رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثالث و الاربعون 43
على / انا قومت عشان ما اردش و نمسك فى بعض
نور / دا اخويا يا على
على / ابقي انزلى راضيه انتى
نور / و لا حتى عشان خاطرى
على / انا ما غلطتش فيه عشان اعتزر
نور / انت ضربته
على / كان يستاهل اكتر من كدا
نور / دا اخويا يا على
على / و انا مش مانعك عنه و دا فى الاول و الاخر بيتك يجى فى اى وقت و تنزليله فى اى وقت لكن انا … اكيد بتهرجى
نور / دا جارك و مسلم زيك ليه عليك حقوق
على / نور
نور / خلاص براحتك هو كدا كدا مسافر و على كلام ندى مش هتخليه ينزل مصر تانى فبراحتك بقي
على / و اه لو ما فيهاش قله زوق منى ياريت زى ما مامتك طلبت منك تلينيني ياريت تتكلمى معاها و تفهميها انها بتخسرنى لسه بدرى اوى على الخلافات دى و بالنسبالى الخلافات من النوعيه دى هى الاسوء
نور / و الله ماما طيبه جدا و بتحبك
على / نور حبيبتي نور مامتك على راسي بس مامتك … نور ممكن نغير الموضوع … بجد
نور / تمام … تحب اممم
على / هو احنا كنا كام كام
نور تضحك و تبص فى الارض على يقوم يحضنها و يبوس راسها
…………………..
تانى يوم فى شقه ندى
ندى بتلبس حبيبه نور تدخل
نور / صباح الخير
ندى / اهلا … صباح النور ازيك
نور / سمعت الخبر و ما صدقتش
ندى / كانت فكره حسام فاضل يومين على السفر هنقضيهم فى السخنه تغير جو
نور / فرحت عشانك بس انتى مش تعبانه و الافضل ترتاحى
ندى / دى ساعه بالعربيه و بعدين
نور / هترجعوا هنا تانى نسلم عليكوا قبل السفر
ندى / هتفرق فى ايه النهارده من بكره و بعدين ما انتى هتسافرى انتى كمان يعنى المفروض تجهزى حاجتك
نور / انتى زعلانه منى يا ندى
ندى / ابدا … ليه بتقولى كدا … بقولك ايه طمنيني عليكي عامله ايه مع جوزك مبسوطين
نور / الحمد لله
ندى / الحمد لله
حسام يدخل
حسام / نزلت الشن … ازيك يا نور
نور / الحمد لله
حسام / صحيح … كويس انى افتكرت انا كلمت المركز و هيبعتوا ممرض مقيم مع عمى انا عاوزك تتابعيه مع بابا مش عاوز عمى يبقي ناقصه اى حاجه و احنا مسافرين
نور / ما انا قولتلك انى هاخده عندى انا و على متفقين على كدا
ندى / حبيبه جاهزه … هستاذنكوا اجهز انا كمان عشان ما نتاخرش
حسام يشيل حبيبه و شنطتها
حسام / خدى راحتك تعالى يا نور
نور تبص على ندى مدياها ضهرها تطلع بره و حسام وراها محمد و امانى و مصطفى قاعدين فى الصاله
امانى / ما تفكر تانى يا ابنى لزمتها ايه السخنه و المصاريف دى
حسام / خلاص بقي يا ماما
امانى / طب على الاقل نشبع منك
حسام / ايه يا ماما هو انا اول مره اسافر
محمد / تروحوا و ترجعوا بالسلامه
حسام / انا مليت التلاجه و راجعت دوا عمى و ان شاء الله يا بابا هبعتلك مبلغ كل شهر لاى مصاريف
نور / ما تشغلش بالك الصيدليه شغاله الحمد لله
امانى / يا اختى يبعت ارحم ما تبعزقهم ست الحسن هى فارق معاها حاجه
على يخبط على الباب مفتوح حسام يبصله
حسام / اهلا اهلا اتفضل واقف عندك كدا ليه ادخل
على / بما انكوا مسافرين قولت انزل اسلم عليكوا
حسام / خير ما عملت … اسمع لو احتجت اى حاجه
على يقاطعه
على / تحب اوصلك
حسام / شكرا بس انا هاخد عربيتي لحد ما نسافر و ما تقلقش يا بابا اتفقت مع واحد حبيبي هيقابلنى عند المطار يوم السفر يرجعهالك
نور / طب ما نقابلك فى المطار نسلم عليكوا
حسام / ما لوش لزمه تعبكوا بس طبعا براحتكوا بس ابوس ايديكوا بلاش شغل العياط بتاع كل مره ده
ندى تطلع من جوه
ندى / انا جاهزه
ندى تروح توطى تحت رجلين ابوها
ندى / هتوحشنى هبقي اكلمك فيديو كول علاطول
مصطفى يبصلها بحزن
حسام / يلا يا نونو
محمد / مستعجل على ايه يا اخى
حسام / نلحق نوصل فى النور يا بابا
نور تروح تحضن ندى
نور / هجيلكوا المطار
ندى / زى ما تحبى عن اذنك
ندى تمشي من غير ما تبص لعلى و عينه معاها
محمد / تساعدنى يا على ننزل عمك تحت
امانى / ما تصبر تلاقى بتاع المركز اللى حسام باعته فى الطريق بدل ما تنزله و تطلعه
محمد / طيب … هدخل مصطفى يفرد ضهره لو تحبى تنزلى انزلى
امانى / نازله … ايه يا ولاد ناويين تخرجوا شويه و لا هتطلعوا شقتكوا
على / هنخرج
نور تبص لعلى
على / عن اذنكوا اجيب مفاتيح العربيه
على يطلع نور تبص لامانى و تطلع وراه
…………………….
