Ads by Google X

رواية سجينة مع وقف التنفيذ الفصل التاسع عشر 19 - بقلم اميرة اسامة

الصفحة الرئيسية

 رواية سجينة مع وقف التنفيذ كاملة بقلم اميرة اسامة عبر مدونة دليل الروايات 


 رواية سجينة مع وقف التنفيذ الفصل التاسع عشر 19

حصل أحداث كتير في خلال الشهر ده يمكن تكون الاحداث اللي حصلت كانت تقيله و صعبه علي قلوب الجميع.
عاليا حالتها النفسيه كانت تحت الصفر وزنها قل خالص مش بتاكل غير بسيط ديماً حابسه نفسها في الاوضه بين دموع وحزن وصلاه ودعاء مبينقطعش ملهاش نفس لأي حاجه في الدنيا واللي زود حالتها دي هو رفض ناصر لزيارتها مكانش حابب تشوفه في حالته اللي كانت أسوأ منها بكتير..
لكن في وسط الأحداث الصعبه دي كان في أحداث أفضل اولهم.
استردت ريم جزء كبير من صحتها وبقت احسن كتير جرح راسها إلتئم خالص وبدأ شعرها يطلع فكت أيدها و الاشاعه طمنتهم انها بقت أفضل حتي نفسيتها أتحسنت شويه خصوصا بعد القبض علي عز
وفي خلال الفتره دي هي وعاليا قرروا انهم يرجعوا بيتهم حاول سيف يلاقي سبب يقنعهم بيه انهم يقعدوا لكن مكانش لاقي أي حاجه يقولها ومكانش عليه غير انه يوافق لكن مكانش بيسيبهم وتقريباً يومياً عندهم يشوف طلباتهم و يطمنهم علي اخر اخبار ناصر و القضيه.
رجعت ريم وعاليا بيتهم في البدايه الموضوع كان صعب عليهم خصوصا ريم حست ان البيت مبقاش زي الاول ناقصه حجات كتير اوي ناقصه راحه وامان ودفئ ناقصه اهم حاجه هدي وضحي. الجيران رحبوا بيها في وسطهم من تاني الكل كان مبسوط برجوها وسطهم وانها بقت أفضل وأول حاجه عملتها ريم وعاليا هو زياره قبر هدي وضحي بكوا كتير واتوجعوا لكن طمنوهم ان حقهم رجع.
…………
إتعلق سيف بريم اكتر وبدأ يحس انه عايز يفضل معاها قربوا جدا الفتره دي من بعض لكن مكانش في مجال ولا للشعور بالحب من ناحيه ريم ولا مجال للكلام من ناحيه سيف خصوصاً الظرف اللي كلهم فيه.
عمر كمان كان ديماً موجود في القاهره تقريبا كان بينزل يومين في الاسبوع بس عشان يشوف ريم بأي حجه.
رغم ان سيف كان بيحترمه جداً لكن كان بيضايق اوي لما يعرف انه كلم ريم او زارهم بس مكانش قادر يتكلم.
عمر كان مقرر انه يفاتح ريم في موضوع الارتباط بيه بعد ما القضيه تخلص خالص ويكون الوقت يسمح في نفس الوقت اللي حست بيه رغده انها أعجبت بعمر كانت بتشوفه كتير عند ريم وعاليا ولأول مره تحس بشعور الإعجاب ده جواها لأي شخص خصوصا انها من الشخصيات اللي ملهاش في الارتباط والحب كل حياتها ضحك و هزار وشغل و عيلتها وبس والغريب ان رغم شعورها ده إلا انها كانت شايفه في عيون عمر حبه لريم.
في منزل عاليا وريم الباب خبط
راحت ريم تفتح واول ما شافت سيف ابتسمت.
ريم….سيف ايه المفجأه الحلوه دي تعالي أتفضل.
سيف….عامله ايه ياريم.
ريم…الحمد لله انا بخير انت عامل ايه.
سيف….اهو عايش.
ريم….مالك يا سيف انت كويس؟
قعد سيف عالكنبه وهو بيتنهد
سيف…بحزن مش كويس يا ريم انا تعبان اوي.
