Ads by Google X

رواية سلف و دين الفصل الثامن و الثلاثون 38 - بقلم لولو محمد

الصفحة الرئيسية

  رواية سلف و دين كاملة بقلم لولو محمد عبر مدونة دليل الروايات 


 رواية سلف و دين الفصل الثامن و الثلاثون 38

ندى / انا هقوم اطمن على بابا
حسام / قومى و اغسلى وشك و ظبطى نفسك كدا و انا هاخدك افسحك احلى فسحه
ندى / مليش مزاج اخرج
حسام / خلاص مفيش مشاكل فى اصلا فيلم جامد على التليفزيون و تعرفى انا واخد من واحد صاحبى فلاشه عليها شويه افلام انما ايه جامده لسه ما اتعرضتش كلها ايه رايك
ندى / حلوه الفكره دى
حسام / انا هنزل اصلى الجمعه و اجيب فطار و ساقع و دره نعمله فشار و فاكهه و حلويات و تسالى عشان ما يبقاش ناقصنا حاجه فى حاجه نسيتها
ندى / لا حلو اوى كدا
حسام/ ندى
ندى / ايوه
حسام / انتى كويسه
ندى / اكيد هيكون مالى يعنى
حسام / دا كل اللى يهمنى
ندى تبتسم و تمشى
……………………………………………
فى شقه امانى
امانى / لا ما ينفعش طبعا الخطوبه على العروسه
نور / ليه يا ماما هى مصاريف و خلاص
امانى / يا بنتى مش حوار مصاريف دا فرح و دى شبكه و دى حاجه و دى حاجه
نور / يا ماما انا اصلا ما كنتش ناويه اعمل خطوبه اصلا و لا فرح هو كتب كتاب محترم و خلاص

امانى / و ليه ما تكيديش العوازل بفرح عليه القيمه هو يعنى على ما لوش نفس يفرح و لا ايه
نور / ما اعرفش بس بيتهيالى الموقف هيبقى وحش اوى
امانى / بصى لو على المصاريف ابوكى ممكن يكلم على يشيل نص الفرح و كدا ما حدش يقدر يكلمنا ايه رايك
نور / بصى فكرى انتى و بابا و قرروا بسرعه عشان الفرح يوم الخميس و لو عملته معاهم هيبقى فى ورايا مليون حاجه اعملها
امانى / ما تشيليش هم احنا و احنا بنجيب الشبكه هنتكلم فى الموضوع ده و فى موضوع تانى ابوكى قالى عليه امبارح يارب على يوافق عليه
نور / موضوع ايه ده
………………………………………
فى شقه منال
منال / على و عمر هينزلوا بكره يبصوا على القاعات و انا و انتى هنروح للكوافيرات و الاستوديوهات و نختار و نتفق الحاجات دى لازم تخلص بكره باذن الله
أية / انا مش فاهمه ليه السربعه دى
منال / عمر مش طايق روحه هيموت و يرجعلك
أية / و دى حاجه حلوه و لا وحشه
منال / معقول يا أية انتى اللى تقولى كدا
أية / انا اقصد حاجه حلوه و لا وحشه ليه هو تفتكرى مصلحته انه يكمل معايا
منال/ عيب الكلام ده عمر ما لوش غيرك انتى و هو بتكملوا بعض لا هو هيكون سعيد مع غيرك و لا انتى هتكونى سعيده مع غيره
أية / طب ايه تانى فاضل
منال / فاضل اننا نجهز عشان ننزل نشترى شبكه على
أية / هو انا لازم اجى
منال / الله مش كفايا امبارح
أية / مش عارفه
منال / انك تستخبى من الناس مش هو الحل فكيها و اخرجى و حطى صبعك فى عين الطخين انتى ما غلطتيش و لا عندك اى حاجه تتكسفى منها
أية تبصلها منال تشدها
منال / قومى يلا هتاخرينا قومى نلبس الله
…………………………………..