فى شقه عمر
أية قاعده بتزاكر عمر يفتح الباب و يدخل شايل حاجات كتير أية تقوم تاخد منه
أية / ايه دا كله
عمر / عيد ميلاد قلبي مش بيجي كل يوم
أية تبتسم عمر يطلع علبه تورته من كيس كبير و يفتحها و أيه بتلم الكتب فى جنب
عمر / فى شمعه حلوه اوى فى الكيس
أية تفتح الكيس و تطلع شمعه على شكل حرف Aتحطها فى التورته
عمر / هروح اجيب كبريت من جوه كل سنه و انتى طيبه
عمر يبوس راسها و يدخل و أية عينها على التورته
//////////////////
فى شقه عمر زمان
أية بتعيط و سمر بتطبطب عليها
سمر / يعني خليتك تعزمى كل صحباتك و برده بتعيطي مش ده اللى كنتى عوزاه و بتعيطي عشانه كل سنه دلوقت عشان سي عمر مش موجود مش عاجبك
أية / اول عيد ميلاد ليا ما يحضروش
سمر / يا اختى بلا وكسه ربنا رحمك
أية / رحمنى !! دا اسوء عيد ميلاد فى الدنيا
سمر / و الله لو قيدتك صوابعى العشره شمع ما هيطمر فيكي انا الغلطانه انى بطيب خاطرك دا انا دفعت مصروف شهر كامل فى العيد ميلاد اللى مش عاجبك ده
أية / انا هقول لبابا الحقيقه هخليه يرجع عمر
سمر / قوليله عشان نبقي فى الشارع مع عمر عمر خلاص بح راح و حط ايده فى ايد على و ابوكى كرهه قوليله اننا كمان وحشين يمكن لما تجربى نوم الارصفه تحمدى ربنا على النعمه اللى انتى فيها … دا خلفه ايه دى بس يا ربى
/////////////
عمر يطلع من المطبخ و يقيد الشمعه و يروح يطفى النور أية تبصله و تبتسم
عمر / هابى بيرث داى تو يو هابى بيرث داى تو يو .. هو انا هغنى لوحدى و لا ايه
أية تهف الشمعه عمر يروح يقيد النور
عمر / أية يا هادمه الملزات انا لسه كنت هقول حيو ابو الفصاد
أية تحضن عمر اوى
أية / انا بحبك اوى يا عمر
عمر / و انا كمان يا يويو والله .. بصي بقي انا جبت معايا كيلو كباب و كفته ناكل الاول و بعدين نبقي نحلى بالتورته
أية / تمام
عمر يفتح كيس فى جنب و يطلع طبق ملفوف فى فويل و عيش و سلطات و يشد كرسي و يقعد أية تقعد و ياكلوا
عمر / فكرت اكلم على بس خوفت وجود نور يعكنن عليكي
جرس الباب يضرب
عمر / دا مين اللى حماته بتحبه ده خشي خشي اما اشوف مين
أية تدخل ورا الستاره و عمر يفتح يلاقي واحد شايل ورد
الراجل / استاذ عمر حقى
عمر / اؤمر
الراجل / الورد ده عشان خاطر حضرتك … تمضيلى هنا بعد اذنك
عمر ياخد الورد و يمضي الراجل يمشي أية تطلع و عمر يقفل الباب و يروح يحطه على الترابيزه و يبص فى الكارت
أية / من مين ده
عمر / دا مش ليا دا ليكي
عمر يناول أية الكارت تبتسم
عمر / على بيقولك كل سنه و انتى طيبه
أية تقعد
أية / كلمه لو يحب يجي
عمر / دا الورد ليه تاثير جامد بقي
أية / كلمه
عمر يقوم يبوس راسها و يجرى يجيب الموبايل
………………….
فى الملاهى
على / انتى ما تعبتيش
نور / لتكون عاوز تروح
على / الصراحه لا مش عاوز اروح بس بجد مش قادر اللعب اكتر من كدا تعالى نقعد نريح و نشرب اى حاجه
نور / تمام تعال
على و نور يروحوا يقعدوا فى كافيه على ترابيزه
نور / على فكره انا كمان زعلانه اوى انهم سافروا
على / ايه !!
نور / حبيبه هتقطع بيا اوى كانت كبرت و بدات تتفاعل معانا و شويه شويه هتبدا تتكلم و تمشي احنا مش هنعيش معاها ده
على / اه
نور / بس انا هروحلها المطار اسلم عليهم مع ان ده هيجدد عليا وجع الفراق تانى
على / بس اهون من ندم انك ما تروحيش
نور / معاك حق
على تليفونه يرن
على / دا عمر اكيد استلم الورد
نور / ورد ايه ؟
على يرد
على / يا مساء الهابى بيرث داى يا معلم
عمر / طفينا الشمع بس من غير دمع يا حبيبي تحب تيجي
على / معايا نور
عمر / و ماله يا عم بيت اختها و تيجي فى اى وقت
على يبص لنور
على / النهرده عيد ميلاد أية تحبى نروحلها
نور / بجد !!! كل سنه و هى طيبه طبعا احب يلا
نور تقوم تقف على يقف مبتسم
على / مسافه السكه
عمر / قشطه هستناك بقي مش هتعشي من غيرك
على / تمام سلام
على يقفل
نور / كان المفروض تقولى على فكره
على / صدقيني دماغى النهرده ما كانتش فيا خالص … تعرفى انى حاجزلها بوكيه ورد من اسبوعين فاتوا خفت انسي او اتاخد فى الزحمه و سبحان الله نفعت اهى
نور / بس لما كلمك كنت فاكر قولتله هابى بيرث داى
على / اصل بتاع الورد كلمنى من شويه و انتى بتلعبى التليفون اللى جالى ده قالى ان الاوردر اتسلم
نور / ههههههههههههه انا كنت فكراه شغل تبع المحل
على يفتح العربيه لنور
نور / تفتكر اجبلها هديه ايه
على / فكرت كتير اخر ما زهقت جبت ورد
نور / شيكولاته ؟
على / عنيا
نور تركب و على يقفل الباب و يروح يركب
…………………
فى شقه حسام
محمد قاعد جنب مصطفى الباب يخبط محمد يقوم يفتح يلاقى امانى
امانى / انت هتبات هنا و لا ايه هو مش الراجل جه
محمد / هسيبه لوحده يعني معاه من اول يوم مش اعرفه مكان الحاجه و اتابعه و اشوف الدنيا هتمشي ازاى
امانى / براحتك اياكش تبات هنا حتى انا نازله
امانى تنزل محمد يقفل الباب
……………………
فى الفندق
حسام / احلى فيو حاجه كدا ترد الروح
ندى / و الاوضه حلوه اوى كمان كل حاجه هنا حلوه فعلا
حسام / عشان تعرفى بحبك قد ايه
ندى / تصدقنى لو قولتلك ان بابا وحشني اوى
حسام / ايه يا نونو احنا لسه ما سافرناش
ندى / هو ما لوش حد و ظروفه انت عارفها
حسام / سامحتيه يعني
ندى / لا … ما سامحتوش … بس فى الاول و الاخر ابويا و دلوقت محتاجنى اكتر من اى وقت تانى و مع كدا اتخليت عنه
حسام / فكراله الحاجات الحلوه اللى عملهالك
ندى / كلها ما افتكرش ان فى اب دلع بنته و حبها زى ما بابا كان بيعمل
حسام / يعني مصدقه انه عمل كدا من حبه فيكي
ندى / عادى ما الدبه قتلت صاحبها من حبها فيه
حسام / انتى بس لو تبصي للدنيا من ناحيتنا احنا هتفهمى والله
ندى / انت اللى عمرك ما هتفهم
حسام / انتى صغيره يا نونو لسه بيبي ما تفهميش الدنيا اوى انا و عمى و مامتك لما عملنا كدا
ندى / خلاص يا حسام ما فيش فايده من الكلام فى اللى فات
حسام / انتى ام يا ندى ام و عارفه ان الام عمرها ما تاذي بنتها انتى الحياه بكره هتحكم عليكي تاخدى قارارات فى مصلحه حبيبه هى وقتها مش هتشوفها مناسبه هتجبريها تزاكر مثلا تاخد حقن حاجات فى مصلحتها لكن هى وقتها لانها بيبي مش هتفهم ده زى بالظبط ما انتى لسه مش فاهمه
