رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الاربعون 40
فى شقه ندى
نور و ندى بيلموا الحاجه الباب مفتوح حسام يدخل يخبط بصابعه و مبتسم
نور / اتوزعنا
حسام / احبك يا اذكى اخواتك
نور تسيب الكيس فى الارض و تنزل و تقفل الباب وراها وندى تلم باقي الجاتوه ترجعه فى علبه تانى حسام يحضنها من ضهرها
حسام / بتعملى ايه
ندى / خساره باقى الجاتوه و الاكل هحطهم فى التلاجه
حسام / و دا وقته برضه
ندى تلف و تبقي فى حضنه حسام مبتسم و عينه مش ثابته فى مكان
ندى / على ما تغير هدومك هكون خلصت
حسام / محلويه اوى النهرده مش قادر اشيل عيني و لا ابعد
ندى / معلش هانت
حسام / تمام يبقي هساعدك عشان الانتظار صعب اوى فى اللحظات اللى زى دى
ندى / تمام لم بقي الكبايات و الاطباق البلاستيك فى كيس الزباله ده
حسام / عيني
ندى تبتسم و تلف تكمل لم الاكل حسام يبعد شعرها و يبوسها من قبتها تضايق و تحاول تداريها و تلم الدنيا بدله مصطنع
ندى / و بعدين بقي خلينا نخلص
حسام / انتى صح
حسام يسيبها و يروح يمسك الكيس اللى سابته نور و يكمل لم
………………..
فى شقه أية
أية نايمه فى السرير و منال و عمر قاعدين جنبها
عمر / انا عمرى ما شوفتها بالحاله دى
منال / كنت متوقعاها مش هكدب عليك كل يوم حالتها كانت بتبقي اسوء و احنا كمان اتاخرنا عليها فى حكايه الدكتور دى
عمر / ما هو كلو على يدك
منال / لا بكره ان شاء الله رجلى على رجلها .. صحيح مفيش اخبار عن المجنون التانى
عمر / قافل تليفونه بس ما تخافيش مش هيعمل حاجه .. اصل للاسف مفيش فى ايده حاجه يعملها
منال / ربنا يصبره و يصبرنا كلنا … روح يا ابنى انت كمان تعبان و النهرده كان يوم صعب اوى عليك
عمر / مش هقدر اسيبها فى الحاله دى
منال / انا جبنها اهو و بعدين ما هى الحقنه اللى الدكتور اداهالها هتنيمها للصبح روح انت بقي اللحق ارتاحلك ساعتين
عمر / مش عارف هردلك وقفتك جنبنا دى ازاى
منال / وقفه ايه يا ابنى هو انا ليا غيركوا … ربنا يصلحلكوا الحال يا ابنى والله ما عارفه اقولكوا ايه … قوم يا ضنايا ارتاح
عمر يبص على أية نايمه يقوم يطلع بره منال تبص على أية بحزن و تمد ايدها تجيب مصحف و تقعد تقرا
…………………..
قدام اوضه ندى
ندى تفتح الباب بقميص نوم و تطلع تجرى على الحمام ترجع حسام يقوم من السرير يلبس تيشيرت بجامته و يحصلها
حسام / و دا من ايه بقي ان شاء الله
ندى تغسل بقها
ندى / انت وعدتنى مش هتضغط عليا وعدتنى و انا حاولت والله حاولت مش قادره والله ما قادره
ندى تعيط و تبصله برجاء
حسام / ماشي يا ندى ماشي بس تعملى حسابك ان للصبر حدود بس المرادى هخليني الكبير
حسام يدخل الاوضه و يرزع الباب ندى تنزل فى الارض على ركبها و ايديها لسه متشعلقه فى الحوض و بتنهج و مش قادره تنظم نفسها
…………………….
فى شقه على
العمال شغالين الصبح بدرى على يطلع يقف قدام شقه ندى و يحط ايده على الباب مفيش اى صوت يبص فى الارض و يطلع فوق
على / الله ينور يا رجاله ايه الاخبار هنتجوز السنادى و لا ايه
راجل / هههههههههههه لا ان شاء الله تلت ايام و اسلمك كل حاجه
على / على البركه
على يدخل الحمام و بعدين المطبخ معمولين سيراميك حتى السقف يروح يبص على اوضه حبيبه ملزوق رسومات اطفال و نجوم زى ما طلب و مكتوب بيبو على الحيطه يبتسم الراجل يدخل
الراجل / الست نور هى اللى طلبت نعمل كدا و هجيب استكرات قلوب و حركات و ازوقها داير ما يدور
على / تسلم ايدك مقدما عن اذنك
على ينزل يقابل حسام بيطلع الزباله على السلم
حسام / يا صباح الخير ازيك
على / انا تمام
حسام / ايه الاخبار فوق
على / تمام تلت ايام و يسلمنى
حسام / عديت عليهم تحت زمانهم نايمين من هده حيل امبارح كان ناقصك انت ما جيتش ليه كان فى اكل و ساقع
على / هبقي اجى
حسام / امتى
على / اول ما الشقه تخلص هاجى
حسام / تنور بس على الله تلحق قبل ما نسافر
على / ما انت اكيد هترجع
حسام يبتسم
حسام / هستاذنك ادخل … عريس جديد بقي و كدا
على يسيبه و ينزل
حسام / انبسطت انى شوفتك
على ما يردش حسام يدخل و هو مخنوق يروح يقف على باب اوضه ندى نايمه بنفس قميص النور يروح ينام جنبها و يلعب فى شعرها تتفزع
حسام / دا انا دا انا بصيحي تفطرى
ندى / مش عاوزه مش عاوزه اوعى ابعد
حسام يقوم يقعد و يبصلها تقوم تقعد و هى لسه مش مستوعبه
ندى / حرام عليك يا حسام حد يصحى حد كدا
حسام / و حد ينام بقميص نوم حلو كدا
ندى / ما انت قفلت الباب و هدومى كلها جوه
حسام / ما قفلتوش بالمفتاح لو كنتى جربتى كنتى دخلتى
ندى / ما انا ما رضيتش ازعجك
حسام / و هو انتى ممكن تزعجيني برده قومى افطرى
ندى / حاضر
ندى تقوم و حسام عينه عليها لحد ما تطلع بره يبص الناحيه التانيه و ينفخ
…………………….