ريم…فيك ايه ؟
سيف….والله ما بقيت عارف ايه اكتر حاجه وجعاني الضيقه اللي ناصر فيها ولا ستي اللي حالتها ساءت بعد اللي حصل لناصر مش عارف اروح اطمن عليها و اسيب ناصر هنا مش عارف أفرح ان عز اتقبض عليه وخلاص هيتحاكم وعلي حقه هيرجع ولا احزن ان كده الحكايه خلصت ومش هشوف علي تاني ولا البيت اللي بقي يخنق ويجيب أكتئاب من يوم ما ناصر راح يرجع حق علي ومرجعش البيت فقدت نص روحه وانتي وعاليا كنتوا مهونين عليا كتير من بعد ما مشيتوا بقيت حاسس بالوحده ومش قادر اقعد في البيت طول ما انا قاعد لوحدي حاسس اني شايف ناصر قاعد وشايف عاليا في المطبخ وشايفك قاعده معانا الوقت البيت فضي ياريم حاسس ان في حاجه طابقه علي صدري مخلياني مش عارف اقعد فيه ومش عارف اروح فين كل ما احس اني مخنوق بلاقي نفسي باجي اشوفكم.
ريم…بأبتسامه هون علي نفسك ياسيف احنا قطعنا مشوار طويل اوي والحمد لله تقريباً وصلنا لنهايته. هانت يا سيف خلاص.
سيف…خايف ياريم خايف اوي ناصر يتحكم عليه.
ريم….ليه كده بس هيخرج ياسيف انا حاسه بكده والله يمكن احنا ارتاحنا شويه بالقبض علي عز لكن كمان احنا لسه مخرجناش من الفتره الصعبه دي بس هتعدي ياسيف لازم تحمد ربنا علي اللي حصل لحد كده اهم حاجه حق مستر علي وضحي و خالتوا بيرجع الباقي سهل
سيف…يارب ياريم يارب البيت وحش اوي من غيركم.
ريم….ياراجل متقولش كده ده احنا ريحناك😂
ابتسم سيف بحزن بالعكس والله يمكن اللي مخليني في الحاله دي هو انكم مشيتوا وتعبتوني مريحتونيش.
ريم…كان لازم نمشي ياسيف خلاص وجودنا مبقاش ليه اي لزوم خصوصا بعد ما كل الناس عرفت اني رجعت وعز اتقبض عليه مكانش ينفع نفضل قاعدين معاك لوحدنا اكيد انت فاهم.
سيف….طبعا فاهم ياريم وعارف ان ده الصح كمان بس انا بقولك علي اللي جوايا مش اكتر.
ريم….ياسيدي احنا موجودين جمبك في اي وقت كل ما تكون مضايق تعالي انت عارف يا سيف نفسي في ايه اوي.
سيف….نفسك في ايه ياريم.
ريم…نفسي عز يتحكم عليه بقي والحكايه فعلا تخلص واحس اني رجعت زي الاول نفسي اوي انزل اتمشي نفسي اروح اقف علي النيل نفسي احس اني لسه عايشه ياسيف وبالرغم من اني نفسي اعمل كده اوي لحد الوقت مش قادره اخرج مش قادره حتي ابص من البلكونه لسه جوايا حاجه خايفه تواجهه وتخرج وتشوف الناس هتصدقني يا سيف لو قولتلك اني بجد بقيت اخاف من الناس اوي.
سيف…هصدقك عشان انا بقيت زيك ياريم بقيت خايف الناس بقي جواها يرعب متبقيش عارفه ياتري اللي قدامك ده عنده كام وش يارتي بيتعامل معاكي بأنهي فيهم ياتري شايلك ايه جواه حاسس اني فقدت الثقه في كل الناس عز اللي كان صاحبي انا وعلي وكنا بنقول عليه اخونا عمل اللي لا يمكن حد فينا كان يتخيله يبقي هقدر اثق في حد تاني واقول عليه صاحبي واخويا مستحيل.
ريم….بس احنا لازم ياسيف نحاول نخرج من الحاله دي لانها مرهقه ومتعبه جداً فكره انك تبقي عايش وسط ناس مش قادر تتعامل معاهم وديما متحفز لأي غدر او خيانه بجد احساسها متعب اوي.
سيف….عارف بس اكيد هتاخد وقت اللي عشناه يا ريم مكانش سهل محتاج وقت طويل عشان نخف منه
ريم…بأبتسامه تعرف ان الشغل وحشتي اوي ياسيف.
سيف….علي فكره انا جايلك عشان كده عايزك ترجعي يا ريم شغلك شركه علي خايف تضيع خايف تعبه وشقاه العمر ده كله يروح زي ماهو كمان راح يمكن الموظفين في الشركه شغالين وبيعملوا كل اللي عليهم وانا علي قد ما بقدر مش بسيبهم بس كمان انا مبفهمش في شغلكم ده واكيد مهما الموظفين عملوا لازم الشغل هيتآثر انتي وضحي وعلي و حتي عز كنتوا شايلين الشركه علي وضحي راحوا وعز خلاص مبقاش في غيرك ياريم تلحقي اللي فاضل منها وترجعيها تاني احسن من الاول.
