Ads by Google X

رواية سلف و دين الفصل العشرون 20 - بقلم لولو محمد

الصفحة الرئيسية

  رواية سلف و دين كاملة بقلم لولو محمد عبر مدونة دليل الروايات 


 رواية سلف و دين الفصل العشرون 20

فى شقه امينه
امينه / هتفضلى لاويه بوزك لحد امتى
نهاد / واحده مستنيه ورقه طلاقها عوزاها تكون ازاى
امينه / شوف و انا اللى قولت هتقولى واحده جوزها فى السجن و ممكن يعدموه صحيح
نهاد / انا وديت الفلوس للمحامى و عملت اللى عليا مفيش فى ايدى حاجه تانيه اعملهاله للاسف
امينه / انا روحت لحسام و كلمته
نهاد / و طبعا ملاك برئ ملوش اى علاقه و مروان اتجنن و بيجيله تهيات صح
امينه / حسام معاه حق حسام نزل مصر بعد ما مروان اتقبض عليه يعنى ما يقدرش يلفقله حاجه زى دى
نهاد / انتى ازاى مستهونه بحسام ده على فكره حسام نزل مصر تلت ايام بس رقى مروان و اتسبب فى استقالتى
امينه / طب ما كان اولى ينقل نفسه مصر بدل ما قدم استقالته من هناك و نزل هنا من غير شغل
نهاد / انتى مصدقاهم و مكدبه ابنك هقدر اعملك ايه انا بقى
امينه / سيبك انتى المحامى قالك ايه
نهاد / هيقول ايه عاوز فلوس زياده عشان الحبايب اللى هيظبطوا الموضوع و الله انا شاكه ان الراجل ده بيشتغلنا م نشوف محامى غيره احسن
امينه / هنشوف و هنجيب فلوس
نهاد / منين ما انتى بعتى دهبك و بعتى الارض فاضل تبيعى كليتى بالمره
امينه / ربك هيفرجها تصبحى على خير
……………………………
فى شقه حسام
حسام نايم تليفونه يرن يرد و هو نايم
اروى / وحشتنى
حسام يفتح عينه و يبص على الموبايل
حسام / انتى مجنونه يا بت افرضى كان حد غيرى اللى بيرد
اروى / و لا يهمنى
حسام / يا جامد
اروى / انا زعلانه منك كدا تقلقنى عليك مش تطمنى انك روحت مش تكلمنى
حسام / كنتى قلقانه عليا يعنى
اروى / اخص عليك و انت عندك شك يعنى على فكره انا اتخانقت مع ماما جامد اوى
حسام / ما كانلوش لزوم بصى موقف و عدى انسى
اروى / ان كان على الموقف ده ممكن انساه عادى هههههههههههههههههههه
حسام / انتى صاحيه ليه لحد دلوقت
اروى / مش عارفه انام عماله افكر فيك
حسام / هههههههههه انتى مجنونه صح
اروى / و انت السبب انا اصلا مش قادره اصدق احنا مجانين اوى على فكره تعرف انا طول عمرى جنبك بس عمرك ما شوفتنى كنت هتجنن بجد تعرف و انا بفرش الشقه كنت كل مره ادخلها ادعى ربنا اوى انها تكون شقتى انا
حسام / للدرجادى
اروى / اول مره فرشت السرير نمت عليه و ما كنتش عاوزه اقوم و اقول المفروض ده يكون سريرى انا المفروض ان انت تنام عليه جنبى انا بس حتى الاحلام فى ناس بتطلعلك فيها
حسام / هههههههههههههههههههه
اروى / نور دخلت الاوضه و قعدت تقولى انتى سيبانا طالع عينا و نايمه هنا قومى ساعدينا فقومت و عدلته و انا قلبى بيتقطع من جوه انى بعدله عشان واحده تانيه تنام فيه
حسام / النصيب
اروى / النصيب انت اصلا لو لفيت الدنيا مش هتلاقى واحده تحبك قدى مش هتلاقى واحده عارفه قيمتك قدى
حسام / كتر خيرك يا ستى
اروى / هو انا هشوفك تانى امتى
حسام / ما تهدى يا بت مالك الله هتودينا فى داهيه
اروى / اخص عليك و انا اللى فكراك عاوز تشوفنى انت كمان
حسام / مش كل مره تسلم الجره يا بنتى
اروى / انا مستعده اروح لابوك و اطلب ايدك منه على فكره
حسام / انتى عبيطه يا اروى ندى لسه على زمتى
اروى / بعد اللى عملته
حسام / و حتى لو طلقتها ما حدش هيوافق نتجوز بالبساطه دى الكل هيعترض
اروى / و هما مالهم مانت اتجوزت ندى فى اسبوع و لا نسيت
حسام / الوضع كان مختلف ساعتها ما كنتش متجوز لكن دلوقت الكل هيقول على الاقل اصبر عمك يخرج من المستشفى اصبر على الاقل نشوف ندى فين على الاقل اطمن على بنتك
صمت
حسام / اروى
اروى / نعم
حسام / اهدى و خلى الامور تهدى و كل حاجه هتتحل لوحدها
اروى / انت شايف كدا
حسام / انتى شايفه غير كدا
اروى / مش مهم انا شايفه ايه مدام انت شايف كدا خلاص ماشى اللى تشوفه
حسام / بالعكس لازم تبقى مقتنعه انا مش عاوز حد يشوفك و انتى نازله من عندى مش عاوز حد يطلعلى فجاه و يشوفك هنقولهم ايه انتى هتقولى ايه شكلك قدام اهلك هيبقى ازاى شكلى انا هيبقى ازاى
اروى / خلاص اللى تشوفه حاضر
حسام / يااااه دا الوقت اتاخر اوى كل ده كلام هههههههههههههههههه يلا تصبحى على خير
اروى / لازم نقفل يعنى لا هنتقابل و لا حتى نتكلم
حسام / لا هنتكلم بس ننام دلوقت و الصبح نتكلم
اروى / ماشى سلام
حسام / سلام
حسام يقفل و ينفخ و يحط التليفون جنبه و ينام
………………………………
تانى يوم فى شقه منال
سمر / على عينى اسيبك لوحدك اول ما ترجعى من السفر لازم تكلمينى تطمنينى عليكى احنا خلاص بقينا اهل
منال / اكيد
أية / هتوحشينى
منال / خلى بالك من عمر بيحبك
أية / اكيد فى عينى
على / القطر يا ست الكل
منال / جايه اهو
منال تقفل باب الشقه و ينزلوا فى الاسانسير
…………………………
فى شقه امينه
امينه / نهاد … نهاد
نهاد تطلع من جوه بتغسل المواعين
نهاد / نعم
امينه / السمسار اتصل و قال فى زبون عاوز يشوف الشقه هروح افرجهاله و هطلع من هناك على المحامى
نهاد / طب ثوانى اللبس و اجى معاكى
امينه / لا خليكى انتى مفيش لزوم خلصى اللى فى ايدك و حضرى الغدى انا كنت مطلعه فرخه من امبارح فى رف التلاجه اعملى عليها اى حاجه على ما ارجع سلام
امينه تمشى و نهاد واقفه تنفخ
نهاد / و انا كنت اتجوزت بسلامته عشان اطبخ لامه و لا ايه ايه القرف ده
……………………….