فى شقه أية
أية بتلبس و منال بتساعدها
منال / قوليله كل حاجه ما تخبيش قوليله اللى حصل و بتحسي بايه اتكلمى معاه كانك بتتكلمى مع نفسك دا شغله و هو قايل قسم سرك فى بير
أية بتعدل النقاب و ساكته
منال / الراجل ده سمعته كويسه و سالين عليه ما تخافيش
أية / بس احنا هيتقفل علينا باب
منال / عوزانى ادخل معاكى هترتاحى فى الكلام قدامى
أية / انا مش عارفه
منال / ما جبنا الست ما روحتيش تحبى نرجعلها
أية / انا بقيت كويسه خلاص والله
منال / انتى زى الفل خلينا بس نطمن عليكي
جرس الباب يضرب
منال / دا اكيد على هروح افتحله
منال تطلع بره تلاقي عمر فتح لعلى
عمر / اخبارك
على / زى اهرامى الشقه فاضلها تلت ايام و تخلص على كلامه يعني قول اسبوع
منال / يبقي العقل بيقول تنزل مع نور تلفوا على العفش و الستاير و النجف
على / هى هتخلص كل ده مع مامتها انا هحاسب بس قولتلها مش فاضي للف و واثق فى زوقها
عمر / بس كدا امها هتنفخك فى الاسعار
على / انا اديتها مبلغ و قولتلها ده اللى معايا يعلموا اللى يعملوه بقي
أية تطلع مغطيه وشها
أية / ما دام مش طايقها كدا هتتجوزها و تظلمها ليه
عمر / أية
على / سيبها … انا ما بكرهش نور
أية / بس بتحب ندى
على / هتقى ربنا فيها
أية / هتخونها بقلبك و عقلك و احساسك مش هتقدر ما انتش ملاك
منال / يلا يا أية عشان ما نتاخرش
أية / انتى بتحبى نور و بتحبى على امنعيهم
منال / نور بتحب على و يمكن مع العشره و ندى لما تسافر تقدر تنسيهاله
أية / مفيش فايده من الكلام يلا بينا عشان ما نتاخرش
على / اوصلكوا
أية / ما فيش لزوم كدا كدا كنا هنطلب اوبر … فى فطار لو تحب تاكل لقمه
أيه تنزل منال تبص لعمر و على
عمر / خدى بالك منها
منال تهز راسها و تنزل
على / ما روحتش معاهم ليه
عمر / مش عوزانى اروح
على / ربنا يهديها كان يوم صعب امبارح صح
عمر / كنت متوقع اسوء انت عامل ايه روحتلهم هاه
على / اول ما النهار طلع لبست و جريت عليها شوفته و كلمته
عمر / بتهزر
على / لا كان بيرمى الزباله صاحى بدرى اوى
عمر / ما تفكرش قوم كلك لقمه على ما اللبس ننزل نفتح المحل سوا
على / والله ما ليا نفس
عمر / دا الحجه منال اللى عملاه بنفسها قوم بر نفسك
على / خش اللبس يا عمر ابوس ايدك انا فعلا مخنوق
عمر يهز راسه و يقوم يدخل جوه
………………..
فى شقه ندى
ندى لابسه بجامه و قاعده بتاكل مع حسام عينه عليها و هى عامله مركزه فى الاكل
حسام / ما سالتيش عن بيبو يعني
ندى / هو انا سيباها مع حد غريب
حسام / لا بس اكيد نور هيبقى وراها مشاوير تخلص جهازها مش هينفع نربطها بيهم
ندى تبص لحسام
ندى / طب ما تطلعهم هو انا منعتك دا ابويا و بنتى يا حسام
حسام / اه بس وقتها مش هينفع تروحى تنامى فى اوضه باباكى
ندى تعمل بتكمل اكل
ندى / ممكن نبقي ننزله على النوم تحت عرسان بقي و كدا
حسام / بس احنا
ندى / احنا اتفقنا و انا حاولت
حسام / مره
ندى تبصله
حسام / على فكره اللى حصل امبارح ممكن يحصل لاى اتنين متجوزين عن حب انك تخافى و كدا و فى ناس ما بيدخلوش من اول مره عادى يعني بتحصل مره فى مره الخضه دى هتقل بس حاولى تانى
ندى / حسام انا
حسام / انا مش هضغط عليكي بس على الاقل حاولى انا نفذت كل اللى طلبتيه بس دا حقى حق ربنا
ندى تبص الناحيه التانيه يمسك ايدها
حسام / حاولى و انا مش هقفل الباب تانى لو ما قدرتيش ابقي كملى نومك و انا مش هلمسك بس انا و انتى مش هينفع ننام غير فى سرير واحد
ندى تقوم تشيل الاطباق
ندى / انا شبعت هشيل اعملك شاى
حسام / ياريت نشربه سوا فى البلكونه انا ياما كان نفسي اوى فى الموضوع ده
ندى / تمام عن اذنك
ندى تشيل الاطباق و تروح المطبخ و حسام بيفكر
………………..
فى شقه أمانى
محمد / سيبوهم معايا وروحوا انا مش رايح فى حته
امانى / و يا ترى هتاخد باقى شهر العسل عارضه
محمد / لا بكره يبقي يحلها حلال
امانى / براحتك بقي انا تعبت منكوا… يلا يا نور
نور تطلع من الاوضه بترج ببرونه
نور / طب ارضعها طيب
محمد / سيبيها انا هرضعها و اغيرلها و اخد بالى منهم و هبقي اجيب غدى كمان لفوا براحتكوا و ما تشيلوش هم حاجه معاكوا فلوس
نور / معايا يا بابا على سايب كتير اوى
امانى / هو ايه اللى كتير دا احنا ورانا هم ما يتلم
نور / ايوه يا ماما ما انا معايا فلوسى برده هكمل منها ما هو مش كل حاجه عليه برده
امانى / طب يلا يا اختى يلا خلينا ننجز فى يومنا
محمد ياخد الببرونه من نور و يدخل و هم ينزلوا
محمد / ازيك يا مصطفى يا خويا احسن شويه النهرده
مصطفى يبص الناحيه التانيه محمد يروح يقعد جنبه و يربع و يشيل حبيبه على رجله و يرضعها
محمد / انا عارفه انك زعلان من حسام و انا والله زعلان منه بس هو و ندى اتفقوا و دى مصلحه حبيبه فوق اى حاجه تانيه
مصطفى يتنهد
محمد / انا عاوزك تركز فى علاجك تقوم بقي على رجلك انا محتاجلك و كلنا محتاجينك يعني يا راجل ما نفسكش تقوم تجرى ورا البت دى لما تكبر… انا والله ما مصدق انهم هياخدوها معاهم لبنان … طب انت عارف ان لبنان دى كانت فكره ندى … انت ما بتبصليش ليه يا مصطفى انت زعلان منى انا كمان
مصطفى يبص لمحمد
محمد / حقك عليا لو كنت زعلتك باى حاجه من غير ما اقصد انت عارف غلاوتك عندى بس انا كل اللى حصل الفتره اللى فاتت قسما بالله ما كان ليا لا دخل و لا علم بيه و دا ابنى و دى بنتى هعمل ايه بس
مصطفى يهز راسه و يتنهد
محمد / بكره ربنا يصلحلهم الحال بكره كل حاجه تتصلح ان شاء الله
مصطفى يهز راسه
…………………
فى عياده الدكتور
الدكتور / تمام يا استاذه منال هستاذنك تستنينى بره
منال / طب انا ممكن اقعد فى ركن بعيد اقرا قران لحد ما تخلصوا
الدكتور يبص لأية
أية / انا هبقي مرتاحه كدا اكتر
الدكتور / تمام مفيش مشكله
منال تقوم تروح تقعد بعيد جدا
الدكتور / تحبى تقعدى فين
أية / هنا كويس
الدكتور / مدام منال بتقول انك حاولتى تنتحرى و من ساعتها
أية / انا ما حاولتش انا ما كنتش عاوزه اموت
الدكتور / امال نطيتي ليه
أية / كنت خايفه منهم … كانوا هيموتونى كنت بهرب وقتها الصريخ و الشتيمه ما كنتش عارفه و لا واعيه نطيت لان ده كان الطريق الوحيد قدامى للهروب
