Ads by Google X

رواية حياة بقت حياتي الفصل السادس عشر 16 والأخير - بقلم اسراء محمد

الصفحة الرئيسية

رواية حياة بقت حياتي الفصل السادس عشر 16 والأخير بقلم اسراء محمد

 رواية حياة بقت حياتي الفصل السادس عشر 16 والأخير

مهدي : يبقي اتفقنا بس اخوك هيحضر قراية الفاتحه صح 
حاتم : اكيد يا عمي هروح اكلمه واقوله علي الميعاد وان شاء الله هيجي 
مهدي : ان شاء الله 
ميار : طب نستأذن احنا 
مهدي : ما لسه بدري
ميار : ما احنا ان شاء الله هنبقي عيله واحده والجايات اكتر 
مهدي : ان شاء الله
ميار : اتشرفت بمعرفتكم
مهدي : الشرف لينا احنا 
وسلموا ومشيوا
عند مراد 
يونس : مالك يا مراد بقالك اسبوع تقريباً مضايق
مراد : مفيش 
يونس : مفيش ازاي انت مش شايف شكلك 
مراد : وحشتني اوي
يونس : مين دي 
مراد : حياه 
يونس : حياه مين 
مراد : حبيبتي
يونس : انت لحقت حبيت ووحشتك 
مراد : انا اكتشفت اني بحبها وانا خاطب ياقوت
يونس : وانت عرفتها منين اصلا عشان تكتشف انك بتحبها وانت خاطب 
مراد : جارتي وطالبه عندي ودخلت هندسه مخصوص عشاني 
يونس : دخلت هندسه عشانك يبقي بتحبك 
مراد : اوي 
يونس : ولما انت عارف انها بتحبك اوي خطبت غيرها لي
مراد : عشان غبي كنت شايفها ملزقه وخنقه وماكنتش اعرف اني بحبها غير لما خطبت
يونس : وبعدين
مراد : مش عارف انا هموت واشوفها وهي بقالها اسبوع مجتش الكليه 
يونس : مش انت بتقول الامتحانات الاسبوع الجاي 
مراد : اه 
يونس : استحمل بقي الاسبوع ده كمان او تروح البيت كأنك رايح لمامتك وشوفها
مراد : هشوف كده 
وعدا الاسبوع والامتحانات بدأت 
خلصوا اول امتحان 
وكانت حياه وروز ماشيين 
وفجأة مراد نده حياه 
مراد : حياه 
حياه : نعم يا بشمهندس
مراد : ممكن كلمه لوحدك 
حياه : لا مينفعش
مراد : لي 
حياه : عشان محدش يشوفني وانا واقفه مع حضرتك لوحدي ويعملي شوشره ويتكلم عليا 
مراد حس بالخجل وقال : متخافيش 
حياه : معلش لو عايز حاجه قولها وروز واقفه 
مراد : خلاص بعدين 
حياه : تمام عن اذنك يلا يا روز 
وسابوا ومشيوا
مراد لنفسه : انا فعلا غلطت لما عملت المشكله دي بس عشان بحبك يا حياه واتضايقت لما لاقيتك قاعده معاه لوحدك
عند حياه
حياه : بقولك يا روز 
روز : قولي 
حياه : قراية فاتحتي اخر الاسبوع وهستناكي 
روز : الف مبروك يا قلبي
حياه : الله يبارك فيكي عقبالك
روز : في حياتك يا حبيبتي
وبعد اسبوع 
في بيت حياه 
قبل قراية الفاتحه
حياه : مش ده يسري الجرسون
حاتم : اه بس موجود هنا بصفته صاحبي الانتيم
حياه : لما يسري صاحبك كان بيعاملك رسمي اوي لي قدامي 