ريم…نفسي بس مش عارفه خايفه ياسيف خايفه الخطوه دي تتعبني اكتر عدم وجود ضحي ومستر علي اكيد هيآثروا عليا حاسه اني نسيت الشغل خايفه مقدرش وفي نفس الوقت محتاجه اعمل كده عشان اخرج شويه من الدايره اللي انا محبوسه فيها بقالي فتره طويله.
سيف….ريم انتي مريتي بحجات انا نفسي كاراجل لو اتحطيت فيها مش هقدر ويمكن كان جرالي حاجه او كنت فكرت اخلص من حياتي بس يظهر كده ان انتي مش مقدره نفسك ومش حاسه بقوتك اللي صعب حد فينا يمتلكها.
ريم…انا قويه.
سيف…جدااا ياريم فوق ما تتخيلي اللي تمر بظروفك وتفضل متمسكه بالحياه لازم تكون قويه انا عارف ان الخطوه لسه تقيله عليكي بس بمجرد ما تخطي برجلك خطوه واحده هترجعي زي الاول واحسن ولو علي الشركه فا انتي هتقدري و انا واثق فيكي فوق ما تتخيلي.
ابتسمت ريم وحست بدفعه ودعم قوي وكلام كانت محتاجه تسمعه.
سيف…..خدي الخطوه ياريم و متقاوميش انا عارف ان مع اول خطوه هترجعي ريم تانيه خالص يمكن افضل كتير من ريم الاولي اللي كنت اعرفها وانا مش هسيبك ياريم هفضل معاكي و هعدي عليكي كل شويه انتي عارفه ان مكتبي قريب من شركه علي اوي يعني علي طول هكون معاكي ولازم تعرفي ان المرادي مش هترجعي مجرد ريم اللي كانت موظفه انتي هتبقي مدير عام الشركه لان بختصار مفيش حد ممكن آئمنه علي شركه علي غيرك.
ريم…بدموع انت عارف ان كلامك ليا ده بيشجعني و بيخليني احس ان في امل ارجع زي الاول.
سيف…انتي مش محتاجه تشجيع ياريم ولا محتاجه حد يرجعلك ثقتك في نفسك عشان انا عارف انك قدها وواثق فيكي وهفضل معاكي.
ابتسمت ريم بسعاده وانا هنزل الشركه يا سيف و هكون قد ثقتك و الشركه هترجع زي الأول و احسن كمان.
سيف…وانا واثق من ده جداً يا احلي باربي ♥️
ابتسمت ريم وسكتت.
سيف…عاليا عامله ايه هي فين صحيح انا كنت عايزها.
ريم…عاليا نفسيتها وحشه جدا يا سيف تقريبا مش بتخرج من الاوضه وعلي طول لا بتعيط لا بتصلي لا نايمه.
سيف….انا عارف اللي فيها يا ريم بس ان شاء الله فتره وهتعدي
ريم…بأبتسامه يارب قولي تشرب ايه ولا تتعشي معانا انت شكلك مكلتش حاجه.
سيف….انا واكل الحمد لله ممكن بس اشرب قهوه وبعدين يعني بتعزمي بقلب كده علي اساس انك بتعرفي تطبخي🤨
ريم…بضحك حوش الشيف اللي قاعد معايا😂
سيف…لا هتتريقي علي مغامراتي في المطبخ هزعلك ده انا وبلا فخر عملت صنيه كنافه رفضت تترمي في الباسكت😂😂
ريم…انت هتقولي انا شوفت بعيني انا كل ما هشوف قدامي صنيه كنافه هفتكرك 😂
سيف….ياسلام واحنا نطول ياباشا ده لو صنيه الكنافه هتخليكي تفتكريني هاجي تحت بيتكم و اعمل ناصبه للكنافه تحت وطول اليوم هرش في كنافه😂
ضحكت ريم ووشها أحمر من الإحراج.
سيف….لا بقولك ايه هتتكسفي ووشك يحمر متحاوليش انا سبق وطلبتك من عاليا بس خلاص غيرت رأيي اصل انا وانتي ملناش في المطبخ مش هنلاقي اللي يطبخلنا🤨
ريم…بضحك عندك حق اللي زيي وزيك لازم يتجوزوا حد بيطبخ انا عن نفسي هتجوز بوراك.
