رواية السمرة الفصل السابع 7 بقلم مريم اليوسف

الصفحة الرئيسية

     رواية السمرة الفصل السابع بقلم مريم اليوسف 


رواية السمرة الفصل السابع 

منار :البنت يلي حبيتا وصرت احكي معها هية المى بنت عمار 
شوكت :مين هي البنت ماعرفتا 
منار :واذا قلتلك سمرا بتصير حالتها مرت ابوها ؟؟
شوكت :شووو
معاذ :عم تمزح 
محمد واياس :مين سمرا 
منار :اسأل الحنون بقلك مين هي 
شوكت :خلص وحدة مو منيحة ..
اياس :لاي درجة بدنا نفهم 
معاذ :مو مخلاية شب من شرها .. وهية يلي كنت احكي معا لما مرتي سمعتني 
اياس :حلو .. حلو التطور ... وانت منار شو بتعرف عنها لتكون انت متل هالجوز 
منار :فشرت .. بس حاولت تتعرضلي كتير  وانا كنت صدا .
محمد :لهالسبب تركت البنت 
منار :بدك اكبر من هيك سبب
محمد : البنت شو شفت منها 
منار :ماشفت منها شي البنت ولا اطهر من هيك ... بس مابعرف بركي هية عم تفرجيتي وجها البريء او يمكن هية هيك ..  وبعدين بدك اياني ناسب سمرا 
الشباب ساكتين 
منار :شو احكو عطوني رأيكن 
محمد :انا برأيي انك غلطان البنت مالها ذنب وانت لو بتحبا عنجد بتخلصا من مرت ابوها احسن ماتجرها معها ... بس مزال اخدت قرارك فات الاوان 
منار  :غلطان ؟؟
اياس :انا برأيي اي كمان 
معاذ :لا مو غلطان وعمل يلي لازم ينعمل .. لو حدا غيرو كان كمل مع البنت وضحك عليها 
شوكت : والله ياحنون عملت عين العقل لا تنام بين القبور وتشوف منامات وحشة 
محمد : مشالله عليكن .. بس شوبدو يطلع معكن جوز فلتانين 
شوكت :لكن بدك اياه يتزوجا ويضل طول عمرو عايش بالشك عم تخوني لأ ماعم تخوني ... متل سمرا ولا مو متلا ... هيك رح يتعذب ويعذبا خلص تروح بحال سبيلا .. الله يبعتلا الاحسن 
اخر كلمة نزلت متل الجمر على صدر منار .. بس اكتفى بالصمت 
اياس :خلص ماتركتا  لاتفكر راحت .. حاول ترجع لطبيعتك واصلا لو رجعت البنت معد تقبل تركتا بدون اي سبب خلص اتركا تعيش حياتا 
منار :وهو هيك يعني فترة وبتعدي 
شيلكن مني ... شو محمد شو حل لاياس 
محمد : انابقول يرجع يحكيها عادي رح تسامحو وبالنهاية مادخلك بمنار قلا انا رايدك اذا بدك اياني خليني ابعت اهلي 
منار :وانا رأيي من رأيو .. البنات دغري بسامحو 
اياس :رح حكيها لما روح ... وانت شوكت افندي 
شوكت:انا بصراحة يا شباب حابب هالمرة عنجد .. بنت اخدت قلبي وروحي وكل تفكيري 
منار :ههههه اي بدنا ..  المهم ناوي تتزوج ولا بس حكي 
شوكت :والله ياحنون ناوي خلص هاي هية 
منار :الله يسهلك ... ومعاذ ؟؟
معاذ :شباب انتو حاسين فيني.. عفكرة انا اكتر واحد متألم فيكن 
محمد :هههه وليش بقا 
معاذ :لكن انا شكلي شكل عريس جديد ...انا لازم هلق كون عم اتنعم بالعسل مو قاعد معكن وعم اسمع سوالفكن المعتة 
منار : بتستاهل .. ماتقول لحالك هالحكي قبل ماتاكل هوا مع هديك يلي ما بتتسمى 
معاذ :ندماااان ... لك لاقولي حل يا شباب 
قرب محمد بطريقة طريفة وقال : مامشي حالها الشوكولاتة 
معاذ :الله يعدمني اياك انت 
والشباب كلن قلبوها ضحك 
____________________
في اليوم التالي 
البنات مجتمعين عند ديمة وعم يهنو بعض بالنجاح بالبكالوريا وصوت الرصاص عم ينضرب بالجو على فرحة النجاح بالضيعة 
ديمة :مو مصدقة يا بنات انو انجحنا 😍😍
غزل :بس مجموعي مانو عالي متلكن 
مريم :اي عادي عأساس حتى لو عالي رح نكمل 
غزل :قولتكن رح يخلونا نكمل 
مريم :مو حابة انزع فرحة النجاح بس شفتولي شي وحدة كملت .. الا اذا تزوجت او انخطبت .. لانو الاهل بخافو عبناتهن  ومعن حق 
ديمة :لاحقين ع النكد اصلا اهلنا لسه ماحكو شي ... بتعرفو بنات يمكن لانو نحنا مع بعض يخلونا ندرس جامعة
غزل :الله يسمع منك ... ياربي المى ليش ما اجت  ماخبرتوها 
ديمة : كيف بدنا نخبرها  تجي اذا تلفون ما معها
مريم :ارجعي بالله افتحي ع اسم المى لشوف شقد مجمعة 
غزل :لا تفتحي انقص منك بعلامة 
ديمة :لكن صفى انا وانت كسلانين يا غزل 
غزل :شايفة بالله مع انو اجتهدت 
مريم :اجتهاد على حالكن 
ديمة :هههه المهم قومو نروح لعند المى والله ماحلوة الجمعة بلاها  وكمان بركي بتطلع من جوها شوي وبتكون فرحانة لنجاحها 
طلعو وراحو مشي لعندها ومين ماشافن ع الطريق يسألن اذا نجحو ويباركلن 
وصلو لعند المى واستقبلو بعض بالاحضان ويباركو لبعض 
المى :ماتخيلت جمع هيك مجموعة 
ديمة :لأنك شطورة 
المى : وغصب عنك ههههه
مريم : دخيل هالضحكة ماتفارقك حبيبتي 
المى :تسلمولي يارب ... انطروني شوي لجيب شي اشربو 
غزل :وينا مرت ابوكي 
المى :بتكون بغرفتا .. راجعتلكن(وطلعت)
________________________
ببيت اهل معاذ 
طلعت شهد مفزوعة من المطبخ :شو هالاصوات .. شوفي شو صاير 
الاء :النتائج 
شهد :ييي اي والله تذكرت
الاء : عقبالي😴
شهد :ان شاء الله وبتجيبي مجموع عالي 
الاء : الله يسمع منك يارب
شهد : صحيح هدول الصبايا يلي رحنا لعندن مو كانو بكالوريا 
الاء :لك صحيح ...لروح اتصل بمريم  واسألها 
شهد : وخبريني 
الاء : يلا 
راحت الاء وانفتح باب غرفة عمها ومرت عمها  وطلع ابو معاذ ومرتو وراه عم تضبطلو هندامو 
ابو معاذ: بدكن شي اليوم 
ام معاذ : لا سلامتك .. اذا بدنا شي بنخبر معاذ 
ابو معاذ لشهد : كيفك يابنتي 
شهد : الحمد لله عمو 
ابو معاذ : بنتي ماراق قلبك على معاذ 
سكتت وماردت 
ابو معاذ : البعد جفا يابنتي .. ومعاذ عريس وفهمك كفاية 
شهد :حكالك شي عمو 
او معاذ :من غير مايحكي انا قريانو ..