الدكتور / فاهمك و لسه بتختارى طريق الهروب صح
أية / انا مش هنا عشان انا ليه نطيت انا هنا عشان … عشان انا مش قادره اعيش و هو قدامى فى الاول حاولت اتاقلم بس كل يوم بيعدى كل مره بشوفه او بسمع اسمه اعصابى بتبوظ
الدكتور / دا حسام
أية / ايوه … كوابيس طول الوقت
الدكتور / بتشوفى ايه
أية / بيضحك
الدكتور / بس بيضحك بس
أية / و دى حاجه عاديه دا قتلنى و قتل ندى
الدكتور / و مامتك يا أية
أية / ما هى ماتت اشمعن هو لسه عايش
الدكتور / هترتاحى لما يموت
أية / جدا
الدكتور / ما يمكن ما ترتاحيش لما يموت يمكن يتحول بموته لبطل او شهيد
أية تبص للدكتور
الدكتور / انتى الحاله بتزيد كل ما فرحه من ندى كان يقرب صح انتى زعلانه اكتر انه هيتجوز ندى و لا من اللى عمله فيكي
أية / هو عمل كل ده عشان يوصلها و نجح وصل للى هو عاوزه هو الوحيد السعيد و كلنا لا الشر انتصر
الدكتور / بس الحكايه لسه ما انتهتش
أية / حكايتى انا انتهت
الدكتور / ليه انتى عندك كام سنه لكل ده
أية / انا مش عايشه فى الدنيا لوحدى انا ما بعرفش امشي فى الشارع الكل بيبص عليا للكل بيحاول يلمسني
الدكتور / كل الناس شافت الفيديو
أية / ما اعرفش
الدكتور / و جوزك فين
أية / ماله
الدكتور / رايه أية هو مش كان معاكى فى الصور
أية / هو راجل
الدكتور / بس انتى شرفه
أية / ما هو طلقنى و هرب
الدكتور / و رجعلك و ردك
أية / بعد ما كل حاجه خلصت
الدكتور / بتحبيه
أية / ما ليش فى الدنيا غيره
الدكتور / بتحبيه
أية / جدا
الدكتور / بس ما عدتيش بتثقى فيه مش هيقف جنبك هيتخلى عنك فى اول مفترق طرق صح
أية تبص فى الارض
الدكتور / انا اسف فى السؤال بس انتى علاقتك مع عمر عامله ازاى
أية تبصله
الدكتور / انا اسف طبعا انى بدخل فى حاجه زى دى بس العلاقه بينكوا اتاثرت
أية / اكيد
الدكتور / بصي يا مدام أية انتى كل اللى بتمرى بيه طبيعى جدا و انا مش هديكي علاج انا بس همشي معاكى جلسات متابعه و هديكي بروتوكول حاجه كدا زى خطوات يوميه تعمليها و كل مره هنشوف فى تحسن و لا لا اتمنى المره الجايه اقعد مع استاذ عمر
أية تهز راسها الدكتور يبتسم
……………….
فى محل الموبايلات
عمر قاعد عمال يلف موبايل فى ايده و على كل شويه يبص فى الساعه
على / هم طولوا و لا العياده زحمه و لا ايه
عمر / كنت روحت معاهم انا صح
تليفون على يرن
على / دى نور هطلع بره ثوانى
عمر / خد راحتك
على ياخد التليفون و يقف فى الشارع
على / الو … ازيك
نور / انا تمام ماما تعبت من اللف و قعدنا فى كافيه قولت اللحق اكلمك
على / لقيتوا حاجه يعني
نور / اه تقريبا الاجهزه الكهربائيه خلصناها احنا اصلا شبه نازلين عارفين هنجيب ايه فالعربيه هتحمل و تبعت الحاجه على البيت بابا يستلمها و احنا هنكمل لف و الحمد لله ان المطبخ خلصان الحاجه تتحط فيه علاطول
على / تحبى اروح البيت استلم مع عمى
نور / ياريت والله يا على كنت محرجه اطلب منك اصل بابا لوحده و معاه عمى و حبيبه واخاف يسيبها لوحدها
على / تمام مسافه السكه و اكون هناك
نور / ربنا يخليك ليا و ما يحرمنيش منك ابدا
على / هتعملوا ايه دلوقت
نور / احنا هنطلع على معرض موبيليا ماما عرفاه جايبين منه لحسام حلو اوى وننقى اوضه النوم و الصالون و السفره و الليفيتج
على / انا فصلت سرير اطفال لبيبو هاتى سرير ميه و عشرين لعمى و دولاب صغير
نور / تمام كويس انك قولتلى بس انت لحقت عملت السرير امتى
على / لا دا واحد صاحبى بينا فلوس شغل مغلبنى عليها قولت اطلع منه باى مصلحه بدل ما تروح عليا يعني
نور / ههههههههههههههههه حلوه دى طب مش كان عملنا اوضه النوم احسن
على / لا غالى اصله فالسرير يادوب على حق الفلوس سيبك انتى انا اصلا ما اضمنش التفصيل المهم انا هروح البيت و انتى خلصى لفتك و انا هخليهم يبعتولنا اكل لينا و للعمال ما تقلقيش خدى راحتك
نور / هو انا قولتلك بحبك قبل كدا
صمت
نور / ايه انا قولت حاجه غلط و لا ايه
على / ابدا
نور / طب ايه مش هتقول حاجه
على / و انا كمان بحبك يا نور
نور / ربنا يخليك ليا يلا هقفل عشان ما اعطلكش
على / سلام
على يقفل و يدخل جوه عمر بيتكلم فى التليفون
عمر / مش انا قولتلك اجى معاكى … تمام تمام لما تيجي نتكلم سلام يا قلبي سلام
على / خير
عمر / خلصوا و جايين و عاوز يشوفنى الاسبوع الجاى
على / تمام روح و انا هروح البيت استلم الاجهز و اطلعها هتعوز حاجه
عمر / غدى بقي لينا احنا التلاته
على / تمام هكلم احمد يظبطلك الليله
عمر / تمام قشطه يلا صحبتك السلامه
على يبتسم و يمشي
عمر / طب و انا هروح للدكتور ده اقوله ايه و لا انتى قولتليله ايه يا أية انتى كمان حسبي الله و نعم الوكيل فيك يا حسام انت و سمر
………………
فى شقه ندى
ندى واقفه فى المطبخ بتقطع فاكهه حسام يدخل يحضنها من ضهرها و يمسك ايدها بالسكينه و يقطع معاها
ندى / حاسب تعورنى
حسام / بحبك يا ندى
ندى / ليه
حسام / و هو من امتى في ليه فى الحب قلبي اختارك عيني ما بتشوفش غيرك عاوزك انتى و بس
ندى / تحب احط سكر و لا سيرب على الفاكهه
حسام / كفايا تاكليهانى بايدك هتبقي مسكره
ندى تحط السكينه و تبصله
ندى / ايه شغل الافلام القديم ده
حسام / ما اكلش معاكى صح
ندى / و لا شرب وسع كدا اما اروح اطمن على بابا و حبيبه
ندى تطلع بره تجيب الموبايل
حسام / بابكى فطر و حبيبه راضعه و مغيره و نايمه و كلو تمام اخدت التقرير كلو و انتى فى الحمام من بابا
ندى / برده هكلم نور اطمن
حسام / يا بنتى هو انا هكدب عليكي و بعدين لا نور و لا ماما تحت بيشتروا الجهاز و بابا قاعد بالاتنين تحت
ندى / شوفت بقي ان ليا حق اقلق يا حسام الاتنين مع باباك لوحده
حسام / و ماله يعني هو صغير و بعدين الله يرحم اما كان بيغيرلك و يحميكي
ندى / بس باباك دلوقت كبر و الاتنين تقال عليه بص تعال ننزل عشر دقايق نطمن عليهم و لو ناقصهم حاجه نشوفها و نطلع تانى هو احنا بنعمل ايه هنا يعني
حسام / هترتاحى كدا يعني
ندى / عشان خاطرى عشان خاطرى
حسام / و انا ما اقدرش اقول لخاطر النونو لا بس الاول اخد ابوسه
ندى تبوسه من خده و تجرى على الاوضه و حسام مبتسم
………………….