ندى / يعني هيجي عليا وقت وارتاح
حسام / اكيد و كل ما فهمتى ده اسرع كل ما ارتاحتى اسرع
ندى / يمكن
حسام / و بعدين انتى ليه مش مقتنعه بالنصيب هو مين اللى بيحط النصيب ده مش ربنا مش يمكن ليه حكمه اننا نبقي سوا
ندى / انت بتقول ايه
حسام / عسى ان تكرهوا شيئا و هو خير لكم
ندى / انا هقوم اخد دوش عشان … عن اذنك
ندى تقوم تدخل الحمام و تقفل الباب و حسام يبص لحبيبه نايمه فى سرير بيبي
حسام / اعمل ايه فى امك دى … جربت معاها كل حاجه و برده غبيه
حسام يقوم يغير هدومه
…………………
فى شقه عمر
نور / والله لو كان قالى من بدرى كنت عملت حسابى طبعا
عمر / انا اللى مستغرب انكوا خرجتوا بالسرعه دى
على / ليه يعني هنقضي الاسبوع كله فى البيت يعني و لا ايه
أية / اخبار ندى ايه
على الابتسامه تروح من وشه و عينه لسه على عمر
نور / سافرت النهرده السخنه
أية / السخنه !!! هى مش مسافره لبنان كمان يومين
نور / انتى عارفه ندى بقي
عمر / هقوم اعمل شاى حد عاوز
أية / خليك انا هعمل
عمر يبتسملها أية تقوم و تدخل على يوطى على نور
على / تعزمى بمساعده؟
نور / انا هقوم اساعدها
نور تقوم تدخل ورا أية عمر ينط جنب على
عمر / فى ايه احكى
على يبص على الترقه
على / يوم الفرح حسام ضرب ندى علقه موت
عمر / ابن الكلب
على / فى الدربكه ما روحتش معها المستشفي حبيبه كانت بتصرخ على اخرها عمى مصطفى كان فى الارض المهم انهم مخلوهاش تتهم حسام بحاجه و طبعا عشان يغطى خدها على السخنه
عمر / ابن الكلب
على / و لا امه … لا امه … بقيت ببصلها بس كفايا ان ضغطى يضرب فى نافوخى انا بجد مش عارف انا بعمل ايه هناك
عمر / باين عليها من الاول على فكره سيبك انت … نور عامله معاك ايه
على يبتسم عمر يبتسم و على مش عارف يجمع يتكلم
عمر / شكل فى حاجه حلوه اخيرا فى الجوازه
على / نور فهمانى اوى عارفه ايه اللى ناقصنى و بتكمله معاها برجع عيل صغير تحكيلى حواديت تلعب معايا بنسي كل اللى فات برجع عيل صغير بجد
عمر / جميل
على الابتسامه تروح من وشه
على / و بفوق لما بقابل ندى
عمر يتنهد
على / باكتشف انى بخونها قدام عنيها بحس بوجعها بفهم و بتوجع اكتر لما باكتشف انى كمان بخون نور و كل ما بتحبنى اكتر بتوجع اكتر لانها ما تستاهلش تنجرح
عمر / يبقي ما تجرحاش انت مش من الاول قولت هتتقى ربنا فيها و اهى ندى سافرت و نور بتحبك و بتعوضك عيش يا على حبها مع الوقت و العشره هتحبها
على / تفتكر
عمر / ما حدش عارف ايه اللى هيحصل بكره بس ليه لا
على / و ندى ؟
عمر / حاول تنساها ما كانتش مكتوبالك من الاول يا على
على يبص فى الارض أية و نور يدخلوا
عمر / يا سلام و الله فى وقتها تسلم الايادى
نور تقعد جنب على يبتسملها و أية متبعاهم و مضايقه
…………………..
فى اوضه عمر
أية / بالسرعه دى نسى ندى
عمر / ايه اللى خلاكى تقولى كدا بس
أية / ما شوفتش بيضحكلها ازاى بيبصلها ازاى هو انت ممكن تبص لواحده غيرى كدا
عمر / ههههههههههه يا قلبي الموضوع مش كدا خالص
أية / امال ازاى بس
عمر / هو على هيعيش عمره كله من غير جواز نور بتحبه و على كلامه عارفه تلاقى السكه اللى تدخل لقلبه بيها
نور / و ندى
عمر / ندى على زمه راجل تانى و ما ينفعش على يفكر فيها حتى
أية / بالبساطه دى
عمر / ربنا خلق الراجل ممكن يحب اكتر من واحده
أية تبصله باستغراب
عمر / و الا ما كانش حلل التعدد بس هى الفكره انه ما يقدرش يحبهم زى بعض عشان كدا ربنا قال و لن تعدلوا فهمتى
أية / بحاول
عمر / انتى صغيره لسه بكره لما تكبرى هتلاقى نظرتك لكل حاجه اختلفت
أية / انت بتحبنى يا عمر
عمر / اكيد طبعا و لعلمك لا عمرى حبيت و لا هحب واحده قدك
أية / بس ممكن تحب غيرى مش شرط قدى بس ممكن تحب
عمر / ما افتكرش
أية / ما انت لسه قايل ربنا خلقكوا كدا
عمر / ما هو مش كل الحالات زى بعض انا عشان احب غيرك لازم الاول عيني تشوفهم و انا لحد اللحظه دى مش قادر اشوف غيرك
أية / و بكره و بعده و المستقبل
عمر / طول ما انتى جنبى عمرى ما هقدر اشوف غيرك
أية / وعد
عمر / وعد
عمر ياخد أية فى حضنه و يبوس راسها
………………….
فى اوضه نور
نور قاعده قدام المرايه بتسرح شعرها على يدخل
نور / ها اطمنت بنفسك
على / اه نايم و كل حاجه تمام … برده الجدع اللى تحت لازم يشوفنا طالعين نازلين عشان يفوق لنفسه و ما يكسلش
نور / معاك حق
على يبوس راسها و يروح يقعد على السرير و يمسك الموبايل يظبط منبه نور تروح تقعد جنبه
نور / وراك حاجه بكره باين
على / اه هخطف بصه على الشغل بقالى ياما متقل على احمد و لسه لما نسافر كمان
نور / تمام بس بليز ما تتاخرش
على / لا ان شاء الله علاطول و لو تحبى تيجي معايا
نور / احب اوى جدا على فكره
على / هههههههههههه تمام هصحيكي معايا مع انى كنت ناوى اسيبك ترتاحى
نور / حبيبي انت … صحيح يا على
على / خير
نور / هو انت لما وزعتنى اساعد أية
على / ههههههههههه
نور / ايه فاكرنى ما فهمتش
على / كنا بنتكلم عنك على فكره
نور / امممممم خير بقي و لا
على / ما شوفتش منك غير كل خير يا نور
نور تبتسم بخجل و تبصله
على / صحيح حد كلم حسام يطمن عليهم
نور / بابا كلمهم وصلوا و زمانهم نايمين دلوقت
على / اكيد طبعا الوقت اتاخر جدا
نور / تحب اقرالك حدوته جديده قبل ما تنام
على / لا النهرده انا اللى هحكى دا انا معبى حكاوى
نور / هههههههههههههههههه
…………………
فى اوضه ندى
حسام نايم ندى واقفه فى التراس تبص على النجوم
//////////
ندى / انا ليه بيحصل معايا كدا طب انا غلطت فى ايه عشان اتعذب بالشكل ده طب ليه هو قادر يكمل مع نور و انا لا مش يمكن حسام معاه حق … بس انا ما بحبوش … بكرهه … بس هو عمل كل ده عشانى على عمل ايه راح اتجوز قدامى … قهرنى … انا ضعيفه اوى وحيده اوى … انا عملت ايه غلط عملت ايه استاهل عشانه كل ده … طب عزابى له اخر … هيطلع عليا نهار افوق فيه … هيطلع عليا نهار اقدر اتنفس فيه … طب انا ما ليش نصيب فى على ليه خلتنى احبه ليه علقت قلبي بيه ليه لسه متعلقه بيه ليه مش قادره اعيش
ندى تمسح دموعها و تبص على حسام نايم جوه
