Ads by Google X

رواية سلف و دين الفصل الخامس عشر 15 - بقلم لولو محمد

الصفحة الرئيسية

    رواية سلف و دين كاملة بقلم لولو محمد عبر مدونة دليل الروايات 


 رواية سلف و دين الفصل الخامس عشر 15

فى شقه نهاد
نهاد / والله لو ما كنت جيت النهرده كنت زعلت منك اوى
مروان / انا ما اقدرش على زعلك بس والله انا عامل زى الطور المسحوب فى ساقيه
نهاد / للدرجادى ايه هى رجعت تنكد عليك تانى
مروان / ابدا دى اتغيرت خالص انا بتكلم عن الشغل لا عارف ازوغ و لا فى ماموريات و لا اى حاجه
نهاد / دول عاملين عليك كماشه بقى
مروان / مش فارق معايا قد انى بروح كل يوم الشغل مش بلاقيكى تحسى ان الشركه بقت كئيبه اوى حقيقى
نهاد / على العموم و لا يهمك انا جيبالك خبر هيخليك تنسى كوووووووووووول حاجه و تطير من الفرح
مروان / الحقينى بيه لحسن انا على اخرى
نهاد / مبروك هتبقى اب
البسمه و الحماس يروحوا من على وش مروان
نهاد / مالك كنت فكراك هتفرح
مروان / لا فرحان فرحان طبعا انا بس اتفاجات
نهاد / ليه
مروان / مش بدرى اوى
نهاد / هههههههههههههههههه انت فاكر زى التليفزون هتستنى اما ادوخ و ارجع و كدا
مروان / لا ما اقصدش انا اقصد
نهاد / انت مش فرحان انى حامل يا مروان
مروان / لا والله مش قصدى
نهاد / انا كنت فاكره ان ده حلمك زى ما هو حلمى و ان كان ده سبب المشاكل اللى بينك و بين مراتك لو انت مش عاوز خلفه اتجوزتنى ليه نور كان ناقصها ايه
مروان / لا طبعا الموضوع مش كدا خالص انا بس كنت محتاج شويه وقت عشان
نهاد / عشان تمهد لنور موضوع جوازنا صح
مروان / مش بالظبط
نهاد / ما هى اكيد فى يوم من الايام هتعرف هنفضل متجوزين فى السر كدا لحد امتى يعنى و بعدين انت ليه بتبص للموضوع من النحيادى ما تبص ان هيبقى عندنا ابن تاخده لنور و تحطه فى حضنها و هى ساعتها هتلاقى الامومه اللى اتحرمت منها و هتنبسط ليه لازم تبقى النهايه وحشه معقول هى انانيه اوى كدا معقول مش عوزاك تحس بنعمه الابوه و اصلا يا مروان هو انت متجوزنى عرفى و لا حتى مقضينها دا شرع ربنا مثنى و ثلات و رباع و انت ما اتجوزتنيش شهوه انت اتجوزت عشان تبنى اسره و تعف نفسك و تبقى اب انت مش غلطان عشان تستخبى
مروان يبصلها
نهاد / فكر فى كلامى كويس يا مروان احنا اتجوزنا فى السر عشان نراعي مشاعرها مش خوف منها و لا من اخوها
مروان / ايوه طبعا خوف ايه
نهاد / خلاص يبقى تنسى كل حاجه و تفكر بس فى ابننا اللى جاى و الدنيا الجديده اللى هنعيشها سوا
مروان يهز راسه
……………………………..
بعد فتره فى المستشفى
على و اقف مع منال و نور و هما بيعيطوا
على / ايه اللى حصل
منال / ما اعرفش دخل يتوضى سمعت صوت حاجه بتقع جريت اشوف فى ايه لقيته واقع فى الحمام اتصلت بالاسعاف و بعدين اتصلت بيك
على / انا هروح اتكلم مع الدكتور و اطمن
منال / ماشى
نور / ما تخافيش باذن الله هيبقى كويس
منال / يارب يا نور يا بنتى يارب دا انا مليش غيره فى الدنيا
نور / ما تخافيش
………………………….
فى الكليه عند عمر
عمر يدخل المكتب و غاده قاعده بتشتغل على اللاب يفتح دولاب و يطلع عصير و بسكوت
عمر / انا واقع من الجوع
غاده / لا واضح ان نفسك مفتوحه
عمر / لا هو الواضح انك عامله دايت بقالك فتره
غاده / دايت فى عينك انا مش محتاجه لدايت
عمر / ههههههههههههههه طبعا هو حد يقدر يقول غير كدا
غاده / لا بقى بجد انت مزاجك رايق اوى الفتره دى واضح ان الغردقه عملت شغل
عمر / لا بصراحه انتى اللى عملتى
غاده / انا ؟؟؟
عمر / اه انتى الواحد ما بيعرفش قيمه صحابه و الناس اللى حواليه الا فى الاوقات اللى زى دى صدقينى يا غاده انا عمرى ما هنسى اللى عملتيه عشانى
غاده / انا بدات اقلق هههههههههههههههه
عمر / الفتره اللى فاتت انا كنت تايه مش عارف انا عاوز ايه و لا بفكر فى بكره ماشى و مقضيها كنت خايف اوى و مخنوق زى ما اكون غرقان و مش لاقى قشايه يتعلق بيها بس انتى فوقتينى خلتينى اشوف الحقيقه اللى مكنتش بحاول ابصلها
غاده / أية
عمر / كان معاكى حق انا بحبها و مهما هحاول اعمل انا مكانى معاها سعادتى جنبها
غاده / مبروك
عمر / عقبالك
غاده / انا ما بفكرش فى الموضوع ده خالص
عمر / ليه يعنى هو الحب و الجواز وحش
غاده / على حسب
عمر / مش فاهم
غاده / لو هتحب و تتجوز حد بيحبك يبقى الحب جميل اوى لكن لو هتحب حد و هتتجوز حد تانى يبقى وحش فهمت
عمر / اسمه نصيب و سبحان الله يمكن تلاقى نصيبك بيخبط على الباب مين عارف
صوت خبط على الباب و طالب يستاذن يدخل عمر يقوم و هو بيضحك و غاده تبتسم باستهزاء لعمر و تشاور للطالب يدخل
……………………………….
فى المستشفى
منال و نور قاعدين على يدخل
منال / خير يا على طمنى الدكتور قالك ايه
على / هيدخلوه عمليات دلوقت بس باذن الله خير
منال / يالهوى عمليات
نور / هو الموضوع كبير اوى
على / لا باذن الله خير اهدوا بس
مروان يدخل بيجرى على نور
مروان / خير فى ايه سبت كل حاجه و جيت على ملى وشى
منال / فيك الخير يابنى
مروان / ما لك يا نور ايه اللى حصل
نور / انا كويسه الحاج انور هو اللى وقع و نقلوه المستشفى
مروان / الحمد لله
الكل يبص لمروان
مروان / لا ما اقصدش انا اقصد يعنى الحمد لله انى اطمنت على نور انا اقصد
على / انا هعدى على الحسابات عن اذنكوا
منال / اقعد يابنى
مروان / لا معلش انا لازم استاذن عشان انا سبت الشغل و جيت جرى اول ما نور قالتلى انها فى المستشفى
نور / ما انا قلتلك انى مع طنط منال
مروان / حصل خير مش يلا بقى و لا ايه
نور / ما يصحش يا مروان
منال/ روحى مع جوزك يا نور و انا هبقى اطمنك بالتليفون
نور تبص لمروان
منال / على هنا يا نور ما تشيليش هم
مروان / طب الحمد لله ابقوا طمنونا لو فى جديد عن اذنكوا يلا يا نور
نور توطى تبوس منال و تمشى مع جوزها و هى كل شويه تبص لمنال
………………………………..
