رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل التاسع و العشرون 29
نهاد / يعنى انا عاوزه افهم ايه اللى مخليك هادى اوى كدا
حامد / و ايه يقلقنى بس
نهاد / يعنى انت لما تدى الراجل الفلوس من غير اى وصولات او اى حاجه تثبت حقك و تقعد المده دى كلها دا طبيعى
حامد / انتى محسسانى ان عدى سنه و لا حاجه انتى بس اللى مستعجله عشان كدا متوتره خصوصا من ساعه ما الراجل عرض عليكى الجواز
نهاد / يا سيدى ما تدخلش ده فده
حامد / و لا مؤاخذه يعنى انتى ناقصك ايه ما انتى واكله شاربه نايمه ببلاش حد قالك هاتى جنيه و لا حتى طلب منك حاجه
نهاد / يا سلام و انا هعيش هنا العمر كله مش من حقى افتح حاجه تخصنى انا زهقت من قاعده البيت
حامد / ما انا جبتلك شغلانه و انتى اللى رفضتى
نهاد / و اشتغل عند الناس ليه و انا معايا فلوسى
حامد / هو اللى هنعيده هنزيده و لا ايه كل يوم نفس الموال
نهاد / و هو انا باخد معاك حق و لا باطل
البنت تطلع من جوه
البنت / فى ايه يا نهاد صوتك عالى ليه كدا
نهاد / انا عاوزه حد يريحنى فلوسى فين يا عالم
حامد / انتى بتسرقينى و لا ايه انا كان مالى اصلا
نهاد / انا ما قولتش كدا انا بس بقولك عاوزه اى دليل على فلوسى من الراجل المقاول ده
حامد / مش قولتلك لما البرج يخلص هيكتبلك شقتين
نهاد / ما يكتبهم دلوقت ليه استنى
حامد / يوووووه بقى انا زهقت و لعلمك دى اخر مره ادخلك فى حاجه امال لو كنتى تعبانه فيهم كنتى عملتى ايه دا انتى حياله سرقاهم
نهاد / و هو ده يديه الحق يسرقنى
حامد / ما اعرفش بقى انا تعبت شوفى انتى عاوزه ايه و اعمليه
نهاد / الله يعنى ايه
حامد / يعنى انا قولتلك مش هدخلك فى حاجه تانى مش هخسر شريكى عشان خاطر ملاليم نص مليون جنيه ايه بتتكلمى فيهم دول ما يجيبوش عربيه عليها القيمه
نهاد / بقى كدا
حامد / اقولك ايه يعنى
البنت / ما تهدوا يا جماعه و توحدوا الله
حامد / انا هنزل اقعد على القهوه شويه هدى اختك و عقليها عشان انا خلقى ضيق و مش فايق لزن الحريم ده سلام
حامد يمشى
نهاد / عاجبك كلام جوزك ده
البنت / ما هو مش معقول كل يوم نفس الكلام هو انتى ناقصك حاجه ما تصبرى
نهاد / زهقت من قاعده البيت
البنت / ما تخرجى اتفسحى شمى هوا حد مانعك
نهاد / و الخروج و الفسح و الهوا ده مش لازمه فلوس
البنت / و انتى معاكيش يعنى
نهاد / الله امال انا بصرف منين من يوم ما جيت هنا
البنت / قولى كدا بقى خلاص يا ستى هسلفك
نهاد / و تسلفينى ليه
البنت / اللهم طولك يا روح يعنى الراجل لو كتبلك الشقتين و لا حتى شيك بالفلوس تستلميه لما البرج يخلص هتروحى تاكلى شقق لسه ما اتبنتش و لا تلبسى الشيك اللى لسه معاد صرفه ما جاش ما انتى برده هتفضلى قاعده معانا اكله شاربه نايمه ببلاش و بجمله يا ستى المصاريف هخلى حامد يعملك مصروف عشان ما تزعليش مع انك شايفه الحاله يعنى
نهاد تنفخ و تقعد بعيد
البنت / فكرى فيها بالراحه احمدى ربنا ان حامد اتصرف السجن مش حلو للى زينا
نهاد تبصلها
البنت / انتى اختى و خايفه عليكى هما عارفين بيعملوا ايه و هيطلعوا الفلوس امتى و ازاى بس اصبرى
نهاد / صبرت صبرت
………………………………..
تانى يوم فى الصيدليه
حسام / انا كدا ممكن اسافر و انا مطمن ان الصيدليه هتفضل مفتوحه
نور / يا راجل
حسام / اه والله اصل شغل الصيدليه تلتربعه مش محتاج صيدلى يعنى الا لو فى تركيبات و كدا و دى مش عندنا الحمد لله
نور / انت مش مبسوط هنا صح
حسام / سؤال فى الجون
نور/ طب ما ينفعش ترجع شغلك فى الامارات تانى
حسام / اخر مؤتمر فى لبنان اتعرض عليا منصب حلو اوى هو صحيح مش بنفس المرتب بس برستيج اعلى شامل السكن و التنقلات يعنى مش هصرف من مرتبى الا على اكلى و شربى و مشترياتى بس
نور / مدا حلو جدا
حسام / بس انا مش قادر اسيب مصر يا نور
نور / عملت ايه مع اروى
حسام / فى ايه
نور / ماما طول اليوم امبارح دودودودودو ما اقولكش
حسام / ماما بتحبها اوى
نور/ دى حقيقه و مش بتطيق ندى خالص
حسام / حما بقى
نور / ههههههههههههههههههههههههههههه
حسام / مروان كلمنى امبارح على فكره
نور / كويس
حسام / بيطمن عليكى
نور / ابقى سلملى عليه المره الجايه
حسام / قالى انه قدم على قرض شقه و هيشترى شقه جديده
نور / حسام
حسام / مرتبه زاد الضعف فلو دفع نص مرتبه قسط شقه تبع البنك مش هتحسى باى ضغط
نور/ الموضوع ده منتهى يا حسام مفيش امل و صدقنى لا حوار شقه و لا مرتب و لا مامته الموضوع احترام ثقه انت ما كنتش موجود و انا بنضرب قدام الناس ما شوفتش عنيها و هى بتشمت فيا ما شوفتنيش و انا بنطرد من بيتى عشان خاطرها كل الحاجات دى عمرى ما هنساها
حسام / و ربنا خدلك حقك منه و دفع تمن اللى عمله فيكى غالى اوى اتسجن و اتسرق و اتبهدل عاوزه اكتر من كدا ايه عشان تعرفى انه حقك
نور / مش عاوزه بالعكس انا سامحته و كنت بدعيله ربنا يفك كربه بس انا مش هقدر اكمل حياتى معاه الثقه و الاحترام اللى بينا انتهى و دول اساس اى علاقه
حسام / كل انسان يستحق فرصه تانيه
نور / و انا كمان استحق فرصه تانيه
حسام / هههههههههههههههههه ازاى يعنى
نور / فرصه ابدا حياتى من جديد بشكل مختلف مش شرط اتجوز هو اكيد لو اتقدم حد كويس مش هتامر و هفكر بس لو ما جاش مش هوقف حياتى على حد يعنى
حسام / ايه ده يعنى مبدا الجواز موجود و مروان هو اللى مرفوض
نور / بالظبط
حسام / هو الخسران طبعا
نور / شكرا
………………………………
فى شقه ندى
مصطفى / ما تسيبوا حبيبه معايا
ندى / هتتعبك يا بابا و مش هتعرف تتعامل معاها خليها معانا احسن
مها / و بعدين احنا هنروح بالعربيه و هنرجع بالعربيه
مصطفى / معاكوا فلوس
مها / معايا ما تقلقش
مها و ندى ينزلوا و معاهم حبيبه يلاقوا أية و عمر و على واقفين الناحيه التانيه يروحولهم
أية / ايه القمر ده
ندى / انا برده
عمر / انا وصلتها هطير بقى على الشركه
على / ماشى هتيجى تاخدها و لا اروحهالك
عمر يرفع حاجبه
على / لحد باب البيت حاضر
أية / لو تقيله عليكوا ممكن اروح لوحدى مش صغيره على فكره
على / انا بنكشه بس هو انا اقدر
ندى / و لا ما تروحيش انا بقول تيجى تباتى معايا دا احنا هنعمل احلى شغل سوا
عمر / انسى يا ست الكل دى ما تباتش بره بيتها هتسبينى فى البيت لوحدى
ندى / ما انت معاك طنط سمر هههههههههههههههههههه
على / دا سبب اولى ان أية تفضل فى البيت
عمر / احم احم
على / انا اسف
أية تهز راسها
مها / هنقف كدا كتير يا ولاد
على / لا ازاى اركبوا اركبوا
الكل يركب و عمر يشاورلهم يمشوا عمر يوقف تاكس و يمشى
……………………………….