ندى / يعني كل الستات يعني متجوزين رجاله بيحبوهم ما يمكن … طب هم ازاى قادرين … معقول هم اقوى منى … عشان عيالهم طب ما انا عشان حبيبه برده … اجرب ؟؟؟ ما انا جربت … ما قدرتش كنت بموت روحى بتطلع جسمى بيتحرق مكان ما بيلمسنى …. ما انا لازم اعيش انا كدا بموت بالبطئ لا منى بعيش و اربى بنتى و لا منى مت و ارتحت … اخره عذابى ايه … بستحمل ليه لو ما قدرتش فى الاخر اوفر لبنتى الجو الصح اللى تتربى فيه … ما لهاش غيرى … ماما و بابا كانوا عايشين مع بعض عشانى … كان بيخونها و يضربها و تسكت عشانى … مش هقدر يعني استحمل عشان بنتى …. طب مهم كانوا سبب فى عذابى … هم السبب فى كل اللى انا فيه … و ماتت و سابتنى برده و اتانى عاجز انه يحميني او يحمى بنتى
ندى تقعد فى الارض
ندى / اعمل ايه يارب اعمل ايه انا تعبانه
/////////////
حسام يقلق يبص جنبه ندى مش موجوده يقوم يبص عليها يلاقيها بتعيط فى الارض فى البلكونه يجرى يقعد جنبها و يحضنها
حسام / مالك يا ندى مالك بتعيطي كدا ليه
ندى / انا تعبانه اوى تعبانه اوى
حسام / ايه بيوجعك ؟ نروح مستشفى ؟ قومى نروح مستشفي قومى
حسام يقوم و هو ماسك ايدها تبصله
حسام / مش قادره تقومى ؟ اشيلك ؟
ندى تهز راسها لا و تبص فى الارض يقعد قدامها
حسام / لسه برده يا ندى
ندى تبصله حسام يجز على سنانه مع ابتسامه استهزاء
حسام / تمام … تمام
ندى / مش زى ما انت فاكر
حسام / لا لا لا براحتك انا مش هضغط عليكي تانى
حسام يجي يقوم ندى تمسك ايده يقعد و اللهفه ماليه عنيه
ندى / انا عاوزه اجرب معاك
حسام يرتبك و يبلع ريقه و يحاول يمسك اعصابه
حسام / تجربى !! تجربى ايه بالظبط ؟
ندى / انى اعيش … اننا نبقي زوج و زوجه بجد
حسام / بتتكلمى جد يا ندى ؟ … لا زى كل مره هتعشمينى و تسبيني و تجرى على الحمام مش قادره مش قادره مش كدا
ندى تبص فى الارض حسام يقعد جنبها
ندى / غصب عنى انا مش زيكوا
حسام يبصلها
ندى / انت و على … انتوا ما تفرقوش عن بعض .. حتى انت ما بتحبنيش اوى زى ما بتقول ما انت عرفت غيرى رميتني و ما بكيتش عليا ثانيه زيه بالظبط
حسام يبصلها
حسام / جوازى من رؤى كان
ندى / لا لا مش جوازك ارجع ورا شويه ارجع لاول مره تحط ايدك عليها كان بقالى قد ايه بعيد عنك كام يوم
حسام / انتى ماسكه فى اخطائي و ناسيه عمايلك
ندى / عملت ايه انا يا حسام
حسام / مكالماتك لحبيب القلب جواباتك
ندى / انت هتكدب الكدبه و تصدقها انا كنت بفضفض مع نفسي و بقطعها و ارميها
ندى تدخل الاوضه حسام يدخل وراها و يمسك ايدها
حسام / انا اسف بلاش نتكلم فى اللى فات تعالى نحاول مره اتنين تلاته هصبر هحاول معاكى اكيد فى مره هتقدرى مره فى مره هتقدرى
ندى / لو كنت بصيت وراك مره واحده كنت شوفتنى فى الارض لو كنت بصيت وراك مره واحده كنت لحقتنى كان هيبقي عندنا فرصه نخاوى حبيبه كنت بص عليا مره واحده
حسام / عصبيتي كانت عميانى و شيطانى راكبنى فكرانى مش ندمان ندمان و الندم قاتلنى ندمان على كل حاجه كان فى مليون طريقه انا ما كنتش مخطط لكل ده كنت فاكر عمى هيبعد على عنك ما كنتش مخطط انه يجوزنا لما قالى وافقت كنت مقرر ما ندخلش بس لما بقيتي قدامى … انا بشر كان غصب عنى ما قدرتش امنع نفسي صدقيني ندمان على كل ده بس كان غصب عنى و الله غصب عنى
ندى تبص فى الارض و تهز راسها و هى بتعيط
حسام / انا مستعد اعمل اى حاجه عشان تحبيني اى حاجه عشان بس .. تحسي بيا مره … كل اللى محتاجه مره … ساعتها هتحسي و تفهمى
ندى تبصله حسام يمسح دموعها
حسام/ لو لفيتي الدنيا كلها مش هتلاقى حد بيحبك قدى
ندى / انا داخله الحمام عن اذنك
ندى تبعد عن حسام و تروح الحمام و تقفل الباب و تقعد وراه و تمسح وشها و تغمض و تتنهد
………………..
فى المحل عند على
على يركن العربيه
على / ادخلى المكتب و انا هلف لفه و احصلك
نور / تمام
على و نور ينزلوا من العربيه
احمد / رياسه رجع يا رجاله
على / ايه الاخبار
نور تدخل جوه و الشباب يتجمعوا حوالين على
على / تسلموا يا شباب كل واحد على شغله
الشباب يتوزعوا
احمد / نورت محلك يا رياسه
على / منور بصحابه اخبار الدنيا ايه
احمد / والله تمام ما فيش اى حاجه
على / الحمد لله البركه فيك طبعا جاى عليك جامد انا عارف
احمد / ما تقولش كدا احنا اخوات
على / تسلم
احمد / ايه نوجب مع ست الكل فى المكتب و لا ايه
على / كفايا ساقع و لا اقولك اتنين قهوه مظبوط
احمد / ايوه يا عم فطرتك فى البيت قبل ما تنزل
على / قول زغطتك هههههههههه وسع وسع
احمد / الله يسهلوا يا عم مش قادر انت على البعاد
على / حتى الحاجات دى فيها نق
احمد/ هههههههههههههه خلاص يا عم عدى عدى
على يضرب كف على كف و يدخل يلاقي نور بتبص فى دفتر
على / اتاخرت عليكي … بتعملى ايه
نور / فواتير توريد اللحمه
على يروح يبص
على / احسن و انضف حاجه فى السوق
نور / خدت بالى
على / هراجع شويه حاجات بسرعه عشان نمشي
نور / تمام
نور تقعد فى جنب و على يبص فى الورق
نور / انت عارف ايه الغريب فى الموضوع
على يبصلها
نور / انت عارف انا جيت بيت عمى هنا كام مره من يوم ما سكنوا ؟ مش قادره اتخيل اننا ما اتقابلناش
على / و هى قمر زيك هتبص لواد بتاع شاورما زى ليه
نور / لا ما افتكرش … يمكن لو كنت سينجل وقتها كنت بصيت و بعدين ما انا كمان عديت كتير و ما لفتش انتباهك مره يعني
على / ما كنتش فايق وقتها ارفع عيني حتى سبحان المذل المعز
على يبص المكان و يشاور على الباب
على / كنت بفرش كارتونه بره هنا و انام كنت احلم وقتها ان المكان ده يبقي بتاعى … طب انا عملت ايه استاهل عشانه حاجه زى دى
نور / العوض ساعات بيفاجئك
على يهز راسه و يبص لنور
على / احلى عوض
نور تبتسم
نور / احلى عوض … احم انا شكلى معطلاك
على / انا بقول انى اجازه نروح احسن
نور / ههههههههههههههه
احمد يدخل شايل صينيه عليها كبايتين قهوه نور تتعدل احمد يخبط
احمد / لا مؤاخذه … احم القهوه
على / تشكر يا ابو حميد
احمد / ما اجبش حاجه حلوه حادقه اى واجب
نور / ميرسي
احمد / اللى تشوفوه … ان عوزتنى انا بره
على / ما اتحرمش
احمد يهز راسه و يطلع على يبص لنور و يبتسم نور تروحله تاخد فنجان القهوه تاخد بق
نور / نشرب القهوه و بعدين نبقي نقوم
نور تروح تقعد مكانها و على متابعها و مبتسم
……………………..
