Ads by Google X

رواية سلف و دين الفصل الثاني 2 - بقلم لولو محمد

الصفحة الرئيسية

  رواية سلف و دين كاملة بقلم لولو محمد عبر مدونة دليل الروايات 


 رواية سلف و دين الفصل الثاني 2

ندى / انا عاوزه انام

مصطفى / هى اللى عصبتنى هى اللى

ندى تنام و تشد الغطا على راسها و تعيط

مصطفى / مش هعمل كدا تانى اوعدك انى هتحكم فى اعصابى بعد كدا اوعدك يا ندى انى مش هعمل كدا تانى

ندى تقوم تقعد و هى بتعيط

ندى / كل مره تعمل كدا اوعى تفتكر انى مباخدش بالى اوعى تفتكر انى بصدق انها خبطت راسها فى الكومدينو و هى نايمه زى مبتقولى انا معدتش صغيره انا بقيت بفهم كل حاجه

مصطفى يطبطب عليها و يخرج و هى تنام و هى بتعيط

………………………….

فى المحل

عمر معدى من قدام المطعم

صاحب المحل / عمر عمر

عمر / ايوه يا حج

الراجل / ايه يابنى اخوك فين قالى هيغيب ساعتين يروح الكليه مجاش لحد دلوقت وورديته كلها ساعه و تبدا و زميله مش هيغطيه

عمر / معرفش والله يا حج انا هكلمه عالموبايل

الراجل / كلمته عشرين مره تليفونه مقفول

عمر يتصل

عمر / مقفول برده يا حج

الراجل / ربنا يجعل تاخيره خير دا عمره معملها دانا بظبط الساعه على مواعيده

عمر يبص لفوق يلاقى ندى واقفه فى البلكونه بتبص عليهم ووشها حزين

عمر / عن اذنك انا يا حج

الراجل / اتفضل يابنى

عمر يبص فى ورق فايده و يروح مكتبه تصوير عالناصيه يصور و بعدين يطلع عماره ندى و يخبط ابوها جنب الباب يقوم يفتح

مصطفى / اهلا اهلا استاذ عمر اتفضل اتفضل

ندى تدخل جرى مالبلكونه ووشها مخطوف و مخضوضه

عمر / انا صورت سكشن للانسه ندى و هى نسيت تاخده منى فقولت اديهولها بدل منسى و لا يضيع اسف عالازعاج

مصطفى / فيك الخير والله يابنى اتفضل اتفضل

ندى تروح تقف عالباب تليفون مصطفى يرن

مصطفى / ثوانى ارد عالتليفون

مصطفى يمشى

عمر / ندى متعرفيش على فين تليفونه مقفول و مروحش لحد دلوقت

ندى / و انا اش عرفنى و انا المحامى بتاعه

عمر / لا بس انتى اخر حد شافه

ندى / و سابنى و مشى روح دور على اخوك فى حته تانيه اكيد مش هخبيه فجيبى يعنى و لا ادخل دور عليه يمكن مخبياه فى الدولاب مثلا

عمر / انا اسف

مصطفى يدخل

مصطفى / كان واحد صاحبى عاوزنى اسهر معاه

عمر / الورق

مصطفى / الله من عالباب كدا يابنى ادخل ارتاح شويه

عمر / فرصه تانيه عن اذنكوا

عمر يمشى و هو بيبص على ندى و هى باصه الناحيه التانيه و الورق مع مصطفى يقفل الباب ندى تدخل الاوضه امها تطلع

امها / مين يا مصطفى

مصطفى / عمر المعيد بتاع ندى و جارنا جايبلها ورق اللى فاتها لما روحت بدرى

امها / والله فيه الخير

مصطفى / دا شاب محترم جدا الحاج انور صاحب المطعم بيشكر فيهم اوى بيقول انه مربيهم على ايديه

امها / انت بتتكلم جد يا مصطفى

مصطفى / تفتكرى يا مها بيعمل كدا مع كل الطلبه اللى عنده و لا ندى ليها معامله خاصه

مها / يا سلام و هو كل واحده تغيب من الكليه هيروحلها البيت و يديها الورق بنفسه و بعدين انت اكبر من كدا كان ممكن يبعته مع اى حد او يستناها بكره تلاقيه يعنى الله انت فاهم بقى كلها تلاكيك الله يرحم اما كنا شباب

مصطفى / متفكرنيش ياختى

مها / كدا … ماشى على العموم الاحتياط واجب ابقى اسال عنه برده اهو على الاقل يوم ميجى يتقدم نبقى عارفين راسنا من رجلينا

مصطفى / اوام عملتيه يتقدم

مها / هو يطول جته وكسه توكسه

مصطفى / ههههههههههههههههههه يخرب عقلك انا نازل اقعد عالقهوه حاولى تتكلمى مع ندى و تطيبى خاطرها

مها / متنساش بس اللى قولتلك عليه

مصطفى / حاضر لحسن انا عارف مش هخلص من زنك

………………………….

فى شقه أية

امها بتتكلم مع الراجل اللى كان بيضرب عمر بالحزام

امها / متنساش فلوس دروس أية

الراجل / و انا من امتى نسيت على الله بس هى تركز السنادى و تجيب مجموع عدل بدل مالواحد حاسس ان شقاه السنه اللى فاتت راح عالفاضى

امها / بلاش الكلام ده ياخويا انا و انت عارفين كويس ظروف البت الله يعينها

الراجل / الله يعينا جميعا

امها / لسه بتلوم نفسها على عمر

الراجل يبص الناحيه التانيه

امها / اقول ايه بس مكنتش غلطته و لا غلطتها هما مهما كانوا عيال

الراجل / كفايا يا سمر

سمر / انا عارفه ان فراقه واجعك بس والله مكنت اعرف انك هتطرده انا كنت فكراك هتعاقبه و تفهمه بالراحه

الراجل / و انا مكنتش عارف ان فراقى كان سهل عليه اوى كدا و كانه مصدق

سمر / انا و انت عارفين ان اللى وجعك انه راح لعلى

الراجل / مش عاوز اسمع اسم الكلب ده تانى

سمر / خلاص خلاص حقك عليا

الراجل / انا هنزل المحل و باذن الله ربنا يبعت للبت رزقها متشيليش انتى هم

سمر / و هو فى واحده تبقى متجوزه راجل زيك و تشيل هم

الراجل / تعيشى يا اصيله يا بنت الاصول

……………………….

فى شارع على بالليل

على بيمشى بالعافيه يرفع عينه يشوف ندى بتبص عليه و اول معنيهم تيجى فبعض تدخل و تقفل البلكونه يبصلها بحزن و يعدى من قدام المحل انور يقابله

انور / كنت فين طول اليوم يا على دى اصول شغل يابنى انت لانك اول مره تعملها ………….

