Ads by Google X

رواية سلف و دين الفصل السادس و العشرون 26 - بقلم لولو محمد

الصفحة الرئيسية

   رواية سلف و دين كاملة بقلم لولو محمد عبر مدونة دليل الروايات 


 رواية سلف و دين الفصل السادس و العشرون 26

مها / ندى ندى
ندى / خير
مها / شكله ما قدرش على زعلك
ندى / مين
مها / على طالع مع ابوكى
ندى وشها يحمر
مها / ههههههههههههههههههههه
صوت الباب بيتفتح
مصطفى / اتفضل يا على اتفضل يا ندى على هنا عاوزك ثوانى هدخل اشوفها فين
ندى تطلع
مصطفى / اهى
على يبصلها و يبتسم و هى بتحاول تبان زعلانه بس ما تقدرش و تبتسم
مصطفى / على عاوز يقولك حاجه
على / بصى انا دوغرى و بحب كل حاجه تبقى واضحه من الاول انا ممكن اعمل حاجات غلط من غير ما اقصد عادى ممكن حد ياسفنى عادى ممكن تدلعى عليا عادى برده
ندى تضحك
على / بس ما ينفعش ما تتكلميش معايا زعقى اتخانقى اشتمى اعملى اللى انتى عوزاه المهم ما نبطلش كلام و انا كمان كدا على فكره
ندى / ماشى
على / انا اتفقت مع عمى اننا بكره ننزل نجيب الشبكه احلى شبكه لاحلى عروسه
مصطفى / احنا صحيح هنعملها فى الصاغه على الضيق و مش هنقول لحد عشان يعنى ما حدش يكلمنا و لا يتكلم عننا
الضحكه تروح من وش ندى
مصطفى / ما تنسيش ان عدتك ما خلصتش
ندى تبص لعلى
على / بس دا مش معناه اننا مش هنفرح احنا هنروح بكره نشترى الشبكه و ناكل بره و نتفسح و ندخل سينما و نسهر لحد الصبح احنا فرحتنا لينا ما حدش له حاجه عندنا
ندى / اللى تشوفوه
مصطفى / على البركه اقعدوا بقى على ما ادخل الحمام و اجى نقرا الفاتحه اصل السكر بعيد عنك مبهدلنى
مصطفى يدخل و مها تطلع شايله عصير
مها / الله انتوا واقفين كدا ليه ما تقعدو
على يروح يقعد مكان ما كان قاعد يوم ما اتقدم بالظبط و يبص حواليه
ندى / ايه مش قد المقام و لا ايه
على / بالعكس انا بس مش مصدق انى هنا هقرا الفاتحه
مها / ربنا يسعدكوا يا اولاد و يبعد عنكوا ولاد الحرام
////////////////////////////////////////////////////
على / انا نيتى خير انا جاى اتقدم رسمى اهو و كل اللى طلبتوه وافقت عليه و بعدين احنا علاقتنا ما عداتش زمايل الكليه
حسام / ايه ده انت لسه بتدرس لا دى عيلت اوى يا عمى
على / احترم نفسك
حسام / انا محترم غصب عنك الدور و الباقى على اللى زيك على العموم ملحوقه مدام انت هنا بقى احب اعزمك على فرحى انا و ندى يوم الخميس ابقى تعال بس ابقى اللبس بدله نضيفه عندك و لا اسلفك
/////////////////////////////////////////
ندى / مالك يا على
على / مليش افتكرت حاجه كدا
مها / اشرب يا حبيبى العصير
على ياخد كاسه و يشرب
على / تسلم ايدك يا ست الكل
مصطفى يدخل و يقعد
على / نقرا الفاتحه
مصطفى / مستعجل اوى كدا
على / انا مستنيها بقالى كتير اوى
مصطفى / حقك عليا انا …. نقرا الفاتحه
الكل يقروا الفاتحه و ندى و على بيبصوا لبعض و هما مبتسمين
…………………………………
قدام بيت أية
تاكس يقف و أية تنزل عمر مستنيها
عمر / ايه فلوسى حلال و لا ايه
أية / بطل رزاله بقى هههههههههههههههههه لا ما لفيناش
عمر / ليه
أية / فى الشارع !!! لما نطلع هحكيلك كل حاجه انت اصلا ما طلعتش ليه
عمر / قولت استناكى بما ان امك فوق ههههههههههههههههههه
أية/ يا رزل
أية و عمر يطلعوا و حسام واقف بالعربيه بعيد
////////////////////////////
حسام / مين الواد ده شفته فين يا حسام شفته فين معقول ده اخو على اه هو تصدق مراته دى و لا اخته و لا ايه مش مشكله يا خبر بفلوس بكره الصبح يبقى ببلاش
///////////////////////////////
حسام يطلع بالعربيه و يروح
……………………………..
فى شقه حسام
حسام يفتح الباب اروى تجرى عليه
حسام / انتى لسه صاحيه
اروى / ينفع كدا اتصل عليك مليون مره غير متاح
حسام / فصل منى هعمل ايه يعنى
اروى / كنت فين
حسام / فى ايه يا اروى مالك مرواحك عند امك شحنك ضدى و لا ايه احنا اتفقنا انى ما بحبش النكد
اروى / انت بتسمى قلقى و خوفى عليك نكد
حسام / اروى ما تحوريش انا ما كنتش عند ندى و لو مش مصدقانى انزلى خلى نور تتصل بعمى و تساله انا ما كنتش عندهم ارتاحتى كدا
اروى تبص الناحيه التانيه
حسام / بقولك ايه انا تعبان اوى و عاوز انام ورايا مشوار الصبح بدرى اوى
اروى / على فين
حسام / هجرى على الورق بتاعى هكون صاحى اوزع لبن يعنى
اروى / لا يا حسام بس اصل
حسام / حبيبتى عشان خاطرى اى كلام اجليه لبكره انا مش قااااااااادر
اروى تهز راسها ماشى حسام يبتسم و يدخل ينام
…………………………..