فى اوضه ندى
ندى نايمه و حسام واقف عند سرير حبيبه بيغيرلها
حسام / مين بقت نضيفه … مين ريحتها بقت حلوه … مين هتخلى عندها دم بقي و تقول بابا
حسام يجرب الببرونه على ايده يلاقيها مناسبه
حسام / مين جعانه تاكل مم
حسام يشيلها و يطلع البلكونه يقعد يرضعها
حسام / بكره تكبرى و يقولولك ابوكى عمل و سوى و خلى ابوكى رماكى فى الصحرا و انتى حته لحمه حمره بكره يعملوا كل اللى هيقدروا عليه عشان ياخدوكى منى انتى كمان … بس على مين انتى قلب بابا ما حدش هيقدر ياخدك من حضنى ابدا
ندى تدخل
ندى / ايه مش هتجوزها
حسام / صباح العسل نمتى كويس
ندى / الحمد لله و انت
حسام / و لا شوفته يا اختى من ساعه ما قلقت و انا صاحى
ندى / ليه
حسام / بفكر فى اللى قولتيه امبارح انك عاوزه تجربى معايا
ندى / ايوه
حسام / ايوه ايه
ندى / انا هطلب فطار انا جعانه اطلبلك حاجه معينه
حسام يبتسم
حسام / هاتيلى زيك
ندى / تمام .. سميلها
حسام يبتسم و يبص لحبيبه ندى تدخل جوه حسام يوشوش حبيبه
حسام / النهرده عاوزه بكره تقدر و ادينا بندردرش ورانا ايه ورانا ايه … نرضع و ننام عاوزين نبقي مؤدبين اتفقنا
حسام يكمل رضاعه حبيبه
…………………………..
فى شقه امانى
تهانى قاعده
امانى / والله ما كنت اعرف انهم هيخرجوا النهرده كمان
تهانى / ملحوقه ابقي اجيلهم فى وقت تانى
امانى / وقت تانى ايه دا انا ما صدقت انك جيتي اخبار اروى ايه
تهانى / اهى على حطه ايدك قافله على نفسها اوضتها
امانى / مش كنتى جبتيها معاكى يا تهانى
تهانى / الا اخبار ابنك الحيله ايه لسه مراته ممشياه
امانى / فشر دا لسه مديها حته علقه ممشياها على عجين ما يلخبطوش
تهانى / لا يا شيخه
امانى / زى ما بقولك لو ما كانوش حاشوه عنها كانت ماتت فى ايده
تهانى تبص الناحيه التانيه امانى تتنهد
امانى/ جننته خرجته عن شعوره كان هيموتها و يودى روحه فى داهيه
تهانى / كان طلقها و خلص بس نقول ايه سحراله
باب الشقه يتفتح و نور تدخل و وراها على شايل بيتزات يحطها على السفره و نور تسلم على عمتها
نور / وحشتيني جدا و زعلانه منك موت
تهانى / كان على عيني و الا انتى عارفه غلاوتك … ازيك يا عريس
على / الحمد لله ازى حضرتك … احنا جبنا بيتزا لو تحبوا تاكلوا و هى سخنه … هستاذنكوا اطلع اغير عشان عرقان و كدا
امانى / على ما تنزل نكون حطينا الاكل
على يهز راسه و يطلع
تهانى / شكله جدع طيب و ابن حلال
امانى / و الله احترت فيه
نور / ماما
امانى / ايه … اشهدك يا تهانى فى واحد يسيب مراته يوم دخلته لوحدها
نور / ماما
تهانى / ازاى ده
امانى / لا دا مسك فى حسام و ضربه كان مجنون و لا الطور الهايج
تهانى / لتكون بنت الجزمه سحرتله هو كمان
نور / بتتكلمى عن مين يا عمتى
امانى / يا لاهوى يا تهانى ليكون بصحيح … طب والله صحيح … شوفتيش يا نور حاله اتعدل ازاى لما ندى سافرت عقده سحرها اتفكت
نور / دا كلام برده
تهانى / قادره و تعملها
نور / انا هستاذنكوا عشان راجعه تعبانه
نور تروح ناحيه الباب و ترجع تاخد بيتزايه و تطلع
امانى / شايفه اتحمقت عشانها ازاى
تهانى / سحرالها هى كمان
امانى / الحمد لله انى عارفه ربنا و الا كانت عرفت تسحرنى انا كمان
تهانى / لا يا امانى لازم تشوفى شيخ و لا حاجه اللى بيحصل معاكوا كتير
امانى / عندك حق والله
………………….
