي عشان نمشي
زياد / ثوانى حاضر
زياد يمشي حسام يقوم
حسام / هروح احاسب على ما تلمى حاجتك
ندى / اوك
ندى تقوم تلم الحاجه و تروح ناحيه الباب حسام يحصلها و يمشوا
………………………
فى شقه على
ليلى تدخل اوضه على تلاقيه فارد ضهره و قاعد لوحده تخبط على الباب يقوم يقعد
و يبتسم
ليلى / هى نور هتتاخر تحت
على / مش عارف بس ربنا يعينها ما ارتاحتش من السفر و اتسحلت مع ابوها و عمها
ليلى / ربنا يعينها بنت جدعه و باين حبتها ليه
على يبص لليلى فى صمت
ليلى / انا مش من الحموات الوحشين اللى عاوزين يخربوا على عيالهم خصوصا ان نور بنت حلال و انا شخصيا بحبها
على / حوار الخلفه
ليلى / انا ما ليش غيرك نفسي
على / لو انا ما بخلفش هتعملى ايه
ليلى / هلف بيك على الدكاتره
على / و لو كلهم أجمعوا ان ما فيش امل
ليلى / هستعوض ربنا هعمل ايه
على / طب ما توفرى على نفسك و علينا لفه طويله ما لهاش لزمه
ليلى / بس انت كدا
على / انا محتاج نور مش هى اللى محتاجانى اقولك حاجه
ليلى / قول يا ابنى
على / نور هى اول حد فى حياتى يحتوينى اول حد يطبطب عليا … الحقيقه مش الاولى التانيه بس الاولى اتحرمت منها غصب عنى و فراقها قتلنى و نور هى الحاجه الوحيده اللى لسه ربطانى بالدنيا دى عارفه ده معناه ايه
ليلى تبصله بحزن و نور تدخل
على / نور لو بعدت عنى هموت
نور / بعد الشر عنك ايه اللى جاب سيره الكلام ده دلوقت
ليلى تبصلها و تبتسم
على / انتى هنا من امتى
نور / من اول نور هى الحاجه اللى ربطاك بالدنيا … ممكن اعرف الكلام الحلو ده ما بيتقالش فى وجودى ليه
ليلي / الله هو يعني ما بيقولش كلام حلو
نور / ايه ده كلكوا عليا و لا ايه لا انا مش سهله دا انا اعيطلكوا هنا
على / هههههههههه و انا ما اقدرش على كدا
على يقوم يبوس راسها
على / هقوم اعملنا حاجه نشربها ارتاحى شويه
ليلى / انا
على / لا ارتاحى انا اللى هعمل
على يطلع بره و نور تقعد مكانه و ليلى بتبصلها
ليلى / انتى كنتى عارفه عن حبيبته اللى قبلك
نور / اه عارفه بس على ما بيحبش يتكلم عنها و لا حتى عن طليقى
ليلى تهز راسها و تقوم و نور تتابعها بحزن
……………
فى شقه ندى
ندى قاعده فى البلكونه تقرا فى الكتاب حسام يدخل شايل مجين نسكافيه
ندى / ميرسي جاى فى وقته
حسام / اول مره اعرف انك بتحبى القراءه اوى كدا
ندى تقفل الكتاب و تحطه على ترابيزه قدامها
ندى / و الله كنت فاكره انى ما بحبهاش بس انا كنت خايفه الموبايل يفصل فقولت اسيبه و اتفرج على الكتب و الكتاب شدنى
حسام / انا ممكن اجبلك كتب مفيده جدا تتسلى بيها
ندى / اما اخلص الكتابين اللى معايا بقي
حسام / الناس هنا مش حلوين يا ندى
ندى تبصله
حسام / اوعى تفتكرى انى فى الشغل ما بشوفش اشكال عجب
ندى / الناس وحشين فى كل مكان
حسام / بس هنا … انا و انتى ما لناش غير بعض هنا
ندى / انا لوحدى فى اى مكان عن اذنك هبص على حبيبه
ندى تقوم و حسام متابعها
…………………
فى الشركه تانى يوم
حسام فاتح اللاب يوصله ايميل يبتسم و يفتح ملف اوله صوره لهدايه تليفونه يرن يقفل اللاب و يروح البلكونه و يرد
حسام / عمرى ما اعتمدت عليك و قصرت رقبتى
راجل / البت دى داهيه سوده
حسام / ان جالك الغصب خده بالرضا
الراجل / براحتك بس انا عملت اللى عليا و حزرتك تتجوز الراجل عرفى و تطلق و لسه شغاله فى نفس الشركه لا و كمان تترقى بدل ما تترفد دى اتجوزت اربع مرات و كل جوازه طلعت من وراها بشئ و شويات
حسام / اش تاخد الريح من البلاط
الراجل / على العموم خد بالك برده
حسام / ما تقلقش نصايه و توصلك رساله بتحويل الفلوس لحسابك
الراجل / حبيبي انا طول عمرى احب اخدم الناس المحترمه اللى زيك
حسام / ههههههههههه ربنا يديم المحبه
الراجل / سلام
الراجل يقفل و حسام يبص على هدايه مركزه معاه يبتسملها و يرجع مكتبه
………………….