فى الشارع
عربيه نص نقل واقفه و العمال بتنزل منها الاجهزه قدام البيت و بيطلعوها فوق و على بيحاسب السواق موتوسيكل يقف و ينزل شاب يجرى على على
على / اول دور فوق و ما تاخدش تيبس و انزل ساعدنى اطلع الحاجه دى فوق
الشاب / هوا يا رياسه
حسام ينزل من فوق
حسام / الله ينور ايه الحاجات الحلوه دى
على / زوق نور
حسام / لا للصرف باين و دى تلاجه و لا دولاب هههههههههههههههههه
على / اهم حاجه التلاجه طبعا امال هنسقع ازاى
حسام / صح معاك حق جبت حد يشيل و لا اشوفلك
على / لا ما تقلقش هتصرف
حسام / تمام انا هطلع بقي عشان انا نزلت بس لما بابا فتحلى موشح
على / عملت الواجب و زياده
حسام / لا انا عامله من زمان عامله بزياده كمان
حسام يطلع بتاع الدليفرى ينزل يشيل مع العمال و على واقف بينفخ يبص لفوق يلاقى ندى بتبص من البلكونه و مبتسمه بسخريه تدخل جوه
على / الهمه يا رجاله الاكل هيبرد
………………………
فى شقه ندى
نور / يا بنتى سبيهم معايا دا سواد الليل
ندى / هم يعني هيعملولى ايه و بعدين انا ما برتاحش بعيد عن حبيبه والله طول الليل عقلي فيها
نور / و انا طول الليل عقل فيكي
ندى / ليه يعني مالى هى اول مره اتجوز و لا ايه
نور / ما اقصدش انا
ندى / سيبك منى انتى فاضلك حاجه اقدر اساعدك فيها
نور / لا يا حبيبتي مش مستاهله احنا اصلا ما بنلفش احنا نزلنا على المحلات اللى جبنا منها جهازك علاطول حاجتهم حلوه و متنوعه و سعرها مناسب
ندى / ربنا يتملك على خير
نور / يا رب يا حبيبتي يا رب
حسام يفتح باب الشقه و يدخل شايل اكياس
حسام / احلى عشا بقي و لا ايه
نور / طب اتوزع انا بقي و لا ايه
حسام / يا بت اقعدى كلى لقمه دا انا جايب سى فود بطننا نشفت من الشاورما تعالى برى نفسك
نور / الف هنا عليكوا يلا سلام
حسام / انتى طالعه فقريه لمين يا بت
نور / هههههههههههههههه تصبح على خير
نور تنزل حسام يفضي الاكياس على السفره
حسام / اما شويه ساندوتشات بقي و جبتلك الكول سلو اللى بتحبيه جبتلك علبتين لوحدك و عملت حساب عمى كمان فى ساندوتش كبير
ندى قاعده مكانها بتبص عليه يبصلها و يستغرب
حسام / ايه مالك مش هتاكلى و لا ايه
ندى / لا هاكل اكيد هاكل ما انت عارف قد ايه بحب الكول سلو
ندى تقوم و تروح تقعد جنبه و تمسك اول ساندوتش و تاخد قطمه
ندى / على فكره حلو اوى فعلا و مليان واو بجد
حسام / اهم حاجه انه عجبك
صوت حبيبه يعيط محمد يضرب الجرس ندى تحط الساندوتش و تبص لحسام
حسام / كملى اكلك هقوم انا اشوفها
ندى / و انا هقوم اكل بابا و الاكل سخن هو انت طالبله ايه
حسام / اى حاجه الاكل كتير
ندى / تمام يا قلبي نيم بيبو بقي و انا هاكل بابا و اجيلك
حسام / تمام
ندى تقوم و تاخد ساندوتش و تدخل لمصطفى صوت حبيبه يعلا حسام يجرى على اوضته
………………………
فى اوضه عمر
عمر / يعني ما كتبش علاج خالص و لا فيتامين سى حتى
أية / لا قالى مش هنمشي فى السكه دى دلوقت و قعد اتكلم كتير عن الصلاه و الدين انا حسيته شيخ مسجد مش دكتور نفسي
عمر / على فكره انا شخصيا من اول يوم و انا بعمل كدا و قولتلك على فكره
أية / ما انا بصلى يا عمر هو انا ليا الا ربنا اشكيله و يفهمنى
عمر / و نعم بالله بس ان شاء الله ما تكونيش بتلقحى بالكلام بس
أية تبتسم و تبص الناحيه التانيه و ترجع تبصله
عمر / على فكره انا عارف انك حتى لو مش هتقولى زعلانه منى
أية / بالعكس
عمر / انا برده بحس يا أية بشوفها فى عنيكي عارف ان مش دى نفس النظره اللى كنتى بتبصيلى بيها
أية / العيب مش فيك فيا انا اللى
عمر / انتى لا غلطتى و لا ليكي اى ذنب فى كل اللى حصل و اللى له عندنا حاجه يجي يحاسبنا أية انا بحبك و عمرى ما حبيبت و لا هحب غيرك انا عارف انى غلطت و الصدمه كانت قاسيه علينا كلنا بس الحمد لله ربنا ادانا فرصه تانيه و اوعدك انى اتمسك بيكي و اعوضك اوعدك انى هعمل كل اللى اقدر عليه عشان نكون اسعد زوجين فى الدنيا انا و انتى و بس يا أية انا و انتى و بس
أية / طب و على و ندى و نور و
عمر / انا و انتى و بس باب الشقه بيتقفل عليا انا و انتى و بس اى حد بيتعب اعصابك ما تتعامليش معاه اى حد بيوترك ما تقعديش معاه على كدا كدا ما عدش بيجي بقابله فى المحل
أية / المشكله مش فى على
عمر / و الباقي بعيد و بكره حسام يغور على لبنان داهيه لا ترجعه و ما نحتاكش بيه خالص و ان كان على نور فا انتى عارفه و الكل قالك هى مش زيه
أية / خلاص يا عمر غير السيره دى
عمر / ايه رايك لو طلعنا كام يوم نغير جو انا و انتى و بس نرجع عرسان جداد
أية / طب ما احنا عرسان جداد فعلا يا عمر
عمر / و ماله بس لسه خفاف نسافرلنا اى حته كل ويك اينك نغير جو قبل ما حزومبل يجي و يتقلك و لا نعرف نروح و لا نيجي
أية / و الله انت فايق و رايق
عمر / يعني ايه احجز لنا رحله حلوه و لا ايه
أية / احجز طبعا
عمر / ايوه بقي هى دى أية اللى بحبها
…………………
فى اوضه مصطفى
حسام يدخل يلاقى ندى نايمه جنب ابوها و مصطفى ماسك الساندوتش و بياكل
حسام / غيرتلها و نيمتها و
حسام يسكت و يروح يقرب من ندى مصطفى يبصله
حسام / طب هى مش هتتعشي و لا ايه زمانها جعانه اصحيها تاكل
مصطفى يهز راسه لا حسام يعوج بقه و يهز راسه
حسام / طب اجبلك ساندوتش تانى يا عمى
مصطفى يهز راسه لا
حسام / طب هروح اكل انا بقي لوحدى ما انا دافع دم قلبي فى العشوه دى يلا تتعوض بقي
حسام يطلع بره و يسيب الباب مفتوح مصطفى يعدي ايده من على خد ندى تفتح يشاورلها تسكت تكمل نوم و هى مبتسمه و هو عمال يلعبلها فى شعرها و مبتسم و بياكل
………………………
فى شقه على