سيف…تتجوزي مين 🤨
ريم…بضحك شيف بوراك التركي عالاقل هضمن اكل حلو و حادق.
سيف…طب قومي يا اختي قومي اعمل القهوه ونادي علي عاليا🤨 قال بوراك قال😒🔪
ضحكت ريم وقامت من قدامه
دخلت بلغت عاليا وراحت عالمطبخ تعمل القهوه.
خرجت عاليا بعد ما غيرت لبسها.
عاليا…بحزن ازيك يا سيف.
سيف….ازيك انتي ياعاليا عامله ايه طمنيني عليكي.
عاليا….زي ما انت شايف.
سيف….انا شايف قدامي حد تعبان ياعاليا.
لمعت الدموع في عينها طمني علي ناصر ياسيف.
سيف….زي الفل متقلقيش عليه.
عاليا….ليه رافض يشوفني يا سيف؟🥺
سيف…بإبتسامه بسيطه بزمتك في حد يقدر يرفض يشوف القمر ده كل الحكايه ان ناصر تعبان ياعاليا نفسيته زي الزفت هو اصلا رافض يشوف اي حد بس انا وخليل باشا بندخله غصب عنه
ريم…ماهو انا عايزه اشوفه عشان عارفه ان نفسيته زي الزفت وهو اللي رافض لما خلاني انا كمان نفسيا بقيت أسوأ منه.
ناصر….اللي ناصر فيه صعب ياعاليا والحبسه مش سهله وكمل بإبتسامه يظهر كده لما ناصر جابك وحبسك في الصعيد دعيتي عليه دعوه كان باب السماء مفتوح واهو ربنا ردهاله.
ابتسمت عاليا من وسط دموعها لا والله ابدا طيب يرجع ويخرج هو بس و يحبسني من تاني وانا مش هتكلم.
سيف….بتحبيه ياعاليا؟
وكان السؤال صدمه ومفجأه متوقعتهاش عاليا سؤال هربت منه كتير اوي حتي من نفسها سابت روحها تدخل جوه قلب ناصر وتوه معاه ويتوه معاها لكن محدش فيهم قالها حتي لو بينهم وبين نفسهم سابوا روحهم تحب وتعشق من غير اي تصريح.
فضلت عاليا بصاله وبسرعه نزلت دمعه تجري علي خدها🥺
عاليا…. معرفش امته وازاي ده حصل بس كل اللي اقدر اقوله ان من يوم ما ناصر خدني من البيت هنا ووداني معاه الصعيد وهو فعلا حبسني بس حبسني جواه يا سيف 🥺 ناصر خد قلبي مني من غير ما احس يمكن سؤالك ده كان مفجأه بالنسبالي لاني عمري ما سألته لنفسي انا لقيت نفسي بتسحب من غير ما احس وكل مره كنت بتوه من نفسي الاقي ناصر بيرجعني من تاني صدقني ياسيف اللي جوايا لناصر اكبر بكتير اوي من كلمه حب لدرجه اني مش لقيالها مسمي يعبر عن اللي قلبي شايلهوله وعمري ما تخيلت اني احس الاحساس ده لناصر بالذات🥺💔
ابتسم سيف بحب….ناصر كمان بيحبك ياعاليا وانتي عارفه كده كويس وهو كمان عارف انك بتحبيه يمكن محدش فيكم قالها للتاني بس كل حاجه بينكم كانت واضحه ليكم وللي بيشوفكم
كل نظره من ناصر ليكي مش بس تقول انه بيحبك او بيعشقك اللي جوه ناصر اكبر بكتير من كده ناصر روحه اتعلقت بروحك يا عاليا وانتي عارفه كده كويس ويمكن عشان كده هو رافض انك تشوفيه في الوضع ده
عاليا…بدموع وانا راضيه اشوفه باي وضع بس اطمن عليه ياسيف.
سيف…هتطمني ياعاليا وكنت جاي اقولك ان بعد بكره معاد اول محاكمه.
عاليا….بخوف بجد طيب وناصر ياسيف.
سيف…متقلقيش ناصر خارج منها ياعاليا المحامي وخليل باشا ومعارفه كلهم مطمنينا بكده اللي ناصر فيه ده وضع مؤقت إجراء قانوني زي ما بيقولوا ولو علي اللي ناصر عمله في عز واللي معاه هيتاخد بعين الاعتبار ياعاليا والحمد لله هما الوقت افضل كتير يعني رجعوا أفضل من الاول وده في صالح ناصر خصوصا في المحاكمه الاولي.