فى اسكندريه
أية تدخل المحل شايله كيس كبير جواه حافظات اكل و عمر قدامه زبون و مراته شايله بيبي
عمر / كدا الحساب اتناشر الف ربعميه
الراجل يحاسب و يمشي عمر يروح يقعد جنب أية
عمر / ايه يا عم الشبح مش ترمى السلام و انتى داخله
أية / معلش المره الجايه هاخد بالى
أية تفتح العلب
عمر / مالك في ايه
أية / مفيش
عمر / طب قولى فى ايه و اجبلك حاجه حلوه
أية / كان فى خناقه فى الشارع عبيت الاكل بسرعه و لبست و جيت جرى
عمر / خناقه ايه
أية / والله ما اعرف انا اول ما سمعت الزعيق رميت العبايه على جسمي و عبيت الاكل بسرعه و نزلت حتى هتلاقي البجامه تحت العبايه ما قلعتهاش
عمر / طب خلاص اهدى
أية / هو انا هفضل كدا لحد امتى
عمر / يا أية احنا سبنا البلد كلها و بعدنا قوليلى اعمل ايه تانى
أية / انا بخاف و انا لوحدى
عمر / خلاص انزلى معايا كل يوم و نروح سوا
أية / و الاكل
عمر / حضريه من بليل نروح ناكل و نبقي نفطر كويس قبل ما ننزل
أية / و شغل البيت و الغسيل و التنضيف
عمر / نعملهم يوم الاجازه او بالليل سوا مش هياخدوا حاجه يعني
أية / انت هتفضل مستحملنى لحد امتى
عمر / طول عمرى و لعلمك بقي على قلبي زى العسل و مش حاسس باى مشكله
أية / امال انا ليه حاسه
عمر / طبيعي والله … أية ممكن اسالك سؤال و تجاوبى بصراحه
أية / اسال
عمر / انتى قولتى انك عمرك ما هتسامحيني
أية / دا ايه علاقته بكلامنا ليه بتفتح
عمر / عشان انا مش قادر انسي الكلمه دى
أية / انا بحبك يا عمر
عمر / بس انا غلطت فى حقك
أية / مش اول مره تغلط و مش هتبقي اخر مره اسامحك انا اصلا ما قداميش اختيار انا ما ليش غيرك فى الدنيا
عمر / بس كدا !!!
أية تفتح العلب و ترصهم قدام عمر
أية / الاكل هيبرد و انت نازل رغى و انا جعانه
عمر / بس عشان كدا يا أية عشان ما لكيش حد تانى
أية / انا بحبك يا عمر لا عمرى حبيت و لا هحب غيرك انا عارفه ان اللى حصل كان صعب عليك زى ما كان صعب عليا و عارفه ان امى السبب و عارفه انه سلف و دين و كان لازم حد يدفع التمن انا فاهمه كل حاجه
عمر / بس انتى معايا عشان ما لكيش غيرى
أية / و مش محتاجه غيرك يا عمر عمرى ما احتاجت
عمر / بس يوم ما احتاجتيني ما لقتينيش
أية / الاكل برد اوى المفروض نجيب
عمر / قوليها يا أية
أية تعيط
أية / لما على قالى انك عيان جيتلك جرى و غدرت بيا و سامحتك و لما امى غدرت بيا ساومونى على شرفى و رفضت اخونك ففضحونى بدل ما تقف جنبى سبتنى و مشيت روحت لعلى قالى روحى موتى رجعتلك رجعت للمكان الوحيد اللى هحس فيه بالامان حتى لو انت مش فيه يمكن تكون رجعت بس ما لقيتكش الراجل اتحرش بيا على السلم لو كنت طاوعته ما كانش كل ده حصل بس انا ما رضيتش اخونك اتكاتروا عليا ايدى جريت على رقمك ما بعتش الرساله غير ليك لانك هتلحقنى و برده ما لحقتنيش و برده سامحتك
عمر يبصلها و الدموع ماليه عنيه أية تمسح دموعها
أية / بس انا استاهل كل اللى جرالى على فكره
عمر / بالعكس انتى الضحيه الوحيده فى كل ده
أية / لا مش انا ندى انا كنت عارفه ان امى بتتبلى عليك و سكت ما اتكلمتش غير متاخر اوى و كنت عارفه انها وحشه و اتمسكت بيها
عمر / بالظبط زى ما انتى متمسكه بيا دلوقت عشان ما كانش ليكي غيرها و دلوقت ما لكيش غيرى
أية / كل حاجه فى الدنيا نصيب ربنا كاتبهولنا لسبب و اكيد هيعوضنا فى الاخره
عمر / مش عاوزه تبقي معايا فى الاخره يعني
أية / انا ما قولتش كدا انا قولت ربنا هيعوضنا هيعوضنا عن الوجع اللى عشناه سواء انا او انت ما انت كمان موجوع
عمر / اوى … فوق ما تتصورى
أية / انا هقوم اجيب حاجه ساقعه نبلع بيها الاكل ده
أية تحط النقاب على وشها و تطلع بره و عمر متابعها بحزن
……………………
فى شقه ندى
ندى قاعده فى البلكونه بتقرا الكتاب و قدامها مج نسكافيه حد فى الشارع يصفر تبص تلاقى زياد الناحيه التانيه يشاورلها تبتسم يدخل الكافيه تكمل قراءه تليفونها يرن تفتح فيديو كول
ندى / الناس اللى اتفسحت
نور / لا و انتى اللى محبوسه اوى
ندى تلف الكاميره