فى الشقه عند عمر
سمر / ما تكلمى عمر تشوفيه فين الاكل هيبرد
أية / بكلمه مش بيرد ممكن يكون فى سكشن و الموبايل صامت
سمر / الا مفيش اخبار عن على بقالوا فتره ما بيظهرش خالص تقريبا من اخر مره جه فيها هنا
أية / عادى يعنى مفيش جديد
سمر / بخاف انا من الهدوء ده
أية / ليه يا ماما بتقولى كدا
سمر / اصل عاوزه تفهينى ان على بلعنا عادى و قرر انه يتعايش معانا و ان عقابهم كدا خلص
أية / هو ما كانش بيعاقبنا اصلا
سمر / شوف ازاى
أية / ايوه يا ماما انا قولتلك من الاول و انتى مش راضيه تصدقينى على كان عاوز فلوس باباه و خدها و عمر كان عاوزنى غير كدا كان مكابره
سمر / ايوه اديكى جبتى المفيد فلوس ابوهم اللى على خدها و ادى لعمر على قفاه
أية / لا مش حقيقى
سمر / يابنتى فوقى احنا عايشين فى شقه مكتوبه باسم على و كل حاجه مكتوبه باسم على عمر بتاعك ما حلتوش غير مرتبه
اية / و مرتب عمر مش شويه الكليه و الشركه بيقبض كويس اطمنى
سمر / انا عامله عليكى بكره لما تتجوزوا هيبقى عندكوا عيال افرضى عمر تعب و لا حاجه ما يبقاش عندكوا حاجه تتسندوا عليها يعنى
أية / بعد الشر يا ماما انتى بتقولى ايه
سمر / بقولك اتنصحى يا بنت الخايبه
أية / تعرفى ما تشليش هم
سمر / يا بنتى دا شرع ربنا عمر ليه زى ما على له بالظبط فى ورث ابوه
أية / يووووه بقى يا ماما
سمر / خلاص خلصنا بكره تقولى امى قالت بصى انا فكرت فى موضوع انى ارجع شقه ابوكى و لقيت ان جوزك معاه حق
أية / هو كان يقصد
سمر / المحل بتاع ابوكى مقفول من يوم ما مات و انا بقول نفتحه تانى و اهو تحت البيت و اهو قرش من هنا قرش من هنا
أية / والله فكره
سمر / لما عمر يجى بقى كلميه فى الموضوع ده
أية/ انا ؟؟؟
سمر / اه ياروح قلب امك الكلمه منك لعمر مع شويه دلع و شويه حب هتجيب مفعول السحر و على عمره ما هيقول لاخوه لا لكن لو انا اللى اتكلمت كلمتى بتقف فى الزور و حتى لو فيها مصلحتهم هيقولوا لا فهمتى و لا ايه
أية / هحاول
الباب يتفتح و عمر يدخل
سمر / اتاخرت كدا ليه يا عمر قلقتنا عليك يابنى
عمر / والله خلصت و جيت علاطول
أية / طب ما بتردش على التليفون ليه
عمر يطلع التليفون من جيبه
عمر / معلش نسيته صامت
سمر / طب غير هدومك على ما غرف زمانك جعان يا عينى … ساعدى جوزك يا أية
سمر تغمز لأية و عمر يشوفها يستغرب
………………………………….
فى المستشفى
على / سلامتك يا حج كدا تخضنى عليك
على يمسك ايد انور يبتسمله
منال / كام مره قولتلك تتوضى فى البانيو اديك اتزحلقت ينفع كدا
على / خلاص بقى مش وقته المهم سلامته …. على فكره انا ما قولتش لحد خالص قولت لما تشد حيلك شويه اقولهم عشان ما يزحموش المستشفى و يتعبوك
منال / خير ما عملت يابنى خير ما عملت
على / صحيح هو مدام نور اتصالحت مع جوزها
منال / يووووه دا علاطول
على / الحمد لله بطمن بس
منال / هههههههههههههههههه لا انا فهماك هو كدا علاطول مستعجل و متلهوج و لسانه ملوش لجام كدا
على / المهم بس يتقى ربنا فيها احنا مش مهم
منال تبتسم لعلى
……………………………….
فى البيت عند نور
نور / بس ما كانش ليك حق برده
مروان / هو مش انتى كلمتيها فى التليفون و قالتلك انه فاق و بقى زى الفل مزعله نفسك و عاوزه تعملى مشكله ليه بقى
نور / يعنى الست ما تبقاش لوحدها فى المستشفى برده يا مروان
مروان / ما كانتش لوحدها و لو كانت لوحدها ما كانتش خليتك تمشى كان معاها الجدع ده اللى اسمه …مش فاكر
نور / على
مروان / اه على صح
نور / حصل خير انت اخبار الشغل معاك ايه
مروان / طحنه زفت من كتر قعدتى على المكتب ضهرى ورم
نور / سلامه ضهرك طب خش افرده شويه
مروان / لا انا كنت مواعد جماعه صحابى نتقابل النهرده بقالنا ياما ما اتقابلناش
نور / صحابك ؟؟
مروان / اه الواد جلال جوز اخته جابله شغله معاه فى السعوديه و هيسافر فقولنا نقضى يوم كدا سوا قبل ما يسافر
نور / بس انت تعبان
مروان / والله ما قادر بس يعنى الراجل هيسافر و يا عالم هيرجع امتى و دا صاحبى من زمان و انتى عارفه ما يصحش
نور / ماشى هتتاخر
مروان / مش عارف على العموم معاكى على التليفون اقولك ما تستنينيش احسن
نور / ماشى اللى تشوفه
مروان / ليه حياتنا ما تبقاش كدا علاطول
نور / الحمد لله
مروان / الحمد لله مش هنشرب بقى كبايه شاى حلوه من ايديكى و لا ايه
نور / من عنيا ثوانى
نور تقوم و مروان مبسوط على الاخر
………………………………….
فى المستشفى
عمر / وربنا انت جزمه و عره
على / الله ما انا قولتلك اهو
عمر / ما يصحش يا على كان المفروض ابقى هنا من بدرى
على / حصل خير الحمد لله قدر و لطف
منال تدخل
منال / معلش يا على يابنى هو انت ممكن تاخدنى البيت اجيب شويه غيارات و كدا عشان ما كنتش عامله حسابى و انا نازله
على / طبعا انتى تؤمرى خليك انت جنب الحاج يا عمر يمكن يحتاج حاجه
عمر / طبعا
…………………………
فى شقه عمر
سمر / يعنى ايه ما لحقتيش تكلميه
أية / هو غسل ايده من هنا و على اتصل بيه من هنا و نزل يجرى
سمر / على خير فى ايه ليكون جراله حاجه
أية / لا بعد الشر دا الحج انور اتزحلق
سمر / و دا مين الحج انور ده يعنى عشان يتلهوجوا عليه اوى كدا
أية/ عمر كان حكالى انه صاحب المحل اللى كان على و عمر بيشتغلوا و يباتوا فيه و من فتره كدا الحج كتب كل حاجه لعلى لما استجدعه و على بياخد باله منه
سمر / و هو فى كدا
أية / اللى حصل
سمر / يعنى الفلوس اللى مع على دى كلها و المطاعم و العربيه كانت فى الاصل بتاعه الراجل ده و اداها لعلى كدا
أية / ايوه بالظبط كدا
سمر / اه ما انا برده كنت بقول الواد ده عمل الفلوس دى كلها بالسرعه دى ازاى بس هو فى حد يكتب الحاجات دى كلها لواحد كدا من الباب للطاق
أية / والله ما اعرفش هما نفسهم استغربوا بس على عايش تحت رجليهم اى حاجه يطلبوها كانهم ابوه و امه و اكتر
سمر / سبحان الله صحيح ارزاق
………………………………….
