رواية اسميتها نغم الفصل الثامن 8 - بقلم نهي الحفناوي

الصفحة الرئيسية

  رواية اسميتها نغم بقلم نهي الحفناوي


 رواية اسميتها نغم الفصل الثامن 8


أحمد: تفتكر ياعمر ان نغم ممكن تكون من نصيبى

عمر: هى تطول ولا ايه

احمد: انا بتكلم بجد، انا نفسى تفضل معايا على طول

عمر: ان شآءالله يا عمر،رينا يفرح قلبك دايما ياصاحبى،دا هيبقى أسعد يوم فى حياتى لما ألاقيك سعيد ومبسوط، وهى لو لفت العالم كله مش هتلاقى حد يحبها زيك، سعات ببقى عاوز أروح أكلمها وأحكيلها كل حاجة وأقولها انها مس هتلاقى حد يحبها زيك

أحمد: أوعى تتهور ياعمر أزعل منك بجد

عمر: ما أنا ساكت أهو

أحمد: كلمت مى علشان تجيى معرض الكتاب معانا

عمر: اه وقالتلى شويه وهتيجى، اومال نغم اتأخرت ليه، متبعتلها خلينا نلحق اليوم، مس كفاية رايح غصب عنى

احمد: لا اهدى كدا ومتبينلهاش اننا مش بنحب القراءة دى فكرانا مثقفين

عمر: هو احنا بنفتح الكتب الى علينا لما رايحين نجيب كتب لناس منعرفهاش، دا احنا مثقفين ثقافة انما ايه أورجانك

أحمد: طب اسكت بقى علشان نغم نزلت أهى

نغم: معلش اتأخرت

أحمد: لا ولا يهمك لسة مى مجتش

عمر: معلش لازم نستناها أصلها بتحب القراءة أوى ودايما بتروح المعرض وهتزعل لو مشينا.* عمر وشوش أحمد وقاله ايه رأيك فيا، ومى أصلا جايه غصب عنها*

أحمد: اه مى قربت تيجى معلش

نغم: عادى نستناها

عمر: اهى جات أهى

مى: معلش لو اتأخرت عليكوا، أصل كنت تعبانة برد وكدا * مى عطست *

عمر: خلاااص عرفنا، مش لازم تعطسى كدا بتأكدلنا يعنى

مى: يعنى أعمل ايه، مش كفاية يوم مهتخرجنى مودينى معرض الكتاب، حد قالك *عمر قطعها وبيضحك،: هى بتحب تهزر كدا، امسكى مناديل أهى معايا علبة،وهروح أشتريلك تانى بس اسكتى *

مى: هو انا شكلى بوظت الدنيا ولا ايه *بتتكلم بصوت واطى لعمر*

عمر: اه اسكتى بقى، نسيت أعرفك، نغم

مى: ازيك يانغم انت مى ودا عمر وهنقرأ الفاتحة قريب

نعم: مبروك ربنا يتمم بخير

عمر: مفضلش غيى تعلقى على دماغى يافتة وتكتبى ممنوع الإقتراب أو التصوير، خلاااص الناس كلها عرفت

أحمد: هما كدا على طول بيحبوا يهزروا

عمر: يلا بقى علشان منتأخرش

* وصلوا معرض الكتاب*

عمر: يلا هروح أجيب تذاكر

مى: ايه دا هو فى سينما جوا الله

عمر: تذاكر المعرض * اخرصى هتودينا فى داهية، بيكلم بصوت واطى*

نغم: تمام. ممكن ندخل الصالة دى أشوف الكتب الى عاوزاها

احمد: اه أكيد. تعالى

*نغم وأحمد دخلوا يشوف الكتب، وعمر ومى واقفين برة*

مى: بقى ياخويا يوم متخرجنى تجبنى هنا،

عمر: وانت شيفانى فرحان، مااحنا جاين علشان خاطر أحمد

مى: طب تعالى نقعد نشرب حاجة ونقعد فى حتة ضل بدل الشمس الى كلت مخى دى

*مى وعمر قعدوا فى حتة ضل، ومى كل شوية تعطس *

عمر: خلااااص خلااااص قرفتى أمى مش قادر قربت أجيب الى فى بطنى، الناس الى رايحة وجاية فكرتنى حااامل

