رواية اسرار قدس كاملة بقلم زينب ماجد عبر مدونة دليل الروايات
رواية اسرار قدس الفصل الثامن عشر 18
طلعت اقسل الكراج
هن ضلن يتحاجن بيناتهن
صاحت عليه خاطر اجي اسوي الريوك ما درتلها ولا حجيت وياها ، طلعت لكتني ما رادة عليها وجاي اقسل ، تخوصرت : مفترات عليه .. سهلة اراويجن اني لو انتن
ما دحكت عليها
مشت هي ع الحجية تكللها : ردي قدس وحجيها لكيتها اتخش بالدوانية مدري شعدها وي خطاب حذريها حت لو الشغل عليها لا تخليها تكرب غاد وحدة من عدنا تروح تنطف غرفته على حورها بس عي بس تريد تلج وياه
جانت سراب بالغرفة وهي تفتن يم الحاجة
الحجية رايح بالها بعيد اجتني شايطة : بت الجلب لو كربتي غرفة خطاب الا اكصب رجليج
– ما متكربتلها جاي اقسل
– انجعمي ولا تردين بوجهي من تردين والله احشم ريسان عليج مثل ما حشمته امس وخليته يجلدج هالمرة يحز ركبتج
– انت ليش تلوميني بس اني ما الومين ابنج ، اني جنت بعيدة عنكم وحت ما اعرفكم ابنج الجان يراقبني الصبح واخوج الاجا خطبني
-وانت وافكتي بهذا ورحتي نمتي ويا هذا
كفختني : الج عين يدلنج وتراددين يولي من اسمع حسج الا احشمنهم عليج ، ولا ابالج اخليج والله وسماواته لا ما خليته ينهيج من الكتل لحد ما تموتين لو يموت اللي ابطنج وافتك منكم
قمتني باثنين اديها ومشت
تنهدت : دخيلك ربي صبرني والله تعبت
اديه مزوركة جسمي مزورك رجلي مورمة وبالزور ادوس عليها
خلصت الكراج دخلت لكيت ابو وهب جاي يطلع من الحمام .. دحكت بيه وتعديته صاح : ما تعرفين تكولين اصباح الخير اكوم اجلدج نوبة الاخرى يولي ؟
– صباح الخير
– لا صبحج الله ولا شافج اذلفي لا بارك الله بعمرج
دخلت لقرفتي اتنهد فد رايدة اتحملهم
مدري شمسوية بدنياي والله يمتحني بيهم ما ينحملون .
عزلت قرفتي ونظفتها خلصن ريوك
كعد ابو وهب واميرة تكله : قدس مدري بيش شايخة علينا توسلت بيها بس تساعدني بالريوك عدي جهال وهي فارغة لا دحكت بوجهي ولا جني حاجيتها
حجيت : مو طلعت اقسل الكراج وانت الريوك اليوم عليج
زكح هو : ومن عدها جهال وانت فارغة ما تعرفين تعاونيها
– جنت…. قلطعني
– هششششش انعل ابوج لابو ساسح السكط بت الجلب
كعدت بالزور واني اسمع قلطه وشتيمته
حجت الحجية : قدس كلش شاخت جن مالها رداد اذا ما تجعمها وتضبها باجر عكبة تصير مثل امها لا تنجرع ولا تنكدر .
