رواية سأحبك بالتاكيد كاملة بقلم بتول عبد الرحمن عبر مدونة دليل الروايات
رواية سأحبك بالتاكيد الفصل الخامس و الاربعون 45
بالليل الساعه ٩ كان عمر قاعد مع ميرنا ومنال ولين كالعاده وجرس البيت رن
قام عمر يفتح الباب وقال بصدمه : بابا !!!!!
رد عليه واخده بالحضن : واحشني يا ابن الكلب
عمر : وانت اكتر بس .. بس انت جاي البيت ازاي
_: هدخل بس وهتفهم كل حاجه
دخل واول م منال ولين شافوه الصدمه لجمتهم جدا جدا يعني … مش عارفه اوصفهالكوا ازاي بس شعور أن حد عزيز عليك يموت وتلاقيه قدامك بعد ٣ سنين دي ممكن تكون صدمة العمر
لين جريت عليه وهيا لسه مصدومه وقالت : بابا !! .. حضرتك از … ازاااي
رد عليها : وحشاني يا قرده
لين : طب .. طب ازاي
بص لمنال اللي كانت واقفه متسنده على ميرنا من الصدمه وحست للحظه انها بتحلم وان اكيد دي مش حقيقه
_: ازيك يا منال
ردت منال : خالدد … اانت… اانت لسه … لسه عاايش … ططب اززاي
قرب منها : زعلانه ولا فرحانه
منال : مصدومه وفرحانه … مكنتش متوقعه انك ممكن ترجع
خالد: وحشتيني
منال : ووكنت فين طوول الفتره دي … قدرت تبعد ٣ سنين ازااي
خالد : هقولك كل اللي عايزه تعرفيه … بص لميرنا وابتسم وقال : انتي بقا مرات عمر
ردت ميرنا : ااه أنا … حمد الله على سلامتك يا عمو
خالد : زوقك حلو زي ابوك … تعالى معايا
عمر : فين
خالد : عايزك في كلمتين
مشي عمر مع خالد ومنال قالت : طول عمري بسمع عن الاعمي اللي بيفتح والعقيم اللي بيخلف والمريض اللي بيخف … لكن اول مره اشوف ميت بيصحى
لين : هيا صدمه فعلا … وبعد ٣ سنين بحالهم
عند عمر وأبوه
عمر : رجعت ليه
خالد : في حد يقول لابوه رجعت ليه
عمر : انت في عين الكل هنا ميت … وخلاص اتاقلمنا على الحياه من غيرك … وانت قولتلي اكبر عقاب ليك انك تحرم نفسك مننا … وبعدك لينا كلنا كانت حاجه صعبه وخصوصا على ماما … بعد كل ده جاي ترجع تاني
خالد : عايز ارجع لحياتي الطبيعيه واموت وسط عيلتي .. مش عايز اقضي حياتي كلها بره بلدي
عمر : مش انت روحت واتجوزت وانبسطت هناك … وانا دايما على تواصل معاك … ليه مختارتش مراتك اللي بره مصر وسيبتنا زي م احنا مرتاحين
خالد : اولا طريقة كلامك معايا مش عاجباني … متنساش اني ابوك .. ثانيا ده بيتي ارجع وقت منا عايز
عمر : أنا مش قصدي … بس انت مشوفتش معاناة ماما هنا كانت عامله ازاي
خالد : عارف … بس كنت مضطر انزل
عمر : ليه ايه اللي حصل
خالد : مراتي اللي بره مصر خدت تعبي كله اللي بدأته من الاول ومكانش معايا غير تمن تذكره لمصر … حتى هدومي نزلت من غيرها … ضربت عليها
عمر : ذنب امي والله … كانت قصرت معاك في ايه علشان تتجوز عليها مرتين … مره سكرتيرتك … ومره تانيه واحده غيرها اجنبيه
خالد : أنا مبقتش زي الاول … العمر بيجري وبقيت عجوز ومعنديش نفس التركيز اللي كان عندي من ٣٠ سنه … ويمكن انت كمان تتجوز في يوم على مراتك
رد عمر بسرعه : مستحيل … ميرنا ماليه عيني اوي وعمري م هبص لأي واحده غيرها مهما يحصل ايه … وده وعد وعدته لنفسي من اول مره شوفتها فيها
طبطب عليه خالد : ربنا يخليهالك
عمر : يارب … طب وانت هتقول ايه لماما
خالد : أنا مألف حكايه ممكن تدخل عليها
عمر : وهيا ايه بقا الحكايه دي
خالد : نبض قلبي وقف لمده وافتكروني ميت … واندفنت بالفعل ولكن قعدت اصرخ لحد م بواب الترب فتحلي وخرجت ولكن كنت وقتها فاقد الذاكره … ولما رجعتلي دورت عليكوا