ام معاذ : خلص اتركها ... عندي .. مو قليل يلي صار معها 
اتفاجئت بحماتها كيف عم تدافع عنها 
ابو معاذ :على خير ..تركهن وطلع 
________________________
بالمعمل
بمكتب الشباب مجتمعين الشباب  عم يشربو شاي الا معاذ ... ومافي شوي الا ودخل عليهن
معاذ :شوفي اليوم شباب 
اياس :نتائج البكالوريا 
معاذ :امم .. اختك هي السنة بكالوريا ماهيك 
اياس :اي والله 
معاذ :ونجحت 
اياس :غصب عنها ههههه
معاذ :مبروك 
محمد والابتسامة على وجهو :مبروك 
شوكت :مبروك حنون 
اياس :الله يبارك بعمرك ... شو منار مافي مبروك 
منار :ليش المبروك ليش شوعامل حضرتك ... انا بباركلها بنفسي لبنت خالتي 
اياس :غليظ 
منار :ليك شوبدي قلك 
اياس :قول 
منار :ولا شي .. يلا قومو خلينا نحمل عندي طلبية كبيرة اليوم ويمكن اتأخر 
محمد :صحيح اياس ومين نجح كمان من الضيعة
منار فورا نقل نظرو لاياس يمكن هاد السؤال يلي كان بدو يسألو 
اياس :نسبة النجاح كتيرة بالضيعة  في كم شخص راسبين ... يمكن ابن ابو عماد وابن السنكري  وواحد تاني 
قامو وطلعو مع بعض .. ومنار جال بنظرو على المعمل وقال : شباب بدنا نكمل التوسيعة للمعمل 
اياس :والمصاري ؟؟
منار :انا بدبرها ... انت خبر المعمرجي يجي يهد الحيط بين المعمل والتوسيعة يلي عملها  وكمان حدا يدهنا 
اياس :ماشي 
________________
قاعدين الصبايا   والمى دخلت عليهن  ومعها عصير وكيك 
ديمة :لسه بتضيفينا بهالعصير .. خلص نحنا كبرنا بدنا قهوة 
المى :هههههه
ضيفتن وقعدت 
المى :غريب مالقيت خالتي سمرا بالبيت ولاحتى ابي  مدري وين راحو 
مريم:بكونو راحو يجبولك هدية 
المى :هههه ياريت 
مريم :لكن كيف طلعتي النتيجة ؟؟ اذا تلفون مامعك ومافي حدا بالبيت 
المى : البابا تركتلي تلفوني  بس انا ماعم قرب عليه طلعت النتيجة ورجعتو .. المهم خبروني شو اخر اخباركن 
ديمة :تمام انت كيفك 
المى :غير شكل شو صاير علي 
غزل :بطلتي زعل 
المى :لك انا هبلة ...ماحكيت معو غير كم يوم وزعلت ... عنجد بصفن بحالي بقول ما اغباني في بنات كل يوم بتحكي مع عشرة وبتقلع عشرين هههه ... وهو يمكن ماحبني شو الحب غصب بس ماحب يجرح مشاعري  بس انسحب بطريقة غلط 
ديمة :المى عم تحكي جدد
المى :والله جد انا اوفرتها كتير .. كل يلي كان حكي بحكي 
ديمة :بشرفك عم تحكي انك مأوفرة الموضوع وانا تركت اياس كرمالك 
المى :كرماليي؟؟؟ ليش 
ديمة :مشان يضغط ع منار ونعرف شو السبب يلي تركك مشانو 
المى : مجنونة انت؟
ديمة : اي مجنونة لانو اتعاطفت معك 
المى :انا شوو دخلني 
ديمة بهدوء : خلص مافي شي ... الحق علي انا 
المى : وشو صار هلق 
ديمة : ماصار شي كل واحد من طريق 
المى : مين قال هالشي 
ديمة :من يومها ماعبرني 
مريم : لو فاتحة تلفونك المسا كان عبرك بس حضرتك كنت قافلتيه 
ديمة : شو قلتي ؟؟
اياس : قرر يصالحك ومبارح طول الليل يحاول يتصل فيكي وماقدر 
ديمة :وهلق لحتى احكيتي 
مريم : فرحة النجاح نستني 
ديمة : يعني اياس لسه بحبني 
مريم : اي وبدو يطلبك رسمي 
ديمة :يا الله ماعم صدق 😍😍😍😍
المى تغيرت ملامحها قامت فورا وقالت : رح شوف خالتي وينا بتذكر كانت بالبيت 
طلعت وهية حابسة الغصة .. وطبعا لاحظو عليها 
غزل : هالبنت مابتعرف تكذب 
_______________________
طالع من الحمام  اخد تلفونو وتمدد على تختو وطلب رقم 
شوكت : كيفو حبيبي 
:شو خلصت شغل 
شوكت :هي طلعتي من الحمام 
:اي نعيما
شوكت:لي عم تحكيني بنفسية يا حنونتي 
: انت بتعرف ليش 
شوكت : ماقلتلك شوصار معي .. مرة تعب منار ومرة نسيت ومرة اخجل ... والله مو ظابطة حاليا 
: هو هالطلب طلبتو منك ... قول مابدك وخلصنا 
شوكت : والله بدي وطلباتك على عيني وعلى راسي .. بس انو نوظف حدا بالمعمل حاليا كتير صعب .. والله مكسورين ... بس الك عندي خبر حلو.. بلشنا بتوسيع المعمل واكيد بدنا عمال واخوكي اول واحد  رح يتوظف  عنا 
: شقد يعني 
شوكت : اسبوع بالكتير 
:طيب انا ناطرة ... بترجاك يا حبيبي والله اخي درويش وماعم تتيسر معو ويلاقي شغل... والله لو بلاقي مابعود اطلب منك شي
شوكت : طيب بوعدك اذا ما مشي حالو بالمعمل لدورلو عشغل 
: لااا ... بدنا بالمعمل 
شوكت : ليش 
: مشان يضل جنبك ويتعلم مصلحة وتصيرو رفقات 
شوكت : امممم اقنعتيني ... المهم قوليلي شوعم تعمل يا حنون 
__________________
المسا 
قاعدة ديمة بغرفتها وعلى تختها وعم تعض اضافرها وتهز وقدمها التلفون من وقت خبرتا مريم وهية ناطرة هالاتصال 
حطت ايدها عبطنها وقالت :هلق وقتك ...اوووف رح اعملها على حالي وانا عم انطر ... اخدو معي ... لا لا ... اي من الصبح ناطرة معقول يتصل وانا بالحمام ..  وبركي اتصل ... لا لا مابظن 
قامت دخلت على الحمام والحظ النحس اشتغل ورن التلفون باسم اياس... مافي الا دقائق وطلعت لقت الشاشة مضوية ...قربت لقت مكالمة فائتة ... 