على يديله ورقه

انور / سلامتك يابنى مالك طب اطلع ارتاح يا سعيد … سعيد … سند اخوك لفوق و انا شويه و هحصلك اطمن عليك

على يهز راسه و يطلع شقته عمر يقابله

عمر / كنت فين يابنى قلقتينى عليك اتصلت بيك مليون مره غير متاح فى ايه

على يقعد عالسرير

سمير / مالك ياسطى لونك اصفر كدا ليه

على / وقعت فى الشارع و لما فوقت لقتنى فى المستشفى و المحفظه و الموبايل و كل حاجتى اتسرقت

عمر / متصلتش بيا ليه يابنى كنت جيتلك .. ايه اللى حصل اصلا

على / بعدين يا عمر بعدين

انور يدخل

انور / سلامتك يا على يابنى فى ايه مالك

على / خير يا حج

سمير / اغم عليه فى الشارع وولاد الحرام نضفوه

انور / و لا يهمك يابنى المهم سلامتك

على / الله يخليك يا حج

انور / ارتاح انت لحد متقف على رجلك متشلش هم الشغل سلامتك بالدنيا … يلا يا سعيد

انور و سعيد يمشوا

عمر / احكى ايه اللى حصل

على / الدنيا اسودت فعينى اوى يا عمر عمرى كله راح هدر

عمر / ليه كل ده انت اتخانقت مع ندى و لا ايه معقول دانتوا كنتوا سمنه على عسل

على / ندى !!! اه يا عمر اقولك ايه بس انا مش عارف هبصلها باى وش بعد اللى حصل

عمر / لا ثانيه ثانيه كدا و مالاول و بالراحه و فهمنى ايه اللى حصل بينك و بين ندى اوعى ياد تكون اتهورت و عيلت معاها

على / ندى قالتلى ان اللى بينتحر بيموت كافر

عمر / و دى حقيقه

على يبصله و يعيط

عمر / ااااه فهمت

على / مقدرتش استحمل الفكره اصلا جريت و سالت شيخ فى الموضوع و حكتله كل حاجه و قالى ان ندى صح

على يعيط

عمر / اسمع يا على ربنا رحيم ارحم منى و منك ربنا اعلم بينا مننا انا متاكد انه هيرحم عبير هو عارف هى عملت كدا ازاى هو عارف مرت بايه هو عارف

على / انا وعدتها انا وعدتها يا عمر

عمر / متقساش على نفسك اوى كدا يا على ارحم نفسك بقى

على / يمكن لو كنت روحت بدرى شويه يمكن لو

عمر / على على اللى حصل مكنش ذنبك مفيش اى حاجه ماللى حصلت لينا لانا و لا عبير و لا حتى انت ذنب فيها لا طلاق امك و لا موت امى و لا موت عبير كان ذنبك بطل تلوم نفسك على كل حاجه حصلتلنا

على / هو بيلومنى مبيرضاش يبص فوشى و بسببى مبيرضاش يبص فوشك

عمر / بسبب أية و امها انت اخويا و مفيش حاجه فى الدنيا هتغير ده

على / انت لسه بتحبها يا عمر

عمر يرتبك

عمر / لا طبعا احب مين؟؟ ايه؟؟؟ بعد اللى عملته فيا انا كنت مستنى الغدر من اى حد الا هى كنت مستنى من امها اى حاجه لكن أية لا … لا يا على لا

على / انا اسف

عمر / انت عارف يا على مره سالت نفسى هو ربنا زعلان مننا فحاجه هو احنا غلطنا فى ايه عشان نشوف كل ده بس ايه اللى ممكن يكون غلط فيه عيل اربع سنين و عيله سنتين عشان يشوفوا كل ده ايه اللى ممكن يكون غلط فيه عيل ست سنين عشان يشوف كل ده و بعدين فمره اكتشفت ان ربنا بيحبنا اوى يا على هات اى اتنين غيرنا و خليهم يعيشوا اللى عيشناه و شوف الفرق لا انت طلعت كولجى و لا انا مجرم لحم كتافنا من خيرنا احنا مش من خير حد كل ضربه نزلت على ضهرنا قوتنا متكسرناش عمرنا مطاطينا لحد احمد ربنا يا على احمد ربنا

على / الحمد لله

على يحضن عمر و عمر يمسح دموعه

عمر / اتصل بندى و طمنها عليك زمانها قلقانه

على / ندى لو بصت فوشى بعد مسبتها و مشيت بالطريقه دى يبقى هتبص عشان تتف فوشى بس يا عمر

عمر / اللى بيحب بيسامح يا على و هى لما هتفهم هتسامح احكيلها ظروفك قولها الحقيقه هى هتفهم

على / بكره هروحلها الكليه و احاول اتكلم معاها

عمر / طب متكل… اه نسيت ان موبايلك اتسرق … ايه معكش الورقه اللى فيها النمره

على / معايا اصلا انا حافظ نمرتها بس هكلمها بانهى وش

عمر / كلمها يا على فهمها متخليهاش تنام زعلانه

على / اخاف اعملها مشكله يا عمر اخاف حد يرد

عمر / اه صح … بينى و بينك انا مش موافق عالوضع و بقول اننا ولاد اصول و الواجب نخش البيت من بابه

على / و انا كمان ناوى على كدا والله يا عمر

عمر / خلاص خلاص ارتاح انت دلوقت و الصباح رباح

……………………………

تانى يوم فى الكليه

ندى ماشيه مع نهى على يشوفهم

على / ندى ندى

نهى تبص لندى و تمشى خطوتين على يروح يقف مع ندى

ندى / خير عاوز ايه

على / ممكن اتكلم معاكى

ندى / مش فاضيه ورايا محاضره و انت بتعطلنى

على / هستناكى تخلصى

ندى / هروح بعد المحاضره علاطول مفيش داعى تضيع وقتك عالفاضى انا لو منك اجرى اشوف ورايا ايه احسن

على / انا كنت فى المستشفى امبارح

ندى / والله و انا المفروض اصدق يعنى

على / والله ده اللى حصل و دى تذكره المستشفى عشان لو مش مصدقانى

ندى / هى المستشفى بقت بتذاكر دلوقت و ياترى كانت من كام لكام

على / هى اسمها كدا اعمل ايه يعنى على فكره لو سمعتينى

ندى / بص يا استاذ على انا مش هنكر انى انا اللى اديتك رقمى

على / انا موبايلى اتسرق امبارح عشان كدا معرفتش اكلمك انا اسف انا بحاول

ندى / متحاولش من فضلك متحاولش و الحمد لله ان الموضوع خلص على قد كدا

على / انا بحبك يا ندى

ندى تبصله و تسكت

على / على الاقل اسمعينى اوعدك انك لو مسامحتنيش اوعدك انى هبعد عن طريقك اوعدك بس بالله عليكى وحياه اغلى حاجه عندك تسمعينى مره واحده

نهى/ ندى هنتاخر

ندى تبص لنهى و تبص لعلى بيبصلها باستماته تهز راسها لعلى و يروحوا يقعدوا

على يفتح محفظه و يطلع صوره بنت

ندى / مين دى حبيبتك القديمه

على / اختى

ندى تمسك الصوره

على / مش شبهى عارف هى احلى كتير … الله يرحمها انتحرت

ندى تبص للصوره بحزن

على / انا بحبك يا ندى و مقدرش اخسرك انتى الحاجه الحلوه اللى باقيه بحياتى انا بصحى كل يوم الصبح عشان اشوفك انا مش عارف ابدا منين بس بيتهيالى ان من حقك تعرفى كل حاجه عن حياتى يمكن لما تعرفى ترفضى تكملى معايا

ندى / ليه يعنى مالها حياتك

على / هحكيلك

///////////////////////////////////

من اربعتاشر سنه عيل عشر سنين واقف ورا ستاره و الراجل اللى ضرب عمر و سمر شايله عيله عندها سنه و ست تانيه واقفين بيتخانقوا فى الصاله