تانى يوم الصبح فى شقه على
تليفون على يرن يصحى يبص يلاقى فيديو من ندى يفتح
ندى / انت كنت نايم سورى بجد
على / و هو انا كنت احلم باصطباحه احلى من كدا اكيد النهرده يوم جامد
ندى / ههههههههههههههههه
على / و اهو فرصه تشوفينى و انا لسه صاحى من النوم يمكن تغيرى رايك
ندى / انت عارف انى ما نمتش طول الليل
على / معقول ليه طب كنتى كلمتينى
ندى/ ما انا لما قفلت معاك قولت هنام و كدا و فضلت اتقلب و اتقلب و فى الاخر ما عرفتش خفت اتصل بيك اقلقك حرام يعنى و ما اقولكش فضلت جنب الساعه عشان اتصل لحد ما فتحوا المحل قولت اتصل بقي
على / هههههههههههههههههههه لا بعد كدا هنام و نسيب الكاميرا مفتوحه
ندى / لا انسى قولتلك قبل كدا مش هتشوفنى و انا لسه صاحيه او وانا نايمه غير لما تدبس فيا الاول
على / هههههههههههههههههههههههههه قوليلى بقى ايه اللى واخد عقلك و مسهرك
ندى / انت
على / لا كدا هتغر
ندى / هههههههههههههههههههه لا بجد تعرف و انا هناك فى الاول ما كنتش اعرف حاجه كانوا ضاحكين عليا كنت فاكره ان حسام بيضحى كنت فكراه ضحيه و حاسه بتانيب ذنب رهيب ناحيته خصوصا انه كان بيبذل مجهود جبار عشان يسعدنى و يخرجنى من الحاله اللى كنت فيها ساعتها قلبى اتهز او عقلى ما اعرفش بس حسيت للحظه انى ظلماه ان معقول فى حد بيحبنى اوى كدا حتى و انا مش ليه معقول حد يستحمل اللى حسام بيستحمله ده عشانى ياترى على انت يعنى عندك استعداد تقدملى ده طب اشمعن انت اللى حبيتك و حسام لا
ندى تسكت
على / كملى
ندى تتنهد
ندى / انا اصلا مش عارفه حبيتك ليه لحد دلوقت يعنى لو راجعت زكرياتنا مش هتلاقى كتير اه كل واحد كان متابع التانى من بعيد بس سوا احنا ما احتكيناش ببعض اوى فاهمنى
على / ايوه
ندى / ياترى الحب ده هيكمل لما نعرف بعض اوى لما نعيش سوا لما تدوق طبيخى مثلا
على / هههههههههههههه و مالك بتقوليها كدا ليه …. هههههههههههههههههههه فهمت فهمت
ندى / ما كل حاجه لازم تبقى على نور من الاول
على / انا بعرف اطبخ ما تشيليش هم اخرنا هناكل من المحل بتحبى الشاورما و انا بحب الفول خلاص مش مهم
ندى / هتفضل تحبنى يا على بعد ما نتجوز هتقدر تضحى بابسط حقوقك ان يكونلك طفل من صلبك على انت عارف انت داخل على ايه انت عارف
دمعه تنزل من عين ندى و على يعدى ايده على الشاشه عشان يمسحها ما بتتمسحش يتنهد
ندى / انت بتعمل ايه
على / فى دمعه على خدك عاوز امسحها
ندى تمسحها و تبتسم
على / انتى مش عارفه انتى بالنسبالى ايه انا اول مره شوفتك كنت من غير روح بضحك قدام الناس بس مش بحسها بنام من التعب مع انى عارف ان الكوابيس اللى هشوفها هتفزعنى لما دخلتى حياتى بضحكتك فى طفل كان بيتولد جوايا و كل يوم كان بيكبر لحد ما بقى روحى لما غبتى عنى روحى راحت منى بقيت فاضى من جوه زى الموميا او الزومبى مفيش احساس مفيش روح كنت حد وحش اوى عملت حاجات مش فخور بيها اذيت اقرب الناس ليا لاول مره فى حياتى ادى ضهرى لابويا لمته على اللى حصل و الاكبر انها كانت اخر مره ما كانش فى فرصه اصلح اللى حصل لانه مات بعدها علاطول مات و انا لاول مره فى حياتى انا اللى بديلو ضهرى مش هو حتى عمر ما سلمش منى و عايش لحد النهرده بحاول اصلح اللى حصل ما تبعديش عنى تانى يا ندى انا مش عاوز ارجع على الوحش ده تانى
ندى تاخد الموبايل فى حضنها و تعيط
ندى / كان غصب عنى والله كان غصب عنى
على / انتى بتعملى ايه
ندى / بحضنك مش انت مسحت دموعى
على / هههههههههههههههههههههه انا بحبك لدرجه الجنون يا بت
ندى تمسح دموعها و تبص للموبايل و تضحك و تتاوب تحط الموبايل جنبها
على / عاوزه تنامى
ندى / اه خليك جنبى لحد ما انام
على / لو عليا عاوز اخلينى معاكى كل لحظه فى عمرى
ندى تغمض عينها و على بيبص عليها و مبتسم لحد ما ندى تروح فى النوم الباب يتفتح و مها تدخل
مها / ندى الفطار
على / شششش سبيها لسه نايمه
مها / ازيك يا على
على / سبيها تنام لسه نايمه كانت سهرانه طول الليل
مها / حاضر اقفل
على/ اقفلى سلام
مها تقفل و تحط التليفون جنب ندى و تاخد حبيبه من جنبها
مها / تعالى لحسن تصحى تصحيها
مها تطلع و تقفل الباب وراها
……………………………………….
قدام بيت عمر
أية نازيه هى و سمر يركبوا تاكس حسام يمشى وراهم التاكس يقف عند المحل و ينزلوا يفتحوا المحل و يدخلوا يقعدوا جواه حسام يركن عربيته و ينزل يقعد على قهوه قدام المحل
القهوجى / تؤمر بحاجه يا باشا
حسام / واحد شاى تقيل سكر بره على ميه معدنيه
القهوجى / حمامه و عندك واحد شاى تقيل على ميه معدنيه سكر بره
حسام / الا قولى يا
القهوجى / محسوبك سيد
حسام / قولى يا سيد هو انت شغال هنا من زمان
القهوجى / بتدور على حد معين قولى و انا افيدك
حسام يطلع فلوس و يديهاله
حسام / لا مش حد انا بس عاجبنى المحل اللى هناك ده تعرفش مين صحابه ناويين يبيعوه و لا لا كدا يعنى
القهوجى / دا بتاع الحج محمود حقى الله يرحمه بانى البيت على ايده
حسام / طب و نظام الورثه ايه
حسام يدى فلوس تانى للقهوجى
القهوجى / يا باشا انا من يوم ما اشتغلت هنا و انا ما 1شوفتش غير بنته أية اللى هى بنته من مراته اللى واقفه فى المحل دلوقت دى بس لما ربنا توفاه بقى يوم الجنازه ظهر ان عنده ولدين بس شكلهم ولاد ناس اوى عملوله عزا من اول الشارع لاخره
حسام / ظهروا كدا من عدم
القهوجى / فى ناس بيقولوا انهم كانوا مسافرين بره و ناس بيقولوا انهم ولاده من مراته الاولانيه و لما اطلقوا خدت العيال عندها
حسام / يعنى انا لما احب اتكلم على المحل اكلم مين
القهوجى / لا تتكلم مع الست سمر هى الوحيده اللى بتفتحه و تقف فيه
حسام / اه طب ما تعرفش علاقتها ايه بالورثه الولدين يعنى الموضوع هيبقى سهل و لا اروح للرجاله علاطول و افكنى من الحريم
القهوجى / فى بيتها يا باشا عشان الاستاذ عمر ابن الحج محمود اتجوز أية بنتها اصل اللى فهمته بعدها ان أية مش بنت محمود حقى دى بنت مراته الحكايه دى ما كناش نعرفها زمان