ديمة :لااااا ... لااااااا 
__________________
كان ماشي على الطريق لعند الشباب وعم يحكي على التلفون 
اياس :الو مريم
مريم :اي قلي 
اياس :متأكدة انها فرحت لما خبرتيها
مريم :اي وكتتتير ليش شو صار ماحكت 
اياس :ولا حتى عم ترد علي 
مريم :والله مابعرف شو صايرلا 
اياس :خلص اتركيها علي انا بدبرها 
وصل لعند الشباب ورما حالو على كنبة فاضية 
منار : شو اياسو ايمت بدنا نروح 
اياس : ع وين 
منار : نخطبلك 
اياس : ههههههه عضة كوساية
منار : وانت حنون
اتنهد شوكت وتجلس : شباب 
منار :شو 
شوكت : خلص مافي شي 
محمد : صح شوكت من مدة وانت في شي بدك تحكيه وبعدين بتغير السالفة
رن تلفون شوكت قام وقال : بعدين بعدين 
معاذ : شبو هاد 
منار : الا مايحكي اتركو 
حكو شوي بتوسيع المعمل وبعدا كل واخد التهى بتلفونو ... منار قلب كتير بس مافي شي بنسيه او يلتهى فيه .. بالو وقلبو عندا رح يطق ... وكل مايتذكر يسب سمرا بسرو 
فقرر يحكي هلا لانو حسها فهمت عليه وممكن تساعدو او يفضفضلا 
فتح ع اسمها وبلش يحاكيها 
منار :مسالخير 
هلا: يا مسالنور 
منار :كيفك 
هلا :تمام .. وانت 
منار : منيح كتير ..
هلا : دووم يارب 
منار : بدي اتشكرك 
هلا : الي ؟؟؟
منار :اي .. مظبوط متل ماحكيتي عزيمتنا هية يلي تعبانة 
هلا :وشو عملت 
منار :قعدت انا والشباب وفضفضنا لبعض وقررنا نرجع نوقف على رجلينا ومانخلي شي يلهينا عن هدفنا 
هلا :اي تمام ... الله يقويكن يارب ... يعني بلشتو بتوسيع المعمل
منار :هو كنا مبلشين من فترة ووقفنا اليوم قررنا نرجع نكمل 
هلا :برافو والله ... الله يكملها معكن 
منار :آمين 
هلا :يعني بعد شقد بنصير نشتغل مع بعض 
منار :شهرين 
هلا :اوووف 
منار : بدنا اجهزة جديدة وعمال وكمية حليب زيادة مو بين يوم وليلي بصيرو 
هلا :لكن بننطر شوبدنا نعمل 
منار :ههه اي والله 
هلا :طيب شو رأيك مزال لسه شهرين قدامنا .. بنتعرف عبعض وبنصير اصدقاء 
منار :اي ممكن 
هلا :لانو حسيت انك بحاجة صديق او صديقة ههههه😅
منار :اذا متلك ليش لأ
هلا :  والحب تبعك وبدك تحكي لحدا وتشيكلو وماعم تلاقي الشخص المناسب مو هيك 
منار :شو عرفك 
هلا :لانو  انا عرفت انو عزيمتكن ماتعبها غير الحب 
منار :اي والله معك حق 
هلا :احكيلي عنك 
منار :بهالسرعة 
هلا :اي مابدنا نصير اصدقاء لازم نعرف كلشي عن بعض 
منار :طيب بلشي من عندك 
هلا :هههه كنت مفكرة انو البنات بتخاف على حالها طلع العكس 
منار : خلص لاتبلشي رح بلش انا 
هلا :لا  لا انا رح بلش 
بعتت صورتها  وكملت كتابة : هي انا .. اسمي هلا ٢٤ سنة ... مبطلة دراسة من بعد البكالوريا 
منار :لي ماكملتي 
هلا:نحكي صوت ؟؟
منار :لا لا سهران مع الشباب 
هلا :اممم ... طيب ماشي .. بس انا قلت لانو مابحب الكتابة 
منار : اطلع لبرا 
هلا :لا خلص بنكمل كتابة 
منار :طيب 
هلا :ماكملت دراسة لانو اهلي شوي صعبين وبقولو الجامعات فيها فلت ومدري شو 
منار :مانو سبب مقنع 
هلا :هههه بصراحة 
منار :هي هية 
هلا :ماجمعت مجموع عالي 
منار :اي قولي هيك من الاول 
انسجم منار معها وبالتعارف معها وحكتلو  انها عندا اخ وعندا اب وام دراويش وانن عايشين من شغل اخوها وهية بتساعد اخوها بتحسبلو وبتساعدو بالمواعيد السفر وهيك  وانها عاشت قصة حب من الطفولة والشب سافر وانقطعت اخبارو ولحد هلق ما دق قلبها لحدا .. بيتقدملا خطابين بس مابتحس في انسجام بينهن مشان هيك بترفضهن 
ومنار حكالها عنو وعن دراستو وعن اهلو وعن رفقاتو وكيف بنو المعمل  
هلا :والحب 
منار :...
هلا :شبك ولوو احكي  انا احكيتلك كلشي 
منار :رح احكيلك بس بتمنى تفهميني وماتحكمي علي بأستعجال 
هلا :طيب عم اسمعك 
منار : والاهم يكون سر 
هلا: موضوع خطير ؟
منار :هلق بتعرفي 
هلا :يلا 
منار :حبيتا من اول نظرة ... من اول ماشفتا حسيت قلبي طلع من صدري وتعربش فيها ويقول هي هي .. شفتا بكافيه مع رفقاتا وبنت خالتي معن 
هلا :اي 
منار : وبنفس اليوم كان عرس رفيقنا شفتا بالعرس لانو طلعت من ضيعتي وانا مابعرف  يمكن لانو ولا مرة شفتها قبل هلق ... 
