رواية الان اقول احبك كاملة بقلم ندي سامي عبر مدونة دليل الروايات
رواية الان اقول احبك الفصل الثاني 2
فؤاد : بس بشرط
ساره بفرحه : انت تشرط براحتك يا قمر انت
فؤاد : فارس يسافر معاكى
ساره اختفت ابتسامتها و قالت بملل : بتهزر صح
فؤاد : لا لازم حد موثوق يجى معاكى و انا مش هعرف اجى و مش هينفع اسيبك لوحدك
ساره بقله حيله : طيب يا بابا بس ياريت ميدخلش ف إلى ملوش فيه
فؤاد قام و سابها و مامتها بصتلها بلوم
نهاد : مش قولنا نتكلم كويس هو عملك ايه يعنى
ساره : ماما انتى عارفه انى مش بحب حد يبقى معايا ف كل حاجه و يودينى و يجيبنى و انا مش عيله يعنى و بعرف اسوق كويس
نهاد : وانتى عارفه برضو أن باباكى بيخاف عليكى و عايز مصلحتك
ساره : عارفه يا ماما بس هو فارس ده رخم اصلا
نهاد : ولا رخم ولا حاجه انتى إلى مستقصداه عشان مش عايزه يبقى عندك سواق معاكى ع طول
ساره بتهرب : هروح انام انا بقى
قامت من قدامها و طلعت الاوضه و فطلت تفكر ف حاجات كتير لحد م نامت
_______________________
بعد أسبوع ف معاد السفر
ساره و هى بتتكلم ف الفون : حاضر يا ميريام جايه اهو
ميريام : متتأخريش عشان الباص ميطلعش
ساره : تمام انا جايه اهو
قفلت معاها و نزلت تحت سلمت ع أهلها و بعدين خرجت لقت فارس واقف مستنيها ف بصتله بعدم اهتمام و سابت الشنط و ركبت و هو حط الشنط ف العربيه و ركب و راحو ل مكان الباص
_______________________
ف الباص
ساره ركبت و سلمت ع ميريام و اختها و خطيبها و قعدت جمب ميريام و اختها و فارس ركب جمب خطيب ميريام
ميريام بهمس : هو ده السواق إلى انتى مش طايقاه
ساره : ايوه
ميريام : م اهو قمر اهو يا بت مالك فكك من ضياء و خليكى فيه
ساره : لا طبعا ضياء حبيبى اه مضايقه منو بس لا برضو
ميريام : براحتك
سكتو و شغلو اغانى ف الباص و قعدو يغنو لحد م وصلو
_______________________
ف السخنه
ميريام : بصى دى اوضتك و دى اوضتى ” شاورت ع اوضه جمب اوضه ساره ” و دى اوضه فارس
ساره : تمام ماشى هدخل اريح شويه و بعدين نبقى ننزل بليل
ميريام مشيت و كلهم دخلو اوضهم و نامو لحد معاد الغدا
~~~~~~~~ بليل
صحيو كلهم ع معاد الغدا و نزلو المطعم و اتقابلو تحت و جابو الاكل و قعدو ع ترابيزه واحده و قعدو يهزرو و ميريام لاحظت أن فارس قاعد سكت
ميريام لفارس : مالك قاعد ساكت كده ليه فرفش كده معانا احنا جايين نتبسط
قالت كده و ضحكو كلهم حتى فارس بس ساره كانت حاسه انها اتضايقت و متعرفش ليه بس طنشت
خطيب ميريام ( محمد ) : هتعملو ايه بعد الغدا
ميريام : مش عارفه بس حاسه انى عايزه ارتاح
اخت ميريام و ساره : ايوه وانا
سكتو شويه و بعدين كملو كلام لحد م خلصو اكل و قعدو شويه و بعدين كل واحد طلع اوضتو يريح
_______________________
ف اوضه ساره