الست / يعنى ايه مراتك

الراجل / مراتى يعنى مراتى و اوعى من وشى

الست / اوعى فين مهياش داخله دا بيتى و بيت عيالى

الراجل / سكتناله دخل بحماره و لا ايه فوقى يا ست حنان البيت دا بيتى انا و انا اللى اقول مين يعيش فيه و مين يمشى و لو مش عاجبك الباب يفوت جمل و انتى عارفه انى مببكيش على حد

سمر / اهدى يا محمود هى برده معزوره انت ممهدتلهاش

محمود / ادخلى الاوضه اللى عاليمين جوه

حنان / دى اوضتى

محمود / هتنامى جنب العيال النهرده لحد الناس بتوع العفش ميجيبوا اوضه النوم الجديده نحطها مكان الليفنج

حنان / دى اخرتها يا محمود دى اخرتها تتجوز عليا

محمود / انا لا عملت حاجه غلط و لا حرام انا مخنتكيش انا اتجوزت على سنه الله ورسوله و ربنا يشهد انى مش هقصر ناحيتك فى حاجه

حنان / انت مصدق نفسك ازاى مخنتنيش ايه عرفتها من ساعه طلعتوا عالماذون و جبتها و جيت و لا بقالك فتره مخبى عليا انت لو مكنتش واثق انك بتظلمنى على الاقل كنت خيرتنى صارحتنى

محمود / و احنا فيها اديكى عرفتى دا باب الشقه و دا باب الاوضه اختارى الباب اللى يناسبك انا داخل انام

محمود ياخد سمر و يدخلوا اوضه و حنان تفضل ترزع على الباب

حنان / مش على سريرى مش على سريرى

الولد / ماما

حنان تبص وراها تلاقى تلت عيال بيعيطوا عيل 6 و عيل 10 و بنت 8 تاخدهم فى حضنها و تدخل اوضتهم

حنان / ايه انتوا صحيتوا حقكوا عليا

ولد 8/ مين دول يا ماما

حنان / نام يا عمر دلوقت نام و الصباح رباح

حنان تنيم الولدين جنب بعض و تنام جنب البنت و هى بتعيط

………………………

تانى يوم الصبح حنان واقفه فى المطبخ بتحضر الفطار سمر تدخل بقميص نوم احمر حنان تشوفها تضايق

سمر / ايه اول مره تشوفى قميص نوم

حنان / البيت فى اطفال بتفهم و ميصحش ابدا انك تلبسى قدامهم كدا

سمر / هههههههههههههههههههه و ماله قال يعنى القميص اللى مضايقك مش الحشو اللى جواه

حنان / لا القميص و لا اللى جواه يملو عينى

سمر / ميهمنيش يملو عينك يهمنى يملو عين محمود حبيبى

حنان / و ماله الغربال الجديد له شده برده

سمر / متبصليش كدا محمود حاكيلى عنك كل حاجه انا و انتى منختلفش كتير و لا نسيتى ام على و عبير

حنان / انا و انتى ملناش اى علاقه ببعض انا لما اتجوزت محمود كان مطلق و معاه ولد و بنت و مراته متجوزه ورمياهم متجوزتش راجل و خطفته من حضن مراته

سمر / محمود مش عيل صغير عشان يتخطف يا حبيبتى و بعدين بصى لنفسك و بعدين اتكلمى دا منظر ست ده مله حق يطفش طبعا و يتجوز عليكى

حنان / قسما عظما

البنت الصغيره تدخل

البنت / ماما انا جوعت

سمر / بسم الله ما شاء الله انتى بتخليهم يقولولك ماما

حنان / انا امهم غصب عنك و عن اى حد

محمود يدخل

محمود / فى ايه يا حنان بتزعقى كدا ليه

سمر / اللحقنى يا محمود دخلت اقولها اساعدك مسكت فيا و يا خطافه الرجاله و هاتك يا شتيمه و تهزيق اقسم بالله انا لو مكنتش عملالك اعتبار و خاطر والله مكنت سكت ابدا

محمود / حقك عليا يا حبيبتى خشى انتى شوفى أية بتعيط و انا ليا كلام تانى مع الست هانم

حنان واقفه فاتحه بقها

محمود / روحى يا عبير كملى لبس على ماما تخلص الفطار عشان متتاخريش عن المدرسه

الكل يطلع من المطبخ و حنان واقفه تبص لمحمود بحزن

محمود / انا لحد اللحظه دى عامل حساب للعيش و الملح اللى بنا دول برضه مكنوش عشره يومين دول سبع سنين بحالهم ربيتى عيالى و عملتيهم على انهم عيالك انتى و خدتى بالك منى

حنان / و مدام عارف ده ليه تعمل فيا كدا

محمود / اعمل ايه يا حنان انا برده راجل و ليا احتياجاتى هو انا مش كان ممكن اتجوزها فحته تانيه اقطع من فلوسك انتى و العيال و اجرلها شقه

حنان / لا ازاى انت تجيبها هنا و تنيمها ففرشتى و سريرى و بعدين انا بتكلم فى ايه حقك طبعا مانا لو كان ليا حته تانيه اروحها مكنتش هتقف بكل ثقه امبارح و تقولى مش عاجبك امشى لو اضمن انك هتسبلى عيالى و مش هتحرمنى منهم زى ما عملت فى ليلى

محمود / قولتى ايه

حنان / مقولتش حاجه مفيش منه فايده الكلام

محمود / انا ظلمت ليلى انا اللى حرمتها من عيالها انا

حنان تبص فى الارض و تعيط

محمود / من النهرده يا حنان انتى ملكيش عيش معايا متلزمنيش بس عشان انا عارف كويس انك ملكيش حته تانيه تروحيها و لا باب رزق ياكلك انا هسيبك تعيشى هنا تربى عيالك و تاكلى و تشربى

حنان / دى اخرتها

محمود / عيشى بلقمتك يا حنان و حاولى على قد ما تقدرى تبعدى عن عنيا عشان ما قولكيش كلام يوجعك اكتر

حنان / هو فى كلام اكتر من كدا يا محمود فى وجع اكتر من كدا

محمود / فى متستفزنيش اقولك اكتر

محمود يجى يطلع من الباب يلاقى على واقف حنان تقعد تعيط فى الارض على يجرى يحضنها

على / ماما هو انتى كمان هتسبينا

حنان / انا عمرى ما اسيبكوا يا حبيبى

على / ماما عشان خاطرى متمشيش عشان خاطرى

حنان / بس يا على بس ..على انا عاوزه اطلب منك طلب

على / ايه

حنان / اوعدنى انك هتاخد بالك من اخواتك اوعدنى انك

على / انتى هتمشى

حنان / لا يا حبيبى مش همشى همشى اروح فين انا بس بوصيك عليهم محدش عارف بكره مخبيلنا ايه

على / انا هتكلم مع بابا هقوله انى زعلان منه هقوله يصالحك

حنان / لا يا على لا روح مدرستك خد اخواتك و روحوا المدرسه اتعلموا اتعلموا عشان متتحوجوش فيوم لحد خد بالك من اخواتك خد بالك من عمر

على / حاضر

حنان تاخد على فى حضنها و هى بتعيط

……………………………

بعد فتره محمود واقف فى البلكونه يسمع صريخ سمر يدخل يجرى يلاقى سمر بتضرب فى على و حنان بتحاول تحوش

حنان / سيبى الولد سيبيه

سمر / انتى اللى سلطتيه انتى اللى بعتاه

محمود / فى ايه

حنان و سمر يقفوا و على يجرى على حضن ابوه

سمر / وقع أية من السرير كان عاوز يموتها

حنان / قالك غصب عنه قالك كان بيسكتها

سمر / طبعا لازم تدافعى عنه تلاقيكي انتى اللى مسلطاه يقتلها عشان تحرقى قلبى

حنان / و احرق قلبك ليه يعنى

محمود / ايه اللى حصل يا على

…………………….

