رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثاني و الثلاثون 32
اروى / انت بتطردنى عشانها
امانى و تهانى يخرجوا جرى من الاوضه
امانى / فى ايه
حسام / انا اللى يصغرنى ما يلزمنيش انتى فاهمه
امانى / سيب ايدها هى عملت ايه يعنى ايه مش مستحملينها الخمس دقايق اللى نزلتهم
حسام / لو سمحتى يا ماما ما تدخليش بينى و بين مراتى ممكن
تهانى / و انت ياخويا خليت فيها مراتك
حسام / ده اللى عندى
امانى / لما يجى ابوك له كلام تانى معاك مدام ما بتكبرش لحد و لا هو البيت ده مفتوح لمزاجك تدخل فيه اللى تعجبك و تخرج منه اللى ما تعجبكش لا فوق دا بيتى انا و ان كنت عملت باصلى و فتحته مضيفه مش معناه انى ما اقدرش استقبل فيه اللى على مزاجى انت فاهم و لا لا
حسام يرفع حاجبه
اروى / ما لهاش لزمه يا عمتى انا طالعه فوق سيبهالك
تهانى / انا جايه معاكى تعالى يا امانى الشقه هنا بقت بتشغى حشرات
امانى و تهانى و اروى يطلعوا حسام يقفل الباب وراهم و ينفخ يبص وراه يلاقى ندى واقفه
حسام / بصى اى كان
ندى / احب اوى
حسام / ايه ؟؟؟
ندى / كنت بتقول تحبى تغيرى جو اه احب اوى اغير جو
حسام يرتبك / تحبى تخرجى امتى
ندى/ وقت ما يناسبك
حسام / احم انا عشانك كل الوقت يناسبنى انتى بس اؤمرى
ندى تهز راسها و تمشى و ترجعله
ندى / شكرا
حسام / هاه ؟؟
ندى / شكرا انك وقفتلهم عشانى انا اصلى ما عادليش حد يقفلى
حسام / و انا روحت فين
ندى تبتسم و تقرب و تمسح على دراعه
ندى / سكر مطرح المطبخ
حسام يسهم ندى تبتسم و تمشى
حسام / ندى
ندى / ايوه
حسام / ما تلبسى ننزل دلوقت احنا لسه بدرى يعنى و المحلات فاتحه و انا فاضى و كدا
ندى / امممم مش عارفه ينفع اسيب بابا لوحده
حسام / نور معاه
ندى / انت شايف كدا
حسام / لو يناسبك يعنى اه
ندى / اوك هلبس مش هتاخر
ندى تبتسم و تدخل الاوضه و حسام واقف مش مصدق نفسه
………………………………
فى شقه اروى فوق
التلاته واقفين فى البلكونه
اروى / عشان تبقوا تصدقونى وجودها هنا طيرله عقله
تهانى / انتى الغلطانه دخلتى الاوضه لقتيهم سوا كنتى صرختى و لميتى عليهم الناس
اروى / و دى بيهمها ناس و لا حتى هو بيهمه
امانى / انا مش فاهمه يعنى امك لسه ميته ما بردتش مش تتهدى كدا و تعيطى و تقعدى تقرى قران لكن لا هو اللحق استغل الفرصه و اخطف الواد
تهانى / و انتى هتسكتى يا امانى على اللى بيحصل ده
امانى / والله على جثتى انا هكلم محمد النهرده يروحوا بيتهم و هو مش سى حسام فتح صدره و قعد يقول اجيبلك خدامه و مش خدامه يجيبلهم هما هناك
اروى / و حسام يجيبلهم خدامه ليه هو خالى ما لوش معاش
تهانى / يا ستى هجيبهالهم انا اخويا و انا اولى بيه هروح انا اقف على ايدها و هى بتنضف و اهو ينوبنا ثواب المهم ان حسام يقطع اى علاقه بالبت دى دى حربايه يا امانى
امانى / طول النهار قاعده بالبت و البت بتعيط لما بتقطع قلبى و هو طبعا بنته و ملهوف عليها
اروى / اول ما يسمع عياط البت من هنا ينزل يجرى من هنا
تهانى / ما انتى اللى موكوسه مش عارفه تربطيه بحته عيل
اروى / اعمل ايه يعنى ما هو اللى شرط عليا فى اول الجواز
امانى / انتى بتقولى ايه يا اروى
اروى / والله يا عمتى و خدنى للدكتوره و ركبلى شريط كمان
تهانى / اصوت و لا احدفك من البلكونه دلوقت و ما قولتيش الكلام ده من بدرى ليه ما ليه حق يبيع و يشترى فيكى يا بت الجزمه
امانى / ما لكيش حق يا اروى كنتى قوليلى و انا امنعه بالقوه هى سايبه و لا ايه انا من حقى اشيل احفادى
اروى / اهو اللى حصل بقى
تهانى تبص تحت تشوف حسام و ندى خارجين من العماره و بيركبوا العربيه و يمشوا
تهانى / اللحقوا اللحقوا
اروى و امانى يبصوا
امانى / يا بنت الكلب
اروى / دلوقت ما عندناش ميت فى البيت عشان تصدقونى
تهانى / بكره الصبح لا بكره ايه خشى اللبسى و انا هاخدك عند الدكتور حالا نشيل الزفت ده و يبقى يفتح بقه بقى
امانى / ايوه انا هاجى معاكوا بنفسى و ليا حساب تانى مع الكلب ده لما يرجع
تهانى / و انتى هتعرفى تاخدى معاه حق و لا باطل ما خلاص غسلتله مخه
امانى / والله والله ما هى بايته فى بيتى ثانيه واحده بعد كدا بنت الجزمه دى
تهانى / اما نشوف يلا يا بت انتى لسه واقفه انجرى على جوا
……………………………….
على القهوه قدام بيت أية
اتنين رجاله قاعدين بيشربوا شاى
الاول / والله زى ما بقولك كدا
التانى / يا عم دول ناس فى حالهم من يوم ما سكنوا ما سمعنالهمش حس
الاول / يا جدع حس ايه دا صوت الوليه بيجيب لاخر الشارع و ناس داخله و ناس خارجه
التانى / يا ابنى انا ما اقصدش انا اقصد لا اتكلموا مع حد من الجيران مثلا و لا عملوا مشكله و لا اى حاجه تحسهم فى حالهم كدا
الاول / امال يعنى يلفتوا النظر ليهم ما لازم يبانوا فى حالهم بقولك انا كنت فاتح الفيس على القهوه هنا امبارح جالى طلب اضافه صوره واحده لفه نفسها بفوطه بس وشها مش باين اعمل ايه
التانى / انت بتسال تقبل طبعا
الاول / و هاتك بقى يا كلام و صور لما سخنت اللى جابونى المهم بقولها افتحى الكاميرا قالت تدفع كام قولتلها اللى تعوزيه قالتلى الشحن الاول
التانى / و شحنتلها
الاول / هو انا تلميذ ياما اتقرصنا من ولاد الكلب دول قولتلها و انا اش ضمنى انك مش هتنصبى عليا و اخرتى بلوك قالتلى هبعتلك تصبيره و بعتتلى شويه صور ياله يخربيت امها صاروخ ارض جو
التانى / و وشها باين فيها
الاول / هو وشها بس اقولك انا هعمل معاك الصح و افرجك على الصور
راجل تالت يشد كرسى و يقعد
التالت / القاعده بتاعتكوا دى انا عارفها
الاول / ههههههههههههههههههههه وحشنى يا اسطى فينك مختفى كدا
التالت / مشاغل بقى انت عارف
التانى / عليا يلا مشاغل ايه
التالت / بقولكوا ايه امبارح جالى واحد يصلح عربيته و مستعجل عليها اوى و قالى هديك الضعف بس اسهر فيها عشان مسافر تانى يوم
التانى/ مصلحه ظبطك يعنى ما تجيب بقى الفلوس اللى عليك
التالت / اتقل يا ابنى هو ظبطنى فلوس
الاول / امال برشام
التالت / ادانى دى
الاول / و دى ايه لا مؤاخذه
التالت / دى شويه افلام انما ايه تطير العقل سهرت طول الليل لما جابت اجلى
الاول / لوحدك يا درش
التالت / كنت بفنطها بس تعرفوا فى الاخر خالص كنت هنجت و جبت اخرى بس حلفت ما انام الا لما اخلصها اخر فيديو كان مفاجاه
الاول / يا راجل احكى احكى
التالت / البت اللى ساكنه فى التانى و جوزها فى عماره الحج فريد
التانى يبص للاول
التالت / اما عملوا عمايل يخربيتهم
الاول / عشان تصدقنى لما اقولك ان البت دى شمال و سكتها شمال الشمال
التانى / صحيح ياما تحت السواهى دواهى
الاول / بقولكوا ايه ما تيجوا نطلع عندى و نعدل المزاج
التالت / ما عنديش مانع
التانى / على البركه
…………………………………………..