مى: بدل متستحملنى فى تعبى، شوية برد بتعمل كدا

عمر: برد وقولنا ماشى بتنفى وقولت ماشى، انما بتبصى فى المنديل ليه، بتطمنى على عملتيه، مش كفاااية

مى: علبة المناديل قربت تخلص، متخلنيش أنف فى التيشرت بتاعك

عمر: راجل اعمليها وانا وحياة أمى مهروحك على رجلك

مى: خلاص لم نفسك

عمر: هى لو نغم جات دلوقت وقالتلنا مجبناش كتب ليه هنقولها إيه

مى: مش عارفة *أتشى، بتعطس *

عمر: الله يقرفك امسكى مبقاش معايا مناديل اسكتى بقى

* احمد ونغم خرجوا ونغم جابت كتب*

نغم: انتوا مجبتوش حاجة

عمر: لا اصل اصل اه اصل مى عندها برد فمرضناش ندخل علشان. محدش يضايق منها، متعطسى يا مى *يعنى بقالك ساعة قرافانى وخفيتى دلوقت * بيكلم مى بصوت واطى

نغم: على العموم كان يوم حلو، وسعيدة انى اتعرفت عليكوا

أحمد: ايه ياعمر انت ومى مش تعزموا نغم على الخطوبة

عمر: خطوبة مين

احمد: انت بتنسى ولا ايه خطوبتك انت ومى

عمر: اه اه ان شاء الله وألف ألف مبروك

مى: بتقول حاجه ياعمر

عمر: بقول بعد الامتحانات

مى: كلها شهر

نغم: ربنا يتمم بخير

مى: انت أكيد. هتيجى

نغم: ان شآء الله

مى: هاتى موبايلك بقى أسجلك رقمى

أحمد: يلا بقى علشان نغم متتأخرش

*مى ونغم روحوا وعمر وأحمد فى الكافية*

أحمد: تفتكر ايه

عمر: فى أيه

احمد: متركز كدا، نغم يابنى ممكن توافق لو اتقدمتلها

عمر: انت هتروحلها بعد الامتحانات

احمد: هروح أكلم عمو عاطف الأول، وكدا هيبقى فاضلى سنة بس حاسس انه مش هيوافق

عمر: لا هيوافق انا متفائل


*فى الكورس*

زياد دخل وسأل فى حد هنا اسمه نغم*

نغم: أنا

زياد: متوصى عليكى جامد أوى، ومن مين، من أعز صحابى، بس انا زى ماانت شايفة كدا خلصت قبلهم وبدى كورسات وهما عندهم امتحانات كمان شهر يلا ربنا معاهم *كل الى فى الكورس ضحك*

* زياد كتب سؤال على البوردة: تعرفى يا دكتورة نغم تجوبية

* نغم معرفتش السؤال واتوترت، وبعدين بصت بثقة: والله لو أعرف مكنتش جيت لحضرتك الكورس، أنا جاية زى ما أحمد فهم حضرتك ان المادة صعبة، وأنا عاوزة ألحق أخلصها قبل الإمتحان