عاليا…يارب يا سيف يارب نفسي اخلص من الكابوس ده بقي
سيف…هنخلص كلنا ياعاليا وناصر هيرجعلنا من تاني.
خرجت ريم في الوقت ده وهي ماسكه القهوه ومبتسمه والله و ماليك عليا حلفان دي تالت مره اعملها و ارميها انها تطلع بوش مش راضيه ابدا😂🙈
ضحكت عاليا وسيف علي ريم.
عاليا…انتي علي طول كسفانا كده حتي القهوه مش بتظبط معاكي.
سيف….انا نفسي اعرف انت ا ازاي اخوات بس😂😂
ريم…والله لو انا قهوتي رفضت تطلع بوش فا انت الكنافه بتاعتك رفضت تترمي🤨
سيف…شايفه شايفه اللي اختك بتقوله يرضيكي ياعاليا المعايره دي
عاليا…بضحك معلش امسحها فيا انا عيله و غلطت.
سيف….ابدا انا راجل صعيدي ومقبلش كده علي كرامتي ابدا لازم حقي يرجع.
عاليا…بضحك خلاص هعملك انا القهوه مرضي كده.
سيف….لا مش مرضي.
عاليا…طيب ايه يرضيك 😂
سيف…جوزيهالي ينوبك فيا ثواب عشان امشيها علي العجين متلخبطهوش.
ابتسمت ريم ووشها احمر.
عاليا…بضحك ياسلام وانا موافقه انا هلاقي عريس زيك مبيعرفش يعمل كنافه😂
سيف…بضحك واضح ان انا أخدتكم عليا اوي انا ماشي🤨
عاليا…بضحك خلاص استني متزعلش علي فين بس.
سيف….هروح و اجرب اعمل كنافه لحد ما تظبط معايا🤨
فضلت ريم وعاليا يضحكوا عليه.
سيف….سلام يابتاعه الشيف بوراك😒 قال شيف بوراك قال من انهارده مفيش غير شيف سيف وبس. وكمل بضحك هعدي عليكم بعد بكره الصبح عشان نروح مع بعض.
عاليا…ماشي يا سيف هستناك.
ريم…هنروح فين؟
سيف…ابقي اسألي بوراك يا اختي 😒😒😒😒 سلام.
عاليا وريم…سلام😂😂😂
مشي سيف وفضلت ريم باصه للباب ومبتسمه.
عاليا….🤨😒 ايه روحتي فين؟
ريم…انا ما انا هنا اهو بضحك علي المجنون ده.،
عاليا….امممم قولتيلي ماشي يا ست ريم🤔 اما نشوف اخرتها مع الشيف سيف .
سابتها عاليا ودخلت اوضتها قعدت ريم وفضلت مبتسمه وساكته♥️
………………….
عدي اليوم بسرعه و تاني يوم عدي بسرعه جدا في خلال اليوم اتصل سيف اطمن عليهم
واتصل كمان عمر بريم بلغها ان هو وياسر وشيماء هيكونوا معاهم بدري في المحكمه.
اما ريم وعاليا كان باين عليهم القلق جدا متوترين و خايفين
خصوصا عاليا اللي كانت قلقانه جدا علي ناصر رغم ان كل اللي حواليها مطمنينها.
فضلت عاليا قاعده في البلكونه لحد بعد الفجر النوم رفض يزور عينها طول الليل مستنيه الصبح يطلع بفارغ الصبر فرخانه انها هتلمح ناصر بعد غياب طويل اوي
وخايفه عليه و بتدعي ربنا يكملها بالستر ويقف معاه.
نفس الحال كان عند ريم حاولت تنام لكن معرفتش خرجت من اوضتها
تشوف عاليا لمحتها قاعده علي الكرسي في البلكونه و راسها مرفوعه للسماء كأنها في حوار خاص ومغلق مع ربنا.
ريم….عاليا حبيبتي ايه اللي مقعدك كده منمتيش ليه؟
عاليا…بإبتسامه تعالي يا حبيبتي انا مش جايلي نوم.
ريم….وانا كمان بحاول انام بس مش عارفه خالص حاسه الوقت بيمر ببطئ.
عاليا…فعلاً النهار مش راضي يطلع خالص.