سمر / انت بتساله ؟؟ انت مش مصدقنى

محمود / لو سمحتى يا سمر

على / والله كانت بتعيط و طنط كانت فى الحمام شلتها عشان تسكت اتكعبلت فى السجاده وقعت

حنان / انا دخلت لقيته واقع على ضهره و أية فى حضنه البنت سليمه شوفها بنفسك

سمر / و احنا هبل بقى هنصدق الكلام ده مجاش ندالك ليه مراحش ندى محمود ليه انتى اللى سلطتيه يعمل كدا فى بنتى

محمود / ادخل على اوضتك يا على

على يمشى

سمر / ايه يعنى ابقى اخدها معايا و انا داخله الحمام يعنى و لا على ايه بناقص استحمى خالص خلينى اعفن زيك

حنان / مين دى اللى معفنه يا زباله

محمود / حنان

حنان / انت بتكلمنى انا انت مسمعتهاش ياخى اتقى الله بقى اتقى الله

محمود / خلاص

حنان تمشى سمر تاخد أية و تقعد تعيط محمود يقعد جنبها

محمود / بتعيطى ليه

سمر / انا مكنش المفروض اوافق على الجوازه دى كلهم قالولى عمرك ما هتتفقى مع مراته دا حتى عيالك مش طايقينى و خصوصا على بس الحق مش عليهم هى اللى طول الوقت تشحنهم ضدنا و تقولهم عنى كلام وحش دا حتى عبير اللى ما طلعتش من البيضه سمعتها بتتكلم مع عمر عنى و تقوله الساحره الشريره عملت لبابا عمل و خطفته من ماما و لازم نلاقى حل عيله زى دى تعرف منين الاعمال و السحر يعنى اكيد ست حنان هانم

محمود / خلاص خلاص حقك عليا

سمر / ربنا يعلم انى من يوم ما دخلت البيت ده و انا بحاول اكسبهم ربنا يعلم انى عمرى ما حاولت اعمل مشاكل و ان اهم حاجه عندى راحتك باماره فاكر لما قولتلك اديها يوم على الاقل عشان حق ربنا فاكر انا لو بعمل مشاكل كنت طلبت منك كدا

محمود يبوس راسها

سمر / انت عارف ان ما كانش قصدى اضرب على بس انا ام و منظر بنتى و هى مفلوقه من العياط خلانى انفعل

محمود / خلاص حصل خير

سمر / محصلش يا محمود محصلش من النهرده لا مراتك ليها دعوه ببنتى و لا انا ليا دعوه بمراتك و عيالك

محمود / مكنش ده اتفاقنا احنا اتفقنا نبقى عيله

سمر / حاولت على يدك بقالى قد ايه بحاول اديك شايف

محمود / اصبرى بس

سمر / يا محمود انا عارفه الظروف و عمرى ما هقولك هاتلى بيت لوحدى بس على الاقل انا ليا اوضتى و مش هخرج منها كفايا انى داخله على اوضه قديمه ووعدتنى انك هتجيب اوضه جديده و مجبتش حصل و لا لا

محمود / الله مش انتى اللى قولتى ملوش لزوم و الشقه كدا حلو و انا و هى واحد و مفيش تكليف

سمر / و ياريته عاجب

محمود / ايه اللى يرضيكي يا سمر

سمر / متزعلش منى انا بتكلم بس فى ساعه نرفزه انا اللى يرضيك يرضينى

محمود / و انا مرضالكيش بوضع مش عاجبك من النهرده فصل قوات صباح الخير يا جارى انت فى حالك و انا فى حالى

سمر تبتسم بخبث

……………………………..

فى اوضه الاولاد

حنان قاعده جنب عبير على السرير بتساعدها فى عمايل الواجب و على و عمر قاعدين على السرير التانى بيعملوا واجباتهم محمود يدخل

محمود / فى كرتون فى التليفزين اطلعوا اتفرجوا عليه و بعدين تعالوا كملوا الواجب

التلت عيال يطلعوا من الاوضه

حنان / خير وزعتهم ليه

محمود / انتى زعلانه عشان اتجوزت عليكى حقك لكن أية ذنبها ايه هى فكرت فى مره تاذى العيال

حنان تبتسم بتنهيده

محمود / كلمينى قوليلى لو حاولت مره قوليلى

حنان/ ما تسالنيش انا عيالك عندك اسالهم من ورايا و بعدين انت بتتهمنى بايه انى هاذى عيله بترضع لسه انت بتتكلم جد يا محمود انت شايف انى انا ممكن اعمل كدا فعلا

محمود / حنان اللى اعرفها عمرها ما تعمل ده

حنان / تمام تمام مفيش مشكله حقك عليا اعتبرها وزه شيطان و اوعدك انها مش هتحصل تانى ان شاء الله فى اى حاجه تانى يا محمود

محمود / لا شكرا

حنان متقدرش تمسك دموعها و تعيط

حنان / انا غلطت فى ايه قصرت معاك فى ايه قولى قولى بتعمل فيا كدا ليه

محمود / حنان

حنان / ياخى دانا عشت سبع سنين خدامه تحت رجليك عمرى ما رفضتلك طلب عمرى ما قصرت معاك دا جزاتى انا اسفه اسفه خلاص

محمود يمشى و يقفل الباب و حنان تكمل عياط

……………….

بعد فتره

حنان فى الحمام و العيال قاعده بتتفرج على التليفزيون سمر تجيب طبق لب و سدانى و تقعد تاكل و ترمى القشر فى الارض

على / عيب كدا ماما لسه منضفه

سمر / انت هتعلمنى العيب و اللى مش عيب

على / اللى بيوسخ حاجه لازم ينضفها

سمر / لو مش عاجبك نضفها و ما تصدعنيش بدل قسما عظما اكسر عليك شماعات الدولاب كلها

على / انا هقول لبابا

سمر / انتى يا بت تعالى هنا

على / اسمها عبير متقوليلهاش يا بت

سمر / اقولها اللى انا عاوزه اقوله يابن الوارمه ليها حق ترميكوا فى الزباله

على / يلا يا عبير يلا يا عمر ندخل اوضتنا

سمر / انتى يا بت بقولك تعالى هنا

على / قولتلك مسمهاش بت

سمر تزق على و تشد عبير و تقلعها الحلق من ودانها

سمر / دا اللى ناقص تلبسى نفس حلق بنتى قال اش جاب لجاب يا بنت المقشفه

حنان تطلع من الحمام تشوف المنظر تشد عبير من تحت ايدها و الحلق فى ايد سمر و على بيحاول ياخده منها و عمر واقف فى جنب بيعيط