فى شقه نور
على و نور بياكلوا
نور / ههههههههههههههههههه يعني ما كنتش هتنزل اصلا
على / لو اتزنقت اوى كنت هعمل اى حجه و اخلع
نور / مجرم
على / انا اه ما احتكتش بعمتك بس سمعتها سبقاها هتقعد طول القاعده تقطع فى فروه ندى
نور تبص فى الاكل
على / انهى اخت دى اللى تيجي على اخوها كدا ما فكرتش حتى تبص عليه حتى فى وضعه ده
نور تمسك ايد على يبصلها
على / المفروض نعملك دى ان ايه انتى ما ينفعش تبقي من العيله دى
نور / ههههههههههههههه انت بتقول ايه
على / باباكى كمان طيب سلبي بس طيب
نور / انت شايف ان بابا سلبي
على / اممممم انا اسف انا
نور / و ماما يا على ؟ شايفها ازاى
على يتنهد و يبتسم لنور بخجل
نور / انت طلبت منى ما اتكلمش عن مروان بس طنط ما كانتش حلوه اوى معايا
نور تبص فى الاكل
نور / مع اننا لما اطلقنا كانت بتعاملنى حلو جدا و قبل الجواز كانت بتعاملنى حلو جدا يمكن لو كانت مامتك عايشه كنت هتفهم
على / و انتى مين قالك ان مامتى ميته
نور تبصله باستغراب
نور / هى ؟؟
على / انا شخصيا ما اعرفش انا اخر مره كانت فى دفنه عبير الله يرحمها
نور / انت بتتكلم جد يا على … ما سالتش على مامتك من ساعتها
على / ما كنتش طايقها يوميها … مهما حكيت مش هتفهى احساسي … لما تبقي سبتى كل حاجه حلمتى بيها عشان حد و ياخدوه منك فجاه
على يسيب الاكل و يقوم نور تقوم وراه يدخل الاوضه
نور / انت فاكرها ما اتوجعتش زيك دى بنتها
على / مين اللى باع عياله عشان الكلب ده مش هى
نور / دى برده امك و بعدين مين اللى خلى عبير تعيش مع جوز مامتها مش باباك
على / و هو انا كنت عشت مع ابويا يعني ما انا
نور / دى امك
على / باعتنى و انا حته لحمه حمرا فضلت راجل غريب على عيالها
نور / اكيد كانت بتحبه … و بعدين انت قولتلى ان مامه عمر كانت كويسه معاكوا اكيد عشان كدا كانت مطمنه عليكوا و كمان انت قولتلى انكوا لما روحتولها نزلت اشتغلت عشان تجيب مصاريفكوا
على / مصاريفنا
نور / لا يكلف الله نفس الا وسعها
على / انتى بتدافعى عنها ليه انتى ما تعرفيهاش ما تبصى لندى شوفى عندها كام سنه و اختارت بنتها عن اللى بتحبه
نور / مهما عملت هتفضل امك و هتفضل مجبر تبرها … عشان ربنا على الأقل … باباك الله يرحمه استسهل انه يلومك على موت عبير و انت بتستهل تلوم مامتك
على يبصلها
على / انتى ما تعرفيش اى حاجه لا شوفتى و لا حسيتي باللى عيشته
نور / هو انا بتكلم ليه مش عشانك هتقول ايه لربنا
على / مش هقوله حاجه هو شايف و عارف و مش عاوز كلام تانى فى الموضوع ده
على يطلع بره نور تقعد على السرير
…………………….
على البحر فى السخنه
ندى قاعده و حسام جنبها و حبيبه على رجله
ندى / كان معاك حق اننا نخرج من الاوضه و نيجي البحر فعلا فرق معايا اوى
حسام / اليود مهم جدا عشانك و عشان حبيبه
ندى تبص لحبيبه و تبتسم
حسام / تحبى اصوركوا على البحر
ندى / لا مش هطلع حلوه و انا تعبانه كدا
حسام / مين دى اللى مش حلوه طب والله لاصورك استنى
حسام يقوم يحط حبيبه على رجلها و يطلع الموبايل يصورهم ندى تبتسم
حسام / سجلى لحبيبه اليوم عشان لما تكبر تلاقى زكرياتها الحلوه
ندى تعدل حبيبه و حسام يصور
حسام / واحده سيلفى بقي
حسام يروح يحضن ندى و يصور و هى مبتسمه و هو سعيد
ندى / كفايا بقي ممكن تقعد
حسام يشد كرسيه لزق فى ندى
حسام / بصى حلوين ازاى مع بعض
ندى تبص للصوره و تبتسم
حسام / البحر جوعنى تحبى تاكلى حاجه
ندى / ماشي
حسام / تمام قومى اما نشوفلنا مطعم حلو كدا نضربلنا فيه لقمتين
ندى / تمام
ندى تقوم و حسام يشيل منها حبيبه و يانجها و يمشوا سوا
………………….
فى البلكونه
على واقف باصص فى الملكوت نور تدخل
نور / انا اسفه
على يبصلها
على / انتى ما غلطتيش عشان تعتزرى
نور / سبت لقمتك و افتكرت همك انا بجد ما كانش ده قصدى
على / تفتكرى اللى حصلى فى حياتى الفتره اللى فاتت يكون سببه امى
نور / مش فاهمه
على يبتسم باستهزاء
على / و هو يعني قبلها كانت حياتى عدله
نور تبصله
على / كنت كتير بسال نفسي انا ليه بيحصل معايا كل ده
نور / الحمد لله غيرك مش لاقى ربع اللى عندك
على يبصلها
نور / يمكن مش ده اللى انت عاوزه فهماك بس الشيطان هيخليك تركز بس على اللى ناقصك هتفضل فاكر انك محروم من كل حاجه لمجرد انك ما اخدتش اللى انت عاوزه و ساعتها هتتبتر على اللى معاك مع ان يمكن هو ده اللى انت محتاجه
على / عاوزه تقولى ايه
نور / انت فى نعمه كبيره اوى يا على حس بيها و اشكر ربنا قبل ما تزول و يمكن ساعتها تكتشف انك ضيعت عمرك زعلان على حاجه مع ان كان معاك حاجات اهم
على / انا عارف قيمه اللى معايا كويس قيمتك و قيمه اللى عملوا عشانى الحج انور انا مش بتكلم عن كدا
نور / تحب نروح نزور طنط منال ؟ ايه رايك نعملها مفاجاه و نروح نتعشي معاها
على / دى فكره حلوه جدا
نور / تمام ثوانى و اكون لابسه
نور تجري على جوه و على متابعها
………………….
فى شقه عمر
عمر بيتكلم فى التليفون
عمر / قشطه هقولها … لا دى بتموت فيها اكيد هتوافق … تمام اوى سلام
عمر يقفل و يدخل الاوضه يلاقي أية بتتكلم فى التليفون
أية / المهم انك بخير … انا هاجى اسلم عليكي قبل ما تسافرى … لا هاجى انتى اصلا وحشانى اوى … حبيبه كمان وحشانى
عمر يقعد جنبها
أية / اكيد ان شاء الله … تمام يا حبيبتي فى حفظ الله … سلام يا قلبي سلام
أية تقفل
عمر / ندى ؟
أية / ايوه
عمر / على و نور هيروحوا يسهروا مع طنط منال تحبى نروح
أية / خلينا احنا يوم تانى اهو نبقي نبدل عليها بجد ما ليش مود خالص اشوف نور خالص النهرده
عمر / و هى نور عملت ايه بس ما هى غلبانه زينا و عايزه تعيش اديها فرصه يا أية هى ما لهاش ذنب انها اخت حسام نور بتحب على بجد و صدقيني صعبانه عليا جدا لان على كلام على بتعمل كل حاجه عشان تسعده
أية / ما حسام عمل المستحيل عشان ندى بقي كويس كدا
عمر / حسام كان بياذى الناس و بياذى ندى نور ما يتاذيش حد بالعكس جدعه و بتساعد كل الناس قومى اللبسي و انا هعزمك على الآيسكريم يلا يلا بقي بلاش الجو الكئيب اللى انتى قاعده فيه ده
أية / تمام اللى تشوفه
عمر / يلا يا قلبي ربنا يصلحلك الحال يا ست البنات يا قمر انتى
أية تبصله و تبتسم و تروح تفتح الدولاب
…………..