* نغم كسفت زياد،وبقى واقف مش على بعضة*

زياد: تمام يادكتورة وان شاء الله نكون عند حسن ظنك وتخلصى المادة قبل الامتحان

* الكورس خلص وروان طالعة مع نغم بتهديها علشان متضايقة من الى زياد عمله*

روان: كبرى دماغك، يانغم، يعنى هتفضلى كدا خلاص وبعدين ماانت قصفتى جبهته

نغم: انا بفكر مجيش تانى

روان: مش هينفع المادة صعبة، والامتحانات قربت،

نغم: دا مستفز جدا يا روان

روان: هنخلص الكورس ومش هنشوفه تانى

نغم: انت شايفة كدا

روان: اه وبعدين، أخبار مصورنا العظيم ايه

نغم: مين

روان: فى غيرة، ابن الجيران الى هنا قصادى الى عمل يصفر كدا وينادى

نغم: انت هبلة قولتلك مفيش حاجه، وبعدين أحمد محترم جدا وانت عارفه

نغم: أنا أهو وانت أهو لو الواد دا طلع بيحبك وهيجوزك، وابقى تعالى قولى روان قالت

نغم: ماشى ياختى

روان: متيجى نروح معرض الكتاب، انا سمعت انه لسة مقافلش وفاتح لأخر الأسبوع

نغم: لا ماانا سبقتك وروحت

روان: ازاى بقى هو انت تعرفى تروحى أخر الشارع لوحدك

نغم: ماانا روحت روحت

روان: متخلصى رووحتى روحتى ايه

نغم: خايفة أقولك علشان انت بتفهمى غلط

روان: ايه دا يبقى روحتى مع ابن الجيران

نغم: اسمة أحمد ياروان

روان: مانا عارفة ياختى ان اسمه أحمد ياروان.

نغم: هو قالى انه خيودينى وصاحبة عمر جه وخطيبت عمر مى جات، وقولت لبابا قالى روحى

روان: والأستاذ احمد بيقرأ لمين

نغم: مش عارفة بس هو كان بيجيب أى حاجه لمجرد انها موجودة، حسيت انه علشان ميكسفش نفسة كان بيجيب اى كتب

روان: الواد دا لا ليه فى القراءة ولا نيلة، وجاى معاكى بس

نغم: طب اسكتى ويلا علشان منتأخرش، وابقى ذاكرى الى أخدناه فى الكورس علشان الامتحانات


* نغم فى البلكونة حاطة الترابيذة بتذاكر، وسرحانة بتفكر فى أحمد، وفى الكلام الى روان قالتهولها*


يعنى هو ممكن أحمد يكون بيحبزى، أكيد لا طب هو ليه مقالش، يعنى ممكن يكون فاكر طفولتنا، ياترى لسه عاين الكورة، زى ماانا عاينة العروسة، بس مستحيل أقوله حاجة زى كدا، اكيد لا هو نسانى أصلا، روان بتقول أى كلام، لا لا دا مستحيل يكون بيفكر فيا أصلا، دا لما بيشوفنى بيدخل يجرى على جوة وبيحط عينة فى الأرض * ماسكة القلم وعمالة بتتفكر وهى بتشغبط فى الإسكتش، وفجأة أحمد طلع البلكونة كان ماسك كتاب، شاورلها وعينه فى الأرض، ودخل على طول*

أحمد بيكلم نفسه: طب هو أنا ليه بدخل وبرتبك كدا لما بشوفها مع انى كنت امبارح معاها فى معرض الكتاب، انا مش عارف ايه دا، وقعد على المكتب وبيكتب جواب


" نغم اول مرة أكتب جواب، مش عارف أقولك ايه، ولا الجوابات بتتكتب فيها ايه، كل الى أقدر أقولهولك، انى اتغيرت علشانك، وبقيت أذاكر علشان أنجح ، وأعرف أجى اتقدملك، مش عارف ايه الى بيحصلى لما بشوفك برتبك ومببقاش على بعضى وببقى عاوز أستخبى، مع انى ببقى هموت وأشوفك، مش عاوز حاجه غير انى أكمل حياتى معاكى، عارف انك كتيرة عليا، انت اصلا كتيرة عل أى حد، بس أنا حقيقى بحبك جدا جدا يا أحلى حاحة حصلت فى حياتى، معلش مش بعرف أكتب جوبات ولا كلام حب، بس انا حسيت انى عاوز أكتبلك جواب، يمكن مش هعرف أقولك كدا دلوقت، بس فى فى الوقت المناسب هديك الجواب دا، والجوابات التانية الى هكتبها، مع طبعا العروسة، ماانا عارف انك لسة بتحب العرايس، عقبال متحبنى أنا كمان، يلا بقى مش هطول عليكى المرة دى، والمرة الجاية هبقى اكتبلك، مع السلامة، خلص ومضى با اسم أحمد على وحط قلب وكتب فيةN ♡A*