المهم طلبت احكي معا بالاول رفضت بعدين قبلت .. وصرت احكي معها ... ماصرلا زمان هالقصة عفكرة 
هلا :ايي
منار :لما احكي معها حس حالي عايش بعالم خيالي ... ولما تغيب ضل على طول عم فكر فيها ... وحتى قررت اخطبا خلص بكفي هي هية ليش عم طول القصة 
هلا :وشو صار بعدين 
منار :ابوها اخد منها التلفون  وسافر .. انا قلت بستنى ليرجع وبروح بخطبا ..  بس بيوم بدقلي رقم وهالرقم انا بعرفو  
هلا :لمين الرقم
منار تابع ومارد على سؤالها :دق كتير بعدين اجتني رسالة من هاد الرقم انو انا المى رد ... لما شفت الرسالة والرقم الدنيا فتلت فيني .. شو قرب المى لصاحبة الرقم 
هلا :مين صاحبة الرقم 
منار :وحدة بالضيعة سيرتها اوسخ من الوسخ 
هلا :كيف يعني 
منار :ما مخلاية شب من شرها ومنن تنين رفقاتي .. يعني خيانة وقرف 
هلا  :وكيف عرفت انو هالرقم الها 
منار :حاولت كتير معي تجرجرني لوساختها وانا ماقبلت 
هلا :وشو علاقتها بألمى ؟
منار :خالتها مرت ابوها 
هلا:وبعدين 
منار :مابدي طول عليكي ... بس انا تركت البنت عشان هالسبب 
هلا :عشان مرت ابوها 
منار :اي 
هلا : وشو دخلها بمرت ابوها .. لو عم تقول امها اختها فيها وجهة نظر 
منار : مابدي اي شي يربطني فيها لهالمخلوقة 
هلا :المى ؟؟
منار :لااا مرت ابوها 
هلا :وخايف تكون متلها؟
منار :بالظبط 
هلا :طيب شو عطيتا سبب لتتركا 
منار :ماعطيتا شي .. تركتا بدون سبب .. اصلا مافيني قلا 
__________________
ببيت ابو معاذ 
دخل معاذ كانت الاضوية كلها مطفية والظاهر الكل نايم   دخل ع المطبخ  فتح البراد وسكرو بملل ... كمل ع غرفة اختو الاء .. شق الباب شوي 
‌شافهن نايمين جنب بعض رجع سكر الباب وكمل عغرفتو ... تمدد ع تختو وشرد بسقف الغرفة .. فجأة انفتح علبه الباب بهدوء ودخلت وسكرت وراها .. تجلس فورا قربت لجنبو وقعت على التخت ودفشتو شوي بجسمها مشان يوسعلا مشان تنام 
شهد :الاء كتير بترفس وهية نايمة تمددت وشدت الغطا عليها ودارتلو ضهرا 
تحت انظار معاذ المصدوم 
لما لاحظت سكوتو لدقائق التفتت وقالت شبك مابدك تنام 
معاذ :بتعرفي انت شو يعني حركتك هي 
شهد: اي بعرف ... الضو الاخضر طلع من عندي 
معاذ : لكن انا  يلي رح فرجيكي كيف الضو الاحمر 
شهد : عيب نحنا عند اهلك 
معاذ : لو بنكون ع المريخ 
___________________________
بعدها سهرانة وقاعدة بغرفتها بالعتمة .. ساكتة او صافنة مابنعرف .. سمعت صوت الباب البيت انفتح .. قامت فورا وطلعت 
سمرا: يي بعدك سهرانة 
المى :وين كنتو لهلق 
سمرا :ابوكي اجتو سفرة وسافر 
المى :وانت 
سمرا بلؤم : نعممم 
المى : اي وين كنتو لا انت ولا ابي كان معي بهاليوم .
سمرا : ليش شوفي اليوم 
المى :نتائج البكالوريا 
ضربت جبينها وقالت :اووف على هالنسوة 
المى :الله يسامحكن حتى بهي ما هنيتوني ... تصبحي على خير
سمرا :حبيبتي بكرا الك مني احلى هدية ورح اتصل ع ابوكي يجبلك هدية كمان 
المى :من فاتت ماتت 
دخلت على غرفتها وسكرت الباب بقوة وراها 
سمرا :شبا هالبنت 
كملت عغرفتها  وعملت مكالمة 
سمرا :من وين اخترعتلو هالسفرة هلق ههههههههه
هلال :مالو لزوم 
سمرا :هههههههه بتعجبني 
هلال :اي قوليلي كيفني معك 
سمرا : هههه قلتلك رأيي شوبدنا نضل نعيد 
هلال :طيب شوبدك تخبرينا 
سمرا :هي البطيخة قهرتني 
هلال :مين 
سمرا :المى 
هلال :شبها خطيبتي 
سمرا :عنجد ناوي تخطبها 
هلال :لك ايي لخلصك منها 
سمرا :....
هلال :شو وينك 
سمرا :معك معك 
__________________
الصبح بكير
عم تفتل بالبيت وبالغرفة تفتح غرفة وتسكر غرفة بقلق .. لوصلت لغرفة اهلها  وصارت تدق بخفة خافت تزعجهن 
الاء : ماما 
وسرعان ما اجاها الرد  وانفتح الباب
ام معاذ : شوفي يابنتي 
الاء : ماما ... شهد مو مبينة بالبيت كلوو 
ام معاذ :شو عم تحكي انت 
الاء :والله نمنا سوا... فقت بليل مالقيتا قلت يمكن عم تشرب مي ما اخدت بالموضوع كتير ... فقت الصبح كمان مالقيتا 
ام معاذ :شفتي بغرفة اخوكي 
الاء :لا .. شوبدا تعمل بغرفة معاذ 
ام معاذ : مرتو شوبدا تعمل يعني 
الاء :ليش مو متزاعلين 
ام معاذ :بعدي هيك لشوف 
بعدتها من طريقها ومشت اتجاه غرفة معاذ  .. دقت الباب دقتين  مافي رد حطت ايدها على القبضة ونزلتها بس الباب مقفول 
ام معاذ : معااذ .. معااذ 
................
صحيت شهد عصوت حماتها وهية بحضن معاذ .. شهقت واتجلست بسرعة 
شهد بهمس :معااذ ... معاااذ 
فتح عيون وابتسم 
معاذ : صباح..
شهد : هششش
ام معاذ من برا : معااذ 
اتجلس وقال شوفي
شهد بخوف : امك بررا وعم اتدق ع الباب 
معاذ : اي افتحي 
شهد : لااا .. شو افتح 
معاذ : شبك شو نايمة مع حدا غريب انا جوزك 
شهد : بوس ايدك وطي صوتك ...لا تفضحنا 
معاذ : شهد صاير لعقلك شي 
شهد :  بخجل .. بترجاك لاتحطني بهالموقف 
ام معاذ :يا معاااذ شبك ماعم تسمع ... شهد عندك شي 
شهد : لا لا يامعاذ 
معاذ : الله يثبت  علينا العقل والدين .