فى الشركه
غاده / و يا ترى دا اخر كلام و لا فى تغير
عمر / اقسم بالله ابدا دا انا خللت
غاده / خللت امال هى يا عينى تقول ايه
عمر / نحس بعيد عنك بس ما يتهياليش ان فى اى تغير المرادى لانه مش فرحى لوحدى
غاده / على الله انا معزومه صح
عمر / هتيجى يعنى ؟
غاده / اكيد ليك غيرى اصلا
عمر / الصراحه لا و لو ليا اكيد مش زيك
غاده / بس احلى حاجه فى الموضوع ان أية و ندى بقوا صحاب اسمع ان الاخوات ممكن يخسروا بعض بسبب مراتاتهم
عمر / انسى انا و على مفيش حاجه فى الدنيا ممكن تفرق بينا اصلا
غاده / و دى احلى حاجه فيكوا
عمر / عملتى ايه فى موضوع صلاح
غاده / بتسال ليه
عمر / انتى قولتى هفكر و بعدين
غاده / ما انت عارف رايى انا بس بسكت دادى
عمر / ايه ده يعنى ما فكرتيش اصلا
غاده / هفكر فى ايه يا ابنى
عمر / صلاح شاب كويس جدا فى كل حاجه الحقيقه شاب محترم و من عيله و غنى و عنده شركه محترمه دا غير انه طول بعرض و وسيم
غاده / كل ده جميل و سهل الاقيه على الاقل فى خمسين واحد بس الاهم من كل ده انى احبه
عمر / لا دى ما اقدرش اتكلم فيها
غاده / الحمد لله ممكن بقى نبطل رغى و نخلص مراجعه الملفات دى عشان امضيها عشان اقوم اروح
عمر / بالراحه طيب ما تزوقيش
……………………………..
فى شارع ندى
حسام يركن العربيه و ينزل منها يلاقى عمه على القهوه
حسام / مساء الخير يا عمى
مصطفى / اهلا يا حسام تعال اقعد اللاعبك عشره طاوله
حسام / حبيبه نسيت ببرونه عندنا فى البيت قولت اجيبها لحسن تكونوا محتاجينها
مصطفى / هههههههههههههههههه والله فيك الخير بس حبيبه عندها اربع ببرونات بتبدل فيهم ندى ما بتسبش حاجه للظروف دى اشترت واحده جديده لما نسينا دى عندكوا
حسام / والله لقيتها فى المطبخ كانت ماما بتغليها فا اتنست لو كانت كلمتنى كنت جبتها فى ساعتها
مصطفى / على ببرونه يعنى ما تشغلش بالك لو عاوز تخليها عندك احتياطى خليها
حسام / لا ما لوش لزوم
حسام يبص على البلكونه فوق
حسام / هى حبيبه فوق ممكن اشوفها
مصطفى / لا والله ندى و مها خرجوا و خدوها معاهم
حسام / ممكن اعرف راحوا فين
مصطفى/ بيلفوا على فستان الفرح يا سيدى عقبال حبيبه
حسام / ربنا يسهل و على راح معاهم
مصطفى / اه بص لو حبيت تشوف حبيبه فى اى وقت انا مش همنعك و ندى كمان مش هتمنعك دا حقك انت ابوها برده و انا مقدر انها بتوحشك بس ابقى كلمنى قبل ما تيجى بدل ما تضرب المشوار على الفاضى
حسام / لا فداك ابقى ادى اللبرونه لندى بقى … استاذن
مصطفى / ما تخليك تشرب حاجه
حسام / فرصه تانيه
حسام يقوم و يركب عربيته و يطلع موبايله
حسام / ايه الاخبار
سمر / من صباحيه ربنا و انا بنضف فى الشقه
حسام / و انا مال امى انا بالموضوع ده كسرتى ام المرايه و لا لا
سمر / انت بتكلمنى كدا ليه لسه ما كسرتهاش
حسام / مستنيه ايه اما يرجعوا و يشوفوكى ما تنجزى
سمر / انت مستعجل على ايه
حسام / اللى حضرتك ما تعرفيهوش ان العروسه نزلت تجيب الفستان
سمر / عارفه و أية معاها بيفقعونى و لاد المضايقه
حسام / الاقى سبب واحد انى اعتمد عليكى مش عارف
سمر / انت خلقك ضيق كدا ليه انا ما ينفعش ابدا باوضه عمر فى التنضيف فكنت بخلص الشقه و قال يعنى تعبت فالكرسى و انا بشيله وقع على المرايه كسرها بسبك القصه يعنى
حسام / اللهم طولك يا روح
سمر / انت معطلنى اقفل و انا همسك الكرسى و افش امها دلوقت
حسام / هستنى منك تليفون بكره و انتى لوحدك اجى اركب الازاز و الكاميرا
سمر / اعتبره حصل
حسام يقفل و يحدف الموبايل على اخر دراعه
حسام / الواحد المفروض يعمل كل حاجه بنفسه احسن
……………………………….
فى شقه عمر
سمر تمسك الكرسى و ترزعه فى المرايه تكسرها و الازاز ينزل تلاقى تحتيه لوح ابلكاش ساندها
سمر تتصل بحسام
سمر / عندى خبر حلو و خبر وحش
حسام / انجزى
سمر / كسرت المرايه
حسام / مبروك
سمر / فى وراها خشب الازاز العاكس مش هيركب بص انا هصورهالك و هبعتلك الصور و انت تتصرف بقى
حسام / ماشى ما تشيليش هم
سمر تصور المرايا و تبعتها
حسام / ماشى هستنى منك بكره مكالمه و البيت فاضى اجى اشتغل
سمر / تمام سلام
سمر تجيب الجاروف و تلم الازاز المتكسر تتعور فى ايدها
سمر / اااااااااااه ايه الفقر ده
سمر تروح الحمام و تغسل الدم من ايدها
……………………………………….