فى محل على
تليفون على يرن
على / الو ازيك عاش من سمع صوتك
نور / مش هتتخيل الفتره اللى فاتت و اللى حصل فيها
على / انا دلوقت لو شوفت ديناصور معدى فى الشارع ووقف طلب سندوتشين فول و حاسبنى هديله الباقى عادى جدا و لا اى اندهاش
نور / هههههههههههههههههههه يا راجل
على / انا ما نمتش من امبارح من كتر التفكير يا بنتى والله
نور / ليه خير احكي ايه اللى حصل
على / بصى هو اقل حاجه حصلت تحول مرات ابويا من الساحره الشريره للسندريلا يعنى انا عاوزك تشوفيها و هى بتعامل الحجه منال بكل الحب و كانهم متربيين سوا من كى جى تو مثلا
نور / هههههههههههههههههههه طب ما يمكن اتغيرت و بقت كويسه
على / على مين يا ماما دا انا تربيه ايدها انتى بتقولى ايه اكيد فى مصلحه فى الموضوع
نور / على العموم اطمن طنط منال مش سهله و بتفهم فى الناس كويس
على / غريبه مع انك قولتيلى كتير انها كانت بتدافع عن طليقك
نور / هى كانت دايما بتقول انها بتدافع عن بيتى و بتحاول تهدى سرنا و تخلينا سعدا على الاقل ابقى انا عملت اللى عليا كلو ناحيته
على / لا بس هو خد جزائه بجوازته من واحده زى دى صدقينى هتخلص القديم و الجديد من على جتته
نور / تصدقنى لو قولتلك مش فارق معايا
على / احسن
نور / انا طلاقى الفتره دى يبان تافه اوى جنب الحاجات الكتير اللى حصلت فى حياتى تقريبا مش بيفوت يوم من غير مشكله جديده و خناقه العيله كلها مش مظبوطه كان فى لعنه و حلت علينا ما نعرفش ناخد نفسنا من مستشفى لمشكله لخناقه لعمليه لزعل لقرف مفيش راحه مفيش فاصل
على / انتى اللى لسه فرفوره
نور / افندم
على / ههههههههههههه انتى بتزعلى و لا ايه انا اقصد ان المفروض تكونى عديتي على المرحله دى من زمان
نور / حساك مبسوط
على / مش مبسوط و مش زعلان يعنى
نور / طب احكيلى بقى انت ايه الجديد
على / فاكره البنت اللى كنت متقدملها و اهلها رفضونى
نور / مالها
على / عرفت النهرده ان اهلها غصبوها تتجوز هى ما باعتنيش عشان الفلوس هما غصبوها و عرفت انها كانت بتحاول تتصل بيا كانت بتتصل عشان تسمع صوتى
نور / بس فى جميع الاحوال هى متجوزه يا على و جوزها اكيد
على / جوزها طلع عيل ابن كلب ما يستاهلش ضافرها
نور / ما يغيرش حقيقه انها متجوزه و انك مهما حاولت ما ينفعش اصلا حرام انك تحاول تقرب منها و هى على زمته دا لو مخطوبين بس حتى حرام ما بالك بقى لو اتجوزوا
على / يعنى اعمل ايه افضل مكانى ما اتحركش ما اروحش ادور عليها و اخلصها من اللى هى فيه
نور / ما اعرفش ما اقدرش افيدك بس اكيد فى حد تانى اولى منك اهلها مثلا
على / اهلها اللى غصبوها تتجوز واحد ما بتحبوش انهى اهل دول اللى يبيعوا بنتهم عشان الفلوس انا مش قادر اتخيل اللى شافته معاه
نور / ناوى على ايه طيب
على / هقلب الدنيا عليها مش ههدى الا لما الاقيها حتى لو قلبت الكره الارضيه كلها عليها شبر شبر و لما الاقيها بقى
نور / ايوه هتعمل ايه
على / مش عارف و مش عاوز افكر فى اى حاجه غير انى الاقيها و انها لسه بتحبنى زى ما بحبها غير كدا مش هقدر استوعب
نور / ربنا يوفقك للى فيه مصلحتك
على / ادعيلى قوى
نور / ربنا يجمعكوا فى الحلال يا على انت طيب و ابن حلال و تستاهل كل خير
على / و انتى كمان يا نور بت جدعه و طيبه اوى و صدقينى كلامى معاكى الفتره اللى فاتت فرق معايا كتير اوى
واحد من العمال يشاور لعلى
على / انا لازم اقفل معلش بيشاورلى مش عارف عاوزين ايه
نور / سلام
على / هضايقك لو كلمتك تانى بالليل شويه
نور / انا هبقى اكلمك
على / تمام هستنى سلام
………………………..
فى شقه عمر
أية / انت فى حاجه مضيقاك يا عمر
عمر / لا ليه
أية / يعنى مش عارفه حساك بعيد اوى
عمر / بعيد ايه انا لازق فيكى
أية / بس مش بتتكلم معايا و لا تهزر و لا تضحك زى الاول قولى لو زعلتك فى حاجه قولى
عمر يمسك ايدها و يبوسها
عمر / لو وصلك الاحساس ده بجد فانا اسف انا بجد ما كانش قصدى بس اديكى شايفه الواحد دماغه فى مليون حاجه و مش ملاحق
أية / طب الحمد لله
صمت
أية / الله يا عمر انت سكت تانى ليه
عمر يقوم يقعد
عمر / ههههههههههههه ايه يا بنتى عوزانى اقول ايه طيب و انا اقوله
أية / احكى اى حاجه اخبار الكليه ايه اخبار الشركه اخبار على اخبارك انت اى اخبار المهم افتح اى حوار و ارغى معايا الله
عمر / ههههههههههههههه الكليه مفيش جديد الشركه فى شويه شغل حلوين اوى مطلعين عينى و سحلينى اما بقى على فربنا يعينه
أية / ليه يابنى فى ايه
تليفون عمر يرن
عمر / ثوانى … الو ايوه يا غاده …… لا مش ناسى بكره الصبح هجيبهولك معايا الكليه … لا مش هعرف اجى الشركه ……. على عنده حوار كدا و مش هينفع اسيبه ….. لما اشوفك بكره هحكيلك ……. هههههههههههههه عارف …….. سلام
عمر يقفل يلاقى أية بصاله
عمر / فى ايه
أية / انت بتضحك على ايه
عمر / بتقولى ده اللى باخده منك تفتح الموضوع و تسبنى مع فضولى
أية / بتضحك اوى الجمله دى فى حبوب زغزغه بين الحروف
عمر / ههههههههههههههههه انتى لسه بتغيرى منها يا بنتى و لا ايه
أية / انا مراتك على فكره و اغير براحتى ما حدش له عندى حاجه
عمر / طبعا يا باشا حد يجرؤ صحيح انتى عارفه ان الحجه منال وصت على انه ينجز فى حوار الفرح و اتفقوا انه بعد الاربعين علاطول
أية / كويس والله فرحى بيحدد معاده اخوك و طنط منال هو انا ليه حاسه ان انا و انت ما لناش راى فى الموضوع ده
عمر / هنعيد الموضوع ده تانى
أية / لا و على ايه
عمر / انا و انتى متفقين من الاول اننا مش هنعمل فرح صح
أية / و انا قولتلك اصلا انه مش فارق معايا
عمر / الحج انور وصى ان يتعملك فرح بس الراجل مات ينفع احنا نعمل فرح و فى عندنا حاله وفاه ابسط قواعد الاصول اننا نستنى على الاقل الاربعين
أية / طب المصيف طب لبس الكليه طب باقى الحاجات اللى ورانا
عمر / و ده ايه علاقته بده يا أية شوفى يا قلبى انتى نفسك تعملى ايه و نظبط انا و انتى
أية / اما نشوف
عمر يضربها على قفاها تضحك يضحك و يخدها فى حضنه
أية / بطل بقى قفايا ورم
عمر / ههههههههههههههههههه انتى عاوزه تروحى مصيف فين يا ست البنات
أية / ياعم اي حته اشوف البحر و ادلدل رجليا و اروح
عمر / هههههههههههههههههه حاضر من عنيا هشوف فى الكليه و اطلع معاكى يومين فى اى حته
أية / يومين بس
عمر / هتحتاجى اكتر من يومين عشان تدلدلى رجليكى فى البحر
أية / انت رخم اوى هو فى كدا
عمر / اه فى عادى بصى سيبيها لله و انا هحاول اظبطها
أية / اما نشوف
عمر يجى يضربها على قفاها تنزل راسها و تضغطها فى كتافها يضحكوا
………………………………….