حجيت : وشويت اني فد طلعت اكضي شقلي بين ما يخلصون الريوك
حجت عواطف : كل وحدة بينا عليها شغلها العدها جهال الما عدها جهال تنظم وكتها شني عندج جهال تحير بشغلج
اميرة : معاونة شوية شني ما تصير تعاوني
– من فارغة تعاونج غير تكمل شغلها اول
صاح ابو وهب : صمن احلوكجن لا اكوم اترس روسجن رصاص وافتك منجن
كلنا سكتنا
اميرة سوت روحها اختنكت وكامت دوعاها تجري وما تتريك .. دك على رجلها وكاللها : اكلي
– لا والله احس روحي عدوتهن ما بيهن التحمل مني جلمة
– شحدهن اكصبهن والله
– يا شحدهن كلهن متفقات عليه يتعاونن بيناتهن واني جني وحدة بيه جرب شادات كورهن وكوري
-انعل والديهن والله ام مصطفى الغالية اكلي ول يابه
عفاف كامت تشرب الجاي وتتنهد وترفع بحاجبها وادور وجها ، وعواطف تضايكت وكامت تصيح على بتها : امشي جيبي الشكر كووووومي
صاح ابو وهب: لا تصيحين لا اكوم احط الطاوة براسج
– انا وبتي ما جاي اصيح على احد
– يولي لا تخليني اكوم اكفر بيج بت الجلب
سكتت ، كمل : لا ما يزهكني من الصبح ما يرتاحن بنات السكط دنعل ابوجن لابو الجابجن عليّ
الكل سكت ومحد ضل اله خلك ياكل
فد اميرة ضلت تحجي : شكثر اصبر الهن واكول اخياتي واشيل شغل عنهن وهن يكرهني كره ما صاير .. شكثر اغطيلهن واكول ميخالف ولا يصير بعينهن ، شكثر شفت على قدس وشكثر اضمضملها وهي عونه ما بيها
حجيت : اشفتي علي ليش هيج تفتنين والله حرام عليج
رد هو : اشايفة عليها يولي ؟
خزرتها الحاجة ، كملت وفرتها : ليش بس قدس ، ذاك اليوم اختي شايفة عواطف وهي تفرفر ابناتها بالسوك وحتى بدون نكاب ، حجيت فتنت كلت
عواطف : صخام بعينج كون يولي ليش هيج حية خافي ربج
ابو وهب : صدك ماخذة بناتج ورايحة
– اكو مرة ما تروح للسوك من تروح لاهلها اطوني اخوتي مصرف رحت اشتريت .
-وبكيف اخوتج يولي اطلعين لو بشوري
– رحت على مود بناتي معتازات كون هدوم مال بنات ما عدهن ضالات وحدة تاخذ من اللخ وانت لا تطيني ولا تخليني اروح
– ومن ما اخليج تروحين اطلعين بلايا شوري
– بس اني الطلعت شني هن ما طالعات
اميرة : عتبة الباب ما وصلت زلمتي مريض وتعبان يا سوك يا هدوم يا من كلاب الدنيا الزاد مالي نفس اضوكه مو افرفر بالسواكه ولا جن رجلي بشدة
كام من مكانه
جر الخيزرانه من فوك الديلاب
وصاح : عواااااطف
عواطف اندارت لاميرة ؛ بذمتج كون يالمسمومة الله لا يوفقج ان شاءالله
سراب ندهت الحاجة : فدوة عمة كومي لابوي
رادت تكوم امها والحاجة تكللها : ومن تخاف امج شعدها بالسواكه ورجلها مريض ، ينجازن هن وزلمهن مالي غرض .
نفضت ثوبها وكامت منقهرة من رد الحاجة .. وهو يصيح : ويييييينج.
هي مشت للقرفة
والكل طش .. الحاجة كامت لقرفتها
واحنا كل وحدة كامت لشقلها ، ضلت بس نور وسراب يشيلن بالسفرة وعينهن على قرفت امهن
صياح ابو وهب عواطف فزز البيت كله
كام يضربها بالخيزرانة صوت الضربة على جسمها واحن بعيد نسمعها
انظف بالبيت واعزل
وجسمي كشعر كله من حسها وهي تتوسل بيه يرحمها وما ينرد منها
محد بيهم تحرك
لا الحاجة طلعت ولا نسوانه
ووهب ما ادري وينه حتى ما فزعلها ولا شافها
فد بناتها واكفات برا يتباجن
كعدن ضياء من النوم
يطلع عمره ١٣ سنة ، فز وراح لقرفة امه خاطر يفازعلها .. كضبوا ابو وهب كفر بيه كفران جيف وكف بوجهه وراد يوكفه عن طك امه
فوك كتلتها عواطف كامت تذب بيه وتطرده وتحاول تبعده .. ذبت روحها على ابنها خاطر ما يضربه
فزعن بناتها وذبن روحهن على امهن
كضبهم جلدهم اربعتهم
وكفت ادحك وابجي
لا اكدر اذب روحي واحاميلهم جسمي كله يون من جلدة امس ولا اتحمل اشوفهم ينطكون هيج واسمع حسهم .
