رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثالث و العشرون 23
مصطفى / ندى ما كانتش موافقه
حسام / ليه بقى ما كانتش موافقه عشان كان فى عيل صايع معلقها و ماشيه معاه فى الحرام
ندى تلطشه بالقلم على وشه
ندى / مش انا اللى اعمل الحرام الحرام انك تبقى عارف اننا مش متجوزين و تغتصبنى
صوت الناس يعلى
ندى / انك تحطلى المنوم فى العصير
حسام / امك اللى كانت بتحطهولك
مها / و انتا اللى بتجبهولى
ندى / ضربتنى و حبستنى و حملتنى غصب هددتنى انك هتدخلنى السجن او مستشفى المجانين و فى الاخر رمتنى بنزف فى قلب الصحرا و مشيت تنكر
حسام / انا شيطان و انتوا ملايكة مش كدا
ندى / خليك راجل لمره واحده فى حياتك و قول الحقيقه خليك راجل قدام نفسك على الاقل كنت بتنام ازاى و دمى فى رقبتك كنت بتنام ازاى
نور / ندى
ندى / نعم
نور / كفايه
ندى / دى بنتى ربنا ما رضيش انها تموت ما رضيش انى اموت عشان كنتوا هتفضلوا تتهمونى فى شرفى بالباطل ربنا اراد انى اعيش عشان افضحك و ابرئ شرفى اللى انت بعد ما قتلتنى ما هانش عليك غير انك توسخه … سيبنى اربيها و انا مش عاوزه منك اى حاجه
امانى / انتى فكرانا هنصدق الهبل ده
محمد / حسام … اللى ندى قالته ده حقيقى يا مصطفى انت مضيت بدالها فى القسيمه و جبرتها على الجواز
ندى/ حسام دخل و فكنى و قالى الناس و الفضيحه هنمثل سكت و خفت عشان كنت هبله و فجاه فى يوم اكتشفت انه بيحطلى المنوم فى العصير اكتشفت انى حامل ازاى ابقى حامل و انا مفيش راجل لمسنى ازاى و ابن عمى بيحرسنى و يحمينى اتارى حاميها حراميها
محمد / الكلام ده حصل يا حسام ساكت ليه ما ترد دافع عن نفسك انت عملت كل ده كل اللى كنت بتقولهولنا كان كدب
حسام / اتصلت بيك و حكتلك و ما صدقتهاش وقتها ليه بتسالنى دلوقت
محمد يضرب حسام قلم على وشه
ندى / انا مش عاوزه اى حاجه تربطنى بيه ينسانى و يبعد عنى و يسيبنى اربى بنتى فى حالى مش عوزاه يهددنى بالقسيمه المضروبه اللى معاه مش عاوزه ابقى مراته لا فى الحقيقه و لا على الورق
محمد / هتطلقها …. طلقها
حسام / انتى طالق
تهانى تزرغط
تهانى / فى ستين داهيه خدت الشر وراحت قال يعنى هنصدق الهبل اللى اتقال ده دى مؤامره عشان تبوظى فرح بنتى
ندى / انا لو منها اهرب اللى زي ده ما بيجيش من وراه غير الاذى
اروى / قولى كدا بقى كل ده عشان تفرقى بينا و يرجعلك
مصطفى / اللى قالته ندى هو الحقيقه
تهانى تبص لاخوها و تسكت
مصطفى / مبروك يا اروى
محمد / ياريتنى مت قبل اليوم ده
محمد يحط ايده على قلبه و يقع فى الارض و الكل يتلم عليه
………………………………..
فى المستشفى
امانى / انتوا جايين ليه جايين تشمتوا فينا جايين تتفرجوا على الراجل و هو بيموت
مها / و هو انتوا كنتوا جايين تشمتوا فيا لما جوزى كان بيموت ايه يا شيخه اتقى الله مره واحده فى حياتك بقى
تهانى / احنا اللى نتقى الله صحيح اللى اختشوا ماتوا لزقتوا البت للواد و دفعتوه دم قلبه و جوزتوهاله غصب و بعدين جايين تعملوا ضحايا
مها / حسبى الله و نعم الوكيل فيكى يلا يا مصطفى انا مش قاعده فى المستشفى دى ثانيه واحده
نور تسبهم بيتخانقوا و تروح تقعد بعيد جنب ندى بتلاعب حبيبه و لا على بالها
نور / اسمها ايه
ندى تبص لنور
ندى / حبيبه
نور / ممكن اشيلها
ندى / اتفضلى
نور تيجى تشيل البنت امانى تيجى تجرى عليها من بعيد
امانى / ارمى البت دى فى الارض احنا ما لناش دعوه بيها
نور / انتى بتقولى ايه يا ماما دى حفيدتك
امانى / هو حد شايف حاجه يروحوا يجيبوا بت من اى داهيه و يقولوا حفيدتك
مصطفى / لا بقى كدا كتير انتى زودتيها اوى و انا مش هسكتلك
امانى / اخرك اعمله بس البت دى مستحيل تكون بنت ابنى و اقولك اصلا البت دى بنت حرام و ما تلزمناش روح بقى شوف هتعمل فيها ايه
ندى تضحك بشكل هستيرى و هى بتلاعب حبيبه و الكل يبص عليها و تبص لحسام اللى واقف بعيد اوى و بيبص عليهم و تتف عليه و تاخد بنتها و تمشى
مها / ندى ندى استنى
مصطفى / ليكى راجل يترد عليه
امانى / ادعيله يقوم بالسلامه ربنا ياخدكوا
امانى تعيط و تهانى تحضنها
تهانى / ما تعمليش فى نفسك كدا يا اختى دا ما يستاهلش اللى يعمل فى اخواته كدا عشان الفلوس ما يستاهلش
امانى / منه لله منهم لله شوفتيها بتضحك ازاى شوفتيها
تهانى / ربايه امها نقول ايه بس ارتاحى يا اختى ارتاحى
نور تروح لحسام
حسام / جايه تهزاينى انتى كمان
نور / على قد ما انا مصدومه فيك على قد ما لازم اقولك ان الملاك البرئ ده ما لوش ذنب
حسام / كان ممكن نعيش زى اى اتنين كنت هشيلهم على راسى كنت هخلى بنات الدنيا تغير منها و من حبى ليهم بس هى فضلت عليا حته بياع ما حلتوش الا الهدمه اللى لابسها
نور / ما تحاولش تلاقى تبرير لنفسك انت حاولت تقتلها
حسام / لو كنتى مكانى
نور / انا عمرى ما كنت هبقى مكانك لانى ما اتعودتش اخد حاجه مش بتاعتى
حسام / بتاعتى
نور / ربنا يهديك عن اذنك
……………………………
فى شقه عمر
أية / يعنى خلاص على مش هيسافر
عمر / لا خلاص
أية / بس تعرف قصه حبهم غريبه اوى معقول بيحبها للدرجادى
عمر / تعرفى ان دى نفس البنت اللى جه يطلب من بابا يروح معاه يتقدملها
أية / ايوه بس هيعمل ايه فى بنتها دى
عمر / ما تحاوليش على ما بيفكرش فى حاجه غير ندى و لو عاش عمره كله يحاول يكون جنبها بس مش هيفرق معاه
أية / ربنا يجمعهم ببعض على فكره معزومين عند ماما بكره
عمر / استر يارب خير
أية تبصله
عمر / ماشى نروح و انا يعنى هخاف من ايه
أية / صحيح اخبار غاده ايه
عمر / عادى يعنى مالها
أية / مش ناويه تتجوز بقى و لا ايه
عمر / الحاجات دى قسمه و نصيب و انتى عارفه … ليكون عندك عريس ليها
أية / لا بس انا بستغرب انها حلوه و غنيه و شاطره و مع كدا مش مخطوبه