فى شقه ندى
ندى نايمه على السرير و بتفتكر
////////////////////////////////////
ندى / انا جنبك
على يبتسم و عنيه تلمع
ندى / انا جنبك
على / تتجوزينى
ندى / ايه !!!
على / تتجوزينى يا ندى
ندى / ما اعرفش اكيد اه بس لا ما اعرفش بابا مش عارفه
على / اهدى … انا جنبك
//////////////////////////////////////////
ندى تمسح دموعها و تمسك الموبايل و تتصل بحد على يرد تحط ايدها على التليفون
على / الو …. الو ….الو
اخلاص تفتح الباب ندى تقفل السكه فى ساعتها
ندى / انتى ازاى تدخلى عليا من غير ما تخطبى
اخلاص / معاد الدوا
ندى / اوووووف حطيه عندك و اطلعى بره
اخلاص / حاضر
اخلاص تروح تحط الدوا على الكومدينو و تيجي تشيل صينيه الاكل تلاقيها مليانه
اخلاص / انتى ما كلتيش ليه
ندى / كلت على قد نفسى
اخلاص / انتى بتاكلى لاتنين يا بنتى النونو لو ما اتغذاش كويس بياخد من جسمك هتتعبى اكتر و تضعفى اكتر
ندى / تعرفى تخليكي فى حالك يلا سيبى الدوا و اطلعى بره
اخلاص / حاضر
اخلاص تسيب الدوا و تطلع بره و تقفل الباب ندى تمسك الموبايل و تمسح اخر نمره من السجل و هى بتنفخ و تاخد الدوا و تنام
…………………………………
فى شقه انور
على واقف فى الصاله بيبص على التليفون باستغراب نور تفتح باب شقتها و تروحلهم
نور / حسيت بحركه قولت اشوف مين
على / ازيك جينا ناخد شويه حاجات
نور / هو كويس الحمد لله
على / اه الحمد لله فاق و بقى كويس
نور / الحمد لله
منال تطلع من جوه شايله اكياس على ياخدها منها
نور / مش محتاجه اى حاجه
منال / محتاجه سلامتك يا حبيبتى
نور / لو عوزتى اى حاجه كلمينى ماشى
منال / تسلمى يلا يا على مش عاوزين نتاخر
على / يلا مع السلامه
نور تفتح باب الاسانسير و على و منال يدخلوا و تقفل الباب و تدخل شقتها
…………………………….
فى شقه ندى
حسام يفتح الباب و يدخل يلاقى اخلاص قاعده تشوفه تقومله
اخلاص / حمدالله على السلامه
حسام / ندى عامله ايه
اخلاص / زى ما هى عصبيه و مش طايقه روحها
حسام / بتاكل بتاخد الدوا
اخلاص / اللقمه على القد بس الدوا بتاخده الحمد لله
حسام / ماشى
اخلاص / كنت عوزاك فى حاجه معلش
حسام / خير
اخلاص / النهرده حصلت حاجه قولت اقولك عليها ما اعرفش هى ايه بس اكيد انت هتعرف
حسام / ما تطوليش و انجزى خير
اخلاص / دخلت ادى لست ندى الدوا لقيتها بتتكلم فى التليفون و اول ما شافتنى قفلت بسرعه و اتنرفزت عليا
حسام يسكت ثوانى
حسام / طب روحى هاتيلى اكل و ما لكيش دعوه انتى بالموضوع ده
اخلاص / حاضر ثوانى
اخلاص تمشى و حسام واقف بيفكر
……………………………..
فى شقه مها
محمد / يا مصطفى الموضوع مش مستاهل كل الزعل ده و بعدين انا جايلك لحد عندك
مصطفى / لا زعل و لا حاجه يا محمد ما تكبرش الموضوع
محمد / الله امال مالك مش دى شقه بنتك و لازم تقف فيها
مصطفى / لا معلش دى شقه ابنك و احنا الحمد لله خلصنا حاجه بنتنا اول ما تقولوا الشقه جهزت هنجيب عربيات تشيل العزال و نيجي نفرش
محمد / امرك غريب والله يا مصطفى
مصطفى / سيبك منى نور عامله ايه مع جوزها
محمد / الحمد لله الدنيا هديت والله الواحد الفتره اللى فاتت ما كان عارف يلاقيها منين و لا منين
مصطفى / عدت كلو بيعدى يا محمد كلو بيعدى
محمد / المهم و هو بيعدى ما يخسرناش بعض دا انت اخويا
مصطفى / انجز فى الشقه يا محمد خليهم يرجعوا بقى البت قطعت بيا اوى
محمد / الله المستعان
………………………………
فى شقه عمر
أية نايمه عمر يفتح الباب بالراحه و يدخل يغير هدومه و ينام جنبها تحس بيه تقوم تصحى ياخدها فى حضنه
عمر / انا انا
أية / اتاخرت كدا ليه
عمر / والله ما رضيتش امشى الا لما اطمن على الراجل
أية / هو بقى كويس الحمد لله
عمر / اه كويس
أية / بقولك يا عمر
عمر / عشان خاطرى يا أية لو الموضوع ينفع يتاجل لبكره اجليه انا هموت و انام
أية / ماشى خلاص مش مشكله تصبح على خير
عمر يبوس راسها و ينام
………………………………..
فى شقه ندى
ندى نايمه حسام يدخل و يقعد جنبها فى هدوء و يمسك الموبايل يقلب فى سجل المكالمات ما يلاقيش حاجه غريبه يبص لندى شويه و يحط الموبايل مكانه و يقوم و يقفل الباب
………………………………
فى شقه نهاد
نهاد / انت هتمشى بسرعه كدا انا ما لحقتش اقعد معاك
مروان / والله لو عليا مش عاوز اروح بس ما ينفعش اتاخر عن كدا
نهاد / تمام قولى هتعمل ايه هتقول لنور
مروان / اكيد هقولها بس مش دلوقت
نهاد / تمام صحيح يا مروان انا عاوزه فلوس
مروان / اكيد كام
نهاد / حوالى الفين جنيه
مروان / الفين ليه
نهاد / ايجار الشقه و كدا انت عارف انى صرفت مرتبى ناقص و طلبات البيت و كدا
مروان / بصى انا معايا خمسميه جنيه و المره الجايه هحاول اتصرف فى الباقى
نهاد / ربنا يخليك ليا يا حبيبى تسلم
مروان / مع السلامه
……………………….