على قاعد و قدامه سرير حبيبه بيبص عليه
//////////////////
على / مش هتنام فيه هتسافر و يا عالم هترجع امتى يا عالم هترجع تنام فيه و لا هتكون كبرت عليه هتسافر و مش هشوفها و لا اشيلها تانى … كل يوم هناك هتتعلق بيه أكتر هبقي عمو على … بس دى الحقيقه يا على هو ابوها و انت حياله هتبقي جوز عمتها … بس هو ما يستاهلهاش و لا هى و لا امها و لا حتى يستاهل انه يعيش … دا حتى ما يستاهلش ان نور تبقي اخته … و مين فينا بياخد اللى يستاهله كلو نصيب و مقدر و مكتوب … ما حدش عارف الخير فين … يعني هيكون فين فى كل اللى بيحصل ده مش فاهم انا … انت هتهب منك و لا ايه اهدى كدا … ما هو أية معاها حق انا بتجوز نور ليه اذا كانت ندى مش هتبقي جنبى لا هى و لا حبيبه و لا هقدر اساعدهم و لا احميهم … انا بعمل فى نفسي كدا ليه
/////////////
على يقوم يروح الحمام يتوضي تليفونه يرن يروح يرد يلاقي نور
نور / صحيتك
على / لا صاحى كنت بتوضي
نور / هتصلى ايه دلوقت
على / اى حاجه مخنوق شويه و هصلى يمكن ارتاح
نور / طب و الكلام معايا مش هيريحك
على / مش كل اللى جوانا بيطلع فى الكلام يا نور مش كل اللى جوانا ممكن يتحكى او يتفهم
نور / فهماك جدا على فكره
على / انا ممكن اجى بكره على فكره اقعد بحبيبه و عمى
نور / ما فيش داعى ندى و حسام رجعوهم تانى فوق
على / بالسرعه دى
نور / جايبلهم عشى جامد و مدلعهم اخر دلع
على / الف هنا اتعشيتي
نور / اكلت زبادى بلمون تقلت انا جامد فى الغدى
على / الا عمرى ما جربته البتاع ده طعمه حلو
نور / شغال انا واخده عليه من زمان اى وقت احس انى زيدت باللغى العشا و اديها زبادى بليمون علاطول
على / تعرفى ان ندى كانت بتاكل شاورما تقريبا كل يوم و ساعات مرتين فى اليوم
نور / لا ندى دى طقه اصلا لما بتحب حاجه ممكن تفضل عايشه عليها العمر كله مهما تحاول تخليها تجرب حاجات تانيه من و هى صغيره مره كان عندها فستان ابيض جيلها فى العيد كانت بتقلعه بالخناق و تفضل تعيط لحد ما طنط مها الله يرحمها تغسله و تلبسهولها تانى لحد ما اتبهدل خالص جابولها واحد تانى جديد ما رضيتش تلبسه و بقي زيه زى اى حاجه
على / كان نفسه
نور / والله كان احلى بس هى كدا دماغها بقي و انت عارف كانت عيله
على / و هى كبرت دلوقت
نور / بقت ماما دلوقت مهما كان سنها ما عدش ينفع تفكر بنفس العقليه
صمت
نور / سكت ليه
على / اقول أية
نور / اخبار أية و عمر ايه
على / كويسين
نور / بفكر اعزمها تيجي تقضي معايا يوم مره اهو نقرب من بعض شويه
على / ما افتكرش ان ده وقته و لا انتى مش عاوزه تتجوزى و لا ايه
نور / ههههههههههههههه ما احنا انجزنا حاجات كتير اوى اهو
على / يعني الفرح بكره ؟
نور / هههههههههههههه دا انت مستعجل بقي
على / و انتى ايه نظامك
نور / اى كانت ايجابتى هتبقي كدب
على / ازاى
نور / يعني مستعجله لانى حبيتك بس خايفه تكون اتسرعت خايفه تندم انت ما حبتنيش يا على
على / و هو يعنى ايه حب يعني تعرفى ازاى انك بتحبى الانسان ده مش انك تكونى مرتاحاله مبسوطه و هو معاكى بتهتمى بيه نور انتى لازم تفهمى انى مش زى اى راجل طبيعي انا من يوم ما وعيت على الدنيا و انا ما بعملش حاجه غير اشتغل نماذج المتجوزين اللى عاشرتهم كانوا بعيد جدا عن الصوره اللى احلم بيها لحياتى او اقبلها على مراتى ما كانش عندى وقت اشوف افلام او تمثيليات طول الوقت شغل شغل شغل عشان بس الاقى حق اللقمه و الهدمه على اللى قدامك ده ظهر قريب اللى راكب عربيه و عنده املاك ده ظهر قريب اوى و كل الحاجات دى مش حقى مش بتاعتى و لو الحجه طلبتها بكره الصبح هتنازلها عن كل ده و ارجع ما حلتيش غير مرتبى
نور / و ده اللى بحبه فيك
على / انا بقولك الكلام ده عشان تفهمى انى مش بقول زى باقي الرجاله عشان انا ما اعرفش اقول ما بفكرش كدا و ما اتعلمتش اعمل كدا
نور / كفايا انك تحاول
على / هتصبرى عليا يعني هتقدرى ده و لا هتتهميني بالتقصير و قله الاهتمام
نور / على فكره انت كدا كدا عاجبنى و الحاجات التانيه دى بقي تبقي تيجي لوحدها بعدين
على / طب ما تعلميني يا نور
نور / هههههههههه اعلمك ايه
على / علميني احب علميني ازاى اتحب انا عارف كويس يعني ايه انك تتعلق بحاجه و تروح منك تحب حاجه و ما تطولهاش عارفه و حافظه صم تقريبا ما عيشيتش غيره طول حياتى انا كمان محتاج اتحب محتاج احس ان ممكن فى يوم حد يتمسك بيا يحبنى و يختارنى قصاد الدنيا كلها يختارنى حتى لو خيروه بيني و بين الدنيا كلها يختارنى
صمت
على / انا اسف اوى انا
نور / بحبك و هختارك و لو خيرونى بينك و بين الدنيا كلها هختارك يا على على فكره يا على انا بقي جربت كل المشاعر دى جربت انى اتحب و جربت انى اترمى جربت انى اتعلق بحاجه و ما اطولهاش و جربت لو طولتها جربت كل حاجه بس مش عارفه اقولهالك ازاى انا احساسي معاك و لا حاجه من دول احساس جديد و مختلف انت ظهرتلى فى اكتر وقت كنت محتاجاك فيه و وقفت جنبى من غير مقابل انت الوحيد اللى ما بصيليش بصه الشفقه وقت ضعفى بالعكس كنت دايما بتقوينى و تحسسنى ان الحياه لسه ما انتهتش
على / عشان هى لسه ما انتهتش فعلا
نور / دى لسه بتبتدى يا على
على / انا كنت متوضي عشان اصلى
نور / روح يا على روح و صلى و انا كمان هتوضي و اصلى و ادعيلك و انت ادعيلى ادعيلنا ربنا يجمعنا فى طاعه و يهدى سرنا
على / امين
نور / هبقي اكلمك تانى الصبح
على / هستناكى
نور / سلام يا حبيبي
على / سلام يا نو.. يا حبيبتى
صمت ثوانى و بعدين نور تقفل السكه على يبص فى الموبايل و يحطه و يقوم يصلى
…………………..
