رواية ليل الفصل الثالث 3 - بقلم اروى مدحت

رواية ليل البارت الثالث 3 بقلم اروى مدحت

رواية ليل الفصل الثالث 3

حمزه قال بوجع و الدم بينزل من مناخيره 

- قولتلك معرفش حاجه عن اللي بتتكلم عنها !! العنوان غلط والله !!

كانو ماسكينه ع الجسر و بيضربوه.. فجاه مسك الراجل راس حمزه بعصبيه و قال :

- انت هتهزر !! انت اللي عاوز تضحك علينا... احنا مسكنا ابوك و هو هرب قبل ما يدينا الفلوس .. و اخر حاجه قالها لما كان معانا ان هو سايبلك انت كل الفلوس 

الراجل ضربه بوكس تاني في وشه .. حمزه قال بالم كبير :

- يعم اوعي بقولك !! أنا ابويا كان مسافر مصر و لسه مجاش و معرفش انت بتتكلم عن اي و ربنا !!!

- يعني مش هتعترف.؟

- أنا لو اعرف حاجه كنت قولتها بدال الوجع اللي أنا فيه ده 

كان فيه اتنين ماسكين حمزه و التالت بيضرب فيه .. فجاه جه صوت عربيات الشرطه.. و الرجاله سابو حمزه بسرعه و جريو من علي الطريق.. كان حمزه واقع علي الارض مش قادر يتحرك خالص .. الظابط وصله ..و شاور للعسكريين اللي معاه أنهم يدورو علي اللي هربو

الظابط قومه و قال

- انت كويس ؟

- قال و كان مغمض عين و مفتح التانيه بألم لان عينه وارمه :

- كويس اي حضرتك بس انت شايف اللي حاصل فيا و بتسالني .. ابوس ايدك دور عليهم و اسجنهم أنا مش ناقص يلاقوني و يضربوني تاني !

- هم مين دول ؟

- صدقني أنا لو اعرف هقولك 

- طب ضربوك ليه ؟

- معرفش ..

- يبني قول عشان اقدر اساعدك

- حضرتك أنا مش في وقت تقدرو تستجوبوني فيه.. ابوس ايدك وديني المستشفي عشان أنا بنزف و تعبان اوي !!

الظابط سنده عشان يوديه المستشفى..

الدكتور كان بيضمد وشه اللي مليان جروح في كل مكان .. قال و هو بيتالم 

- حرام عليك يا بابا اذيتك في اي أنا !!!

- انت بتكلمني؟؟

- هكلمك انت ليه يا دكتور بكلم ابويا 

- لا حول ولا قوة الا بالله يبني انت بتكلم نفسك...

- دكتور .. ابوس ايدك أنا كده كويس.. اطلع بره عشان أنا مش طايق نفسي و مستحمل بالعافيه .. 

الدكتور سابه و طلع بره فعلا .. و هو كان قاعد يتألم ..

- هروح الامتحان بكره ازاي أنا !! .. و الاستاذ هيطردني لو غبت .. ده مريض و ربنا .. 

حمزه مكانش متصاب كليا .. هو وشه اللي متبهدل جامد .. قام من مكانه و قرر يمشي.. هو مش طايق القعده هنا اصلا .. رجع البيت .. استقبلته والدته بقلق و خضه

- مالك يبني اي اللي عمل فيك كده !! 

قعد علي الكنبة بتعب :

- ونبي يا ماما خليكي بعيده عن وشي لاني مش مستحمل حد يلمسه ..

- طب قولي يبني فيه اي ! انت اتخانقت تاني يا حمزه !

- بابا ..

- ابوك ؟ ابوك جوا .. ماله يحمزه ضربك ؟ انت بتشرب سجاير يحمزه !! بتكلم بنات ؟؟؟؟

- يا ماما اهدي ونبي ابوس ايدك.. ما اقصدش ابويا اللي جوا..  اقصد ابويا الحقيقي 

- ايمن ؟

- اه ..

- اي اللي رجعه بعد السنين دي كلها !!

......بقلمي اروي مدحت ........

