رواية عذاب الحب الفصل الاول بقلم ندى محمود
رواية عذاب الحب الفصل الاول
-انا شايفه ان لو صورنا البيوت بس هيكون المنظر كافي لجذب تعاطف الناس
=معتقدش ان شكل البيوت الي ف الاحياء العشوائيه هيكون منظر غريب علي كل الناس .. يعني احنا بنشوفهم كتير فالتلفزيون و مع ذلك محدش بيتحرك … انا شايف ان لو صورنا الناس الي هنا بشكل يجذب تعاطفهم دا هيخليهم يتحركو
= مش عارفه جايب الحكمه دي كلها منين .. بقالنا سنييين اصحاب ومع ذلك متعلمتش منك حاجه
نديم ضحك
= تعالي بس نجيب ميه من السوبرماركت دا
-ايه دا فيه سوبرماركت هنا !!
راحو ب اتجاه سوبرماركت صغير جدا جدا و فيه بضاعه قليله جدا و كان فيه راجل عجوز واقف فالسوبرماركت
اول لما شافهم رحب بيهم جامد
€ اهلا اهلا بالناس الجميله
نديم ابتسم
€ بتدورو علي حاجه معينه ؟ انا معنديش حاجات كتير بس يارب يكون الي عايزين تشتروه موجود عندي
بعدها كمل ب اسف
€ كل الجيران والناس الي فالحاره هنا لما بيشترو مني بيشترو بالسلف يعني عندي كراسه كامله كلها اسماء الناس الي اخدت مني حاجات وهتدفعها بالتقسيط .. الحال هنا صعب اوي
ندي حطت ايدها علي كتف الراجل العجوز
-متزعلش يا عمو احنا جايين هنا عشان نوصل صوتكم للناس وعشان يبقا عندك بيت حلو و وظيفه حلوه
العجوز ابتسم
€ بجد هيكون عندي بيت ليه سقف ؟! و كمان وظيفه اقدر اجيب منها ٣٠ جنيه فاليوم ؟!
نديم بص ل ندي الي كانت عينها بدأت تدمع
ف رد هو
= ايوا كل حاجه هتتحسن اوعدك ب دا .. وبعدين ليه بتقول مفيش حاجات كتير عندك اهو عندك كل حاجه فالسوبرماركت
و اخد حاجات كتيير
€ بس كدا انت هتدفع فلوس كتير ..
= شوفلي بس دول بكام يا عمي وانا عايزهم كلهم
€ ربنا يخليك و يوقف معاك ولاد الحلال ويخليلك اختك
ب دهشه = اختي ؟!
€ اه الانسه الي معاك
كان لسا نديم هيرد بس ندي سبقته
-ايوا هو اكتر من اخويا كمان .. دا انا ربنا عوضني ان معنديش اخوات و خلي عندي اجمل اخ فالدنيا
نديم اتضايق من كلامها
= هل عندنا نفس الام ؟
-لا
= طيب نفس الاب ؟
-لا بردو
= هل راضعين مع بعض مثلا ؟!
-لا
= يبقا بتقولي اخوات علطول لييه .. احنا اصحاب بس مش اخوات
-مش عارفه بجد ليه الكلمه دي بتضايقك اوي
بزعيق = عشان احنا مش اخوات
-طب براحه بتزعقلي و تعلي صوتك عليا ليه ! قولتلك ١٠٠مره يا نديم مش بحب انك تعلي صوتك عليا
وسابته فالسوبرماركت وراحت تكمل تصوير فالمكان
نديم وقف فمكانه وهو بيتنهد
= مش بعرف امسك نفسي لما بتجيب سيره اننا اخوات ..
€ بتحبها صح
نديم استغرب
= عرفت منين فخمس دقايق كدا
€ الموضوع واضح زي الشمس يبني
= اومال ليه الغبيه دي مش فاهمه .. عارف يا عمي مامتي ومامتها اصحاب من المدرسه و عمرهم م افترقو ابدا و حتي بابا وباباها كانو اخوات لكن هما الاتنين ماتو فحادثه قبل لما انا وندي نتولد ومن وقتها و ماما ومامتها اتفقو انهم عمرهم م هيفترقو وانهم هيربونا مع بعض عشان نبقا سند لبعض لما نكبر وفعلا دخلنا نفس الحضانه ونفس المدرسه لغايه ثانويه عامه . اتفرقنا بس فالجامعه لما هي دخلت اثار و انا دخلت شرطه بس مع ذلك انا الي بوصلها الجامعه كل يوم و مش بيعدي يوم غير لما نشوف بعض فيه و كمان هوايه التصوير خلتنا نقضي مع بعض وقت اكتر .. اتخيل بحبها من وانا عندي ٧ سنين وهي مش ملاحظه ؟! ١٤ سنه وهي غبيه بالشكل دا !