يسري : كنت بحاول اديله برستيچ بس قدامك مش اكتر
وبعدين قراؤا الفاتحه في حضور 
صفاء ومهدي وحازم واحمد ونسمه وروز 
ومن عند حاتم عمار اخوه وهايدي مراته وجنه بنته وميار ويسري الجرسون صاحبه الانتيم  
حاتم : مبروك يا شمسي 
مهدي باستغراب : مين شمس دي يا ابني 
حياه : انا يا يا بابا 
مهدي : ومن امتا اسمك شمس 
حاتم : انا احكيلك يا عمي 
مهدي : احكي 
حاتم : لما سألتها علي اسمها ومرضيتش تقولي قررت ساعتها اندها بشمس قبل يوم المستشفى بيوم عرفت اسمها 
احمد : وانت حبيت واحده من غير ما تعرف اسمها 
حاتم : عادي يا عمو 
مهدي : عادي ازاي 
حاتم : انا حبيتها عشان اخلاقها وادبها وتربيتها ميهمنيش بقي اسمها اي او شكلها اي 
احمد لميار : ونعمه التربيه يا مدام 
ميار : تسلم 
حاتم : ممكن بقي اعمل حاجه ومحدش يعترض 
عمار بقلق : هتعمل اي بالظبط 
حاتم : متقلقش يا عم الله 
مهدي : طب اعمل اللي انت عايزه وربنا يستر 
الجميع ضحكوا 
وحاتم قام من مكانه وطلع علبه من جيبه ونزل علي ركبته 
وقال لحياه : تقبلي تتجوزيني 
حياه : ما احنا قرينا الفاتحه 
حاتم : اي الفصلان ده 
حازم : ما تخديه وخلاص بقي في اي 
مهدي : يلا يا بنتي الواد اكيد تعب من القعده 
حاتم : قولها يا عمي 
حياه : خلاص موافقه 
ومدت ايدها لبسها الخاتم وفجأة ميار جت في النص حضنتها 
حاتم : في اي يا ماما 
ميار : اصل انا عارفه اللي بعد كده عشان كده قولت الحقك
والكل ضحك 
نسمه : خير ما فعلتي يا مدام 
ميار : اسمي ميار 
نسمه : عاشت الاسامي 
ميار : تسلمي 
وقضوا وقت بين ضحك وهزار واغاني وزغاريط 
وحاتم واهله روحوا 
الكل بارك لحياه 
حياه : الله يبارك فيكم 
وقالت باستغراب : بس هو عرف منين مقاسي في الخاتم 
حازم بفخر : البركه فيا انا 
حياه : ربنا يباركلي فيك 
حازم : ويباركلي فيكي يا حبيبتي
ودخلوا يناموا 
وحياه معرفتش تنام من كتر الفرحه اللي هي فيها 
عند حاتم 
ميار : مبروك يا حبيبي
حاتم : الله يبارك فيكي يا ماما 
جنه جريت علي حضن حاتم 
وقالت : خلاص كده بقيت عريس وهتفرج عليك في الفرح 
الكل بضحك 
وحاتم قال : هو انا فيلم يا بنتي اسمها هشوفك في الكوشه مع عروستك 
جنه : هتفرج عليك في الكوشه مع عروستك
حاتم : مصممه تتفرجي عليا 
جنه : اه 
حاتم : طيب يا ستي ابقي اتفرجي عليا براحتك وادخلي نامي بقي 
ودخلوا يناموا كلهم 
وخلصت الامتحانات
بين قلق وتوتر حياه من الامتحانات ومن الخطوبه اللي قربت وبين مضايقات مراد ليها وانه مصمم يكلمها وهي بتصده 
وجه ميعاد الخطوبه 
كانت معموله في حياه 