حسام يدى فلوس للقهوجى
حسام / كتر الف خيرك
القهوجى / لو عوزت اى خدمه تانيه انا محسوبك
حسام / ما اتحرمش
حسام يقوم و يركب عربيته و يمشى و عينه على المحل
…………………………………
فى المحل
أية / لا مش هطلع اعمل الغدى فوق على فكره
سمر / خلاص يا اختى نبقى نبعت نجيب دليفرى
أية / ماما بقولك ايه انا هاكل فى بيتى
سمر / اه طبعا سبينى و روحى يا اختى
أية / يا ماما مهو اللى بتعمليه ده صعب اوى بصراحه انا مش هقدر اقعد جنبك اربعه و عشرين ساعه خايفه من ايه بس
سمر / خلاص بقيت تقيله عليكى خلاص
أية/ لا طبعا ما اقصدش بس لو حضرتك خايفه خلاص نقفل المحل و نروح عمر هيروح من الشغل جعان و بالليل عنده شركه ما ينفعش اقوله تعال اتغدى هنا
سمر / ليه بقى ان شاء الله
أية / الله كل واحد بيرتاح فى بيته يا ماما
سمر / و هو ده مش بيته و بيت ابوه صحيح
أية / ماما انتى فاهمه قصدى ما ينفعش نتشحطت كدا طب ما نيجى نعيش معاكى هنا و خلاص بقى
سمر / و ماله الشقه شرحه و برحه و تساعى من الحبايب الف
أية / يوووووه مفيش فايده من الكلام انا تعبت
سمر / طبعا مهو حبيب القلب اغلى من امك رضاه عنك اهم من رضا امك … يا خساره … يا خساره تعبى فيكى
أية / انتى بتعملى فيا كدا ليه هو انا هقطع نفسى يعنى يا ماما ما قولتلك لو خايفه بلاش ننزل المحل اصلا و خلينا فى البيت و خلاص
سمر / احبسونى اكبتوا حريتى اخنقونى ما تشوفولى تربه و تدفنونى فيها احسن
أية / انا طالعه اعمل الغدى و اخلص انا اسفه يارب خدنى و ريحنى بقى تعبت
أية تطلع و هى بتتزهق و سمر متمزجه
………………………………
فى شقه حسام
اروى / ايه نازل تانى و لا ايه
حسام / اه بس مش دلوقت
اروى / حسام
حسام / نعم
اروى / انت مش ملاحظ انك مش مهتم بيا خالص
حسام / ليه و انا قصرت فى ايه
اروى / ما قصرتش اى كان انا راضيه بس انا عروسه و من حقى احس ان حبيبى جنبى
حسام / ما انا جنبك اهو
اروى / اه بس مش معايا عمال تفكر و تسرح يا اما نايم يا اما بتاكل و الاسم جنبى و خلاص
حسام / فتره و تعدى بس عشان فى حاجات كتير اوى فى دماغى الفتره دى بس باذن الله لو ربنا كرمنى و كل حاجه مشيت زى ما انا عاوز اوعدك ان دماغى هترتاح على الاخر
اروى / و ساعتها بقى هتفضالى
حسام / هيبقى ورايا ايه
اروى / طب و ايه الحاجات اللى فى دماغك دى قولى يمكن اقدر اساعدك
حسام / و ليه تشغلى بالك بمشاكلى بصى انا عاوزك رايقه كدا عشان تعرفى تفكى عنى هتشيلى الهم و تكرمشى و تعجزى و فى الاخر اروح اتجوز واحده اصغر منك
اروى / دانا اقتلك
حسام / ههههههههههههههههههههه انا بغيظك بس
اروى / حسام بلاش تعمل كدا تانى انت عارف انا بحبك قد ايه عشان خاطرى
حسام / حاضر من عنيا
……………………………………
فى اوضه ندى
مها تصحى ندى
مها / ايه يا بنتى هتنامى لحد امتى
ندى تصحى و تتمطع
ندى / صباح الخير يا ماما هى الساعه كام
مها / العصر على اتصل عليا و قالى نلبس عشان ننزل نجيب الشبكه
ندى/ انا جعانه اوى كدا ليه
مها / اعملك لقمه تتصبرى اصل على عازمنا على الغدى بره فى محله الجديد
ندى / هو على عنده محل غير ده
مها / هو ما قالكيش على العموم ادينا هنروح و نشوف و اهو بعيد عن البيت عشان نبقى براحتنا
الفرحه تروح من على وش ندى
مها / مالك فى ايه
ندى / و كان ربنا مش كاتبلى افرح كانى بعمل حاجه غلط و بدارى من الناس سبحان الله لما كنت فعلا بعمل حاجه غلط كانت الناس كلها فرحنالى لما كنت تعيسه الناس كلها كانت بتباركلى لكن لما اخيرا بعمل الصح اخيرا هفرح لازم ادارى كانى بعمل جريمه ليه يا ماما
مها / يا بنتى فتره بس لكن هنعمل بعد كدا فرح كبير و نرقص و نغنى و لا هيهمنا حد
ندى / و هو الناس ساعتها هترحمنى مش هيقولوا اتجوزت بعد عدتها علاطول و كانت مرتباها و كانت ماشيه معاه و ما استنتش و كل واحد يتكلم عنى بكلمه هو الناس هتسبنى فى حالى
مها / انتى ليه شاغله نفسك
ندى / مش انا انتوا احنا كلنا ما اعرفش بس انا حاسه انى مخنوقه متحاصره خايفه ساعات بفكر اتجوز انا و على فى السر و نسافر فى اى حته عشان خايفه ان حسام لما يعرف يفكر ياخد منى حبيبه ساعات بفكر هو هيسكت هيرضى انا خايفه و كل مره بحاول انسى خوفى تحصل حاجه تفكرنى بجد تعبت و اعصابى تعبت ما بقيتش عارفه انام من كتر التفكير هو ده طبيعى و لا انا اللى مجنونه
مها تطبطب على ندى
مها / على بيحبك و انا و ابوكى جنبك و ما حدش فينا هيسمح لاى حاجه وحشه تحصلك لا انتى و لا حبيبه ما تخافيش
ندى/ وعد
مها / وعد
ندى تهز راسها
مها / قومى بقى اغسلى وشك كدا و فوقى و اللبسى على ما احضرلك لقمه خفيفه تاكليها
ندى تبتسم و تقوم
………………………………………
فى المحل أية نازله من فوق
سمر / فى ايه ؟؟؟ ايه اللى نزلك ؟؟؟ فى حاجه ناقصه
أية / لا عمر كلمنى و قالى اننا معزومين على الغدى بره
سمر / والله فجاه كدا و معزومين فين بقى ان شاء الله
أية / على و ندى هيروحوا يجيبوا الشبكه و بعدها هنطلع على المطعم اللى عند الجامعه ناكل كلنا و نسهر هناك و كدا يعنى نحتفل
سمر / و دا حصل فجاه
أية / اه امبارح على اتفق مع حماه و النهرده هيروحوا يعنى حضرتك عارفه ان عمر بيقفل موبايله و هو نايم و على ما فتحه بقى و على كلمه و هو كلمنى الموضوع خد وقت بصى انا بقول اروح اغير هدومى الطقم ده عادى اوى و لا انتى ايه رايك
سمر / طبعا ما ينفعش خالص انتى هتقابلى سلفتك و اهلها لازم يعرفوا انك مش قليله انا هقفل المحل و اجى معاكى بنفسى لازم الكل يعرف ان عمر حقى مراته مفيش زيها اه
أية تبص لمامتها بطرف عينها
أية / حاضر
………………………….
قدام شقه عمر
عمر واقف تحت أية تنزل ووراها سمر عمر يوطى على أية
عمر / هى جايه معانا ؟؟؟
أية / ا مقدرتش اقولها ما تجيش
سمر / بتتكلموا فى ايه
عمر / و لا حاجه بقولها اتاخرتوا اوى
سمر / ياخويا كل تاخيره و فيها خيره امال فين العربيه
عمر / هناك اهى يلا عشان لسه هنعدى على على ناخده
……………………………..