فى المستشفى
منال / على … هو احنا قفلنا الباب قبل ما ننزل
على / اه
منال/ متاكد
على / بيتهيالى
منال / مش عارفه انا بقول اكلم نور اخليها تبص
على / تمام
منال تتصل
منال/ اوووف دا وقته الباقه خلصت
على / كلميها من عندي
منال تنقل النمره تلاقيها متسجله مدام نور تبص لعلى و ما تتكلمش
منال / ايوه يا نور ازيك ….. لا يا حبيبتى الحمد لله احنا تمام بقولك هو انا ممكن اتعبك تبصى على باب الشقه قفلته و لا لا ….. قفلته ربنا يطمنك …. لا دا رقم على ههههههههههههه الباقه عملتها معايا ……….. سلام يا قلبى
منال تدى الموبايل لعلى و هى مبتسمه
………………………….
بعد يومين فى شقه نور الصبح
مروان خارج من الحمام
نور / الفطار جاهز
مروان / تسلم ايدك يا قلبى
نور / صحيح نسيت اقولك امبارح
مروان / خير
نور / الحاج انور خارج من المستشفى النهرده
مروان / حمد الله على سلامته يا ستى
نور / كنت عاوزه استاذنك نجيبله هديه صغيره بمناسبه العمليه و كدا
مروان / والله يا نور انا عن نفسى مش شايف اى مشكله بس منين بس يا حبيبتى انا اترقيت اه بس لسه ما قبضتش المرتب الجديد و على يدك
نور / ايوه بس ما يصحش
مروان / يا نور كبرى دماغك معلش و ان شاء الله ان شاء الله فى اقرب وقت هنعوض الموضوع ده
نور / طب انا كنت محوشه قرشين للطوارئ
مروان / قرشين ايه دول
نور / اهو اللى كان بيتبقى من مصروف البيت كنت بحوشه عشان لو لاقدر الله حصلت اى حاجه
مروان / عمرك ما قولتيلى على الموضوع ده
نور / يمكن عشان الحمد لله عمرنا ما احتجناهم
مروان / خلاص اتصرفى منهم و لما ربنا يفرج هبقى اردهملك
نور / خلاص اتفقنا
مروان / هو كام فلوس الطوارئ دى
نور / بتسال ليه
مروان / يعنى من باب العلم بالشئ
نور / حوالى خمس تلاف حاجه زى كدا
مروان / تصدقى يا نور انتى جزمه
نور / انا ؟؟؟
مروان / دانا كنت ناوى اعدى على واحد صاحبى بالليل استلف منه و انتى معاكى و بتخبى عنى
نور / ابدا والله يا مروان انا اصلا ما اعرفش انك مزنوق والله لو كنت قلتلى كنت اديتك و لو اكتر من كدا كمان عمرى ما كنت هبخل عنك
مروان / ربنا يخليكى ليا يا قلبى
نور تقوم و تجيب كيسه سوده و تفتحها و تطلع منها فلوس
نور / انا هاخد تلتميه جنيه و انت خد الباقى
مروان / لا طبعا انا هاخد الفلوس اللى محتاجها بس الفين جنيه و اول ما اقبض المرتب الجديد باذن الله باذن الله انا كمان هخلى جزء من المرتب للطوارئ حلوه الفكره دى طول عمرى بتعجبنى دماغك
نور / ههههههههههههههههههههههه عشان تعرف بس
…………………………
فى شقه عمر
أية / هو انت بتتهرب من الكلام معايا يا عمر
عمر / انا ؟؟؟؟ ليه يابنتى بتقولى كدا
أية / فى موضوع عاوزه اتكلم معاك فيه بقالى يومين و انت مش مدينى فرصه خالص
عمر / دا اللى هو انا امبارح الست هانم كانت فين طول اليوم
أية / فى الدروس اه عارفه و رجعت متاخر عشان دى فتره مراجعه مش بتصرمح
عمر / عارف والله
أية / يا عمر عاوزه اتكلم معاك
عمر / اقسم بالله كان زمانك خلصتى الموضوع بدل ساعه عتاب دى
أية / ماشى هخش فى الموضوع بص يا سيدى
عمر / بصيت
أية / دلوقت انا كلمت ماما انها ترجع بيت بابا محمود الله يرحمه
عمر / الله يرحمه
أية / ووافقت
عمر / كويس
أية / بس انا اتفقت معاها انها هتفضل معانا لحد الفرح
عمر / و ايه يمنع
أية / ندخل فى الجد بقى
عمر / اتفضلى
أية / دلوقت المحل بتاع بابا مقفول من يوم ما مات الله يرحمه
عمر / و هى عاوزه تفتحه و تقف فيه صح
أية / ان ما كانش عندك مانع
عمر / انا مالى المحل بتاع على
أية / انا مليش انى ادخل بس معلش انت ليك زى على بالظبط فى الشقه و العربيه و المحل
عمر / اقعدى يا أية
أية تقعد جنب عمر
عمر / اه شرع ربنا ان ليا نص الشقه و نص العربيه و نص المحل معاكى بس انتى عارفه على صارف عليا كام من يوم ما اضطردت من البيت لحد ما اتخرجت و بقالى مرتب
أية / بس انت قولتلى انك كنت بتشتغل
عمر / بكام يا أية و قد ايه و بعدين لنفرض انا و انتى عايشين فى شقه على صح
أية / اه
عمر / امك هتروح تعيش فى شقه نصها لعلى
أية / اه بس شرع ربنا ان ماما ليها تمن الشقه صح و لا لا
عمر / اه صح
أية / يعنى ماما بتعيش فى نصيبها من البيت و بتاكل من نصيبها فى المحل
عمر / يعنى امك هتدفع ايجار او بمعنى تانى جزء من ايجار البيت الباقى من نصيبها مت المحل و انا هدفع ايجار الشقه دى انا كمان
أية / ما اعرفش خلاص نروح انا و انت و ماما نعيش فى شقتنا و نفتح المحل و ندى لعلى نصيبه من الايجار و المحل
عمر / و نبقى عملنا ايه يا أية
أية / نبقى مش عاله على حد و لا حد له جميل علينا
عمر / انتى ليه بتتكلمى كدا
أية / ما اعرفش انا ما عنديش اى مشكله مع على بس بكره انا و انت هنتجوز و يبقى عندنا عيال و كمان على بكره يتجوز و يبقى عنده عيال ما ينفعش تبقى العمليه سايحه كدا على بعضها
عمر / انتى شايفه كدا
أية / والله يا عمر انا مش بقولك كدا عشان اوقع بينك و بين على انا بقول كدا عشان
عمر / انا عارف ما تشغليش بالك ممكن بقى انزل بقى
أية / طبعا ممكن بس الاول تفطر
عمر / تمام يا فندم ههههههههههههههههههه
…………………………….