عمر / ما قولتلك نصيب لسه نصيبها ما جاش
أية / النصيب تعرف ان اكتر حاجه بتوصف النصيب حكايه على دى
عمر / يا شيخه
أية / تلف تلف و ترجعله دا اسمه ايه ؟؟
عمر / ترجع لمين يا بنتى دا انتى لو شوفتى المقابله اللى قابلته بيها كانه ضرتها
أية / و هو ذنبه ايه يعنى ايه الهبل ده
عمر / انا ما اعرفش هى شافت ايه هناك بس واضح ان الموضوع ما كانش سهل
أية / لو بتحبه هترجعله
عمر / هنشوف ممكن تنامى بقى و لا ايه النظام النهرده عندى شغل كتير الصبح قبل ما نروح لامك
أية / خلاص نمت
……………………………………
تانى يوم فى شقه ندى
مها تصحى على صوت فى المطبخ تقوم تشوف فى ايه تلاقى ندى بتغسل الببرونات
مها / اساعدك
ندى / انا خلاص خلصت
مها / اعملك تفطرى
ندى / مش جعانه شكرا
مها / ابوكى نزل الشغل من بدرى صح
ندى / ما اعرفش انا لسه صاحيه
مها / ابوكى بيحبك اوى يا ندى صدقينى الفتره اللى فاتت ما كانتش سهله عليه
ندى / تعرفى ايه اللى لفت نظرى
مها / ايه ؟؟
ندى / ان ما بانش عليكوا اى حاجه كانكوا بعتونى ببلاش عن اذنك
ندى تمشى مها تروح وراها
مها / انتى بتحكمى من ناحيتك بس
ندى تقف و تبص لامها
مها / ابوكى غلط اه كلنا غلطنا و انتى اولنا كل اب فى الدنيا بيحلم باليوم اللى يقعد يحط رجل على رجل و يتامر على العرسان و يقول انا بنتى تتاقل بالدهب
ندى تهز راسها و تمشى مها تسبقها
مها / حسى بيه انهى اب يستحمل يشوف صوره بنته و هى ماسكه فى ايد واحد تانى
ندى / سبحان الله نفس الواحد اللى فتحتوله بيتكوا و بتقوليله امبارح تعبناك معانا اوى يا ابنى
مها / حتى هو غلط باى حق يمسك ايدك و بعدين ابوكى يعرف منين انه كان جد مش بيلعب بيكى
ندى تبصلها
مها / انا عارفه ان على جه
ندى / يعنى جه يعنى مش زى ما كدبتوا عليا و قولتوا انوا ما جاش مش زى ما استغليتوا انى نايمه من المنوم اللى حضرتك كنتى بتحطيهولى فى العصير
مها / ما انتى عنيده و ما بتسمعيش كلام حد يا ندى ما شوفتيش كنتى بتردى على ابوكى ازاى
ندى / معاكى حق كلنا غلطان و انا اولكوا مانا برده صدقت حسام و عديت اليوم و سافرت معاه وقعت فى المصيده برجلى كل ما افتكر انى صدقته اقول ازاى كنت بالغباء ده ازاى ما قدرتش اشوف حقيقته ازاى سكت انا دفعت التمن غالى اوى بس تعرفى انا كان ممكن ادفع اكتر كان ممكن اموت هناك و اترمى جثه فى الصحرا و هو يكمل حياته هنا عادى ياااااااه دا انا طلعت رخيصه اوى
مها تحاول تمنع دموعها ما تقدرش
ندى / انا اسفه انا مش عارفه انا بكلمك كدا ازاى بس خلينا نتفق ان انا مش ندى بنتك لانى مش قادره احس انك امى سامحينى بس انتى ما عدتيش امى سامحينى على قسوتى بس
مها تهز راسها
ندى / عن اذنك
ندى تدخل اوضتها و تقفل الباب بالمفتاح تلاقى حبيبه صاحيه تفتح الستاره
ندى / الدكتور قال الشمس مفيده عشان عضم حبيبتى
ندى تقلع حبيبه البنطلون و تشيلها و تروح تقف عند الشباك تشوف على واقف فى البلكونه بتاعته عينه عليها يشاورلها باى تفتح الشباك و تشد الشيش عشان تقفله تشوف حسام بيركن عربيته ترفع عينها لعلى تانى و فى نظره خوف فى عنيها و تقفل الشيش و تحط حبيبه على السرير
ندى / ما تخافيش مش هخليه يقربلك
ندى تروح تتاكد انها قفلت الباب بالمفتاح و تشد الكومدينو و تحطه ورا الباب و تجيب كرسى التسريحه و تحطه فوقيه و تروح تقعد على السرير و تاخد حبيبه فى حضنها و تهزها بالراحه و عينها على الباب
………………………………..
فى المحل عند على
على نازل من فوق بيجرى احمد يمسكه
على / وسع
احمد / انت رايح فين فوق لنفسك
على / بانهى وش جاى هنا انا هقطع رجله من الحته كلها
احمد / اهدى و اعقل ما تركبش نفسك الغلط انت مش معاك رقم ابوها اتصل بيه
على / معاك حق وسع اما اكلمه
احمد يسيب ايد على على يفلت و يعدى الشارع و يطلع لندى و احمد واقف بيضرب كف على كف
…………………………….
فى شقه ندى
مها تفتح الباب تلاقى حسام
مها / عاوز ايه
حسام / مش هتدخلينى و لا ايه
مها / لو كنت اعرف انه انت ما كنتش فتحت اصلا يلا غور من هنا بدل ما اطلبلك البوليس
حسام / والله هى حصلت
مها / اقسم بالله لو ما مشيت من هنا لاصوت و اللم عليك الناس كلها
على يطلع
حسام / ليكى حق ما البديل موجود سمعت انك ورثت و بقى معاك فلوس
على / نورت اتفضل و ما تعتبش المنطقه تانى
حسام / انت بتتكلم بقلب جامد اوى
مها / اسمع يا حسام انت ما عدلكش حاجه هنا و لما ابوك يطلع من المستشفى لينا كلام تانى معاه على مجيك هنا
حسام / انا اب جاى اشوف بنتى بيتهيالى ده حقى
مها / روح شوفها فى المحكمه و دلوقت امشى
حسام / ما افتكرش ان سكه المحكمه هتعجبك يا حماتى
على / ما توفر الجاز اللى بتحرقه و تمشى بالادب
حسام / همشى بس نصيحه احلم على قدك عشان ما تزعلش انا دايما بكسب فى الاخر عن اذنكوا
حسام ينزل
مها / تعال يا ابنى اتفضل
على / ندى عامله ايه
مها تهز راسها بحزن و تبص فى الارض
على / لو ينفع اكلمها فى التليفون
مها / اى حاجه تفيدها انا مستعده بس هى ما عاهاش موبايل اسمع كلمنى و انا هدخلها الموبايل
على / ماشى شكرا عن اذنك
على ينزل يلاقى حسام بيزق اكياس الزباله من على عربيته و العمال الناحيه التانيه واقفين بيضحكوا حسام يبص لعلى و يضحك
حسام / ده اخرك ؟؟؟
حسام يفتح الباب و يركب و يمشى احمد يروح يقف جنب على
على / ايه حركات العيال دى
احمد / ايه وحشه
على / نضفوا الشارع مش عاوزين مخالفات نظافه تجيلنا مش فايق
على يعدى الشارع و احمد بيجرى وراه
احمد / عملتوا ايه فوق
على / و لا حاجه و مليش مزاج اتكلم دلوقت ابوس ايدك فكك منى
احمد / خلاص يا عم كنت بطمن بس
على / نضفوا الشارع
على يطلع فوق و يقف فى البلكونه تانى يبص على شباك ندى المتشيش
…………………………………..