فى كافيه فخم
ندى / المكان ده غالى اوى
حسام / اعتبريها اعتزار
ندى / عن ايه و لا ايه
حسام / كل حاجه
ندى تضحك بصوت عالى
ندى / بالبساطه دى تؤ
حسام / عيونى للتؤ
ندى / انا عمرى ما هقدر اسامحك يا حسام لو قولت غير كدا ابقى بكدب عليك
حسام / انا بحبك يا ندى و مستعد اعمل اى حاجه عشانك
ندى / عارفه و عشان كدا قاعده معاك دلوقت عشان انا ما عادليش حد انا لسه صغيره كل اختيارتى كانت غلط بس انت كمان غلطت
حسام / عارف و مستعد اعمل اى حاجه اصلح غلطتى دى
ندى / انت لو كنت صبرت عليا انت و بابا بالراحه و فهمتونى حقيقه على من الاول انا كنت بعدت عنه و انت كنت اقرب حد ليا فاكيد كنت هلجالك و ساعتها
حسام / بلاش نتكلم فى اللى فات
ندى تمسك ايده حسام يبص لايده و هو مش عارف يقعد على بعضه
ندى / لو سمحت يا حسام خلينى اكمل … انا كل مره كنت براجع نفسى كنت بجد بحس ان معقول كل ده كان عندى و ما شوفتوش ؟؟ ازاى ما شوفتوش معقول كنت عايشه فى الدلع ده بس انت السبب ما تبصليش كدا اه انت السبب انام فى يوم و اصحى الاقى نفسى حامل ليه مش من حقى انى افرح و انبسط مش من حقى انى احب انا كمان
حسام / انا اسف
ندى / لو كنت صبرت عليا شويا كنت حبيتك صدقنى
ندى تبص فى الارض و ترجع تبصله
ندى / بس ازاى احبك و انت بتعاملنى بالقسوه دى انت ضربتنى و حبستنى يوم اقول بيحبنى و يوم اقول لا
حسام / بحبك والله بحبك و كل ده عشان بحبك و خايف اخسرك و عاوزك جنبى
ندى / جنبك !! هونت عليك ترمينى فى الصحرا و نزلت تتجوز اروى انت فاكرنى ما كنتش عارفه انها بتكلمك و احنا هناك انت خنتنى
حسام /ما انتى
ندى / كلمت اروى كلمت على واحده بواحده خالصين انا خسرت كل حاجه ماما و بابا و نفسى
حسام / فى ايدك تكسبى كتير
ندى / و المقابل انى اسامحك
حسام / المقابل انك تكسبى بنتك و بيتك و حياتك و مستقبلك
ندى / عمرها ما هتنجح انا بس قربت منك الدنيا ولعت و عمتى مش طيقانى و بتهينى فى الرايحه و الجايه
حسام / انا مش هسمح لحد يقرب منك مش هسمح لحد يكلمك نص كلمه هخلى جزمتك فوق الكل هدافع عنك زى النهرده و اكتر
ندى / انا مش بعرف اطبخ و لا امسح و لا اكنس ازاى هتسكتهم
حسام / هجيبلك خدامه هخليكى ملكه هعيشك معززه مكرمه حياتك على الكوافيرات و الشوبينج و مش هخليكى تشيلى هم اى حاجه مش هخليكى تندمى و لو لحظه
ندى / و هتعيش معايا فى شقه بابا
حسام يبصلها و يسكت
ندى / مستحيل طبعا انا مش هقدر ابدا حياه جديده و على قدامى طول الوقت نظره الشماته اللى فى عينه هتقتلنى و بعدين انا مش قليله عشان اعيش معاك فى الحرام فى بيت ابويا كمان
حسام / مين قال فى السر مين جاب سيره حاجه زى دى انتى مراتى
ندى / ما تكدبش الكدبه و تصدقها مامتك نفسها قالت على حبيبه بنت حرام
حسام / ماما قالت كدا
ندى / ايوه و اسال نور
حسام / انا ليا كلام تانى معاها انا مش هسكت انا بنتى ما يتقالش عنها كدا ابدا
ندى / حسام انا مش هقدر ابنى حياتى على كدبه لو عاوزنى بجد يبقى لازم عقد جديد و شهود و انا امضى بنفسى برضايا و اللبس فستان شيك و احس بالفرحه اللى بجد عشان فرحتى يوميها كانت مكسوره
حسام / غالى و الطلب رخيص اى حاجه انا موافق
ندى / اى حاجه اى حاجه
حسام / جربى لو رفضت اى حاجه ليكى حق
ندى / انا كنت مراتك لوحدى ما ينفعش ابقى على ضره
حسام يرتبك
ندى / انا ليك لوحدك و انا و اروى عمرنا ما هنتفق و بعدين الشقه اللى هى عايشه فيها دى اصلا بتاعتى كل ركن فيها كان مفروش ليا ما ينفعش تنام هى فى جهازى و انا انام فى الشارع مقامى عندك الشارع يا حسام
حسام / لا طبعا ايه اللى بتقوليه ده
ندى / حسام ما تنساش ان ماما باعت دهبها فى الجهاز ده و استلفت فلوس عشان تجيبه انا اولى بيه منها حبيبه اولى بيه منها
حسام / هو بس
ندى / عاوزنى و لا لا
حسام يسكت
ندى / فكر براحتك بس انا كمان من حقى اعيد التفكير فى موضوع الجواز
ندى تسحب ايدها من ايد حسام حسام يمسك فيها
حسام / انا ما عنديش اغلى منك الشقه ليكى
ندى / و اروى تطلق
حسام يهز راسه
ندى / قدامى زى ما اتجوزتها قدامى تطلقها قدامى
حسام / الموضوع مش بالبساطه دى
ندى / حسام انت عملت المستحيل عشان توصلى و قدرت تكدب على الكل و توصل للى انت عاوزه فى كل مره مهرى هيبقى صعب عليك
حسام يبصلها
ندى / يا خساره
حسام / اعتبريها اطلقت
ندى / اللحظه اللى هترمى فيها اليمين هى اللحظه اللى هكون انا بتاعتك فيها
حسام / زوج و زوجه مش على ورق
ندى / انت و شطارتك بقى
حسام / يعنى ايه
ندى / يعنى توعدنى انك مش هتستخدم معايا اى حاجه من حاجات زمان دى لا منوم و لا مهدئ لازم يبقى برضايا كلو برضايا يا حسام
حسام / مفيش احلى من كدا
ندى / خلاص تحب تنام فى حضنى انا و حبيبه امتى
حسام / حالا
ندى / طب و مستنى ايه قوم يلا نروح … بتنا انا و انت و حبيبه و بس
ندى تبتسم حسام يبلع ريقه ندى تقوم حسام يقوم يحط فلوس على الترابيزه و ياخدها و يمشوا
…………………………………………
فى اوضه فوق السطوح
التلت رجاله قاعدين قدام جهاز كومبيوتر قديم و بيشربوا بيره و سجاير
التالت / و لا يبان عليهم و لاد العفريته
الاول / تدفع كام و تبقى مكانه
التالت / ادفع عمرى كله بس ازاى
الاول / ياعم اللى تتصور كدا و تفتح صفح كدا
التالت / ياعم الاشكال دى مش سهله تيجى تكلمها تعملك فيها ام الشرف
التانى / ياعم نجرب وفقت كان بها رفضت
الاول / وربنا افضحها و اخلى سيرتها على كل لسان
التانى / اهو
التالت / خلصانه
……………………………….