فى شقه انور
على و عمر مسندين انور يدخلوه الشقه و منال وراهم نور تفتح الباب و تساعد منال فى الشيل يدخلوا كلهم جوه اوضه انور نور تحط الحاجه و تمشى فى هدوء
على / نورت بيتك يا حج
منال / حمد الله على سلامتك يا قلبى كدا تخضنى عليك
عمر / انا راييى كان فضل فى المستشفى شويه على الاقل نطمن عليه خالص
انور / لا يا عمر يابنى انا ما ليش انا فى الجو ده اتعب زياده
منال / بعد الشر عنك بعد الشر
نور تدخل شايله صينيه اكل فراخ مسلوقه ورز ابيض و شربه و سلطه و عصير
منال / ايه ده يا نور
نور / انا قولت هتيجى من بره تعبانه فعملت لقمه لعموا و عملت لحضرتك اكل تانى معانا
انور يبتسم
منال / تعبتى نفسك اوى يا بنتى
نور / تعبكوا راحه شفاك الله و عافاك يا عموا
انور / تسلمى يا بنتى
على / بيتهالى نسيب الحج يرتاح صح و لا ايه
انور / خليك يا على
على / هجيلك تانى يا حج بالليل ارتاح انت بس و انا هاجى تانى
انور يهز راسه على يخبط على كتف عمر و يطلعوا بره لسه هيمشوا
نور / على استاذ على
على يقف و يبصلها
نور / سورى هههه انا عامله غدى ثوانى اتغدوا و امشوا
على / فى حد بيتغدى الساعه اتناشر هههههههههههه فرصه تانيه باذن الله
نور / طب اشربوا حاجه طيب
منال / ما تكسفوهاش بقى يا ولاد اقعدوا شويه صغيرين البت تعبت فى الحاجات دى
على يبص لعمر و يهز راسه و يقعد
……………………………..
عند ندى
حسام يدخل شايل اكياس كتير و ندى بتاكل تبطل اكل و تنفخ
حسام / لا و على ايه كملى اكل انا هسيب الحاجات دى هنا اتفرجى و قولى رايك
ندى / مش عاوزه منك حاجه
حسام / دى مش ليكي اصلا دى هدايا لابوكى و امك و عمتك و نور و كدا يعنى
ندى تبصله
حسام / اكيد مش هتنزلى مصر بايدك فاضيه يعنى
ندى / انت بجد هتنزلنى مصر مش عارفه ليه مش قادره اصدق
حسام / براحتك الميه تكدب الغطاس يا ست البنات
حسام يجى يمشى يرجع تانى
ندى / ايه تانى
حسام / انتى كنتى بتكلمى مين فى الموبايل من يومين
ندى / اللى قالك انى كنت بتكلم فى الموبايل يقولك انا كنت بكلم مين
حسام يبتسم و يهز راسه و يمشى
……………………………………
فى شقه نهاد
نهاد / انا مش مصدقه نفسى انك قدرت تزوغ من الشغل و تيجى
مروان / و مش هقدر اقعد كتير بصى انا جيت اجيبلك الفلوس اللى طلبتيها
نهاد / ميرسى اوى يا مروان انا عارفه ان المصاريف
مروان / انتى مراتى يا نهاد و اكيد يعنى مش هتصرفى على نفسك و انتى على زمتى
مروان يطلع فلوس و يديها لنهاد
نهاد / كام دول
مروان / الفين جنيه
نهاد / بجد ميرسى يا قلبى بجد بحبك مووووت موت بجد
مروان / ربنا يقدرنى و اسعدك
نهاد / مجرد انى اشوفك دى لوحدها عندى بالدنيا كلها يا مروان
مروان يبتسم نهاد تحضنه
…………………………
فى المطعم عند على
عمر / انت ساكت ليه ما ترد تقول اى حاجه
على يبصله و يبتسم
عمر / الله ما انا قولتلك ان سمر مش هتسكت و ان معاملتها الحلو ليه و هدوئها موترنى و اكيد بتنمر على حاجه امال انا عاوز ابعدها عن أية باقصى سرعه ليه يا ابنى
على / فوق يا عمر عمرك ما هتبعد سمر عن أية و ان قدرت تبعد سمر مش هتقدر على أية مهما كان دى امها
عمر / بس انا متاكد ان ده مش كلام أية
على/ و ليه لا و اصلا ايه الغلط فى كلامها
عمر / يعنى ايه انت ما اضايقتش من الكلام
على / عمر انت فاكر انى ممكن اقبل على نفسى اكل حقك
على يطلع مفاتيح و يفتح خزنه جنبه و يطلع ملف
على / الشقه و المحل و العربيه باسمك
عمر / ايه ده
على / ما تقولش لا لأية و لا لسمر حاجه و انا ما كنتش قلتلك لحد دلوقت عشان اضمن انك ما تقولهمش خصوصا انك مدلوق اوى الفتره اللى فاتت ههههههههههههههههههه
عمر يبص لعلى
على / خلاص ما تزعلش اوى كدا مش مدلوق اوى يعنى
عمر / بس انا ما اقدرش اقبل حاجه زى دى يا على
على / و مين قالك انى بعمل ده عشانك
عمر يرفع حاجبه
على / سمر ليها التمن و انا كتبت نصيبى لأية و بما ان أية مراتك و قاصر فانا اعتبرتك الواصى و كتبت كل حاجه ليك انت حر بقى تقسمه تخليه تبيعه براحتك
عمر / و الشقه اللى انا قاعد فيها
على / الشقه دى مش بتاعتى يا عمر دى بتاعه الحج انور ممكن فاى وقت يقولى هاتها او حتى بعد عمر طويل لو جراله حاجه و الحاجه منال طلبتها منى مش هتاخر عليها عشان كدا ما اقدرش اتصرف فيها
عمر / و انت
على / انا ايه ما انا زى الفل اهو مرتبى ياكلنى الشهد مع انى اكل شارب نايم راكب ببلاش هعوز ايه تانى
عمر / انت كويس يا على
على / الحمد لله الحج انور قام بالسلامه هعوز ايه تانى
عمر / لا انت كويس يا على
على / بص يا عمر ما تقولش الحوار اللى دار بنا لا لأية و لا لسمر مؤقتا بس لحد ما تشوف ميتهم ايه قولهم على وافق انها تفتح المحل عادى و انها تسكن فى الشقه عادى و خلينا نشوف هتشغل المحل ازاى
عمر / و الفكره؟؟؟
على / يا سيدى خليك ورا الكداب لحد باب الدار خليهم يعملوا اللى هما عاوزينه و نشوف الحوار ده هيوصلنا لايه و كدا كدا مش خسرانين حاجه
عمر / معاك حق
على يبتسم
…………………………………….