فى القسم
محامى / احنا بنعتزر جدا على الخطا اللى حصل بس واضح ان كان فى تلاعب واضح فى الملفات لان النسخه دى ما ظهرتش الا النهرده الصبح
مروان / يعنى انا براءه
محامى / ايوه و حسين بيه بيعتزر جدا و بيعرض على حضرتك ترجع الشركه تانى و هينزل اعتزار رسمى فى كل الجرايد و تقدر ترجع الشغل تانى فى اى وقت
مروان / انا كل اللى يهمنى انى اخرج من هنا
المحامى / مساله وقت مش اكتر اجراءات روتينيه بس و تخرج
مروان / احمدك و اشكر فضلك يارب
المحامى / انا هتابع كل حاجه بنفسى مع المحامى بتاع حضرتك
مروان / انا مش عارف اشكرك ازاى انا كنت خلاص فقدت الامل و بموت
المحامى / احنا اللى بنعتزر للمره التانيه
………………………………..
فى المستشفى
محمد / حسام فين
الكل يبص لبعضه و يسكتوا
اروى / الف حمد الله على سلامتك يا خالى
محمد / الله يسلمك يا بنتى
تهانى / قوم بالسلامه يا خويا لحسن دا فى كتير اوى مستنين وقوعك
امانى / مش وقته يا تهانى
محمد / شوفولى حسام فين
امانى / راح مشوار صغير و زمانه جاى
محمد / كلميه
امانى / حاضر
……………………………..
فى شقه فى اسكندريه
بنت / انا قولتلك ان الموضوع ده مش هيعدى على خير
نهاد / و انا اش عرفنى انهم هيطلعوا ولاد كلب كدا دول قادرين
البنت / دا انتى ربنا نجاكى شوفى بقى لو ما كنتيش قدمتى استقالتك مش بعيد
نهاد / لو ما كنتش قدمت استقالتى و اتنقلت هنا ما كانش كل ده حصل و كان زمان مروان و الست بتاعته متهنين و انا فى حالى بس تقولى ايه اللى يشوفها ما يقولش ابدا اخوها كدا
البنت / اصلا انا قولتلك طريقه جوازكوا دى ما كانش ناوى يعمر معاكى و لولا انك سمعتى كلامى و روحتى لامه
نهاد / لا دا مجيت نور هى اللى نجزت كل حاجه امه مش طيقانى و كاننا ضاربين ورقتين عرفى متانعره لحد اخر ثانيه
البنت/ عدت و ناويه تعملى ايه
نهاد / انا بفكر اشوف حته ارض و اشتريها و اشوف حد يشاركنى و نبنيها و افتح المحلات اى حاجه
الراجل / تشترى ارض و تبنيها كمان هو الكلام اللى قولناه فى مصر ما اكلش معاكى و لا ايه انتى ما تقدريش تطلعى قرش من الفلوس دى الا لما يكون عندك حاجه تغطيه
نهاد / انت مش قولت هتتصرف فى الموضوع ده
الراجل / انا مش ساحر يعنى الموضوع محتاج وقت و لعلمك هيكلف برده الناس دى ما بتشتغلش حبى لله و للوطن
نهاد /قول بقى كدا يعنى هياخدوا كام يعنى
الراجل / وانا اش عرفنى هو حد قالك انى حرامى
نهاد / انا مش حراميه ده حقى اللى كانوا عاوزين ياكلوه عليا و الاقى نفسى اترميت فى الشارع و خرجت من المولد بلا حمص دا حقى و حق ابنى اللى فى بطنى
الراجل / اصلا العيل ده ما عادلوش لزوم انا لو منك اخلص منه
نهاد / انت بتقول ايه اموت ابنى
الراجل / العيل ده هيربطك و مروان مش هيسيبك فى حالك و هينطلك كل شويه ابنى ابنى
نهاد / دا لو خرج منها اصلا
الراجل / برده فكرى فيها و شوفى كدا هو انتى لو كان معاكى عيل كان مروان بصلك انتى لسه صغيره و حلوه و الف من يتمناكى و العيل ده هيقرفك و يربطك جنبه
نهاد تبص للبنت
نهاد / لا طبعا مستحيل انسى
الراجل/ براحتك انا خارج لو عوزتوا حاجه كلمونى
البنت / مع السلامه يا قلبى تيجى بالسلامه
……………………………….
فى شقه ندى
مها تخبط على الباب
مها / والله مشى افتحى بقى
ندى تروح تفتح الشباك تبص ما تلاقيش العربيه تبص فوق تشوف على تقفل الشباك تانى و تنفخ
مها / يابنتى افتحى بقى تعبتى قلبى
ندى تروح تساخر الحاجات و تفتح الباب و مها تدخل و ندى تقفل الباب تانى
مها / ليه دا كلو
ندى تبصلها و تسكت
مها / حقك … على عاوز يكلمك
ندى / هو انا تقيله عليكوا اوى كدا
مها / ليه بس كدا يا بنتى انا بس عوزاكى مبسوطه
ندى / انا مش طالبه منكوا اكتر من انكوا تسيبونى ارتاح
مها / و احنا والله مش عوزين اكتر من كدا
ندى / يبقى تسيبونى فى حالى ابوس ايديكوا سيبونى فى حالى انا هبقى ضيفه خفيفه و مش هتحسوا بوجودى اصلا تعرفى استنى
ندى تجيب شنطتها و تفتح جيب و تطلع منه سلسله دهب كبيره و تديها لامها
مها / ايه دى
ندى / الراجل اللى انقذنى سابلى دى مع الورق بتاعى و سابلى فلوس كمان حولتها مصرى و انا نازله انا معايا فلوس و دى لو بعتها هتجيب فلوس انا مش هبقى عاله عليكوا ما تخافوش
مها تبص لندى و الدموع تنزل من عينيها
ندى / اقف بس على رجلى و هنزل ادور على شغل انا مش هكلفكوا حاجه لا عليا و لا على بنتى سبونى بس فى حالى اعتبرونى ماجره الاوضه دى انا ما ليش مكان تانى اروحه انا ما ليش حد
مها / انتى معاكى حق انتى مش ندى بنتى عشان ندى ما كانتش قاسيه اوى كدا
مها تحط السلسله فى ايد ندى
مها / خليها معاكى و اى حاجه تحتاجيها احنا تحت امرك و اوعدك انى مش هزعجك تانى عن اذنك
مها تخرج و تقفل الباب وراها و هى بتمسح دموعها
……………………………………
فى شقه سمر
سمر و ايه قاعدين بيلفوا محشي
سمر / هو المعدول ماقالش هيجى الساعه كام
أية / المعدول اسمه عمر
سمر / شوف ازاى و ياترى بتدافعى عنى كدا لما بيجيب فى سيرتى
أية / اكيد
سمر / طب لفى لفى ما تعصبنيش
أية / بلف اهو
سمر / هو البيه نام على كدا مش هياخدك و يجبلك طقمين جداد عشان الدراسه و كدا
أية / كان مشغول الفتره اللى فاتت معلش
سمر / مشغول بايه كفا الله الشر
أية / بحوار على مش انا حكيالك
سمر / و هو انتى بتحكى حاجه خير ماله على
…………………………………………………..