قدام بيت ندى
ندى تنزل هى و مامتها و باباها و على يروحلهم
مصطفى / احنا هنركب تاكس و نسبقكوا على هناك
على/ عمر زمانه جاى و معاه العربيه
مصطفى / معلش نبقى نركب و احنا طالعين من هناك يعنى انت فاهم
على / تمام حاضر انا مش هتاخر باذن الله … ايه القمر ده
ندى تنكسف
على / دا سلوبيت جديد حلو اوى
ندى تبص على حبيبه و تبص لعلى تلاقيه بيضحك تضحك
مصطفى / تاكس هناك اهو
مصطفى يوقف التاكس و يمشى و بعيد حسام واقف بيتابع يجى يركب العربيه عمر يدخل الشارع بالعربيه حسام يستنى و يبص يلاقى على ركب معاه و طلعوا يطلع وراهم
على / اهلا يا سمر
سمر / مبروك يا عريس
على / الله يبارك فيكى عقبالك
سمر / هههههههههههههههههه يخيبك واد هو ينفع بعد ابوك يجى حد
على / و هو ابو أية كان ناقصه ايه
سمر / ما كانش ناقصه حاجه يا ابن محمود بس العيشه كانت صعبه و أية كانت صغيره و محتاجه اب لكن دلوقت الحمد لله عندها زوج يصونها و لا ايه يا عمر
عمر / طبعا يا حماتى على بيهزر معاكى على فكره
عمر يبص لعلى يلاقيه مضايق و باصص من الشباك
………………………………
فى محل دهب
مها و على بينقوا و ندى قاعده ترغى مع أية و يلاعبوا حبيبه و سمر واقفه تتفرج على الدهب
على / ايه يا بنتى مش تقولى رايك امال لو ما كنتيش انتى العروسه
ندى تقوم و تبص
ندى / حلو اوى
على / طب بصى يمكن حاجه تانيه تعجبك
ندى / كلهم حلوين يا على اى حاجه بقى
ندى تروح تقعد جنب أية
أية / ما تنقى يا بنتى انتى مكسوفه و لا ايه
ندى / والله بجد مش فارقه معايا خالص
أية / عقبال شبكه بيبو
ندى / امين يارب ياااااه دا هيبقى يوم هههههههههههههههههههههههه
سمر تروح تقعد جنبهم
سمر / ياختى حلوه اختك دى
على يبص على سمر
ندى / بنتى
سمر تشيلها و تبص لعلى
سمر / بسم الله شبهك بالحته دى مش واخده من باباها حاجه خالص شبهك الخالق الناطق
ندى / شكرا
سمر / بس دى صغيره اوى هى كام شهر دى ما تكملش شهرين دى خالص
الكل يسكت و يبصوا لبعض
مها / الا قوليلى يا ست سمر الدبله دى احلى و لا دى احلى
سمر / يا اختى العروسه اللى تقول
أية / انا رايى الكلاسيك احلى ايه رايك يا نونو
ندى / الاتنين حلوين هو لسه كتير
على / لا خلصنا هنوزن و نحاسب
سمر / عينى عليكى يا قلبى ابوكى مات قبل ما تشوفى الدنيا بتفكرنى بيكى يا أية
على / لا كدا كتير معلش يا سمر تعالى معايا
على ياخد حبيبه من سمر و يديها لندى و ياخد سمر من ايدها بره المحل
على / انتى بتحاولى تعملى ايه
سمر / الا قولى يا عيونى هو ابو البت دى كان ناقصه ايه عشان العروسه تبصلك بعديه
على / اقسم بالله لولا انى عامل حساب اننا فى الشارع و الناس
سمر / لا ياخويا خد راحتك اوعى تعمل حساب لحد خلى نسايبك يشوفوا اصلك و ربايتك خليهم يعرفوا انت ايه
على / اتقى شرى
سمر / سيبهالك مخضره اشبع بيها
سمر تمشى و هى بتنفخ و على يدخل جوه يلاقى أية بتبصله و تبص فى الارض و صمت تام فى المكان أية تسيب المكان و تطلع بره و عمر يطلع وراها أية تبصله و عنيها كلها دموع
عمر / عشان كدا ما كنتش عاوزها تيجى انتى عرفاها ما كنتش هتسكت
أية تعيط
عمر / بتعيطى ليه بس
أية / ممكن امشى عاوزه اروح
عمر / طب بطلى عياط و اهدى
على يطلع من المحل أية تبص الناحيه التانيه
على / حقك عليا بس كنتى عوزانى اعمل ايه يعنى مش شايفه
أية / انا عاوزه اروح يا عمر لو سمحت بص خليك انا هركب تاكس
على / أية ارجوكى
أية / انا مش زعلانه منك انا بس زعلانه على نفسى
على / طب تعالى انا اصلا كنت ناوى اعملهالك مفاجاه بس على زوقك اكيد هيبقى احسن تعالى نقيلك خاتم حلو كدا هديه منى ليكى بس خليكى حنينه على اخوكى ماشى
أية / انا مش عاوزه حاجه
ندى تطلع
ندى / ممكن تسيبونا شويه لوحدنا
على و عمر يدخلوا جوه
ندى / بصى انا فاهمه انتى زعلانه عشان على و ماماتك مش بيتفقوا بس دا مش معناه ان انا و انتى مش هنتفق دى خطوبتى و انتى قولتى اننا اخوات و اصحاب و اديكى شايفه انا حتى اهل مليش ما عنديش حد يفرح معايا و لا يفرحلى
أية / بطلى هبل احنا اصلا كفايه اوى
ندى / عارفه تعالى بقى جوه
أية / عشان خاطرك انتى بس
ندى / ربنا يخليكى يا احلى اخت فى الدنيا
ندى تحضن أية و يدخلوا جوه
…………………………..
فى عربيه حسام
//////////////////////////////
حسام / على و مرات ابوه ما بيطيقوش بعض بس البت لا … شكلك مسيطر فى البيت يا عمر …. مبروك عليكى شبكتك يا ندى ….مبروك يا علوه …. بس ما ترجعوش تزعلوا من اللى هعمله بقى
///////////////////////////////////
………………………….