كان لسا العجوز هيرد بس فيه شله غريبه دخلت عليهم فالسوبرماركت
¥ هتدينا الي عندك فالسوبرماركت بالذوق و لا ناخده بالعافيه
€ يبني معنديش والله غير كام كيس مكرونه وكام شيبسي .. بالله عليك سبهم ومتاخدهمش انا معنديش رزق غيرهم
¥ انا مش بكرر كلامي مرتين
= ايه يا شبح انت وهو عايزين ايه من الراجل
¥ ايه دا ناس نضيفه عندنا فالحاره
و زق نديم
¥ بتدخل ليه ف الي ملكش فيه
نديم زقه
= وانت مالك بالراجل العجوز
¥ الحقو يا رجاله دا بيزقني
= امشو وسيبوه احسن ليكم
¥ وهتعمل ايه لو ممشيناش
€ يبني سيبهم خلاص ياخدو الي عايزينه .. دول معروفين بالبلطجه فالحاره هنا ومحدش بيتجرأ يكلمهم
= لا استني يا راجل يا طيب انت .. ليه ياخدو بضاعتك اصلا .. ايه مفيش شرطه فالمكان !!
البلطجيه بصو علي بنطلون نديم يشوفو فيه مسدس ولا لا بس مكنش فيه
¥ انت هتضحك عليها ولا ايه .. هو فيه شرطي بيخرج من بيته من غير سلاح !
= طب تعالو قربو بس من اي حاجه فالسوبرماركت دا وانا هوريكم الضحك فين
البلطجي قرب و اخد كيس مكرونه
نديم مسكه من ياقه قميصه و ضربه جامد ف وشه لدرجه ان مناخيره نزفت و عينه ورمت
¥ يبن ال****
= يلا الي بعده
قرب عليه اتنين مع بعض بس هو مسك واحد فيهم من رقبته و ضرب بيه التاني
= ايه مستواكم الضعيف دا .. حاسس اني بتخانق مع اطفال
قامو من عالارض و جريو عليه مره واحده بس هو ضرب كل واحد فيهم ف بطنه بسرعه جدا لدرجه انهم ملحقوش يبدو رده فعل
= ايه الملل دا بجد .. طب اضربوني ضربه واحده حتي عشان اقتنع انكم بلطجيه
بس وقتها ندي وصلت عند السوبرماركت .. كانت راجعه عشان تقوله انها هتمشي وحدها ف مفيش داعي يستناها لانها مش هتروح معاه
اتفاجئت بالبلطجيه الي كانو واقعين عالارض
-نديم ! ايه حصل هنا !
البلطجيه اول لما شافوها جريو بسرعه عليها وواحد فيهم مسكها من رقبتها وحط مطوه عند رقبتها
¥ يا تري هتقتنع اننا بلطجيه لو موتناها ! و قرب المطوه جامد علي رقبتها لدرجه انها اتجرحت جرح سطحي و نزلت دم
اما نديم ف كان قلبه بيدق جامد من الخوف
= سيبها !!
¥ قال يعني هسمع كلامك فعلا واسيبها لما تقولي كدا
= هتقتلها يعني وتدخل السجن !
¥ عادي كدا كدا حياتي برا السجن عباره عن سجن
نديم بدأ يقرب منه براحه
¥ متتحركش والا اقسم بالله هدبحها !!
نديم وقف مكانه
= خلاص خلاص مش هتحرك اهو .. عايز ايه عشان تسيبها !
وطلع من جيبه كل الفلوس الي معاه
= خد اهو كل الي معايا بس سيبها
¥ واقلع الساعه الي ف ايدك كمان
نديم خلعها
¥ اديهم لصاحبي و هسيبها
صاحبه قرب من نديم و نديم حطله الفلوس والساعه ف ايده
= اهو عملتلك الي عايزه يلا سيبها !!
¥ فاكر يعني ان لما اخد كل الي معاك دا هيرجع كرامتي الي رمتها فالارض !!