فى شقه ندى
ندى لابسه و واخده حبيبه على ايدها و شنطتها تروح المطبخ مها بتطبخ
ندى / هنزل اشترى حاجات من الصيدليه لحبيبه هتعوزى حاجه
مها / هترجعى تانى
ندى / ليا مكان تانى اروحه
مها / و مدام هترجعى لامه حاجتك كلها و ماشيه ليه
ندى / انا مليش فى الشنطه دى حاجه كلها حاجات حبيبه
مها / انتى مش مامنانى على بنتك صح مش هعرف اخد بالى منها
ندى / ما تكبريش الموضوع
مها / تروحى و تيجى بالسلامه عاوزه فلوس
ندى / معايا شكرا
ندى تمشى و مها عينها عليها
………………………………
عند على
على واقف فى البلكونه يشوف ندى ماشيه فى الشارع ينزل وراها جرى
على / ندى ندى
ندى ما تردش و تكمل مشى و تدخل الصيدليه يقف على الباب
ندى / لو سمحت فى عندك اللبن ده
الصيدلى / لا واضح انه مش من مصر
ندى / اه فعلا
الصيدلى / انا عندى بديل ممتاز
ندى / اوك هاخده و هاخد بامبرز كمان مقاس نيو بورن
ندى تحاسب و تاخد الحاجه فى كيسه و تطلع من الصيدليه
على / هو انتى زعلانه منى
ندى ما تبصلوش و تكمل مشى
على / لا دا انتى زعلك وحش اوى
ندى تقف و تبصله
ندى / اسمع يا على ابعد عنى انا مش ندى بتاعه زمان مش البت الهبله المراهقه اللى بتعيش اليوم بيومه انا عندى بنت زى ما انت شايف بعيش عشانها سبنى فى حالى
على / ههههههههههههه و دا وش واحده ناويه تعيش برده
ندى / معلش اصلى لسه خارجه من التربه طازه ابعد بقى
ندى تعدى على و تمشى فى الناحيه الغلط
على / بيتك من الناحيه التانيه
ندى تقف و تنفخ و تلف و ترجع تانى و على واقف ماسك نفسه من الضحك
……………………………
فى شقه مروان
امينه تفتح الباب و تدخل و مروان وراها
امينه / الف حمد الله على سلامتك نورت بيتك و مطرحك
مروان يدخل فى صمت
امينه / ادخل الحمام غير هدومك و خدلك دش سخن و انا هحضرلك لقمه تاكلها زمانك هفتان يا حبه عينى
مروان يرزع نفسه على اقرب كرسى
امينه / مالك يا حبيبى قدر الله و ما شاء فعل قضا اخف من قضا و احمد ربنا ان الموضوع خلص لحد كدا و كمان كرامتك رجعتلك و ان كان على الفلوس تتعوض انت اللى بتعملها مش هى اللى بتعملك
مروان / و ابنى يا ماما
امينه / ابنك !!! اقولك ايه بس حسبى الله و نعم الوكيل فيها اللى زى دى يا ابنى مش امينه تكون ام لاولادك صدقنى
مروان / هو انا غلطت لما اتمنيت اكون اب امال لو كنت بتاع ستات بقى و عينى زايغه دا انا حتى
امينه / يا ابنى انساها و اقف على رجليك من تانى ما تخليش واحده زى دى تكسرك بالسهوله دى و اديك اتعلمت الدرس
جرس الباب يضرب
امينه / خير هروح افتح
امينه تفتح تلاقى حسام
امينه / اهلا اهلا بريحه الحبايب ادخل يا ابنى ادخل
حسام يدخل مروان يقوم يقف
حسام / كفاره يا راجل اول ما عرفت سبت اللى فى ايدى و جيتلك جرى
حسام يحضن مروان و مروان مش متفاعل
حسام / خسيت كدا ليه يا ابنى جرا ايه يا ست الكل مش تظبطيه اكله حلوه من بتوعك
امينه / والله كنت هدخل اعمله كويس انك جيت اقعد معاه بقى لحسن دا نفسيته وحشه اوى عن اذنكوا
امينه تدخل جوه
مروان / جاى تشمت فيا
حسام / طول عمرك اهبل و انا اشمت فيك ليه يعنى بينى و بينك ايه
مروان / قول لنفسك
حسام / انا خدمتك خدمه العمر خليتك تشوفها على حقيقتها و لو كنت سمعت كلامى من الاول ما كنتش خسرت الفلوس دى كلها
مروان / دا انت متابع بقى
حسام/ هو انا عندى اهم منك
مروان / انت جاى ليه
حسام / جاى اطمن عليك و اقولك عمك فى المستشفى من امبارح بيركب دعامه ايه مش واجب برده تروح تزوره
مروان / ليه ماله خير
حسام / اهو تعب فى الفرح امبارح .. شوفت نستنى اقولك مش انا فرحى كان امبارح عشان تعرف غلاوتك سبت العروسه فى الصبحيه و جيتلك اطمن عليك يلا استاذن انا بقى
مروان / نورت
حسام / ابقى خلينى اشوفك ..سلام
حسام يمشى و يقفل الباب وراه
………………………
فى شقه سمر
الكل قاعد بياكل
سمر / مش كان على جه وياك ياكله لقمه
عمر / هو انتى عزمتيه و ما جاش
سمر / قال يعنى لو عزمته فاضى يجيلى الله يسهله بقى مع الجو
عمر يبص لأية وشها يحمر
عمر / ربنا يبعد عنهم ولاد الحرام
سمر / امين يا جوز بنتى امين صحيح بالمناسبه كنت بفكر يعنى اخد أية اسبوع و لا حاجه و نروح اسكندريه بيقولوا خالد ابن الوليد فيه لبس يجنن
عمر / مش دلوقت الدنيا تظبط معايا شويه و هنسافر كلنا
سمر / ما انت بتقول كدا كل شويه و سبحان الله كل ما تقولها الدنيا تتعقد زياده مره الراجل يموت و مره اخوك هيسافر و مره اخوك مش هيسافر و لقى البنت اللى بيحبها احنا ملزمين بمعاد فرح و لا ده كمان ناوى تاجله انا تعبتلكوا سلف الصراحه
عمر / اى حاجه وراكى بيتهيالى فى هنا محلات احسن بكتير من خالد ابن الوليد ممكن تشترى منها كل اللى نفسك فيه
سمر / و هيحصل ايه يعنى لو سافرت انا و البت اسبوع مصيف غيرت جو حتى ابوك الله يرحمه كان معودها على كدا كل سنه
أية / خلاص يا ماما ما فرقتش النهرده من كمان شهر ابقى اسافر فى اسبوع العسل
سمر تقوم و هى بتبرطم
سمر / و لا شكلك هتشوفى فرح و لا عسل فى سنتك دى بلا قرف
أية / ما تزعلش
عمر / انا كدا كدا ماشى هعدى اخدك بالليل و لا تحبى تروحى دلوقت
أية تسكت
عمر / خلاص هرنلك و انا جاى تجهزى و تنزليلى سلام
أية / طب كمل اكلك
عمر / شبعت ما انا عارف من الاول ان العزومه دى مش هيجي من وراها خير
عمر يمسح ايده فى منديل و يقوم يمشى
………………………………….