فى المحل
ندى لابسه فستان زى بتاع سندريلا
ندى / ايه رايكوا
على يبتسم
أية / حلو اوى يا بت ايه ناويه تبقى احلى منى و لا ايه
ندى / يا بكاشه
على / حلو اوى بجد عامله زى الاميرات
ندى / انفع يعنى
على / تنفعى بس دا انتى تنفعى و نص
أية / احم احم
على / مين اللى جابها معانا
أية / بقى كدا
مها / ها يا ندى عاجبك و لا تشوفى غيره الوقت يا بنتى
ندى / لا حلو اوى
على / تحبى تشوفى فى حته تانيه و نرجعله
ندى / لا مش مستاهله انا هاخده
على / خلاص تمام خشى غيري يلا
…………………………………….
فى شقه عمر
عمر / طب مش تاخدى بالك و انتى بتلمى الازاز معقول كدا
سمر / دى بسيطه الحمد لله جت سليمه
أية / الحمد لله بس انا مش فاهمه ازاى دا حصل
سمر / ما اعرفش كنت بشيل كرسى التسريحه عشان امسح الارض دخت و الكرسى وقع منى على المرايه كسرها
عمر / ما هو ما كانش لازم يعنى تخلصى الشقه كلها فى يوم واحد
أية / قولتلك استنى بكره اسعادك
سمر / انتوا بتتكلموا على انى عجزت و لا ايه طب دا انا اعمل شقتين اكبر من دى
عمر / ربنا يزيدك يا ستى بس برده
سمر / لو زعلانين على المرايه اوى كدا انا هصلحها
عمر / دا كلام برده انا ما اقصدش والله زعلت عشانك
سمر / مش الفكره بس انا فعلا كلمت الراجل خلاص و هيجى ياخد المقاسات و يصلحها
عمر / بالسرعه دى
سمر / اصل انا بتعامل معاهم من ايام ابوك الله يرحمه هو اللى معرفنى عليهم فمعايا رقمهم كلمتهم و قولتله هيبعت حد ياخد المقاسات و يركب
عمر / خلاص مفيش مشكله فى فلوس فى درج الكومدينو جنب السرير انا بكره طول اليوم بره البيت
أية / خير
عمر / فى شغل كتير متاخر فى الشركه هطلع من الكليه على الشركه عشان انجز اللى ورايا الفتره اللى فاتت قصرت جامد فى الشغل
أية / و طبعا انا السبب
عمر / و انتى دخلك ايه يعنى
أية / بقول يعنى اكيد المديره فاكره كدا
عمر / احنا مش كبرنا على الكلام ده
أية / كبرنا يلا انا هدخل انام تعبانه من اللف طول اليوم هتعوزوا حاجه
سمر / الله مش هتقعدى تحكيلى عملتوا ايه و الفستان شكله ايه و بكام و لا ايه
أية / بكره يا ماما هقعد معاكى طول اليوم و احكيلك كل اللى انتى عوزاه
سمر / ماشى يا ستى تصبحى على خير
عمر / انا كمان هدخل انام تؤمرنيش باى حاجه
سمر / تسلم و تعيش تصبحوا على خير
…………………………….
تانى يوم فى الصيدليه
نور / انت مستنى حاجه
حسام / هههههههههههههههههه جرا ايه يا اروبه انتى هو انتى قاعده مركزه معايا كدا ليه
نور / ههههههههههههههههه يا ابنى انت كل تلت ثوانى تبص فى الموبايل و تبص فى الساعه
حسام / عرفتى ان ندى كنت بتشوف فستان الفرح امبارح
نور / ربنا يهنيها
حسام يبصلها و يبتسم / امين
نور / شوفتها امبارح ؟
حسام / بقولك كانت بتشوف الفستان يلا ربنا يسهلهم و عمى بيقولى ايه ابقى اتصل قبل ما تيجى
نور / ما تزعلش نفسك
حسام / و ازعل ليه ما انا عارف من الاول ان راحت عليا و جه غيرى
نور / هو خطيبها ده عامل ازاى
حسام / تعرفى النوعيه اللى بيمشى منفوخ ده و عمال يقول انا راجل انا راجل كانه مش مصدق نفسه
نور / ههههههههههههههههههه
حسام / اهو كدا لا اصل و لا فصل و لا عيله و لا اى حاجه بس ورثله قرشين بقى افتكر نفسه حاجه
نور / دا انت كارهه اوى
حسام / لا هى دى الحقيقه و لو كان غير كدا كان عمى وافق عليه لانه اتقدم قبلى
نور / غريبه فعلا
…………………………………..
فى شقه سمر
سمر / هههههههههههههههه والله دمها خفيف
أية / جدا
سمر / و ياترى بقى بتعرف تهتم بنفسها و لا زيك كدا خيبه
أية / خيبه ؟؟ كتير خيرك
سمر / يا بت دا انا لو منك و عروسه كدا كنت هبلته كل شويه اروح الكوافير اظبط شعرى و اعمل بديكير و مانكير و ادلع عشان عينه ما تزوغش على غيرى امال لو ما كنتيش بتقولى غاده متغندره و مهتميه جدا بنفسها
أية / الفلوس يا ماما تعمل معجزات
سمر / و انتى ناقصك ايه اقولك انا هعمل معاكى حركه مجدعه جوزك لما يشوفها هيخليكى تكرريها كل شويه
أية / ايه دى
سمر / الشغل الفتره اللى فاتت كان زى الفل فى المحل انا بقى هديكى فلوس تروحى الكوافير تدلعى روحك
أية / بتتكلمى جد
سمر / و انا ههزر معاكى يا بتاعه انتى
أية / طب ما تقومى بينا نلبس بقى مستنيه ايه
سمر / نلبس ايه انا فيا حيل دا انا مهدوده من تنضيفه امبارح
أية / الله امال هروح لوحدى يعنى
سمر / و انتى يعنى صغيره اقولك اتصلى بندى و روحوا سوا و انا يا ستى عزماها اهو اعتزار عشان اللى عملته قدامها اخر مره
أية / و دا ينفع
سمر / و ما ينفعش ليه كلميها و ادى دقنى ان رفضت دى هتلبس قبل منك
أية / اجرب
……………………………………
فى شقه ندى
ندى و على بيتكلموا فى التليفون هى من شباك اوضتها و هو فى البلكونه
على / والله
ندى / لا بس بابا ظبطه قاله يتصل قبل ما يجى مش تكيه هى
على / على الله يفهم بقى بجد بدات اضايق
ندى / كبر مخك
على / تعرفى انا لو عندى ذره شك ان حبيبه تهمه بجد كنت تعاطفت معاه …….. بس يمكن لما شافها قلبه حن الله اعلم
ندى / ههههههههههههههههههههههههه
على / منتهى التناقض صح
ندى / بابا بيقول كدا بس ماما بتقول ان ديل الكلب عمره ما يتعدل
على / ربنا وحده اللى يعلم حقيقه اللى فى القلوب
ندى / ثوانى أية على الوايتنج
على / طب ردى و شوفى عاوزه ايه و كلمينى
ندى / اوك
ندى تقفل و تفتح على أية
ندى / ايه ما قدرتيش تستغنى عنى و لا ايه
أية / هههههههههههههههههههه طبعا دا انتى الحته اللى فى الشمال كنتى بتكلمى مين
ندى / على
أية / اوبا
ندى / هههههههههههههههههههه عادى عادى قولى خير
أية / انا عزماكى على فسحه تطير العقل
ندى / فين
أية / هاخدك و نروح الكوافير ندلع عمر فى الشغل طول اليوم و ماما قالتلى اعزمى ندى و روحوا سوا
ندى / ايه ده بتتكلمى عن النهرده يعنى
أية / دلوقت انا مش قادره اصبر اصلا انا عمرى ما روحت الكوافير اصلا فهموت و اجرب
ندى / هههههههههههههههههههههههه انتى فاجئتينى انا مش عامله حسابى
أية / سيبى بيبو مع مامتك مش مامتك فى البيت لو مش فى البيت هاتيها و سبيها مع ماما هى فى البيت
ندى / لا ماما فى البيت بس
أية/ بقولك ايه ظبطى امورك على ما اجيلك انا هدخل و اللبس
ندى / هههههههههههههههههه انتى مجنونه يا بنتى عامله زى العيال ما بتصدقى تشبطى
أية / انتى هتكبرينى و تكبرى نفسك ليه بقولك ايه انا ما صدقت ان الدنيا بدات تضحكلى بقى و ناويه اعيش كل ثانيه و كل فرصه فياتيجى معايا و ننبسط سوا يا اما هبيعك و هروح لوحدى و لما تيجى تروحى هروح معاكى برده ههههههههههههههههههههه
ندى / ههههههههههههههههههههه بصى ماشى بس هشوف على و ماما الاول ما انا لازم اخد الاذن برده مش صايعه انا
أية / ماشى يا ستى هستنى تليفون سلام
ندى / سلام
………………………..