بحضور الأهل والجيران والأصدقاء المقربين فقط
عند مراد
قرر يرجع البيت ويعترف لمامته انه بيحب حياه بس بعد اي 
رجع ودخل العماره وهو سامع اغاني بس مش عارف مصدرها اي لحد ما شاف شقه حياه مفتوحه وقف ع الباب وبص عليها
وكانت شغاله اغنيه يا دبله الخطوبه
وحاتم بيلبسها الشبكه 
وخلصوا تلبيس الشبكه والكل بقي يبارك ويهني
وكل ده مراد واقف مصدوم مش فاهم حاجه واتصدم اكتر لما شاف مامته فرحانه وبتزغرد
وبعدين طلع شقته وهو متعصب وقعد يكسر الحاجات اللي ممكن تكسر وبهدل الدنيا وبأعلي صوت عنده 
قال : يعني اليوم اللي ارجع فيه عشان اعترف بحبك قدام الدنيا كلها هو نفس اليوم اللي تضيعي مني فيه بس ده مستحيل 
وخلصت الخطوبه وناديه طلعت شقتها شافتها مبهدله 
وقالت : بسم الله الرحمن الرحيم اي اللي بهدل الشقه كده 
وبعدين شافت مراد 
وقالت : يعني اليوم اللي ترجع فيه تبهدل الشقه كده 
مراد بدموع : سابتني يا ماما سابتني واتخطبت لغيري 
ناديه : عارف لي 
مراد : لي 
ناديه بجمود : عشان جبان 
مراد : انا جبان 
ناديه : اه جبان ومبتعرفش تواجه واخرك صوت عالي بعد ما الحاجه تضيع منك 
مراد : كل ده 
ناديه : اه كل ده واجيبلك الدليل 
مراد : اي بقي الدليل
ناديه : انك لما خطبت ياقوت واكتشفت فجأه انك بتحب حياه مع اني قولتلك قبل ما تخطب ياقوت اخطبلك حياه واهي متربيه معاك وبتحبك وعارف اخلاقها ومش معني كده اني بعيب في اخلاق ياقوت لا ياقوت برضو اخلاقها عاليه بس رفضت حياه وقولتلي دي ملزقه وبعدين علي كلامك طلعت بتحبها ف انت بدل ما تواجه ياقوت بحقيقه مشاعرك وتواجه حياه باللي حسيته ناحيتها هربت وسيبتلي دبله ياقوت انا ارجعها وسيبت حياه لحد ما حد تاني اعترف بحبها وجه وطلبها رسمي عرفت بقي انت جبان لي
مراد : كل ده شايلهولي في قلبك 
ناديه : عشان المفروض اني ربيت راجل وفي الاخر الراجل معرفش يواجه وهرب زي البنات 
مراد : انا مسمحلكيش 
ناديه : تسمح ولا متسمحش هي كلمه هقولهالك وادخل 
مراد : اي هي بقي 
ناديه : الحمدلله ان ربنا خلص البنتين منك عشان انت متستاهلش واحده فيهم 
مراد : يعني ده اللي عندك 
ناديه : اه 
مراد : طب خدي بقي اللي عندي 
ناديه : قول يا حيله
مراد : الخطوبه اللي تمت من شويه دي مش هتكمل الا علي جثتي 
ناديه : ابقي اعمل حاجه يا مراد ورحمه ابوك انا اللي هقفلك تمام 
وسابته وكانت داخله ولفتله
وقالت : اه والشقه اللي انت بهدلتها دي اصحي الصبح القيها متنضفه 
وسابته ودخلت 
مراد فعلا نضف الشقه ودخل نام 
تاني يوم صحي دخل الحمام وجهز ونزل 
قابل حياه ع السلم 