فى شقه ندى تانى يوم
نور بتغلى الببرونات و ندى بتغسل المواعين
نور / اول مره يقولى يا حبيبتي
ندى بتسمع و ماسكه الطبق فى ايدها تحت المايه و هى و نور مدين ضهرهم لبعض
نور / تعرفى امبارح قالى كلام حلو اوى فضلت سهرانة طول الليل افكر فيه قد ايه على ده انسان شفاف بيبي فى نفسه كدا
ندى / قالك ايه اكتر من حبيبتي
نور / قالى علميني احب علميني اتحب قالى اصبرى عليا قالى انه عمره ما جرب احساس ان حد يتمسك بيه قالى انه مش
صوت ندى بتقع فى الارض نور تبص و تصرخ حسام يدخل جرى يشيلها و يحطها على السرير و يحاول يفوقها
…………………
فى شقه امانى
جرس الباب يضرب امانى تروح تفتح تلاقى على
على / السلام عليكم
امانى / ازيك يا حبيبي ادخل اتفضل اهلا و سهلا اهلا و سهلا
على يدخل يقعد
على / انا اسف انى جيت من غير ما اتصل بس اتصلت بنور كتير ما بتردش قلقت
امانى / تلاقيها نسياه صامت جوه و لا وخداه معاها فوق و بعدين ما تقولش كدا يا حبيبي دا بيتك
على / هى فوق يعني عند ندى .. وحسام تمام كويس اطمنت
امانى تقوم تجيب الموبايل
امانى / هنديهالك مش عارفه هى هتفضل مسحوله وراهم لحد امتى و لا دى لما تسافر بالبت لبنان هتعمل ايه دى ما بتقدرش تغسل طبقين و بتعمل مغم عليها
على القلق يبان عليه
على / ايه ده هو فى حاجه و لا ايه
امانى / لا لا ما تقلقش اهو الحركتين بتوع كل مره تدوخ و تقع و تقلب البيت و تقوم زى القرده بس عشان ما حدش يطلب منها حاجه قال يعني بنطلب
على يقوم يقف
على / هستاذنك اطلع اطمن عليها
امانى / يا ابنى انت لحقت تقعد هكلملك نور اهو
على يفتح باب الشقه و يطلع فوق بيجرى يضرب الجرس نور تفتح
نور / على ازيك
على / فى ايه مامتك قلقتنى
نور / هبوط حسام ركبلها محلول ملح و بقت كويسه و متابعين مع الدكتور على التليفون
على / طب ما روحتوش مستشفي ليه
نور / ما هى كويسه اهو و حسام عمل اللازم و الحمد لله انه دارس اكلينيكال و لا مش عارفه ايه دى يعني فاهم
على / طب ممكن اطمن عليهم و لا ما ينفعش
نور / لا ازاى اتفضل اتفضل ثوانى هدخل ابلغهم انك جيت
على يدخل يقف فى جنب و نور تدخل و على متابعها لحد ما تدخل الاوضه تلاقي حسام واخد ندى فى حضنه و بيلعب فى شعرها
حسام / لا ما بتاكليش على الاقل ما بتاكليش كويس و بعدين انا بقيت بخاف عليكي اوى يا نونو انتى ناسيه انك بترضعي
نور / عامله ايه دلوقت احسن ؟
حسام / بتاع الدليفرى وصل ؟؟ الفلوس بره على البوفيه
نور / لا دا على ما اعرفش عرف ازاى و جاى يطمن على ندى
حسام / خليه يدخل
ندى / مش قادره اقابل حد
حسام / عيب يا نونو دا ضيف و جاى يقوم بالواجب خليه يدخل يا نور
ندى تبص لحسام باستغراب تحاول تعدل نفسها يشدها لحضنه
حسام / ارتاحى انتى تعبانه
على يدخل يقف على الباب
حسام / ازيك يا علوه معلش مش هقدر اقوملك بقي انت مش غريب
على / طنط تحت قالتلى انك تعبانه
ندى / بقيت احسن الحمد لله … عن اذنكوا هروح الحمام
ندى تقوم حسام يجرى يسندها
حسام / على مهلك يا حبيبتي على مهلك
نور / اعملك حاجه تشربها
على / لا انا اطمنت عليهم و خلاص هنزل تحت
نور / هجيب حبيبه و اجى
على / تمام ياريت برده
نور تبتسم و توصل على لباب الشقه و تقفل الباب تلاقي حسام خارج من جوه
حسام / هو مشي ليه
نور / نزل يستنانى تحت هاخد بيبو معايا و اسيبكوا ترتاحوا و كدا كدا انت طالب دليفرى مش هتحتاجنى
حسام / ما اتحرمش منك يا احلى نور فى الدنيا
نور / خد بالك منها بقي
حسام / بتوصيني على قلبي يا نور
نور تبتسم و تدخل تشيل حبيبه و شنطتها و تطبطب على كتف عمها
نور / ندى زى الفل ما تقلقش هخلى بيبو معايا
نور تمشي و حسام واقف على باب الحمام ندى تطلع
حسام / نزلوا و خدوا حبيبه
ندى / خير ما عملوا هروح اطمن على بابا
ندى تدخل تنام جنب ابوها
حسام / هروح اروق الدنيا ارتاحوا
حسام يقفل الباب مصطفى يحسس على شعر ندى ندى تقوم تقعد
ندى / انا كويسه ما تخافش
مصطفى يبصلها بحزن
ندى/ كنت مستنيه ايه يعني يبكى عليا العمر كله يعني نور طيبه و بنت حلال عمرى ما شوفت منها حاجه وحشه
مصطفى يمسك ايد ندى
ندى / قالها يا حبيبتي لحق يحبها … طب ما هى تتحب برده .. و بعدين ما انا عندى اللى بيحبنى انا كمان ايه يعني
مصطفى يبصلها و ييص فى الارض ترفع عينه فى عينها
ندى / الدنيا ما بتقفش على حد و انا عندى ناس بيحبونى و بحبهم … انت و حبيبه … و حسام … حت لو علاقتى بيه بايظه بس هو بيعمل كل حاجه و على يدك … مش سهله بس هحاول … هاخد اللى بيحبنى و زى ما نسيني هنساه زى ما حب غيرى هحب غيره مش هقف اتفرج عليه و هو بيكمل حياته و اموت عشانه انا ما حدش بيموت عشانى
مصطفى يطبطب على ايدها تمسح دموعها بايدها التانيه
ندى / سامحنى انت الدكتور قالك تبعد عن التوتر و انا … بس انا ما ليش غيرك اكلمه … انا وحيده اوى وحيده اوى يا بابا وحيده اوى اوى
ندى تعيط و تترمى فى حضن ابوها يطبطب عليها و يحسس على شعرها
…………………….