فى شقه حسام
حسام يدخل اروى قاعده حاطه ايدها على خدها
حسام / السلام عليكم
اروى / على ما افتكرت ان ليك بيت
حسام / كنت عند ابويا فى المستشفى
اروى / باماره ايه ما انا روحتله النهرده ما لقيتكش هناك
حسام / بقولك ايه انا ما نمتش من امبارح و مش طايق روحى
اروى / روحت لندى
حسام / اسمعى يا بنت الناس انا راجل بحب الفرفشه و مليش فى النكد ماشى
اروى / و هو انا اللى بتاعه نكد يعنى انا عروسه يا سى حسام مش كفايا فرحى اللى باظ امبارح لا و ابات لوحدى
حسام / قال يعنى لسه هندخل
اروى / قصدك ايه
حسام / ما قصديش بقولك مطبق و تعبان وسعى
حسام يزقها و يدخل اوضته و ينام اروى تدخل وراه و تنام جنبه و تحضنه
اروى / حقك عليا انا فعلا اتعصبت عليك بس انت عارف قد ايه بحبك و بجد رجوع البت دى مجننى
حسام / اه روحتلها عشان اشوف بنتى و ما خلتنيش اشوفها و بعدين روحت لمروان عشان خد براءه فقولت مدام بره اباركله و بعدين روحت لبابا و جيت تحبى بعد كدا افتح اللوكاشن على الموبايل و اعمل شيك ان فى كل مكان اروحه
اروى / خلاص بقى ما تكبرش الموضوع
حسام / خلاص ممكن انام بقى
اروى / هتنام زعلان
حسام / اروى ابوس ايدك انا فيا اللى مكفينى يعنى انزل انام فى اوضتى تحت يعنى
اروى تقوم تقعد
اروى / و على ايه نام انا هطلع اتفرج على التليفزيون
حسام /احسن برده اقفلى الباب وراكى
حسام يشد الغطا و يستغطى و اروى تنفخ
……………………………..
فى شقه ندى
باب الشقه يتفتح و مصطفى يدخل شايل اكياس مها تقابله
مها / اتاخرت كدا ليه قلقتنى
مصطفى / مش قولتلك انا رايح ابص على محمد فى المستشفى بعد الشغل
مها / اه قولت و ما رضيتش اتصل بيك لحسن العقربه مراته تقول بنستعجلك و مش عاوزينك تشوف اخوك
مصطفى / يا ستى قابلت حسام هناك و اتكلمنا و اعتزر
مها / انسى يا مصطفى
مصطفى / انا قولتله كدا قولتله نحافظ على اللى باقى بينا هو مهما كان ابن اخويا لكن اللى عمله عمرنا ما هنسامحه عليه و اتكلمت مع محمد و قالى انه هيعمل مصروف شهرى لندى و حبيبه بدل النفقه و كدا عشان انا قولتله اننا مش عاوزين محاكم و قرف
مها / يا مصطفى مش عاوزين منهم حاجه يا نحله لا تقرصينى و لا عاوزين منك عسل
مصطفى / فى الاول و الاخر هو جد البت و من حقه يشوفها
مها / و هو ابنه لما رماهم
مصطفى / ما تكمليش ما لناش دعوه بحسام جدها اللى بيتكلم
مها / اصلا الكلام فى الموضوع ده مش معايا مع ندى انت اصلك مش حاسس هى عامله ازاى دى مش طيقانا لا انا و لا انت بتقولى هدور على شغل و اعتبرونى ماجره الاوضه لحد ما لاقى مكان تانى
مصطفى يبصلها
مها / و نزلت تجيب حاجات لحبيبه من الصيدليه خدت حبيبه و شنطتها معاها ما كانتش مامنانى عليهم و جابت كيس حلويات و بسكوت و شبسى و ميه معدنيه و دخلت قفلت على نفسها الاوضه و ما بتطلعش غير على الحمام و حتى فى الحمام بتاخد البت و شنطتها معاها
مصطفى / انا هدخل اتكلم معاها
مها / انا تعبت يا مصطفى كل كلمه بتقولها بتوجع عن اللى قبلها بيبقى هاين عليا اشق صدرى بالسكينه و لا انيش اسمع الكلام ده منها
مصطفى يروح لاوضه ندى و يخبط ما حدش يرد
مصطفى / انا ابوكى يا ندى افتحى يا ضنايا …. ندى بلاش القسوه دى يا بنتى …. طب افتحى ابص عليكى و اقفلى تانى …. شوفى انا
الباب يتفتح
مصطفى / شوفتى انا جبت لحبيبه ايه
ندى / انا كنت نايمه اتفضل
مصطفى يدخل و مها وراه ندى تقعد على السرير و مصطفى قدامها و مها واقفه قدامهم مصطفى يفتح الاكياس و يطلع هدوم بيبى حلوه اوى و شخليله
مصطفى / ايه رايك
ندى / كتر خيرك
مصطفى / كنت عند عمك فى المستشفى جنبه محل هدوم اطفال ما حستش بنفسى غير و انا بحاسب
ندى / تعبت نفسك
مصطفى / انا عارف انك زعلانه منى .. و حقك مش هتكلم انا نفسى مش قادر ارفع عينى فيكى بس انتى دلوقت ام و هتعزرينى كل يوم هيفوت عليكى و هتشوفيها بتكبر فيه هتلاقى نفسك بتاخدى قرارات لمصلحتها يمكن تكون قاسيه عليها هتغلطى و هتعملى حاجات صح برده
ندى تهز راسها
مصطفى / على فكره عمك بيسال عليكى
ندى / هو روح
مصطفى / لا لسه بس الحمد لله بقى احسن كتير هو قالى انه اول ما هيخرج من المستشفى هيجى يطمن عليكى و على حبيبه
ندى تبص الناحيه التانيه
مصطفى / هو جدها برده
ندى / يانس و ينور بس ياريت ما يجبش كلبه معاه
مصطفى / انا والله هزقت حسام جامد اوى النهرده و بهدلته و اعتزر و قولتله ما تحاولش
ندى / خلاص يا بابا لو سمحت قفل السيره
مها / اجيبلك حاجه تكليها يا قلبى
ندى / مش جعانه شكرا
مها / طب اجيبلك سندوتشين شاورما من تحت ههههههههههههههههه
ندى تبصلها
ندى / هو انا ممكن اكمل نوم قبل ما حبيبه تصحى
مصطفى يبص لمها
مصطفى / طبعا يا بنتى تصبحى على خير
مها / لو عوزتى اى حاجه نادى بس احنا بره
مصطفى يخرج هو و مها و يقفلوا الباب و يسمعوا صوت تكه المفتاح من جوه يبصوا لبعض بحزن
……………………………………….