ندى / نزلت مره لوحدى توهت و نسيت المفتاح و اتحبست بحبيبه فى الشارع
نور / يا نهار أبيض
ندى / بس كانت فرصه سعيده اتعرفت على كافيه هنا قدام البيت فيه مكتبه حلوه اوى
نور / انتى بتقرى
ندى / سبحان الله الكتاب بيقول ان كل حاجه بتحصل بتوصلنا لحاجه تانيه لو ما كنتش نسيت المفاتيح ما كنتش هعرف ان الكافيه ده فيه مكتبه و ما كنتش هعرف ان القراءه حلوه اوى كدا
نور / لا دا احنا اتغيرنا خالص بس للاحسن على فكره
ندى / انتى عامله ايه
نور / الحمد لله
ندى / لا فى حاجه
نور / اللى كنت خايفه منه حصل
ندى / على ؟
نور / مامته .. الخلفه … على بيرد عليها بس الزن على الودان و انا خايفه اخسره انتى ما تعرفيش على بالنسبالى ايه
ندى / بس هو اتجوزك و هو عارف
نور / اخاف السكينه تكون سرقاه و يصحى فى يوم نفسه فى عيل
ندى / و على قال ايه
نور / قالها لو نور بعدت عنى اموت
ندى تبتسم بحزن و تحاول تدارى
ندى / ربنا … ربنا يهنيكوا … انا لازم اقفل … سلام
ندى تقفل التليفون و تحطه على الترابيزه و تفضل تفرك و تبص يمين و شمال و هى بتتنفس بصعوبه تقوم تدخل جوه
…………………
فى المحل عند على
احمد بيعد فلوس
احمد / بس دا كتير اوى يا رياسه
على / حقك انت شلت الشغل كلو الفتره اللى فاتت
احمد / انت بتقول ايه احنا اخوات دا انت عملت معايا اللى الشقايق ما عملوهوش
على / ما انت اخويا يا حماده دا انت عشره عمر
احمد / امال بقي
على / الحق ما يزعلش ما انت برده لما تخستع هخصملك
احمد / اوعا … لا ان كان كدا بقي القرش الابيض ينفع فى اليوم الاسود
على / ههههههههههههههه ايوه كدا … الا اخبار الرجاله ايه حد فيهم ناقصه حاجه
احمد / ناقصه حاجه ايه دا انت مدلعهم اخر دلع دا الحج الله يرحمه ما كانش مدلعنا كدا
على / الله يرحمه ما كانش حارمنا من حاجه و دا كله خيره
احمد / بتزور الحجه
على / طيارى بس اغلبها تليفونات و الله فكرتنى اما اكلمها فى التليفون
على يطلع التليفون و يدور على النمره
احمد / انا هطلع اشوف باقي شغلى سلملى عليها
على / يوصل … ايوه يا ست الكل صباحوا عسل
منال / صباح الفل يابنى قول السلام عليكم
على / و عليكم السلام
منال / ههههههههههههههه طمنى عليك
على / انا زى الفل الحمد لله ما تيجي تتغدى معانا
منال / لا النهرده مش قادره خليها يوم تانى
على / ليه سلامتك
منال / الحمد لله بس بروق البيت
على / طب وليه تتعبى روحك ما ابعتلك حد ولا اجيلك انا دا انا لهلوبه و الله
منال / ههههههههههههه بقولك ايه عملت ايه فى حوار المحل
على / فى كذا حاجه قدامى لما اشوفك هاخدك افرجك و تنقى
منال / و انا اش فهمنى خد الست ليلى و اللى تختاره انا راضيه
على / وهى يعني امى اللى بتفهم فى الحاجات دى
منال / مش مهم تفهم المهم بس هتفرح
على / يبقي اللى تشوفيه
منال / اخبار نور ايه
على / الحمد لله بتسلم عليكي هى مش جنبى انا فى المحل كلميها هى فى البيت
منال / هخلص واكلمها و انت كمان روح شوف شغلك انت معطلنى
على / هههههههههه دى اخرتها ماشي كلو منك ماشي
منال / سلام يا ابنى
على / سلام يا ست الكل
على يقفل و يروح يقعد على المكتب مبسوط
…………………
فى شقه عمر
عمر نايم فى السرير أية تدخل الاوضه تنام جنبه تحضنه من ضهره يبصلها
أية / انا اسفه
عمر / على ايه
أية / انا قولت كلام ما ينفعش يتقال
عمر / و ما كانش ينفع يتكتم جواكى زى ما قولتى ما لكيش غيرى
أية / انا بحبك يا عمر
عمر ياخدها فى حضنه و يبوس راسها
عمر/ و انا عمرى ما حبيت و لا هحب غيرك
أية / يعني مش زعلان
عمر / لا
أية تمسك ايده و تحط فيها شريط حبوب منع الحمل عمر يبصلها
أية / انا مش هاخدها تانى
عمر / متاكده … يعني
أية / انا بحبك يا عمر و الله بحبك و بيتهيالى البيبي ده هيقربنا لبعض اكتر
عمر / مفيش اقرب من كدا انتى جوايا يا أية و لا انتى حاسه انى بعيد
أية / يعني مش عاوز ؟
عمر / لا طبعا عاوز و عاوز جدا كمان
أية / امال العطله منين بقى
عمر / ربنا ما يجيب عطله واحشنى يا غالى
عمر يغمزلها تضحك
…………………….