فى شقه اروى
حسام يفتح الباب و ندى تدخل تتفرج
ندى / تعرف ان دى اول مره اشوف الشقه
حسام يقفل الباب ندى تبتسم و تدخل جوه و هو وراها
ندى / حلوه اوى اوضه النوم دى بس الملايات دى عاوزه تترمى فى الزباله انا اينفه و ما بنامش مطرح حد
حسام يدخل يشد الملايه و يرميها فى الارض ندى تضحك بصوت عالى و تروح الاوضه اللى بعدها
ندى / دى بقى هتبقى اوضه بيبو اممممم حلوه عجبتنى
ندى تيجى تطلع من الباب تلاقى حسام سادد الباب
ندى / عاوزه اتفرج على باقى الشقه
حسام / وحشانى
ندى / العطله من عندك
باب الشقه يتفتح
ندى / وسع بقى ما تبقاش رخم الله
حسام يوسع و ندى تطلع تجرى على الصاله و هى بتضحك و حسام وراها تلاقى اروى و تهانى و امانى موجودين
ندى / ايه ده انتوا جيتوا امتى ما حسيناش بيكوا
امانى / اما صحيح اللى اختشوا ماتوا انتى بتعملى ايه هنا يا بت انتى ايه مفيش دم مفيش
حسام / ندى مراتى و من فضلك يا ماما تتعاملى معاها احسن من كدا
ندى تروح تقعد على اقرب كرسى و تحط رجل على رجل
اروى / يعنى ايه مراتك من امتى و ازاى و انا
ندى / انتى ايه يا ماما
اروى تبصلها
ندى / هو حسام ما قالكيش انه طلقك
تهانى / ايه الكلام الاهبل ده
ندى / امممم قولهم يا حسام
حسام / انتى طالق يا اروى
اروى / انت بتطلقنى عشانها دى اخرتها يا حسام
امانى / انت اتجننت تبيع دى عشان دى يا اهبل يا ابن الهبله … قومى يا بت اطلعى بره قومى
امانى تحاول تشد ندى بره حسام يمنعها و اروى بتعيط
تهانى / انت اكيد مش فى وعيك
حسام / لا الحقيقه انا فى وعيى جدا و عارف انا بعمل ايه ندى مراتى اتجوزتها عن حب و مستعد اعمل عشانها اى حاجه
امانى / و اروى ؟؟ فيها ايه عدل دى رد و قولى فيها ايه مش دى اللى خانتك و سابتك
حسام / كنت بكدب كنت ببرر موقفى عشان ما تقولوش عليا عيل واطى بس الصراحه انا على قد ما كنت واطى مع ندى كنت جدع مع اروى
جرس الباب يضرب ندى تقوم بدلع تروح تفتح محمد و نور يطلعوا
محمد / فى ايه صوتكوا جايب لتحت
اروى تترمى فى حضن خالها
اروى / اللحقنى يا خالو حسام طلقنى عشان خاطر ندى
حسام / جوازى منك فى الاول كان غلطه يا اروى و انتى عارفه ده ما تخلينيش افتح ماشى
تهانى / لا يا حبيبى فتح قول اللى عندك كلو
نور / خلاص يا جماعه اهدوا شويه انا متاكده ان فى سوء تفاهم تعالى يا ندى معايا تحت
نور تحاول تشد ندى ندى تفلت منها
ندى / اشمعن انا اللى اجى معاكى و بعدين ما ينفعش اسيب بيتى و ضيوفى و انزل تحت
اروى / انتى صدقتى نفسك يا بت
اروى تحاول تضرب ندى حسام يزقها تقع فى الارض و ندى تدخل الاوضه جوه
حسام / لو اى حد حاول يضايقها بكلمه او يمد ايده عليها انا اللى هقفله دى ضافرها برقبتك
اروى / اتفو عليك حيوان
تهانى / اما بهدلتك فى المحاكم اما ربيتك و علمتك الادب
حسام / ربى بنتك الاول و بعدين تعالى ربينى
نور / حسام لو سمحت
حسام / ايه يا نور مش كان على يدك ما تقوليلها عمتك اللى عايشه فى دور الشرف طول الوقت
محمد / اخرس يا حيوان
حسام / لا مش هخرس قوليلهم يا اروى انا و انتى اتجوزنا ازاى قوليلهم
امانى / انت ليك عين تبجح مش كفايا انك خدتها لدكتوره نسا و مركبلها لوب عشان ما تحملش
حسام / ظهر الحق يعنى عرفتوا
محمد / انا مش فاهم حاجه
حسام / انا بقى محتفظ هنا بالحجز اللى كان عند الدكتوره و اللوب بيركب
اروى تعيط حسام يفتح درج و يطلع شنطه و يفتحها و يطلع منها ورقه
نور / حسام لو سمحت اهدى و لم الموضوع انا عارفه
حسام يدى لباباه الورقه
حسام / شوف كده التاريخ اروى مركبه اللوب امتى و شوف انا و اروى دخلنا امتى
اروى / انت ازاى كدا
حسام / انا اللى ازاى كدا انتى اللى ازاى كدا تقفلى موبايلك و تعملى انه فصل شحن و تدخليلى اوضه النوم و تعرضى عليا نفسك ايه
تهانى / اخرس انا بنتى اشرف من الشرف
حسام / انا اتجوزت بنتك تصليح غلطه مش اكتر قولت بنت عمتى و حرام تتفضح و اكسب فيها ثواب
محمد / لا مش ممكن لا
حسام / قوليلهم يا نور سمعتى ايه على السلم قوليلهم لما جت و فى شنطتها قميص النوم و لقتك عندى قوليلهم يا نور
ندى تطلع من الاوضه و لفه هدوم فى الملايه
ندى / لا لا لا لا مش مصدقه ودنى من اللى بسمعه و كنتوا رايحين جايين تجيبوا فى سيرتى و سمعتى كنتوا بتقولوا ان امى انا الله يرحمها ما عرفتش تربى الله يرحمك يا ماما ياريتك عشتى و شوفتى اليوم ده
ترميها فى الارض جنب اروى
ندى / حاجتك عشان بنضف
حسام / انا من حقى انى اختار ام لاولادى و اخترت ندى و اخترت بيتى و بنتى و مراتى
صمت
حسام / انا لاول مره من فتره طويله اوى اختار صح كل الاختيارات اللى فاتت كانت غلط و دعمتونى و وقفتوا فى ضهرى النهرده لاول مره بختار صح ياريت تقفوا جنبى
صمت
تهانى / اللى حصل النهرده ده عمره ما هيعدى على خير انا مش هسكت والله ما هسكت
ندى / بقولك يا حسام ممكن تساعدنى اطلع بابا و حبيبه و حاجتى من تحت
حسام / اكيد
ندى تمسك ايد حسام و ينزلوا سوا و الكل بيبص لبعضه و صمت