فى شقه مامه مروان
مروان قاعد و مامته داخله بكبايه شاى
مامه مروان / لما اتصلت و قولت انك جاى ما صدقتش بس بينى و بينك قلقت خير يا مروان مش بعاده تيجى لوحدك و فى وقت زى ده و فجاه فى ايه يابنى خير
مروان / ماما انتى عارفه انى مليش غيرك يعنى
مامته / عاوز فلوس
مروان / لا الحمد لله انا عاوز اعترفلك بحاجه
مامته / خير يابنى ما تقلقنيش
مروان / انا اتجوزت
مامته / يا لهوى فى السر و من غير ما تقولى ليه كدا يا مروان مين دى اصلا نور عرفت
مروان / لالا لا نور مش لازم تعرف حاجه
مامته / ما مسيرها تعرف مين دى اوعى تكون نهاد زميلتك فى الشغل … ساكت ليه هى … هى مراتك كان قلبها حاسس
مروان / يا ماما نهاد بنت كويسه جدا و طيبه و بنت حلال
مامته / لو كانت كويسه ما كانتش رضيتش تتجوز فى السر بالطريقه دى عرفى و لا شرعى يا ابن بطنى
مروان / لا يا ماما شرعى و ماذون و شهود و كل حاجه
مامته / و ده حصل امتى و ليه ما اخدتش رايي قبل ما تعمل كدا و ليه جاى تقولى دلوقت هى حامل … حامل اه حامل
مروان / ايوه حامل
مامته / شوف سبحان الله عشت عمرى كله اتمنى اسمع الجمله دى و يوم ما اسمعها قلبى يتقبض
مروان / يا ماما نهاد والله بنت كويسه و لما تشوفيها هتحبيها
مامته / انت بتفتح على نفسك فاتوحه جهنم و خربت بيتك بايدك
مروان / يا ماما انا بحب نور مش هنكر بس انا نفسى اكون اب
مامته / كنت كلمت نور و اقنعتها و شوفت واحده مناسبه ليك
مروان / ما نهاد مناسبه ليا
مامته / فى وجه نظرك لكن لا انا شوفتها و لا اعرفها و لا مراتك بتقبلها بتحط الجاز جنب الكبريت و تسيبها تولع
مروان / اى كان البنت اللى هختارها نور مش هتحبها و طبيعى جدا انها هتغير و كدا خصوصا المشكله اللى عندها
مامته / بص الكلام ده ما عادش يجيب همه انت اتجوزت و مراتك حامل يعنى مفيش رجوع عن السكه دى و لا عن البنت دى دلوقت المشكله فى نور هتقولها و لا لا
مروان / ما انا جايلك عشان كدا
مامته / انا ما اقدرش اقولك تخبى عليها اصل مسيرها فى يوم هتعرف و كل ما خبيت عليها اكتر كل ما الموضوع باظ اكتر
مروان / ما انا لو قولتلها هخسرها
مامته / طب ما فكرتش فى ده ليه قبل ما تتجوز
مروان / انا اتجوزت على سنه الله و رسوله ما اجرمتش
مامته / يبقى خلاص توكل على الله و اللى فيه الخير يقدمه ربنا كلمها
مروان / هحاول
………………………………..
فى شقه انور
نور واقفه فى المطبخ بتروق
منال / يا بنتى بتعملى ايه كفايه تعبك طول النهار
نور / تعبك راحه يا طنط كفايه انى ما كنتش قادره اكون جنب حضرتك فى المستشفى
منال / يا بنتى بيتك اولى بيكى و كتر خيرك كنتى بتسالى بالتليفون
نور / المهم انه روح بالسلامه
منال / نور روحى ارتاحى شويه يا بنتى انتى على رجلك من الصبح
نور / انتى بتطردينى بقى ولا ايه ههههههههههههه
منال / بصراحه بقى اه بطردك ههههههههههههههههه
نور / امممممم ماشي همشي بس تعملى حسابك ما خلصتيش منى و هرجعلك تانى
منال / هههههههههههههههههههههه ربنا ما يحرمنى منك
…………………………….
بعد كام يوم فى شقه عمر
أية واقفه بتاكل فى المطبخ
سمر / يعنى وافق
أية / اه وافق تروحى تفتحى المحل فى اى وقت انتى عوزاه
سمر / يعنى اخوه هيرجعله نصيبه من الورث
أية / لا هو ما طلبش من على حاجه زى دى
سمر / ازاى ما يطلبش ده حقه
أية / دى حاجه بينه و بين على ملناش دعوه
سمر / يا بنت الخايبه هتفضلوا عايشين تحت رحمه سى على لحد امتى
أية / ماما انا مش عاوزه مشاكل مع عمر مش عوزاه يحس انى بوقع بينه و بين على انا ما صدقت انه بقى كويس معايا
سمر / يا بنتى لازم يامنلك مستقبلك يعنى لو عمر جراله حاجه دلوقت تضمنى على هيعمل فيكى ايه
أية / بعد الشر يا ماما ما تقوليش كدا
سمر / ما قولتش يابنتى انا … بصى خلاص سيبى الموضوع ده عليا
أية / يا ماما ابوس ايدك
سمر / بصى قولى لعمر انك عاوزه تعملى يوم كدا نتلم فيه كلنا و نقرب من بعض و خليه يعزم على عندنا على الغدى
أية / دا اللى هو امتى بقى ان شاء الله دا انا باكل و انا واقفه عشان اللحق انزل تانى هو انا بلحق انام و النبى تسبينى فى حالى
سمر / يووووه الحق عليا
أية / يا نهار ابيض هتاخر سلام سلام
سمر / انتى يابت كملى اكلك
أية / شبعت سلام
……………………………..
فى شقه نهاد
نهاد / و ياترى بقى هربت منها بانهى حجه بقى المرادى
مروان / امى يا ستى
نهاد / انت مجنون يا مروان افرض اتصلت بمامتك و لا راحت تزورها و لا امها العقربه دى راحت تزور مامتك هنعمل ايه
مروان / لا ما تخافيش انا ما قولتلهاش انى عند امى انا قولتلها ان امى بعتتنى مشوار البلد عشان فى مشكله كدا بخصوص الارض بتاعتنا
نهاد / انتوا عندكوا ارض
مروان / اه حته ارض صغيره كدا فى البلد و عمى بياجرها و يزرعها
نهاد / اااااه اول مره اعرف بس انت مامتك يعنى لو حد سالها هتستر عليك و لا هنعيش الفيلم بتاع الرساله تانى
مروان / انا قولت لامى على كل حاجه
نهاد / انت بتتكلم جد
مروان / انا هفضل مخبى عليها لحد امتى
نهاد / انا فرحانه اوى دا احسن خبر سمعته فى حياتى على فكره بقى انت كدا ما لكش حجه لازم اتعرف على مامتك فى اقرب وقت
مروان / ربنا يسهل
نهاد / بس ثوانى تعرف احنا ممكن نستغل الموضوع ده
مروان / موضوع ايه
نهاد / انت فى البلد مسكوا فيك تقعد فهتبات
مروان / انتى بتهزرى لا طبعا
نهاد / ليه لا هى هتروح تدور عليك فى البلد يعنى خليك معايا النهرده انا ما بلحقش اشبع منك
مروان / مش عارف
نهاد / اتصل انت بيها بس و قولها انك هتبات فى البلد و صدقنى لما هتروح هتلاقيها بتستقبلك بالاشواق و الاحضان
مروان / ماشى هقوم اكلمها
………………………………
فى شقه ندى
ندى نايمه حسام يدخل يقعد جنبها يبص عليها و بعدين ينام بالراحه خالص و يفضل مفتح يبص عليها لحد ما تحس بيه و تصحى تصرخ و تحاول تبعد تقع من على السرير يجرى عليها و هى تنفلق عياط
ندى / انت بتعمل ايه انت مش هتبطل
حسام / اهدى اهدى انا ما كنتش بعمل حاجه و لا كنت ناوى اعمل اهدى
ندى / ما ترحمنى بقى يا اخى انت ايه ما بتحسش ارحمنى ابوس ايدك
حسام / اقسم بالله والله ما كنت هعمل حاجه انتى وحشتينى كنت جاى اشوفك بس
ندى / ابعد عنى ريحتك بتخنقنى ابعد
ندى تقوم و تجرى على الحمام و تفضل ترجع حسام يبص عليها و يمشى و هو بيبص فى الارض و يقفل الباب وراه ندى تطلع من الحمام تقعد على الارض قدام الباب و هى منهاره من العياط
…………………………..