فى بلكونه امانى
على واقف بيشرب شاى نور تدخل شايله طبق كيك
نور / لسه خارجه من الفرن حالا
على ياخد واحده و يبتسم و يدوقها
على / حلوه اوى ما تتاكلش غير كدا تسلم ايدك
نور / لا دى ماما عملتها عشانك بس انا بعرف اعملها والله
على / اساسي
نور / مالك .. شكلك مضايق اوى
على / مامتك بتقولى ندى هتعمل ايه مع حبيبه فى لبنان افرضي اغم عليها و حسام فى الشغل حبيبه هتعمل ايه
نور / و هى ماما بتشيلك انت هم ندى ليه
على / على سياق الحديث يعني
نور / لا ما تشغلش بالك حسام مش هيسيبهم لوحدهم انا متاكده انه هياخد باله منهم كويس
على / حسام طبعا
نور تحط طبق الكيك على ترابيزه صغيره فى جنب
نور / يعني انت هتكون احن على حبيبه من ابوها مثلا بص انا عارفه انه غلط جامد زمان بس دلوقت الوضع اختلف بيحاول فعلا بيحاول انت مش عايش معانا و لما هتيجي هتشوف بعينك دا بيعملها كل حاجه هى و عمى دا بيحبهم اوى يا على
على يهز راسه
نور / انت لسه زعلان من حسام صح
على / مرات اخويا بتتعالج نفسيا بسببه اخويا ساب الجامعه اللى تعب سنين عشان يبقي معيد فيها بسبب اخوكى ندى شخصيا عايشه معاه بسببى واخده بالك بسببى بسبب انى زى العبيط شوفت واحده مغم عليها جريت اساعدها و هى اللى بتدفع التمن
نور باصه فى الارض
على / مش لوحده اللى اجرم مرات ابويا كمان بس انا عارف عينه مرات ابويا يلا ماتت ما تجوزش عليها الا الرحمه الدور و الباقي على اللى لسه عايش
نور / اللى هو اخويا يا على
على / ابويا الله يرحمه ما كانش يجرؤ يعمل ربع اللى حسام عمله و شوفى انا و اخواتى عانينا ازاى يا نور
نور / حسام غير باباك حسام بيعمل كل ده عشان يحافظ على بيته مش عشان يخربه حسام عمل كل ده عشان بنته ما تترباش فى حضن راجل غريب باباك عمل العكس
على يبصلها
نور / انا بحاول استوعبك بقدر كل اللى انت عشته بس انا كمان عشت معاك كتير منه و اعرف حسام و ندى اكتر منك و اقدر اقولك ان ندى اختى زيها زى حسام و عرفاها و عارفه عيوبها و طبعها كويس ندى صغيره لسه مش عارفه مصلحتها
على / ما هو عشان اخوكى اتجوزها غصب صغيره
نور / بس حسام حرفيا بيقدملها اكتر من ما انت متخيل و بعدين ان كان حسام غلط فعمى كمان غلط
على يمسك فى السور و يبص على الشارع
نور / انت و حسام علاقتكوا متوتره و انا متفهمه جدا ده بس دا اخويا و دى اختى و انت خطيبي انا فى النص واخد بالك انا اللى فى النص
على / معاكى حق اهدى انا اسف
نور / اجبلك كيك تانى و لا شاى و لا
على / اللبسي تعالى نخرج ناخد بيبو و نخرج نغير جو
نور / ياريت حقيقي يا ريت انا داخله اللبس
نور تدخل جوه و على بيحاول يمسك نفسه
………………
فى اوضه مصطفى
حسام يفتح الباب يلاقي ندى نايمه فى حضن ابوها
حسام / انا هدخل اريح شويه و هسيب الباب مفتوح لو احتاجت اى حاجه اضرب الجرس
مصطفى يضرب الجرس حسام يستغرب و يدخل يقعد جنبه
حسام / خير محتاج ايه اجبلك اكل او شرب او اى حاجه
مصطفى يمسك ايد حسام و يحطها على راس ندى
حسام / انت اكتر واحد عارف انا قد ايه بحبها
مصطفى يعدى ايد حسام على شعر ندى كذا مره
حسام / انت عاوزنى اخد يالى منها
مصطفى يهز راسه
حسام / طب انا اقدر اعمل ايه اكتر من كدا و انا اعمل ما على يدك دا انا امى بقت مسميانى الدلدول من كتر ما بحاول اسعد ندى مهما كان القرار
مصطفى يعدى ايد حسام تانى على شعر ندى بالراحه حسام يبصله بعدم فهم
حسام / طب اعمل ايه اطبطب عليها يعني
مصطفى يهز راسه و يعمل بايده قلم
حسام / اجبلك ورقه و قلم
مصطفى يهز راسه حسام يبتسم و يطلع بره جرى و يرجع بورقه و قلم مصطفى يكتب بخط مهزوز جدا و القلم كل شويه يقع من ايده و حسام يساعده و بعدين ياخد الورقه و يقراها
حسام / احتويها ما لهاش غيرك … طب ما انا كمان ما ليش غيرها
مصطفى يفرد نفسه بتعب
حسام / ما انا مش فاهم اعمل ايه بالظبط… بص نام انت و انا هفكر و نتكلم تانى بس اكيد هنتكلم ما تقلقش خصوصا انك اخيرا هتقف معايا و تساعدنى يبقي اكيد هنتكلم ارتاح انت بس دلوقت
حسام يعدى ايده على شعر ندى بالراحه و يعدل الغطا عليها و على مصطفى و يطلع بره و يسيب الباب مفتوح
……………………….