صاحت عفاف : اكضي شغلج انت الا يردلج يكتلج وياهن ، امشيييي
– خطية واحد منكم يحاميلهم والله حرام يطكهم هيج
– اشتغلي معليج
جاي تحجي
طلعت عواطف من القرفة تصيح : كافي طكت روحي منك ومن فكرك كاااااافي جزعت يا ناااااس جزززززززعت
ما يوم نصفتنييييي
ما يوم رحمتنيييييي
اسمك تكصب بيه وابزرييييييي
شنهو ذنبا شسوييييييينا وياك ، خذيت علي اربع نسوان لا يوم حجيت ولا يوم فكيت حسي ويااااااك
ولكم تعبت طكت روحي منك جززززعت
فوك الفكر والضيم يومية ننطيك يومية ننهان
شنهو السويته اشتريت اسلابات البناااااااتك
اكو يوم حسيت عليهن شمعتازات
دريت بحالهن اشبيهن ما بيهن لو ما اهلي ياهو بحاااالهن
طلع وراها يعرج وهو يكللها : يولي حسج يعلى بالبيت
كامت تصرخ وهي تزكح بوجه : يعلى بوجهك يييييييييعلى كونك ظااااالم تعبنا من ظلمك وضيمك تعبنا
صاحت عليها الحجية : حسج بت الارادم شهرتينا
يعرج حيل ورجع كضبها من راسها ويسحل بيها .. جاي تشكف عن رحها الضربة دفعت ايدو صارت الدفعة على رجلو بسرعة وكع للكاع
.. طاح لو تخبل عليها
كضب العكازة وباثنين اديه كام يضرب بيها
دفعته منها وتكله : احرك روحي واخلص منكم … احرك روحي
طلعت للكراج مفرعة ومفرفحة
جابت دبة النفط وكامت ترش على روحها
تراكضنا اني وبناتها نجر بيها
كامت تدفع بينا بقوة وتصيح : وخرن مني بنات الاوادم خلني اااااخلص عوفني ارتااااااح منكم … ولكم تعببببببت
هو يصيح ؛ خلوها تحرك روحها ابعد منها اذا شريفة سويها وفكيني منج
– اسويها والله اسويها واخلص من ظلمك تعبت عمرك ما نصفتني ورحمتني تعبببببت
ذب عليها الجداحة كالته وهو يكله : اذا بت ابوج سويها وفكينا من شرج بعدن منها
كضبت الجداحة واحنا نلزم بيدها
وهو يصرخ عليها ، اجر بيدها وسراب تتوسل بيها ونور تخبلت كامت ادك على راسها مثل المخبلة وبيها حالة نفسية
ضياء ركضلها ويبوس بديها ويكللها : فدوة يمه عووووفيها اطيني الجداحة
كامت تصرخ وتكلهم : وخري مني اكلكم خلوني اخلص تعبببت
جرت روحها وجدحت الجداحة بسرعة ايدها وهي سابحة بالنفط اديها والثوب كله وج
كامت الجهال تصرخ عفاف تركض وتصيح جيبن ماي .. ضياء يحضن بيها ويريد يطفي بيها
كامت تصرخ من كل كلبها وهي تحترك
وريسان يدحك عليها ما حرك ساكن
انخبصنا كمنا واحد يضرب باللخ
نريد نطفيها ما نكدر
وجت من فوك ليجوا .. الحجية كامت تركض تريد تجيب بطانية .. وعفاف ع المي
واني كمت اضرب على وجهي واصيح : راح تمووووت احترررركت راح تمووووت
طب خطاب من حلاة روحه نزع قميصه ويضرب بيها يرد يطفيها وهو يصيح : بطااااانية جيبو بطااااانية
طلعت الحاجة وبيدها البطانية
جرها من ايدها بسرعة ولفها بالبطانية ووكعها للكاع .. وعفاف ذبت الماي عليها
سراب تهسترت كامت تشلع براسها وتصيح : امي ماتت ولكم امي ماتت مااااااااتت
يحرك بيها خطاب يحاجيها ما ترد
الحاجة تهز بيها .. احتركت من فوك ليجوا
وضياء كله حروك
وريسان يصيح : كتلت روحها الله لا بارك بيها من نعلت الله على اليوم الشفتها بيها