وشاورله عالناس الي واقفه قدام بيوتها وبيتفرجو عليهم
¥ انت دوست علي كرامتي قدام كل سكان الحاره وكدا محدش هيخاف مني تاني ! لازم ترجعهالي و بعدها هسيب البنت
= هرجعهالك ازاي مثلا !!
واحد من البلطجيه قرب من نديم و ضربه بوكس ف وشه
¥ اظن فهمت هترجعهالنا ازاي
نديم وقف قدامهم وهو فاتح دراعاته ( مش عارفه اتخيلتو الموقف ولا لا ) وكان وقتها ندمان خمسين مره انه مجابش المسدس معاه .. لو كان معاه كان زمانه موقعش فالموقف الصعب دا بس مش هينفع يقرب منهم و يخاطر ان يحصل حاجه لندي
= اهو انا قدامك اعمل فيا الي عايزه
الرجاله قربو من نديم و بدأو ضرب فيه .. ف وشه وبطنه و كل مكان فيه و لما وقع عالارض ضربوه برجلهم
بعياط -سيبوه حرام عليكم سيبوه !!
¥ بس يا قطه متعيطيش متخافيش دول كدمات بسيطه
بعياط - خلاص قولهم كفايه ضرب كفايه
¥ لسا شويه لما احس انا انه كفايه هقولهم يوقفو
اما الراجل العجوز فمكنش قادر يتدخل لانه خايف علي نفسه و باقي سكان الحاره كلهم بيتفرجو عالمنظر ومحدش فيهم اتحرك
وبعد ربع ساعه من الضرب سابوه وهو مش قادر يتحرك بس قبل لما يسيبوه واحد فيهم ضربه بالمطوه ف بطنه و بعدها البلطجي ساب ندي
¥ ياريت تكون اقتنعت اننا بلطجيه
و سابوهم ومشيو
اما ندي ف جريت علي نديم
بعياط -نديم افتح عينك يا نديم ..
فتح عينه بالعافيه وكان بيتكلم بالعافيه
= متقلقيش انا كويس اهو .. دي غلطتي ان مجبتش المسدس
بعياط -ششش متتكلمش انت كدا هتتعب اكتر
وحاولت تقومه وهو ساند عليها
بعياط -حد هنا يساعدني حرام عليكم !!!
و كانت هتطلع موبايلها عشان تتصل بالاسعاف بس افتكرت ان واحد من البلطجيه اخده
كان نديم بينزف جامد من بطنه من كتر الضرب فيها
= سيبيني و اطلعي من الحاره وشوفي اقرب سوبرماركت اتصلي منه عالاسعاف
بعياط -لا مش هسيبك هنا احسن يرجعو تاني
وكانت بتبص عالدم الي عالارض وهي مرعوبه
استجمع قوته وحط ايديه علي عينيها
= متبصيش عالدم .. انتي بتخافي منه جامد وبيغمي عليكي لما تشوفي دم ..
سندته وقعدته عالارض و قطعت حته من فستانها و ربطتله الجرح الي ف بطنه
بعياط -متقلقش هتبقا كويس
وسندته تاني وقومته و فضلت سانداه مسافه كبيره لغايه لما وصلو للطريق العمومي و حاولت توقف عربيه بس محدش كان بيوقفلها
بس هو كان بدأ يقفل عينه
بعياط - لا لا متسبنيش يا نديم خليك صاحي اوعي تنام
بس هو نزف كتير ومكنش قادر ف اغمي عليه
هي انهارت اول لما شافته اغمي عليه و نزلته عالارض و وقفت فنص الطريق العمومي عشان تجبر عربيه انها تقف
وفعلا دا الي حصل
•انتي مجنونه !!! عايزاني ادوسك و اتسجن ! فيه كذا طريقه للانتحار غير دي علي فكره !
بعياط -ساعدني ارجوك اخويا بيموت
بص علي جانب الطريق و شاف نديم نايم عالارض و باين انه مضروب جامد وفيه قماشه علي بطنه
سنده معاها لغايه العربيه و ووصلها المستشفي وكانت مستنيه ف طرقه المستشفي وهي بتموت من القلق
*انتي الي جبتي المريض الي كان بينزف جامد هنا !