فى شقه ندى
حسام يدخل يلاقي ندى قاعده بتقرا فى البلكونه يروحلها
حسام / شكل بيبو راضيه عليكي
ندى تقفل الكتاب
ندى/ دا باماره ايه يعني على فكره لسه نايمه مفيش عشر دقايق
حسام / على العموم انا جبتلك هديه
حسام يديها شنطه هدايا تاخدها و هى مستغربه تبص فيها و تبص لحسام
حسام / بما انك بتحبى القرايه و هتسليلكي عديت على مكتبه جبتلك شويه كتب اتمنى تعجبك
ندى / شكرا
حسام / شويه كتب فى التربيه الايجابيه و كتب تنميه مهارات حاجات تفيدك مدام هتقرى يبقي تستفادى احسن و لا ايه
ندى تطلع كتاب
ندى / حقوق و واجبات الزوج فى الاسلام !!!
حسام / دا بقي عشانى قولت اشاركك بس لو تحبى تقريه ياريت
ندى / مفيش زيه للزوجه
حسام / اشوفلك لو تحبى
ندى تهز راسها و تبتسم
ندى / تحب اغرفلك
حسام / لا مش جعان بصراحه خطفت حاجه فى السريع فى الطريق كدا
ندى / تمام
حسام / فى كتاب حلو اوى الراجل شكرلى فيه مخصوص لمرحله حبيبه دلوقت مش مجرد تاكل و تنام يعني
ندى / هقراهم ما تقلقش هقراهم كلهم
حسام / تمام و المكتبه مش بعيد ابقي اجبلك غيرهم لما تحبى
ندى / شكرا
حسام / العفو هقوم اغير و اريح شويه جنب حبيبه … تحبى تخرجى بالليل
ندى / عاوزه اخلص الكتب عشان ارجعها خليها مره تانيه
حسام / تمام
حسام يدخل جوه و ندى تكمل قراءه
…………………..
فى شقه امانى
محمد / ما انا لو لاقى سبب للقمصه دى اراضيها انما دى بتقول يا شر اشتر انا مش عارفلها حل
نور / يعني يا بابا بعد العشره دى كلها مش قادر تفهمها او تحتويها
محمد / دى بتتخانق معايا انى باخد بالى من اخويا العاجز
نور/ يمكن هى محتاجه لاهتمامك و حضرتك عارف ان ماما مش بتقدر تطلب الاهتمام
محمد / و هى لما تسيب البيت و تروح لعمتك
نور / و هى ليها غيرها يا بابا
محمد / يا ستى انا مش معترض بس
نور / يا بابا حضرتك طول عمرك قلبك كبير عديها المرادى و لم الموضوع على الاقل عشان خاطر حسام
محمد / و ادى حسام كمان فى ام
نور / يعني تروح لمين هى يعني
محمد / هو انتى علاطول معاها كدا
نور تبص لمحمد بحزن
محمد / هراضيها هخليني انا الكبير للمره المليون و اراضيها اياكش انتوا ترضوا
نور تحضن محمد يبتسم
محمد / اخبار حماتك معاكى ايه
نور / لولا دى عسل
محمد / ربنا يهديهالك
نور / بقولك ايه انا بقي عشان انت ما كسفتنيش هعملك شويه ممبار من ايديا
محمد / لا كنتى قولتى ممبار من الاول و انا كنت رضيت امك وقتى
نور / طب راضيها انت بس و مش هيبقي ممبار بس
محمد / حالا
محمد يقوم و نور بتضحك
…………………
فى محل
منال و ليلى واقفين مع على و راجل
ليلى / بس دا محتاج توضيبات كتير اوى يا على
على / لا ما تقلقيش خالص شاورى انتى بس و الرجاله يبداوا شغل فيه من بكرا الصبح
منال / والله انا شيفاه كويس و المنطقه تجاريه ايه رايك انتى يا ست ليلى
ليلى / اللى تشوفوه بس لو كان
على / انا شايف اننا ما نضيعش وقت اكتر من كدا لو ناويين فعلا تبداوا
منال / خلاص توكل على الله يا على
على / تمام … خلاص يا رياسه استبينا هعدى عليك بالليل بالفلوس نمضى العقود و استلم منك المفتاح
الراجل/ تنور يا باشا
…………….