فى كافيه بالليل على و نور قاعدين على ترابيزه و الباقى على ترابيزه
نور / انا بجد مش قادره اصدق نفسى من الفرحه
على / يارب علاطول
نور / تعرف انا بجد حاسه انى بحلم عارف كل حاجه بتحصل بسرعه و انا مش فاهمه اى حاجه بس انت كنت شاطر اوى و قدرت تقنع ماما على فكره دى مش حاجه سهله ابدا
على / لا واضح ان حماتى بتحبنى
نور / بصراحه اه و من زمان اصل ماما ليها نظره فى الناس تعرف ماما عمرها ما طاقت مروان
على / طب كويس انك فتحتى السيره اولا انا ما بحبش ابص ورا ضهرى ياريت ما يحصلش اى مقارنه بينى و بين مروان باى شكل كان سواء فى صالحى او فى صالحه نهائى انا هعتبر نفسى اول واحد فى حياتك و انتى اعتبري نفسك اول واحده فى حياتى و نتعامل على الاساس ده ممكن

نور / اكيد لو ده هيريحك بس على اعزرنى عشان نقفل الموضوع ده للابد
على / اتفضلى
نور / هو انت و خطيبتك القديمه سبتو بعض ليه
على / بسبب الاحداث اللى حصلت ما رضيتش تكمل
نور / و انت واخدنى علاقه تعويضيه عنها
عل / لا انا و هى ما عدناش ننفع لبعض و عشان كدا بقولك انتى هتكونى اول واحده فى حياتى و هتعامل معاكى على الاساس ده و انتى و شطارتك بقى تملى مكانها بجد
نور / و لو ما قدرتش
على / يبقى هيفضل العهد اللى بنا هتقى ربنا فيكي لابعد حد
نور تبتسم محمد يدخل
محمد / انا عارف انى عازول رزل بس انا كنت عاوزك فى كلمتين
على / اؤمر يا عمى
محمد يبص لنور تقوم و يقعد مكانها
على / اتفضل خير
محمد / بص يا على انت قولت انك بتدور على شقه
على/ حصل
محمد / طب انا رخصه البيت عندى ارضى و اربع ادوار
على / تمام
محمد / ايه رايك تبنى شقه فوق مدام معاك فلوس و تكتبها بالنص بينك و بين نور
على / والله هو عرض ما يترفضش بس حضرتك متاكد انها فكره كويسه
محمد / على العموم يا ابنى فكر فيها بالراحه انا كدا كدا كنت مستنى ربنا يكرمنى باى قرشين و انا كنت هبنيها و اكتبها باسم نور و انت و نور هتبقوا ايه مش واحد
على / بص يا عمى انا لو هوافق يبقى ليا شرط واحد بس
محمد / خير يا ابنى
على / هى طبعا فكره ممتازه و انا فعلا لو لفيت المنطقه كلها مش هلاقى مكان انسب من ده و خصوصا اننا هنبقى عيله و كدا بس انا هكتب الشقه باسم نور مهرها يعنى ايه راى حضرتك
محمد / بس دا حقك
على / و انا مش معترض بس ده هيريحنى اكتر
محمد / خلاص يا ابنى انا ما عنديش مانع
على / باذن الله من يوم السبت نبدا نشوف موضوع المبانى ده
محمد / ههههههههههههههههههههههه دا انت مستعجل بجد بقى
على / ههههههههههههههههههههههههه
……………………………..
فى شقه ندى تانى يوم
ندى / الف مبروك يا نور انتى طيبه و تستاهلى كل خير و صدقينى مش هتلاقى احسن من على
نور / بجد الخروجه كانت نقصاكى اوى
ندى / انا خفت اجى ابوظها زى امبارح انا بجد تعبانه اوى و مش عارفه مالى
نور / انا كمان ملاحظه ده بس تعرفى احلى حاجه فى الموضوع ايه
ندى / ايه
نور / على اتفق مع بابا انه هيبنى الشقه اللى فوقك و يكتبها باسمى و نتجوز فيها يعنى انا و انتى عمرنا ما هنفترق
ندى تبتسم ابتسامه عريضه مليانه وجع
نور / كنت متاكده انك هتفرحى زيى ايه رايك تنزلى معايا بكره نجيب الفساتين انا بثق فى زوقك جدا
ندى / واضح
نور / قصدك على البلوزه يخربيتك انتى لسه فاكره هههههههههههههههههههههههه بس معاكى حق انا صحيح ما كنتش مقتنعه بيها وقتها بس كنت هندم اوى لو ما كنتش سمعت كلامك و سبتها
ندى / هو كلو فى الاول و الاخر نصيب
نور / صح طنط منال و أية حجزوا الكوافير و الاستوديو فانا بقول نروح معاهم و خلاص ايه رايك
ندى / اللى تشوفيه انتى العروسه
نور / كدا نجيب الفستان بكره و نفضى بقى للتظبيط عشان انا عاوزه نبقى احلى اتنين فى الدنيا
ندى / باذن الله