مسحت دموعها
-ايوه .. هو كويس صح
*عايزين نقل دم بسرعه
-انا نفس فصيلته واقدر اتبرعله
*تمام كويس جدا تعالي ورايا
و فعلا اتبرعتله بالدم و قعدت فالطرقه تاني وهي مستنياه لغايه لما الدكتوره طمنتها ان حالته بقت مستقره وانه يقدر يمشي لما يفوق بس لازم يرتاح كويس
دخلت الاوضه الي هو فيها و نامت عالكرسي الي جمب السرير وهي سانده راسها عليه
بعدها بساعات نديم فاق و شاف ندي حاطه راسه عليه ونايمه وكان سرحان فيها
بس فاق من سرحانه علي صوت الممرضه وندي كمان صحيت
-ايه دا اخيرا فوقت !
وحضنته جامد وهو فرح انها قلقت عليه بالشكل دا
-متتخيلش انا قلقت عليك اد ايه .. كنت فاكره ان ربنا هياخد الاخ الي عوضني بيه
زقها بعيد عنه لما سمع كلامها بحجه ان الجرح وجعه لما حضنته جامد
-انا اسفه بجد نسيت ان فيه جرح ..
حاول يغير الموضوع
= قولتي لماما ؟
-ايه دا نسيت اقول لماما او مامتك وبعدين اصلا الموبايلات اتسرقت ..
= كويس مقولتيلهمش كانو هيقلقو عالفاضي
اما الممرضه ف زهقت من انها واقفه ليها كذا دقيقه وهما بيتصرفو كأنها مش موجوده
-اه اسفه نسيت انك واقفه هنا خالص .. كنتي جايه تعملي حاجه ؟
٪ جايه اغير عالجرح
= اه تمام اتفضلي
و رفع التيشرت لفوق عشان تغير عالجرح الي ف بطنه
بس الممرضه قالتله انه لازم يقلعه خالص عشان تعرف تشوف شغلها ف هو اضطر يخلعه
ندي بصت للناحيه التانيه بسرعه
-ايه يبني مش تقول انك هتخلعه بدل م انت خلعته فجأه كدا !!
= علي اساس دي اول مره تشوفيني من غير تيشرت مثلا
-علي فكره اخر مره شفتك كدا كانت فالابتدائي لما رحنا البحر
=اااه براحه لو سمحتي
ندي بصت عليه بقلق
-ايه حصل !!
نديم ضحك
= يعني مكنش ينفع تبصي غير لما اخضك 😂
-ايه عضلات البطن دي عملتها امتي !!
= مش انتي يبنتي عارفه اني بروح الجيم كتير !
-فكراك رايح تخس
= طب بذمتك واحد زيي جسمه مظبوط هيعوز يخس ليه
-علي فكره عندك كرش
= لا والله مفيش
-ما علينا يلا البس التيشرت اهو الممرضه خلصت
الممرضه خلصت ومشيت وهو لبس التيشرت و خرج من المستشفي و ركبو تاكسي و روحو البيت
اه نسيت اقولكم انهم كمان جيران و شقتهم قصاد بعض
خبطت علي شقته عشان توصله بعدها هتروح شقتها
واول لما خبطت الباب اتفتح بسرعه وكانت ام ندي وام نديم مع بعض فالشقه
> كنتو فين بردو كدا تقلقونا عليكم بالشكل دا !!!
-هي الساعه كام
> داخله علي ٢
-نعم !
> تعالو احكولنا كنتو فين
وبصت علي نديم
> ايه الي ف وشك ورقبتك دا !!!
و قعدو عالكنبه كلهم
*ايه الي حصل يا ندي احكيلنا وماله نديم ليه حالته كدا
ندي حكتلهم كل حاجه
وام نديم حضنته و هي بتعيط
> مكنتش هعرف اعيش من غيرك لو حصلك حاجه..
= اهدي يا ماما انا كويس وبعدين دا درس ليا عشان منساش المسدس تاني
*الحمدلله اتطمنا علي نديم ف انا هروح انا وندي شقتنا عشان الوقت اتأخر واكيد نديم عايز ينام ويرتاح
> تمام يا روحي
و ودعوهم و راحو شقتهم
*يبنتي ليه بتروحو الاماكن دي .. وكمان رايحين من غير اي احتياطات
-يا ماما عدت علي خير
*الحمدلله انتي ونديم بقيتو زي م انا وصفيه عايزين .. كنا عايزينكم سند لبعض و النهارده اتأكدنا انكم فعلا سند لبعض لما دافع عنك وعرض حياته للخطر
-متقلقيش يا ماما انا اصلا لو كان عندي اخ مكنش هيكون احسن من نديم و عشان كدا انا فخوره اننا اخوات
*تمام يا بنتي يلا روحي استريحي شويه اكيد اليوم كان مرهق
^اليوم الي بعدو^
ندي صحيت الصبح وهي مخضوضه لانها حلمت بكابوس و فتحت باب الشقه وخبطت جامد علي شقه نديم
> ايه يبنتي مالك
-نديم هنا ؟!