كانت قاعده بتحاول تنام بس مش عارفه و فضلت قاعده لحد م زهقت و قررت انها تنزل تتمشى ع البحر شويه و قبل م تنزل لقت ضياء بيرن عليها ف افتكرت إلى حصل و اضايقت ف قفلت الفون و نزلت
_______________________
ع البحر
كانت قاعده ع الرمل بتسمع اغانى و سرحانه مع الاغنيه و البحر و فجأه حست بحد واقف جمبها ف شالت الهاند فرى و بصت جمبها لقت فارس
فارس : احم حضرتك قاعده لوحدك هنا ليه
ساره بملل : زهقت و مش عارفه انام ف قولت انزل ع البحر وانت
فارس : كنت عايز اشم شويه هوا ف خرجت اتمشى .. ممكن اقعد
بصتلو و هزت راسها بالموافقه ف قعد جمبها و لقاها بتمد أيدها ليه ب الهاند فرى ف بصلها ب استغراب
ساره باحراج : احم لو حابب تسمع معايا يعنى
فارس ابتسم و خد منها الهاند فرى و قعدو يسمعو اغانى شويه لحد م هى زهقت ف قفلت الاغانى مره واحده و قامت
فارس باستغراب : حصل حاجه !؟
ساره : لا بس حسيت ب ملل تعالى نتمشى
فارس : تمام يلا
فضلو يتمشو شويه لحد م لقتو واحد بتاع ايس كريم
ساره بحماس : الله ده عامل زى الى بيبقو ف تركيا
قالت كده و راحت بسرعه عند بتاع الايس كريم و هو راح وراها و هو بيضحك ع طريقه كلامها
ساره : عايزه اتنين ايس كريم واحد اوريو و ..
بصت ل فارس ف قال : شوكولاته
الراجل بدأ يعمل ف الايس كريم و عمل نفس الحركات بتاعت التركيين و ساره كانت مبسوطه جدا عشان ده كان سبب م الأسباب إلى مخلياها عايزه تروح تركيا و فارس كان واقف باصللها و مبتسم لحد م الراجل خلص الحركات و اداهم الايس كريم و مشيو
ساره بفرحه : بجد حلو اوى و كمان الايس كريم طعمو حلو
فارس بتلقائيه : إلى يشوفك اول مره ميشوفكيش دلوقتى
ساره بتكشيره : قصدك ايه يعنى
فارس باستوعاب : احم ولا حاجه حضرتك هتروحى حته تانى ولا هنرجع الاوتيل
ساره بصتلو باستغراب ل تغيره و قالت ف سرها : ده ايه إلى قلبو رسمى كده !
ساره : لا لسه مش عايزه اروح
قالت كده و فضلت تتمشى و هى بتاكل الايس كريم لحد م لقت كراسى ف راحت قعدت و فارس راح قعد جمبها
ساره : تيجى نحكى عن نفسنا !؟
فارس : ازاى يعنى
ساره : انا اقول حاجات عنى و انت تقول حاجات عنك اهو نقطع الملل
فارس : تمام مين يبدأ
ساره : انت
فارس : انا فارس و عندى 26 سنه اتولد ف المنصوره و كل حياتى كانت هناك لحد م كبرت و جيت ادور ع شغل هنا ف القاهره عشان كمان انا بحب القاهره اكتر ف خدتها فرصه و بقيت كل فتره اروح المنصوره ازور اهلى .. بس كده اختصرتلك دورك
ساره : انت بتكروتنى يعنى
فارس ضحك ف ساره قالت : ليه بقيت شغال سواق
فارس : مكنتش لاقى شغل و دورت كتير مكنش فى أماكن ف معظم الشركات إلى روحتها و الشركتين إلى اشتغلت فيهم مشيت عشان التعامل مكنش احسن حاجه و لما لقيت أن والد حضرتك كان بيدور ع سواق و كان حاطط سعر حلو وافقت و كمان كان لازم اشتغل عشان اقدر اصرف ع نفسى و اجيبلى دخل يعيشنى