تانى يوم فى الكليه
غاده / ههههههههههههههههه يا حرام تصدق صعبت عليا
عمر / مش كدا برضه
غاده / اصلا مش قادره افهم ايه الفكره من الهرى دا كله ما تهرب انت و هى و تتجوزوا و تسافروا فى اى حته و يولع الباقى فستان و فرح و معازيم و مشاكل
عمر / لو على أية الوضع اسهل حتى فكره السفر مش فارقه لكن امها و زن امها و كلام امها و تحكمات امها بقى اووووووووف ياما نفسى اقتل امها اووووف
غاده / ههههههههههههههههههههههه فى الاول و الاخر مامتها يا عمر
عمر ينفخ
غاده / بص كبر مخك و خلاص بتحصل فى احسن العائلات
عمر / صحيح يا غاده هو انا ممكن اغلس عليكى
غاده / اكتر من كدا هههههههههههههه اتفضل
عمر / ههههههههههههههههههههه هو انتى ايه مواصفات شريك حياتك يعنى على راى أية بنت جميله و ذكيه و ناجحه و من عيله ناقصها ايه
غاده / دا راى غاده فيا
عمر / اه والله
غاده / ناقصنى النصيب
عمر / كويس كنت فاكرك معقده
غاده تضربه على كتفه يضحك
………………………………………..
بعد يومين فى شقه ندى
جرس الباب يضرب مصطفى يروح يفتح يلاقى محمد و حسام
مصطفى / اتفضلوا
الكل يدخل يقعد
محمد / انا جيت زى ما اتفقنا
مصطفى/ اتفقنا ان حسام مش هيجى معاك
حسام / دى بنتى و من حقى اشوفها على فكره
مصطفى / بنتك ؟؟؟ اللى رمتها فى الصحرا و هى فى بطن امها دلوقت جاى تقول بنتك
حسام / بيتهيالى مفيش حاجه هتغير حقيقه انها بنتى
محمد / حسام
حسام يبص لابوه
محمد / معلش انزل استنى فى العربيه
حسام / يعنى ايه مش هشوف بنتى بسيطه اروح المحكمه و ارفع قضيه و هاخدها و عليا و على اعدائى بقى
مصطفى / اعملها و ساعتها اقسم بالله
ندى تطلع من الاوضه صمت
محمد / تعالى يا بنتى اقعدى
ندى تروح تقعد و حسام يروح يقعد
حسام / انا غلطت مش هنكر بس دا ما يدكيش الحق تحرمينى من بنتى ماشى
مصطفى / انهى بنت اللى بتسال عنها هاه ؟؟؟
حسام / بنتى ملزمه منى من الالف للياء انا مش هتاخر بس على الاقل اشوفها
محمد / البنت هيتعملها شهاده ميلاد هنا عشان تاخد التطعيمات بتاعتها هنا و هيتعملها مصروف شهرى و اى طلبات ليها او لامها احنا ملزمين بيها
ندى / و المقابل ان حبيبه تبقى مسمار جحه اللى هيفضل حسام كل شويه ينطلى بسببه مش كدا
محمد / مش هينطلك و مش هتشوفيه خالص ممكن مصطفى يجيبها مره فى الاسبوع عندنا
ندى / انا ما بفارقش بنتى
الكل يبص لبعضه
ندى / عاوز تروح المحكمه روح عاوز تطلب حق الحضانه اطلب و محامى قدام محامى و فضايح بفضايح انا مش باقيه على حاجه انت فاهم
حسام / حبيبه ما لهاش ذنب فى كل ده انتى زعلانه منى و ده حقك بس انا عملتلك كل حاجه حرفيا كل حاجه و فى الاخر انتى عملتى ايه الورق ده مش بخطك
ندى / انا كنت عايشه فى سجن حتى خواطرى اللى كنت بكتبها و اقطعها و اشد عليها السيفون كنت بتلاقى طريقه انك توصلها انا اصلا مش قادره انام و لا ارتاح لانى مش قادره استوعب ان الكابوس اللى كنت عيشاه فيه معاك هناك خلص مش عارفه ازاى هقدر افهم حبيبه اللى حصل من غير ما اجرحها
حسام / احنا لسه فيها بايدك انك توفرى لحبيبه حياه طبيعيه اب و ام
ندى / انت مجنون انهى حياه طبيعيه انهى اب …..انت ؟؟؟؟
محمد / حسام
ندى / ماشي كل يوم جمعه بعد الصلاه تيجى تشوفها هنا و فى وجودى
محمد / عين العقل
ندى / اقسم بالله يا حسام لو فكرت فى غدر شوف اقسم بالله اقتلها و اموت نفسي
محمد / مفيش غدر انا اضمنهولك اصلا حسام بدا حياه جديده مع مراته اروى و هيركز فيها مش كدا يا حسام
حسام يبص لابوه و لندى
محمد / لو سمحتى يا ندى هاتى البنت اشوفها ارجوكى
ندى تقوم تجيب البنت و عمها يمدلها ايده ما تفكش ايدها من حوالين حبيبه و تبصلها
مصطفى / اديها لجدها يا ندى ما تخافيش
ندى تبص لحبيبه و تحطها فى ايد محمد
محمد / بسم الله تبارك الله شبهك اوى يا ندى حته منك قمر ما شاء الله انا فاكر لما كنتى لسه بيبى فاكر يا مصطفى
حسام يمد ايده عشان ياخدها ندى تزقه يخبط فى الجزامه و يضحك
حسام / صحتك جت على الولاده ولا ايه هههههههههههههههههههههههههههههه
ندى / انا قولت تشوفها لكن ما قولتش تلمسها انا ما اضمنش تعمل فيها ايه
حسام / انتى هبله يا بنتى انا هستفيد ايه لو قتلتها انتى مش قلتى بنفسك انها هتبقى مسمار جحا بينا
ندى / معاد رضعتها
ندى تشد البنت و تدخل الاوضه و تقفل الباب محمد يبص لحسام
حسام / بتبصلى ليه بقي دى تصرفات واحده عاقله
محمد يقوم و يمشى و حسام يجرى وراه و مصطفى يقفل الباب و يدخل يخبط على ندى
مصطفى / مشيو يا قلبى خلاص
مصطفى يخبط مره و اتنين مها تطلع من اوضتها
مها / سيبها
مصطفى يدخل مع مها الاوضه
………………………………………..