نور / تعرفى لو كانت عدتك خلصت كنت اقنعت على نتجوز و نعمل زى عمر و يبقى فرح ثلاثى والله كنت تبقى فكره مطرقعه على الاخر
ندى / نور ما تنزلى تجيبى الماسكات بتاعتك و تيجى نعد نعمل ماسك بتاع المره اللى فاتت ده
نور / تصدقى فكره جامده انا هنزل و اجى علاطول
ندى / تمام
نور تنزل و ندى تدخل الحمام تفضل تغسل فى وشها
///////////////////////////////////
ندى / فرح ثلاثى انا و على فى الكوشه فى نفس اليوم بس كل واحد بيتجوز حد تانى انا و هو بنرقص فى نفس القاعه بس كل واحد بيرقص مع حد تانى انهى وجع ده بس يارب انا راضيه بحكمتك و عارفه انك مش بتعمل فينا حاجه وحشه بس حقيقى محتاجه اى اشاره اى علامه ان ده خير يارب
///////////////////////////////
صوت خبط على الحمام ندى تفتح تلاقى ابوها قاعد على الكرسى تقعد على رجلها
ندى / مالك يا بابا فى ايه ناقصك حاجه
مصطفى عنيه مليانه دموع ندى تمسح على خده
ندى / ما تخافش يا بابا انا قويه اوى عادى يعنى ما انا كدا كدا عمرى ما كنت هتجوزه عادى يعنى و اهو نور اختى برده و هى اولى من الغريب
مصطفى يمسك ايد ندى تبتسم
ندى / اوعى تخاف عليا انا خلاص نحست الوجع ده بقى عندى مزاج لو فى يوم قلبى ما وجعنيش احس ان فى حاجه غلط اعصابى تتعب اقولك انسى و انبسط ما حدش بياخد اكتر من نصيبه يا بابا
نور تدخل
نور / جاهزه
ندى / جاهزه اقفلى الباب على ما ادخل بابا اوضته و ابص بسرعه على حبيبه
…………………………………
فى الحنه عند منال
الكل متجمع فى شقه منال و بيرقصوا و يغنوا فى الصاله مع عمر و البنات جوه فى اوضه مع أية
فى البلكونه على واقف و حسام يدخله
حسام / سبحان الله عمرى ما كنت اتخيل اننا نبقى نسايب او حتى نقف نتكلم كدا عادى زى باقى البشر
على ما يردش
حسام / ما سالتش نفسك انا ليه سبتك تتجوز نور
على / عشان ما عرفتش تمنعها صدقنى لو كنت تقدر تعمل حاجه كنت عملتها
حسام / ما انكرش كنت مضيق فى الاول بس اكتشفت فى ساعتها قد ايه كنت غبى انت بتقدملى حلم عمرى على طبق من دهب جوازك من نور لغى فكره ارتباطك بندى نهائى حتى يوم قرايه فتحتكوا كانت اول مره ندى تعرف انها عمرها ما هتلاقى الامان و لا الدفا الا معايا يوميها ندى نامت فى حضنى طول الليل
على يبصله
حسام / لا ما تفهمنيش غلط كلو الا الحرام اه كان حضن مش اكتر وكل ما هتجرحها اكتر كل ما هتقرب منى انا اكتر بس انا هقولك سر انا اللى حبست مروان لما زعل اختى و انا اللى خرجته لما ردلها كرامتها ما تبقاش غبى زيه و تخلينى احطك فى دماغى و ائذيك و استغل الهدنه اللى بينا انت دلوقت حبيبى ابو نسب و لا ايه
على يبصله من فوق لتحت و يدخل جوه
………………………………..
جوه عند أية فى الاوضه
منال تقوم نور ترقص و هى بتقول لا يتحايلوا عليها توافق و ترقص أية تقوم تقعد جنب ندى و تمسك ايدها ندى تبتسملها
أية / عامله ايه
ندى / كويسه الحمد لله مبروك
أية / انا والله حاولت امنعه بس هو بيعمل كدا عشان يبقى جنبى
ندى / صدقينى ما عادتش فارقه معايا بصى حواليكى كل الناس دى فرحانه اشمعن انا اللى هزعل حد فيهم هيحس بزعلى حد هيبطل فرحته عشانى لا … انسى يا أية الناس و الدنيا عيشى لنفسك العمر قصير اوى يا أية و الموت بيجى فى ثانيه
أية تهز راسها و تضغط على ايد ندى تبتسملها
………………………………
تانى يوم فى الكوافير
منال / حصنتكوا بكلمات الله التامه من شر كل شيطان و هامه و من شر كل عين لامه لولولولولولولولى يلا يا بنات اتحركوا اتحركوا الزفه مستنيه
أية تطلع اول واحده بفستان ابيض زى الملاك عمر يجرى عليها و يمسك ايدها و يديها البوكيه
عمر / ايه القمر ده
أية تنكسف و تبص فى الارض ندى تطلع وراها بفستان سواريه سمبل اسود وهم على و حسام يتعدلوا قمر بيتحرك تبص بعينها على على اللى عينه هتطلع عليها بكل شوق و تروح ناحيه حسام يبوس راسها و يطلع بوكيه ورد و يديهولها تبتسم و على متابع اللى بيحصل يلاقى نور واقفه قدامه بفستان خطوبه بنفسجى و مبتسمه