فى كافيه مرسال
ندى واقفه على الباب بتدور على زياد يشوفها يروحلها تديله كتاب
ندى / خلصت ده قولت ارجعه لتكون محتاجه
زياد / امال النونو فين
ندى / نايمه قولت استغل الوضع و اجى ارجع الكتاب و اطلع علاطول
زياد / اوعى تكونى نسيتي المفتاح
ندى توريهوله متعلق فى صابعها يضحك
زياد / انا بقي جهزتلك كتاب تانى هيعجبك اوى
ندى / لا لا لا بقولك ايه بالراحه عليا انا لسه ما بداتش فى الروايه و كمان جوزى جابلى كتب كتير اوى لما عرف انى هقرا
زياد / و ماله زياده الخير خيرين برده اقرى الكتاب ده يمكن و انا يا ست الكل مش مستعجل عليه
ندى / تمام
زياد يروح يجيب لندى كتابين يديها واحد و التانى فى ايده ندى تبص فيه
ندى / الزواج بين الحب و النصيب
زياد / و دا كتاب تانى بيتكلم عن لغه الجسد … الانسان لما بيشوف حد ما بيحبوش تعبيرات وشه بتتغير حركات جسمه حتة نبره صوته
ندى تاخد الكتاب و تقلبه فى ايدها و تبص لزياد
زياد / انا الموضوع ده كان هوسي فى الكليه اخدت فيه دورات كتير جدا و قريت تقريبا كل الكتب اللى اتكتبت فيه
ندى / شكله موضوع شيق فعلا
زياد / خلصيهم و هجبلك كتب جديده احلى و دلوقت اتفضلى من غير مطرود قبل ما البيبي تصحى
ندى / شكرا
زياد / العفو
ندى تاخد الكتابين و تمشي و زياد متابعها
……………………
فى شقه نور
على و ليلى قافلين عليهم اوضه
على / يعني المكان ما عجبكيش
ليلى / لا حلو بس يمكن كنا نلاقى حاجه احسن و ارخص بس ما دام الحجه منال قالت حلو
على / قبل ما تكملى احب افكرك ان كل اللى احنا فيه ده فلوس الحجه منال
ليلى / انا ما اتكلمتش انا
على / لا انا و لا حضرتك بنفهم فى الملابس
ليلى / و لا هى
على / بالظبط عشان كدا انا سالت اللى بيفهموا و جبت محل فى منطقه تجاريه خاصه بالملابس
ليلى / خلاص اللى تشوفه
على / طب ممكن تطلعى تقعدى مع الست عشان ما تحسش ان فى مشكله
ليلى / هغير هدومى و اطلعلها
على / تمام يا ماما عن اذنك
على يطلع بره و يقفل الباب وراه يروح المطبخ يلاقي منال بتساعد نور
على / دا انا هدلع بقي
منال / و هو فى عندنا اغلى منك ندلعه
على / طب وسعى بقي للشيف و روحى ارتاحى و انا هكمل
نور / انتوا الاتنين من غير مطرود عشان انا مش هسمح لحد ينسب لنفسه الفضل فى روعه ابداعاتى النهرده و لا شيف بقي و لا غيره
منال / و هو فى حد يقدر يقول كلمه على اكلك برده
نور / طب يلا بقي ما تعطلونيش و هاوونى بقي
على / هي بقت كدا طب يلا يلا خليها لوحدها بقي اما نشوف
على ياخد منال و يطلعوا بره و نور تكمل لوحدها
……………….
فى شقه تهانى
امانى / على ما افتكرت يا خويا
محمد / ما تزوديهاش انا اساسا ما زعلتكيش
امانى / و ما دام ما زعلتنيش جاى ليه
محمد / يعني هتعيشي عند تهانى العمر كله يعني
امانى / لحد ما حسام يبعتلى اروحله
محمد / طب انتى سالتى نفسك حسام ده ظروفه ايه الراجل لسه ما تبتش قدمه هناك عشان يبعت يجيب امه
امانى / ما انا لو ليا غيره
محمد/ و بيتك راح فين بتغضبى بعد العمر دا كله يا امانى
امانى / اهو بفضيلك الجو انت و اخوك
محمد / لا اله الا الله دا بدل ما تيجي منك و تساعديني و تكسبى فيه ثواب
امانى / و هو الناس اللى بيلهفوا على قلبهم قد كدا من عرق ابنى و شقاه قصروا فى ايه عشان نشيل معاهم
محمد / ما قصروش بس دا اخويا و وحدانى محتاج حد يقعد معاه يحسسه انه مش لوحده
امانى / بنته اولى بيه بدل ما هى ماصه دم ابنى فى الغربه
محمد / لا اله الا الله
امانى / انا بس عملت ايه فى دنيتي عشان ابقي متحاوطه كدا من كل ناحيه
محمد / بصي يا امانى عشان واضح انك مرتاحه هنا و انا تهمنى راحتك خلاصه الكلام النهرده لو ما كنتيش فى بيتك مش هتعتبيه تانى
امانى / انت بتهددنى
محمد / انا هنزل العربيه نص ساعه و همشي حبيتي تروحى معايا على راسي ما حبتيش خليكي بقي العمر كله
امانى تبص الناحيه التانيه محمد يقوم يقف و ينزل و يرزع الباب وراه تهانى تطلع من جوه
امانى / شوفتى اخوكى
تهانى / لو نزلتى تستاهلى اللى يجرالك هو هيلوى دراعك و لا ايه دا بدل ما يدخل عليكي بورد و هديه يراضيكي جاى يكسرك و يهددك اعلى ما فى خيله يركبه
امانى تهز راسها و تدخل الاوضه و تقفل الباب عليها
………………….