فى شقه عمر
أية تنزل و سمر تتصل بحسام
سمر / الو
حسام / ايه الشطاره دى انا على اعصابى من الصبح
سمر / أية نزلت راحت للكوافير ما اعرفش هترجع امتى و عمر قال عنده شغل و هيتاخر فياريت تنجزوا و تخلصونا بقى
حسام / مسافه السكه و ابقى عندك
سمر/ ربنا يستر
حسام / تعرفى انا معجب بنشاطك اوى عشان كدا جايبلك معايا هديه هتعجبك اوى
سمر / ياخويا انجز احسن عندى من اى هديه
حسام / ما قولت مسافه السكه انا بركب العربيه اهو سلام
سمر / سلام
………………………………..
فى الكوافير
ندى / لا طبعا ملكيش حق
أية / انتى اصلك ما شوفتيهاش ما اعرفش بس هى مش بتريحنى احنا بنات و نفهم بعض و بصتها ليه مش مريحانى و كلامها معاه و اهتمامها فى حاجه غلط
ندى / بصى هى قدامه من زمان و لو كان فى حاجه ايه اللى يخليه يسيبها و يتجوزك
أية / ما اعرفش بس هى مش بتقدر انه متجوز
ندى / ما هو مش معنى انه اتجوز انها تقطع علاقتها بيه يا أية دول زمايل شغل فى الكليه و الشركه
أية / يعنى لو على كان له واحده لزقاله كدا هتسبيها
ندى / على مش عيل و لو ما كانش بيحبنى ما كانش بصلى فى ظروفى دى
أية / ما اعرفش بس انا مش مرتحالها يا بنتى انتى ليه مش عاوزه تفهمى
ندى / طب اتكلمتى مع عمر فى الموضوع ده
أية / فى الاول كان بيضايقنى بس بعد كدا قالى مفيش و دلوقت بيضحك عليا
ندى / دا انتى زنانه بقى يا أية هههههههههههههههه
أية / اضحكى اضحكى ما اللى ايده فى الميه مش زى اللى ايده فى النار
ندى / مش هزعل عشان عارفه انك ما تقصديش انتى عارفه غلاوتك عندى
أية / والله و انتى كمان غاليه عندى اوى يا ندى
………………………
فى شقه عمر
حسام و الراجل اللى معاه كل واحد ماسك شونيور و بيعملوا خروم على دايره مرسومه على الابلكاش لحد ما يقطعوا الدايره دى و الراجل يركب الكاميرا و يحركها يمين و شمال و يشوفها على تابليت معاه و يورى حسام و يلزقوا لوح الازاز و ينضفوا مكانهم بسرعه بسرعه
سمر / خلصتوا
الراجل / كلو تمام بصى بنفسك حاسه باى حاجه غريبه
سمر / بصراحه لا بس انت ازاى شايف الحاجه على التاب اللى معاك مش المفروض جهازى بس اللى يقراها
الراجل / اه بس انا هنا بجرب بس و طفيته خلاص
سمر / بقولك ايه دى اسرار بيوت و تطير فيها رقاب
الراجل / عيب عليكى يا ست الكل هو انا هغشك و بعدين دا الدكتور حبيبى و ما اقدرش ازعله
حسام / يا ستى ما تخافيش
سمر / ربنا يستر
حسام / احنا لازم ننزل بسرعه قبل ما حد يرجع
سمر / طب هو لازم الكاميرا تبقى هنا ما ينفعش تبقى الصاله
حسام / احنا هنخيب و لا ايه بعد كل ده ايه ما شافوهمش و هما بيسرقوا شافوهم و هما بيتخانقوا على ما نفك المرايه و الكاميرا هنعمل ايه فى الفاتحه فى الابلكاش لو الازاز اتكسر
سمر / انا اقصد يعنى الصاله هتبقى
حسام / و بعدين ما انتى عارفه انا مركب الكاميرا هنا ليه هى ندى هتاخد راحتها فى الصاله و لا هنا اقولك بناقص خالص و خلى سى على يكوش على كل حاجه
سمر / يوووووه انت ليه مش قادر تفهم
حسام / فاهمك انا عندى بنت برده ما تخافيش… و انت قسما عظما لو طلعت بتلعب بديلك و عامل وصله تانيه للفيديوهات دى
الراجل / عيب يا دكتور و بعدين لا مؤاخذه يعنى هو انا محتاج
سمر / يعنى ايه
حسام / اقفوا ارغوا انتوا بقى و انا همشى عشان لو حد رجع هنروح كلنا فى ستين داهيه
سمر / خلاص امشوا امشوا استر يارب استر يارب
……………………………
فى شقه ندى
مها / يعنى انبسطتوا
ندى / جدا
مها / بس كنتوا اجلتوها قبل الفرح
ندى / يا ماما احنا عملنا ايه يعنى حمام كريم لشعرنا و حمام بخار و باديكير ايدين و رجلين
مها / براحتكوا
ندى / أية كانت بتفكر تصبغ قولتلها ما ينفعش عشان برضع
مها / جدعه صبغت هى ؟
ندى / لا بس بينى و بينك ضحكت عليا بتقولى اول مره اشوف عروسه بترضع انا ضحكت بس وجعتنى اوى من جوايا يا ماما حسيت انى
مها / دا نصيب يا بنتى
ندى / مش عارفه بس بجد الكلمه وجعتنى اوى
مها / هى ما تقصدش و انتى عارفه أية رغايه و بتكب الكلام من غير ما تفكر فيه
ندى / عارفه والله عارفه
مها / يا بنتى خديها منى نصيحه عيشى حياتك و ارمى الناس ورا ضهرك ياما قالوا و ياما هيقولوا ما حدش بيسكت اصلهم فاضيين و تعرفى حتى لو مشغولين هيفضوا نفسهم مخصوص عشان يتكلموا عليكى ما حدش بيسكت يا بنتى انا ياما شوفت
ندى / انا هقوم ابص على بيبو وحشتنى اوى
مها / قومى هتلاقيها نايمه لسه مرضعاها و مغيرالها
ندى / تسلم ايدك يا ست الكل
مها تبتسم و ندى تقوم
…………………………………..