فى المحل عند على
الكل قاعد بيضحكوا
ندى / لا طبعا اكيد حبى للشاورما كان له علاقه باعجابى بعلى
على / شوف ازاى و انا اللى كنت فاكر العكس ههههههههههههههههههههههههههههههه
عمر / يا بنتى اصلا انتى ما تعرفيش الكائن ده كان عامل ازاى عارفه المدمن ادونى الجرعه بسرعه ارجوك محتاجه الجرعه يطلع البلكونه ياخد ضحكه و يدخل واحد تانى خالص
على / حقى و لا مش حقى
صوت كبايه بتتكسر بعيد / مش تفتح يا حيوان
على / عن اذنكوا ثوانى
على يقوم يشوف فى ايه يلاقى حسام قاعد على ترابيزه و قدامه اكل و كبايه الميه واقعه على الارض متكسره و فى واحد واقف بيلمها على يشد كرسى و يقعد
على / كتر خيرك يا مصطفى روح شوف شغلك
حسام / يااااه دا الدنيا صغيره اوى يا جدع
على / انت بتعمل ايه هنا
حسام / جعان قولت اجى اتغدى عندك مانع
على / لا ازاى تحت امرك على العموم خلص اكلك و قوم و ما تشيلش هم الكبايه و لا الحساب انا عازمك
حسام / انت تعزمنى انا ليه المقامات اتشالت و لا ايه
عمر يدخل
حسام / الله دا الحبايب كلهم هنا اهو
عمر / بيعمل ايه هنا ده
حسام / الا انت ايه اخبارك مع بتوع الصحه دول حبايبى
على يوطى و يسند باديه على الكرسى
على / اعلى ما فى خيلك اركبه انا كل حاجتى فى السليم
حسام / انا متاكد بس ولاد الحرام ما سابوش لولاد الحلال حاجه يعنى لو لا قدر الله حد كدا و لا كدا اداك بلاغ و دسلك حته بايظه
على / جرب
حسام / و انا مالى انا بس بقولك عشان لو لا قدر الله حصل انا حبايبى كتير و ممكن اساعدك
عمر / على اساس ان الحدايه بتحدف كتاكيت
حسام / على اساس ان العيار اللى ما يصبش يدوش
حسام يقوم من على الترابيزه و يبص يلاقى عمه باصصله
حسام / الله دا الحبايب كلهم هنا اهو
حسام يروح ناحيه الترابيزه على يشاور لواحد من العمال على الاكل يجى يشيله
حسام / ازيك يا عمى اخبارك شوفت الدنيا صغيره ازاى
حسام يبص لندى فى عنيها و هى شايله حبيبه بايدها و بعدين يبص على أية و يمدلها ايده
حسام / حسام زغلول ابن عم ندى و جوزها
مصطفى / طليقها
حسام يشد الكرسى اللى جنب أية و يقعد
حسام / يرضيكى كدا
عمر يشد حسام من هدومه و يسحله فى الارض
على / انا اسف يا جماعه كملوا اكلكوا زبون سكران و خلصنا منه
على يحصل عمر بره المحل حسام يقوم يقف و هو بيضحك
عمر / لو عتبت هنا تانى هكسر رجلك
حسام / ليك حق تغير البت مزه ما تجيب رقمها
عمر يضرب حسام و العمال يحوشوا بينهم و على يبعد عمر
على / ابعد عننا بدل اقسم بالله لجيب القديم و الجديد
حسام / اخوك اضايق عشان عاكست مراته بس انا حبيت اشوف الرد فعل الطبيعى لو حد قرب من مراتك تعمل فيه ايه عشان ما ابقاش اوفر او بظلمك
واحد من العمال يجيب كيسه فيها اكل و يديها لعلى يديها لحسام
على / خد و امشى
حسام يسيب الكيس يقع
حسام / انا مش زى ندى … ما برمرمش
حسام يمشى و على يتنهد و ينفخ و يدخل جوه هو و عمر يقابلهم واحد من العمال
على / نزل لكل الزباين حاجه حلوه اعتزار عن اللى حصل
العامل يهز راسه و يمشى على يروح ترابيزته يلاقيهم بيلمواحاجتهم و قايمين
على / على فين لسه بدرى
مصطفى / معلش كفايا كدا النهرده
على يبص لندى يلاقيها مضايقه و مش بتبصله
على / طب اسمحولى اوصلكوا
مصطفى / ما تتعبش نفسك احنا هناخد تاكس عن اذنك
مصطفى ياخد مها و ندى و يمشوا و على واقف زعلان
أية / ندى قالت انه عمره ما هيسيبها فى حالها
على يبصلها
أية / يلا نروح يا عمر
عمر / هروحها و ارجعلك
على / ما لوش لزوم روحها و ارتاح انا عاوز اقعد لوحدى شويه
عمر / لو حصل حاجه كلمنى
على يهز راسه و يقعد على الكرسى و عمر و أية يمشوا
……………………………….
فى شقه حسام
اروى / ايه اللى عمل فيك كدا
حسام / مش حاجه يا بنتى
اروى / مش حاجه ازاى دانت قميصك و هدومك ووشك
حسام / اتخانقت ارتاحتى
اروى / ليه ايه اللى حصل
حسام / يوووووه واحد غبى زنق عليا لسه بقوله حاسب يا عم نزل هو و صحابه و اتخانقوا معايا
اروى / و انت ازاى تسكتلهم ما اخدتش رقم العربيه نعمل محضر ليه
حسام / ههههههههههههههههههههههههههه لتكونى فكرانى انضربت يا بت يخربيت شيطانك ههههههههههههه دا انتى ما شوفتيش شكلهم دا لولا انهم كانوا كتير ما كانوش عرفوا يلمسونى اصلا بصى تعالى ندخل جوه و انا هحكيلك الخناقه بالتفصيل دى كانت معجنه تعالى تعالى
حسام يحط ايده حوالين رقبه اروى و ياخدها اوضه النوم
……………………………….
فى شقه مها
ندى تدخل اوضتها و تفضل تعيط مصطفى يروح يخبط
مصطفى / ندى افتحى يا بنتى عاوز اتكلم معاكى
ندى تفتح الباب ووشها كلو دموع
مصطفى / اوعى تخلى اللى حصل النهرده ياثر فيكى يا بنتى اوعى تخافى
ندى / مش هيسيبنى فى حالى عمره ما هيسيبنى
مصطفى / اعلى ما فى خيله يركبه لو كان يقدر يعمل حاجه
ندى / انت ما شوفتوش لسه بيقول عنى مراته لسه فاكر انه جوزى هو فى ايه هو انا مش هفوق من الكابوس ده بقى
مصطفى / انا هكلم عمك و
ندى / عمى مش بيعرف يرد على مراته تفتكر هيعرف ياخد حق مع ابنه يا بابا ارحمنى بقى انا تعبت
تليفون ندى يرن ندى تمسك التليفون و تحدفه على اخر دراعها يكسر المرايه و يقع فى الارض تقعد تعيط
……………………………..