رفع الغطا عنو  وقام فتح الباب 
معاذ : اي امي شهد هون 
ابتسمت ام معاذ : لكن ارجعو نامو ازعجتك .. بس خفت تكون رجعت لعند اهلا 
معاذ : ههههه ..
سكر الباب  ودخل 
شهد : بكرهك 
وقفت لتطلع ليمسكها من ايدها ويوقفها 
معاذ : لك شبك .. فكرت حالي عامل شي غلط لاسمح الله 
شهد : ليش حطتيتني بهالموقف 
معاذ : والله انت يلي حطيتي حالك ... مو انت جيتي لعندي برجليكي 
شهد :هيك لكن 
معاذ : لا مو هيك ... انا صدقت انك تجي ...  بتعرف لو مانك جاي كنت ناوي اخطفك 
شهد :نعممم 
حط ايدو على كتفها وبرمها ليرجعو على تختو وقال :  متل ماعم قلك ... تعي لاحكيلك السالفة 
شهد :سالفة شو 
معاذ :لك ضروري يكون في سالفة  تعي وماعليكي 
___________________
ارتفعت الشمس فوق ثنايا الجبال لتبث النشاط بين الناس  ويقومو على اشغالن  
طالع منار من بيتو ومتوجه لسيارتو وعم يقول :اصبحنا واصبح الملك لله  اشهد ان لا إله الا الله وان محمد رسول الله  ركب سيارتو  واخد تلفونو من جيبتو وفتح ع اسم هلا 
اخر ظهور من وقت حكت معو ..   وعلى الشاشة ظاهر المحادثة بيناتن : هلا :بدك شي 
منار :بكير  ع وين 
هلا :نعست .. ببقا بحكيك سلام هلق 
كبس على الاتصال وفتح المكبر 
فصلت الخط بوجهو  وهية رجعت اتصلت 
منار :صباح الخير 
هلا :صباح النور 
منار :شغلتي بالي 
هلا : الله لايشغلك بالك .. بس معي شقيقة  وفجأة صارت توجعني 
منار : سلامتك 
هلا : الله يسلمك 
منار : وكيف صرتي 
هلا : والله بعدني تعبانة 
منار : لكن مابدي ازعجك .. لما تلاقي حالك منيحة حكيني 
هلا : ان شاء الله .. عن اذنك 
منار :باي 
سكر بدون تعليق رجع الموبايل عمكانو ودور السيارة وانطلق 
_____________________
قربت سمرا من باب  غرفة المى واجت لتفتحها لقتها مقفولة 
سمرا : المى
انفتح الباب  وظهرت المى بملامح جامدة 
سمرا :ليش قافلة على حالك 
المى صافنة بسمرا قالت :ليش ممنوع 
سمرا دققت فيها وقال :بكيانة 
المى بنفس النظرة :كمان ممنوع 
سمرا صفنت شوي فيها وبعدا حكت :زعلانة على شان الهدية 
المى :مو مهم 
سمرا :خلص ولا يهمك  فوتي لنطلع ع السوق واشتريلك أحلى هدية 
المى : كلمة مبروك وشوية فرح بكفو 
سمرا :والله حقك علينا .. بس نسينا ومبارح الصبح بيت ابو هلال بعتولنا نروح نفطر معن وفجأة اجا لابوكي شغل  وراح 
المى :ومين جابك ع البيت 
سمرا :هلال 
المى :اممم ...
سمرا :وبعدين ليش عم تسألي مين وصلني .. لتكوني خايفة علي يا بعدي 
المى : مو هيك بس فكرت بابا يلي وصلك قلت ماشافني قبل مايروح .. 
اتنهدت سمرا وقالت : امم .. خلص ولا يهمك احلا هدية .. بس هلق تعي ساعديني بالفطور 
المى :يلا شوي  وبجي 
راحت سمرا والمى بقيت صافنة بالفراغ يلي تركتو سمرا .. لتمسك راسها بتعب  وترجع تدخل على غرفتها 
___________________
بجلسة نسائية  على فنجان قهوة اجتمعت ام اياس بأمها لديمة ببيت  اهل ديمة 
ام اياس :والله هالصبايا بيضوها 
ام ديمة : اي والله .. بس قولتلك بدنا نخليهن نكمل 
ام اياس :مبارح بالليل والله فتحنا هالموضوع  واياس وقف بوجه ابوه وقلو مريم لازم تكمل 
ام ديمة : والله بظن ابوها لديمة مايخليها 
ام اياس : لا يوه ان شاء الله بخليها
دخلت ديمة بالقهوة وعيونا عم تغزل فرح بعد زيارة ام اياس الهن 
ديمة :مية اهلا وسهلا  بخالة ... ليش ماجبتي مريم معك 
ام اياس :والله تركتها نايمة بس قلت اجي  اخد هالطنجرة من عندكن  عبكير  
ديمة: ناوية تعملي شي لنجاح مريم 
ام اياس :يوه كيف لكن .. بدي اعمل رز بحليب  وابعت لكل اهل الحارة 
ديمة : اي والله ياخالة  يسلم ايدك الرز بحليب يلي بتعمليه محدا بيعملو 
ام اياس :دخيل يلي عملك حبيبتي .. وعقبال فرحتنا فيكي 
ديمة بخجل : شكرا 
ام اياس : اي صح حبيبتي  جهزي حالك تروحي اليوم لعند مريم 
ام ديمة :خير  عندكن شي زيارة 
ام اياس :اي والله رايحين نخطب لأياس 
ديمة تجمدت حواسها وملامحها  ومعد طلع معها حتى الحكي 
ام ديمة : الف مبروك .. ومين رح تخطبولو 
ام اياس : والله بنت سلفي .. لك سلوى 
ام ديمة : اي والله ونعم الأختيار هالبنت مافي منها 
ام اياس: تسلميلي .. وان شاء الله بس يصير كلشي رسمي انتو اول المدعويين 
انسحبت ديمة بهدوء  لانو حست الجو صار خنقة  
_________________
الشباب كل مين عم يشتغل شغلو بالمعمل .. صف شوكت السيارة ونزل منها  ووقف بنص المعمل وحكي 
شوكت :شباب 
اتطلع عليه الكل 
منار :شو حنون 
شوكت :معاذ مارح يجي اليوم ع الشغل 
محمد :لي 
شوكت :رجع لشهر العسل 
محمد :ههههههه  بدنا تصالحو مرتو 
لفو وكل واحد رجع لشغلو 
منار :وماينقبر يحكي  من الصبح 
شوكت :والله يا حنون مابعرف  خبرني قلي خبركن 
منار :سيدي الله يهنيهن عقبالك 
شوكت :صحي منار عندك شي 
منار :تعا تعا 
دخل على الغرفة يلي عبارة عن مكتب ولحقو شوكت  
قعد وحكي :احكيلي شو عندك 
شوكت :والله مو عرفان شو قول يا حنون .. بس انت عندك شي شغل هلق 
منار :شوي ورايح وصل الطلبية .. بس قلي شو قصتك 
شوكت : لا قصة ولا شي ... بسس
منار :ايوواا .. ال بسس .. شو هية 
شوكت :
__________________________
اندق الباب  
بينما المى وخالتها مرت ابوها بالمطبخ .. صح المى عم تشتغل بس شاردة ياترى وين عقلك يا المى 
سمرا :المى افتحي الباب 
المى:....