فى شقه امانى
تهانى / بقي دى تصرفات ناس عاقلين الناس كلت وشنا
امانى / يعنى كان يسيب ابوه يروح لوحده
تهانى / لا بس كان خدنا معاه العروسه دى زنبها ايه تقعد كل يوم من غير عريسها كدا انتى ترضى لنور كدا
امانى / ظروف و تعدى باذن الله
تهانى / لو ما كانش عاوز اروى جرى وراها ليه اتحايل عليا عشان يتجوزها ليه
امانى / اروى ما لهاش دعوه … دى بنته برده و الضنا غالى
تهانى / و هى الحربايه بنت مها هتسيبه بالساهل كدا
نور / اسمها ندى يا عمتى
تهانى / انتى بتدافعى عنها
نور / اه ادافع حد يقولى غلطت فى ايه ما خلاص بقى ما كل حاجه اتعرفت مفيش اى لزمه اننا نكابر حسام اللى غلط مش ندى
اروى / يا سلام و حد قالها تمشى مع الواد الصايع ده الحق عليه يعنى
نور تبص لاروى و ترفع حاجبها و تضرب كف على كف و تسيب المكان و تمشى
تهانى / عاجبك يا امانى كلام بنتك حقها ما ست ندى طول عمرها حبيبتها لكن اروى كخه
امانى / بلاش الكلام ده يا تهانى انتى عارفه
تهانى / اذا كانت نور قالت كدا ياترى سى حسام هيجى يقول ايه هاه فهمينى عارفه لو كان اللى حصل ده حصل قبل الفرح اقسم بالله ما كنت جوزتهاله لكن اقول ايه الفاس وقعت فى الراس
باب الشقه يتفتح و محمد يدخل ما يسلمش على حد و يدخل اوضته و يقفل الباب و حسام يدخل يقفل باب الشقه
امانى / ماله ابوك يا حسام
تهانى / العقربه بنت الحربايه عملت ايه اكيد ما رضيتش توريكوا البت عشان تلوعكوا تربيه امها و انا عرفاها
حسام / انا طالع انام هتعوزوا حاجه
اروى / حسام
حسام / نعم اؤمرى عاوزه ايه من حسام
تهانى / انت بتكلمها كدا ليه هو مش كفايه اللى هى مستحملاه معاك يلا يا بت انجرى قدامى بلا قرف
امانى / صلى على النبى بس يا تهانى مش كدا
تهانى / مش شايفه ابنك
حسام يمشى و يرزع الباب وراه و نور تطلع من جوه
تهانى / والله ما هى بايته فيها ليها بيت لما يعرف قيمتها يبقى يجى ياخدها
نور / هو ايه اللى حصل
تهانى / اسالى اخوكى يلا يا بت
تهانى تشد اروى و يمشوا و يرزعوا الباب
نور / هو ايه اللى حصل و بابا فين
امانى / ابوكى فى اوضته انا هدخله و انتى اطلعى بصى على اخوكى
نور / حاضر
………………………………
فى المحل
احمد / اتاخرت كدا ليه يا جدع
على / كنت بوصل الحجه منال المحطه ما اعرفش ليه قررت تسافر البلد فجاه كدا
احمد / حبيبك جه و مشى ما طولش
على / هو ابن الكلب ده مش هيجيبها لبر بقى و لا ايه
احمد / يا ابنى قولتلك نكسر رجله و نربيه
على / انا طالع بالاذن
على يطلع فوق و يقف فى البلكونه الشيش مقفول فى الاوضه يتصل بالتليفون مها ترد
على / الو
مها / ازيك يا ابنى عامل ايه
على / انا الحمد لله كويس قالولى ان حسام جه تانى
مها / اقولك ايه بس جه قلب البيت و مشى عاوز يشوف بنته و الا هيرفع قضيه ضم فى المحكمه
على / يرفع و بدل المحامى عشره و يورينى نفسه ايه هو مفيش حد عارف يوقفه عند حده و لا ايه
مها / ما كفاهوش اللى عمله فيها ما كفاهوش و جاى يكمل
على / ندى عامله ايه
مها / قافله على نفسها الباب و مش راضيه تفتح
على / هو ممكن تحاولى تديها التليفون
مها / احاول بس ما افتكرش هترضى
مها تروح تخبط على باب ندى ما تردش
مها / افتحى يا ندى على عاوز يكلمك
مفيش اى استجابه
مها / ما بتردش
على / يمكن نايمه سبيها ترتاح و انا صاحى هنا قدامكوا لو عوزتوا اى حاجه
مها / كتر خيرك يا ابنى تسلم مع السلامه
على / مع السلامه
على يجيب كرسي و يقعد عليه و يفرد رجله على كرسى قدامه و يفضل قاعد باصص على شباك ندى
……………………………..
فى شقه حسام
حسام / اقسم بالله لولا انى عامل حساب ليكوا كلكوا
نور / كنت عملت ايه انت جاى دلوقت تعمل حساب فوق يا حسام انت الغلط راكبك من ساسك لراسك ما تكابرش
حسام / انتى مش مكانى عشان تحكمى عليا
نور / عارفه و لانى عرفاك انا متاكده انك ما كنتش تقصد يمكن لحظه نرفزه يمكن شيطان
حسام / اقسم بالله ما كنت عارف ان الطلق فيها اقسم بالله ما كنت اعرف انها بتولد
نور / ولو يا حسام سبتها و سافرت و قطعت الباسبور بتاعها
حسام / ما اعرفش ما اعرفش كنت مخنوق انتى ليه مش قادره تفهمى كنت تعبان اوى و مخنوق كانت بتكلمه على الموبايل كانت بتكتب رسايل
نور / ما كانتش بتبعتها
حسام / و انا اش عرفنى حطى نفسك مكانى بعد كل اللى عملته بعد كل اللى استحملته مش راضيه تنساه ليه احسن منى فى ايه
نور / انت بدات الجوازه غلط اتجوزتها غصب و بعدين ما تنساش حوار المنوم مفيش ست ترضى على كرامتها ابدا اللى انت عملته ده يا حسام بلاش احنا ربنا اللى انت عملته انت و عمى حرام
حسام يسيبها و يروح يقعد فى حته تانيه تروح وراه
نور / انت ترضالى اعيش اللى هى عاشته
حسام / انتى ما اتقدملكيش نص اللى اتقدملها مفيش حد عمل عشانك ربع اللى عملته عشانها
نور / طظ
حسام / طظ ؟؟؟
نور / ايوه طظ و الف طظ الجواز مبنى على حب و مواده مش اكراه و غصب كنت بتفكر فى ايه عقلك كان فين
حسام / يوووووه
نور / انت فاكر ان الموضوع ده ممكن يتلم بص حواليك انت لما رجعت ما سكتش كملت و بدل ما كانت ندى بس حطيت اروى فى السكه
حسام / على يدك اروى كانت على يدك
نور / انت مش عيل صغير يا حسام هى ما سقتكش حاجه اصفره
حسام / و صلحت غلطتى و اتهببت و اتجوزتها و جبتلها شبكه و انتى بنفسك شوفتى عملوا ايه يوم الشبكه انتى شوفتى اسلوبها هما نصبولى فخ و دبسونى
نور / ندى ما عادتش تنفع لك بلاش تخسى اروى كمان
حسام / اروى مين دى اللى ابصلها اصلا
نور / يعنى هتخسر الاتنين اوعى تفتكر ان العلاقه بينك و بين ندى ممكن تتصلح
حسام / ليه لا
نور / انت كمان بتسال
حسام / نور نور كفايا انا وحش خلاص ابعدوا عنى و ابعدى انتى كمان بدل ما ائذيكى
نور / انت بتقول ايه يا حسام
حسام / مش انا اللى بقول انتى اللى بتقولى انا انسان وحش و باذى كل اللى حواليا اوعى تفتكرى انى مش حاسس بنظره الكل ليا و اولهم انتى و بابا اوعى تفتكرى انى فخور بنفسى بس انا مش وحش اوى كدا
نور / عارفه