انهد بيها غلط
بس صوته ضاع بنص صريخنا وصريخ بناتها
خطاب شالها من الكاع وطلع يركض .. كلنا تراكضنا وراه
ذبها بالسيارة والحاجة صعدت وياه
واحنا ضلينا بالباب نبجي ونصرخ … طلع ريسان وهو يلف الشماق على اركبتوه ويعرج على العكازة ويصرخ : دخلن جوا بنات الجلب شهرتنا لا بارك الله لا بيجن ولا بامجن
حجاها وطلع وسد الباب وراه
كامت سراب تضرب على وجهه وتصيح : امي ماتت راحت امي راااااااحت
نور بس تصرخ بدون حجي وتشلع بشعرها
اني كعدت ابجي بصياح بدون شعور .. عفاف تبجي .. اميرة ما هي
الجهال كلها تبجي
ساعة احنا فد نبجي ما نعرف نكوم ولا مستوعبين الصار .. بادت ادينا الخوف اكل كلوبنا والحيرة عليها حركتنا حرك
ما ندري ماتت لو بعدها عايشة
بناتها تخبلن .. ساعة دكن على روسهن ساعة يصيحن مثل المجانين
ندستني عفاف : كومي مسحي البيت خاف يجونا الوادم كومي صار سيان
كمت للهول ادحك الهوسة والسواد من الحرك الصار .. ريحة لحمها وهو يحترك بالهول يكشش البدن … دموعي تجري شلت الهول وطلعت اترسه من برا
ورجعت امسح
شفت اميرة بالمطبخ جاي تطبخ
جريت البيت للمطبخ ووكفت احاجيها : اذا ماتت بذمتج انت الفتنتي عليها وجتلتيها
– امشي لج امشي هم العكروك اله ضروك .. كملي شغلج يلا
– شستفاديتي من فتنتي ؟
– كملي شغلج لا اهفج بالجفجير والله
– حوبتها تطلع بيج ان شاءالله
اجت شالتني من جتف دشداشتي : تدعين عليمن يولي
بعدتها عفاف : دكافي ما كفاجن الصار بسجن كلوبنا خلصت كاااافي
بعدتنا من بعض
واميرة تخزر بيه .. مسحت البيت كله
وصارت الساعة ١٢ وماكو خبر عن عواطف
كلوبنا نار .. صبت اميرة القدا وصاحت : يلا تعالن تغدن
عفاف : يا غدا يولي اكو احد ضلتله روح ياكل بيها
اميرة : شلون يعني نموت جوع الجهال هاي شلون ما تاكل نلزمهم حداد عواطف احتركت
كبت عليها سراب : كله من وراح حركت روحها الله لا ينطيج الله يحركج بنار جهنم مثل ما حركتيها
كامتلها : تعاي هين يولي عليمن هاي تعلين صوتج
كربت منها ملشتها من شعرها وطكتها راشدي
دفعتها سراب وكامت تدعي عليها ، انهدت عليها اميرة تكضبها من شعرها
فزعتلهن اميرة فاككتهن ودفعت سراب ليقاد وجرت اميره وهي تكلها : بنات امهن احتركت جدامهن عوفيهن كرصيها شوية ما مليتي .
كعدت اميرة وهي تقلط على سراب وتوكل بجهالها وتاكل هي ، سراب كاعدة على صفحة مالها واهس توكل جهالها كامو يلوصون بالاكل
كامت اميرة تصيح : هسه عرفناج كاتلة روحج وتمثلين وعو كاتلج القهر على ضرتج كومي لجهالج شوفي شسوو
عفاف : يولي كلج سم اعوف بالله منج
– مو اقل منج اكلها انا سمي واضح مو مثلج من تحت لتحت
عفاف : دسكتي حسج ما اتحمل اسمعه
– اي روحي حركي نفسج وفكينا ياهو الكاضبج
صرخت اني : انت بكلبج رحمة ما تنقهرين لا تنقهرين ما تعرفين تسكتين كلنا بالبيت ما متحملين نسمع صوتج اسكتيييييي
– اكلي خ**** كضبي دودتج على خطاب وعود احجي مدودة وهي على ذمة رجل وجاية تحجيلي اخلاقيات ..