نور / اللى واخد عقلك يا سيدى
على / ايه القمر ده اتفضلى
على يناول نور بوكيه الورد و يفتحلها باب العربيه تركب و الكل يركب و الزفه تطلع
…………………………
فى القاعه
أية و عمر يدخلو الاول على اسماء الله الحسنى و بينهم مسافه يدخل على و نور و ندى و حسام قاعدين على ترابيزه قريبه وسط الاهل و منال قاعده جنب ندى شايله حبيبه و على كل شويه يبص على ندى و هى بصاله ما بتشلش عينها من عليه العرسان يروحوا يقعدوا فى كوشتين جنب بعض و الناس بتسلم عليهم
غاده / الف مبروك
عمر / الله يبارك فيكى
غاده / ما تخافش مش هطول بس كان لازم اجى اباركلك حتى لو انت ما عزمتنيش
عمر / انا اسف انتى احسن منى
غاده / مبروك يا عروسه
أية / فرحت اوى لما جيتى
غاده / ميرسى
عمر / ما تمشيش لو سمحتى انتى واحده مننا برده
غاده / كنت عن اذنكوا سلام
غاده تمشى و عمر يقعد أية تمسك ايده يبتسملها
الدى جاى / ياريت نفضى الاستايدج للعرسان للفيرست دانس
على يقوم يقف و يمد ايده لنور تقف و يساعدها تعدل فستانها و ندى نفسها بيعلى فى كل ثانيه حسام يمسك ايدها و يبوسها تبصله و عنيها بتتملى بالدموع و بتحاول تداريها على و عمر يوصلوا الدانس فلور و تبدا الاغنيه تشتغل ندى توطى على حسام و توشوشه
ندى/ هو مفيش عصير هنا اى حاجه مسكره
حسام / ثوانى
ندى تهز راسها و حسام يقوم يجرى منال تمسك ايد ندى ندى تبصلها و تبتسملها فى وسط الاغنيه عمر يشيل أية و يلف بيها وسط الصريخ و الزغاريط و على ما يعملش زيه و نور تبصله يبتسملها و يبص على ندى حسام جايبلها عصير و بيديهولها و بيلعب فى شعرها و يضحكها يبص على نور مبتسمه
الدى جاى / ياريت كل الكابلز اللى معانا يحبوا يشاركوا العرسان يتفضلوا
ندى تاخد بق من العصير و حسام يمدلها ايده تقوم و تتحرك معاه للدانس فلور توصل جنب على ما بيشيلش عينه من عليها تبتسمله و تشاور لأية بابتسامه مليانه وجع بتدارى بيها ضعفها
حسام / عقبال ليلتنا
ندى تهز راسها بنفس الابتسامه
حسام / تحبى تقضى شهر العسل فين
ندى/ و هسيب بابا و حبيبه لمين
حسام / اسبوع واحد حتى على الاقل نتفسح فيه
ندى / نبقى نشوف الموضوع ده بعدين اوك
حسام / انتى تؤمرى بس
ندى تبتسم حسام يلفها و يسحبها لحضنه على يبصلهم
نور / ربنا يهنيهم يارب
على يبصلها
نور / انت فى حاجه مضيقاك
على / ابدا ليه
نور / حساك متشتت كدا
على / ههههههههههههههه اصلى بخاف من الفرحه
نور تضحك بصوت عالى ندى تبص عليهم
على / اه والله زى ما بقولك كل ما افرح فى مصيبه تنزل على دماغى زى المرزبه
نور / عشان كدا عمال تبص يمين و شمال
على / يعنى
نور / تسمع عن حاجه اسمها سيبها على الله
على / حاضر
نور / شاطر
نور تقرص على من خده و هو يضحك و ندى متابعه
الدى جاى / ياريت كل اصدقاء العروسين يجوا هنا على المسرح
و يبدا يشغل اغانى نور تجرى تمسك ايد ندى و يرقصوا سوا ندى تبتسم
نور / مالك يا بت مخشبه كدا ليه
ندى / ابدا
نور / فاكره عملتى ايه فى فرحى دا انتى خربتيها رقص
ندى / وقتها كنت صغيره و بعدين انا ما اضمنش حسام و طنط يعدوهالى لو عملتها
نور تلف ندى
نور / دا فرحى يا بت
ندى / ربنا يتمملك على خير فرحنالك من قلبى
نور تحضنها و أية تدخل وسطيهم و يرقصوا سوا و الرجاله حواليهم على يوطى على عمر
على / اول درس نتعلمه فى الجواز ايه هو
عمر / ايه
على / مراتك دايما على حق و انت حمار
عمر / هههههههههههههه امال ادبحلها القطه الله يرحمها و لا ايه
على / قالتلى بلاش فرح و كتب كتاب على الضيق و خلاص كان معاها حق
عمر / حاسس بيك
على / بوظت فرحتى بيك و بنفسى يلا نصيبى بقى
عمر يحضن اخوه و يقفوا يسقفوا
…………………………….