حنان / هاتى حلق عبير

سمر / يلا يا بت من هنا مش ناقصه دوشه

حنان / انتى فاكره نفسك ايه هاه

سمر تمسك طبق اللب تشحطره على السجاده

سمر / نضفى الارض

حنان / اللى اختشوا ماتوا صحيح

سمر / طب بما انك عايشه يعنى الحال من بعضه

الباب يتفتح و محمود يدخل سمر تجرى عليه و هى بتعيط

سمر / اللحقنى يا محمود اللحقنى مراتك و العيال ملمومين عليا

على / كدابه هى اللى شتمتنى انا و عبير و سرقت الحلق بتاعها

سمر / محصلش دا حلق أية انت اللى جايبهولها بنفسك يا محمود مراتك كانت عاوزه تاخده منى

حنان / صحيح اللى اختشوا ماتوا فعلا

سمر / انتى ايه اللى دخلك اوضتى اصلا و ليه بتفتشى فدهبى هاه انطقى

محمود / حصل يا حنان الكلام ده

حنان / ده حلق عبير بص على ودنها بنفسك هتلاقيها فاضيه

سمر / ملعوبه يعنى

حنان / للاسف موهبتى متجيش حاجه جنبك

محمود / انا تعبت منكوا والله اوعوا اوعوا دا مش بيت دا مرستان

سمر / و على ايه اتفضلى خدى الاتنين بناقص خالص

سمر تحط الحلق فايد محمود و تدخل الاوضه تعيط محمود يحط الحلق فايد حنان و يدخل يجرى ورا سمر

حنان / انهى حيه دى انهى بلوه دى بس

………………..

فى اوضه سمر

سمر / دا اللى ربنا قدرك عليه دانا كنت فكراك هتحطها عند حدها هو ده اللى أية زيها زى ولادك هو ده اللى مش هتفرق بينهم

محمود / انا هجيبلها احسن منه

سمر / هات هات بدل الحلق عشره و خليها تدخل و تقلبهم واحد و را التانى

محمود / حنان مش حراميه انا متاكد انها اتلخبطت فى الحلقان

سمر / والله طب استنى

سمر تروح تفتح الدولاب و تطلع شكمجيه و توريهاله

سمر / فين حلق البت بقى اللى انا حطاه هنا بايدى و بعدين حلق بنتها ضاع ماشى مقولناش حاجه تتلخبط لكن تدخل اوضتى و تفتح دولابى و تطلع دهبى و تدور فيه و تاخد لا دا اللى كتير اوى

محمود / صبرنى يارب

سمر / امين امين امين

محمود / يا حناااااااان

حنان تدخل

حنان / افندم

محمود / انتى دخلتى الاوضه هنا

حنان / ايه فى الدنيا ممكن يدخلنى هنا يعنى

سمر / الحلق ده بتاع بنتى محمود جبهولها بنفسه انا اللى منقياه بنفسى اصلا

حنان / نقيتيه ازاى دا جايبهولها فى عيد ميلادها اللى فات … انت كنت تعرفها من ايام عيد ميلاد عبير يا محمود

محمود / متغيريش الموضوع يا حنان دخلتى الاوضه و لا لا

سمر / اه نعرف بعض و جاب يوميها الحلقين واحد ل أية وواحد لعبير

حنان / مدخلتش يا محمود ممكن امشى بقى

محمود / رجعى الحلق لصحبته يا حنان و دورى على حلق عبير انا متاكد انه وقع منها هنا و لا هنا و لو ملقتيهوش انا هبقى اجيبلها واحد تانى .. اقولك هاتيه انا هبيعه و اشترى حلقين تانين خالص ارتاحتوا كدا

سمر / و ماله

محمود / ممكن انام بقى و لا فى حاجه تانى

حنان / طب انت خلصت موضوع الحلق بالنسبه بقى لحق العيال عندها

محمود / مالهم العيال

حنان / كلف نفسك مره واحده و اسمع لعيالك

سمر / و ياترى محفظاهم ايه بقى يقولوله

حنان / دلوقتى عيالك بقوا كدابين على العموم متشغلش بالك و مبروك عليكى الحلق

حنان ترمى الحلق تحت رجلين سمر

محمود / حنان

حنان / نعم اؤمر

محمود / اعتزرى

حنان / من ايه على الاقل انا رميتها بالدهب مش بشويه لب و سدانى اصل كل واحد بيرمى بمقامه

محمود / حنان

حنان / محموقلها اوى هاه ايه خايف تنيمك على الكنبه و لا ايه يا سبعى

محمود يلطش حنان بالقلم

حنان / انت بتضربنى عشانها

محمود يشد حنان بهدوم البيت و يشدها لباب الشقه و يقفل الباب العيال بتعيط و تصرخ

عمر / ماااااااما

محمود ينفخ و يفتح الباب يلاقيها واقفه بتعيط و مصدومه العيال يجروا عليها تاخدهم فى حضنها و تبص لمحمود

محمود / لاخر مره بحذرك عيشى و ربى عيالك عشان دى اخر مره افتحلك باب بيتى يا حنان عيشى و ربى عيالك

حنان / حاضر

محمود / ادخلى

حنان تدخل مع العيال تبص تلاقى سمر واقفه مبتسمه بسخريه

////////////////////////////////

على يحط ايديه على وشه ندى تمسك ايده

على / تانى يوم الصبح جينا نصحيها لقيناها ميته مقدرتش تستحمل ماتت

ندى تبصله بحزن و عنيها كلها دموع

على / انتى بتعيطى دا الفتره الحلوه اللى فى حياتى خلصت الحنيه ماتت

ندى / كفايا يا على

على يمسح دموعه

على / الله يرحمها كانت ارحم من امى كانت ارحم من كل اللى قابلتهم فى حياتى عمرى ما حسيت فى لحظه انها مرات ابويا ما كنتش اعرف يعنى ايه مرات الاب الا لما ماتت و سابتنا لمرات ابونا تبيع و تشترى فينا

نهى تدخل و تقف بعيد

ندى / المحاضره خلصت و لازم اروح

على / انا بحبك يا ندى و انا اسف على كل اللى حصل امبارح بس والله …

ندى / انا لازم امشى

……………………………..

على القهوه فى الشارع

انور / هههههههههههههههههههه قلبك اسود يا جدع بس متتعشمش انى هخليك تكسب النهرده كمان هعلم عليك

مصطفى / انا حظى امبارح كان نار فى الطاوله

انور / امبارح كان يوم صعب فى المحل على مجاش و الشغل اتكوم

مصطفى / متقولش يا انور ايه الشغل هيقف على واحد و لا ايه

انور / الواحد ده لو على اه يقف الواد ده فنان تربيتى شارب الصنعه من صغره و حاببها و بيديها و اللى يحب شغله يبدع يا مصطفى دا حتى الزباين بيجوله مخصوص و لو مش هو بيطلبوا اى حاجه تانيه فنان بقولك

مصطفى / ههههههههههههههههههههه والله انت اللى عامله قيمه ايه يعنى واقف بيعمل ايه بيقطع الشاورما و يعبى السندوتشات

انور / ههههههههههههههههههه يخرب عقلك انت فاكرها سهله كدا دى وقفه ستاشر ساعه قدام النار صيف شتا و محتاجه مجهود و تركيز لحسن الشاورما تكون نيه او محروقه و ملوه السندوتش اقولك ايه بس اللعب اللعب