– خليني اصير شما اصير فد ما اصير مثلج كلبج اسود
– كلابهم وانت وين تلحكين توصلين لنعالي خاطر تصيرين مثلي مصدكة روحج يولي ؟
عفاف : راح تاكل **** بروسنا عيفنها لحد تحجي وياها
اميرة : الخ**** بحلكج لا تغلطين لا تخليني اهينج بالنعال والله
– ياهي هاي التهينيها بالنعال
كامت لحيلها وتلازمن
كامت سراب جرت الخيزرانة مالت ابوها وتولت اميرة بيها كامت تصرخ .. اني من حلاة روحي اصيح : حل حل
واجر بشعرها
جريتها جرة من راسها للكاع
نور ادفر بيها وسراب تجلد بيها واني املخ بيها
والتمينا عليها اربعتنا كطعناها تكطع
فكت روحها من عدنا وهي تقلط وتدعي علينا
وراحت ضمت روحها من عدنا بالقرفة .. غد بعد كلبي ما برد منها على الصار بعواطف بودي اذب النفط عليها هي واحركها يلا يبرد كلبي
المرة وجت جدامنا لا اهتزت ولا حست
كمت لميت البيت
جاي امسح طب وهب وهو يصيح : ولكم امي مااااااتت مااااااااتت
فزينا كلنا وطلعنا نتراكض
صرخت عفاف : منين عرفت
– جنت بالمستشفى ما لحكوا عليها ماتت ولكم مااتتتتتتتت
صرخت وخليت ايدي على حلكي
بناتها كامن يصرخن ويلطمن على وجوهن ويجرن بوهب ويكللنا : جيبلنا امنا نريدها اخذنا الها نريد امنا نريدهااااااا ما تعوفنا امنا ما تعووووفنا
نور تصرخ يمه
وسراب تصرخ وتكلها : ليش عفتيناااااا يمه
ليش ما فكرتي ابنااااتج ليش ما فكرتي بينا ليش عفتينا للما يرحموووون يمه رجعي ما نكدر بدونج ولج يممممه
لازمة راسي واصرخ بلا شعور وياهن
عفاف حطت ابنها بحضنها وكامت تبجي واجتافها يهتزن من البجي ..
شوية ودخلت مرة تصير اخت عواطف
لطمت على وجهه وصاحت : امجن وييييين يولن
جابلنها سراب ونور يصرخن وياها ويكللها : خالة امنا عافتنا حركت روحها وعافتنااااا امنا راحت عافتنا عافتنااااااا
كامت تشك بهدومها بنص البيت
الناس الجيران لفوا علينا .. ناس انكلبت على البيت
لحد ما اجا ابو وهب عاقج وجهه عصبي شاف الكل ملتم ، صاح : شعدي مضيف الخلفوكم يلا كل واحد لاهلها ما عدي فاتحة ولا سوي يلا
صفكت وجهه عفاف : يا ريسان تطرد الوادم ريسااان
وهو يصرخ : يلا من هين ما اريد ادحج احد يلااااا
فزت اخت عواطف وهي تكله : كلو من ضيمك جتلت روحها كله من ضيمك انتحرررررت
صرخ : نعلت الله على روحها التكتل روحها بالنار واختج للنار راح لحكيها وولي وراها يلا من بيتي
كامت تتكاون وياه وتقلط عليه
كضبها وطردها من البيت
بناته كامن يصرخن ويتوسلن بيه يروحن لامهن
كضب العكازة وتولاهن كتل وهو يكلهن : التترحم على امها اكص السانها امجن كافرة وراحت لنار جهنم التكتل روحها كفرت بالله من اسمعجن تبجن على امجن الكافرة اكصبجن
جرتهن عفاف من عندو وضمتهن بغرفتها
كام يصيح بالبيت : ما اريد احد يذكرها هين ولا اسمع واحد يترحم عليها ، الاسمعووووا يذكرها لو يبجي عليها احركو واخلي يلحكهاااا
واليجي لهين تطروه
ما انصب لها عزا هالكافررررة كفرت بدين الله وانتحرت الكاااافرة المررررررتدة
كلنا التمنينا بقرفة عفاف خاطين ادينا على حلوكنا نبجي بسكوت
سكت وهدى واحنا على نفس البجية .. جابتله اميرة ماي وكالتله : اشرب وطفي نار كلبك عليمن تحرك بروحك على هالكافرة الحركت روحها وما خافت من ربك اذا ارتفع ضغطك لو شكل وياك مرض ياهو اليفيدك هي لو بزيتها النكسة مثلها
فزت سراب من بينا وطلعت وهي تكللها : امي مو نكسسسسسه امي اشرف منج يا ساقطة يا ام الززززززلم
صرخ ريسان : جيبوها جيبوها هاي هل اربيها مثل امها جيبووووها
جرتها عفاف وكفلت الباب واميرة ضلت تضرب بالباب وتكلها : طايحة الحظ تصيحين وابوج موجود امج لا عرفت تربيجن ولا عرفت تحويجن جلباااات متكولن هالرجال عصبي مو وكتها تستحن تخجلن انتن بس الله يستر من عرامتجن وصلافتجن
صرخت عفاف : ولي من هين انجعي اميرررررة
– يطلعلج حس انت يالمسمووومة سمج اصفر يبث علينا مسوية روحج حزنانة وكاتلاتج بناتها
صاح ريسان : بسسسس
اميرة: ما يخلنك ترتاح حسبالك يعيفنك شوف اذا ما فتنن عليك للناس ويكولن هو الاطاها الجداحة وخلاها تحرك روحها .
