رواية يا انا يا انتي الفصل الخامس 5 - بقلم ملك محمد

الصفحة الرئيسية

رواية يا انا يا انتي البارت الخامس 5 بقلم ملك محمد

رواية يا انا يا انتي كاملة

رواية يا انا يا انتِ الفصل الخامس 5

وقفنا لما العربيه اتخبطت ف الشجره وعملوا حادثه
بعد مرور دقائق
: ملك انتي يابنتي قومي أنتي موتي ولا اي 
وبعدين بصلها وهي مغمضه عيونها قال بتعجب : وانتي مغمضه ال يشوفك يقول ملاك نازل من السما بس ف الحقيقه انك مصيبه
جاب قزازة مايه وبدأ يرش على وشها 
فتحت عنيها لقته ف وشها قالت بخضه
: هو انا مت ولا اي طب دخلنا الجنه طيب 
بصت لأدهم بتعجب وقالت: لا طالما انت معايا يبقى اكيد دخلت النار
واتفتحت ف العياط وهي بتقول
: يعني حتى النار ادخلها مع داه لي كدا لي

 راح ماسك باقي القزازه ودالقه ف وشها وهو بيقول
: قومي يامصيبه جنة اي ونار اي قومي منك لله يانحس 
قامت بسرعه لقت نفسها ع الرصيف والعربيه لازقه ف الشجره وبتدخن 
ادهم مدايق وعمال يلف حواليين نفسه ومش عارف يعمل اي
قالت بتعجب : هي بتدخن ليه انت بتشوي فراخ جوه 
: فراخ! لا انا هشويكي انتي دلوقتي 
بخوف : وانا مالي حد قالك تخطفني وقعت ف شر اعمالك احسن 
بضيق: فعلاً ف دي عندك حق انا ال جبته لنفسي كل مره بتكوني قريبه مني ببقى متأكد ان فيه مصيبه هتحصل 
: خلاص بقى انت هتعيط 
وراحت مطلعه كيس شيتوس من شنطتها وفتحته وقالتله : تاخد شويه

ادهم قرب منها بذهول وهو بيقول : هو انتي مش مدركه اننا ف مكان مقطوع والعربيه مولعه قدامك واننا مش عارفيين هنروح ازاي
: ايوا ماشي واي ذنب معدتي ف ال انت بتقوله داه ثم ان الإنسان مبيعرفش يفكر اساسا وهو جعان
بسخريه:  انتي بالذات لا بتفكري وانتي جعانه ولا وانتي شبعانه انتي مكان مخك دا في طبق مهلبيه
: ملكش فيه يا اينشتاين زمانك روح شوف هتحل المصيبه دي ازاي وقبل ماتفكر تخطفني ابقى فكر ف ال هيجرالك 
وقامت مطلعاله لسانها
: مستفزه
: بارد 
بعد مرور بعض الوقت 
: هو انت بتعمل للعربيه سحر اسود علشان تشتغل ولا اي بقالك ساعه بتلف حواليها وتبرطم ف الكلام 
بصلها بضيق: لا انا عندي دم بس وبفكر هتصرف ازاي مش زيك
: طب يعني الوقت ال انت لفيت فيه حواليين نفسك انا قعدته وكلت وشربت وف الآخر النتيجه واحده لا انت لقيت حل ولا انا فبطل أفوره وأقعد شويه
قرب منها وقال: ملك انا لو دفنتك هنا مفيش مشكله صح
بخوف : كمل أفوره روح انا كنت بهزر ع فكره معايا شوية طلاسم وتعاويذ اي فله 
بضيق : يارب صبرني ع المصيبه دي
وراح قاعد جمبها
شوية صمت 
ملك طلعت من شنطتها باكو بسكويت ومدته ايدها ليه
بصلها بتعجب 
ملك: كل داه زمانك جعت
اخده منها وبدأ ياكل وبعدين ادتله قزازة المايه ال معاها يشرب 
بعد ماخلص أكل 
ملك : هو انت كنت هتوديني القبو فعلاً
ابتسم من كلمتها
ملك بإبتسامه : مش قولتلك انت مش انت وانت جعان
ادهم بص للسما وقال 
: من حظنا ان القمر منور النهارده
ملك رفعت وشها للسما وقالت : الله النجوم شكلها حلو اوي 
 بصلها بتعجب وقال
 ‏: سبتي القمر وبصيتي ع النجوم