فى شقه نور
نور واقفه مع محمد فى البلكونه
نور / هو ده اللى اتفقنا عليه يعني
محمد / يعني عاجبك عمايلها
على يدخل
على / ما تعمليلنا شاى يا نونو
نور تبص لعلى و تدخل على يقف جنب محمد و محمد مضايق
على / روق دمك البيوت ياما بيحصل فيها
محمد / و انا جبت اخرى هو انا هفضل طول عمرى انا اللى ادادى و اراضي
على / ما انا قولت لحضرتك انها مش هتتراضي بسهوله لانها واخده على كدا
محمد / يعني انا الحق عليا انى بحافظ على البيت
على / عيالك مش صغيرين و كل واحد وقف على رجليه مفيش اى مبرر انك تكمل فى التنازل خصوصا انك كل ما بتتنازل اكتر كل ما هى مع احترامى بتسوق اكتر
محمد / طب اهو اديني سمعت كلامك و شديت و عدى تلت ساعات و لا حس و لا خبر
على / و لا حتى اسبوع هى نفسها اطول من نفسك بكتير و عارفه انك هترجع تصالحها تانى نور و حسام هيضغطوا عليك عشان تنزل من على ودانهم و هتفضل حضرتك الطرف الاضعف
محمد / طب و العمل
على / تتجوز
محمد / انت بتقول ايه يا على
على / كدا و كدا يعني مش بجد
نور تدخل تحط الشاى الاتنين يسكتوا نور تبصلهم باستغراب
محمد / ادخلى اقعدى مع الحجه بدل ما تحس بحاجه و تتحرج
نور تهز راسها و تبص لعلى و تدخل
محمد / يعني ايه كدا و كدا
على / يومين كدا ان ما جاتش و مش هتيجي هات نور و قولها انك قررت تتجوز و مدام طنط امانى مرتاحه بعيد انت ما عليكش ملام نور هتكلمها هتلاقيها جايه طيرااااان
محمد / ما هى هتيجي تقتلنى
على / فى ايه يا عمى ما تنشف كدا دا انت راجل البيت
محمد يلم نفسه و يبص لعلى
على / اهم حاجه مهما ضغطوا عليك ما تنخش لو نخيت المرادى زى كل مره هتفضل كدا طول عمرك لكن لو خدت موقف واحد حياتك هتتعدل طول عمرك
محمد / اجرب و امرى لله … بس افرض عندت بزياده
على / هتخرب بيتها يعنى هتسيبك تجيبلها ضره يعني ما فيش ست تعمل كدا
محمد / حماتك تعمل … دى مش بعيد تخلعنى و تشحطتنى فى المحاكم
على / تبقي مش باقيه عليك اصلا
محمد / و ساعتها اعمل ايه
على / هتعمل ايه يعني يا عمى هتبقي على واحده مش باقيه عليك
محمد / دى عشره عمرى كله يا على دى ام اولادى
على / خلاص روحلها تانى و راضيها
محمد / لا … ان ما كانتش باقيه عليا زى ما انا باقي عليها انا مش عاوزها
نور تدخل
نور / ايه يا جماعه هتفضلوا هنا لوحدكوا و لا ايه
محمد / انا هنزل اقعد مع اخويا شويه عن اذنكوا
محمد يمشي
نور / هو فى ايه
على / تعالى ندخل نقعد معاهم و بعدين نتكلم
نور / تمام تعال
على و نور يدخلوا جوه
……………….