فى شقه عمر
عمر / لا والله شغل عالى و لا كانها اتكسرت
سمر / الحمد لله انها عجبتك
عمر / مالك
سمر / مالى
عمر / مش عارف بس حاسك مش مظبوطه
سمر / يعنى ممكن يكون داخل عليا دور برد و لا حاجه كح كح
عمر يحط ايده على راس سمر تحرك راسها لورا
عمر / انا كنت هشوفك سخنه و لا حاجه فى ايه
سمر / ههههههههههههههه اتخضيت
عمر / اكيد ما كنتش هضربك يعنى
سمر / ههههههههههههه خلاص بقى يا عمر ما تكبرش الموضوع
أية تدخل
أية / خلصت المواعين …. ايه يا سى عمر مش حاسس باى تغيير
عمر / لا خالص لسه بقول لسمر ان الراجل عامل شغل حلو اوى
أية / منين عامل شغل حلو و منين مش حاسس باى تغير بس يا عمر
سمر / يا بنتى الرجاله ما بتاخدش بالها من الحاجات دى
عمر / حاجات ايه
سمر/ أية راحت مع ندى للكوافير
عمر / يا شيخه امتى ده
أية / معقول مش باين حاجه خالص كدا
عمر / مهو لا قصيتى شعرك و لا صبغتى و لا حاطه مكياج عملتى ايه طيب
أية / ما عملتش يلا ننام
عمر / يلا يا ستى
سمر/ بقولك ايه يا عمر بعد اذنك انا فعلا حاسه انى تعبانه شويه النهرده ممكن تخلى أية تيجى تنام جنبى
عمر / لو تعبانه نروح للدكتور
سمر / لا مش مستاهله انا بس عوزاها جنبى عشان لو تعبت زياده بس حاسه انى باذن الله باذن الله الصبح هبقى كويسه
أية / خلاص يا عمر مش مشكله انا هخلينى مع ماما لحد ما نطمن عليها و لو فضلت تعبانه بكره نروح للدكتور
عمر / ما عنديش مشكله انا بس قلقان عليها حتى لسه كنت بقولها انها مش مظبوطه
سمر / تعيش يا حبيبى تصبح على خير خش انت ارتاح يلا يا أية لحسن انا هموت و انام
أية / تصبح على خير يا عمر
عمر / و انتى من اهله
سمر تاخد أية معاها الاوضه التانيه و عمر ينام فى اوضته لوحده
…………………………………………………
تانى يوم فى المحل عند سمر
سمر فاتحه الجهاز و قاعده تراقب الكاميرا
سمر / و الله لو فضلت قاعده كدا اربعه و عشرين ساعه ما هيحصل حاجه انا لازم اتصرف لازم الاقى حجه اجيب فيها ندى عندنا عشان نخلص بقى
ثوانى و أية تدخل الاوضه لافه نفسها بالبشكير و تطلع غيار من الدولاب و تمشى
سمر / اقسم بالله يا حسام لو طلعت بتضحك عليا ما هيكفينى فيك موتك فكرى بسرعه يا سمر فكرى بقى
…………………………….
فى الصيدليه عند حسام
مروان يدخل الصيدليه
مروان / صباح الخير
نور / صباح النور ازيك
مروان / مبروك
نور / الله يبارك فيك اخبار طنط ايه
مروان / كانت ماما ماشى الحمد لله كويسه و بتسلم عليكى
نور / و انت عامل ايه
مروان / يعنى عايش
نور / بكره تتعدل خير
مروان / بصراحه انا كل يوم بعدى و بتردد كتير انى ادخل بس مش عارف النهرده اتجرات
نور / مروان لو سمحت
مروان / انا غلطت عارف بس
نور / يا مروان انا فاهمه انا لو مكانك ما اعرفش كنت هفكر او اتصرف ازاى بس بجد انا الموضوع بالنسبالى منتهى
مروان / انا و انتى كنا حلوين اوى سوا و مش قادر اتخيل نفسى مع اى واحده تانيه
نور / مش عارفه اقولك ايه
مروان / قولى اللى جواكى
نور / مش كل حاجه جوانا ينفع نقولها فى حاجات
مروان / قولى ازاى مش قادر تتخيل انت روحت خنتنى و اتجوزت من ورايا و ضربتنى و حطتنى قدام الامر الواقع قولى انت جرحتنى و هنتنى قولى ان قلبى كان حاسس و كنت بتقول عليا نكديه قولى كل حاجه
نور / و بعد ما اقول
مروان / هقولك ان اسف مش كفايا و انى اتعاقبت اوى و عرفت قيمتك
نور / صدقنى انا عمرى ما اتمنتلك غير الخير عمرى مكان فارق معايا انتقم او اعاقبك
مروان / عارف و عشان كدا كبرتى فى عينى اوى وقفتك جنبى و جنب امى حتى بالرغم من انى عارف مين السبب فى كل ده بس حقه
نور / لسه هتقول ان حسام هو السبب
مروان / كان معاه حق هو خلانى اشوف حقيقه نهاد شال الغمامه من على عنيا خلانى اعرف الفرق بينك و بينها فوقنى عشان كدا مسامحه
نور / مروان لو سمحت انا مليش مزاج اتكلم فى الهبل ده لو سمحت
مروان / بكره تعرفى انى بقول الحقيقه
نور / حسام مش رئيس عصابه عشان يعرف يعمل فيك كدا حسام فيه عيوب كلنا فينا عيوب بس مش شيطان يعنى حسام ما يعملش كدا
مروان / انا عرفت حقيقه ندى و اللى عمله معاها
نور / انت بجد مصمم تنزل من نظرى
مروان / نور انا بحاول
نور / انت جاى تشوه صوره اخويا طب ما تقول من الاول ايه لزمته فكره انا غلطان و ندمان و اتعاقبت
مروان / عشان دى الحقيقه انا فعلا
نور / انت جاى عشان خايف ان حسام يرجعك السجن خايف انه ياذيك عشان كدا بتعتزرلى
مروان / لا والله
نور / اطلع بره لو سمحت
مروان / يا نور اسمعينى
نور / دا مكان اكل عيش و اصلا مفيش بينى و بينك اى حاجه تخلينا نتكلم او اسمعك
مروان / لا فى عشره سنين و زكريات و حب
نور / الله يرحمهم كلهم ماتوا و اندفنوا من زمان اوى و صدقنى اللى عملته النهرده كان الناهيه من فضلك اطلع بره
مروان / يا نور لو سمحتى بس
حسام يدخل
حسام / مروان ازيك
مروان / ازيك يا حسام
نور / اتفضل امشى
حسام / عيب كدا يا نور دا مهما كان
نور / امشى و لا عندك استعداد تعيد كلامك قدام حسام
مروان / ماشى انا وصلتلك الموضوع بطريقه غلط بس والله ما كانش ده قصدى خالص
نور / ما يهمنيش اقولكوا انتوا برده المفروض اصحاب انا طالعه فوق
نور تسيب المكان و تمشى
حسام / هو فى ايه
مروان / مفيش انا ماشى
حسام / نورت
مروان يمشى و حسام واقف يفكر
……………………………………………..