> لا راح الشغل
-بتهزرييي يا صفيه
( بتقولها ب اسمها عادي )
> قعدت اتحايل عليه يرتاح يومين بس مرضيش وبعدين ايه حالتك دي .. قومتي من عالسرير عالباب علطول ولا ايه
ندي حطت ايدها علي شعرها
-ايواا حلمت بكابوس ف جيت اطمن علي نديم
> لا متقلقيش هو كويس
-عن اذنك هروح اسرح شعري
وجريت بسرعه علي شقتها و سرحت شعرها و لبست ونزلت راحت مركز الشرطه الي شغال فيه نديم
لما وصلت هناك كان بيتكلم مع حراميه و صوته كان عالي جدا
بزعيق = بقول وديتو الحاجه الي سرقتوها فين !! انطقو !
€ اسجنا لو عايز لكن مش هنقول
بزعيق = يا عسكري !! خدهم اضربوهم لغايه لما يعترفو !
و العسكري خدهم فعلا
ندي راحت ناحيه نديم
-كل دي عصبيه يا نديم
= ايه دا ندي
-صحيح اكيد هتعاقب البلطجيه بتوع امبارح صح
= هو انتي لسا فاكره .. دا انا رحت بنفسي هناك وجبتهم هنا و نزلت فيهم ضرب لغايه لما تعبت
-بس كدا غلط عالجرح يا نديم !! ليه ترهق نفسك كدا
و قربت منه و رفعت القميص بتاعه عشان تشوف الجرح الي ف بطنه .. كل دا و كل الي فمركز الشرطه مراقبين الموقف ومش مصدقين
= احم ندي ابعدي انا فالشغل وبعدين كنتي قولتيلي وانا كنت هوريكي بنفسي
اول لما شافت ان الجرح كويس ومتفتحتش سابته
-اهو خلصت يسيدي .. قولت اتأكد بنفسي انه متفتحتش
= طب اقعدي عالكرسي
ندي قعدت وشافت الشرطه التانيين باصيين عليها وبعدين استوعبت هما بيبصو ليه
-مش تقولي ان فيه ناس هنا يا نديم !!
=هكون شغال وحدي مثلا فالمركز كله !
-معلش يجماعه كنت بطمن علي اخويا
ف سره= اخوكي تاني !
و هي قاعده هناك عينها وقعت علي واحد زميل نديم .. زميله دا زي الممثلين الاتراك .. طول و عرض و عين ازرق و شعر اشقر .. واحد كدا مفيش زيه غير فالافلام
هي اصلا معجبه بيه ليها كذا شهر و نديم ملاحظ نظراتها ليه عشان كدا مش بيحب انها تجيله الشغل
فاقت من سرحانها علي صوت نديم
= طب ايه مش هتمشي بقا
-انت كل مره تطردني كدا !!
= عندي شغل يلا نتقابل لما اروح البيت
بصوت واطي -طب مش هتعرفني علي زميلك دا وتكسب فيا ثواب .. بلييز عرفنا علي بعض
= يلا يبنتي من هنا دا مكان شغل يلا يا ماما
-طب علي فكره مش هجيلك الشغل هنا تاني
= احسن بردو يلا امشي
طلعتله لسانها ومشيت
وهو ضحك علي تصرفها دا
بمجرد لما مشيت .. زميله الي كلمتكم عنه فوق قعد جمبه
~ انا بحاول بقالي فتره اعرف ايه علاقتكم ببعض وبصراحه كنت مكسوف اسألك بس انا مشوفتش خالص دبله ف ايدك و لا هي كمان و كمان لما قالتلك النهارده انك اخوها دا شجعني اكتر اني اجي اكلمك
= خير
~ حابب اخد منك رقم ابوها عشان عايز اتقدملها
يتبع الفصل التالي اضغط هنا
- الفهرس يحتوي على جميع فصول الرواية كاملة :"رواية عذاب الحب" اضغط على اسم الرواية