فى العربيه
أية / مش بترد
عمر / قلتلك ما تتصليش دلوقت
أية / صعبانه عليا اوى
عمر / ربنا يعينهم هما الاتنين الموضوع مش هيكون سهل و ربنا يستر فى اللى جاى
أية / هما بيحبوا بعض يا عمر مفيش حاجه تقدر تقف بينهم
عمر يبصلها
أية / انا متاكده انهم هيبقوا لبعض حتى لو الموضوع عرقب شويه فى النص بس اكيد فى يوم من الايام
عمر / اكبرى شويه تعرفى الدنيا مش فيلم عربى بينتهى بجواز البطل و البطله
أية / ما انا و انت اتجوزنا
عمر / و الحياه بقى لونها بمبى يعنى
أية / قصدك ايه
عمر / ان حتى بعد الجواز فى مشاكل فى قرف فى خناق فى تدخلات مفيش راحه
أية / انت بترمى كلام على ماما يعنى
عمر / لا طبعا و اه هى برده جزء من مشاكلنا بس اكيد مش المشكله كلها اللى اقصده
أية / انا كنت عارفه من الاول
عمر / كنتى عارفه ايه
أية / انك هتلف تلف و تجيب ماما فى الموضوع
عمر / ما حصلش
أية / و لا يحصل ما دى الحقيقه فعلا اصلا انا كان شكلى وحش اوى قدام ندى الله اعلم اصلا على قايلها ايه عنها و اكيد بعد اللى شافته
عمر / ندى بتحبك لنفسك
أية / و انا والله مرتحالها و بحبها اوى بس مش عاوزه احس انى قليله
عمر / هههههههههههههههههه يا بنتى ندى عندها اب و ام اللعن من امك بمراحل كل اللى هى فيه ده بسببهم اصلا
أية / ما اعرفش بقى
عمر / انسى و فكيها و سيبى كل حاجه على ربنا
أية تهز راسها
………………………………
فى شقه ندى
مها تدخل تجيب الموبايل من الارض و تركبه تانى و تايده
مها / ما تعمليش فى نفسك كدا على الاقل عشان خاطر حبيبه
ندى / هو حسام بيراقبنى عرف اننا هناك منين
مصطفى / ما يمكن قابلنا صدفه فعلا او يمكن حد شافنا بلغه
ندى / مستحيل يكون فى كلمه صدفه فى قاموس حسام انا متاكده انه بيخطط لحاجه انا متاكده انه لا هيسكت و لا هيسيبنى فى حالى
مصطفى / و احنا روحنا فين
ندى / كلكوا بتقولوا انكوا هتحمونى بس ما شوفتش حد فيكوا فتح بقه قدام حسام النهرده
مصطفى / كنتى عوزانا نعمل ايه بس
ندى / ما اعرفش ما اعرفش
مصطفى / اوعدك ان اللى حصل النهرده مش هيتكرر تانى ابدا
ندى / ما توعدش بحاجه انت مش قدها
جرس الباب يضرب
مها / انا هروح افتح
مها تفتح تلاقى على شايل كيس فيه اكل
على / ندى عامله ايه
مها / اتفضل …. على يا ندى
……………………………………
فى شقه عمر
سمر ماسكه خاتم فى ايدها
سمر / ضحك عليكى بده
أية / هو من امتى الواحد بيجيب لمرات اخوه دهب فى وسط شبكته انتى بتتعاملى كدا ليه
سمر / قلبوكى عليا يا بنت بطنى و طبعا جايه تعاتبينى و تقوليلى انى غلطت فى حقك قلبوكى عليا بحته خاتم
أية / انا مش ماديه و مش صغيره و اقدر احكم على الناس و تصرفاتها بعقلى
سمر / و عقلك يا ختى قالك عنى ايه
أية / قالى انك امى بمزاجى غصب عنى امى حلوه وحشه امى
سمر / طب والله كويس
أية / انا داخله انام عشان تعبانه هتعوزى حاجه
سمر / كتر خيرك
أية / تصبحى على خير
سمر تشاور بايدها روحى و أية تدخل اوضتها
……………………………………
فى اوضه حسام
حسام نايم على السرير و اروى فى حضنه
////////////////////////////////
حسام / خطوبه بالسرعه دى … ايه خلاها واثقه اوى كدا انى مش هرفع قضيه ضم مثلا … معقول تكون بايعه حبيبه … لا اكيد الزفت ده مطمنهم بحاجه … عمى ما اتهزش .. بابا هينصفه عليا مثلا … اقول لبابا ان ندى بتتخطب ؟؟؟ هيقولى ما انت اتجوزت … بس انا من حقى ان بنتى ما تترباش فى حضن راجل غريب … و هتلاقى يا سى حسام الكل داخل عليك بالشعار ما انت اللى رميتها فى الصحرا …. سمر اتخانقت معاهم و بنتها ما عبرتهاش دمعتين و كملت يومها مع جوزها عادى …. بس ممكن تستفيد ازاى من سمر دى يا حسام … بس ياترى مستعده اصلا تعمل ايه و المقابل هيكون ايه سكتك منين يا سمر …. خلى سمر للاخر يا حوس عشان لو اتحرقت … لازم قبل ما تستخدمها اتاكد الاول انها مش بتطيق على و مستعده تعمل اى حاجه ضده … لا لا لا سمر ايه مش وقتها خالص الحلوه اولى بمجهودى دلوقت ههههههههههههههههههه … واحده بواحده و البادى اظلم يا على
////////////////////////////////
…………………………….
فى شقه ندى
على / انا عارف انك مضايقه من اللى حصل بس
ندى / انا قولتلك ان ده هيحصل قولتلك انه مش هيسكت
على / و احنا كمان مش هنسكت دى نسخه من الملف اللى جه من المستشفى
مصطفى / المحاكم سكتها طويله
على / حسام قالى العيار اللى ما يصبش يدوش و هو معاه حق
مها / قصدك ايه
على / عمى ياخد الملف بكره و يروحلهم البيت و يقول انه كان ساكت يعنى عشان حسام ساكت و انه قال عيله و نلم الليله و ندى هتتجوز
مها / ايوه بس
على / هنخبى ليه ما خلاص حسام عرف كل حاجه
مصطفى / مش معنى اننا بنتغدى سوا
على / احنا ما بنعملش حاجه غلط نتخبى منها يا عمى و ان ما كانش النهرده يبقى بكره
مصطفى / ايوه بس افرض عند وردها
على / دا على اساس ان ردها ده ممكن يكون بغير رضاها اسمع بس فكرتى لو حضرتك نفذتها صح ان ما خافش هو و اتلم اهله هيلموه مراته دى اللى اسمها اروى
مها / لا اروى لا انا هروح لتهانى
مصطفى / لا يا مها لا
مها / هى هتعرف تتصرف و تلمه
على / من مصلحتها ان ندى تتجوز اصلا عشان تبعد عن سكه جوز بنتها
مها / والله يا ابنى معاك حق
على / و ابوه و امه بقى اكيد هيخافوا على ابنهم من الحبس يا عمى و خصوصا انه فى الحاله دى مش هيشوفوا حبيبه تانى
مصطفى / فهمتك
على / حسام بيتعامل معانا على انه فى نقطه قوه و احنا فى موقف ضعف عشان كدا محتاج رد قوى و سريع عشان يعرف مقامه و حجمه و يفكر الف مره قبل ما يتعرضلنا
مصطفى / بكره الصبح هروح لابوه
مها / و انا بكره هروح لتهانى
ندى / لا ما ينفعش
الكل يبصلها
ندى / ما ينفعش تسيبونى لوحدى فى البيت
على / طب ايه رايك تروحى بكره الصبح عند أية
ندى تبصله
على / عمر هيبقى فى الشغل و هتاخدوا راحتكوا بنات بس و حسام هيعرف العنوان هناك منين اصلا
مها / امها يا على
على / امها فى بيت ابويا الله يرحمه مالها بس و مال ندى
مصطفى / انا شايف ان ده حل كويس ايه رايك يا ندى
ندى / على الله بس يجي بفايده
على / فكيها بقى قولتلك ما تخافيش
ندى تهز راسها و هى قلقانه
………………………………..