ساره بصتله و هى مبتسمه ف قال : دورك
ساره : طبعا مش محتاجه اقول اسمى ف هبدأ ع طول .. انا عندى 24 كنت ف كليه صيدله و بشتغل ف مصنع ادويه زى م انت عارف بشرف ع العمال و بشوف الادويه قبل م تتغلف لو بايظه عارفه انها مش شغلانه اوى بس حبيبت المصنع عشان معايا صحبتى و بنقضى وقت كبير مع بعض .. بحب الايس كريم و الحلويات و خاصتاً الشوكولاته تافهة ايوه و دى حقيقه بس لازم أبين انى جامده و مش بخاف من حاجه بس الصراحه كنت بعمالك ف الاول وحش عشان انا فعلا مش عايزه حد يودينى و يجيبنى و يبقى معايا ع طول انا مش عيله يعنى
قبل م يتكلم فون ساره رن و كان ضياء برضو ف كشرت و قفلت الفون و قامت
ساره : يلا نمشى !؟
قالت كده و مستنتش ردو و مشيت و هو مشى وراها و هو مش فاهم لحد م وصلو للاوتيل و كل واحد طلع اوضتو
~~~~~~~~ ف اوضه ساره
ساره دخلت الاوضه و قفلت الباب و قعدت ع السرير و بصت ف الفون
ساره : مش هرد عليك لحد م ارجع م السفر عشان تتعلم متردش عليا تانى
قالت كده و سابت الفون و دخلت خدت دش و نامت
_______________________
تانى يوم الصبح بدرى ف الاوتيل
كان فارس قاعد بيفطر و لقى اخت ميريام ( يارا ) واقفه قدامو
يارا : ممكن اقعد
فارس : اه اكيد اتفضلى
يارا : صاحى بدرى اوى
فارس : عادى متعود اصحى ف الوقت ده و قولت انزل أفطر لحد م تصحو
يارا : عادى اقعد افطر معاك
فارس بابتسامه بسيطه : اه عادى
قعدت معاه و قعدو يفطرو هما الاتنين و يارا كانت بتتكلم مع فارس لحد م اندمجو ف الكلام و كانو بيضحكو و ف الوقت ده كانت ساره صحيت و نزلت تحت لقتهم قاعدين بيضحكو ف اضايقت و راحتلهم بسرعه
ساره بعصبيه : مدام بتضحكو اوى كده ضحكونى معاكو ايه الحوار
يارا باستغراب : مالك فى ايه بنهزر عادى
ساره : والله بتهزرو عادى و صوتكو جايب اخر الاوتيل
فارس : فى ايه يا فندم هو ايه المشكله يعنى لما نقعد مع بعض احنا معملناش حاجه احنا بنفطر بس و هى شافتنى صدفه ف جت قعدت تفطر معايا
ساره بانفعال متعرفش سببو : المشكله انك جاى معايا المفروض تبقى معايا انا و تاخد بالك منى انا
فارس باستغراب : طب م انا مع حضرتك احنا بس نزلنا نفطر
ساره بضيق شدت كرسى و قعدت : تمام و انا هقعد معاكو
يارا بصتلها ب استغراب و هى ماسكه الضحكه و فارس بصللها ب استغراب بس حس انو مبسوط سيكا و رجعو هما الاتنين يقعدو عادى بس سكتو شويه
ساره : ايه الضحك خلص اول م جيت !؟
يارا حبت تغيظها و قالت : اصل احنا خلصنا كل الكلام بقى
ساره بصتلها و ابتسمت ابتسامه مستفزه و سكتت و قعدو ياكلو كلهم لحد م لقتو ميريام و محمد جايين عليهم
ميريام : الله الله بقيتو تنزلو من غيرنا يعنى
يارا : انتو إلى نومكو تقيل صحيتك كام مره انا
ميريام بضحك : خلاص هصحى بدرى بعد كده عشان نفطر كلنا مع بعض