محمد / الكلام اللى اخوكى قاله ده حصل يا نور
نور / بابا لو سمحت
محمد / حصل فعلا انتى كنتى عارفه ان فى علاقه بين اخوكى و بين اروى
تهانى / اللزم لسانك يا محمد
نور / ايوه كنت عارفه و عشان كدا صممت على جوازهم و قولت لازم يتم باقصى سرعه
تهانى / يلا يا اروى قومى يلا انت من النهرده لا خويا و لا اعرفك و كلامك مع المحامى بتاعى
تهانى و اروى يمشوا
امانى / دى اكيد سحراله اكيد
محمد / بس بقى يا امانى بس بقى انا مش قادر اصدق مش قادر افوق من الكابوس ده بقى ايه هو مفيش فى الدنيا غير حسام و مصايبه فى ايه
نور / اهدى يا بابا صحتك
محمد / احنا كنا فين و كل ده بيحصل كنا فين
نور / يا بابا حضرتك كنت هتعرف منين يعنى
محمد / و انتى ليه ما قولتيليش
نور / كان موقف حضرتك هيتغير يعنى ما كنتش هتجوزهم يعنى انا عمرى ما كنت اتخيل ان اللى حصل ده هيتعرف عمرى ما كنت اتخيل ان حسام ممكن يرجع لندى او انه يقول حاجه عن علاقته باروى
امانى / يا خساره تعبى و تربيتى فيك يا حسام
باب الشقه يتفتح و ندى تدخل شايله حبيبه و شنطتها و حسام شايل شنطتين وراها
ندى / لو سمحت يا حسام دخل الشنطه دى اوضه بابا و التانيه اوضتنا و يلا عشان ننزل نجيب بابا
حسام / حاضر يا قلبى
حسام يدخل
ندى / ميرسى يا نور تعبتك و انتى بتلمى حاجتنا بس برافوا عليكى ما سبتيش حاجه
حسام يخرج من الاوضه و ينزل
ندى / والله كنت ناويه ارجع بيتنا خصوصا بعد اللى طنط امانى عملتوا معايا انا و بابا النهرده بس حسام ما رضيش و قالى ان مصلحه حبيبه فوق اى زعل و انى هدخل البيت معززه مكرمه و صدق معلش خلى بيبوا معاكى على ما انزل اسند الكرسى قدام حسام عن اذنك يا عمو عن اذنك يا طنط اعتبرى البيت بيتك
ندى تنزل و امانى هتطق
محمد / هو ايه اللى حصل النهرده يا امانى فى ايه تانى فى ام اليوم اللى مش عاوز يخلص ده
امانى / امانى هتموت دلوقت امانى هتطب ساكته دلوقت
نور / بعد الشر عليكى يا ماما
محمد / عملت ايه يا نور ردى عليا
امانى / ياريتنى مت و لا شوفتش اليوم ده ماشى ليكى حق يا ندى ليكى حق ما الدلدول ابنى هو اللى قواكى و عملك قيمه
محمد / انا هنزل اسند اخويا القاعده هنا خنيقه
محمد يجى يطلع يلاقى ندى شايله الكرسى من قدام و حسام من ورا و طالعين يجرى يساعد ندى و يدخلوا مصطفى الشقه
ندى / الف شكر يا جماعه تعبناكوا بس انا و بابا عاوزين ننام
امانى تقوم تقف و تروح تقف قدام ندى
ندى / ايه يا عمتى رايحه فين انا مش بطردكوا والله البيت بيتكوا انا بس بستاذن ادخل انا انام
امانى / هتدفعى تمن اللى بتعمليه ده غالى
ندى / هو انا عملت ايه
امانى تنزل
ندى / الله مش هى اللى حلفت ما نبات فى بيتها مش هى اللى قالت اننا تقال عليها ايه يا نور ما انتى كنتى حاضره اللى حصل و ازاى كانوا بيتعاملوا معانا هو احنا تحت وسطيكوا مش عاجب و فوق هنا لوحدينا مش عاجب قولتلك يا حسام نرجع شقتنا انت اللى ما رضيتش
حسام / خلاص يا نونو اهدى و خشى ارتاحى و انسى اى حاجه حصلت النهرده
ندى / حاضر اللى تشوفه
محمد / انا نازل تصبحوا على خير
نور / خدنى معاك يا بابا
محمد و نور ينزلوا
ندى / حسام
حسام / عيون حسام
ندى / انت كدا نفذت اول شرط تانى شرط الجواز يتم صح المرادى و لحد ما دا يحصل مش هينفع تبات معانا فى الشقه
حسام / ايوه بس
ندى / احنا اتفقنا
حسام / حاضر يا ستى بكره الصبح هروح للمحامى و اخليه يخلص كل الورق و نحدد معاد الفرح عشان نبدا حياتنا على نضافه
ندى / صفحه بيضه و ننسى كل اللى فات و عشان لما بيبو تكبر و تسالنا اتجوزتوا ازاى نقولها الحقيقه ما نبقاش بنكدب تعرف قد ايه بنحبها و قد ايه باباها بيحب مامتها
حسام يبتسم و ينزل و ندى تقفل الباب و البسمه تروح من وشها و تقفل الباب بالترباس و تبص وراها تلاقى ابوها وراها تروح تقعد تحت رجليه
ندى / ما تبصليش كدا بس انا مش ضعيفه عشان اسيبهم يهينونى و يذلونى كدا انا استحملت كتير و على يدك ضرب و اهانه و بهدله ظلمونى بس انا مش هسكت هخليهم يفهموا ان حتى ضعفى قوه و ان كل جباروتهم ده ما يساويش حاجه هردلهم كل اللى عملوه فيا هندمهم و هربيهم و مش هسمح لحاجه تقف فى طريقى
مصطفى يمسك ايدها
ندى / ما تخافش عليا انا ما عدتش ندى الصغيره الطيبه خلاص قتلوها لما قتلوا امها قتلوا امها بالبطئ انا هاخد حقى و زى ما شوفت مش هيلاقوا فرصه يردوا عليا
مصطفى يبص الناحيه التانيه
ندى / الشقه حقى و رجعلى مش انا دفعت سنه من عمرى فى الغربه عشان الشقه دى مش انت يا بابا اللى وقفت على ايد العمال هنا عشان تتشطب مش ماما باعت دهبها عشان تكمل دى بتاعتى حقى لا دى جزء صغير اوى من حقى و مش هسمح لحد يشاركنى و لا يشارك بنتى فيه
ندى تقوم و تزق ابوها لاوضته
ندى / انت لازم ترتاح و تنسى اى حاجه حصلت و ما تفكرش فى اى حاجه هتحصل انا قولتلك كلو سلف و دين و انا ياما سلفت جه دورى بقى اللم ديونى منهم
……………………………….