ريم…عاليا هو ممكن عز مياخدش إعدام عشان كان معاه رجالته بتساعده والحكم يتقسم عليهم
عاليا…لا طبعاً يا ريم مين قالك كده القضيه كلها لابسه عز خصوصا ان في دليل قوي متوثق صوت وصوره وبعدين رجالته كانت بتساعده لكن ولا اشتركوا في قتل ولا إغتصاب اكيد هيتحاكموا لكن هو لازم ياخد اعدام
ريم….خايفه ياعاليا الموضوع يخلص علي كذا سنه وخلاص يعني زي ما بنشوف القضايا اللي من النوع ده بيحصل فيها نقض كتير وممكن لو معاه محامي كبير يخلصهاله في كام سنه
عاليا….مستحيل يا ريم اولا اللي اعرفه ان محدش من اهله مقومله محامي ولا حد واقف معاه اصلا هما مش طايقين يبصوا في وشه
وبعدين القضايا اللي بيحصل فيها نقض كتير بيبقي الدليل اللي متقدم ناقص والمحامي اللي تبع المجرم بيحاول يلاقي اي ثغره يعطل بيها الحكم ويأجله. لكن قضيه عز خلصانه ده إغتصاب وقتل مع سبق الإصرار والحكم في قضيته زي ما قال خليل بيه حكم نهائي.
ريم….يارب يا عاليا نفسي ارتاح بقي.
عاليا…بتنهيده إن شاء الله هنرتاح كلنا يا ريم .
ريم….انا عارفه مستنين ايه كل ده لما هو هياخد إعدام بيعالجوه ليه ادام كده كده ميت.
عاليا…لانه روح يا ريم مهما كان ومينفعش ابدا يتحكم عليه بالإعدام وهو تعبان لازم يعالجوه الاول وبعدين يحاكموه.
ريم…بتنهيده طيب قوليلي بقي انتي مالك ايه اللي مطير النوم من عينك كده وقالقك.
عاليا….خايفه علي ناصر يا ريم خايفه ياخد حكم عشان اللي عمله خايفه يدفع تمن حاجه ملهوش ذنب فيها كفايه اوي اللي هو شافه
ريم….متخافيش يا عاليا سيف وخليل بيه و حتي دكتور عمر بيقولوا انه ممكن يخرج بكفاله مش هياخد اب حكم كفايه الشهر اللي قضاه اكيد هيتحسب كمان ليه
عاليا…يارب يا ريم يارب بقولك ايه تعالي ندخل نرتاح شويه انا مصدعه جدا.
ريم…يلا يا حبيبتي.
عاليا….خدتي العلاج بتاعك.
ريم…اه خدته متقلقيش.
دخلوا اوضتهم مع بعض نامت عاليا عالسرير و خدت ريم في حضنها وفضلت صاحيه بتعدت الدقايق عشان تشوف ناصر
مر الوقت بسرعه
وأخيراً اتجمع الجميع قدام المحكمه.
خليل واسرته عمر واسرته عزام ومرعي و سيف ورجاله ناصر وعاليا وريم
ووالده عز ووالده اللي كانوا واخدين جمب وبيحاولوا يتداروا من الناس و حاسين بكسره كبيره.
بعد السلام دخلوا كلهم علي القاعه
كان القلق مصاحب الجميع وكلهم حوالين عاليا وريم وسيف اللي كانوا في خاله قلق وخوف غير طبيعيه.
خليل….فكوا شويه انا مش فاهم انتوا قلقانين ليه.
سيف…انا قلقان علي ناصر.
خليل…بإبتسامه هيخرج يا سيف انهارده و هيرجع معانا اطمن
سيف…بجد يا خليل باشا
خليل…من امته يا واد وانا بقول اي كلام🤨
سيف….طول عمر كلامك سيف يا باشا.
خليل….يبقي فك كده واطمن.
وفجأه دخل ناصر والمتهمين في القفص.
سيف….ناصر اهو.
بصت عاليا واول ما شافته دق قلبها وغصب عنها دموعها فضلت تنزل عينها عليه مشالتهاش اما هو فا بصلها ثواني كان بالدنيا كلها بالنسباله وبعدها بعد عينه عنها
فاقت عاليا علي صوت كلمه (محكمه)
وقف الجميع ودخل القضاه ووكيل النيابه وقف مكانه.
وبدأت المحاكمه استمرت حوالي ساعه لكن كل دقيقه كانت بتعدي في الساعه كانت بمثابه دهر علي الجميع.
اتكلم وكيل النيابه وبدا يوجهه اتهاماته لعز واتكلم عن جريمته البشعه اللي نفذها من غير اي رحمه او شفقه
ونظراً لعدم وجود محامي مع عز عينت المحكمه محامي يقوم بالدفاع عنه.
وبدأ كل الشهود يقولوا اقوالهم مره تانيه امام القاضي.