فى اوضه حسام
حسام يدخل ياخد غيار و فوطه و يدخل الحمام و يفضل يستحمى و يدعك فى نفسه بالصابون و الليفه و يكب ازازه الشاور جيل كلها عليه و عنيه حمرا دم و مخنوق و بيعيط و يحط راسه تحت الدش و يغمض عنيه
……………………………..
فى شقه انور تانى يوم الصبح
منال / انا عملتلك فطار بايدى لازم تخلصه كله
انور / تسلم ايدك
منال / مش عارفه يا انور انا مالى اليومين دول
انور / سلامتك مالك
منال / تعرف فرحانه اوى عمرى ما فرحت كدا
انور / للدرجادى يا ستى لو ده هيفرحك اتزحلق كل يوم
منال / بعد الشر عنك يا انور حرام عليك انا اقصد على على و نور بجد مش عارفه اوصفلك ازاى
انور / الاتنين ولاد حلال
منال / تعرف صحيح ربنا ما اكرمناش بخلفه بس رزقنى ببنت وولد الاتنين احسن من بعض ياريت كان لنور اخت كنت جوزتها لعلى
انور / هههههههههههههههههه مش هتهدى الا لما تجوزيه صح
منال / نفسي …. لما ببصله من بعيد دايما بلاقيه سرحان و كانه بيفكر فيها شال الهم بدرى
انور / بكره ربنا يرزقه ببنت الحلال
منال / قول عليا مجنونه بس على و نور كانوا هيبقوا لايقين على بعض اوى
انور / لا فعلا هقول مجنونه عشان نور متجوزه يا ست الستات
منال / هههههههههههههههههههههههههه اهو كلام
…………………………..
بعد فتره فى شقه نهاد
نهاد / مروان ما تنساش ايجار الشقه و مصروف البيت
مروان / كام يعنى يا نهاد
نهاد / مش اقل من تلت تلاف
مروان / ايوه بس
نهاد / مروان انا كنت ناويه ادور على شغل بس ازاى هقدر اوفق بين الحمل و بين الشغل و البيبى بعد كدا اكيد هيبقى محتاج كل رعايتى و اهتمامى
مروان / انا ما قولتش حاجه بس كنت بفكر يعنى ندور على شقه بسعر اقل شويه انا المفروض اترقيت و مرتبى زاد و بالشكل ده نور هتفتح عليا فاتوحه بتودى باقى المرتب فين لان مرتبى كدا بالنسبالها هيقل مش هيزيد فهمانى
نهاد / مش عارفه اقولك ايه بس هنا منطقه راقيه و الجيران محترمين لو نقلنا فى منطقه ارخص ما نضمنش نفس المستوى و اكيد مش هقدر اعيش فى مستوى اقل من ده او اسكن فى منطقه شعبى
مروان / لا طبعا شعبى ايه بصى انا هحاول ادور على شقه تانيه تكون مناسبه
نهاد / مروان هو انت هتفضل مخبى على نور لحد امتى
مروان / مش عارف بحاول افاتحها صدقينى بس مش لاقى فرصه خالص مش عارف اعمل ايه
نهاد / انت عارف لو فاتحتها و قدرت تقنعها انا ما عنديش اى مانع انى اسكن معاها فى نفس الشقه و اهو نبقى وفرنا الايجار و المصاريف
مروان / لا طبعا ما ينفعش
نهاد / خلاص انا ممكن اعيش مع مامتك عادى و اكيد هى هتفرح بالبيبى و هتاخد بالها منه و كمان هستفيد كتير منها
مروان / مش عارف
نهاد / يا مروان الدنيا مش هينفع تستمر على الوضع ده ابدا كلها كام شهر و بطنى تكبر او حتى اولد هتشوف ابنك فى السر برده و لا هنعيش ازاى قولى
مروان / سبيها لله انا هحاول احلها
نهاد / طب انا عندى فكره هى هنكسب بيها وقت مش اكتر و هتبرر بيها قدام نور النقص فى مرتبك
مروان / اللحقينى بيها
نهاد / بس يكون فى علمك الموضوع ده زيه زى الحمل مش هينفع تداريه علاطول مسيره فى يوم هيتكشف
مروان / قولى بقى ايه الفكره
نهاد / اسمع يا سيدى
………………………..
فى شقه ندى
ندى بتدور فى درج فى الصاله
اخلاص / بتدورى على حاجه اقدر اساعدك
ندى / مفيش عندنا ورق او كراسه نوته اى حاجه اكتب فيها
اخلاص / قوليلى بس عوزاها فى ايه و انا اساعدك
ندى / انتى مالك انا عوزاها ليه
اخلاص / انا كان قصدى اخدم
تدى / اووووف تقيله على قلبى بشكل تعرفى انا ممكن استحمل حسام ده و ما استحملكيش صبرنى يارب
ندى تدخل اوضتها و ترزع الباب
……………………
فى اوضه حسام نايم على السرير يسمع الحوار بين ندى و اخلاص يبتسم و يقوم يفتح شنطته و يطلع نوته كبيره و قلم و يروح اوضه ندى يخبط و يدخل ندى تبصله و تنفخ يحط النوته جنبها و القلم و يمشى من غير و لا كلمه ندى تقوم تاخد النوته و تقعد تكتب
…………………………
فى شقه على
تليفون على يرن نمره غريبه يرد
على / الو
سمر / ازيك يا على انا سمر مرات ابوك الله يرحمه
على / سمر ؟؟؟ خير
سمر / بقالك فتره طويله ما بتجيش قولت اطمن عليك
على / ههههههههههههههههههههههههههههههههه بتطمنى عليا ؟؟؟
سمر / الله احنا نسايب يا على
على / كتر خيرك
سمر / كنت بقول لو انت فاضى بكره تيجى تتغدى معانا
على / هو عمر فين
سمر / فى الشغل
على / طيب انا هرتب مع اخويا و نشوف
سمر / انا اصلى كنت قاعده بلف حله كرنب تستاهل بقك فقولت خساره حبيب قلبى زمان بطنك نشفت من اكل الشارع تاكل لقمه ترم عضمك
على / حبيب قلبك ؟؟؟؟ ماشى ماشى هكلم عمر و باذن الله هاجى دا كلو الا عضمى هههههههههههههههههههههه
سمر / على العموم مش هعطلك مع السلامه
على / سلام
على يقفل السكه و يبص للتليفون باستغراب و يتصل بعمر
على / فينك ياسطى
عمر/ فى الشركه خير
على / هو مرات ابوك بتشرب حشيش
عمر / ايه ؟؟؟
على / بانجو طيب
عمر / هههههههههههههههههههه مالك يا على
على / اصلها اتصلت بيا بتطمن عليا
عمر / يا راجل
على / بتقولى عملالى كرنب يا حبيب قلبى ارم بيه عضمى
عمر / قول و الله
على / لتكون هتسمنى ياعمر
عمر / هههههههههههههههههههههههه دا احنا هنشوف العجب
على / انا مش مطمن
عمر / و هنخسر ايه يا على ما تيجى تقضى اليوم و تغير جو و تاكل لقمه
على / كنت فاكر أية فى الفحته
عمر / لا من جهه فحته فالبت طالع عينها والله بتصعب عليا
على / هانت هانت
عمر / اه هانت الحمد لله كنت ناوى اخدها نجيب الفستان و كدا بس مفيش وقت خالص
على / يا سيدى لسه قدامنا وقت تخلص امتحانات و عيشوا
عمر / بقول كدا برده بقولك لازم اخلع اكلمك بكره نشوف هتيجى امتى
على / ههههههههههههههههههههه قشطه سلام
………………………………………………….