سمرا :المىىى
نقزت المى واتطلعت فيها :اي خالتي 
سمرا :الباب عم يندق روحي افتحي 
المى :انا 
سمرا :لك شو صايرلك .. اي انت لكن انا 
تركتها وطلعت تفتح بدون ماترد ..
فتحت الباب  وظهر قدامها بوالين ومعن بوكس بس مين يلي شايلن 
برقو عيونا بفرح  وهية عم تقرأ شو مكتوب على احد البوالين : مبروك النجاح لأحل بنت اخت 
المى :خااالووو😍😍 نزل الهدية على الارض والمى رمت حالها بحضنو  وهو رفعها وصار يدور فيها 
ادهم :مبروك النجاح للأميرة 
المى بدموع :شكرا ... شكرا خالو 
نزلها وصار يمسحلها دموعا وقال :شبك حبيبتي .
حكت بغصة :محدا اتذكرني 
ضمها لحضنو وقال : انا معك المى .. انا معك حبيبتي .
المى :بحبك خالوو بحببك 
:: اي شوهالفيلم الحلو هاد  ... 
وقفو  ليلتفت ادهم لورا  والمى معو ليطلعو على مصدر الصوت 
هلال 
هلال  :من ايمت دارجة عنكن بالضيعة الحرية المطلقة والله حاسس حالي بتركيا 
ادهم :عفوااا 
هلال :والله مو عارف مين يلي عفوا ... مبلشين تعبيط ببعض قدام خلق الله وعم تقلي عفوا 
ادهم بغضب مكبوت :وشو مشكلتك .. اصلا مين انت 
هلال :انا يلي مين ولا انت يلي مين 
اندفع اتجاهو ادهم ومسكو من خوانيقو وقال :مين انت ولاااه ... وبعدين بتعرف مين اناا 
هلال وهو خايف :انا ... انا هلال  ابن شريكو لعمار .. وهو موصيني بعيلتو  بغيابو 
تركو ادهم وقال : موصيك بعيلتو بس المى محدا وصي عليها عم تفهم 
هلال :بس عرفني مين حضرتك او شو بتكون لألمى لاعرف مع مين عم تحكي 
ادهم :انا بكون خالا 
هلال :مشان الله لا تواخذني والله مابعرف 
طلعت سمرا من جوا على الضجة وتفاجئت بأدهم وهلال 
ادهم بتجاهل لسمرا :فوتي خالو البسي وتعي معي 
سمرا :اهلا ادهم تفضل لنشربك شي 
ادهم :شكرا ... غير مرة 
المى :ثواني خالو 
سمرا :مابدك تخبري ابوكي 
المى :بخبرو على الطريق ... بدنا نطول خالو 
ادهم :لنشوف ابوكي شقد بدو يعطينا اجازة 
المى :يلا  يلا 
دخلت المى  وبقيو التلاتة واقفين 
هلال : اي اختي ام بشار بدكن شي عايزين شي 
سمرا :لا هلال شكرا الك  ويكتر خيرك 
هلال :بالاذن 
سمرا :الله معك 
مشي هلال وهو عم يتطلع من تحت لتحت على سمرا وادهم وانسحب .. وادهم كمان راح وقعد بسيارتو 
وخلال دقائق طلعت المى وركبت مع خالها وانطلقو 
ادهم: شو وضعو هاد ؟
المى :عم يرسم على شي 
ادهم :شي متل شو 
المى :متلي انا مثلا
طارق :ههههه متفتحة يابنت 
المى :شو بدي ضل هبلة طول  عمري .. بس تمنيتك تضربو شي ضربة 
طارق :خلص ولا يهمك المرة الجاية 
المى :ههههههه
_____________________
صوت منار طالع : شوووووو  
شوكت :شبك مابدا كل هالانفعال 
منار : ليك شوكت حب واعشق مين مابدك بس ع المعمل لاتقرب 
شوكت :ليش هيك فورا حكمت ع الشب بس لانو من ضيعة الشقرا 
منار :بدك سبب اكتر من هيك 
شوكت : لاتجمل كل اهل الضيعة بسبب كم واحد ازعر 
منار :  نسيت شو عملو بعرس معاذ 
شوكت : مادخلني بالعالم كلها  .. انا بهمني هالبنت  
منار هدي شوي وقال : ومالقيت غير المعمل تشغلو فيه 
شوكت :مشان خليه تحت عيني ونتقرب من بعض 
منار : المعمل  مو بس الي والك .. رح نجتمع  ونشوف رأي الشباب 
شوكت :طيب ماشي 
وقف منار وقال انا صار لازم امشي ... احكي مع الشباب والمسا بنشوف 
شوكت :ماشي الله معك حنون 
_____________________
على الطريق : المى انت متأكدة 
المى : اي وكتير 
ادهم : بس مو كبير عليكي هالشي ... يعني قفزة كبيرة من المى الطيبة البريئة  للشي الي بدك تعمليه 
المى :  اي متأكدة ومافي اي شي رح يفقدلي حماسي 
ادهم :وانا معك للموت 
المى :خالو وقف هون  
ادهم انتبه للطريق  وكان في كافيه 
ادهم :حابة نشرب شي .
المى :اي .. وخصوصا هالمكان  الو ذكرى 
صف ادهم ونزلو وقال :وشو هية هالذكرى 
المى : هون شفتوو اول مرة 
ادهم:   ههههه 
حاوطها من كتافها ودخلو 
وقفو بالدور  لانو هالكافيه اقرب للاكسبربس والطلبات السفرية 
ادهم : شو تشربي 
المى :عصير فريش 
ادهم :  لو سمحت عصير وقهوة وسط 
اخدو طلبهن والتفتلو ليروحوا .. كان المى عم تحط الشلمون بقلب الكوباية .. لتصطدم بحدا ويندلق العصير عليها وعليه 
رفعت راسها وهية عم تقول اسفة ما انت... لتجمد ويجمد لسانها  عن نطق باقي الاحرف 
.. وحالها  مابيختلف عن حالو .. 