تانى يوم على السلم فى بيت حسام
اروى بتتسحب على السلم لحد ما توصل لشقه حسام و تضرب الجرس مره و اتنين و تلاته ما حدش بيفتح تمسك التليفون و تتصل
حسام / ايوه يا اروى ازيك
اروى / هو ده اللى اتفقنا عليه لما تصحى هتكلمنى
حسام / معلش والله بابا صحانى و روحنا لعمى خرج من المستشفى النهرده
اروى / بجد !!!ما كنتش اعرف
حسام / ملحوقه هبقى اكلمك بعدين لما اروح
اروى / لما تروح ليه انت فين
حسام / لسه قايلك انى بره مع بابا عند عمى
اروى / يوووووه اعمل ايه انا دلوقت انا قدام شقتك
حسام / انتى يابت غبيه و لا ايه ده اللى اتفقنا عليه امبارح انتى عاوزه تعملى فى نفسك ايه
اروى / يوووووه خلاص بقى همشى همشى
حسام / امشى ربنا يهديكى امشى سلام
اروى تقفل السكه و تنفخ و تلف تلاقى نور طالعه شايله رصه هدوم مكويه على ايدها
نور / اروى ؟؟؟؟ بتعملى ايه هنا
اروى / انا؟؟؟ هكون بعمل ايه يعنى عاجبك عمايل اخوكى دى على فكره دا مش طبيعى ابدا ما يصحش كدا
نور / ليه هو عمل ايه
اروى / يعنى هو ماما غلطت اوى للدرجادى انه يقاطع العيله كلها الحق عليها انها كانت متعاطفه معاه يعنى
نور / يا اروى الموضوع
اروى / طب انت زعلان من ماما ممكن نبلعها طب انا اتصل بيك اطمن عليك ما تردش عليا ليه و لا هو مستكبر يكلمنى
نور / يمكن كان مشغول فى حاجه يعنى او يمكن
اروى / ما يمكنش يا نور على فكره احنا مش جيران و لا معارف احنا قرايب انا بنت عمته يعنى صله رحم امال لو ما كنتش اكتر حد بيسال عنه فى الغربه بقى
نور / يا اروى راعى ظروفه
اروى / و هى ظروفه انى ابقى واقفه على باب بيته ما يفتحليش حتى هى دى اصلا اخلاق لا بجد والله زعلانه
نور / بس حسام مش جوه
اروى / يا سلام امال فين
نور / خرج من بدرى
اروى / امال انتى طالعه لمين
نور / كنت بكويله هدومه و طالعه احطها فى دولابه و نازله بس انتى مش كنتى عديتى علينا و انتى طالعه كنت وفرت عليكى الوقفه دى
اروى / ما اعرفش انا بجد كنت متنرفزه جدا و كنت جايه اتخانق دا لو كان فتح كنتوا سمعتوا صوتى من تحت بجد ما كانش العشم ابدا
نور / ما تكبريش الموضوع بقى استنى هحط الهدوم فى الدولاب و ننزل سوا اما انا عامله شويه رز بلبن تاكلى صوابعك وراهم
اروى / معلش يا نور مليش نفس خالص
نور / الله و بتلومى عليه ما انتى هتاخدينى بذنبه اهو
اروى / لا بجد اللى عمله اثر فيا اوى
نور / بس يا اوفر بقى وسعى اما احط الغسيل ايدى وجعتنى
………………………………………
تانى يوم فى المحل
عمر / سفر ايه يابنى اللى بتتكلم عنه دا هبل على فكره
على / انا ما قداميش اى حل تانى
عمر / هتروح فين يابنى طيب هتسال مين هتبدا منين يعنى انت عارف انت بتعمل ايه اصلا
على / بص انا مش هقدر اسيبها فى بلد غريب لوحدها
عمر / انت بترجعهاله يا على هربت منه و هو ما عرفش يوصلها فنزل مصر و انت هتروح ترجعهاله مصر يا على دا اللى انت بتعمله
على / لا مش هترجعله
عمر / هى على زمته يا على و حامل منه
على / ماشى
عمر / هو ايه اللى ماشى ما تكلمنى يابنى زى ما بكلمك
على / انا مش زيه انا مش هقدر احط راسى على المخده و انام و انا مش عارف هى فين انت متخيل ممكن تكون فين دلوقت ممكن يكون جرالها ايه واحده فى ظروفها دى بتبقى تحت رعايه اهلها معززه مكرمه فى بيتها مش فى بلد غريب لوحدها يا عالم معاها فلوس و لا لا بتنام فين بتاكل منين انت ايه يا اخى قلبك حجر
عمر / انا خايف عليك انت مش هتستحمل جرح تانى يا على مش هتستحمل تشوفها بتضيع منك تانى يا على
على / ما انا برده مش هستحمل قلقى عليها امها قالتلى انهم اجبروها انت متخيل يعنى ايه اجبروها
عمر / ندى حامل … حامل يا على
على/ حاولت تعيش و ما قدرتش حاولت تتاقلم على الوضع اللى اتفرض عليها و ما قدرتش ما قدرتش
عمر / و انت هتاخد واحده بعيالها بلاش يا على هى هتسيب عيالها لجوزها يربيهم و لا الزفت ده هيسيبلك عياله تربيهم فوق يا على فوق
صمت ثوانى
عمر / ما تعشمش نفسك بحاجه ربنا مش كاتبهالك ندى ما عادتش تنفعلك بكل الظروف و المقاييس ما تنفعش
على / حتى لو معاك حق حتى لو ربنا مش كاتبهالى مش هقعد حاطت ايدى على خدى و اشوفها فى مشكله و اسكت
عمر / و انت اش عرفك انها فى مشكله ما يمكن هربانه منه بمزاجها هتروح انت ترجعهاله هتروح ترجعها لاهلها اللى اجبروها تتجوزه
على / هقف جنبها يا عمر هخليها تعرف انها مش لوحدها هساعدها
عمر / انت غاوى تعب يا ابنى
على / اه اعتبرنى كدا بس انا مش هقدر اعمل غير كدا
عمر / خلاص يا على اعمل اللى يريحك ربنا يوفقك
……………………………
فى شقه مها
مصطفى / هو مفيش اى اخبار عن حسام
مها / قطعت و قطعت سيرته
مصطفى / هو ازاى ساكت كدا
مها / عشان واطى انا اللى عملت فى بنتى كدا انا اللى سودت الدنيا فى وشها لحد اما طفشت
مصطفى / ما تلوميش نفسك انا السبب مش انتى بس كنتى عوزانى اعمل ايه
مها / كنت تسمعها تفهمها تحس بيها هو يعنى ان ما كانش على يبقى لازم يكون حسام ما ينفعش كنا نصبر
مصطفى / فات الوقت على الكلام ده خلاص