فى شقه ندى
ندى بتتكلم فى التليفون مع أية
ندى / المهم الكتاب بيقول ان حياتنا عباره عن سلم كل سلمه بتوصلك للسلمه اللى بعديه لو مدوستش على السلمه المكسوره اللى فى النص مش هتقدر توصل للسلمه السليمه اللى فوقيها فقدامك حل من اتنين يا و انت بتدوس على السلمه المكسوره دى تكون قوى و متماسك و تركز تعديها يا هتتكعبل و تتكفى على بوزك و تاخد كل السلالم اللى طلعتها زحلقه بقي لحد ما تتماسك و تاخد موقف مع نفسك تبدا تقف على رجلك تانى و تكمل طلوع طبعا الكاتب مش كاتب الكلام ده بس انا بديكي زاتونه الكتاب و كدا
أية / حلو اوى و اهو ارحم من المنهج العقيم اللى عماله ازاكر انا فيه
ندى / لا زاكرى يا أية و اتعلمى عشان تقدرى تقفى على رجليكي و ما تحتاجيش لحد
أية / انا عندى ليكي خبر
ندى / لو وحش ما تقوليش ابوس ايدك انا مش ناقصه
أية / لا حلو او مش عارفه هيفرق معاكى فى ايه … انا بطلت الحبوب
ندى / سامحتيه يعني ؟
أية / مش عارفه بصي هو فى فرق انى اسامح و انى اعيش و اتعايش يعني انتى فاهمه
ندى / لا مش فاهمه
أية / اصل انا … انا ما ليش فى الدنيا الا عمر لا ليا اهل و لا اصحاب و لا اى حد و لا معايا شهاده و لا عندى املاك اتسند عليها و لا اى حاجه
ندى / فبتربطى نفسك بيه بطفل
أية / لا … انا مش بربط نفسي بيه انا بديلنا فرصه مع بعض هو عمل كل حاجه عمل كل اللى يقدر عليه ساب حلمه انه يبقي معيد ساب شغله فى الشركه اللى بيكسب منه دهب ساب غاده اللى كنت بغير منها و كانت اقربله من اى حد ساب مصر كلها و جه معايا هنا بيعاملنى كويس اوى و بيحاول يعوضنى و يرضيني هو يستاهل فرصه تانيه
ندى / طب ما تقولى انك بتحبيه بالرغم من زعلك منه
أية / و هو حب عادى يا ندى دا انا ما عرفتش غيره ما حبتش غيره ما ليش ذكريات مع غيره او حتى من غيره حاولت اتخيل انه .. مجرد فكره بعده عنى بتوجعنى بحبه حتى لو جرحنى … برده شوفت منه كتير حلو و لسه بشوف .. ما هو برده موقفه صعب و برده انه يرجعلى و يحاول يعوضنى مش سهله … كان ممكن ما يرجعش كان ممكن يسبنى اموت و ما يرجعش
ندى / معاكى حق
أية / كان ممكن ما يردنيش و يرميني فى الشارع ادفع تمن غلطه امى بس هو ما عملش كدا جالى و ندم و بيعوضني و على فكره هو ما ضغطش عليا فى اى حاجه دا قرارى انا
ندى / قرار صح ربنا يسعدكوا و يهنيكوا و يرزقكوا بالخلف الصالح
أية / يارب انا اصلي تعبت اوى من النكد تصدقى انى لحد النهرده ما اتعرفتش حتى على الجيران
ندى / احسن هتاخدى منهم ايه يعني ركزى فى مزاكرتك و مستقبلك و بس
أية / عمر بيقول كدا برده
ندى / و على بيقول ايه
أية / و على ماله بموضوع زى ده … اسكتى مش امه طلعت منهم
ندى / من ايه
أية / حربايه خرابه بيوت بس سهنه ما يبانش عليها بس حطت نور فى دماغها و ناوياهالها يا تطلقها يا تجبها ضره عشان حوار الخلفه
ندى / بس على مش هيسمحلها
أية / ايوه نور مدلعاه و وكلاله عقله بس الزن على الودان
ندى / نور طيبه و غلبانه و لو على باعها يخسر كتير
أية / من قلبك
ندى / يعني هو لو باعها هيكون ليا يعني هو لازم كلنا نعيش تعسا يعني ما ينفعش … يكون سعيد … حتى لو مع غيرى
أية / ربنا يخصلنا من حسام ده بقي هو ما بيموتش ليه ما تسميه
ندى / هههههههههههه و اخش السجن و حبيبه تعيش لا اب و لا ام حرام عليكي يا أية
أية / اووووف بقولك ايه انا هقفل و اروح اودى الاكل لعمر المحل هتعوزى حاجه ؟
ندى / ما اتحرمش .. يلا سلام
ندى تقفل و تطلع البلكونه تلاقي زياد بيكنس المنطقه قدام الكافيه تبصله باستغراب يشوفها يشاورلها باى تبتسم و تقعد تقرا كتاب و هو يكمل كنس و يدخل جوه
…………………….
فى شقه محمد بعد كام يوم
نور / انت بتهزر يا بابا يعني ايه تتجوز
محمد / و انا هفضل وحدانى طول عمرى
نور / طب و ماما
محمد / امك مش عوزانى اعملها ايه
نور / تراضيها يا بابا
محمد / راضيتها و ما ارتضتش مش هتحايل عليها
نور / و مين دى بقي ان شاء الله ست عروسه هانم
محمد / لسه ما قررتش هدور و اشوف و اقولك
نور / طب قولى على الاقل مواصفاتها
محمد / يعني طيبه و بنت حلال و حلوه مش مشكله السن تلاتين خمسه و تلاتين حاجه فى الرنج ده
نور / و جاى على نفسك كدا ليه ما اشوفلك واحده من صحباتى احسن
محمد / لا مش للدرجادى يعني
نور / انا طالعه يا بابا هتعوز حاجه
محمد / سلامتك
نور تطلع و هى بتفرك و محمد متابعها و مبتسم بخبث
…………………..