ليرجع ادهم بسرعة لعندها :شو حبيبي المى  
المى وعيونها على منار : متل مو شايف 
ادهم حط ايدو على كتف منار وقال :لا تواخذنا اكيد ما انتبهت 
اتطلع عليه منار وصار ينقل نظرو بين المى وادهم .. نفض ايد ادهم عنو ولف ورجع على سيارتو  بدون مايطلب شي 
ادهم : شبو هاد .. وليش هيك متنح 
المى : هاد منار 
ادهم فورا التفت عليه بس كان رايح 
ادهم :طيب تعي نجيب عصير تاني 
المى : وتيابي 
ادهم :بتغيري عند ستك .. مانا مطولين 
مسكها من ايدها ورجعو يطلبو .  وهية عم تلتفت لوراها بركي بترجع بتلمحو 
________________________
المسا  واقفين الشباب محمد وشوكت واياس قدام بيت اياس  وبوصلة منار لعندن 
منار :سلام .. شوفي جبتوني عملا وجهي ... (اتطلع بشوكت )قلتلن يعني 
اياس : اي قلنا ومافهمنا شي المهم .. مو مشانو جامعكن 
منار :لكن 
اياس :رايح اخطب بدي تروحو معي 
لف منار وقال :ماني جاي 
اياس :شبك شو صاير معك 
منار :ولا شي متضايق شوي  روحو انتو... او  بنروح ع الخطبة شو ماخدنا من هلق 
اياس  :منار شو صاير معك 
منار عم يتهرب منو :خلص بعدين 
التفت ليمشي 
اياس :منار انت  اخي معقول ماتجي 
منار :مو هيك بس والله مو ظابطة بركي ماوافقو 
اياس :ما انا اخدكن جاها لشوف حالي فيكن 
اتطلع بمحمد ورفعلو كتافو  
منار : لكن لظبط حالي  وجايكن 
محمد :ضروري 
منار :هه لكن 
____________________
عم بندق باب بيت ديمة ...  وديمة يلي فتحت 
مريم : شبك من الصبح عم دقلك وماعم تردي 
تركتها بدون ماترد وسبقتها على غرفتها .. ولحقتها مريم 
دخلو غرفة ديمة ومريم سكرت وراها 
مريم :شبك شوفي .
ديمة :عنجد رايحيين تخطبو لأياس 
مريم :انا والله مادخلني هاد هو واهلي
ديمة بغصة :اي الله يهنيه 
مريم :طيب ليش زعلانة .. مو انت يلي ما رديتي عليه .. وانت يلي تركتي بالاول شو بدو يضل يركض وراكي 
ديمة :لا لا يركض ولا يتعذب .. خلص يروح الله يهنيه 
قربت منها مريم وملست على ضهرها : والله حكيت معو و قال مانو فاضي لشغل ولاد صغار 
ديمة :ليش ماخبرتيني 
مريم :شوبدي خبرك .. اذا مبارح بليل حسم امرو وقال لاهلي يروحو يخطبولو سلوى .
قعدت ديمة على تختها وصارت تبكي 
مريم :خلص لاتبكي بترجاكي .. الله يبعتلك الاحسن 
انفتح باب الغرفة عليهن  وكانت امها 
ام ديمة :هي مريم عنا كيفك خالة 
مريم :تمام بنشكر الله 
= دووم يارب ... ماما ديمة جهزي حالك جايين بيت خالك يباركولك 
ديمة وهية بارمة ضهرها : ماشي ماما 
مريم :خلص لاتبكي بكرا براجع حالو وبيكتشف انو مابحبها وبيرجعلك .. وبعدين رايح يخطب مو يتزوج يعني في امل 
ديمة : خلص مشي الحال يلي راح راح 
مريم :طيب قومي جهزي حالك ماحلوة جايين بيت خالك وانت عم تبكي 
مسحت دموعا وقالت :مين قال عم ابكي 
وقفت وفتحت الخزانة تنقي شي تلبسو 
__________________
وصلها خالها لقدام البيت بس مانزلو من السيارة 
ادهم :مافهمت انا ليش هالبوز 
المى :ماشفت كيف اتطلع علي .. لك انا شو عاملتلو 
طارق :معقول اضايق مني 
المى :شو دخلك انت 
طارق :بركي مابيعرف انو انا خالك 
المى  بقهر وحزن :عمروو ما يعرف .. يلي تركني بدون سبب معد يهمني .. بس ردة فعل مو اكتر 
ادهم :طيب روقي ولا تخلي مرت ابوكي تحس على شي 
المى : ماشي 
بوستو على خدو وقالت : انتبه على حالك 
ادهم: وانت كمان 
دخلت البيت  وكانت سمرا عم تحضر التلفزيون
سمرا : اتصل ابوكي  
المى : حكي معي من تلفون خالي 
سمرا : ماتلفونك هون ليش ماعم تاخديه 
المى :  رح اخدو وينو
سمرا : بدرج الكومدينا تحت التلفزيون 
قربت اخدتو وقالت : شكرا 
________________
طالعة ديمة من غرفتها  بكامل اناقتها وحلاوتها ومعها مريم واتجهو ع المطبخ 
ام ديمة :الجماعة صرلن نص ساعة جوا 
ديمة :ليكني جيت .. قوليلي شو اخد معي 
= خدي القهوة وانا لاحقتك 
ديمة :قهوة فورا ... وبعدين ليش كل هالفناجين  مين جاي 
=شوبدك ضيفن لكن .. وكمان اجو بيت عمك 
ديمة :طيب ماتحكي .. وبدي فوت لحالي 
=انا بفوت معك .. روحي 
ديمة:اوووف شو جابن هدول هلق 
=امشي بلا علاك فوق مو جايين يباركولك 
ديمه : اووف .. 
= حطي راسك بالارض وماترفعيه وتبصبصي ع ولاد عمك 
ديمة :ليش كمان جايبين الشباب 
امها بفرح : ايي .. ادعي يكونو  حاطينك ببالن لشي واحد 
ديمة :بالله شووو 
امها :انقبري خرسي .. يصحلك واحد من ولاد عمك  .. اصلا مرة عمك من زمان عم تلمح انو تخطبك لجاد 
.. وانا قلتلا لتخلص .. وهي خلصتي والله رح يفتح نصيبك 
لفت ديمة لتطلع :وقالت اي مارح ادخل .. وانا ماني موافقة ولا اني رجل كرسي هون
=بدك تفضحينا شيلي هالقهوة والحقيني 
ديمة :والله لطفشن يا امي 
=انقبري قدامي لشوف .. 
قربو من باب غرفة الضيوف  وشافت الاحذية فوق بعضها .. 