قعدو معاهم و جابو اكل و فطرو و بعدين كل واحد راح يغير و نزلو ع البحر
~~~~~~~~ ع البحر
ميريام لساره : انتى مش نازله ولا ايه
ساره : لا مش بحب انزل البحر اوى انزلو انتو
ميريام لفارس : وانت
فارس : لا مش هنزل
ميريام : براحتكو احنا هننزل
قالت كده و ضحكت و مشيت نزلت البحر معاهم و ساره مسكت روايه قعدت تقرا فيها و فارس كان قاعد معاها عشان ميحصلش حاجه
ساره بملل : انا هقوم اتمشى تيجى معايا !؟
فارس و هو بيقوم : تمام اتفضلى
ساره بصتلو بخنقه عشان كل شويه يكلمها برسميه و مشيت
فارس : ينفع اسأل حضرتك سؤال
ساره بخنقه : انا مش حضرتك ع فكره
فارس بصلها بتعجب ف قالت : مش بحب الرسميه الكتير دى ممكن تكلمنى عادى يعنى
فارس : تمام .. ينفع اسالك سؤال !؟
ساره : اسأل
فارس : انتى ليه مش بتحبى تنزلى البحر بس بتحبى تتمشى عندو و تفضلى قاعده قدامو ب الساعات عادى
ساره بحزن : عشان صحبتى الله يرحمها غرقت ف البحر و من ساعتها و انا مش بحب انزل البحر
فارس : ربنا يرحمها بس هى غرقت ازاى
ساره : كنا بنعلب انا و هى و احنا صغيرين و دخلنا جوا شويه و الموج كان بيدخلنا اكتر و لقينا ماما بتنده علينا ف لفيت ابصلها و رديت عليها لفيت اشوف صحبتى ملقتهاش
فارس بحزن : ربنا يرحمها بس ده مش سبب يخليكى متحبيش تنزلى البحر اكيد هى ربنا كان كاتبلها كده
ساره : عارفه بس بخاف انزل
فارس : تيجى ننزل دلوقتى !
ساره بتوتر و كدب : ايه لا انا اصلا مش عايزه انزل مش عشان السبب ده
فارس : احنا جايين هنا هما 3 ايام اتبسطى بيهم احسن و يلا قبل م يطلعو
فارس شدها و راحو ناحيه صحابها و هى كل ده ماشيه وراه بتحاول تبطئ نفسها عشان خايفه لحد م بدأو يدخلو المايه ف مسكت فيه جامد لحد م دخلو
فارس بهدوء : اهدى احنا ع الشط ع فكره
ساره استوعبت أنها ماسكه فيه جامد ف بعدت عنو بسرعه و راحت مسكت ف ميريام و فارس ضحك عليها و فضلت كده شويه لحد م اتعودت ع المايه و بدأت تسيب ميريام و بقت واقفه لوحدها
فارس : شوفتى أن المايه حلوه .. طول م انتى ع الشط مش هتغدر متقلقيش
ساره : م احنا كنا ع الشط و الموج دخلنا
فارس : عشان كنتو خفاف
ساره بتكشير : قصدك ايه يعنى
فارس بضحك : لا ولا حاجه
فضلو يلعبو كلهم ف البحر لحد م ساره نسيت خوفها و بعد وقت طلعو كلهم و قعدو ع البحر و قعدو يلعبو شويه و بعدين رجعو الاوتيل
~~~~~~~~ ف الاوتيل
ميريام قبل م يطلعو : الساعه 6 هننزل نتغدى و نروح كافيه اعرفو هنا تمام
الكل : تمام
وطلعو كلهم اوضهم
~~~~~~~~ بليل ف غرفه ساره
ساره دخلت و قعدت شويه وعملت نسكافيه و قعدت تشوف مسدجات الشغل و فجأه جه ف بالها فارس ف قعدت تدور ع اكونت الانستا بتاعو لحد م لقتو و فضلت تقلب فيه و وهى بتقلب عملت ….
ساره بخضه : يلهوى ايه إلى انا عملتو ده
- يتبع الفصل التالي اضغط على ( رواية الان اقول احبك ) اسم الرواية