مها / ما فاتش على سال و عرف انها ما نزلتش مصر و ماشى فى التاشيره هروح انا و هو ندور عليها
مصطفى / على ؟؟
مها / انا كلمته و حلفلى ان مفيش اى جواب وصله منها
مصطفى / الكلام كان مكتوب بخط ندى انا عارف خط بنتى
مها / بس ما بعتتوش
مصطفى / و انتى مصدقاه
مها / اه مصدقاه عشان بيحاول يدور عليها ما راحش نام فى المروحه و قال و انا مالى
مصطفى / ربنا يردك لينا يابنتى
مها / ربنا يسامحنا على اللى عملناه فيكى يا ندى
……………………………………
فى شقه نور
اروى / انا همشى بقى
نور / ما تخليكى قاعده معايا يا بت
اروى / ما انا بقالى فوق الساعتين قاعده
نور / جزمه اقسم بالله
باب الشقه يتفتح و حسام و محمد يدخلوا اروى تقوم تقف حسام يشوفها وشه يتخض
اروى / طبعا ليك حق
نور / فى حد يعمل كدا يا حسام
حسام يبص لاروى
نور / على فكره اروى زعلانه منك و كانت هتمشى و انا اللى مسكت فيها
محمد / فى ايه يا ولاد مزعل بنت عمتك ليه يا حسام
حسام / و انا عملت ايه
اروى / يعنى بتنكر ما عملتش حاجه بتبلى عليك انا
حسام / انا مش فايق للكلام ده عن اذنكوا
نور / فى ايه يا حسام مالك بتتكلم كدا ليه على فكره اروى معاها حق
حسام / فى ايه يعنى
اروى / اتصلت بيك كام مره ما بتردش عليا ليه انا مالى باللى ماما عملته
حسام ينفخ اروى تبتسم
حسام / يمكن مشغول مثلا يمكن فى قعده رجاله و سايبه صامت مثلا
اروى / جديد الكلام ده يا خالى هما صحيح بيقولوا ان قاعده الراجل بميت ست بس برده لما بتيجى الست يغور الميه راجل
محمد / هههههههههههههههههه هو انتى حد يقدر يغلبك يا بت غلباويه زى امك
حسام / ههههههههههههههههههههههههه مشكله اقسم بالله بقولكوا ايه هو القاعده دى ناشفه ما فيهاش لقمه انا جعان
محمد / و انا هموت من الجوع هو صحيح امك فين يا نور مش شايفها
نور / عند عمتى بتصالحها مهو اصل الموضوع طلع كبير و احنا مش واخدين بالنا
حسام / يا سلام هو مين اللى له حق يزعل
محمد / عمتك عيطت جامد اوى امبارح على فكره
نور / انا راييى تروح تراضيها يا حسام هى اكيد ما كانتش تقصد
اروى/ و فى الاول و الاخر عمتك و هى اللى مربياك
حسام / حاضر هتغدى و اروحلها فى اكل و لا انزل اكل بره
نور / ثوانى هغرف ايه الطفاسه دى
نور تدخل
اروى/ انا هتغدى معاكوا عشان حسام يبقى يوصلنى و بالمره يصالحنى
حسام / و انا تحت امرك فى اى حاجه
محمد / هقوم اغير هدومى عن اذنكوا
محمد يقوم
حسام / ايه الجنان ده هو ده اللى اتفقنا عليه
اروى / اعملك ايه ما انت اللى جننتنى ما عرفتش انام من امبارح طول الليل بتلوى فى السرير
حسام / هههههههههههه يا شيخه
اروى / و انت عندك شك
حسام / طب و اخرتها
اروى / مليش فيه انت بتاعى و مش هتنازل عن لحظه اقضيها معاك عمك و خرج من المستشفى و انا و انت و بنحب بعض و لو على ماما انا هقنعها
حسام / و لو على اهلى
اروى / زى ما اقنعتهم يجوزوك ندى تقنعهم يجوزونا و لو ما قدرتش انا هقنعهم بطريقتى
حسام / وايه هى الطريقه دى بقى ان شاء الله
اروى/ هقف على سور البلكونه و اقولهم لو ما جوزتونيش الواد ده هموت نفسى
حسام / ههههههههههههههههههههه تعمليها
اروى / خلاص يبقى تسمع الكلام من سكات
حسام / و انا اقدر اعمل غير كدا
اروى / ههههههههههههههههههههه
نور تطلع شايله اطباق
نور / اتصالحتوا يعنى طب انجرى ياختى ساعدينى
اروى / من عنيا حاضر
اروى و نور يدخلوا جوه و حسام بيهز راسه و هو بيضحك
…………………………………..
فى الشقه عند سمر
سمر / يا بنتى ارحمى امى
أية / ماما انتى هتجننينى مش دى طنط منال اللى فضلتى بايته معاها تروقى و فطار و غدى و عشا دلوقت احنا مالنا
سمر / يا بنتى انا عامله عليكى هو هيفضل سايبك كدا زى البيت الوقف اصلا مش قادره افهم انهى حجر تنام جنبه موزه زيك و ما يحاولش معاها انا هتجنن
أية / ههههههههههههههههههههه
سمر / شلينى شلينى و اضحكى كمان
أية / عوزانى اقولك ايه يعنى
سمر / بت انتوا دخلتوا و مخبيه عليا
أية / وهخبى ليه هى عيب و لا حرام لو كان فى حاجه حصلت كنت قولتلك
سمر / امال فى ايه ماله
أية / يا ماما هو انتى مش عايشه معانا و لا ايه
سمر / والله يعنى انا السبب امشى لو انا اللى وقفه فى زوره امشى
أية / هههههههههههههه يا ماما عمر نفسه حياتنا تبدا بدايه ما تتنسيش و اديكى شايفه الظروف
سمر / انا نفسى اشيل عيالك قبل ما اموت يا بنتى
أية / بعد الشر عليكى يا ماما ما تقوليش كدا احنا لسه صغيرين ما تخافيش
سمر / تعرفى انا الغلطانه الكلام ما ينفعش يكون معاكى انا هتكلم معاه
أية / تتكلمى معاه فى ايه يا ماما
الباب يتفتح و عمر يدخل
عمر / مساء الخير متجمعين عند النبى
سمر / جيت فى وقتك انا عوزاك
عمر / خير
أية / يا ماما لو سمحتى
سمر / اسكتى انتى ما تدخليش فى الحاجات دى
عمر / هو فى ايه بالظبط
أية / مفيش حاجه تعال غير و انا هغرفلك
سمر / و ماله غير و اتغدى و برده هنتكلم
أية / يا ماما خلاص بقى
عمر / لا انا عاوز اعرف فى ايه
سمر / طب اقعد
…………………………………………….