فى شقه ندى بالليل
ندى قاعده قدام المرايا بتمسح المكياج و حسام قاعد على السرير بالقميص و البنطلون و قالع جاكت البدله و راميها على الكرسى وبيدى حبيبه ببرونه و بيبص عليها
ندى / ايه ؟؟
حسام/ معجب ولهان
ندى / بطل بقى
حسام / ليه ؟؟
ندى / خلصت هخش اغير هدومى فى الحمام
حسام / خد راحتك يا باشا
ندى / انا جعانه تاكل حاجه
حسام / هو انا اطول يا باشا ناكل سوا
ندى / بطل بكش بقى
ندى تسيبه و تروح الحمام و تاخد البجامه فى ايدها
حسام / ارضعى يلا عشان اللحق اوضب لامك عشوه يمكن ترضى عليا
……………………….
فى اوضه فى فندق
عمر / ايه رايك
أية / حلوه اوى
عمر / هنقعد هنا اسبوع و بعدين نسافر الغردقه اسبوع ايه رايك
أية / هو صحيح انا بقالى ياما اوى ما ادلعتش بس
عمر / ما تشيليش هم المصاريف الغردقه انا اللى دافعها عشان وعدتك بيها لكن هنا على دفعها بيكسب ودك يا قمر
أية / لا صارف و مكلف
عمر / هههههههههههههههههههههه المهم مزاج جنابك
عمر يروح يقعد على السرير و يهز المرتبه
عمر / حلو البتاع ده
أية / بس افرض يا عمر الشقه ما خلصتش فى اسبوعين
عمر / والله هو على واقف على راس الرجاله بس لو لاقدر الله حصل اى حاجه الحجه منال قالت نقعد عندها و هى هترجع البلد
أية / احنا تقلنا اوى عليها يا عمر مش لدرجه انها تسيب بيتها عشانها
عمر / هى بتعتبرنا عيالها يا يويو انا و على و انتى و ندى و نور صدقينى
أية / انا ما بحبش نور
عمر / ليه عملتلك ايه
أية / ما اعرفش ما بحبهاش كفايا اوى انها اخت حسام و كمان ندى …
عمر / أية ملناش دعوه ماشى الحوار ده مكلكع اوى و لعلمك نور نفسها ملهاش فيه اى ذنب رجلها جت فيه بالغلط زى ندى بالظبط بصى انا و انتى لينا دور واحد فى الموضوع ده اننا نساند على و نحسسه انه مش لوحده
أية / و ندى
عمر / ندى كدا كدا كانت هتتجوز حسام مش بمزاجنا يعنى و بعدين فى ايه يا أية فى اتنين يوم دخلتهم فى فندق حلو كدا و على اضواء الشموع يقعدوا يتكلموا فى الحاجات دى برضه
أية / امال يتكلموا فى ايه
عمر / ايوه انا اقولك تعالى بس كدا
………………………………
فى شقه ندى
ندى تطلع من الحمام تلاقى حسام بينيم بيبو فى سريرها و يبصلها و يحط صابعه على بقه
حسام / ششششششششش ما صدقت نامت اطعلى اطلعى
حسام ياخد ندى على المطبخ تسند على الرخامه يشيلها يقعدها
ندى / هههههههههههه بالراحه
حسام يفتح التلاجه و يطلع البيض و الجبن و العيش و الطماطم و الخيار
ندى / فى فى الرف ده برطمان النوتيلا على فكره
حسام يفتح رف من المطبخ و يطلع النوتيلا
حسام / تشربى حاجه مع الاكل
حسام يفتح التلاجه تانى و يطلع علبه عصير و يجيب بوله و يرب فيها البيض
ندى / هتلاحق على الدلع ده لو انا خدت عليه
حسام / والله كلو بتمنه
ندى تنزل من على الرخامه و تربع ايدها حسام يكب البيض فى الطاسه
حسام / هو ببلاش دلوقت عشان اوقعك بس بعد الجواز الوضع هيختلف انا مش هاكل عيالى يعنى كل حاجه و ليها تسعيره اه بقولك اهو
ندى/ و يا ترى عشوه زى دى تكلفنى كام بقى
حسام / عشر بوسات و حضن دا ارخص حاجه فى السوق و اسالى بره
ندى / و لو ما دفعتش
حسام / ههههههههههههههههه ياريت عشان اجمعهم و اخد حساب الاسبوع كله مره واحده
ندى تمسك سكينه و تقطع الطماطم و الخيار شرايح
ندى / قريت مره بوست على الفيس بيقول ان فى نوعيه من البشر بيجيلهم هوس بالحاجه طول ما هى بعيد و يعملوا المستحيل عشان يوصلولها و اول ما تبقى معاهم الهوس ده بيروح و بيزهقوا منها و يرموها
حسام يفضى الاومليت فى طبق و يحضن ندى من ورا و يمسك ايديها و يقطع معاها
حسام / جربينى شوفى هزهق منك و لا لا
ندى / و لما تتعور بقى هتبقى مبسوط
حسام / ناكل الاول و بعدين عورينى براحتك يلا
حسام يسيب ندى و يشيل اطباق و يطلع يحطها على السفره و هى تشيل حبه و تروح وراه
……………………………..