تانى يوم فى شقه تهانى
جرس الباب يرن تهانى تروح تفتح تلاقى مها
تهانى / نعم
مها / ايه مش هتخلينى ادخل
تهانى / لا ازاى اتفضلى
مها تدخل و تقعد و تهانى تدخل و تقعد
تهانى / والله كان نفسى اضايفك بس اعمل ايه السكر خلصان
مها / ما لوش لزوم انا جايه فى كلمتين و رد غطاهم
تهانى / اتفضلى ياريت ما يكونوش بخصوص حسام
مها / لا الحقيقه بخصوص حسام فعلا
تهانى / هو فى ايه هو مش خلاص كل واحد راح لحاله
مها / تهانى افهمى ندى اتخطبت
تهانى / بالسرعه دى دا على كدا الكلام اللى كان بيتقال حقيقى
مها / الحقيقه انها كانت بتحب زميل ليها فى الكليه فى نفس الوقت اللى حسام اتقدم فيه و زميلها اتقدم فعلا و وافق على كل شروطنا بس باباها بقى قرر ان حسام انسب و جوزها لحسام غصب و لما اطلقت زميلها اتقدم تانى
تهانى / الا زميلها ده اللى كانت بتبعتله الجوابات و تكلمه على الموبايل
مها / انا بنتى اشرف من الشرف يا تهانى و لو عاوزه مصلحه بنتك يبقى تسيبك من الغرور اللى انتى فيه ده و اسمعينى حسام لازم يبعد عن سكه ندى
تهانى / انتوا هترموا بلاكوا علينا و هو حسام طايق ندى اصلا
مها / فوقى لنفسك و لبنتك يا تهانى حسام عمل مشكله كبيره اوى امبارح لما شاف ندى و خطيبها و اتخانق مع خطيبها و ضربوا بعض
تهانى / حسام ما يعملش كدا ابدا
مها / انا قولتلك و عملت اللى عليا حسام لازم يبعد عن ندى و ينساها لو الموضوع وصل للمحاكم على حبيبه حسام هيخش السجن دى صوره من التقرير و المحضر بتوع ندى هناك لو الموضوع كبر احنا مش مسؤلين حسام لازم ينسى ندى و حبيبه و يشيلهم من دماغه خالص و ربنا يبارك فى اروى بقى تجيبله حته عيل يفرح بيه
تهانى / عن قريب يا حبيبتى
مها / انا قولت اللى عندى عن اذنك
تهانى / نورتى
مها تنزل و تهانى تقعد تفكر فى كلامها و تمسك التليفون و تتصل بحد
……………………………
فى شقه عمر
جرس الباب يرن أية تروح تفتح تلاقى ندى شايله حبيبه وراها على
أية / اهلا اتفضلوا اتفضلوا
على / انا عارف ان عمر مش موجود بس ندى عاوزه تقعد معاكى شويه بدل ما تقعد لوحدها
أية / طب والله جدعه
سمر تطلع من جوه لابسه
سمر / مين …. اهلا
أية / ندى جايه تقعد معايا شويه يا ماما مصلحه عشان ما ابقاش لوحدى
سمر / ايوه بس انتى كنتى نازله معايا المحل
على / انا ممكن اوصلك يا سمر
سمر / ما تيجى معانا يا ندى
ندى تبص لعلى
أية/ بقولك ايه يا ندى ادخلى حطى حبيبه على السرير و انا جايه وراكى
ندى تبص لعلى
على / ايه يا سمر انا نازل تيجى اوصلك و لا ايه
سمر / مش لازم افتح المحل النهرده الناس مش واقفه طوابير يعنى امشى انت
على يبص على ندى
أية / ما هو يا تدخل يا تمشى ما تخليش البت واقفه متمسمره كدا
على / خدى بالك منها ماشى
أية / بتوصينى على اختى
على / مش هتاخر
على يقفل الباب و يمشى
أية / ها تحبى تقعدى فين
ندى تبص لسمر
سمر / انا هدخل اغير هدومى خدى راحتك يا ندى يا حبيبتى فى الاول و الاخر دى شقه على برده و احنا كلنا ضيوف عنده
سمر تمشى
أية / على فكره هى مش بترمى كلام دى حقيقه دى شقه على فعلا و احنا عايشين فيها
ندى / هو انا ممكن احط حبيبه على السرير جوه
أية / يا بنتى ما تستازنيش خشى و برطعى و عيشى
ندى / شكرا
أية و ندى يدخلوا جوه
………………………….
فى شقه حسام
اروى / انتى بتقولى ايه يا ماما
تهانى / جوزك جه امبارح متخانق ؟
اروى / ايوه ناس زنقوا عليه بالعربيه و نزل اتخانق معاهم
تهانى / ده اللى قالهولك و لا كنتى معاه
اروى / معاه فين بس هو بياخدنى فى حته
تهانى / مصيبه لتكون مها بتتكلم صح
اروى / ليه يا ماما فى ايه
تهانى / انا عوزاكى تنزلى عند عمك لحد ما اجيلك و تطرطقى ودانك عاوزه اعرف كل كلمه بتتقال فى ام البيت ده اما نشوف اخرتها فى الجوازه دى
اروى / لا ما تسيبينيش كدا ما انا لازم افهم
تهانى / لو مرات عمك بتقول الحقيقه حسام لسه بيفكر فى ندى و بيحاول يرجعلها
اروى / يا ماما بتقولى ايه حسام قدامى عاملها عادى جدا و هى اللى كانت هتطق منى و ما شوفتيش اصلا وشها نور ازاى لما دخلنا و شافته دى مريضه يا ماما بجد حالتها صعبه
تهانى / عارفه لو طلع اللى بتقوليه صح ندر عليا ادبح حاجه لله بس خوفى يكونوا بينيموكى يا بنت بطنى و يحنلها
اروى / مستحيل
تهانى / طب هو فين دلوقت
اروى / نزل من بدرى راح يخلص ورق
تهانى / تمام تمام هلبس و جيالك
اروى / تنورى
…………………………………………
فى شقه أية
أية و ندى قاعدين على سرير أية فى اوضتها و قافلين الباب و حبيبه نايمه جنبهم
ندى / انا بجد اسفه اوى على اللى حصل امبارح
أية / يا بنتى عادى بتحصل و بعدين بعد اللى ماما عملته عادى هو يوم مضروب بالنار اصلا بس اقولك سر
ندى / قولى
أية / للحظه كدا للحظه صغيره اوى كنت فرحانه
ندى / يا شيخه
أية / انا بحب عمر لما بيغير عليا اوى بتاكد انه بيحبنى
ندى / لا اطمنى و حطى فى بطنك بطيخه صيفى بيحبك و بيموووووت فيكى كمان
أية / و على كمان بيحبك
ندى / انتى عارفه انا هنا ليه يا أية
أية / اه زهقتى من القاعده فى البيت فقولتى تغيرى جو و يازين ما اخترتى بصراحه احسن مكان تغيرى فيه جو
ندى / انا مليش مكان اروحه خفت اقعد فى البيت لوحدى حسام يطب عليا انا بجد عايشه فى كابوس
أية / طب ما تعمليلو محضر فى القسم
ندى / قسم ايه بس احنا مش بتوع الحاجات دى اصلا دا غير انى بصراحه بحاول على قد ما اقدر اتجنبه عشان ما يحاربنيش على حبيبه
أية / الله يعينك بصراحه فعلا موقف صعب
ندى / المشكله ان على مش قادر يشوف المشكله دى مش قادر يفهم انى بين نارين
أية / ما هو معزور برده بيحبك
ندى / تعرفى انى ما نمتش طول الليل امبارح
ندى تتاوب
أية / و قاعده ترغى اللحقيلك غفوه كدا قبل بيبو ما تصحى يلا نامى لو عوزتى حاجه ناديلى
أية تفتح الباب تلاقى سمر بتجرى فى الطرقه تتنهد و بعدين تبص لندى و تبتسم و تقفل الباب و هى خارجه
………………………………..