فى عربيه حسام
حسام / وصلنا انزلى و انا هركن و اجيلك
اروى / انت زعلان و لا ايه
حسام / هزعل من ايه يعنى يا اروى هو انتى عملتى حاجه
اروى / لا ما عملتش انا بحبك و مش قادره انت ليه قاسى عليا اوى كدا
حسام / انا برده
اروى / ارجوك يا حسام ما تحسسنيش انى راميه نفسى عليك ما تحسسنيش ان اللى حصل بنا كان غلطه انا مليش غيرك
حسام / تعرفى تسكتى يا هبله غلطه ايه هو انتى كنتى سقتينى حاجه اصفره مثلا
اروى / كانت هتجيب معاك نتيجه مثلا
حسام / هههههههههههههههههههههه انزلى يا بلوه دا انتى ما لكيش حل
اروى / لا روح اركن و نتمشى سوا
حسام / امرى لله تعالى ندور على ركنه صبرنى يارب
اروى / يارب ههههههههههههههههههههههه
……………………………
فى شقه عمر
عمر / هههههههههههههههههههههههههههههه
سمر / انت بتضحك على ايه
عمر / يعنى حضرتك عاوزه ايه دلوقت عشان ابقى فاهم
سمر / بص انا مقدره كل الظروف بس انا ام و من حقى احس ان بنتى غاليه
عمر / و انا رخصتها
سمر / اه و مش هنكر انها ساعدتك و رخصتلك نفسها بس برده اسمع يا عمر لو انت مش عاوز أية
عمر / لحظه بس توفيرا للوقت و المجهود لو انا مش عاوز أية ايه فى الدنيا هيخليها على زمتى لحد دلوقت
سمر/ ما انا مش فهماك فى الاول قولت تركز فى الامتحانات و قولنا ماشى نزلنا شوفنا الفستان و الدنيا اتقلبت علينا و خناق ليل نهار و قرف
عمر / والله
سمر / و لما هديتوا الحج انور مات و لازم نستنى و لما السنويه تخلص هيظهرلنا مصيبه جديده و هتفضل ام الجوازه دى واقفه كدا
عمر / انتوا اللى نحس اعمل ايه هههههههههههههههههه
سمر / ما تعملش انا اللى هعمل انا هاخد بنتى و نعيش فى شقتى … شقه ابوك الحج و لما الظروف تتحسن نعمل فرح و تاخدها تعيش معاك هنا
أية / ماما
سمر / اصل طول ما هى فى حضنك مش هتحس بقيمتها و اصلا انا بصراحه كدا بدات اشك فيك
عمر / ههههههههههههههههههههههههههههه
سمر / انا قولتلك و اعمل اللى يريحك
عمر / لا والله اعملى اللى يريحك انتى عشان انا مش فاهمك بصراحه مفتاح الشقه هديهولك و اعملى اللى يريحك و اه مفتاح المحل كمان الاتنين هدخل اجيبهملك من جوه و عيشى و أية تشوف هترتاح فى انهى بيت اكتر
سمر / ايوه لوى الدراع اهو
عمر / انتى اللى بتلوى دراعى مش انا
سمر/ اعمل اى حاجه حسسنى ان البت دى ليها قيمه عندك حسسنى ان ليها تمن مش كدا
عمر / تمنها كام سعريها كدا و قوليلى انا بنتى تساوى كذا
سمر / لو على الفلوس فا انا بنتى تساوى وزنها دهب و زياده و لا انت عندك اعتراض
عمر / لا ما عنديش
سمر / خلاص ما تطلبش منى اتمنها
عمر / أية
سمر /ملكش دعوه بيها كلمنى انا
عمر / انتى عاوزه ايه يا أية
أية / مش عاوزه اعيش اللحظه دى عشان اتخنقت
أية تدخل اوضتها و ترزع الباب وراها
عمر / انا قولت لأية ان الفرح هيتعمل بعد الاربعين و هى وافقت و بيتهيالى احترام الميت اللى بكيتى عليه بالدموع مش تلكيكه عن اذنك
سمر / على الاقل هاتلها شبكه اخطبها زى الناس
عمر / حاضر حاجه تانى
سمر / كتر خيرك
عمر يدخل اوضته يلاقى أية بتعيط يقعد جنبها
عمر / ممكن اعرف بتعيطى ليه
أية / اتخنقت و تعبت
عمر / و انا اللى تاعبك
أية / هو انا مش زى اى بنت من حقى فى حياه مستقره و هاديه هفضل لحد امتى فى الوضع ده فى المشاكل دى هتفضل لحد امتى تقولى رخصتى نفسك هتفضل لحد امتى ت…..
عمر ياخد أية فى حضنه و يطبطب عليها تعيط
عمر / حقك عليا
أية تعيط
عمر/ انا بكره ناخدك و تنقى الشبكه اللى تعجبك
أية / و ده هيغير نظره ماما لجوازنا هيخليها تبطل تعايرنى
عمر / امك هتفضل طول عمرها امك لو وقفنا على راسنا مش هتتغير فطنشى
أية / تعبت
عمر / حقك عليا … تحبى تخرجى
أية تبصله
عمر / قومى اللبسى تعالى نتغدى بره انا جعان و نشوف فيلم سينما و نتعشى فى اى حته ايه رايك
أية / ماشى
عمر / قومى يلا هستناكى بره
عمر يخرج من الاوضه و أية تقوم تلبس
……………………………….
فى شقه تهانى
اروى / ما تكبريش الموضوع بقى يا ماما دا حسام جايلك لحد عندك
تهانى / هو عارف انى ما كنتش اقصد لزمته ايه القمصه بقى
حسام / عمتى خلاص بقى كفايا انك اتكلمتى قدام حماه نور
امانى / كانت حماتها
حسام / يعنى هيشمتوا فيها اكتر اذا كان اخوها مراته ما استحملتوش و طفشت احنا هنستحملها
امانى تبص لتهانى
تهانى / والله يابنى ما كان فى بالى حاجه زى دى ابدا
حسام / عارف و عارف قد ايه حضرتك بتحبينى و بتحبى نور عشان كدا جيت اراضيكى
تهانى / لا يابنى انت معاك حق انا فعلا ما كانش يصح اتكلم كدا قدام الغرب احنا مهما كان عيله فى بعض لكن امينه غريبه عننا
حسام / الحمد لله انك مقدره موقفى عشان كدا انا مشيت
اروى / ما خلاص بقى غيروا السيره انا هقوم اعملكوا شويه عصير مانجو تحلفوا بيهم
حسام / والله تبقى بت جدعه الدنيا حر و انا ريقى ناشف
اروى / حالا
……………………………….