وهي باصه للسما: تعرف النجوم احلى بكتير من القمر 
وهو باصصلها : ازاي
وهي باصه للسما : النجوم موجوده ع طول ومبتختفيش زي القمر وهتلاقيها كتير مش نجمه واحده بس يعني النجمه ال انت شايفها دلوقتي غير النجمه ال انا باصه عليها
وهو باصللها : بس النجمه ال انا شايفها زي النجمه ال انتي شايفاها بالظبط مفيش اختلاف
وهي باصه للسما : ايوا فعلاً هما كلهم شبه بعض لدرجة انك بتحس ان النجوم دول كأنهم نجمه واحده بس متفرقه ف السما 
: بصراحه اول مره اشوف حد بيحب النجوم اكتر م القمر
:يمكن علشان النجوم بتشبه شخصيتي هتلاقيني اكتر من شخص ف شخص واحد وكل شخصيه جوايا هتلاقيها بتلمع زي النجوم بالظبط
: بس القمر منور اكتر لدرجة انه مغطي ع النجوم
: للأسف النور داه القمر بيستمده من الشمس بس النجوم مبتستمدش نورها من حد هي بتلمع لوحدها من الطاقه الموجوده جواها 
: واي المانع اننا نستمد قوتنا من حد طالما هنور 
: ابقى تعالى بص ع القمر لما الشمس بتبعد عنه وشوفه بيبقى عامل ازاي هتلاقيه جسم معتم ملوش اي لازمه
ابتسم 
ملك بصتله وقالت: يبقى ليه بقى نبني توهجنا على شخص خلينا نعيش زي النجوم صغيره اه بس بتلمع طول السنه 
: ممكن يكون عندك حق بس دا ميمعنش اننا بنكون محتاجين حد جمبنا نستمد منه طاقتنا وقت لما بنضعف 
: تمام بس اهم حاجه منبقاش موقفين حياتنا عليه زي القمر مابيعمل مع الشمس لا لو موجود احنا بنلمع ولو مش موجود احنا بردو بنلمع
ابتسم وبص للسما وهي كمان 
سكوت ثواني
قام وقف مره واحده وقال 
: يلا الوقت بدأ يتأخر
بتعجب : يلا فين
: نمشي لقدام نشوف اي مكان نبات فيه
قامت وقفت وهي بتقول طب مانرن على اي حد يجي يساعدنا 
: ياسلام يعني انتي لسه مفكره ف الحل داه دلوقتي وانا بقالي ساعه بدور على مكان يلقط شبكه بس مفيش 
: اي دا يعني مفيش شبكه كمان 
سابها ومشي لقدام لحقته بسرعه وهي حاضنه شنطتها 
قالت بخوف وهي بتبص حواليها : هو اي المكان ال كله شجر داه
مردش
ملك : هو انت كنت واخدني تموتني بجد
: هضيع حياتي علشان واحده زيك يعني
: امال خطفتني ليه 
: قولت هخوفك واخليكي تحرمي تفتري ع الناس وارجعك تاني معرفش اي ال جابنا المكان الزفت داه 
بفرح : يس يس كنت عارفه انك مش هتحطني ف القبو
: فرحانه اوي ماحنا بقينا ف طريق مقطوع وممكن تلاقي ديب طالع عليكي ياكلك او حراميه يقتلوكي وياخدوا اعضائك 
خافت من كلامه راحت مسكت دراعه 
 بصلها 
راحت شايله ايدها بسرعه وبعدت عنه 
شدها جمبه تاني وكملوا الطريق 
ادهم : هو انا ممكن اسأل سؤال محيرني شويه
: اه اسأل
: انتي لابسه دبله ليه وانتي مش مخطوبه
بخجل: ببعد عني الشباب
ادهم : لسانك كفيل بداه متخفيش 
بضيق : بارد 
:مستفزه 
كملوا الطريق وع بعد كام متر لقوا فندق 
ادهم : الحمدلله لقينا مكان نبات فيه
بفرح: علشان تعرف ان وشي مش فقر ولا حاجه
بخوف : ربنا يستر والفندق ميولعش بينا
دخلوا ووقف ادهم يحجز أوضتين بس للأسف الحجز كان غالي ومعرفش يحجز غير اوضه واحده 
ملك بعصبيه : انت اتجننت ولا اي ازاي تحجز اوضه واحده
: يعني شايفه اني مبسوط اوي دانا يتقفل عليا باب القبر ولا اقعد معاكي ف مكان واحد لو عايزه اوضه ليكي روحي احجزي اجري 
: بس انا ممعيش فلوس 
: ولا انا معايا كل ال معايا دفعته
: خلاص انا هنام بره هنا
: احسن بردو 
وأخد مفتاح الأوضه وسابها وطلع 
بذهول : دا سابني ومشي عادي 
فضلت قاعده ع الكرسي حاضنه شنطتها والنوم بدأ يغلبها وكانت هتقع من ع الكرسي 
قامت وراحتله ع الأوضه 
فتحلها
: اي غيرتي رأيك