فى المحل عند سمر
سمر تتكلم فى التليفون
سمر / ايوه يا عمر ازيك
عمر / الحمد لله عامله ايه النهرده
سمر / كويسه بقولك انا فى حاجه فى دماغى كدا و مسيطره عليا فقولت اخد رايك يعنى انت زى ابنى برده
عمر / اتفضلى طبعا
سمر / بقولك انت عارف ان أية و ندى الحمد لله علاقتهم ببعض كويسه الحمد لله يعنى
عمر / اه الحمد لله
سمر / دا طبعا يفرحنى بس كنت خايفه تكون ندى واخده عنى فكره وحشه خصوصا بعد اللى حصل فى اخر مره كانوا عندنا انا عارفه انى غلطت بس انا خايفه ان الموضوع ده ياثر على العلاقه بين أية و ندى
عمر / لا ما تخافيش من الموضوع ده
سمر / دا غير ان اهلها … انت عارف انا عملت ايه فى الصاغه قدامهم بجد انا محرجه من نفسى اوى لما بفتكر عمايلى دى
عمر / ما تفكريش فى اللى فات
سمر / يابنى النسب زى اللبن اقل حاجه تعكره
عمر / طب بتفكرى فى ايه يعنى
سمر / بفكر يعنى اجيب هديه و اروح انا و أية نزور ندى و اهلها فى البيت و نتعرف عليهم اكتر احنا فى الاول و الاخر عيله و لازم نقرب من بعض اكتر و لا انت ايه رايك
عمر / والله انا مش شايف لزوم للموضوع بس برده مش شايف مشكله فى الموضوع
سمر / المهم انك ما عندكش مانع و انا الحمد لله معايا فلوس يعنى مش هكلفك حاجه
عمر / لا مش موضوع فلوس والله و لو عوزتى حاجه مش هتاخر انا بتكلم على المبدا
سمر / انا بس كنت عاوزه نمره ندى لو معاك يعنى لو مش معاك هكلم أية او انت تجيبهالى من على
عمر / لا هى معايا و هديهالك مش مشكله هبعتهالك فى رساله حاضر
سمر / تسلم يا حبيبى ربنا يخليك ليا
عمر / على ايه بس
سمر / مع السلامه يا حبيبى
عمر / سلام
………………………………………
فى شقه ندى
مها / و انا ايه اللى هيضايقنى يانسوا و ينوروا طبعا
ندى / انا كنت بطمن بس
مها / يا بنتى هى معاها حق برده احنا فى الاول و الاخر اهل و لازم نتعرف على بعض اكتر و نقرب من بعض اكتر عشان الجواز مش واحد وواحده دول عيلتين
ندى / طب محتاجه اساعدك فى حاجه
مها / لا مش مستاهله هتصل بابوكى يجيب فاكهه و ساقع و هو جاى و هدخل المطبخ اعمل كيكه و خلاص و لا انتى رايك ايه احضر عشا
ندى / ما اعرفش
مها / لا تصدقى معاكى حق دى اول مره اهل جوزك يجوا بيتنا و لازم برده نكرمهم اخر كرم يقولوا علينا ايه
ندى / مهو الفاكهه و الساقع و الكيكه مع الشاى حلو اوى برده
مها / انا هطلع بانيه من الفريزر يفك اعمله و اعمل سندوتشات هخلى ابوكى يجيب كمان عيش و كاتشاب قوليلى ناقص حاجه فكرى معايا
ندى / ما اعرفش
مها / انا هدخل المطبخ اشوف هقدر اعمل ايه
تليفون ندى يرن
ندى / يا ماما الموضوع مش مستاهل
مها تدخل المطبخ ندى ترد
ندى / الو
على / وحشتينى
ندى / و انت كمان اخبار الشغل ايه
على / الحمد لله حلو جدا و احلى من الحلو كمان
ندى / الجو عندى فى البيت هستيرى ههههههههههههههههههه انت جاى صح
على / اجى لو عوزانى بس فى ايه مش فاهم
ندى / انت ما تعرفش و لا ايه مش سمر و أية و عمر جايين بالليل عندنا
على / لا ما اعرفش حاجه عن الموضوع ده بس اجى مفيش مشاكل ثوانى لا بجد هو انا ليه ما اعرفش حاجه عن الموضوع ده
ندى / ههههههههههههههههههههههههههههه طنط سمر اتصلت يا سيدى و قالت انها محرجه جدا من المواقف الوحشه اللى حصلت من يوم ما اتقابلنا و عاوزه نبدا صفحه جديده و اننا عيله و لازم نقرب من بعض و نتعرف على بعض
على / استر يارب
ندى / انا عارفه انك مش سهل تديها فرصه بس
على / العقرب اللى قرصك مش هيتغير هى ربنا خلقها كدا عقربه
ندى / سبحانه مقلب القلوب و ما تنساش انها ام برده ممكن تستحمل اى حاجه عشان خاطر بنتها
على / بصى انا دماغى قديمه و مش سهل تغيرى حاجه فيها بس ممكن اغمض عينى و اسلملك الدركسيون
ندى / حلو الاقتراح ده ههههههههههههههههههه خلاص انسى اى حاجه حصلت او ما تنساش غمض عينك و اتعامل و انت مغمض
على / هيجوا امتى
ندى / بعد العشا كدا
على / تمام خلاص هعمل حسابى و اجى
ندى / دا انت تنور
على / هو انا ممكن اقفل و اكلمك تانى
ندى / ههههههههههههههههههههه انت مش هتسبلى الدركسيون صح
على / يعنى مش كله عاوز اتكلم مع عمر افهم منه يمكن ارتاح هههههههههههههههههههههههههههههه
ندى / ربنا يهديك يا ابنى ههههههههههه ماشى سلام
على / سلام
……………………………………
فى شقه امانى
حسام / هههههههههههههههههههههههههه دا اهبل وربنا
نور / انت ما لكش اى دعوه باللى حصل معاه صح
حسام / عارفه قنبله هيروشيما
نور / و دا ماله و مال اللى بنتكلم فيه
حسام / انا اللى فجرتها تعرفى انا اللى خرمت الاوزون انا اللى كلت الجبنه يارب الناس ترتاح هههههههههههههههههههههههههههههه
نور / هو احنا مش هنسافر مصيف
حسام / ههههههههههههههههههههه اشمعن
نور / عاوزه اسافر و اغير جو
حسام / والله فكره حلوه جدا انا هحجزلكوا شقه فى اسكندريه و تاخدوا اروى كمان معاكوا عشان تنزل من على دماغى
نور / يعنى ايه مش هتيجى
حسام / وقته يعنى