عمر : أنا شوفت المسلسل ده قبل كده … كان اسمه ايه … اسمه ايه
خالد : هوجان
عمر : ايوه هو ده … اتفرجت عليه مع ماما ولسه مخلصين اخر حلقه التلات اللي فات … اي يا بابا الحكايه دي .. دي ولا هتدخل عليها بربع جنيه مخروم
خالد : م هيا من صدمتها هتكون مش مركزه وهتربط دي في دي
عمر : وكده كده ماما مبتركزش فهتصدق
خالد : الله ينور عليك
عمر : استعنا ع الشقا بالله
دخلوا ومنال كانت مع لين وميرنا في المطبخ
منال : انتي يا لين هتجيبيلي اللي أنا محتاجاه … وانتي يا ميرنا اقعدي هنا متعمليش حاجه علشان اللي في بطنك
ميرنا : لا متخافيش هساعد معاكوا
منال : اقعدي بس وهخليكي تعملي حاجات خفيفه
دخل خالد مع عمر
منال : أنا هحضرلك كل الأكل اللي انت بتحبه وانت اطلع اوضتك خد دش وغير هدومك … لسه كل حاجه زي م هيا وهدومك لسه مكانها وكمان البرفانات بتاعتك مكانها محدش قربلها … وبعد كده قولي ايه اللي حصلك مخلي شكلك ضعيف كده وكانك مكلتش بقالك قرن
بصله عمر بعتاب وخالد بصله بندم
طلع خالد اوضته القديمه وحس بالحنان والدفا اللي افتقدهم … في حد يسيب العز والحنان ده كله ويمشي
اخد شاور ونزل والسفره اتحضرت وكلوا كلهم في جو عائلي محصلش من سنين والصمت كان سائد عليهم لحد م قطع الصمت ده خالد
خالد : لسه أكلك جميل زي م هو تسلم ايدك
منال : بالهنا والشفا … كل كويس علشان ترجع زي م كنت
خلصوا اكل وقعدوا كلهم
ميرنا : هعملكوا حاجه تشربوها
منال : لاء متتعبيش نفسك يا حبيبتي هقوم أنا أعمل
ميرنا : والله م انتي قايمه … هقوم أنا عادي يعني
عمر : لا مش هتعملي حاجه لا انتي ولا هيا أنا اللي هعمل
ميرنا : طب هعمل أنا وتعالى معايا
عمر : يلا
دخلوا المطبخ وميرنا ولعت الكاتيل وقال لعمر : هو ازاي رجع وهو مفهمهم أنه ميت
عمر : اتجوز واحده اجنبيه وضحكت عليه وقلبته في كل حاجه حتى هدومه فمكانش قدامه اي حل غير أنه يرجع
ميرنا : احيه ده بجد
عمر : قولتي ايه
ميرنا : في ايه
عمر : اي الملافظ دي … في بنت محترمه تقول احيه عادي كده
ميرنا : انت لسه عايش في ٢٠٠٧ … البنات بتقول أسوأ من كده اصلا
عمر : بس انتي مش منهم … وبعدين اول مره اسمعك اصلا بتقولي احيه دي
ميرنا : اي يا عمر عادي يعني الحوار صدمني
عمر : م أنا مش متجوز واحد صاحبي … في كلام رقيق يليق على موقف زي ده
ميرنا : الموضوع مش مستاهل
عمر : لا مستاهل … لو خدتي على كده ممكن تكون دي طريقة كلامك بعد كده قدام اي حد … شويه وهتقوليلي يسطاا ويا عم ويابا
ميرنا : خلاص ولا تزعل نفسك … هقولك صانكيوا داري
عمر : وده ايه ده
ميرنا : او ماي جاد ثانكيو داري اي لاف يو سو ماتش … متعرفهاش انت البنت دي
عمر : معرفش بنات غيرك اصلا
ميرنا : ثبتني … او ماي جاد … بص خرجتنا من حوار مهم علشان موضوع تافه
عمر : مش تافه بالنسبالي
ميرنا : خلاص اوعدك مش هقولها تاني … بس انت بتتكلم جد على باباك
عمر : وانا هكدب عليكي ليه يعني
ميرنا : أنا مش قادره اصدق بس … دي تاني مره تقريبا
عمر : اول مره ربنا سترها لكن المرادي لاء
ميرنا : طب وهيقول ايه لماما ولين
عمر : هيألف حكايه
خرجت ميرنا مع عمر وكانت منال بتقول لخالد : قصرت معاك في ايه
خالد : مقصرتيش في أي حاجه وربنا يشهد على كلامي
منال : ولما أنا مقصرتش بتتجوز عليا ليا .. وفوق كل ده سيبتنا ومشيت
خالد : ااا … اان … انتي عرفتي من..منين كل..ده .. هو عمر قالك حاجه
- يتبع الفصل التالي اضغط على ( رواية سأحبك بالتاكيد ) اسم الرواية