مصطفى / صحيح يا انور هو العيال دول عندك من البلد

انور / لا من هنا من مصر

مصطفى / يا راجل دانا قولت انك جايبهم من البلد عندك زى باقى العمال

انور / لا على الله يعينه ابوه و امه اطلقوا و هو صغير و جه يتحايل عليا اشغله اديتله حسنه عيط و رجعهالى و قالى انا مش شحات انا عاوز شغل و مشى تصدق و تؤمن بايه انا لو هشغله مكانى هشغله نديت عليه و دخلته المطبخ و قولتلهم يشغلوه اى حاجه مسابش حاجه الا لما اشتغلها عمره مستكبر على شغلانه غسل صحون و نضف الارض لحد مبقى زى مانت شايف كدا

مصطفى / و عمر… عمر يا انور

انور / فيوم على مجاش الشغل و تانى يوم جه مزرق على الاخر و تشوفه تقول الواد ده هيموت و قالى انه ملوش مكان يبات فيه بقيت اقفل عليه المحل و اروح بعدها بمفيش شهر و لا يمكن اقل لقيته جايب عمر و بيقول انه اخوه و بقى يبات معاه فى المحل و يروح الدروس الصبح و يسهر يزاكر بالليل و فى الاجازات يشتغل يجيب مصاريف دروسه بصراحه استجدعتهم اجرت الشقه اللى فوق للعمال و بقوا عايشين فيها

مصطفى / يناموا على الارض ليه ملهمش عيله

انور / مقطوعين من شجره بس شوف بسم الله ما شاء الله عمر بقى معيد و على بقى ايدى اليمين عيال ولاد حلال شوف انت اى اتنين غيرهم كان زمانهم ايه دلوقت

مصطفى / معجب بيهم انت اوى العيال دى

انور / تصدق و تؤمن بايه

مصطفى / لا اله الا الله

انور / انا لو عندى بنتين كان زمانى جوزتهم للعيال دى بس تقول ايه ربنا مكرمنيش بالخلفه يلا بقى امر الله نعمل ايه

مصطفى / اللعب اللعب

…………………………….

فى شقه عمر

عمر / يعنى اتصالحتوا و لا لا

على / مش عارف

عمر / طب حكيتلها زى متفقنا

على / حاولت احكى بس ملحقتش الوقت عدى بسرعه اوى

عمر / ملحوقه

على / مش معقول هفضل كل يوم اضيع عليها المحاضرات عشان احكيلها تاريخ حياتى يعنى

عمر / ابقى اختصر يا على لخص فى الملخص

على يمسك الموبايل و يبعت رساله

……………………….

فى اوضه ندى

ندى قاعده بتزاكر تجيلها رساله

ندى / هتروحى الكليه بكره ؟؟…. لا بكره اجازه

تجيلها رساله تانيه

ندى / يعنى مش هشوفك ؟؟؟ ….. نهى بتقول انك بتافلم عليا

تجيلها رساله تدحك

ندى / مليش دعوه براى نهى انا بحبك انتى مش نهى

مها تفتح الباب و تدخل

مها / ادخل

ندى تقفل الموبايل و تقوم من على المكتب و تقعد على السرير

ندى / طبعا يا ماما

مها / كنتى بتلعبى فى الموبايل و لا ايه

ندى / يعنى كنت بحاول اظبط لسته اغانى عشان اشغلها جنبى

مها / ربنا يوفقك يابنتى .. انا كنت عاوزه اتكلم معاكى امبارح بس

ندى / ماما خلاص انسى بالله عليكى

مها / انا عارفه اننا وعدناكى اننا هنحل مشاكلنا بنا بس انتى جيتى بدرى

ندى / والله … خلاص حاضر هتصل بيكى و انا على ناصيه الشارع عشان تبداو تمثلوا

مها / حقك عليا

ندى / انا اللى مش قادره افهمه مدام كارهين بعض اوى كدا ليه مكملين ليه كل واحد ما يروحش فى حته

مها / عشانك يا ندى

ندى / عشانى ؟؟؟ يعنى دلوقت بقيت انا السبب فى تعاستكوا

مها / يابنتى احنا فى مجتمع ما بيرحمش لا بيرحم المطلقه و لا عيالها خصوصا لو كانت بنت

ندى / ميولع المجتمع اللى يخليكى تستحملى الضرب و الاهانه دى كلها

مها / هتقولى كدا لما اهل جوزك يعايروكى بيا و يقولولك يا بنت المطلقه هتفهمى ساعتها ظروفى و الكرامه لما ابوكى يوحشك و لا لما تحتاجى حاجه و مقدرش اوفرهالك يابنتى انا

ندى / انتوا اتجوزتوا ازاى يعنى ايه اللى وصلكوا للمرحله دى يعنى لو مفيش مفر على الاقل تحاولوا تصلحوا نفسكوا لنفسكوا على الاقل

مها / ياما حاولنا و بنحاول و هنحاول عشانك على فكره انا و ابوكى كنا قصه حب يتحكى عنها افلام و حكايات

ندى تبص الناحيه التانيه

مها / ابوكى ده كان مدوخ بنات مصر كلها وراه اقولك ايه بس هههههههههههههه مكنش فى بنت تشوفه الا لما تقع فى حبه من اول نظره لحد ما اتقابلنا فى فرح واحده صاحبتى على واحد صاحبه و من يوميها و هو دخل حياتى و مخرجش اقولك ايه بس هدايا و زيارات و جوابات حب و حتى بعد الجواز عشنا احلى شهر عسل بس مع الوقت بقى و الروتين مخدناش بالنا غير و احنا على الوضع ده

ندى تبص فى الارض

مها / تعرفى يا ندى يمكن انتى شايفه انا و ابوكى مبنحبش بعض لكن تصدقينى لو قولتلك انك لو خيرتينى بين ابوكى و الدنيا هختار ابوكى

ندى / و هو

مها / هيختارنى

ندى / واثقه اوى يعنى

مها / بكره الايام تثبتلك

صوت باب يتفتح

مها / ابوكى جه هقوم احطله العشا و انتى كملى مزاكره لحد مناديكى

ندى تهز راسها و مها تطلع بره

…………………………………..

فى المحل بتاع محمود

عمر يدخل

عمر / السلام عليكم

محمود / اؤمر

عمر / ازيك يا بابا

محمود / حضرتك غلطان انا مخلفتش عيال

عمر / اممم انا بقيت معيد على فكره فى الكليه

محمود / اطلع بره و متخلنيش اشوف وشك تانى روح ارجع من مطرح مجيت

عمر / ماشى

عمر يطلع فلوس

عمر / انا عاوز موبايل جديد

محمود / شطبنا بطلنا نبيع روح اشترى من حته تانيه

عمر / هتفضل لحد امتى رامى لحمك فى الشارع هتفضل لحد امتى تظلمنا كدا هتفضل لحد امتى تبيع الغالى و تشتري الرخيص

محمود / اطلع بره بقولك اطلع بره

محمود فضل يزق عمر بره و فجاه يمسك قلبه و يقع فى الارض و عمر يسنده

……………………….