فى شقه نور
نور / مالك يا مروان سرحان فى ايه يا حبيبى
مروان / ما تيجى نروح لدكتور تانى يا نور
نور / انا كنت فكراك رافض الموضوع ده و زهقت
مروان / يعنى محاوله اخيره
نور / انت نفسك تكون اب يا مروان
مروان / مش الفكره انا بس مش عاوز
نور / ماشى
مروان / ماشى ايه
نور / نشوف حد شاطر و نروحله
مروان / على البركه
………………..
عند ندى
فى اوضه حسام حسام بيتكلم فى التليفون
حسام / يعنى خلاص مضى الورق
راجل / مضاه و هو مغمض
حسام / خلاص اخفى الورق ده دلوقت لحد ما اقولك و حلاوتك هتوصلك
الباب يتفتح و ندى تدخل
حسام / سلام هكلمك بعدين اقولك انى بعت الفلوس سلام
حسام يقفل و يقوم يقف
ندى / كنت بتاذى مين
حسام / ما باذيش حد
ندى / مش شغلى انا كنت عاوزه فلوس
حسام / اؤمرى خير
ندى / مخنوقه و عاوزه اخرج اغير جو
حسام / تحت امرك فى اى وقت تحبى تروحى فين
ندى / اى مكان هادى
حسام / من عنيا تحبى تخرجى امتى
ندى / فى اسرع وقت
حسام / خلاص روحى اللبسى
ندى تمشى
حسام / اخلاااااص
اخلاص تدخل
اخلاص/ ايوه ايوه
حسام / انا هاخد ندى و نخرج ما تنسيش اللى طلبته منك
اخلاص / من عنيا حاضر
اخلاص تخرج
………………………………
فى شقه مها
مصطفى / انا كلمت حسام
مها / كويس
مصطفى / ندى زى الفل واخدها و بيتفسحوا
مها / ربنا يسعدها
مصطفى / اللى بتعمليه ده غلط يا مها
مها / معلش اصل ما حدش يعرف الصح فين غيرك ما حدش بيعرف حاجه غيرك
مصطفى / قصدك ايه بالكلام ده
مها / انا خسرت بنتى يا مصطفى ما بتردش عليا على الموبايل بعرف اخبارها من جوزها مش عاوزه لا تكلمنى و لا تشوفنى
مصطفى / هانت و هتنزل مصر
مها / فى شقتها تفتكر هتيجى تزورنا هتسمحلنا نزورها
مصطفى / كنتى عاوزه منى ايه كنتى عوزانى اطاطى للكلب اللى شقطها و اديهاله
مها / ما كنتش عاوزه منك حاجه عمرى ما استنيت منك حاجه و خدت ايه بص لحالنا
مصطفى / مصارين البطن بتتعارك و اللى حصل وارد يحصل فى اى جوازه
مها / انا داخله انام الكلام مفيش منه فايده
مها تقوم و تسيب مصطفى
………………………………….
فى مطعم فخم
ندى قاعده على ترابيزه بتكتب و حسام قاعد على ترابيزه تانيه بعيد شويه و بيتابعها فى هدوء شديد
//////////////////////////
ندى / اوحش احساس فى الدنيا انك تنام و تصحى تلاقى نفسك لوحدك كل الناس اللى كنت بتتحامى فيهم اختفوا فجاه و مش بس كدا بقوا هما اعداءك اللى بيطاردوك و مفيش مكان تهرب من اذاهم فيه عارفين نقط ضعفك فهمينك و سابقينك اصعب حاجه ان فرحتك تتكسر فى يوم و ليله احلامك تدمر تصحى فيوم تكتشف ان حياتك كانت مجرد كدبه فيلم و انت فيه مجرد كمبارس فى دور صامت لواحد بياخد على قفاه و المخرج مش عاجبه و عمال يعيد و يزيد و انت تاخد على قفاك تانى و تالت و رابع لو قولت كفايه هيطردوك و مش هينوبك غير انك انضربت و لو كملت يا عالم هيوقفوا ضرب فيك امتى مع ان الضرب مش هوه اللى وجعك اللى وجعك انك ما اخترتش تكون كومبارس و لا طلبت انك تمثل الدور ده تفتكر احلامك و طموحك اللى عمرك ما هتحققهم و لا هتشوفهم تكتشف انك هتصحى فى يوم تلاقى نفسك زى الطور مربوط من رقبتك بحبل و بيشدوك منه مش قادر تقاوم تتكسر قدام نفسك قبل اى حد كل الوجع ده حسيت بيه لما فى يوم حسيت ان هيبقالى بنت طفله ما لهاش اى ذنب بس انا كمان مليش ذنب هعمل ايه هسيبها تحت رحمه الحيوان ده و اختار نفسى و لا هكمل و افضل تحت رحمتهم و لا هاخدها و اهرب طب هروح فين اى بنت فى الدنيا لما بتخاف بتجرى على بيت اهلها الا انا يوم ما هجرى هجرى من بيت اهلى مليش حد يحمينى ما اعرفش حد اللجاءله بقيت عايشه فى كابوس ما بينتهيش ياترى هعيش و اضمن ليكى مصير احسن من مصيرى ياترى هقدر استحمل لحد امتى اعمل ايه استسلم و لا احارب و اخره الحرب دى ايه لو عليا انا ممكن استحمل اى حاجه بس خبطك فى بطنى بيفوقنى بتقوليلى انا هنا انا مليش ذنب و معاكى حق انتى ما لكيش اى ذنب
////////////////////////////////////
حسام يقوم من ترابيزته و يروح يقعد معاها تقفل النوته يناولها منديل تمسح دموعها
ندى / شكرا
حسام / انا ما كنتش ناوى اقاطعك خصوصا انى لقيتك بتكتبى بتركيز و اهتمام بس باباكى اتصل
ندى ما تردش
حسام / انا كنت قاعد على النت بدور فى الاسامي لقيت كام اسم عجبونى
ندى / حبيبه
حسام / ايه ؟؟؟
حسام / حلو …. هو انا ممكن اعرف كنتى بتكتبى ايه
ندى تقطع ورق من النوته اللى كتبت فيهم و تقطعهم مليون حته و ترميهم على الترابيزه قدام حسام
ندى / لو بتحب البازل خد …. انا مروحه
ندى تقوم و تمشى حسام يقوم و يطلع فلوس و يحطها و يمشى ورا ندى
………………………………..
تانى يوم فى بيت عمر
جرس الباب يضرب أية تروح تفتح
أية / ازيك يا على اتفضل
على يدخل
أية / عمر فى الحمام ثوانى و الاكل يكون على السفره اتفضل اتفضل
على يبصلها باستغراب و يدخل يقعد من غير و لا كلمه سمر تطلع من جوه شايله سيرفيس عليه بطه كبيره
سمر / ازيك يا على فى معادك بالثانيه حماتك بتحبك خشى يا أية هاتى باقى الاكل
أية تدخل المطبخ و سمر تروح تقعد جنب على يبصلها
………………

google-playkhamsatmostaqltradent