ريم….حالتها كانت سيئه جداً من اول ما دخل عز وهي جسمها متلج بتترعش جامد رجلها بتتهز بطريقه هستيريه دموعها مش بتقف وهي سامعه كلام وكيل النيابه عن الجريمه اللي ارتكبها عز.
سيف…بصوت واطي اهدي ياريم متخافيش.
فضلت تفرك في ايدها بخوف وبصت لسيف انا بتخنق يا سيف انا عايزه اخرج من هنا.
سيف…بخوف عليها اهدي طيب انا معاكي وكلنا هنا موجودين معاكي خايفه من ايه اوعي تخافي ابدا ده محبوس قدامك اهو وقرب ايده من كف ايده ومسكها بقوه وحط كفه التاني فوق كفها طبطب عليها متخافيش واوعي اشوفك خايفه كده تاني المفروض هو اللي يخاف ماشي ياريم.
هز ريم راسها و بلعت ريقها بخوف.
خلص وكيل النيابه كلامي وخلص الدفاع عن عز كلامه وخلص الدفاع عن ناصر وجاءت الكلمه الحاسمه للقاضي.
القاضي..بعد الإطلاع علي الاوراق والادله وسماع المرافعه و شهاده الشهود
قررت هيئه المحكمه الحكم
ببراءه ناصر محمد المنشاوي ودفع كفاله قدرها خمسون الف جنيهاً
اتنهد الجميع براحه وفضلت عاليا تعيط وهي ايدها علي قلبها.
رفع ناصر راسه ومكانش هامه الحكم عليه كان عايز بس يسمع الحكم علي عز عشان يرتاح.
القاضي…و الحكم علي كلاً من
محمد السيد عبد الرحيم
و
ممدوح إبراهيم محمد
و
محسن السيد احمد
بالسجن سبع سنوات مع الشغل والنفاذ.
كما قررنا الحكم علي المتهم
عز احمد محمد إبراهيم بإحاله أوراقه الي فضيله المفتي رفعت الجلسه.
صوت عالي وصريخ وبكاء لوالدته ووالده في صمت
و صرخه هزت قاعه المحكمه خرجت من ريم بعد النطق بالحكم
ريم…..يا كاااااااااالب ياقذر حق ضحي وعلي جم يا عزززززز هتموت زي ما موتهم يا كاااااااالب
طلع ناصر راسه لفوق وهو بياخد نفس طويل وكأن روحه رجعتله بعد وقت طويل.
عاليا…بدموع الحمد لله الحمد لله يارب الحمد لله.
جريوا كلهم علي ناصر وراحت والده عز ووالده معاهم.
خليل….مبروك يا بطل
ناصر…الله يبارك فيك يا باشا
خالد….مبروك يا ناصر الحمد لله الحق رجع
ناصر..بتعب وحزن باين علي ملامحه الحمد لله.
فضلوا ملهم يباركوا لناصر ويتكلموا معاه إلا عاليا اللي اكتفت انها تبصله وتسمع صوته وتعاتبه بنظراتها.
اما ناصر كان بيبصلها كل شويه ويبعد عينه عنها تاني.
سيف…..طب ايه هيخرج امته
خليل….لسه شويه بلاش استعجال في قضيه لازم تتقفل وشويه إجراءات قانونيه دفع كفاله والكلام ده يعني ساعتين تلاته ويكون في البيت.
سيف….الحمد لله يخرج بالسلامه يارب.
مرعي…بدموع مبروك يا ولدي حمدالله علي سلامتك يا حبيبي.
ناصر….الله يسلمك يا مرعي.
بص لسيف… سيف طمن ستك زمانها قلقانه.
سيف…هطمنها يا ناصر حاضر وهفضل معاك لحد ما تخرج
ناصر…بص للمحامي شكراً يا متر تعبتك معايا اوي.
المحامي…تعب ايه بس ده واجبي يا استاذ ناصر انا معملتش اي حاجه الف حمدالله علي سلامتك هستناك وهفضل معاك لحد ما استلمك بنفسي.
خليل….طول عمرك قدها يا مدحت.
مدحت….انا تحت امرك يا سياده المستشار ديماً
………
في الجانب الاخر.