*فى الجامعه*

عمر: انا خايف يا أحمد المادة دى صعبة

احمد: متخافش يا عمر هيجى الامتحان سهل وبعدين احنا بقالنا شهر بنمتحن جات على أخر مادة متقلقش، انت بس متوتر وحاسس انك مش فاكر حاجة

عمر: اه ماانا فعلا حاسس انى مش فاكر حاجة، وأول مبدخل اللجنة بتأكد

احمد: مش انا قولتلك امبارح بعد مذاكرنا مع بعض راجع قبل ماتنام

عمر: كنت بسمع المسلسل

أحمد: ودا وقته يعنى

عمر: الواحد بيقى يسمع المسلسل وهو مبسوط يفتكر ان وراه امتحان يكمل فُرجة وهو مضايق

احمد: بدل متقول يفتكر ان وراه امتحان يقفل ويقوم يذاكر

عمر: مش كفاية خلاتنى أقفل نت

احمد: انت عبيط وانتوط قفلت نت يعنى

عمر: اه قفلت الموب وفتحت اللاب

احمد: طب ركز بقى على الحته دى، بيقولوا هتيجى فى الامتحان

* احمد وعمر دخلوا اللجنة، وامتحنوا*

احمد: عملت ايه، مستنيكى

عمر: بص انا حليت ومبسوط لازم أراجع، دا أنا هقفل الماده دى، انا هرتب اوائل دفعة

احمد: بلاش تراجع

عمر: لا لازم أراجع، علشان أنبسط أكتر

احمد: طب شوف حد يراجع معاك بقى

عمر: بص الواد دا شاطر هنده عليه *عمر نده عليه*

عمر: معلش ياشبح هو انت اسمك ايه الأول

_اسمى محمد

عمر: انا عارف ان الدحاحين كلك اسمهم. محمد، معلش راجع معايا السؤال دا

عمر: عملت دى ايه

محمد: B وانت

عمر: لا اناعملتها. c

محمد: طب ودى

عمر: D متقولش غلط

محمد: ، هتبقىA

عمر: مش مشكلة اتنين غلط، دى هتبقى ايه

محمد: هتبقىE

عمر: ياعم هو تنت مستخسر تفرحنى

محمد: مش بقولك الصح يعنى أضحك عليك

عمر: طب اتكل على الله وشوف وراك ايه، انا خايف أكمل باقى الامتحان مراجعة معاك أشيل المادة

* محمد مشى، وأحمد بيضحك على عمر*

أحمد: ايه يادكتور أخبار الامتحان أكيد هتقفل صح

عمر: ايدى دى لو بتاكل مال اليتيم، مش هتغير الإجابة الصح وتكتب الغلط فى أخر خمس دقايق

احمد: طب يلا يا خويا

* بعد. مرور شهر، أحمد وعمر قعدين فى الكافية*

عمر: شوف كدا الجروب شوف يمكن ظهرت

احمد: اهدى بقى احنا بقالنا ساعة، ولسة مظهرتش

عمر: ياعم افتح بقى انا خايف

احمد: انا خايف اكتر منك خد شوف

عمر: هات ياعم احنا عمرنا مكنا كدا، بقى دى النتيجة الى عمرنا مستننهاا وكنا بنعرفها صدفة

عمر: ظهرت، ظهرت، بتحمل، استنى

احمد: : عمر الموضوع مفيهوش هزار انا على أعصابى

عمر: بص يا أحمد متزعلش النجاح حلو بس عاد ى، طول ماانا معاك عادى، وان شاء الله خير ومتزعلش

احمد: متكلم يا عمر سقط صح

عمر: مش عارف أنطقها،

احمد: اصلا عادى

عمر: لا ياسطا انت نجحت ومشلتش مواد ومبروك مبروك، والنجاح يرفع ايده،

احمد: بجد بجد،* احمد فرحان، وقام حضن عمر جامد*

احمد: وانت شوف انت.