نور / انا مش فاهمه انت ليه مشغول كدا طول الوقت
حسام / قدرى و نصيبى بحاول اقف على رجلى اللى فات ما كانش سهل برده و المصاريف قطمت ضهرى و ياريت بيحسوا
نور / انت قدها
حسام / اه لو كل الناس زيك يا نونو والله الدنيا دى تبقى جنه
نور / هههههههههههههههههههه يا راجل
حسام / انا جعان هو البيت ده ما فيهوش اكل هقوم اقلب رزقى فى المطبخ هههههههههههههههههه
نور / اعمل حسابى
حسام / هههههههههههههههه علم و ينفذ
………………………………
فى شقه ندى بالليل
مها / ما كانلوش لازمه تعبتى نفسك و كلفتى روحك
سمر / ما يجيش جنب خيرك بسم الله ما شاء الله مين هياكل كل ده
مها / الف هنا
سمر / بصراحه مش هخبى عليكى انا كنت متوتره طول اليوم و الطريق بقى ما قولكيش عربيه رش اساليهم
مها / ههههههههههههههههههههههههه على ايه يعنى
سمر / والله والله يا مها و ما ليكى عليا حلفان انا اول ما دخلت البيت و شوفت كرمكوا و اخلاقكوا اللى ما تتوصفش قلبى اتفتح و ارتحت و حسيت ان الحمد لله ربنا كريم اوى
مها / تسلمى يا ست الكل ربنا يخليكى احنا عندنا اغلى من على و اهله
سمر / هى ندى كل ده بتغير للنونه البت وحشتنى اوى
عمر / خليهم هيجوا يقعدوا معانا يعملوا ايه بنات مع بعض بقى
على / انت ازاى هادى كدا يا ابنى دول بيتفقوا علينا هههههههههههههههههههههه
مصطفى / هههههههههههههههههههههههه ربنا يحظك يا على
جرس الباب يضرب
مها / خليكوا انا هروح افتح
مها تروح تفتح تلاقى حسام شايل اكياس تبص على على جوه
حسام / ازيك يا عمتى هقف كتير
مها / لا ازاى اتفضل …. حسام يا مصطفى
حسام يدخل و مصطفى و الكل يقفوا حسام يشوفهم البسمه تروح من وشه و سمر تحرك شفايفها يمين و شمال
حسام / واضح انى جيت فى وقت مش مناسب
ندى و أية يطلعوا من جوه ندى شايله حبيبه حسام يشوفهم
حسام / انا فعلا كان المفروض اتصل قبل ما اجى بس كنت معدى بالصدفه قدام محل اطفال و اشتريت الحاجات دى لحبيبه
مصطفى / ادخل يا ابنى انت مش غريب
حسام / اخاف اكون ضيف تقيل و اضايق ضيوفك
مها / دول مش ضيوف دول اصحاب بيت
حسام يبص لمها
حسام / طبعا طول عمركوا اهل كرم بس معلش هستاذن انا فرصه تانيه بقى فرصه سعيده
حسام يمشى
سمر / هو مين ده لا مؤاخذه اصل انا اول مره اشوفه يعنى
مصطفى / حسام ابن اخويا
سمر / امال فى ايه مالكوا
مها / حسام يبقى طليق ندى
سمر / اااااااااااااااه يارب ما نكونش عملنالكوا مشاكل
مصطفى / لا ابدا ابدا اتفضلوا كلكوا واقفين ليه
سمر / معلش انا بقول نمشى عشان الوقت و كدا و لا ايه رايك يا عمر
مها / احنا لسه قعدنا
سمر / لسه الايام جايه كتير و النهرده عندكوا بكره عندنا
مها / استنوا انتوا لسه ما دوقتوش الجيلى
ندى / ماما بتعمل جيلى بالفواكه تحفه بجد هيعجبكوا اوى ما انتوش ماشيين الا لما تدوقوه مليش دعوه
سمر / بس بشرط
مها / انا موافقه بس اقعدوا بقى ما تخلوناش نحس ان القاعده باظت
سمر / والله ابدا و ادى قاعده
الكل يقعد
مها / ثوانى
سمر / والله قعدتكوا ما يتشبعش منها بس نعمل ايه بس انا امبارح والله كنت تعبانه فمش عاوزه اسهر
ندى / سلامتك يا طنط الف سلامه
سمر / الله مش قولنا بلاش طنط دى انتى يا تقوليلى ماما يا سمر كدا حاف لكن بلاش طنط دى
ندى / هههههههههههههههههه حقك عليا معاكى حق نسيت
مها تدخل و معاها صينيه عليها اطباق جيلى و تعزم على الموجودين سمر تدوق
سمر / الله حلو اوى فعلا لا دا انتى لازم تعلمينى الطريقه
مها / دا سهل اوى
سمر / لا استنى تعرفى انا بعمل ام على بقى ما تتقاومش و هترد على الجيلى بتاعك ده احلى رد
مها / هههههههههههههههههههههه هو انتى منهم
سمر / اه لتكونى فاكره انك داخله فى منافسه سهله دا المطبخ لعبتى و الحمد لله علمت أية كوووووووول حاجه
مها / جدعه انا بقى ما عرفتش اعلم ندى اى حاجه
سمر / و بتقوليها كدا قدام العريس طب استنى اما ندبسه ههههههههههههههههههه
على / لا ما تخافيش انا مدبس من زمان و راضى
ندى / على فكره بكره اتعلم عادى يعنى
سمر / خلاص على بركه الله بكره تيجى تقضى اليوم معانا هعلمك شويه حاجات بقى
مها / انتى داخله تقيله اوى يا سمر ههههههههههههههههههه
سمر / بكره تدعيلى اساليها انتى مش دوقتى المحشى بتاعى
ندى / حلو اوى فعلا
سمر / خلاص بكره باذن الله عندى و مفيش اعزار ده الشرط بتاعى انتى قولتى موافقه ههههههههههههههههههههههه دبستكوا بقى مليش دعوه
مها / و انا مش هكسر كلمتك بكره عندك و نشوف بقى مين اللى ادبس هههههههههههههه
على / انا كنت فاكر انكوا رايحين بكره تشتروا رفايع باين صح و لا انا لخبطت
سمر / ياخويا و ماله نتغدى و ننزل بالليل كلنا نلف براحتنا احنا فى الصيف هو حد بينام بدرى فى الصيف
مها / انا عن نفسى معاكوا فى اى حاجه انتوا خطتوا و قولولى
ندى / خلاص مش مشكله عشان خاطر ماما سمر حلو كدا
سمر / حلو اوى ربنا يخليكى ليا هههههههههههههههههههههههه
……………………………..