كام من مكانه وفك الباب علينا : اسمعن ولجن دحجن هين
كلهن التفن ورا عفاف وهي تجر بيهن وتحاميلهن ، حجه : الاسمعها تفتن علي وتكول انا الناوشتها الجداحة اجتلها وادفنها بليلة ظلمة .. وما ارحم وحدة منجن الشهد منجن عفاف وسراب ونور وقدس .. الحاجة واميرة ابعدهن اتضلن انتن لو فتنتن علي وحجيتن تعرفن شجرم بيجن
عفاف : والله ما نحجي شلون نفتن عليك ليش شيضللنا اذا انت رحت محد تفتن عليك والله
اندار عليه : سمعتي ولج
وضك عكازتو عليه : والله ما اكول
سراب : يابه ما نحجي والله بس هلينا نروح نودع امنا كبل لا يدفنوها خل نشوفها بس اخر مرة ابوس رجلك يابه
صرخ : هششششش وووووووولج ما عدي بت تحجي سررررراب
وضك عكازتو عليها : امج كافرة يولي البجي عليها حراااااام
الاسمعها لو احس بيها تبجي على امها ادفنهااااااا
ضمت روحها ورا عفاف وهو اندار يمشي ويصيح بالبيت : ما اسمع وحدة تبجي عليهاااا الاسمعها تترحم لو تبجي على وحدة كافرة جتلها حلااااال .. اميرة شغلج هاذ تكليلي يشكو وحدة .. ولو فتنت علي وحدة لو حجت بس جيبيلي اسمها تالله لا ادفنها وهي حية
حجاها وطلع من البيت
وكف اميرة يم الباب مخوصرة : وهاي حط اركابجن بيدي حسبالجن اعديها الجن من اطكني ؟
محد من عدنا جاوبتها
مشت وهي تقني جياد بينا : الدنيا ربيع والجو بديع افل على كل المواضيع .. افل افل افل ههههههههههههه ، وهاي خلصت من وحدة منجن .. باقي اثنين
قدددددددس حضري جفنج … دورج ورا عواطف يقددددس هههههههههههههههه
سراب : لا ما يجي يوم احركها بيدي واخذ ثار امي منها ما يبرد كلبي منها
عفاف : اششش سكتي يمصكوعة لا تروح تسمعج عيفيها
قدس : ونضل تحت جدمها يمتى ما عجبها فتنت علينا
– اسكتي انت اللخ يولي بس تفتن عليج واتهمج ويا خطاب .. تلحكين عواطف ركض
– ميهمني اموت لو اعيش .. مسميها عيشة هاي تنجلد وحدة وتنحرك وحدة .. ويمنعنا حتى من البجى عليها .. يا عيشة نموت ونروح يم الله ارحم منه ومن عيشته
– يولي هش لا تعمين على روحج
– اعمي ما عمي ما عدت اخاف منهم هي موته موته جزعنا كافي الشفنا اليوم احتركت كدامنا محد بينا كدرت تسوي شي .. ماتت مكابيلنا واحنا لا حول ولا كوة … عيشة هاي اني اريد اموت احسن من العيشششة
طبت الحاجة وهي تون وتصيح : يمصيبتجن يبنوااااات يمصيبجن يمه .. شهرنا ابيجن جدام الوادم تمنجدنا يممممممه
كل احنا اطافرنا الها
صرخت وكعدت بالكاع فكت شيلتها وصاحت : مرة بساع بساع راحت من ادينا يولننننننن شحالجن يممممممه
كابلناها وكمنا نبجي
وهي تصيح : تعزينا وتصخمنا يولنننننننن
نبجي بقوة .. ركضت عفاف تجيبلها ماي
اخذت الكلاص كطعت بجاها وشربت … حست حلكها وحطت الكلاص وحجت مفرفحة : شهرنا وخزانا يولن جدام الوادم يصيح كااافرة .. جرني وجر ولده من جنازتها يععععععع
عفاف : وعليش رضيتي تجين
– بس ردت اسكته يولن الوادم كلت وجوهن ولدها ما يوكفون بجنازتها بس خطاب يتراكض منا ومنا ..