فى الملاهى
نور / بص هو اختيار غريب لخروجه بصراحه خصوصا اننا لوحدنا و معظم الالعاب مش هينفع مع بيبو و كدا بس انا شخصيا بحب الملاهى جدا طفولتى كلها
على / انا مش فاكر اخر مره جيت الملاهى امتى انا مش باجى اللعب باجى اتفرج على الناس و العيال باجى اطمن ان مش كل الناس زيي
نور / انت ما كنتش بتيجي خالص
على / مره جيت و انا صغير بس ما لعبتش و لا لعبه عبير لعبت لعبتين و روحنا على قد فلوسي و لما روحت جوز امى ضربنى و اتخانق مع ماما جامد و ساب البيت و مشي اسبوع و لا حاجه
نور / ليه كل ده
على / اصلي كنت سارق الفلوس
نور / يا نهار ابيض
على / انا كنت محوش فلوس مش فاكر ايه اللى حصل بالظبط بفتح الحصاله لقيتها فاضيه اه افتكرت محصل الكهربا جه و ماما ما كانش معاها تحاسب ففتحت حصالتى انا و عبير و خدت كل اللى فيها و انا كنت وعدتها فروحت و هم نايمين فاتح محفظته و اخدت نفس الفلوس اللى كانت فى حصالتى و خدت عبير و روحنا الملاهى
نور / و هم نايمين
على / اه ما انا لو استنيت الصبح هيعرف و هنضرب على الفاضي
نور / كان ممكن تتوهوا كان ممكن عبير تتاذى الوقت اكيد كان متاخر و انتوا طفلين لوحدكوا فى الشارع
على / ما انا كنت عيل و ما بفكرش و بعدين ما انا كنت برده عبيط و فاكر انى راجل و هقدر احميها
نور تبصله بحزن و هو باصص بعيد
على / قال يعني لما ماتت ماتت فى الشارع ما كان فى بيتها و اوضتها و على سريرها
نور / و بعدين لما روحت و عرفوا انك سرقت الفلوس
على / هاه
نور / ساب البيت اسبوع ليه
على / اصرفى انتى على البيت بقي … اكليهم
نور / و مامتك عملت ايه
على / قضيناها بقي لقمه بجبنه و انا كنت بشتغل و اجيب العشا و انا مروح
نور / ساندوتشين الشاورما لعبير
على / ماما كانت بتاخد واحد
نور / و انت
على / انا اكلت فى المحل حتى لو ما اكلتش انا كنت سعيد انه ما كانش موجود فما كانش هامننى اكل او غيره كنت فاكر انه لما يمشي ممكن ابعت اجيب عمر و نقسم اللقمه سوا … انتى بتتكلمى فى اللى فات ليه دى حاجات عدت عليها سنين
نور / انت اللى حكيت
على / انا باجى هنا انسي كل ده بتفرج على العيال بتلعب و تجرى و تضحك بنسي انى كبرت بتخيل نفسي بجرى معاهم
نور / طب ما تيجي نجرى معاهم
على / ازاى
نور / اجرى تيجي نتسابق مين يوصل للعبه اللى هناك دى ان كسبتك تعزمنى على غزل البنات
على / و ان كسبت انا
نور / هتعزمنى برده انت الراجل على فكره احنا النظام الانجليزى ده ما بياكلش معانا
على / ههههههههههههههه اكيد طبعا هو انا اطول اصلا ماشي هاتى بيبو اشيلها انا و يلا نتسابق
نور تديله حبيبه و تشيل هى الشنطه كروس
نور / واحد اتنين تلاته
نور و على يجروا وسط الناس و هم بيضحكوا
………………
فى اوضه مصطفى
مصطفى نايم ندى تصحى تدعك فى عينها تروح تبص على حسام نايم تروح الحمام تسرح شعرها و تظبط منظرها تطلع الصاله تلاقي علب بيتزا على السفره تمد ايدها تاخد شريحه و تطلع البلكونه تبص على السما و النجوم و هى بتاكل تبص فى الشارع تلاقي على واقف بيضحك مع نور و بينزلوا دباديب من العربيه و محتاسين فى شيلها و شيل حبيبه و يدخلوا هم الاتنين العماره تبص للبتزايه فى ايدها و تدخل تفتح باب الشقه و تقابلهم على السلم
نور / ازيك احسن دلوقت
ندى تمد ايدها تشيل حبيبه من على
ندى / كنتى سبتيها يا بنتى تلاقيها تعبتك و لا حاجه
نور / ابدا دى نسمه
ندى / طب هسيبكوا بقي عشان ما ابقاش عازول شكلكوا راجعين تعبانين
على / امال حسام فين
ندى / نام يا قلبي تعبان خالص اصله فضل جنبى طول النهار واحد غيره كان بص من بعيد و اطمن و مشي اصل ايه اللى هيقعده جنبى و انا تعبانه ما يخرج و يشوف حياته
نور / قوليله اصله مش مصدق قد ايه حسام بيحبك
ندى / لا ما انا ما اديش انى ممكن اتحب مع انى اتحب والله مش كدا برده يا نونو
نور / طبعا يا قلبي انتى فى زيك بقولك ايه ما تيجي تتعشي معانا
ندى / و لا لقمه حسام جايبلى البيتزا التشيكن كريسبى زى ما بحبها بالظبط حراقه نار
نور / الف هنا
ندى / بس حلوه الدباديب دى كلها انتوا سرقتوا محل لعب اطفال و لا ايه ههههههههههههههه
نور / ههههههههههه لا و انتى الصادقه كسبناهم فى الملاهى هنزوق بيهم اوضه بيبو فوق عشان لما تكبر و تلعب بيهم نقولها انها كانت معانا و احنا بنكسبهم
ندى تبص لعلى ساكت و بيحاول يتهرب من عنيها
ندى / كان عندى زيهم فى بيت بابا … كسبتهم من الملاهى برده بس لقيتهم متربين خفت يجيبوا لبيبو حساسيه رميتهم فى الزباله
نور / لا والله اهو دول نضاف خالص اهو و على العموم انا احتياطى هغسيلهم اضمن حاجه
ندى / ما تتعبيش نفسك احنا خلاص مسافرين لبنان ابقوا خلوهم لولاد عمر و أية ان شاء الله بقي … يا خبر انا قليله الزوق اوى عامله زى العازول بالظبط موقفه خطيبك على السلم و عماله ارغى فى كلام ما لوش اى لازمه ادخلوا ارتاحوا و انا هاخد بيبو بقي و اطلع يلا هتعوزى حاجه
نور / تسلمى يا قلبي لو عوزتى اى حاجه رنيلى انا صاحيه
ندى / ما اتحرمش بس ما افتكرش هحتاج ما حسام معايا فوق يلا عن اذنكوا
ندى تاخد حبيبه و تطلع و على واقف باصص فى الارض
نور / هههههههههههههههه مجنونه اقسم بالله يلا يلا تعال ادخل
على / لا كفايا كدا النهرده انا طلعتك بالحاجه اهو همشي بقي عشان لا عديت على المحلات و لا شوفت اللى ورايا
نور / تمام ابقي كلمنى لو فضيت
على يهز راسه و يجي ينزل نور تمسك ايده يقف و يبصلها تسحب ايدها
نور / شكرا النهرده كان يوم حلو اوى بجد انبسطت جدا
على / و انا كمان انبسطت اوى عن اذنك
على ينزل و نور تدخل جوه و ندى بتابعهم على السلم من فوق تدخل شقتها و هى هتطق تبص لحبيبه و تروح تحطها جنب ابوها نايم و تروح تبص على حسام نايم و هى بتغلى تبص لنفسها فى المرايه و تبتسم باسطناع و تروح تنام فى حضن حسام حسام يصحى و يبصلها و هى فى حضنه تشد ايده تخليه يحضنها يبتسم اوى و يحضنها اوى من ضهرها
حسام / هو انا مت و دخلت الجنه و لا ايه
ندى / و هى دى الجنه بالنسبالك
حسام / و اكتر مما كنت اتخيل كمان
حسام يحضنها اكتر
ندى / انا زهقت من قاعده البيت ما تخرجنى بكره
حسام / اؤمرى و انا انفذ
ندى / تعال نسافر السخنه يومين اهى ساعه بالعربيه اى فندق او شقه نبعد عن كل اللى هنا انا و انت و بس
حسام / و بس
ندى تلف و تبصله
ندى / و بس
حسام يهز راسه و هو مش مصدق نفسه
حسام / انا و انتى و بس
حسام يحاول يبوسها تقوم تقعد يستغرب و خيبه الأمل تظهر على وشه
…………………..
- يتبع الفصل التالي اضغط على ( رواية سلف و دين ) اسم الرواية