فى شقه أية بعد يومين
أية لوحدها جرس الباب يضرب تروح تقف قدام الباب
أية / مين
التالت / انا درش الميكانيكى اللى على الناصيه انا كلمتك الصبح على الفايس افتحى بقى
أية / كلمتك على الفايس ؟؟؟
التالت / يووووه انتى بتكلمى كام واحد افتحى بقى قبل ما الجيران تحس بينا الله مش قولتيلى استنى جوزى اما ينزل انا بقالى ساعتين مرزوع على القهوه تحت افتحى بقى
أية تجرى تجيب الموبايل و تتصل
أية / امشى من هنا احسنلك
التالت / دا انا اروح فيكى فى داهيه دا انا شحنلك بمتين جنيه غير الضرايب انا ما بنضربش على قفايا افتحى يا بت بدل ودينى اكسر الباب
أية / انا هتصل بالبوليس امشى بالزوق احسنلك
جارتها تنزل على السلم
الست / انت بتعمل ايه هنا يا درش
درش / انا ؟؟ دا انا كنت جاى اسال على الاستاذ عمر
الست / تسال ايه انا سمعاك من فوق بتقول شحن و تكسر الباب هو فى ايه هنا بالظبط
درش / بقولك ايه يا ست الكل انتى ست كبيره و قد امى و انا الحبايه بتلعب فى دماغى ابوس ايدك فكك منى
أية من ورا الباب / انا ما اعرفوش و عمال يخطرف لو ما مشيش والله لطلبله البوليس
الست / هى حصلت يا ناقص يا واطى تخبط على الستات فى غياب رجالتها هو ايه الحاره ما عادش فيها رجاله و لا ايه يا لاااااااااااااااااااااااااهوى اللحقونى يا ناس غيتونى يا عالم
درش / وسعى يا وليه بدل ما اتغابى عليكى
راجل ينزل من فوق
راجل / تتغابى على مين يا ابن الكلب انت دا انت موتك على ايدى النهرده
درش/ هو كلكوا عليا و لا ايه لا فوقوا داا نا اروح فيكوا فى داهيه فلوسى يا ولاد الكلب
عمر يطلع السلم جرى
عمر / فى ايه يا جماعه ايه اللمه دى
الست/ الحيوان ده كان عاوز يكسر الباب لولا ستر ربنا
درش / بفلوسى البت اللى جوه دى واخده منى متين و عشرين جنيه و بعدين هو انا بتبلى عليها دا فيديوهاتها و صورها على كل الموبايلات فى الشارع دا انا حاجز معاد بالعافيه هى ملاحقه
عمر يضرب الواد فى وشه بالبوكس
درش/ انت بتستغل انهم ماسكينى فبتضربنى ايه فاكر نفسك هتخوفنى فهسكت دا انا بسهر طول الليل على فيديوهاتك انت و الست الغندوره فى السرير و اهى الصور اهى الصور اهى
درش يقوم من الارض يفتح موبايله و يفتح الصور و يوريها للناس الملمومه قدام الشقه
راجل كبير / بس يا درش بلاش قله ادب
درش / انا برده اللى قليل الادب ليه انا اللى اتصورت ملط لامؤاخذه و لا انا اللى عامل صفحه على الفايس بلم فيها فلوس من الرجاله عشان اقلعلهم و اتكلم معاهم و اديهم مواعيد لامؤاخذه
عمر واقف بيبص يمين و شمال يدخل الشقه و يرزع الباب يلاقى أية واقفه ورا الباب بتعيط و بتهز راسها لا صوت الناس بره
الست / و انا اللى كنت بقولك اخد البت و انزل اتعرف عليها بلا قرف
الراجل الكبير/ امسح الصور دى يا درش ملناش دعوه
درش / فلوسى يا حج دانا دافع دم قلبى فى الصور دى لا مؤاخذه
الراجل الكبير/ عندى حقك عندى بس احنا عندنا ولايا برضه يلا يا جماعه كل واحد على بيته
الراجل / اتفو و انا اللى كنت نازل اتخانق عشانها تربيه شوارع
عمر يدخل اوضته و يطلع شنطه و يلم هدومه أية تجرى وراه و تمسك ايده و هى منهاره من العياط
أية / انت بتعمل ايه
عمر يزقها و يكمل
أية / عمر انت هتسبنى انت بتعمل ايه
عمر / هو ده اللى كان موترك هو ده اللى كان مغيرك الفتره اللى فاتت نفسيتى تعبانه طول الوقت نايمه
أية / انا حاولت اقولك بس فى كل مره كانت بتحصل حاجه انا مليش دعوه بالصور دى
عمر / و انا اللى ليا دعوه بصى يا أية انا ماسك نفسى عنك بالعافيه ابعدى عنى السعادى بدل ما ارتكب جنايه
أية / اقتلنى يا عمر لو انت شايفنى الغلطانه اقتلنى يا عمر انت لازم تسمعنى
عمر / ادى ام الشنطه اوعى
عمر يسيب المكان و يمشى أية تمسك فيه
أية / ما ينفعش تسيبنى انا مليش غيرك عمر اسمعنى انا مليش ذنب عمر والله لو كنت عملت اللى هما عاوزينه ما كا نوش عملوا كدا بس انا مش كدا انا عمرى ما اخونك اسمعنى بقى
عمر يزق أية على اخر دراعه تقع فى الارض تجرى على رجله
عمر / انا اسف بس انا كان ممكن استحمل اى حاجه الا دى انتى طالق
أية / حرام عليك انا عملت ايه حرام عليك حرام
عمر يفتح الباب و يمشى و هى بتعيط
………………………..