فى الصاغه
أية / احنا ما اتفقناش على كدا
عمر / و ايه يمنع انتى مش قولتى حياتنا ملكنا انا و انتى وبس اهو انا و انتى و بس هنقى الشبكه و هنقى الفستان و القاعه و هنختار كل حاجه لوحدنا مش ده اللى كنتى عوزاه
أية / ايوه بس انت فاجاتنى
عمر / انا عاجبنى الطقم ده انتى ايه رايك
أية / دا شكله غالى اوى
عمر / ما لكيش دعوه بالفلوس عاجبك و لا لا
أية / دا تحفه حلو جدا بس بجد غالى اوى يا عمر
عمر / لو سمحت بكام ده
البياع يوزن الطقم
البياع /بخمسه و اربعين الف
أية / غالى اوى
عمر / عاجبك و لا لا لسه فاضل الدبل ….. ورينا لو سمحت الدبل الحريمى و الرجالى
أية / مفيش حاجه ارخص
عمر / يا ستى ما لكيش دعوه انتى نقى بس ايه رايك فى الدبله دى
أية / حلوه اوى و دى ليك هتبقى حلوه اوى
عمر / حلوه اوى فعلا انا هاخدها …. فى حاجه تانيه عجباكى
أية تبتسم و تهز راسها لا
عمر / هناخد الطقم و الدبلتين دول اكتبلنا اسامينا عليهم بقى
عمر و أية يبصوا لبعض و هما مبتسمين
……………………………
فى شقه تهانى
تهانى / اقعدى كنتى عاوزه تكلمينى فى ايه
اروى / بصراحه يا ماما حسام كلمنى فى موضوع كدا محرج يكلمك فيه
تهانى / خير يابنتى موضوع ايه ده
اروى / حسام عاوز يتجوزنى
تهانى / ايه الكلام ده
اروى / انا قولتله لازم يكلم حضرتك بس هو بيقول ان يعنى انه خايف تحرجيه خصوصا انه لسه مطلق ندى قريب
تهانى / انتى فاجاتينى بالموضوع ده خصوصا ان فعلا الوقت مش مناسب عمك يادوب خارج من المستشفى و ندى ما نعرفش عنها حاجه هيقولوا عننا ايه
اروى / والله احنا اللى نقول عليهم ايه هو ينفع اللى بنتهم عملته حسام حالته وحشه اوى يا ماما و قالى قد ايه هو تعبان و محتاجنى جنبه البنت اللى راهن عليها الدنيا باعته و خدت بنته و هربت قالى قد ايه هو ندمان انه فضلها عليا و ان لو الزمن يرجع بيه هيختارنى انا
تهانى / النصيب بقى
اروى / يا ماما حسام محتاجنى دلوقت و بصراحه انا كمان معجبه بيه
تهانى / حسام شاب ما يتعيبش و متربى على ايدى بس الناس هيقولوا علينا ايه و انا ما عنديش غيرك يعنى يقولوا كانت بتتامر على العرسان و عماله ترفض عشان تتجوز ابن عمها اول ما طلق مراته
اروى / و مالهم بينا بس يا ماما و بعدين هو يعنى ذنبه اللى حصل و لا لو لا قدر الله كنت اتجوزت واحد و اطلقت لاى سبب كان ساعتها كانوا هيسيبونى فى حالى يعنى
تهانى / طب راى عمك محمد ايه
اروى / ما كلموش هو عاوز يكلمك انتى الاول
تهانى / والله مش عارفه انا محتاجه افكر بس على العموم لو محمد وافق انا هعترض على ايه
اروى / بجد يا ماما
تهانى / هو انا هلاقى زى حسام اهم حاجه عندى سعادتك طبعا
اروى / و انا بحبك اوى يا ماما عن اذنك بقى افرح حسام بالخبر ده
تهانى / ههههههههههههههههههه سلميلى عليه
اروى / هههههههههههههههههههههه حاضر
……………………………..
تانى يوم فى شقه حسام
جرس الباب يضرب حسام يروح يفتح يلاقى اروى
حسام / مش هتجيبها لبر صح
اروى تطلع قميص نوم من شنطتها
اروى / ادخل و لا اروح ارجعه
حسام / اهبل انا خشى طبعا
اروى تدخل و هى بتضحك
حسام / انتى ما بتخافيش حد يشوفك يا بت ما بتخافيش امك تعرف
اروى / انت هتضيع الوقت كلو فى الكلام و لا ايه و على فكره انت معزوم عندنا على الغدى
حسام / يا شيخه
تليفون حسام يرن حسام يبص لاروى و يروح يرد اروى تدخل جوه
حسام / الو …. ايوه يا عمتى …. لا موراييش حاجه …. تؤمرى حاضر …. هشوف والله ….. خلاص باذن الله هاجى …. سلام
حسام يقفل و يحط الموبايل على الترابيزه و يدخل الاوضه يلاقى اروى نايمه على السرير بقميص النوم و بتبصله و تضحك
حسام / هو فى ايه بالظبط
اروى / انت شايف ايه
حسام واقف بيبص عليها
اروى / هتفضل تتفرج من بعيد كتير
حسام / دا حتى يبقى عيب
حسام يروح جنبها و هى بتضحك
………………………….
فى شقه سمر
عمر / ايه رايك
سمر / حلوه
عمر / و مالك بتقوليها من ورا قلبك كدا ليه مش كنتى عاوزه لبنتك شبكه اهو جالها
سمر / و هو حق بنتى عندك شبكه و بس مفيش قايمه مفيش مهر مفيش فرح
عمر / انتى عاوزه ايه من الاخر عشان بدات ازهق
سمر / طبعا ما انت ايدك فى الميه البارده انا الناس كلت وشى بسببكوا
عمر / للدرجادى
سمر / لو كانت بنتك كنت فهمت احساسى
عمر / لو كانت بنتى ما كنتش هلاقيلها واحد يحبها قد ما بحب أية فاخرجى منها ترتاحى و تريحينا و اه خدى مفتاح المحل اهو اشغلى وقتك بعيد عننا
سمر / احمد يا عمر بعيد عن مين ياعنيا دى بنتى
عمر / و مراتى من بكره تروحى تعيشى فى شقه ابويا و تفتحى المحل و تسترزقى بعيد عنى انا مش ملزم غير بمراتى
سمر / لما تبقى مراتك
عمر / القسيمه اللى معايا بتقول مراتى
سمر / القسيمه اللى معاك تبلها و تشرب ميتها انا لو خدت بنتى دلوقت على المحكمه هتخلعك فى اسبوع
عمر/ اول حاجه خلتنى اتجوز أية هى انى ابعدها عنك عشان عارف انك هتستغليها هتبيعيها للى يدفع اكتر انتى ايه مش امها
سمر / شقه ابوك تتكتب باسم أية يا عمر ده حقها و ساعتها لا هفتح بقى و لا هتكلم معاك مش هقول باسمى باسم مراتك يا عمر
عمر / اعلى ما فى خيلك اركبيه يا مرات ابويا و ده اخر كلام عندى و افضلى زنى على ودن بنتك كدا لحد ما تخربى عليها و على نفسك اوعى تنسى الشيكات اللى جنابك مضياها انا ممكن اوديكى ورا الشمس و اهد المعبد على دماغى و دماغك و البادى اظلم اوعى تفتكرى ان سكوتى عليكى ضعف لا فوقى
عمر يفتح الباب و يرزعه وراه و سمر بتنفخ
…………………………….