عمر: لا ماانا عارف

احمد: يلا يا عمر متهزرش بقى

عمر: ماشى، يالهوووووى انا نجحت

احمد: بجد مبروك ياعمروة

عمر: بس شيلت ماديتين

احمد: ولا يهمك هنذاكرهم مع بعض، المهم اننا نجحنا وهنروح رابعة بقى خلينا نخلص

عمر: انا مش زعلان، انا هخطب

احمد: اه صحيح مبروك

* مى داخلة من باب الكافية وفرحانة*

مى: عملتها ياعمورة ونجحت

عمر: اه بس انت عرفتي منين دا احنا لسه عارفنها

مى: عيب يا عمررة، دا انا مى

احمد: بس ايه رأيك، نجح اهو وهتتخطبوا

مى: اه، النهاردا بليل نقرأ الفاتحة بقى، انت مالك. كدا ياعمر

عمر: كويس

مى: ومالك بترد كدا ليه

عمر: كويس لولولولوى، ديجى أم عبير ريمكس

مى: بص أنا جيبالك ايه

عمر: جايبة ايه

مى: جبتلك تورته، يعنى تنجح، ومنحتفلش

عمر: ايه دا تورتة عليها أبوا ملحقين

مى: مش بحتفل

عمر: انت فرحانة فيا، انا عارف طب مش قارئ الفاتحة شايف يا أحمد دى فرحانة فيا وبعدين. عرفتى حوار الملحقين منين

مى: مش.قولتلك انا مى يا عمروة

عمر: طب يلا قومى بقى، وقوللهم هنيجى بليل

مى: بجد يا عمر

عمر: ماانت لو مقومتيش، هرجع فى كلامى

مى: لا انا هقوم وهستناك بليل،

*مى مشيت، وعمر وأحمد قعدين *

احمد: بس التورته طعمها حلو

عمر: قصدك الملحقين طعمها حلو ماشى ياعم

أحمد: مبروك ياعريس

عمر: عقبالك يا احمد، هتعمل ايه مع ابو نغم

احمد: انا هروح أكلمه أنا وهقوله كل حاجه

عمر: طب متخلى عمو على أبوك يكلمه، هما صحاب واكيد. هيوافق

احمد: لا انا عاوز يوافق بيا انا مش باأبويا، وهقوله كل حاجة

عمر: ان شآء الله خير، ومتنساش تجى بليل معايا علشان نقرأ الفاتحة هستناك

*عمر واقف فى البلكونة بيشرب شاى ولابس علشان يروح قراءة فاتحة عمر،ونغم طلعت *

نغم: مبروك يا أحمد طنط قالت انك نجحت

احمد: الله يبارك فيكى* بيتكلم هو باصص فى الأرض* وانت عملتى ايه

نغم: الحمد لله نجحت وجبت امتياز، شكرا علشان انت ساعدتنى فى المادة الصعبة

احمد: لا متقوليش كدا، ومبروك ليكى، ناوية تعملى ايه فى الأجازة

نغم: هدور على صيدلية علشان أتدرب فيها

أحمد: مدوريش هخلى عمر يكلم عمو ماهر وياخدك علشان تبقى قريبة، احنا كمان انا وعمر بنشتغل فى الأجازة هناك

نغم: بجد بجد شكرا، شكرا يا أحمد بجد مش عارفة كنت هعمل ايه، كنت لسه هدور شكرا

احمد: عادى معملتش حاجة، النهاردا قراءة فاتخة عمر ومى

نغم: بجد مبروك ربنا يتمملهم بخير

احمد: عقبالك، همشى بقى علشان ألحق علشان عمر ميزعلش

*فى بيت مى*

عمر: ايه رأيك. شكلى حلو يابوحميد

أحمد: اه حلو، بقالك ساعة فى الحمام بتظبط نفسك ايه

عمر: أصلى بحس نفسى حلو فى مراية الحمام، تفتكر أنا حلو ولا دا شغل خبث وخبائث

أحمد: لا حلو واهدى كدا، وترتنى

عمر: انا مش عارف خايف ليه

احمد: انت هتصيع يالا

عمر: والله بجد مش عارف قلبى بيدق ليه، انا شكلى فرحان ولا ايه وبعدين الورد الى انا شايله دا حاسس انى أهبل أوى، يخربيت البنات وتفكيرها، متستعجلولنا العروسة ياجماعة بقالنا ساعة قعدين هى هتيجى على يوم الفرح ولا ايه