فى شقه تهانى
اروى / ماما انتى لسه زعلانه منى
تهانى / انتى حطيتى راسى فى الارض خليتى اللى يسوى و اللى ما يسواش يتناور عليا
اروى / يا ماما انا
تهانى / انتى رخصتى نفسك و رخصتينى انا اللى طول عمرى رافعه راسى وسط الناس جه عليا اليوم اللى اتعاير بيكى اللى احط عينى فى الارض بسببك
اروى تعيط
اروى / يا ماما انا وثقت فيه و حبيته ابن عمى و عمره ما هياذينى و هو كمان ما كانش بيسكت كان بيكلمنى طول الوقت …و انا سبقتكوا على هناك.. و كنت لوحدى … ما اعرفش ازاى ده حصل ما اعرفش بس هو وعدنى انه هيتجوزنى
تهانى / ووفى بوعده و من يوم ما رخصتى نفسك ليه و هو بيبيع و يشترى فيكى من يوم ما اتجوزك و هو مش طايقك اللى لودته جننته و اللى رخصت نفسها زهق منها و رماها
اروى / بس انا مش هسكت انا ليا عنده حق دهبى و مؤخرى و نفقتى و حقوقى كامله انا من بكره هروح للمحامى بس انا محتاجاكى جنبى
تهانى /بانهى وش هقف قدام اخويا دا الحمد لله ان مها ماتت قبل ما تشوف اليوم ده كان زمانى انا اللى مت من قهرتى
اروى / ان كنت انا غلطت فهو كمان غلط اشمعن انا اتعاقب لوحدى
تهانى / امشى من وشى مش طايقه ابصلك امشى يلا
اروى تقوم تدخل اوضتها
………………………
فى شقه ندى
جرس الباب يضرب ندى تروح تفتح و هى لفه شعرها بفوطه نص فتحه
حسام / وحشتينى
ندى / امممم طيب
حسام / هو ايه اللى طيب و ايه الحلاوه دى
ندى/ هاخد برد كدا ما توقفنيش فى الهوا
حسام يديها كيس
ندى / ايه ده
حسام / التليفون و الخط عشان تبقى تصبرينى بصوتك الحلو ده بدل ما انا بسرقك من على الباب
ندى / العطله من عندك
حسام / يا شيخه
ندى / انت عاوز ايه
حسام / هو عمى نايم برده
ندى / اه و حبيبه نايمه فاكيد ما ينفعش تخش
حسام / طب لو نزلت و جبت نور معايا هتدخلينى
ندى تضحك بصوت عالى حسام يضحك ببلاهه
حسام / الله
ندى / تعرف مش انت جبتلى الموبايل انا كمان هديك فرصه نادى نور تقعد مع بابا و بيبو و انا هلبس و اخرج معاك تعزمنى على عشا اصلى بصراحه جعانه اوى و زهقت من الفراخ المسلوقه و الشوربه دا اكل عيانين ده
حسام / بس كدا تؤمرى
ندى / يلا اوعى بقى عشان اللحق انشف شعرى همشى كدا فى الشارع يعنى
ندى تشيل الفوطه من على شعرها ينزل على خدها حسام يمسكه
حسام / و ماله ده ما هو حلو اهه
ندى تضربه على ايده
ندى / اوعى لما تكتب الاول
حسام / الصبر من عندك يارب
ندى / انت كنت لاقى يا ابنى ما تحمد ربنا و افتكر الجمايل
حسام / بحمده و بشكر فضله طبعا
ندى / يلا بقى تعبت من الوقفه الله
حسام / والله بحاول بس رجلى مش مطوعانى
ندى تضحك تانى بصوت عالى حسام يبتسم نور تطلع على السلم
حسام / بنت حلال اهى بقولك يا نونو ممكن تقعدى مع عمى و بيبو على ما اخد ندى مشوار و نرجع
نور / اكيد بس ماما عوزاك تحت
حسام / حاضر هنزلها
ندى / خشى يا نور و لا انتى ممنوعه تدخلى عندى
نور / لا طبعا بس هنزل اقولهم انى هقعد هنا و اجيب موبايلى يعنى
ندى / اوك
نور تنزل حسام يجى ينزل ندى تشده من الياقه عليها
ندى / هى نونو واحده بس
حسام يبتسم و يبوس ايدها و يهز راسه و ينزل ندى تقفل الباب و البسمه تروح من وشها و تنفخ
……………………………….
فى المحل عند على
على يدخل المكتب يلاقى أية قاعده بتعيط
على / اؤمرى قالولى انك هنا
أية / انا حاولت اتصل بيك كتير ما بتردش عليا
على / و المفروض ارد يعنى
أية / على ارجوك اسمعنى انا مليش حد
على / ربنا يخليلك الست الوالده انا مالى
أية / عمر طلقنى
على / خير و بركه
أية تعيط اكتر
على / انا مش فاضى انا ورايا شغل
أية / ندى ما كانتش الوحيده اللى اتصورت انا كمان و الصور بتاعه ندى ما كانتش حاجه جنب صورى
على / هههههههههههههههههههههههههههههه
أية تبصله باستغراب
أية / انا مليش حد اعتبرنى اختك انا مليش ذنب فى اللى حصل
على / لا لا لا لحد اختى و استوب فوقى انا اختى ما استحملتش تعيش من غير شرافها مش زيك مفضوحه بصى انا لو منك اعمل زيها روحى اقتلى اللى عمل فيكى كدا و بعدين موتى نفسك لان لانا و لا غيرى هندخلك انا مالى انا شوفت من وراكوا غير كل اذى يلا يا بت اطلعى بره
أية توطى على رجله عشان تبوسها يرجع ورا
أية / ابوس رجلك ابوس رجلك ما تتخلاش عنى انت كمان اروح فين انا
على / روحى لامك يا روح امك خليها تشوف اخره قرفها ايه قوليلها كلو سلف و دين و اللى عملتيه فى بنت الناس اترد فى بنتك غورى بدل ما اناديهم يرموكى بره يلا اتحركى
أية تبصله و عنيها كلها دموع و بتعيط على اخرها
على / ايه مش سمعانى انا ما عادش فى حاجه تربطنى بيكى و الحمد لله ان ابويا مات قبل ما يشوف اللى ضيع عمره فى تربيتها و هى …. يلا انا مالى
أية / طب على الاقل كلم عمر هو مش بيرد عليا قوله …
على / هيعملك ايه عمر يقدر يعمل ايه هيمسح صورك و فديوهاتكوا من على موبايلات الناس عمر منهار و سافر يغير جو و الله يعينه يخرج من القرف اللى وحلتوه فيه
أية / انا مليش ذنب
على / و المطلوب
أية / ساعدنى
على / ازاى اشتريلك تربه ادفنك فيها ماشى روحى موتى و انا هتصرف فى دفنك ما تخافيش حاجه تانى
أية تمسح دموعها و تمشى و تبص عليه يبص الناحيه التانيه تفتح الباب و تمشى
………………………….