فى الشارع
أية شايله اكياس و داخله العماره عمر خارج منها يشوفها
أية / انت رايح فين
عمر / عندى شغل ايه الحاجات دى كلها
أية / ماما بعتتنى اجيب شويه حاجات من السوبر ماركت
عمر / طب هاتى اساعدك تطلعيها
أية / مش تقيله هطلعها علاطول روح انت عشان ما تتاخرش
عمر يبصلها و يمشى و أية تطلع
…………………………………
عند ندى فى المستشفى
ندى / هو الدكتور هيكتبلى على خروج امتى بقى
الممرضه / هههههههههههههههه خلاص زهقتى مننا
ندى / لا بس انا بقيت كويسه الحمد لله و اقدر انزل مصر
الممرضه / هتقدرى تركبى الطياره و تشيلى حبيبه و شنطتها فى المطار هنا و هناك و تستحملى مواصلات لحد ما توصلى من هنا للمطار و من المطار لبيتكوا يا بنتى احمدى ربنا و استنى لحد ما تجمدى شويه دا انتى بطنك لسه مفتوحه و اللزقه ما اتشالتش من عليها
ندى / بجد مش قادره
الممرضه / ههههههههههههههههههه والله ما قادره امسك نفسى من الضحك من ساعه ما جابولك الباسبور و انتى خلاص لسعتى
ندى / انتى مش هتصدقى انا بقالى قد ايه مستنيه اليوم اللى انزل فيه مصر تانى
الممرضه / طب مش ناويه تكلمى اهلك و تقوليلهم هتنزلى امتى
ندى / لا خليها مفاجاه احسن
الممرضه / يا بنتى على الاقل حد يقابلك فى المطار بدل ما تتبهدلى بالبنت لوحدك
ندى / صدقينى كدا احسن
الممرضه / انتى ادرى انا هقوم ابص بصه على الدور و ارجعلك
ندى / خدى راحتك
………………………………
فى شقه حسام
حسام نايم جنب اروى تليفونه يرن حسام يرد و هو نايم
حسام / الو
محمد / انت لسه نايم و لا ايه
حسام / صحيت اهو يا بابا خير
محمد / الغدى جاهز انزل اتغدى
حسام / معلش باس انا عمتى عزمانى على الغدى
محمد / والله كويس بص ابقى عدى عليا قبل ما تروحلها عاوزك فى حوار
حسام / خير
محمد / لما تيجى
حسام / بابا ما بحبش كدا فى ايه
محمد / عمتك مها هتسافر الامارات تدور على بنتها
حسام يقوم يقعد و يزعق
حسام / بتقول ايه
اروى تتفزع و تقوم تقعد
اروى / ايه فى ايه فى ايه
حسام يشاورلها بعصبيه تسكت
محمد / ايه الصوت ده
حسام / دا التليفزيون كنت بقلب فى القنوات لما حضرتك صحتنى
حسام يبرق لاروى و يخرج من الاوضه
حسام / تسافر فين يا بابا هى فكراها سهله
محمد / كانت عاوز تعرف العنوان اللى كنت قاعد فيه انت و ندى بالتفصيل و اى اماكن ممكن تروحلها
حسام / و انا لو اعرف ممكن تكون راحت فين ما كنتش دورت عليها و جبتها يعنى هى فاكره نفسها هتدور فين دى دوله كامله دا ان ما كانتش نزلت مصر و راحت لعشيقها
محمد / سالوا يا ابنى ما لقيوهاش نزلت مصر
حسام / سالوا ؟؟؟ امتى و ازاى هو مش عمى كان فى المستشفى سالوا امتى
محمد / اهو اللى حصل سالوا و عرفوا انها لسه هناك و هيسافروا يدوروا عليها
حسام / و عمى قادر يسافر
محمد / يا حسام عمك كلمنى و قالى بالحرف انهم عاوزين العنوان بالتفصيل و انهم هيسافروا يدوروا على ندى دا كل اللى اعرفه و احنا نعمل اللى علينا و نديهولهم
حسام / و هو اصلا عمى جاب فلوس السفر منين الله مش كانوا بيعيطوا فى المستشفى ما عاهمش فلوس العمليه و لا دلوقت الفلوس ظهرت و لا يكونوا ناويين ياخدوا منى على اساس انى قاعد على بنك و ان بنتهم ما قلبتنيش فى تحويشه العمر
محمد / عيب كدا يا حسام عمك ما اتكلمش فى فلوس خالص
حسام / يا بابا انت ليه مش قادر تفهمنى انت عارف الدرهم بكام مصرى يجيله بخمسه جنيه الا حضرتك عارف هما محتاجين كام على الاقل عشان التاشيره غير التزاكر و مصاريفهم هناك طب افهم طيب
محمد / بنتهم الوحيده يا حسام لو كنت انت او نور مكانها كنت هبيع اللى ورايا و اللى قدامى عشان الاقيك
حسام / حتى بعد اللى عملته حتى بعد كل ده
محمد / ما لناش فيه انت شايفها وحشه طلقها و ما لكش دعوه بيها لكن ابوها و امها مش هينفع يسيبوها حتى لو هيلاقوها و يقتلوها هما حرين ما لناش فيه و بعدين انت واخد الموضوع على اعصابك كدا ليه الناس ما طلبتش منك جنيه لو طلبوا ارفض و قول ما عايش لكن مش من حقك تمنعهم يروحوا يدوروا على بنتهم
حسام / لا يا بابا بس لو معاهم فلوس بقى يبقى الاولى يدونى الفلوس اللى دفعتها فى المستشفى
محمد / اعتبر انك اخدتها فى شقتك نسيت دهب عمتك مها اللى حطته فى الشقه و لا نسيت الجمعيه اللى عملوها عشان الفنش الاخير
حسام / يووووه يعملوا اللى يعملوه انا قرفت
محمد / انت بتزعق ليه دلوقت
حسام / انا اسف يا بابا
محمد / اغسل وشك و انزل ادينى العنوان قبل ما تروح لعمتك و اسمع ما تقولش لعمتك حاجه ما تقومش الدنيا ما صدقنا هديت
حسام / ربنا يسهل سلام سلام
حسام يقفل و يحدف الموبايل على اخر ايده
اروى / مالك فى ايه
حسام / حاجه تحرق الدم … اقولك حاجه احسن خليهم يروحوا يتبهدلوا شويه
اروى / هما مين بس
حسام / عمك يا ستى و مراته الراجل اللى لسه خارج من المستشفى الراجل اللى ما حلتوش الا مرتبه دلوقت البلاطه اتشالت و اللى تحتها بان
اروى / انت بتقول ايه يا حسام
حسام / عمك هيسافر يدور على ندى و يرجعوها
اروى / و هى هيبقى ليها عين ترجع مصر اصلا بعد اللى عملته
حسام / ترجع و لا ما ترجعش انا اصلا ما عادتش تفرق معايا
اروى / اهدى بس انت منرفز نفسك اوى كدا ليه طلقها و اخلص
حسام / مش بالبساطه دى لما ترجعلى فلوسى الاول كل جنيه صرفته عليها كل جنيه سرقته منى تبقى تروح فى ستين داهيه ما تاخدش شقايا و تعبى و تروح تديهم لابن الكلب بتاعها
اروى / اهدى بس يا حبيبى ما تزعلش نفسك
حسام يحدف نفسه على اقرب كرسى و اروى تجرى تقعد على ايد الكرسى و تاخده فى حضنها
اروى / اهدى يا حبيبى انا جنبك اهدى هى ما تستاهلكش ما تفكرش فيها اهدى انا جنبك
………………………….