فى شقه منال
منال و نور بيصبوا شاى فى المطبخ
منال / المهم جهزتى كل حاجه
نور / ايوه الحمد لله و برده هعيد عليها تانى قبل ما اقفل الشنط
منال / و ان عوزتى حاجه برده كلميني
نور / ما اتحرمش منك يارب
نور تشيل الصينيه و يطلعوا بره أية قاعده بتلعب فى الموبايل
نور / الله امال على .. اااه طبعا دخلوا البلكونه
أية / سبيهم ياخدوا راحتهم هم اصلا ما بيصدقوا فرصه يستفردوا ببعض
على و عمر يطلعوا من البلكونه
عمر / سامعك على فكره … ايه ما قولتلكيش تعالى اقفى معانا
أية / ما بحبش ابقي عازول
على / الله طب غيرى من حاجه عدله
منال / غيره ايه الحق عليها يعني انها مدياك البرسونال سبايس بتاعتك
عمر / اوعى الحجه
منال / امال انت فاكر ايه
نور / ههههههههههههههههه عسل يا منمن
منال / ربنا يصلحلكوا الحال يا ولادى و الله لمتكوا حواليا بالدنيا
على / ربنا ما يحرمنا منك ابدا يا ست الكل
نور / بس تعملوا حسابكوا اللمه الجايه عندى
منال / لما ترجعي ان شاء الله بالسلامه نيجي و نسهر و نعمل كل اللى نفسك فيه
نور / قشطه اتفقنا
………………..
فى شقه ندى
ندى نايمه على طرف السرير مديه حسام ضهرها و هو باصص عليها تتقلب تلاقيه صاحى عنيهم تيجي فى عنين بعض
حسام / انتى لسه صاحيه
ندى / قلقت هنام اهو
حسام / مش هتساليني ايه اللى مصحيني
ندى / سرير جديد اكيد مش سهل تنام يعني
حسام / لا
ندى تبصله و ساكته
حسام / مش هتسالى امال ايه
ندى / لو عاوز تقولى هتقول
حسام / مش يمكن محتاج احس انك مهتمه … انك عاوزه تعرفى
ندى / انا لسه ما فوقتش يا حسام و بدرى اوى انك تفوقنى
ندى تتقلب و تديله ضهرها يهز راسه و يلف ينام الناحيه التانيه
………………………
فى شارع مامه على
على واقف بعيد بيبص على البلكونه فيها غسيل و متخشب يفتكر عبير و هى واقفه على السور يغمض عينه و يكتم جواه راجل يعدى من جنبه و يقف يشبه على على
الراجل / على … يا نهار ابيض عاش من شافك يا ابنى
على / ازيك يا عم حسين ازيك و ازى طنط فريال و الاولاد يارب تكونوا بخير
حسين / فضل و نعمه الحمد لله انت طمنى عليك اختفيت خالص بعد الحادثة
على يبص فى الارض
حسين / و الله يا ابنى شغلتنا عليك
على / فيك الخير يا حج
حسين / بس انت ايه اللى فكرك بينا بعد الغيبه دى كلها
على يبص فى الارض و يرجع يبصله
على / امممم … هو … هو حضرتك ما تعرفش ماما فوق و لا لا
حسين / يااااااه دى سابت الحته من سنين بعد الحادثه علاطول جم ورثه جوزها و طلعوها من الشقه و من ساعتها ما شوفناهاش تانى بس لو عاوز اللى يدلك عليه بالدكتوره رباب هى اللى ساعدتها فى النقل
على / تشكر يا عم حسين ربنا يكرمك
حسين / استاذنك انا بقي لحسن هتاخر على الشغل … مره تانيه نورتنا المره الجايه تيجي تشرب معايا الشاى
على / اكيد باذن الله
حسين يمشي تليفون على يرن يبص يلاقي نور
على / ايوه يا نور ازيك
نور / انت فين يا قلبي
على / مشوار و راجع خير عاوزه حاجه اجبهالك و انا جاى
نور / عاوزه سلامتك … انت لسه زعلان منى يا على
على / انا ما كنتش زعلان منك اصلا يا نور
نور / بس انت
على / هتروحى تسلمى على ندى فى المطار
نور / اكيد
على / تمام هعدى عليكي اخدك و نروح
نور / تمام
على / سلام دلوقت عشان اللحق اخلص و اجى
نور / تمام يا حبيبي … سلام
على يقفل السكه و يتنهد و يحاول يقدم خطوه ما يقدرش ياخد نفس عميق و يروح ناحيه صيدليه بخطوات تقيله و عينه على البيت و البلكونه يدخل الصيدليه يلاقي ست بتقرا قران اول ما تشوفه تقوم بفرح
الدكتوره / على … ما عرفتكش ازيك يا ابنى
على / ازى حضرتك
رباب / قولى انك جاى تسال عن مامتك كدا يا على هانت عليك كل السنين دى
على باصص فى الارض
رباب / اللى حصل ما كانش سهل عليها هى كمان دى بنتها … على العموم الحمد لله انك جيت هى محتاجاك اوى
على / قالولى انهم خرجوها من البيت
رباب / امممم … مش عارفه اقولك ايه بس ليلى اتبهدلت جامد الفتره اللى فاتت دى
على يبص فى الارض
على / هى فين
رباب / فى دار رعايه
على يبص لرباب
رباب / حاولت تقتل نفسها اكتر من مره و وجودها لوحدها كان فيه خطر على حياتها باعت نصيبها لاهل جوزها و خرجت من الشقه ما كانش فى حل تانى بس انت عارف المراكز الكويسه بتكلف فلوس قد ايه ف.. اضطرينا ننقلها مركز يعني
على / ممكن عنوانه
رباب / هديك بس لو رايح تلومها او تكلمها فى اى حاجه بخصوص زمان
على / ما تقلقيش حضرتك
رباب تهز راسها و تبتسم و تروح تفتح شنطتها و تطلع كرت
رباب / الاسم والعنوان و ارقام التليفون كلها
على / شكرا … و اسف على تقصيرى الفتره اللى فاتت
رباب / انا متاكده انه كان غصب عنك متاكده ان اللى حصل ما كانش سهل عليك انت كمان … ما كانش سهل على اى حد ابدا
على يهز راسه و يمشي تليفونه يرن
على / ايوه يا نور انا فى الطريق اهو
نور / تمام انا حبيت اقولك انى جاهزه
على / تمام مسافه السكه … سلام
على يمشي
……………………
فى المطار
حسام يركن العربيه فى الباركينج و ينزل يقابل واحد
الراجل / دى مواعيد دى مستنيك بقالى ساعه … اهلا يا مدام
حسام / ساعه يا بكاش هتعملهم عليا
الراجل / ههههههههههههه تروح و ترجع بالسلامه
حسام / وصلها لبابا اكيد محتاجها
الراجل / ما يكونش عندك فكر يلا سلام
الراجل يركب العربيه و حسام يتحرك مع ندى و هو بيزق الشنط على الشياله و ندى شايله حبيبه قبل ما يوصلوا للبوابه نور تدخل بتجرى و وراها على
نور / ندى ندى
ندى و حسام يقفوا
نور / الحمد لله انى لحقتكوا
حسام / ازيك يا نور … ازيك يا على
على يهز راسه و يبص لندى بتلاعب حبيبه و مش بصاله
نور / هتوحشونى اوى … أية كانت قالت انها هتيجي مش عارفه هى فين
حسام / للاسف مش هينفع نستناها فى معاد للطياره … كويس اننا سلمنا عليكوا قبل السفر بس
صوت عمر / اهم اهم هناك اهم
على / وصلوا اهم
أية و عمر يدخلوا أية تحضن ندى و حبيبه
أية / هتوحشيني اوى
ندى / هبقي اكلمك فيديو طول الوقت ما تقلقيش
أية تهز راسها بحزن
حسام / يلا يا نونو
ندى / سلام يا نور سلام يا أية سلام يا عمر
عمر / سلام
ندى و حسام يمشوا و الكل عينه عليهم
عمر / انا مش مصدق اننا لحقناهم الطريق كان زحمه موت ايه ده
نور / هيقطعوا بيا اوى
عمر / زى ما قالت فى فيديو كول دلوقت مش زى زمان
نور / معاك حق
عمر / طب ايه نشوف حته نتغدى و لا ايه
على / معلش يا عمر ورايا مشوار مهم عن اذنك يلا يا نور
عمر يبص لعلى باستغراب على يمشي نور تبص لعمر و أية و تجرى ورا على
عمر / ماله ده
أية / ما تحطش فى دماغك هو كدا غريب اصلا
عمر / لا على فيه حاجه معقول يكون سفر ندى اثر عليه اوى كدا
أية / ليه و هى ست نور قصرت معاه فى حاجه خليني ساكته بقي
عمر / لو انا ما عرفتش اخويا هعرف مين على العموم مش وقته تعالى نتغدى و بعدين ابقي اتكلم معاه فى هداوه
أية / اللى تشوفه
…………………….