فى الكليه

نهى / عشان تبقى تصدقينى

ندى / مش قادره اقتنع

نهى / دى التمثيليات التركى و الهندى اللى انتى بتتفرجى عليها ليل نهار هى اللى كلت عقلك و بعدين يا بنتى على ده حيطه سد لا شقه و لا عربيه و لا حتى عيله يعنى ان كنتى عاوزه تحبى عشان تخرجى من قرف البيت عندك مينفعش ترمى نفسك فى بلاعه بصى يا بنتى فاقد الشئ لا يعطيه و دا انسان زى ما قولتى ملاقاش عيله و لا اب يعلمه ازاى يكون اب

ندى / بس هو …

نهى / انتى مش لسه قايله ان ابوكى كان بيجرى ورا امك و اتجوزها عن حب يابنتى فوقى الحب بيموت انتى عاوزه ولادك يشوفوا اللى انتى شوفتيه و لا حتى اللى هو شافه يابنتى فوقى

ندى / و الحل يعنى

نهى / انسى على خالص يابنتى فوقى ان مكانش العريس جاهز و هيريحك يبقى بناقصه

ندى / و هعمل ايه بالفلوس لو هو وحش

نهى / اولا هتعملى كتير جدا يعنى لو انشغل عنك مش هتحسى بفراغ هتاخدى المحفظه و تنزلى تعملى شوبينج تروحى الكوافير تدلعى نفسك فمش هتعجزى بسرعه فمش هيطفش بدرى بدرى ثانيا عيالك هيدخلوا احسن مدارس و هياكلوا احسن اكل و اشتراك فى النادى و مش هيتبهدلوا فى المواصلات ثالثا لو طلع واطى و ابن كلب هتطلقى و تبقى طلعتى بقرشين بدل متطلعى بالضغط و السكر

ندى / و هعمل ايه بالفلوس بعد كدا يا فالحه مدام ربطت نفسى بواحد تعسنى

نهى / و انتى ضامنه اوى ان سى على ده هيسعدك اصلا تضمنى ان سى على ده هيكمل معاكى اصلا و انه مش بيتسلى فتره و بعدين يحلقلك

ندى / يووووه معرفش بقى معرفش

نهى / اسمعى منى يا ندى الدنيا دى مبتمشيش من غير الفلوس اصلا شوفى تلتربع خناقات ابوكى و امك سببها ايه … متفكريش الفلوس طبعا

ندى / انا مروحه

نهى / و السيكشن

ندى / يووووه هروح الكافتريا اجيب حاجه اشربها اتخنقت

نهى / انتى اللى خانقه نفسك بلا حب بلا رومانسيه بلا قرف كلو محصل بعضوا

…………………………..

فى المستشفى

سمر / انت طلعتلنا من انهى مصيبه يا اخى

عمر / انا مليش كلام معاكى

عمر يبص الناحيه التانيه يلاقى أية بتبص عليه و على جاى يجرى من بعيد

على / فى ايه ايه اللى حصل

سمر / و ادى المصيبه التانيه حلت على دماغنا

على / احترمى نفسك

سمر / و انت اللى هتعلمنى الاحترام بقى ان شاء الله

عمر / على على مش وقته احنا فى مستشفى

سمر / قولوا لنفسكوا

عمر / بصى اللى جوه ده ابونا ماشى

سمر / هو مش معتبركوا كدا خلوا عندكوا دم و ابعدوا عننا بقى

على / نطمن عليه و هنمشى من نفسنا اصلا

سمر / كان بخير طول ما انتوا بعيد

على / كان بخير قبل ما تدخلى حياتنا كلنا كنا بخير

سمر/ بصوا شوفوا مين اللى بيتكلم اللى رمى اخته فى حضن راجل غريب

على يروح بغضب ناحيه سمر عمر يحوشه فى النص و يزقه بعيد

عمر / انساها انساها

دكتور يطلع من الاوضه جوه على و عمر يجروا عليه

الدكتور / المريض محتاج عمليه ضرورى

سمر / عمليه

على / تمام اى حاجه احنا مستعدين

سمر / حكم

على يبص لسمر و يمسك نفسه و ينفخ

الدكتور / تمام حد يروح الحسابات يحط مبلغ تحت الحساب

على / تمام حاضر

الدكتور يمشى و على و عمر يتوشوشوا

على / خليك جنبه هروح اجيب اللى فى الصندوق و اجى

عمر / و لو مكفاش

على / لو هبيع كليتى عشان ابويا هعملها يا عمر انت عبيط و لا ايه

على يمشى و عمر يبص وراه يلاقى أية واقفه بتبصله يبص الناحيه التانيه

أية / انا اسفه

عمر يطلع الموبايل و يحط الهاند فرى فى ودنه يغمض عينه و يشغل

سمر / صحيح اللى اختشوا ماتوا قاعد يسمع اغانى و ابوه تعبان … لا مش هستحمل

سمر تقوم تروح ناحيه عمر و تشد الهاند فرى من ودنه

عمر / اللهم طولك يا روح

سمر / بدل ما تقعد تسمع الاغانى روح الحسابات و شوف عاوزين كام لابوك و لا هو بق و خلاص قدام الدكتور

عمر / قال يعنى جت منك

سمر تهز ايديها فيها غوايش

سمر / لو عليا ما استخسرهمش فيه و اروح حالا الصاغه ابيعهم و اعالجه بيهم بس بما انكوا هنا و عاملين ولاده و رجاله ورونى هتعملوا ايه

عمر / الله يرحمك يا ماما لو كانت تعرف ان بعدها واحده زيك هتلبس دهبها اكيد كانت استحملت شويه

سمر / و انتوا حد يطيقكوا يلا بلا هم

سمر تروح تقعد و عمر بيبص عليها بحزن يبص الناحيه التانيه يلاقى أية بصاله يمشى و يروح الحسابات أية تمشى وراه بس بعيد

……………………….

قدام المحل

انور / اسمع يابنى لو احتجت اى فلوس كمان اتصل بيا اجيلك

على / كتر خيرك يا حج باذن الله هيكفوا

على يمشى

احمد / والله يا حج على ده غريب اوى بيجرى على ابوه بعد كل اللى عمله فيه

انور / اللى زى على ده يا احمد بيجى فى العمر مره ان كان هو و لا اخوه و اللى عمله فيهم ابوهم اكبر دليل انه راجل مش وش نعمه عشان يرمى نعمتين زى دول روح على شغلك يابنى روح روح

……………………..

فى المستشفى

عمر خارج من اوضه الحسابات يلاقى أية تشوفه تتعدل فوقفتها و يحاول يمشى تروح تمسك ايده

أية / انا قولتلهم الحقيقه

عمر يسحب ايده و يمشى و دموع أية تنزل على وشها

……………………..

فى شقه ندى

ندى تطلع البلكونه و تبص متلاقيش على واقف تبص على بلكونتهم متلاقيش حد تبص على الموبايل فى ايدها و تنفخ و تدخل تلاقى ابوها و امها بيتودودوا يسكتوا لما يشوفوها تبتسملهم و تدخل اوضتها و تقفل الباب

مصطفى / زى مقولتلك هو ده كل اللى قاله

مها / مهو قالك فى الاخر و طمنك لو عنده بنت هيجوزهاله و زى ما قولنا ان كان النهرده معيد و ما حلتوش بكره يبقى دكتور فى الجامعه و يركب احسن عربيه و مش بعيد يسافر بره و يقبض بالدولار كفايا انه هيساعد البت و مش بعيد يخليها معيده زيه و يبنوا حياتهم سوا

مصطفى / بس العيال ملهمش لا اصل و لا فصل يعنى تخيلى كدا يوم قرايه الفاتحه و لا الفرح ايه هناجرلهم معازيم

مها / انت بتقول ايه يا راجل دا كفايا دكاتره الكليه و زمايله المعيدين دول يشرفوا بلد

مصطفى / على العموم سبينى اخد و ادى مع نفسى فى الموضوع ده من هنا لحد ما يتقدم رسمى يحلها حلال

مها / ان مكنش النهرده يبقى بكره

مصطفى / ربنا يسهل

………………………..