فى شقه تهانى
اروى / شوفتى بنتك بنت حلال ازاى قابلت حسام و جابنى فى طريقه كنتى خايفه عليا اتبهدل فى المواصلات
تهانى / مرزقه من يومك قومى اغرفى الاكل على ما اقعد مع حسام شويه
اروى / اوك عن اذنكوا
اروى تقوم و تدخل المطبخ
تهانى / مالك يا حسام يا ابنى فيك ايه شكلك مضايق اوى
حسام / مفيش يا عمتى انا بس مرهق شويه ما بنامش كويس
تهانى / هههههههههههههههه يا سيدى يا سيدى
حسام يبتسم
تهانى / اسمع يا حسام انا اروى حكتلى كل حاجه
حسام عنيه تنور
تهانى / انا لو عليا يا ابنى ما عنديش مانع بس الناس مش هتسكت و لا هترحمنى و لا هترحمها
حسام / ناس مين
تهانى / يا ابنى اصل الحاجات دى ما بتستخباش و شهر و لا اتنين و اكيد بطنها هتبان
حسام يقوم يقف
حسام / انتى بتقولى ايه يا عمتى
تهانى / يا ابنى اروى قالتلى انك عاوز تتجوزها
حسام يخبط كف على كف
تهانى / اقعد بس انت كنت فاكر انها هتخبى عنى انا مقدره ظروفك و فاهمه و لو عاوزنى اكلم ابوك فى الموضوع انا ما عنديش مانع انا بس عاوزه اتاكد انك جد و انك مش تحت تاثير صدمه علاقتك بندى مش عاوزه بنتى تبقى مجرد مرحله فى حياتك انتوا مش اغراب انتوا ولاد عم يعنى عمركوا ما هتفترقوا هتفضلوا طول عمركوا وشكوا فى وش بعض
حسام / يا عمتى
تهانى / انا يا ابنى ما حلتيش غير اروى لا فارق معايا لا شقه و لا شبكه و لا اى حاجه انا عندى سعاده بنتى بالدنيا انا بس عاوزه اطمن عليها و اشيل عيالها على ايدى قبل ما اموت
حسام / ايوه بس
تهانى / لو على عمك و مراته فما تشيليش هم دول ما لهمش عين يكلموك اصلا بعد اللى بنتهم عملته و الله شوف والله لولا انه اخويا كان هيبقى ليا تصرف تانى معاهم اه والله هو الشرف فيه كلام يا حسام يا ابنى دا تطير فيها رقاب
حسام / طبعا يا عمتى طبعا
تهانى / قولت ايه يا حسام يا ابنى
حسام / قولت ايه فى ايه
اروى تدخل شايله صينيه عليها اكل تحطها على الترابيزه قدام حسام
اروى / اما ريحه الاكل بقى ايه ما اقولكش
تهانى / كل يابنى ما تتكسفش ولا هى امك محرجه عليك ما تاكلش عندنا ههههههههههههههههههه
حسام / لا ازاى هاكل حاضر
حسام يبص لاروى يلاقيها مبتسمه و عامله مكسوفه تهانى تبص على الاتنين و تضحك
تهانى / هههههههههههههه يا سلام
حسام يحط عينه فى الطبق و ياكل
……………………………….
فى شقه محمود
سمر تفتح الشقه تلاقيها متربه وراها يطلع عمر شايل شنطه و أية فى الاخر
سمر / و دى مين اللى هينضفها بقى ان شاء الله
أية / مش هتاخد حاجه باذن الله انا هبدا من الاوض عن اذنكوا
أية تدخل جوه
عمر / انا هنزل اجيب شويه حاجات للمطبخ اكيد مفيش اكل جوه
سمر / و انت مش هتساعدنا و لا ايه
عمر / كان على عينى هو انا بعرف لو بعرف ما اتاخرش بس على يدك ما بعرفش يلا الهمه بقى تخلصيها علاطول و اتعودى تخدمى نفسك أية مش هتقدر تشيل بيتين مش خدامتك هى يعنى عن اذنك
عمر ينزل و يقفل الباب وراه و سمر تروح لأية الاوضه
سمر / يا ميله بختك يا سمر
أية / فى ايه يا ماما
سمر / يعنى هو انا مكتوب عليا الشقا طول عمرى هو يعنى المحروس جوزك مش عارف اننا جايين هنا النهرده ما كانش قادر يبعت حد ينضف الشقه ايه بيكسر عينا يعنى امبارح يجيبلك الشبكه و النهرده يقطم ضهرنا فى التنضيف
أية / اكيد عمر ما يقصدش
سمر / انا مفييش حيل انا للشقه دى و طبعا شويه و هيجى ياخدك و ادبس انا فى باقى الشقه
أية / لو بطلنا كلام هنخلصها قبل ما يرجع و يا ستى انا مش همشى من هنا غير لما اطمن ان كلو تمام و اقولك حاجه كمان اقعدى فى الصاله على ما اخلص انا هخلصها كلها هوا
سمر / اقعد فين ياختى بلا حسره هو انا عمرى سبت الشقه لما توصل للقرف ده دا كانهم جابوا عربيه تراب و كبوها جواها
أية / خلاص يا ماما بقى مش مستاهله كانها شقه مصييف مقفوله عادى هتنضف بس سيبينى اخلص
سمر / فقريه و غاويه تعب من يومك
أية/ معلش بكره ارتاح انا لسه صغيره عن اذنك اما اطلع السجاجيد بره عشان اغسلهم
سمر / سجاد ايه اللى تغسليه مش هتلحقى طبعا انا هتصل بالمغسله اللى فى الشارع اللى ورانا يبعتوا ياخدوهم زى ما كنت بعمل احنا هنعمل ايه و لا ايه
أية / اللى تشوفيه يا ماما عن اذنك اطلعها بره لحد ما الناس يجوا ياخدوهم
سمر / روحى ياختى
…………………………………
فى شقه امينه
نهاد / والله الشقه كانت تجيب اكتر من كدا انتى استعجلتى
امينه تبصلها و تسكت
نهاد / دلوقت الارض و بعناها و الشقه و بعناها و الدهب و بعناه و برده مفيش اى ضمان ان مروان يخرج من السجن
امينه / بنعمل اللى علينا
نهاد / يا ماما انا و انتى لا شغله و لا مشغله و ما لناش مصدر رزق و حتى لو مروان خرج هيبقى من غير شغل برده
امينه / يا ستى هو انتى بتنامى من غير عشا امال لو ما كانش اللى فى الحبس ده جوزك ابو ابنك اللى فى بطنك و بعدين انتى مش روحتى شوفتى محامى تانى و قالك نفس الكلام خلاص بقى
نهاد / انا بس بقول
امينه / ما تقوليش انا بكره الصبح هاخد الفلوس للمحامى زى ما اتفقنا عشان نخلص من الموضوع ده و مش عاوزه اسمع كلام تانى فيه انتى فاهمه
نهاد / فاهمه طبعا
…………………………………….
أية تحدف نفسها على السرير
عمر / للدرجادى
أية / انا مش هحط ايدى فى قشايه لمده اسبوع و تعمل حسابك تظبطنى دليفرى
عمر / ههههههههههههههههههه بس كدا تؤمرى
أية / ماما كانت زعلانه اوى و انا ماشيه
عمر / بكره تفك
أية / يا ترى الصبح لما هتفتح المحل هتلاقيه مبهدل هو كمان
عمر / هو المحل كلو على بعضه قد ايه يعنى
أية / ما تبقاش قاسى يا عمر
عمر / انتى عارفه فى تحت ايد امك بضاعه بكام عارفه انا سايبلها فلوس قد ايه قاسى ايه يا بنتى انا لو قاسى عليها كنت حاسبتها على الجنيه و اديتها مصروف ما ياكلهاش عيش حاف بس انا مش هعمل كدا عشانك انتى بس على فكره
أية / انت مش فاكرلها اى حاجه حلوه خالص كدا
………………….

google-playkhamsatmostaqltradent