عزة: ادخلى استعجلى أختك ياسارة، أحسن بن خالتك مش على بعضة

سارة: ماتيلا ياست مى الناس برة وعمر شويه وهيدخل يجيبك من شعرك،

مى: جاب ورد

سارة: جاب باختى

مى: اومال كان بيقولى مش هجيب ليه

يارة: بيضحك عليكى

مى: بس ضحكته حلوة يخربيته

مى: ولابس كلاسيك

سارة: انا بقول يالا علشان عمر هيمشى

مى: يمشى ايه دا انا مصدقت جه

سارة: امسكى الصنية أهى ماما بتقول اطلعى بيها

* مى داخلة بصنية*

مامت عمر: بسم الله ماشاء الله، قمر يا مى طالعة لخالتك ياحببتى

عمر: ايه الحلاوة دى، هما الى بيقرئوا فاتحة بيحلوا كدا

مى: وقولت الكلام دا لكام واحدة قبلى

عمر: كلهم انا مبفرقس فى المعاملة

احمد: أنا بقول نقرأ الفاتحة بقى

* قرئوا الفاتحة، وعمر ومى وكل الى قعدين فرحانين ومشيوا وفاضل عمر ومى قعدين مع بعض *

عمر: يكش تتبطى بقى وتهدى

مى: انت مش مبسوط

عمر: انا مبسوط انت مبسوطة

مى: اه، والورد حلو

عمر: ماانا خفت أخد مخالفة، فروحت جبت بقى هعمل ايه

مى: هنتجوز امتى

عمر: هى قراية الفاتحة لسة بردت، دا احنا لسة قارئين فاتحة

مى: يعنى قرئا فاتحة، هنتجوز فى المشمش

عمر: الصبر أهم حاجة الصبر، وسلام بقى علشان عمر مستنتينى فى الكافية هينفخنى

مى: طب متقعد شوبة انت لسه قعدت

عمر: قعدت ايه، دا شويه وابوكى هيرمينى برة فا انا أمشى بكرامتى أحسن يلا سلام

* فى الكافية*

عمر: ايه اتأخرت

أحمد: ااه ياعريس اتأخرت، عجبتك القعدة

عمر: يعم بكرة تخطب وهنلاقيك غيرت الإقامة خالص، مقولتليش عاوز ايه

أحمد: نغم

عمر: مالها

أحمد: قولتلها انها تنزل صيدليه أبوك تدرب

عمر: ماشى اكلم أبويا مش هيقول حاجه، فين المشكلة

أحمد: المشكلة انى قولتلها انى انا وانت بننزل فى الأحازة نشتغل مع أبوك ونساعده

عمر: هااااااا أو مش دى الصيدلية الى كنت بتحاتيل عليك مبترضاش، تقولى ريحة الدوا بتتعبنى، ومش عارف ايه، دا فعلا الحب يصنع المعجزااات * بيكلم وهو بيتريق وعمال يخبط كف على كف*

أحمد: متسكت بقى واهدى كدا

عمر: وطبعا انت عاوز من بكرة علشان يخلالك الجو مع حببة القلب، بس سورى المكان مشغول ومفيش ليك مكان

أحمد: انت هتستعبط يلا

عمر: اعتبر الصيدلية بتاعتك، احنا عندنا كام أحمد

احمد: تسلم يا رجولة

عمر: المهم هتكلم أبوها امتى

أحمد: مش عارف بفكر أستنى لما أخلص السنة الى فاضلة علشان قلبى يبقى جامد أكتر، مع انى خايف يقولى بنتى دكتورة والكلام دا، وسعات بقول هكلمه اليومين دول

عمر: كلمه وسيبها على الله وان شاء الله خير يا أحمد


 رواية اسميتها نغم الفصل الثامن 8 -  بقلم نهي الحفناوي
nada eid

تعليقات

ليست هناك تعليقات
إرسال تعليق
    google-playkhamsatmostaqltradent