– ضياء شلونه
– شلونه … حال الضيم حاله .. حال الضيم حاااااااااااله يولن انفجعنا هاي المصيبة الما جانت ع البال .. يولن ما يرضى يسويلها عزا ولا يرضى نكف بجنازتها يمممممه
سراب : لا يسوي فاتحة هسه بس كليله نروح لخوالنا نخابل بيبي وخالتي عمة فدوة
– سكتي يولي يذبحنا ريسان طغى طغى ريسان ما ينكضب اليوم جار بظلمها اعليها
بجت : يا عواطف يا مصيبتج
ولج عليش تيهتي بنياتج يولي المن خليتيهن اليا ضيييييم
عليش جتلتي روحج
صرخت نور ؛ امي ما كتلت روحهااااا انتو الكتلتووووها هي بس هددتكم بروحها رادتكم بس تفهموها بس تنصفوها صاحت ارحموني ارحمووووني ارحمووووني محد بيكم رحمها لحد ما سلمت روحها لالله يرحمها امي ما كتلت روووووحها انتم الكتلتوووووها
كامت تصيح
ما ردت عليها الحجية ضلت بس تبجي بقوة واجتافها تهتز من البجي … طب ريسان على حس نور صرخ : اني شكلت يولي ، يولي حسج يطلع بالبيت يولييييي
واجاها بعكازته
فزينه عليها كلنا والحجية وكفت بوجه
كامت تصيح : بسك بنوات انفجعن بامهننننن بسك جووووور يتيمات اصبحن خاف الله بيهن
– انا ما اخاف الله يسلييييمة
– اليمنع بت من البجى اعلى امها ظلم بسك منهن خلهن يروحن لخوالهن يذبن حيلهن اعلى امهن عووووفهن
– تالله التطلع من هينا لا اكصبها … والله وابالله اجرم بيكم جريمة
يحجي وهو يرفع عكازتو ليفوك ويهدد
نزلها يتجى عليها وكعد مكابيلنا ينعل بروح عواطف
ما تحملن بناتها راحن لقرفت ابهن يبجن وينوحن بصوت عالي كام يصيح … تكاونت وياه الحجية سكت عنهن
اجت اميرة كعدت يمه ، سالته : هسه شني اهلها راح يسوون الفاتحة
– مالي غرض لا بفاتحتها ولا بدفنتها هم اليحيرون بيها ، سليمة خبري ابنج وكليله خطاب رد مالك غرض بدفنتها
– الزم خطاب اكدرله انا وارده
– اجتله والله
– دهيد شجاج انجفيت بجتل الوادم مصيبة اصبحت ابيتك وانت تهدد هيد لا الله يكلبها بيناااااا
– يكلبها بينا من اثمجن وزووووورجن جيف ما حجبها حالي حطت روحها وجتلتها لا خافت من الله ولا عذابه
– خليت براسها عكل خاطر تذكر الله جلدتها لحد ما فكدت عكلها مرة صاحية معدلة زينة نسوانك هيج تعمل بحالها
-بالله اسكتي عني سلييييييمة تراه خلكي لهيييين واصل اكضب ابنج واكصبه لو كربهم
– ابني زلمة محسوب على عمامه ما تحكمه انت ولا تكوده
– انعل والدي هالسافل
سكتت عنه ..