همت….مبسوط ياعز فرحان الوقت بإنجزاتك اللي عملتها حصدت نتيجه اعمالك ده كان حكم قاضي الارض مبالك بحكم قاضي السماء
احمد…..دمرت نفسك ودمرتنا معاك حسبي الله ونعم الوكيل فيك
عز…بدموع ولاول مره يطلع صوته سامحيني يا امي والنبي سامحي يا بابا
همت….بدموع وتفتكر لو سامحتك ربنا هيسامحك ولا حتي هيسامحني اني سامحتك وعفيت عنك بحق كسرتي ووجع قلبي بحق تربيتي ليك وتعبي عليك سنين عمري اللي دوست عليهم بأوسخ جزمه عندك عمري ما هسامحك انا مليش ابن ولا يشرفني انك تكون ابني انت زرعه فاسده والحمد لله ربنا قطعها من جدوري عشان لما اروحله اروحله بطولي ويبقي شاهد عليا اني عمري ما قصرت
سابته همت واحمد وراحت وقفت في الجنب التاني بصت لناصر.
همت…بدموع مبروك يا ابني برائتك مبروك رجوع حق اخوك مفيش حاجه اقدر اقولهالك تعوضك عن علي ولا اسف الدنيا بس اتمني انك تقبل اسفي بالنسابه عن تربيتي في ابني اللي يعلم ربنا عمري ما قصرت فيها
وشكراً انك مضيعتش حياتك عشان واحد ميستاهلش
ابتسم ناصر بوجه ومد ايده من الحديد طبطب علي ايدها في صمت.
احمد….مبروك يا ابني رجوع حقك وحق اخوك سامحنا يا ابني سامحنا نزلت دموع احمد ومسك همت ومشيوا قدامهم
الكل كان حزين عليهم لكن مفيش حاجه يعملوها ليهم.
دخل العساكر خدوهم كلهم
واتحرك الجميع من المحكمه.
…………….
عدت الساعات بسرعه والجميع في انتظار ناصر.
واخيراً خرج ناصر مع المحامي ومع خليل.
جري عليه سيف حضنه بكل قوته
طبطب عليه ناصر بحب
وراح عليه الجميع سلم عليه.
دكتور…عمر مبروك يا استاذ ناصر البراءه وحق اخوك.
ياسر…حمد الله علي سلامتك يا راجل
ناصر…الله يسلمكم يارب ويبارك فيكم.
عزام…بحب مبروك يا اخويا
ناصر….جميلك فوق راسي العمر كله يا عزام.
عزام….مفيش بين الاخوات جمايل ياناصر.
ريم….حمدالله علي سلامتك.
ناصر…بإبتسامه الله يسلمك ياريم حمدالله علي سلامتك انتي ومبروك فكيتي ايدك
ريم…بإبتسامه من بين دموعها الحمد لله.
فضلوا كلهم يتكلموا ويضحكوا ومبسوطين ببراءه ناصر وظهور الحق اخيراً
بصلها ناصر وهو شايف عينها في الارض ودموعها بتنزل في صمت.
ناصر….كيفك يا عاليا.
رفعت عاليا راسها وبصتله بعتاب
عاليا….حمدالله علي السلامه.
ناصر….الله يسلمك يارب.
خليل ..انهارده كلكم معزومين عندي بمناسبه خروج ناصر ورجوع حق علي وضحي.
ناصر…بتعب اعذرني اني يا خليل باشا انا طالع الوجت حالا عالصعيد
رفعت عاليا راسها بصدمه
سيف…ايه صعيد ايه انت بتتكلم جد.
خليل….مش وقته يا ناصر عالاقل بكره انت محتاج ترتاح
ناصر…صدجني مش هجدر لازم اروح اشوف ستي أتوحشتها وهي كمان اكيد محتاچه تطمن عليا بكفايه الفتره اللي فاتت عليها جوي.
خليل….ياسيدي كنت عايز احتفل بيك. بس عموما ماشي انهارده الاتنين تسافر وتكون هنا الجمعه عشان كلنا نتجمع وطبعا الكلام موجهه للكل دكتور عمر ودكتور ياسر والمدام وانت ياعزام طبعا واكيد بناتي الحلوين ومش عايز اعذار مفهوم يا ناصر.
ناصر….مفهوم يا باشا.
سيف….خلاص ماشي وهنرجع الجمعه سوا.
ناصر….ان شاء الله.
سلموا كلهم علي بعض و ودعهم ناصر ركب مع مرعي وسافر قدام عيون عاليا اللي كانت نفسها تصرخ فيه بكل طاقتها لكن مقدرتش وفضلت حابسه دموعها لحد ما وصلت البيت خدت هدومها ودخلت تاخد حمامها وبمجرد ما قفلت عليها الباب انهارت من العياط💔🥺
………………

 رواية سجينة مع وقف التنفيذ الفصل التاسع عشر 19 - بقلم اميرة اسامة
nada eid

تعليقات

ليست هناك تعليقات
إرسال تعليق
    google-playkhamsatmostaqltradent