راحت زقاه وداخله بدون ماتتكلم وشدت مخده ومفرش من ع السرير وفرشتهم ع الأرض
ادهم بيبص عليها بتعجب 
: انتي بتعملي اي
: هنام ولا حرام
: طب قومي نامي ع السرير وانا هنام ع الأرض
: لا مسمحلكمش روح الذكوريه ال جواك دي متطلعهاش عليا انت قدام إمرأه مستقله قادره ع التحدي والمواجه 
وقامت شاده الغطا ونايمه وهي بتقول
مجتمع ذكوري متعفن فعلاً 
ادهم بتعجب: هو انا قولت اي غلط
وبعدين نام ع السرير 
هي فضلت تتقلب يمين وشمال علشان مش عارفه تنام ع الأرض
وخمس دقايق بالظبط لقاها بترفع دماغها من تحت الغطا وبتقول
: فعلاً الرجاله ماتو ف الحرب نايم فوق ع السرير وساييني ع الأرض الرجوله ف ذمة الله
راح قاعد ع السرير وفارك وشه بإيده وقال وهو كاتم غضبه
: انتي عارفه لو فهمتيني انتي عايزه اي الناس كلها هترتاح 
بنظرة إحتقار: هعوز اي يعني من واحد زيك نام نام  اكيد النوم ع السرير حلو دلوقتي 
وراحت شاده الغطا على وشها ونايمه 
راح رامي نفسه ع المخده ونام هو كمان وهو بيقول بصوت واطي
: يارب انا اي ال وقعني ف المصيبه دي بس
ملك وهي تحت الغطا: سمعتك ع فكره
: عندك ودان ارنب ماشاء الله
خرجت راسها من تحت الغطا وقالت: هو انت هترجعني بكرا بيتنا
وهو مغمض عينه : لا انا هولع فيكي الأول واسكتي بقى ونامي 
بلعت ريقها بخوف ونامت
_________بقلم ملك محمد #Malak_mohamed  _____
"طلع النهار وملك صحيت قبله قالت لنفسها تلحق تخرج قبل ماهو يصحى وترجع بيتها تاني 
اخدت موبايلها من جمبه ولسه بتتسحب علشان تفتح الباب وتخرج افتكرت حاجه 
 راحت فاتحه شنطتها ومطلعه منها كيس بودره سايباه معاه علشان تعرف تاخد حقها من اي حد يديقها وراحت مقربه من السرير وحطاه جمبه وكاتبه ورقه فيها 
 ‏: دا علشان تفتح موبايلي وتنزل صوري حلو ع الفيس ويا انا يا انت ياادهم
 ‏وحطت الكيس والورقه 
 ‏وراحت متسحبه بالراحه وخارجه من الأوضه
وهي نازله ‏قابلت حد من ال بيخدموا ف الفندق قالتله 
 ‏: لو سمحت
 ‏: أومري يافندم
 ‏: هو انا بس كنت عايزه ابلغ عن الشخص ال موجود ف الأوضه رقم 9 سمعت انه تاجر مخدرات وطبعاً دا غلط على سمعة الفندق ف اتمنى تاخدوا الإجراءات اللازمة قبل مايهرب
النادل جري بسرعه علشان يبلغ مدير الفندق 
نزلت بفرح تتنطط ع السلم وهي بتقول 
: باي باي يا استاذ ادهم علشان تبقى تفكر تخطفني تاني وقال اي عايز تخوفني وتخليني اقول حقي برقبتي هنشوف مين دلوقتي ال هيقول حقي برقبتي 
وهي نازله ع السلم  مبسوطه فجأه وقفت وقالت
: اي ال وقفني دلوقتي بقى
بخوف: لا اوعى تكون ضميري 
ضميرها: ايوا كفايه بقى ال انتي بتعمليه ع الأقل مسبكيش ف الشارع ولقالك مكان تنامي فيه وافتكري انه هو ال انقذك يوم ماهربتي
: انت جي تصحى دلوقتي نام نام دي حاجه صغننه
وراحت نازله سلمه ووقفت تاني
ضميرها : هضيعي مستقبله ليه حرام عليكي هو عملك اي 
ملك : يوووه بقى 
وطلعت جري ع أوضة ادهم 
فتحت الباب ودخلت 
لقته ماسك كيس البودره ف ايده وواقف بيقرا الورقه
راحت ناحيته جري وقالت
: هات الكيس دا بسرعه
ادهم : هو كيس اي داه واي ال انتي كتباه ف الورقه دا كمان كنتي عايزه تهربي  مش كدا 
ملك بخوف : مش وقته مش وقته هات الكيس بسرعه
فجأه بيدخل مدير الفندق عليهم وهي ماسكه طرف الكيس وهو ماسك الطرف التاني 
المدير : الله الله مخدرات ف فندقي وكمان متلبسين بالجريمه
ادهم بصلها بذهول وقال : مخدرات !
ملك بإبتسامه مصطنعه : مفاجأه مش كدا 
رواية يا انا يا انتي الفصل الخامس 5 - بقلم ملك محمد
أيمن محمد

تعليقات

ليست هناك تعليقات
إرسال تعليق
    google-playkhamsatmostaqltradent