- هو مرجعش اصلا .. أنا فيه ناس اتلمو عليا و ضربوني و قالو أن ليهم فلوس عنده و هو بلغهم عني قبل ما يهرب.. بس

- حسبي الله و نعم الوكيل يبني .. مش بيجي من وراه غير المصايب.. بعد السنين دي كلها نسمع خبر عنه .. طب و مامتك الحقيقيه كمان شوفتها ولا حاجه ؟

- لا .. ولا سمعت عنهم هم الاتنين من ساعه ما سابوني زمان ..

- اي المصايب اللي بتتحدف علينا دي بس..  قوم يبني ريحلك شويه .. الف سلامه عليك يا ضنايا

- فعلا هقوم أنام يا ست الكل .. صحيني بدري عشان عندي امتحان في الدرس و لو مروحتش هتطرد..

- تروح اي بس بحالتك دي !! كلم الاستاذ اعتذرله 

حاضر هروح اهو.. 

دخل اوضته و قفل الباب .. كان تعبان جدا... اترمي علي السرير و مسك الفون ..

- الو

- أيوة يا سي حمزه.. خير مصحيني من النوم ليه ؟!!! أماب زن زن زن زن .. اخر ما زهقت فتحت عليك .. عاوز اي بقي !!!

- اااءءء.. معلش يا مستر ع الزن.. اصل بكلم حضرتك عشان مش هقدر اجي امتحان بكره 

- طيب الحمد لله تبقي ريحتني منك السنه كلها.. متجيش تاني بقي 

- استني يا مستر انت هتقفل !! أنا أقصد اني مش هاجي بكره بس هاجي بعدين.. أنا تعبان اوي والله و لازم اغيب

- لا .. صوتك كويس اهو ده مش صوت واحد تعبان .. لو مجيتش الامتحان متجيش يا فاشل يا حرامي الواجب.. ابقي حل واجبك بنفسك تاني مره هاا ؟؟ ولا تلاقيك هتغيب عشان ابن خالتك مش معاك طبعا .. يا فاش...

حمزه قفل الخط فوشه بعصبيه و رمي الفون .. مضطر يروح بقي.. ما هو لو باقي حد شاطر غيره كان سابه من زمان... بس هو كده... كل مدرسين ثانوي شايفين نفسهم وزراء مش مدرسين ..

..........

- هو اي اللي حصله؟؟؟

- والله ما اعرف !! هو من ساعه ما جه الدرس و هو بالمنظر ده و مكلمش حد.. و ربنا منظره يضحك.. يستاهل 

- حرام عليكي يا ليل !! الواد شكله واخد علقه معتبره.. ده مش عارف يفتح عينه التانيه اصلا ماشي بعين واحده !!

فضلو يضحكو هما الاتنين ..

- بت بت !! ده بيبصبنا اعدلي وشك .. عرف أننا بنضحك عليه !

دخل المستر و في أيده كوبايه القهوه .. و عينه جت علي حمزه .. حط الكوبايه بخضه علي الطرابيزة ..

- بسم الله الرحمن الرحيم !! اي يبني منظرك ده ؟؟؟

قال ببرود :

- والله قولتلك مجيش امبارح قولتلي متجيش خالص .. و انا بالحاله دي 

- أيوة بس مكنتش اعرف ان دايس عليك قطر للدرجه دي !!

المجموعه كلها ضحكت ما عدا هو كان متعصب جامد

- روح امشي يبني ربنا يسهلك.. و ابقي تعالا الحصص عادي لو فيك صحه.. 

- لا همتحن.. ما أنا جيت اهو

- هتمتحن بعين واحده ازاي بس يبني !

المجموعه كلها ضحكت تاني ..

- عاجبك يا مستر الضحك ده !!

- ما بصراحه يحمزه الواحد مش عاوز يتنمر.. بس منظرك يضحك

كلهم ضحكو تاني و هو قال في سره 

- ابو ام ظرافتك يا شيخ .. 

قال بصوت اعلي :

- طيب انا ماشي.. ابقي اجي مره تانيه يا مستر ... لما أخف.. سلام 

- استني بس احكيلي اللي حصلك يبني !! يمكن اضحك تاني 

• تابع الفصل التالي عبر الرابط: (رواية ليل كاملة) اضغط على أسم الرواية