فى شقه امانى
امانى / انا مش هتكلم اتكلم انت
حسام / خير يا بابا
محمد / انت عامل ايه
امانى / انت جايبه تهزاءه و لا تطمن عليه
محمد / ايه اهزاءه دى هو عيل صغير
امانى / والله شكله كدا عيل و برياله
حسام / ربنا يسامحك
امانى / ربنا يسامحنا جميعا يا خويا
محمد / امانى قولتيلى كلمه خلاص سبينى بقى اكلمه
حسام / ياريت ولله عشان مستعجل بس
امانى / شوفت شوفت طبعا ما هو خارج مع الست هانم لكن عنده وقت لامه و ابوه لا
حسام / الست هانم دى اسمها ندى و دى مراتى ام بنتى ماشى
محمد / حقك اقعد بقى خشى يا امانى اعمليلنا كبايتين شاى
امانى / مفيش سكر المحروسه كسرت السكريه
حسام يبصلها و يمسك نفسه من الضحك بالعافيه
محمد / خلاص خشى اتوزعى يا امانى ممكن
امانى / لا كلمه قدامى
محمد / اللهم طولك يا روح … بص يابنى انا عارف انك راجل كبير و دى حياتك و انت حر فيها بس يابنى اللى بتعمله فى حياتك ده ما يرضيش ربنا
حسام / انا عارف انى غلطت و حياتى كانت ملخبطه بس ربنا ادانى فرصه اخيرا انى اعدلها و اصلح كل حاجه
محمد / يا ابنى بص حواليك مرات عمك ماتت و عمك اتشل و خسرنا عمتك و بنت عمتك كل ده عشان ايه
امانى / عشان الغندوره
حسام / لا عشان بنتى تتربى فى حضنى
امانى / و هى سابت خطيبها كدا من الباب للطاق فجاه اكتشفت انك حب حياتها يعنى
حسام / مفيش نصيب انا اصلا ما كنتش هسمح ان بنتى تتربى فى حضن راجل غريب و قولتلها ده صراحه و اتفقنا على خطوط حمرا نمشى عليها حياتنا هى قالت شروطها و انا قولت شروطى ابقى انا غلطان انى بنقذ بيتى انا اعرف اللى هتتجوزه ده هيعامل بنتى ازاى ما بتسمعوش عن الحوادث البشعه اللى بتحصل للبنات من اجوزا امهاتهم يا جماعه
محمد / انا معاك فى كل ده بس
حسام / اروى صح … بص يا بابا انا غلطت بس والله هى اللى بدات بالغلط انت انسان فى اسوء حالاتك و تجيلك واحده و تنام جنبك فى السرير قولى بقى انك هتقوم و تسيب المكان و تمشى احنا مش ملايكه يا بابا
امانى / انا عمرى ما هصدق ان اروى تعمل كدا اكيد مقصوفه الرقبه هى اللى مسلطاك تقول عنها كدا و تشوه سمعتها عشان تنتقم منها
حسام / لا حصل انا كنت نايم خبطت و قالت انها مش لاقيه حد تحت كنتوا تقريبا بتزوروا عمو مصطفى باين قولتلها انكوا هناك قالتلى ان موبايلها فصل و دخلت تشحنه و سبتلها البيت كلو و دخلت اكمل نوم ايه اللى يدخلها ورايا ماشى اول مره تانى مره بقى جاتلى بقميص نوم دخلت على اوضه النوم و قلعت هدومها و بكل بجاحه بتقولى هتقف تتفرج
محمد / خلاص يا حسام
حسام / انا وريتك الكشف بتاع دكتوره النسا قوليلى اللوب هيركب ازاى لواحده بنت يعنى انا اتجوزت اروى عشان خاطر العيله و عشان عمتى و عشان انا معترف بغلطتى بس دى ما ينفعش تكون ام لاولادى دى ما ينفعش اخرب عشانها حياتى او اكمل معاها حياتى حتى
محمد / قولت خلاص يا حسام
حسام / لا معلش عشان نقفل السيره الشقه من الاول شقه ندى و عمى و مراته ساهموا فى تجهيزها بالفلوس و المجهود و على يدك
محمد / حصل
حسام / و ندى حاضنه و معاها نونو يعنى الشقه حقها
امانى / اللهم طولك يا روح
حسام / يا ماما انتى قولتى ان ندى و عمى حمل عليكى انا فصلتهم عنك اعمل اكتر من كدا ايه عشان ارضيكى
محمد / خلينا فى اروى الاول اروى مهما عملت هى بنت عمتك و من دمك
حسام / و عشان كدا اتجوزتها و اللى هى عوزاه انا هديهولها نفقه مؤخر لو لسه ليها حاجه فوق تقول و انا هوصلهالها معززه مكرمه
امانى / دهبها
جرس الباب يضرب حسام يروح يفتح ندى شايله سكريه كريستال و لابسه كوليه دهب امانى تشوفه عينها تطلع
ندى / انا جبت لحضرتك سكريه كريستال من عندى بدل اللى كسرتها عشان اصالحك
امانى / مش عيب تلبسى حاجه مش حاجتك
ندى / حسام هو انا شبكتى فين انا مش لقياها فوق هو انت بدلتها
حسام يبص لابوه و امه
ندى / انا ما لقيتش حاجه فى الدولاب غير ده فلبسته بس لو بتاع حد اقلعه
ندى تحاول تقلعه و بعدين ترفع شعرها من على ضهرها و تلف لحسام
ندى / مش عارفه ممكن تساعدنى يا حسام تقلعهونى لو سمحت حسام يحط ايده على كتفها و يغمض يفتح
حسام / خليكى لبساه
امانى / حسام
حسام / احنا خارجين لما ارجع نكمل كلامنا عن اذنكوا
حسام ياخد ندى و يمشى
امانى / شايف بنت الكياده
محمد / انا خلاص مخى طق منى ايه اللى بيحصل ده
امانى / عشان تصدقنى لما اقولك حربايه
محمد / الله يعينك على نفسك و على اللى انت فيه يا حسام يابنى
امانى / الله يعينى انا
……………………………
فى الشارع بتاع أية
التاكس يقف و أية تنزل تسمع صوت صفير من القهوه ما تعبرش و تطلع بيتها تقابل جارها على السلم
الراجل / الله الله الله مالك يا ست البنات بتعيطى و لا ايه
أية تحاول تعديه يمسك ايدها
الراجل / الله مش بكلمك انا و لا انا مش قد المقام يعنى دا حتى الاقربون اولى بالمعروف يعنى
أية تزقه يخبط فى الحيطه و تطلع على شقتها تلاقى مرات الراجل نازله
الست / فى ايه يا ممدوح هى البت دى مالها و مالك
ممدوح / انا عارف اشكال زباله بتتحدف علينا لا حيا و لا خشا ربنا يستر على ولايانا بقى
الست / يا سلام
ممدوح / زى ما بقولك كدا تماحيك انتى مش نزلتى و شوفتينى لازق فى الحيطه ازاى عشان تعدى اشكال ملزقه بعيد عنك
الست / هى حصلت وربنا ما هسكت
الست تروح ترزع على باب أية
الست / افتحى يا بت الكلب انتى وربنا ما عهديهالك
أية تقفل الباب بالترباس و المفتاح
الست / يلا يا رمه يا خطافه الرجاله هى حصلت يا رخيصه يا زباله والله ما انتى بايته فيها افتحى يا بت الكلب
أية واقفه ورا الباب بتعيط
أية / ياريتنى ما رجعت
ستات تتلم على الباب
الست 2 / جرا ايه يا ام منه بتزعقى ليه
ام منه / بت الكلب اللى جوه المفضوحه بنت المفضوحه بتتحرش بالراجل
الست 3/ يلاهوى هى حصلت مش كفايا فضيحتها ام جلاجل
ام منه / النهرده جوزى بكره رجالتكوا
الست 2 / و احنا هنستنى و لا ايه يلا ننضف الشارع من الاشكال دى
الستات يضربوا الباب جامد أية تكتب رساله على الموبايل و تبعتها و تجرى تشد الترابيزه و تحوش بيها الباب و تجيب الكراسى و تحطها فوقيها و فجاه تلاقى طوبه تكسر ازاز البلكونه و صوت راجل من الشارع
الراجل / الشارع ده لازم ينضف احنا فين هنا
الخبط على الباب و الطوب على الشبابيك أية تجرى تحاول تقفل الشيش الطوب يجى فيها يعورها فى وشها بس تقفله و الباب لسه بيترزع صوت على الباب
الست 4/ همتكوا معانا يا رجاله
أية تجرى على المطبخ و تجيب سكينه و ترجع تقف قدام الباب تانى و هى فى منتهى الرعب
أية / امشوا من هنا انا ما عملتش حاجه
الست 2/ افتحى يا بت المفضوحه والله ما هنسيبك
…………………………
فى المحل عند على
على قاعد على الكرسى و سرحان
////////////////////////////////
أية / انا مليش حد اعتبرنى اختك انا مليش ذنب فى اللى حصل
على / لا لا لا لحد اختى و استوب فوقى انا اختى ما استحملتش تعيش من غير شرافها مش زيك مفضوحه بصى انا لو منك اعمل زيها روحى اقتلى اللى عمل فيكى كدا و بعدين موتى نفسك لان لا انا و لا غيرى هندخلك انا مالى انا شوفت من وراكوا غير كل اذى يلا يا بت اطلعى بره
أية توطى على رجله عشان تبوسها يرجع ورا
أية / ساعدنى
على / ازاى اشتريلك تربه ادفنك فيها ماشى روحى موتى و انا هتصرف فى دفنك ما تخافيش حاجه تانى
////////////////////////////
الصوت يفضل يتكرر فى عقله كتير
على / روحى اقتلى اللى عمل فيكى كدا و بعدين موتى نفسك لا انا و لا غيرى هندخلك انا مالى روحى اقتلى اللى عمل فيكى كدا و بعدين موتى نفسك لان لا انا و لا غيرى هندخلك انا مالى روحى موتى و انا هتصرف فى دفنك انا مالى روحى موتى نفسك روحى موتى و انا هتصرف فى دفنك انا مالى روحى موتى نفسك روحى موتى و انا هتصرف فى دفنك انا مالى انا مالى انا مالى روحى موتى نفسك روحى موتى نفسك
على يقوم من على الكرسى و ياخد المفاتيح و يمشى
…………………………….