فد صوت نياح سراب ونور بقرفة امهن
المل سكت .. شوية وكام من عدنا
حجت عفاف : مو كودة حرام ومنتحرة .. بخل يكول هي راحت راحت بعد عليش ادفع فلوس دفنة وجفن وكبر … سوا هالفلم خاطر يكربس عالمصاريف براس اهلها وذبها براس الحرام
زكحت بيها الحاجة : هششش سكتي لا يسمعج
حجت اميرة : حجايتج هاي جبيرة يعفاف شني ريسان بخيل ويبخل بدفنة وجفن الحركت روحها وهي تنعله شناطرة يكلل كبرها ورود
كامتلها الحجية وهي تخزرها : محد عزانا وصخم روسنا غير فتنتج وسمج من تحجي وتفتنين على وحدة نوبة اللخ الا اكضبج واملصجججججج
وذبت روحها عليها وعضتها من جتفها حيل
كامت تصرخ .. ابو وهب ما هو
كامت تريد تجر وحها من الحجية
ملشتها من شعرها نص كذلتها اجت بيد الحجية
كامت تصيح وتبجي والحجية تكلها : دفتني وشوفي انا لو انت .. روحي وكليلة الحاجة كتلتني وفتني … سويها يولي اني الارييييييدج اسويهااااااا
ركضت وراها ذيج راحت تركض
ابو وهب ما هو بالبيت .. والكهرباء مدري شبيها .. لا اجت ولا حولت .. صار المغرب والبيت اظلم
انسحنت روحي .. حيل تعبت
لا اكل ولا شرب وصيحت وبجيت هواي وحارة
احس بعد تبنجت لا اكدر اشيل ايد ولا رجل
الحاجة ودت واحد من الجهال على ابو السحب
رد يكللها : حاجة يحول اليوم ٨ بالشهر ودولي فلوس خاطر احوللكم
– عجل يابه وكته هذا عرس ويا عرسنا
ياهو العده هسه ويطي .. روح كله بس اليوم باجر ابو وهب يجي ويطيك
– كتله ما يرضى
– ابوك وين
– ما هو
– يربي بيمن نحير بمصيبتنا لو بمصيبة الحر
عفتهن ورحت تمددت بقرفتي
انصلخنا صلخ من الحر واني جلدي محزوز ومجرح من جلدت امس .. رحت للحمام كوة اجر بروحي جر .. الكل هدا وماكو صوت بالبيت ولا جن الصبح مات من عدنا واحد .. البيت هادي .. جن ميتتلنا دجاجة مو مرة .. يا رخص ارواحنا بهالبيت
دخلت للحمام وذبيت جم طاسة ماي على روحي واني بالثوب خاطر يسكن الوجع مال جسمي وما يحركني وياذيني
– ها
– كهرب عليش ماكو
– يريد فلوس
– والحاجة ما اطت
– لا تكول ما عدها
– عجل راتب رجلها مالت الرعاية وين يروح اذا هي الما عدها كلشي بهالبيت علي كلشي بهالبيت انا الادفعه ادفع ايجار لابنها وادفع سحب الها
عفته يحجي مالي خلكه ورحت للقرفة
شو هذا لحكني .. تمددت كعد بقرفتي حجت : انت مبللة يولي
– جلدي يحركني من اعرك نكعت روحي بماي
مد ايدو يتحسس جسمي : عمت عيني هاي من طكت امس
وخرت عنه .. نتر : عليش تنهريني عنج يولي
– تعبانة وجسمي يوجعني
– التنهر رجلها كح…. تدرين لو لا
بعدت روحي منه
ولا جنت مرته اليوم حركت روحها يدور فراش لا بعينه ولا بحاجبه زهكت روحي منه شرخصنا عده يكربنا ومن نخالف يحركنا وما يسال عنه ويستحسف مكان كبر يشتري نندفن بيه يذبنا على اهلنا
بعدته مني حيل .. اتخبل
شو هذا ذب نفسه عليه يريدني
لعبت نفسي منه .. دفعته مني ..
صاح : ادفعييييني انا اليوم اعلمج تعااااي هين ….
- يتبع الفصل التالي اضغط على ( رواية اسرار قدس ) اسم الرواية