فى شقه على
على نايم على السرير بيتكلم فى التليفون
نور / بجد كان يوم حلو اوى
على / الحمد لله
نور / هتعمل ايه بكره بقى
على / هصحى من النجمه اروح الشقه اشوف العمال وصلوا لفين و احاسبهم و بعدين هعدى على المحلات اتابع الشغل و بعدين هطلع على الفندق اصبح على العرسان انا و الحجه و نشوف لو ناقصهم حاجه و بالليل عندى معاد مع الحج والدك على القهوه
نور / اشمعن على القهوه يعنى ما تيجوا البيت احسن
على / لا ما هو مش هنبقى لوحدينا باباكى يا ستى جايبلى مقاول عشان نبنى الشقه فهنقعد و نتفق و كدا
نور / اه فهمت بس ليه كل حاجه فى وقت واحد كدا مستعجلين على ايه
على / و استنى ليه
نور / لسه متوتر و خايف من بكره
على / لا هسمع بنصيحتك و اللى يحصل يحصل
نور / شاطر
على / انبسطوا عندكوا من الفرح
نور / بص هو لو على الفرح انبسطو
على / حاسس ان فى كلمه بس عاوزه تطلع
نور / ههههههههههههههههههه بس ماما متخانقه مع حسام جامد اوى
على / ليه عمل ايه
نور / عشان ندى يا سيدى هو فى سبب تانى
على / انا مش فاهم هى حطاها فى دماغها ليه مش كفايا اللى شافته
نور / ايوه يا على بس هى مش بتحب حسام و بتعامله وحش جدا و ماما صعبان عليها حسام متبهدل مع ندى
على / مش هو اللى عاوز كدا
نور / بس مش لدرجه انه يقعد اسبوع بحاله نايم على الكنبه فوق عندها لحسن حبيبه تصحى او ندى تحتاج حاجه او لاقدر الله تدوخ تانى و تقع دا غير ان ماما طلعت فى يوم فجاه لقته مشمر كمامه و قميصه مبلول من غسيل المواعين
على / و ايه العيب فى ده انا ياما غسلت مواعين و مسحت ارضيات و نضفت حمامات كمان
نور / بس ده شغل اكل عيش
على / اه يعنى انضف مطرح الغرب عادى لكن لو هساعد مراتى و هى تعبانه و اخد بالى من بنتى عيب و ما يصحش صح
نور / يعنى انت ممكن تعمل عشانى كدا
على / لا طبعا عمرى انتى عاوزه مامتك تزعل منى و لا ايه
نور / ههههههههههههههههههههههه يا رخم
على / بصى يا نور خلينا نتفق على حاجه انا هعيش معاكوا بقوانينكوا زى ما حسام بيعمل مع مراته انا هعمل معاكى و اكتر و بيتهيالى ده عدل ربنا
نور / لا لو زى ما بيعمل حسام بقى فا انا هتهنى حضرتك بس ما تخافش اوعدك انى مش هنيمك على الكنبه
على / لا بس احتياطى هجيب كنبه مريحه برضه ههههههههههههههههههههههههههه
نور / يا رخم ههههههههههههههههههههههههههههه
……………………………..