فى مطعم
ندى قدامها اكل كتير و بتاكل كتير
ندى / الاكل حلو اوى انا فعلا بطنى كانت نشفت من اكل العيانين ده الله يعينه بابا حقيقى
حسام / الف هنا
ندى / هو انا عملالك مشاكل فى البيت
حسام / صدقينى اى حاجه تهون عشان خاطرك
ندى / انا مش عارفه بس انا عملتلهم ايه ليه مامتك و عمتى كارهينى اوى كدا دول هما اللى مربينى
حسام / بصى انا لا يفرق معايا كلامهم و لا كلام اى حد انا ما عنديش اهم منك انتى و حبيبه
ندى / و ياترى قولت الكلام ده لاروى
حسام / جوازى من اروى كان غلطه ما اعرفش انا ادبست فيها ازاى خصوصا انى كنت منهار نفسيا وقتها
ندى تبصله و تبص فى الطبق
حسام / بس الحمد لله ربنا بيحبنى و ادانى فرصه تانيه اصلح فيها كل اللى عملته و رجعك ليا
حسام يحاول يمسك ايد ندى تسحبها و تاكل بيها
ندى / فى حاجات ما بترجعش فى حاجات ما بتتصلحش حبيبه عمرها ما هيكون ليها اخوات هتكون وحيده زيى لا ليها ضهر و لا سند انا مش عوزاها تشوف مصيرى
حسام / مش هتحتاج انا و انتى هنعيش عشانها بس هنهتم بيها هنوفرلها كل اللى هى محتاجاه و اكتر هتبقى ملكه زمانها اوعدك ان مش هيبقى فى حاجه نقصاها
ندى / و لما تزهق منى تروح تتجوز عليا و تقولى قال ايه نفسى فى ولد دانا اقتلك انت فاهم
ندى تحط السكينه على رقبته يبتسم
حسام / هههههههههههههههههههههههههه
ندى تبتسم و تكمل اكل
……………………………….
فى الشقه عند اية
الباب بيتزق جامد و هى واقفه مرعوبه و الحاجات بدات تتحرك من وراه أية تجرى على اوضتها تلاقى الطوب بيتحدف من الشباك تقفل الباب بالمفتاح و تشد الكومدينو وراه الطوب ملا الاوضه تجرى تقفل الشيش بالعافيه و صوت الخبط عالى بره و جوه تبدا تشيل اى حاجه فى الاوضه و تحطها ورا الباب حتى المخدات و هى بتعيط على اخرها و السكينه فى ايدها حضناها تجرى تقف جنب الشباك و صوت الخبط بيخليها تتفزع و تتنفض فجاه الخبط يوصل لباب الاوضه
الست 3/ هتروحى مننا فين و ربنا ما احنا سيبينك يا بنت الكلب
الباب بيتزق جامد و أية بتتنفض من الرعب اول ما يجوا يدخلوا الاوضه تفتح الشباك و ترمى نفسها
……………………………
قى المطعم
ندى / الحمد لله يااااه دا انا شبعت اوى ما اكلتش كدا من زمان
حسام/ الف هنا
ندى / تعرف الخروجه دى ناقصها ايه
حسام / ايه
ندى / بحر الدنيا حر اوى السنادى و الواحد بيقعد فى البيت بقميص النوم و برده مش طايق نفسه
حسام / بس الشقه مكيفه
ندى / اممممم لا
حسام / ليه
ندى / عشان مش بيتى يا حسام
حسام / مين قال كدا
ندى / اروى قالتلى انى ضيفه و بصراحه معاها حق
حسام / لا طبعا مين هى عشان تتكلم اصلا
ندى / يا حسام يا حبيبى انا مش مراتك و عايشه فى بيتك كرم اخلاق منك مش اكتر لو لاقدر الله حصلك حاجه دلوقت انا و بابا هنرجع بيتنا مطرودين
حسام / لا مش حقيقى على فكره الشقه دى باسمى و انتى و حبيبه هتورثوا فيها
ندى / يا فرحتى ما مامتك و باباك كمان هيورثوا و اختك كمان امبارح قريت كتير فى الموضوع ده
حسام / ههههههههههههههههههههههههههههه
ندى / لا والله ما تفهمنيش غلط انا بس خايفه اديك شايف مامتك بتعاملنى ازاى و عمتى هتقويها و انا مليش حد يقف فى ضهرى بابا زى ما انت شايف على كرسى
حسام / بصى
ندى / باباكض و مامتك هياخدوا التلت و انا التمن و اللى يتفضل حبيبه هتاخد نصه يعنى منابى انا و حبيبه فى الشقه حياله التلت
حسام يتنهد
ندى / انا مش فارق معايا اصلا انا كدا كدا بابا كاتبلى الشقه بتاعته باسمى و انت عارف فلو لا قدر الله حصل اى حاجه انا مش هكون فى الشارع بس بقولك انا ليه مش قادره اخد راحتى فى البيت
حسام / انا بقولك خدى راحتك و ما تشيليش هم بكره طول ما انا معاكى
ندى تحط ايدها على ايده
ندى / اوعدنى
حسام / اوعدك
…………………………….
فى الشارع عند أية
على ينزل من العربيه يلاقى زحمه قدام بيت أية يجرى و يزق فى الناس لحد ما يوصل لعربيه سقفها مطبق و أية نايمه عليه و فاقده الوعى يبص فوق يلاقى الشباك مفتوح
على / أية أية
راجل / يلا خدت الشر وراحت خلى المنطقه تنضف
على يمسكه من هدومه
على / انت بتقول ايه انت دى اشرف منك انت فاهم قطع لسانك و لسان اللى يتكلم عنها نص كلمه
على يلف و يروح ناحيه أية و يمسك ايدها
على / قومى قومى يا أية قومى
………………….
- يتبع الفصل التالي اضغط على ( رواية سلف و دين ) اسم الرواية