فى عربيه على
على سايق و الحزن ماليه و نور كل شويه تبص عليه
نور / على انت كويس
على / انا لقيت ماما
صمت
على / النهرده بس عرفت انا ليه بيحصلى كل ده
نور / على
على / ما هو انا … هو انا يعني كنت مستنيكي تفكريني ان ليا ام … طب هى وحشه … انا كمان وحش اوى كدا
نور / هى فين … هتعرفنى عليها
على / هقولها ايه … اصلا كان عندى ايه اقدمهولها انا كنت بنام على البلاط … و بعدين ما اللى شوفته ما كانش سهل برده عليا زى ما كان صعب عليها
نور / على على اهدى … اى كان اللى حصل زمان ممكن يعني
على / ما فيش حاجه بتتصلح ما فيش حاجه ممكن تتصلح
نور / مش لازم تتصلح ممكن نبدا من اول و جديد على نضافه تعال نروحلها و بوس ايدها و راضيها هى ما لهاش غيرك دلوقت و برها فرض عليك
على / انتى عارفه امى فين ؟
نور / اى كان مكانها على الاقل انت عارف هو فين … لسه عايشه و ده كفايا … تقدر تروحلها قبل فوات الأوان تقدر تطلب منها تسامحك تعوضها
على / عن ايه
نور / مهما كانت علاقتها بيكوا زمان هى امكوا و اكيد بتحبكوا
على / ماما فى دار رعايه
نور / عندنا اوضتين فاضين نعملها اوضه الليفينج تعيش فيها او تقعد فى اوضه حبيبه
على يبص لنور
على / هتعيشي معاها
نور / مامتك يا على و اكيد هتبقي محتاجالك
على / نور انا
نور / مش عاوز تشوفها
على / خايف
نور / هاجى معاك عرفها عليا … مش يمكن تحبنى
على / اكيد هتحبك
نور / خلاص اطلع عليها يلا تعال ناخدها تعيش معانا
على / بس احنا مسافرين
نور / ناخدها و لما نروح نفكر بهدوء هنعمل ايه على حسب وضعها بس الاول نشوفها و نطمن عليها
على يبصلها و يبص قدامه و يهز راسه
نور / و مين عارف مش يمكن ربنا بصرك بيها دلوقت لحكمه … اكيد ده خير
على / الخير هو وجودك فى حياتى يا نور … حقيقي مش عارف من غيرك كنت هعيش ازاى
نور / ربنا ما يحرمك منى بقي ههههههههههههه
على / امين
نور / و لا يحرمنى منك
على يبوس ايدها و يسوق و نور مبتسمه و كل شويه تبصله
……………..
فى المطعم
أية و عمر قاعدين فى جنب
عمر / هو الفلوس اللى بياخدها الدكتور دى فلوس حرام
أية / انت فاكرها سهله
عمر / لا مش سهله اقسم بالله ما فى اصعب من كدا بس لا انا و لا انتى عملنا حاجه غلط و المفروض نحط صابعنا فى عين اتخن تخين مش نفضل نهرب
أية / يا عمر انا لما بلاقى حد بيبص عليا ببقي هتجنن
عمر / و مين هيعرفك بالنقاب يا بنتى هو انتى باين منك حاجه
أية / انت باين يا عمر
عمر / ههههههههههههههه اعمل ايه اتنقب يعني و بعدين انا ما عملتش حاجه غلط و مش هدارى من حد انتى مراتى
أية / خلاص اللى تشوفه يا عمر
عمر / بصي عشان اريحك ممكن .. بقول ممكن على ما تخلصى دراستك
أية / و هو انا لسه هستنى اما اخلص دراستى و اصلا تفرق فى ايه ما انا كدا كدا انتساب يعني ما بروحش
عمر / اهو يكون ربنا كرمنا شويه بقرشين نجيب شقه هناك و رتبنا امورنا
أية / طب ايه رايك بلاش اسكندريه ايه رايك نسيب مصر خالص نشوف اى شغله فى الخليج
عمر / مش للدرجادى يا أية
أية / ليه لا احنا لينا مين هنا
عمر / لينا على لينا طنط منال
أية / خلاص اللى تشوفه يا عمر انا تعبت من كتر الكلام
عمر / اجبلك شيكولاته تحلى
أية / ماشي هاتلى
عمر / طب مش هتتقمصى شويه طيب و تحاولى تضغطى عليا
أية تبتسم و تبص الناحيه التانيه و ترجع تبصله
أية / لا يا عمر مش هضغط عليك انا راضيه معاك باى وضع انا بس كنت بحاول الاقى حلول عشان نشيل الضغط ده من علينا
عمر / سبيها لله خلصي بس السنادى و ربنا يقدم اللى فيه الخير
أية / و نعم بالله اطلبلى الشيكولاته بقي
عمر / ههههههههه عنيا حاضر
عمر يشاور للمتر
………………………….
الممرضه / مدام ليلى … فى حد مهم جدا جاى يزورك
على يبص يلاقى مامته واقفه فى الشباك مدياه ضهرها و مش فارق معاها
الممرضه / هى ما بيجلهاش زيارات غير مدام رباب و متطوعين الجمعيات الخيرية و هى مش بتتفاعل معاهم مهما حاولوا هى بتحب تقف لوحدها كدا معظم الوقت و تسرح
نور تديها فلوس فى ايدها الممرضه تبتسم و تمشي و على عينه على ليلى و ساكت نور تبصله و تزقه بالراحه و تقفل الباب نور تروح ناحيه ليلي سرحانه فى السما
نور / ازيك يا ماما ليلى عامله ايه
ليلي مفيش اى رد فعل نور تبص لعلى
على / ماما
ليلي تبص لنور نور تبتسم و تبص لعلى ليلى تبص لعلى و فجاه تعيط و بالراحه تنزل تقعد فى الارض على يروح يحضنها و يعيط هو كمان
على / انا اسف سامحيني … سامحيني
ليلي / كان غصب عنى والله كان غصب عنى
على يمسح دموعها
………………
- يتبع الفصل التالي اضغط على ( رواية سلف و دين ) اسم الرواية