فى شقه ندى
حسام / يعنى ايه يتجوز هو فى ايه
امانى / انا بشهدك على ابوك اهو عشان ما حدش يلومنى
حسام / انا ليا كلام تانى معاه ما يصحش كدا هو فى ايه
امانى / اما نشوف يلا سلام
حسام يقفل و ينفخ ندى تدخل تديله مج نسكافيه
ندى / روق روق فى ايه لسه متخانقين
حسام / لا لا عدينا المرحله دى من زمان
ندى / الحمد لله
حسام / ابويا هيتجوز
ندى / هههههههههههههههههه
حسام / اضحكى اضحكى ما حقك تضحكى
ندى / بصراحه معاه حق
حسام / هو ايه اللى معاه حق يا ندى انتى هتنقطيني انتى كمان
ندى / ما هى بقالها قد ايه غضبانه و راحلها و كسفته و هو راجل و ليه احتياجات برده
حسام / كويس انك عارفه ان الرجاله بيبقي ليها احتياجات
ندى / طب ما انا قولتلك اتجوز هو انا منعتك
حسام / طب انتى عارفه بقي ان ربنا هيحاسبك على اللى بتعمليه معايا ده
ندى / ربنا مطلع علينا و عارف كل حاجه عارف حتى الحاجات اللى مش عرفاها و لا هعرف ادافع بيها عن نفسي لما يحاسبنى و بعدين ما كلنا هنتحاسب يعني و لا انت فاكر انى هتحاسب لوحدى
حسام / ابتدينا بقي
ندى / لا لا ما تخافش مش هفتح فى القديم بس بما انك بتجيب سيره ربنا و عارفه فلازم تعرف ان حتى لو انا و انت نسينا ربنا ما بينساش
حسام / ما تيجي نخرج
ندى / ياريت والله لبس حبيبه على ما اخد شاور فى السريع و اللبس
حسام / تمام
ندى تبتسم و تمشي و حسام باصصلها و مضايق
حسام / شكلك هتجبريني على حاجات تزعلنا كلنا بس ماشي
………………….
فى شقه تهانى
تهانى / اقطع دراعى من هنا هو انه بيهتك مش اكتر و اقولك حاجه الكلام ده مش من دماغه
امانى / دا نور ماكدالى حتى حسام كلمه و قاله نفس الكلام
تهانى / و من امتى القلب الجامد ده
امانى / استنى قصدك ايه بده مش كلامه
تهانى / يعني حد مقريه او مسخنه
امانى / و دا يطلع مين دا لا بيقعد على قهوه و لا له صحاب اخره زمايل الشغل سلام سلام
تهانى / شوفى انتى بقي
امانى / داهيه لتكون اتعينت معاه واحده جديده كلت عقله
تهانى / و لا تكون جاره الهنا زغللت عنيه
امانى / جاره مين ليلي
تهانى / و ليه لا هى مش ارمله
امانى / دا ما بيشوفهاش و ان شافها يبقي سلام سلام
تهانى / و انتى اش عرفك ما انتى سايبه البيت بقالك قد ايه تنزله لقمه و لا يطلع ياكل عند نور
امانى / داهيه تاخده اتاريه مسالش مره عنى من يوم ما جيت
تهانى / و لما جه كان مقلوب و ما صدق ادللتى عليه خد فى وشه و طار
امانى / لا و انا هسيبهولها كدا بالساهل دا انا هروح اطلع عينها
تهانى / لا الحاجات دى ما بتتاخدش كدا لازم تبقي هاديه بدل ما يلبسوكى الغلط
امانى / و هم لسه شافوا غلط دا انا هولع فيهم
امانى تقوم تدخل الاوضه و تهانى وراها تلاقيها بتلم حاجتها
تهانى / هتعملى ايه
امانى / هلم حاجتى و أروحلهم
تهانى / الصباح رباح
امانى / لا دا انا لازم اروح فجاه و اطب عليهم كداهو
تهانى / اعقلى يا امانى
امانى / هو خلى فيا عقل دا انا موعوده حتى الواد اللى فرحت بيه و قولت هيعوض البت راح جابلى امه ابن امه
تهانى / اعقلى لتخربى على البت
تهانى / ابقي كلميني
امانى / سلام
امانى تاخد حاجتها و تمشي تهانى تقفل الباب وراها
…………………..
فى شقه مصطفى
على / طب والله الواحد وحشته قاعده الرجاله اوى
محمد / و بتقولها قدامى
على / هتفتن عليا و لا ايه
محمد / هههههههههههه و ان فتنت نور ما بتسخنش
على / رينا يديمها عليها نعمه
… ……………..
- يتبع الفصل التالي اضغط على ( رواية سلف و دين ) اسم الرواية