الحلقه الاخيره
تانى يوم فى الفندق
عمر / زى ما بقولك قعدت تعيط و تتنفض و تتشحتف و فضلت طول الليل حاضنها و اطمنها بس مفيش فايده
على / يمكن انت اتغابيت
عمر / هى اول مره يا على
على / طب خلاص ناخدها لدكتور يشوفها و انت برده اديها وقتها اللى عاشته ما كانش سهل
عمر / والله مقدر بس اعمل ايه بس
على / هو انا اللى هفهمك يا بجم احتويها كلمها مزيكا هاديه طمنها انك جنبها و انا اللى حصل عمره ما هيتكرر اعرض عليها موضوع الدكتور قولها انك مش فارق معاك كلمتين يخففوا وجعها
عمر / والله انا مستعد اعمل اى حاجه بس ترجع زى ما كانت
على / ربنا يهدى
عمر / طمنى انت عليك
على / مفحوت من اول النهار و لسه ورايا مليون مشوار اعمله
عمر / هشوفك تانى امتى
على / عيش انت بقى و ابقى اشوفكوا قبل ما تسافروا
عمر / ادعيلى
على / من غير ما تقول
………………………………
فى شقه ندى بعد يومين
نور / انا ما كنتش متخيله انهم هيبداوا شغل بالسرعه دى
ندى / واضح ان على مستعجل اوى
نور / بصى بينى و بينك
ندى / اكيد
نور / هو مستعجل بس انا مش حساه متحمس للموضوع فاهمه
ندى تهز راسها لا
نور / يعنى هو مش بيقول كلام حب او تصرفات رومانسيه بس فى نفس الوقت مستعجل اوى على الجواز كلامه كلها زى اتفاقيات
ندى / زى ايه
نور / مش عارفه اشرحلك بس هو جامد اوى مش على اللى اعرفه بس ماما بتقولى راعى ظروفه اللى مر بيها الفتره اللى فاتت و ضغط الشغل اللى عليه و تعبه فى شقه اخوه و كمان ادى شقته و انه لوحده بطوله و بصراحه معاها حق على مضغوط اوى الفتره دى
ندى / ربنا يعينه
نور / انتى بقى مش هتحكيلى
ندى / احكيلك ايه
نور / يا بت عليا انا برده دا انا سامعه ضحكك انتى و حسام امبارح للفجر
ندى / دا كان فيلم كوميدى بس اول مره اشوفه و بجد كان رهيب ابقى خديه من حسام و شوفيه هتلاقيه على فلاشته
نور / ربنا يهنيكوا و يهدى سركوا و يبعد عنكوا ولاد الحرام
ندى / امين ياؤختشى امين ههههههههههههههههههه
نور / هههههههههههههههههههههههههه
…………………………
فى الفندق عند أية بعد يومين
عمر خارج من الحمام لابس البرنص و بينشف شعره يروح يحضن أية نايمه فى السرير
أية / انا بحبك اوى
عمر / مش قدى على فكره
أية / عاوزه انام
عمر / دا الليل لسه فى اوله ما تقومى تروشى كدا و نخرج شويه
أية / هنروح فين
عمر / سينما مثلا نتعشى بره مثلا ملاهى مثلا
أية / والله ما قادره يا عمر عاوزه انام
عمر / انتى كويسه يا أية
أية / والله كويسه بس عاوزه انام
عمر / طب انا هطلب عشا جعان اجيبلك حاجه معايا
أية / ايسكريم او كيكه شيكولاته او اى حاجه مسكره يعنى بالشيكولاته
عمر / هههههههههههههههههههههههه حاضر من عنيا
………………………………..
يوم الخميس فى جنينه كبيره مفتوحه و فى شوايه و على واقف بيشوى لحمه و فراخ و نور بتساعده و مرجيحه متعلقه فى شجره و ندى بتتمرجح و حسام بيزقها و أية و عمر قاعدين فى الارض بيلاعبوا حبيبه و جنبهم منال بتقطع سلطه و امانى بتطلع علب جواها فاكهه من كيس كبير و محمد قاعد على كرسى فى جنب جنبه اخوه على كرسيه
///////////////////////////////////////////////////
على / لو حكولى فى يوم انى هكون هنا و لو بعد مليون سنه ما كنتش هصدق بس ما نقدرش غير اننا نحمد ربنا خصوصا بعد كل اللى شوفناه الحمد لله ان مشاكل عمر و أية تقريبا اتحلت و علاقتهم كل يوم احسن من الاول و مفيش حاجه فرقت بين ندى و بنتها و حتى لو مش معايا كفايا انى لسه قادر اشوفها بتضحك و عايشه حتى لو من ورا قلبها
///////////////////////////////////////////////////
ندى تقوم جرى من المرجيحه و تروح ناحيه الشوايه و تخطف دبوس و هى بتضحك و على واقف مبتسم نور تطلع تجرى وراها
نور / تعالى هنا انتى مش هتبطلى حركات العيال دى
ندى / امسكينى
أية / استنوا عاوزه اللعب معاكوا أية تدى حبيبه لعمر و تجرى وراهم
الكل يجرى ورا ندى و ضحك من الكل
//////////////////////////////////////