ديمة :شو كل اهل الضيعة عنا وماني  عارفة 
فتحت الام الباب بدون ماترد عليها ومشان تخليها تخرس ..  تقدمت خطوتين وهية دايبة من الخجل وحست الكل عم يتطلع عليها ...  وبوجهها طلعو بيت عمها ولجوا لمحت  حدا من بيت خالها بس من خجلها نزلت نظرها  وحكت مسالخير وبلشت تضيف قهوة من اليمين ... خلصت اول صف لتنتقل على الصف التاني وهدول قاعدين عنفس الحيط يلي فيه الباب ويلي دخلت منو ... حست انو في شباب غريبة بس ما استرجت ترفع نظرها .. ويلي عم تشوفو فقط اديهن وهنن عم ياخدو القهوة حست  انو هالضيافة اطول شي مر عليها .. بلشت تقرب  منن واحد واحد  ومن بينن نسوان .. لحتى وصلت لقبل آخر واحد 
مد ايده ببطئ ياخد فنجان القهوة ..  وهمس  يسلمو يا احلى عروس ... طبعا في ضجة والضيوف عم يحكو ويسولفو محدا سمعو غيرها .. حست حالها رح ترجف من الخوف .. مو عارفة مين هاد ولا مسترجية ترفع راسها .. وهو لساتو عم يحمل الفنجان من فوق الصينية 
سحب الفنجان وقال : بحبك. حست انو حدا نكعو من جنبو  وصار يضحك .. قربت لأخر شخص ضيفتو وهمت لتطلع او تهرب 
وسمعت صوت ابوها :بابا 
رفعت نظرها لعند ابوها 
=بابا  تعي اقعدي جنب امك 
ما استرجت تعارض .. وقربت  وقعدت جنب امها وعيونها ماعم تشوف شي غير الارض .. قربت وقعدت جنب امها ..  وبنفس الوقت بدا تعرف مين يلي همسلها .. حدا من ولاد عمي ولا من ولاد خالي .. هالصوت مو غريب 
همس بأدن رفيقو :شبا عروستك ...
حكى بابتسامة :اكيد خجلانة 
محمد : والله حاسس انها ماعرفتك 
اياس :معقول 
محمد :اي معقول .. لقت بوجهها بيت عمها  ونزلت عيونا الا اذا حدا خبرها 
اياس : لا انا وصيت امي تخبر امها انو ماتجبلا سيرة ومريم مستحيل تقلا 
منار بهمس كمان :لكن اعمل شي خليها تشوفك او تعرفك  البنت رح تموت من خجلا وخوفا 
ضحك محمد  برضو بهمس 
اياس :يستر على اختك محمد طلاع منها ... لا تفضحنا 
منار :محمد اقسم بالله بقلعك 
محمد :والله حابب ساعد 
شوكت :شو حناين شبكن .. جلقتو الناس عليكن 
محمد :ههههه ولا شي ولا شي 
طبعا الكل قاعد ع الارض  هي مضافة اهل الريف ..  مد محمد ايدو خلسة على فنجان  اياس  وقلو بدون محدا ينتبه : محمد له له يا ايااس  مانك شايف 
لترفع ديمة عيونها بسرعة للتفاجئ بأياس وجهو احمر من الخجلة وتعرف انو هو يلي همسلا 
ابو ديمة :حصل خير حصل خير 
قامت ام ديمة فورا ولحقتها ديمة  بصدمة  وطلعت لبرا بينما امها فورا جابت فوطة وحطتها فوق القهوة 
ام ديمة : كب القهوة خير 
اياس :والله لافرمك 
محمد :هههههههههه
منار :خرسو  لهالفضيحة 
_________________________
قعدت على تختها وهية عم تفتح تلفونها وتفقد المسجات يلي واصلتها من وقت راح تلفونها ... مافي حدا جديد باعتلها 
فتحت عجروب البنات وصارت تقلب  بالمسجات الاقدم .. لوصل مسج من ديمة : صبايااا ... مو مصدقة يلي صار 
المى : شو خبرينا 
ديمة : المى انت اون لاين 😍
المى : اي رجعلي الموبايل 
ديمة : مبرووك ياحبيبتي  
المى : الله يبارك فيكي .. خبريني شوفي عندك 
ديمة : اياس هو عنا ويطلبوني 
المى :عنجد 😍😍🤩
ديمة :والله 
مريم :وانا معها  وكنت سالبتا عليها 
غزل :شو صاير ... شوفي 
ديمة : ماني قادرة اكتب من كتر مو فرحانة ... مريم رح تحكيلكن كلشي 
___________________
دخل على غرفتو  ببيت اهلو وتمدد على تختو  بتيابو .. وصفن بالسقف .. ليرن تلفونو بمسج .. اتجلس  وفتحو 
هلا : سلاام 
منار : يا هلا ب هلا 
هلا : كيفك 
منار : شيلك مني انت كيفك .. كيف صرتي 
هلا : تمام بخير 
منار : شو رأيك نحكي صوت 
هلا : طيب ثواني وبدقلك  
منار : عندك حدا 
هلا : لا بس مشان اطمن انو الكل نايم 
مافي ثواني والا عم تتصل
هلا : احمم ... مسالخير 
منار : مسالنور 
هلا : هات احكيلي شبك  مبين انو مو على بعضك 
منار : لا مافي شي تمام 
هلا : عليي
منار : هههه حلك تحفظيني 
هلا :ماضروري احفظك .. بس فهمتك 
منار : بتصدقي 
هلا : مم 
منار : عنجد بدي حدا يفهمني 
هلا : لكن فضفض 
منار : شفتا 
هلا : ل المى 
منار : اي 
هلا : وين وكيف 
منار : بالكافيه يلي شفتا فيه اول مرة .
هلا : حنيت 
منار : قصدك جنيت 
هلا : ليش 
منار : شفتا مع واحد 
هلا : عنجد 
منار : والله .. مابعرف حاسس شكوكي عم تطلع محلا 
هلا : طيب طول بالك .. بركي حدا بيقربا 
منار : معقول في حدا بيقربا ومابعرفو 
هلا :بجوز ... انت بتعرف كل قرايبنها ؟؟
سكت 
هلا : شو سكتت 
منار : حتى لو بيقربا .. اكيد حدا بحللها ... لأنو مانو كبير ... يمكن حدا من ولاد خوالا او عمامها 
هلا : طيب رجعلا 
منار : لا لا صعب 
هلا : لكن شيلها من دماغك 
منار : عم حاول ماعم اقدر .
هلا : غير السيري واحكيلي كيف كان يومك 
ضحك وقال : كما عم نخطب لرفيقنا 
هلا : ههه وشو يلي بضحك 
منار : تعي احكيلك شو صار 
____________________________
حراااامييي ...  حرااااامييييي
صوت تكسير قزاز .. 
حرااااامييييي
هاد صوت المى ... عم يرن بأرجاء الضيعة 
الوقت  الساعة ٢ بعد نص ليل .. والجو هدوء والصوت وصل لكل بيت من هالضيعة 

يتبع الفصل الثامن اضغط هنا 
  • الفهرس يحتوي على جميع فصول الرواية كاملة :"رواية السمرة" اضغط على اسم الرواية 
رواية السمرة الفصل السابع 7 بقلم مريم اليوسف
ranosha

تعليقات

ليست هناك تعليقات
إرسال تعليق
    google-playkhamsatmostaqltradent