مراد : ازيك يا حياه 
حياه : الحمدلله
مراد : انا عايز اقولك حاجه
حياه : بس بسرعه عشان خطيبي مستني تحت 
مراد : انا بحبك 
حياه : المفروض اقولك اي بقي 
مراد : تقولي وانا كمان بحبك 
حياه : طب عن اذنك عشان اتأخرت علي خطيبي واه ابقي اكشف علي مخك عشان شكل في حاجه
وسابته ونزلت لحاتم
وعدا شهر علي الخطوبه 
ومراد بيفكر يعمل اي عشان يفركش خطوبه حياه 
لحد ما قرر يفبرك صور ويبعتها لخطيبها ع الفيس 
وكان سهل انه يوصل لأكونت حاتم لأن حياه صديقه عنده 
وفبرك اكونت وفعلا عمل كده 
وحاتم اول ما شاف الصور راح لحياه علي طول 
حاتم : بصي يا حياه 
حياه شافت الصور وانهارت 
وقالت : والله ما اعرف حاجه عن الصور دي 
حاتم : اهدي انا عارف وانا مش جاي تتخانق ولا الومك علي حاجه انا جاي عشان نفكر مين اللي ممكن يعمل كده 
حياه : قعدت تفكر وقالت ممكن يكون 
حاتم : مين 
حياه : ممكن يكون مراد جارنا 
حاتم : مين حاتم 
حياه : ابن طنط اللي كانت معانا في المستشفى
حاتم : طب لي ممكن يعمل كده مع اني مش مرتاح له اصلا من يوم ما شوفته 
حياه حكتله الحكايه من اولها من ساعة ما كانت بتحبه لحد ما هو قالها أنه بيحبها
حاتم : تمام فين عمي 
حياه بخوف : عايز بابا لي 
حاتم : اندهيه بس 
حياه ندهت مهدي 
مهدي : خير يا ولاد 
حاتم : بص يا عمي في حد عايز يوقع بيني وبين حياه مش عارف لي 
مهدي : ازاي 
حاتم خلاه يشوف الصور 
مهدي : انا بنتي متعملش كده 
حاتم : اهدي يا عمي انا عارف 
مهدي : ولما انت عارف جاي تفسخ الخطوبه لي 
حاتم : مين اللي قال إني جاي افسخ الخطوبه 
مهدي : اومال انت جاي لي 
حاتم : عشان نحدد ميعاد الجواز 
مهدي : اي 
حاتم : صدقني يا عمي ده الرد الوحيد اللي ينفع نرد بيه علي اللي عمل كده 
في الوقت ده صفاء اتدخلت 
وقالت : حاتم بيتكلم صح 
وفعلا حددوا الجواز بعد شهر
وعدا اسبوعين 
وحياه بتحاول متشوفش مراد 
وفجأة وهي نازله قابلت مراد
مراد بفرحه انها اكيد سابت خطيبها 
قال : ازيك يا حياه
حياه : الحمدلله
مراد : وخطيبك عامل اي
سأل السؤال وهو مستني تقوله ان محصلش نصيب لكن الصدمه انها 
قالتله : بخير ده انا حتي نازله اقابله عشان نجيب الحاجات الناقصه عشان فرحنا كمان اسبوعين 
الخبر نزل كالصاعقة علي مراد ومعرفش يتكلم
وحياه سابته ونزلت 
وهو طلع وكان متعصب وبيفكر يعمل اي تاني عشان يفشكل الجوازه 
وفضل يفكر لحد ما الاسبوعين خلصوا ومعرفش يوصل لحاجه 
وجه يوم الفرح 
حياه لبست فستان ابيض منفوش من تحت زي ديل السمكه 
وحطت ميك اب خفيف وكانت شبه حوريات البحر 
حاتم وصل عندها وهي كانت مدياله ضهرها وكل ما يجي يشوفها تلف الناحيه التانيه لحد ما مهدي
قال : يلا بقي يا حياه المعازيم هيزهقوا ويمشوا 
وفي الاخر لفتله وهو اول ما شافه
قال : ما شاء الله تبارك الخلاق
وقرب عليها كأنه هيحضنها 
مهدي : انت هتعمل اي
حاتم : هعمل كده 
وباسها من قورتها واخدها 
وخدها ونزلوا القاعه 
ورقصوا سلو وهما بيرقصوا حاتم 
قال : عارفه يا حياه 
حياه : عارفه اي 
حاتم : مراد صعبان عليا 
حياه باستغراب : بعد اللي عمله ده وصعبان عليك 
حاتم : اه عارفه لي 
حياه : لي 
حاتم : عشان فوزت بيكي ودمرتله حلمه 
حياه بصت علي مراد اللي كان قاعد حزين 
وقالت : يعني لو كنت مكانه كنت هتبقي قاعد كده برضو 
حاتم : انا لو كنت مكانه ماكنتش هاجي الفرح واشوفك مع حد تاني اصلا 
وخلصوا الرقصه 
وبدؤا كتب الكتاب 
وحياه مش مصدقه نفسها من الفرحه بس برضو متوتره 
وفجأة سمعت 
المأذون بيقول : بارك الله لكما وبارك عليكما وجمع بينكما في خير
وتعالت الزغاريد والكل بقي يبارك ويهني 
وبعد ما خلصوا مباركات 
حاتم بص لمهدي وقال كده بقي حقي 
مهدي قاله : حقك يا عم مش هقدر اتكلم 
وحياه واقفه مش فاهمه يقصدوا اي لحد ما لقت حاتم بيحضنها وبيلف بيها 
وبعد مانزلها
جنه بتشد بنطلونه نزل شالها 
وقالها : اي يا حبيب عمو 
جنه : اخيرا اتفرجت عليك وانت عريس 
حياه ضحكت وقالت : اتفرجتي عليه 
جنه : اه واتفرجت عليكي انتي كمان 
حاتم : طب روحي كملي فرجه جنب ابوكي 
ونزلها 
وحضن حياه تاني 
قال : اخيرا يا شمس بقت حياتي
حياه : لا قولها صح عشان تبقي لائقه علي بعضها 
حاتم : اخيرا حياه بقت حياتي 
#تمت النهاية .. اقرا ايضا رواية زوجة حبيبي كاملة عبر دليل الروايات للقراءة والتحميل
رواية حياة بقت حياتي الفصل السادس عشر 16 والأخير - بقلم اسراء محمد
أيمن محمد

تعليقات

ليست هناك تعليقات
إرسال تعليق
    google-playkhamsatmostaqltradent