ندى / ايوه بضحك و بجرى و بلعب ايوه هعيش مهما كان الوجع اللى جوايا ما دمت لسه بتنفس مش هقع مش هشمتهم فيا مش هقعد اعيط على حاجه ربنا مش كاتبلى فيها نصيب حتى لو هموت من غيرها هعيش عشان بنتى عشان بابا عشان انا ما استاهلش غير انى اعيش كل يوم بيعدى عليا و انا لسه على رجلى بياكدلى انى اقدر انا اقوى منهم كلهم انا اقوى منكم كلكوا بس انا واثقه ان الحكايه ما خلصتش هنا اكيد هيجى يوم و ربنا ياخدلى حقى من كل اللى ظلمونى اكيد هيجى يوم و هعيش بجد مش تمثيل هضحك بجد مش تمثيل بس لحد اليوم ده ما يجى هفضل اجرى و اجرى و اجرى لحد ما اقع
///////////////////////////////
ندى تقع فى الارض و نور و أية يحصلوها يقعدوا جنبها و الكل بينهج و بيضحكوا على اخرهم ندى تاخد قطمه و تدى لكل واحده قطمه
/////////////////////////////////
حسام يروح يشيل ندى من وسطها و يلف بيها و هى بتضحك و يسيبها تكمل جرى هى و أية
//////////////////////////////////////////
حسام / مفيش فى الدنيا اسعد من الراجل وسط اهله و مراته و بنته و الكل سعيد و مبسوط …. انا ؟؟؟ طبعا فرحان بابا زمان قالى كلمه ان ما حدش هيحس بوجعك غيرك ما حدش هيفهم رد فعلك الا اللى فى مكانك و انا ما طلبتش غير حقى بحبها و هفضل طول عمرى احبها و عندى امل كبير ان حبى فى قلبها يكبر يوم بعد يوم متاكد ان بكره هيكون احلى و ان الايام اللى فاتت هنفتكرها و نضحك هيجى يوم تقولى فيه شكرا انك اتمسكت بيا شكرا انك عملت المستحيل عشانى انا متاكد انه هيجى و هستناه حتى لو لاخر يوم فى عمرى هستناه
////////////////////////////////////////
نور و حسام ماشين جنب بعض و بيبصوا لبعض و يبتسموا لحد ما نور توصل لعلى
/////////////////////////////////////////
نور / مفيش اجمل من الرضا الانسان اللى بيرضى باللى ربنا كاتبهوله هو الانسان السعيد فى حياته و انا ربنا ابتلانى ابتلاء صعب و رضيت فكافأنى عيلتى كلها هاديه حواليا بنضحك و نجرى و ننبسط هنعوز ايه تانى من الدنيا … على ؟؟ ربنا يقدرنى و اسعده زى ما بيسعدنى جواه اسرار كتير اوى و تعب من اللى شافه فى حياته بس انا هعمل المستحيل عشان انسيه اى حاجه وحشه شافها قبلى هخليه زى ما رضى بيا اى كان وضعى يقول و لو بعد مليون سنه ان قراره كان صح و انه اسعد واحد فى الدنيا و ربنا يقدرنى
//////////////////////////////////////////
أية و ندى يقعدوا جنب عمر و هما بينهجوا و ندى تشيل حبيبه و تلاعبها
أية / كلنا من يوم ما بنتولد بندور على السند على الكتف الحنين اللى يوم ما نتعب نميل عليه و ما نخافش من بكره و احنا معاه و انا الحمد لله ربنا ادانى كل حاجه طلبتها و حققت تقريبا كل احلامى صحيح مريت بظروف صعبه بس على راى على الصعوبات اللى فى حياتنا مش موجوده عشان تقتلنا او تكسرنا لا عشان تثبتلنا اننا اقوى و اننا نقدر و اننا طول ما احنا مع بعض بجد مفيش حاجه فى الدنيا ممكن تهزمنا
////////////////////////////////////
عمر يوشوش أية يقوموا يروحوا للمرجيحه أية تقعد و عمر يمرجحها
///////////////////////////////////
عمر / كلنا بنمر بلحظات ضعف قرارات مصيريه بتتاخد فى ثانيه فى اسوء الظروف غالبا بنفوق بعدها و نندم عليها بس اللى بيحب بيسامحك و بيضحى و العيله هى اهم حاجه فى الدنيا لان دول الوحيدين اللى هيسامحوك بدون شروط لان ما حدش هيحبك قد اهلهك
////////////////////////////////////
على يشاورلهم يروحوا يقعدوا و يحط الاكل و هو يروح يكمل شوى و هو بيبص على السما
////////////////////////////////
على / الجو جميل اوى النهرده بس فى غيوم بسيطه فى السما بس الهدوء و الاستقرار مش دايما مؤشر خير احيانا بيبقى ناقوص خطر مش يمكن يكون ده الهدوء الذي يسبق العاصفه خصوصا لو عارف ان مهما العمر طال و مهما حققت انجازات مفيش حاجه بتدوم على حالها و كل واحد هيجى عليه يوم و لازم هيدفع تمن كل حاجه عملها فى حياته ياترى هنكون جاهزين لليوم ده انتوا جاهزين لليوم ده ما هو اصله كلو سلف و دين
///////////////////////////////////

 رواية سلف و دين الفصل الثامن و الثلاثون 38 -  بقلم لولو محمد
nada eid

تعليقات

ليست هناك تعليقات
إرسال تعليق
    google-playkhamsatmostaqltradent