حسام / انا بحب ندى و مفيش اى قوه فى الدنيا ممكن تغير ده اللى حصل بينى و بين اروى لحظه ضعف شيطان و انا صلحت غلطتى و اتجوزتها دلوقت ممكن بكل بساطه كل واحد يروح لحاله و مش هتبقى هى وحشه و لا غلطانه هبقى انا الغلطان زى كل حاجه بتحصل انا اللى بشيل الغلط لوحدى
نور تطبطب على كتف اخوها
حسام / ما حدش قال لعمى كلمه ما حدش قاله انت اللى عملت فى بنتك كدا انت استغليت حسام لا ندى ضحيه و ابوها جنبها و امها جنبها و انا ابن الكلب اللى الكل ضده ان كنت مجرم فهما كمان مجرمين انا ما عملتش ده لوحدى كلهم اشتركوا معايا
نور / عارفه
حسام / و اروى انا ما اغتصبتهاش هى اللى جتلى لحد هنا و عرضت عليا نفسها و مش مره و لا اتنين ما حدش قال انها شمال ما حدش قال لعمتى ما عرفتيش تربى بنتك و انتى عماله ليل نهار تقطعى فى فروه ندى و تربيتها لا حسام الوحش حسام الغلطان
حسام يقوم و يروح اوضته و يقفل الباب و يقعد على السرير يعيط نور تفضل ثوانى تبص على الباب و تروح تنزل و تقفل الباب وراها
………………………………
فى اوضه محمد
امانى / ما هو حقه برده يا محمد
محمد / هو احنا عملنا ايه فى حياتنا يا امانى عشان تكون دى حياتنا
امانى / يا خويا البيوت ياما بتشوف و بكره ربك يبدل الحال
محمد / انهى حال حال نور و لا حال حسام و لا حال اخواتى
امانى / بقولك ايه احنا احسن من غيرنا و بكره كل ده يتحل و ابنك مش صغير و هيعرف يحل مشاكله بنفسه
محمد يبصلها و يسكت
امانى / ما تلوموش يا محمد اخوك الغلطان فى الاول و الاخر حسام ما يفهمش حاجه
محمد / كان كبير من شويه و يعرف يحل مشاكله
امانى / برده ما يتلامش اذا كان ابوها و امها ساعدوه و موافقين و هو ما قصرش عمل اللى عليه و زياده هناك
محمد / و اروى و سربعته انه يتجوزها زى سربعته انه يتجوز ندى من غير ما يستنى يطمن على مراته و بنته
امانى / برده هتلومه لوحده ما البت و امها وافقت برده و ما فكرتش فى بنت اخوها
محمد / مهو من الكلام الكدب اللى قاله على البت دا احنا عندنا ولايا يا امانى
امانى / كلنا بنغلط يا محمد الله هنعلقله المشنقه يعنى
صوت باب الشقه بره
امانى / مين
نور تدخل
نور / انا يا ماما
امانى / اخوكى عامل ايه
نور / الحمد لله
امانى / هيروح يصالح مراته
نور / اكيد مش النهرده حسام بجد مش طايق نفسه
امانى / اقول ايه بس الصباح رباح بكره اخده و نروح نراضيها و اهو كمان عمتك تكون هديت شويه
نور / انا داخله اوضتى عن اذنك
امانى / روحى
………………………………………………………
فى البلكونه عند على
على قاعد بيشرب قهوه تليفونه يرن
على / لو ما كنتش بشرب قهوه كنت بقول بحلم
نور / يا راجل على اساس ان تليفونى فرقع من كتر مكالماتك
على / ههههههههههههههههههههه يخربيت لماضتك عامله ايه
نور / تفتكر يعنى لو حياتى ماشيه كنت كلمتك
على / هههههههههههههههههههههه يكرم اصلك
نور / بص انا مخنوقه لدرجه انى هموت و اعيط بس مش عارفه حاجه اخر قرف
على / هاتى كرسى و تعالى اقعدى جنبى
نور / نفسى اوى اقعد على قهوه ههههههههههههههههههه
على / انا مش قاعد على قهوه انا قاعد فى البلكونه
نور / اه انا قولت من صوت الشارع انك على قهوه خصوصا لما قولت بتشرب قهوه
على / بس ايه الطموح الغريب ده اخرك تقعدى على قهوه
نور / احلامى متواضعه شوفت بقى
على يشوف ندى خارجه من باب العماره و شايله بنتها و شنطتها
على / انا لازم اقفل ممكن اكلمك وقت تانى
نور / اكيد
على / سلام
على يقفل السكه و ينزل يجرى على ما يوصل للبوابه يلاقى ندى وصلت لناصيه الشارع يمشى وراها لحد ما يحصلها
على / اوصلك
ندى تبصله و تكمل مشى
على / بكلمك على فكره
ندى تقف و تبصله و تبص الناحيه التانيه و هى بتنفخ و تكمل مشى
على / طب رايحه فين و انا اوصلك معايا عربيه
ندى / كويس روح هاتها
على / ثوانى ما تتحركيش
على يجرى يروح يجيب العربيه يرجع ما يلاقيش ندى ينفخ و يمشى بالراحه لحد ما يشوفها من بعيد يروحلها
على / مش عيب حركات العيال دى
ندى / هو انا لو صرخت دلوقت و قولت بتعاكسنى تفتكر حد من الناس دى هيدخل
على / ههههههههههههههههههههه و اهون عليكى انضرب
ندى / انت عاوز ايه
على / اركبى
ندى / طريقنا مش واحد
على / اركبى
ندى تركب و ما تبصلوش
على / رايحه فين
ندى / رايحه فى اى داهيه تعرف السكه و لا اوصفهالك
على / لا عارف دانا مقيم هناك هههههههههههههههههههه
على يسوق و هو بيلعب فى موبيله و ندى عينها معاه يحط الموبايل
ندى / عرفت دلوقت ليه ماما و بابا ادوك وش
على / عقبالك
ندى / انا ما بكررش اخطائى
صمت ثوانى
على / بجد كنتى ناويه تروحى فين
ندى / فى اى داهيه
على/ بتكلم جد
ندى / مين قالك انى بهزر اسمع لو افترضنا انك فعلا كنت بتحبنى و انك استنتنى و كنت ناوى تدور عليا و الفيلم ده تفتكر انى نفس البنت بص فى وشى لسه شايف ندى البت الهبله اللى ما بتفكرش فى بكره
على / اه نفسها
ندى / نفس الشكل بس
على / لا لا نفسها بدليل انك تنزلى ببنتك فى وقت زى ده تمشى فى الشوارع زى الهبله ما انتش عارفه رايحه فين انتى نفس البنت اللى ما بتفكرش فى اى حاجه بتنفذ اى فكره مطرقعه بتيجى فى دماغها
ندى تبصله
على / و انك تركبى معايا و تسبينى اسوق بيكى يا عالم واخدك فين دا اكبر دليل انك عارفه انى ما كنتش غلطه فى حياتك
ندى تبص الناحيه التانيه و ما تقدرش تمسك دموعها بس تحاول تداريها عن على
على / انا عارف انتى حاسه بايه
ندى تصرخ فيه
ندى / لا ما انتش عارف ما حدش عارف ما حدش كان مكانى كلكوا كنتوا هنا كلكوا سبتونى ما حدش سال عنى ما حدش شاف اللى شفته
على يناولها منديل
ندى / انا ما بنامش قالولى خليكى قالولى هنوفرلك اقامه ما تنزليش معرفش ليه كنت مصره انزل مصر ليا مين هنا مليش حد لا عارفه اكل و لا اشرب و لا ارتاح ازاى اثق فيهم بعد كل اللى عملوه ازاى كنت بالسذاجه دى ازاى ضحكوا عليا كلهم كدا
على / انا ….
ندى / و انت عملت ايه رد قولى عملت ايه وقفت تتفرج و لا اشتركت معاهم
على / انا !!!
- يتبع الفصل التالي اضغط على ( رواية سلف و دين ) اسم الرواية