فى شقه امانى
مصطفى / ادى نسخه من الورق اللى ممكن بكره الصبح اديه للمحامى يحطه فى ملف القضيه
محمد / و ايه اللى فتح موضوع القضيه تانى بس
مصطفى / ما انت لازم تلم ابنك يا محمد
امانى / يا دى حسام اللى مش نازلكوا من زور
مصطفى / من الاخر كدا حسام مش عاوز يسيب ندى فى حالها بصراحه كدا و من الاخر ندى اتخطبت امبارح
امانى / دا انتوا ما بتضيعوش وقت بقى
مصطفى / ضيعت من عمرها كتير مع حسام و الورق ده بيثبت انه ما صانش الامانه و رماها
محمد / انا مش فاهم اى حاجه
مصطفى / حسام امبارح اتخانق مع خطيب ندى و ضربوا بعض احنا لحد دلوقت بنحاول نلم الليله بس مش ضعف مننا يا محمد و لازم تفهم ابنك الكلام ده احنا سكوتنا عشان الدم اللى بينا مش خوف منه
امانى / بس حسام له حق برده يا مصطفى
مصطفى / ليه حق ؟؟
امانى / اكيد الخناقه كانت عشان حبيبه ما هو مفيش راجل يستحمل يشوف بنته بتتربى فى حضن راجل تانى
مصطفى / خطيب ندى شاب كويس و مكافح و كان متقدملها مع حسام بس للاسف رفضته و فضل مستنيها و راضى بيها بظروفها اللى هى فيها اللى لازم تفتكرى ان ابنك كان السبب فيها
امانى / دا قضاء و قدر
مصطفى / الحمد لله انها جت على قد كدا
امانى / ما تقول حاجه يا محمد
محمد / انا والله مصدوم من المفاجاه الاتنين ليهم حق اصل العيال دول شركه بين اتنين بالنص ما ينفعش واحد يجى على التانى
امانى / ايوه يعنى له الحق فى حبيبه زى ندى بالظبط
مصطفى / خلينى افكرك يا امانى يوم ما محمد دخل المستشفى قولتى لندى ان حبيبه بنت حرام و زعقتى لنور عشان شالتها و قولتلها ترميها فى الارض حصل و لا لا
امانى / يوميها اخوك كان فى العمليات و فضيحه الفرح و الجو كلو ما كانش مظبوط
مصطفى / بلاها لما حسام رجع مصر وراح خطب ما سالش عن ضناه اللى هو محموق عليها دلوقت حد فيكوا سال دا الواد الغلبان عمل المستحيل عشان يجيب تاشيرات السفر عشان ندور على واحده متجوزه و حامل ما تقربلوش اصلا و جايين تقولوا حسام اولى بحبيبه و حقه
محمد / يا مصطفى ما لوش لازمه الكلام ده احنا مش عاوزين نفتح فى القديم
مصطفى / القديم لازم يتراجع مره و اتنين و تلاته عشان نعرف نعيش النهرده و نجهز لبكره
محمد / لو عليا انا الف مبروك لندى لكن حبيبه حفيدتى و انا مش هقدر اشوفها بتقول بابا لحد غير ابنى
مصطفى / من الاخر كدا انا جيت اقولكوا اننا ملتزمين باتفاقنا على يوم الجمعه و الفلوس اللى انت سبتها المره اللى فاتت اهى مش ناقصه جنيه ندى مش عوزاها و ندى هتتجوز لما العده تخلص اى مشاكل هتحصل انا مش مسؤل هطلع على المحامى و اعمل بلاغ فى ابنك
محمد / بس ده مش عدل يا مصطفى
مصطفى / هو مش اتجوز بنت عمته عاوز ايه من بنتى هاه عاوز ايه
امانى / ما قولنا مليون مره ما لوش اى مصلحه مع ندى الفكره كلها فى حبيبه حبيبه و بس
مصطفى / يا ستى اروى ربنا يديها و يبارك تجيب بدل العيل عشره لكن ندى ما عادش حيلتها غير حبيبه لا ينفع تجيب غيرها و لا تقدر تعيش من غيرها
امانى / ربنا يخليلها عريسها بقى
مصطفى / مفيش فايده من الكلام معاكوا
محمد / اقعد بس يا مصطفى و اللى انت عاوزه هيكون بص انا معاك ندى لسه صغيره و من حقها تتجوز
امانى / بتقول ايه يا محمد
محمد / بس احنا مش هينفع نروح بيت عريسها نشوف بنتنا مفيش اى حاجه لو جت خميس و جمعه باتت معانا و روحت الجمعه بالليل
امانى / بيتهيالى ما لكوش حجه
مصطفى / لو هتضمنلى ان مفيش اى غدر من ناحيه حسام
امانى / انا ابنى مش غدار
محمد / اضمنلك
مصطفى / نقرا الفاتحه
مصطفى و محمد يقروا الفاتحه جرس الباب يضرب امانى تقوم تفتح تلاقى اروى اروى تدخل تلاقى عمامها بيقروا الفاتحه
اروى / بتقروا الفاتحه على ايه ؟؟؟؟
امانى / تعالى يا اروى
اروى تروح تقعد
مصطفى / ازيك يا اروى
اروى / الحمد لله يا خالو خير
مصطفى / كل خير ان شاء الله … خلاص يا محمد اتفقنا
محمد / اتفقنا يا مصطفى
مصطفى / طب انا هقوم بقى عشان ورايا حاجات كتير اوى عن اذنكوا
محمد / ما تخليك قاعد يا ابنى اتغدى معانا
مصطفى / معلش مره تانيه بالاذن
مصطفى يقوم و يمشى
اروى / فى ايه يا خالو خير
محمد / مصطفى وافق ان حبيبه تيجى عندنا خميس و جمعه
اروى / بالبساطه دى و لا فى مقابل
امانى / المقابل يا ستى ان ندى تتجوز و تحتفظ بالحضانه
اروى / طب ما دا خبر كويس … اقصد يعنى ان المشكله اتحلت حسام يكمل فى حياته و ندى تكمل فى حياتها و حبيبه تتربى بين باباها و ماماتها برده و نرجع عيله تانى زى زمان
امانى / ياريت الحكايه تخلص على كدا
…………………………
فى شقه عمر
عمر يفتح الباب و يدخل يلاقى أية و سمر قاعدين
عمر / متجمعين عند النبى
أية / امين جيت بدرى يعنى
عمر / الجمله دى ما بحبهاش معناها ان الغدى ما خلصش و انا واقع
سمر / هههههههههههههههه لا خلص على ما تغير هدومك هكون غرفتلك
أية / ندى نايمه جوه هجيبلك البجامه
سمر / و هتفضلوا كدا لحد امتى
عمر / على مش هيعمل كدا ماشى
سمر / طبعا طبعا
عمر / بصى انا جبت اخرى مش كل حاجه تعملى منها حوار ايه كميه النكد دى انا عرفت ليه ابويا مات بدرى هو فى كدا
سمر / قصدك ايه يا ابن حنان
عمر / قصدى ان كفايا اوى لحد كدا انتى ما بتزهقيش عاوزه توصلى لايه من كل ده فى دماغك ايه هترتاحى لما تخربى على بنتك مثلا هترتاحى لما تفرقى العيله دى ما عادش باقى غيرنا احنا التلاته ايه تعباكى اوى لمتنا فى ايه عاوز افهم
أية / عمر
عمر / بلا عمر بلا زفت كل يوم تنامى معيطه بسببها و انا ساكت و مستحمل انا …..
عمر يشوف ندى شايله حبيبه وواقفه بعيد بتبص عليهم يسكت
ندى / انا ماشيه عن اذنكوا
………………..

google-playkhamsatmostaqltradent