فى شقه أية بالليل
عمر / و هنبقى كدا يعنى علاطول
أية / اكيد لا طبعا بس مش لما الاحوال تتعدل و الميه ترجع لمجاريها احنا اللى هنتكلم و نقول هو يوم عندنا و يوم عندكوا و نفركشها
عمر / وجهه نظر برده
أية / بص انا هحاول اتكلم مع ماما بكره
عمر / لازم تفهميها ان كتر الاحتكاك بالناس بيعمل مشاكل و خلينا فى حالنا و هما فى حالهم احسن
أية / انت عارف ماما بس انا حاسه انها المرادى بتحاول تعمل حاجه صح عشان خاطرى سبها بدل ما نمنعها و ترجع للمشاكل تانى انا ما صدقت فوقت
عمر / انا مش هنكر ان التغير ملحوظ و مبهر بس على راى على سريع اوى و ده ما يطمنش
أية / على عمره ما هيسامحها و لا حتى هيحاول يديها فرصه
عمر / دى اصلا اخر فرصه ليها
أية / يبقى ما نقفش فى طريقها و نسيبها تاخدها للاخر عشان ما نبقاش احنا اللى بوظناها
عمر / اللى تشوفيه بقولك ايه امك نامت
أية / من بدرى
عمر / طب ما تقربى بقى شويه
أية / ثوانى هقوم اقفل الباب بالمفتاح و اجى
عمر / قشطه
…………………………………
فى اوضه سمر
سمر بتكلم حسام فى التليفون
حسام / انا مستعجل اكتر منك و بيتهيالى انا عملت اللى مطلوب منى و اكتر
سمر / بس ما قولكش اول ما شوفتك قدامى ركبى خبطت فى بعضها
حسام / ما انتى عارفه انى جاى
سمر / خفت تمسك فى على و لا تغلط و لا انا اغلط
حسام / على فكره كان نفسى نمسك فى بعض كان هيسهل عليكى الموضوع بس واضح انك عرفتى تتصرفى بكره بقى تنفذى باقى الخطه يمين شمال تحطيهم فى الاوضه باى شكل
سمر / تمام و اول ما ربنا يكرمنا تجيب الراجل ده يشيل الكاميره و نرجع كل حاجه زى ما كانت فاهم
حسام / انا رقبتى تحت ايدك ما تسلمنيش الحاجه الا لما تتاكدى ان كلو تمام
سمر / انا ما بعرفش انام و عماله امسح فى الفيديوهات كل شويه من على الهارد بتاعى
حسام / انا فاهم والله موقفك بس انا اعمل ايه اكتر من كدا ما انا اديتك كل الضمانات امال لو كانت التسجيلات معايا بقى هتعملى ايه
سمر / هو انا هكسر المرايه تانى
حسام / لا المرادى انا مجهز المرايه ناخد اللى عاوزينه و نوزعهم و ساعه زمن هنغير المرايه من غير ما يحسوا مش زى المره اللى فاتت
سمر / كلو على الله انا هموت من التوتر ده مش مستحمله
حسام / كلو بتمنوا برده
سمر / انا لازم اقفل لحسن حد يحس بحاجه
حسام / هستنى البشرى سلام
سمر / قول يارب سلام
…………………………
فى شقه حسام تانى يوم الصبح
حسام صاحى بدرى و لابس و متشيك و بيسرح شعره و هو بيصفر و مزاجه عالى اوى اروى تصحى من النوم
اروى / صباح الخير
حسام / انا صحيتك و لا ايه معلش اندمجت شويه
حسام يروح يقعد جنب اروى و يمسك ايدها و يبوسها
اروى / هو فى ايه
حسام / النهرده باذن الله كل مشاكلى اللى كانت مضيقانى الفتره اللى فاتت هتتحل
اروى / يارب
حسام / ايوه كدا قومى ادعيلى لحسن انا على اعصابى
اروى / انت بقى مش هتريح اعصابى انا و تقولى ايه اللى كان موترك الفتره اللى فاتت دى كلها
حسام / غصب عنى والله يا حبيبتى ضغط فى كل حته فى البيت و الصيدليه و الورق و مشاكل مع شركات الادويه بسبب النواقص و الفلوس معلش
اروى / على العموم ملوش لازمه نتكلم فى اللى فات اهم حاجه اللى جاى
حسام / ايوه عين العقل انا بقى عاوزك تقومى كدا و تروقى نفسك و ارجع الاقى احلى اكل من احلى ايدين
اروى / بس كدا من عنيا
حسام / تسلملى عنيكى و على فكره انا قولت لنور امبارح هبعتكوا تصيفوا اسبوع بقى اتنين تلاته زى ما انتوا عاوزين
اروى / انت بتتكلم جد
حسام / طبعا يا بنتى هو انا يعنى حابسك انا والله كان غصب عنى
اروى / اخيرا هو ده حسام اللى بحبه انا بجد كنت مخنوقه اوى الفتره اللى فاتت من معاملتك
حسام / انتى السبب انتى اللى مستعجله و انا برده بشر من لحم و دم
اروى تحضنه
اروى / يا حبيبى يا حسام حقك عليا مش هعمل كدا تانى
حسام / ينهار ابيض انا كدا هتاخر ورايا مليون حاجه النهرده و انا لو فضلت جنب القمر ده مفيش اى حاجه هتخلص و يا عالم هعرف اظبط المواعيد دى تانى امتى
اروى / لا لا لا امشى يلا ربنا يوفقك
حسام / سلام يا روحى
اروى / مع الف الف سلامه يا قلبى
………………………………….
فى شقه عمر
عمر يصحى بدرى و يلبس و يطلع من الاوضه يلاقى سمر خارجه من اوضتها
عمر / صباح الخير
سمر / انت رايح الكليه و لا ايه
عمر / اكل العيش بقى
سمر / ربنا يوفقك اعملك تفطر
عمر / لا هفطر اى حاجه فى السكه عشان ما اتاخرش تسلم ايدك اجيبلك حاجه معايا و انا جاى
سمر / لا انا هنزل السوق اشترى شويه حاجات
عمر / محتاجه فلوس
سمر / لا معايا ما تشيلش انت هم
عمر / تمام عن اذنك
سمر / مع الف سلامه
عمر يمشى و سمر تدخل المطبخ و تفتح التلاجه و تطلع حاجات و تبدا تشتغل أية تصحى و تدخل المطبخ
سمر / صباح الخير ما كنتش ناويه اصحيكى دلوقت بس جيتى لقضاكى بقى ههههههههههههههههههه
أية / صباح الفل
سمر / بصى انا هعمل فطار فى السريع و انزل على السوق اجيب الطلبات على ما ارجع تروقى الشقه و المطبخ و انشرى الغسيل عشان نلحق نلمه و نطبقه قبل ما الناس تيجى
أية / حاضر
سمر / حضرلك الخير يا قلبى
أية تمشى
سمر / انتى رايحه فين
أية / واحده لسه صاحيه من النوم هتروح فين الحمام هروح اخد دوش كدا و افوق صباح الخير بقى
أية تمشى
…………………………..
فى الشارع
حسام / شايفك شايله و معبيه
سمر / امال يعنى مش لازم اشرف البيه قدام نسايبه
حسام / اتفضلى
حسام يدى سمر شريط دوا
سمر / البتاع ده امان
حسام / نص حبايه بس فى عصير ندى او فى اكلها الطبق او الكبايه لو اتلخبطت مش عارف هعمل فيكى ايه
سمر / مش هزود هو مال سايب هو
حسام / عارفه لو ربنا كرمنا النهرده و كل حاجه مشيت زى ما خططنا
سمر / انا مستعجله اكتر منك الكاميره دى مجننه امى اقسم بالله لو عرفت انك واخد واصله
حسام / وصله ايه هى اوربت ما تفكك بقى من البرانويا اللى عندك دى انا كل اللى عاوزه ندى غير كدا ما يفرقش معايا
سمر / و على؟؟ انت قولت انك هترجعه الفقر تانى
حسام / على من غير ندى ما يساويش ضربتين فى الراس توجع برده
سمر / بقولك ايه
حسام / بقولك ايه انتى على لو كان عاوز يتجوز و خلاص كان اتجوز اول ما الفلوس جريت فى ايده و بعدين انتى مصعباها ليه عروسه على طارت و بنتك فى حضن جوزها تربطه بعيل و لا اتنين و هو هيتحرك لوحده و يضرب فى اخوه و ياخد منه حقه تالت و متلت مفيش حاجه بتحرك الراجل قد العيال اسالينى انا
…………….
- يتبع الفصل التالي اضغط على ( رواية سلف و دين ) اسم الرواية