فى المستشفى

قدام الحسابات

عمر / قولتلك مش هيكفوا

على / مش مهم انا هتصرف

عمر / على ….

على ياخد جنب و يتكلم فى التليفون سمر تروح تقف جنب عمر

سمر / عملتوا ايه يا رجاله

عمر يسيبها و يمشى بعيد أية تروح وراه

أية / عمر عمر

عمر / ايه عاوزه ايه

أية / دى مفاتيح بابا

عمر / و المطلوب يعنى

أية / اكيد المحل فيه فلوس

عمر / و دى بقى التهمه الجديده اللى بتلزقيهالى انى سرقت ابويا صح

أية / انا قولت الحقيقه يا عمر قولت الحقيقه

عمر / مبروك ابعدى عنى بقى خنقتينى

عمر يسيب أية و يبعد أية تتنهد يرجع عند على

على / كنت فين بدور عليك

عمر / عملت ايه

على / هعمل ايه يعنى كلمت الحج

عمر / ياربى دا مبلغ كبير ازاى تحرج نفسك بالشكل ده

على / قالى هيجيبه و يجى

عمر / معقول وافق

على / الحمد لله

عمر / تفتكر لما يفوق و يعرف اللى انت عملته عشانه …

على / انا مبعملش ده عشان يسامحنى انا مغلطتش فى حقه انا مظلمتوش انا عملت ده عشان ده وجبى ناحيته لو فى حد لازم يسامح التانى ياعمر يبقى انا اللى المفروض اسامحه على كل اللى عمله فيا … و فيك و فى عبير و ماما حنان …. احنا اللى لينا حق عنده

عمر / اهدى

على / هيبقى كويس مش كدا هيبقى كويس صح

عمر يحضن على اللى الدموع بدات تنزل من عنيه

عمر / ان شاء الله ان شاء الله

على يمسك الموبايل و يروح فى جنب و يتصل

على / انا اسف انى

ندى / مال صوتك

على / بابا فى العمليات

ندى / باباك ؟؟؟ هو باباك عايش

على / انا مش عارف اتصلت بيكى ليه بس حبيت اسمع صوتك انا اسف اوى انا هقفل

ندى / انت كويس

على / لا

ندى / تحب تتكلم معايا

على / اخاف اعملك مشكله

ندى / متخافش انا لوحدى فى البيت ماما و بابا راحوا يزوروا عمى ابنه نزل اجازه و راحوا يسلموا عليه

على / ما روحتيش معاهم ليه

ندى / مليش مزاج

على / ليه مالك

ندى / مليش عادى

على / انا اسف يا ندى بجد انى سبتك و مشيت بالطريقه دى اسف على كل حاجه

ندى / خلاص خلاص انسى ان شاء الله باباك هيبقى كويس

على / شكرا

ندى / عشان كدا ما كنتش فى الشغل طول اليوم

على / لا كنت بجرى على الورق اللى ضايع منى يعنى بعمل محاضر و كدا يعنى

ندى / حصل خير

على / كل حاجه بتبوظ فى وقت واحد

ندى / انت قدها

على / انا بحبك يا ندى

ندى تسكت

على / انا اسف

ندى / انا لازم اقفل يا على انا اسفه اوى

على / انا اللى اسف سلام

ندى / سلام

على يقفل يلاقى سمر واقفه وراه بتسمع يرفع حاجبه

سمر / يا عينى على الحب

على يبصلها من فوق لتحت و يسيبها و يمشى

………………………

بعد العمليه

انور / انا خلصت باقى الفلوس فى الحسابات و كلو تمام

على / انا مديونلك بكل جنيه

انور / انت ابنى يا على

على يبص الناحيه التانيه

سمر / روحى يا أية و اقفلى الباب عليكى بالمفتاح و اقفلى الترباس كمان و انا هبات مع ابوكى النهرده

على / ما تتعبيش نفسك انا هخلينى معاه

سمر / انت ناوى على موته مش كدا دا راجل لسه خارج من عمليه قلب يصحى يشوفك انت عشان يموت فيها صح

عمر / احنا ولاده

سمر / صح صح انا مراته و مش هتنقل من هنا

انور / انا رايى انك تروح ترتاح يا على و الصباح رباح

عمر / هخلينى انا يمكن بابا يحتاج حاجه

على / انا مش ماشى خلصت

انور / خلاص يا عمر روح انت تعال اوصلك

عمر / لو عوزت حاجه كلمنى

على يهز راسه انور و عمر يمشوا يطلعوا بره المستشفى عمر يشوف أية بتوقف تاكس

انور / تحب نوصلها

عمر يبصله و يبص فى الارض و يسكت

انور / بنتى … يا بنتى

عمر بصوت واطى / أية

انور / أية

أية تبص

انور / تعالى نوصلك بدل ما تروحى لوحدك

أية تبص لعمر يركب العربيه أية تجرى تركب وراه و انور يسوق

انور / ان شاء الله يخف و يبقى تمام

عمر / باذن الله

انور / ان شاء الله هيبقى كويس يا بنتى

أية تبصله و تبص فى الارض

انور / كليه ايه يا أية

أية / لسه …تالته ثانوى

انور / لا باذن الله خير علمى و لا ادبى

أية / ادبى

انور / ناويه على تجاره ان شاء الله زى اخواتك

عمر / محناش اخواتها

أية تبص من الشباك و تدارى وشها

عمر / حياله بنت مرات ابونا

انور / اااااام … هخش يمين من هنا صح

عمر يهز راسه

………………………….

فى المستشفى

على قاعد بره و سمر قاعده جنب جوزها يفوق

سمر / سلامتك يا محمود سلامتك ياخويا

محمود / الله يسلمك

سمر / ايه يا غالى كدا تخضنى عليك دا

محمود / أية فين

سمر / فى البيت

محمود / و عمر

سمر تبص الناحيه التانيه

سمر / اخص عليك و انا مش كفايا عليك و لا ايه

محمود / ربنا يخليكى يا ست الستات يا اصيله

سمر / انا عارفه انه مش وقت ادايقك فيه بس فى حاجه لازم تعرفها

محمود / خير

سمر / على

محمود يبتنهد

سمر / بلاش بلاش خلاص

محمود/ ماله

سمر / عمل خناقه كبيره على المفاتيح لما عرف انك فى العمليات

محمود يبص الناحيه التانيه

سمر / انا بعت المفاتيح للبيت مع أية و حلفتله انها مش معايا و لا اعرف مكانها بس اقول ايه عمل فيلم و حلف مهو ماشى الا لما ياخدها الحمد لله انك قومتلنا بالسلامه

محمود / مش قادر يستنى اما اموت عشان يورث كنت شوفت منه ايه عشان يورثنى الا ما فى مره جه و سال عنى مكفاهوش اللى عمله مكفاهوش اخته

سمر / خلاص يا غالى بقى كفايا كلام صحتك احنا من غيرك ما نسواش

محمود / فين الغوايش اللى فايدك

سمر / متدقش بقى ياخويا صحتك بالدنيا

محمود / هعوضك يا سمر هعوضك اول ما اقوم

…………………….

google-playkhamsatmostaqltradent