رواية فجر جديد الفصل الثلاثون 30 - بقلم إيمــــان

الصفحة الرئيسية

  رواية فجر جديد الفصل الثلاثون 30 - بقلم إيمــــان

رواية فجر جديد  - بقلم إيمــــان

*  رواية فجر جديد الفصل الثلاثون 


سيدة بفرح : اتأخرتوا كده ليه دا انا قلقت عليكم وفين ندى

أجابها بحزن : قالت حتفضل فى بيت أهلها لحد الفرح

لاحظت سيدة حزنه فقالت لتهون عليه : اه تلاقيها يعنى عوزه توحشك لحد الفرح وكمان عشان تحس انها عروسة خارجة من بيت اهلها وتعزز نفسها ادامك يعنى 

رفعت بمنتهى العصبية : داداة ربنا يخليكى سبينى الليلادى لوحدى أنا مش طايق نفسى

طيب انا دخلة انام تصبح على خير

نبيلة : ممكن اعرف انتى عملتى كده ليه ونكدتى ع الراجل فى عز فرحته

ندى بشرود: مش عارفة

نبيلة بنفاذ صبر : يعنى ايه مش عارفة عيلة صغيرة انتى بتتصرفى من غير ما تفكرى ولا هبلة ولا ايه بالظبط دا غير انك صغرتى عمك شوقى اللى اتفق مع الراجل ووافق لما سكتى على طلب رفعت انك تفضلى فى بيته

شوقى : براحة بس يا نبيلة عليها خلينا نسمعها بهدوء قولى يابنتى ايه اللى خلاكى ترجعى فى كلامك

ندى : انا متأكده يا أبيه شوقى انك انت اللى حتفهمنى

شوقى : طب اتكلمى وانا سمعك

ندى والدموع تملاء عينيها : لما قال انه حيخدنى عشان يشترلى الدبلة كنت فرحانه اوى كأنى اول مرة فى حياتى حلبس دبلة لانى بجد مرتاحة لرفعت اوى وكنت بتمنى انى اتجوزه لكن لما لاقيته بيدينى الطقم الالماظ ده رن فى ودانى كلام سالى قربته وانى طمعانه فيه وحسيت وقتها ان رفعت كمان بيبص لى كده انى عوزة اتجوزة عشان الفلوس والجاه وبس مش عشان بحبه ومش مهم عندى اى شىء تانى

شوقى : اه انا كده فهمتك يابنتى انتى حسيتى ان الموضوع بقه بيع وشره وكرمتك وجعتك اللى وصلنى صح

ايوة بالظبط كده

نبيلة : بس بلا هبل ولعب عيال الراجل هو كمان بيحبك وبيقدرك

ندى : انتى برضو مش عوزة تفهمينى

شوقى : لا يابنتى بالعكس احنا الاتنين فهمينك كويس بس نبيلة مندفعة شوية انا بقه حكلمك بالغة اللى بتفهميها 

بصى يا ندى لو واحد موظف صغير على قدة راح يخطب وحدة حجيب لها شبكه يدوب دبلتين 

أما بقه لو واحد فى مركز أعلى شوية ومرتاح حبتين وراح يخطب نفس البنت حيجيب لها دبلتين وغوشتين  صح

ندى : ايوة كل واحد بيجيب على قدة

شوقى : الله ينور عليكى كل واحد بيجيب على قدة شوفى انتى بقه واحد زى رفعت بيه وفمركزه لما يحب يجيب شبكه للبنت اللى بيحبها وعاوز يسعدها بأى طريقة يجيب أيه

ندى بخجل من نفسها ومنهم : عندك حق يا أبيه انا بس مفهمتهاش كده وشكلى غلط معاه اوى

شوقى : غلطى اوى الحقيقة رفعت بيحبك بجد ومش بيفكر غير فى سعادتك وبس انا من سنين معاه عمرى ما شوفته مبسوط وعنيه بتضحك بالشكل ده دا غير انه راجل محترم ومتربى عارفة فى الزمن ده اللى احنا فيه راجل محترم يعنى ايه اظن بعد تجربتك السابقة انتى اكتر وحدة تعرف يعنى ايه راجل محترم

ندى : عندك حق فعلا يا أبيه طب اعمل ايه عشان اصلح اللى عملته فيه ده

شوقى : لو مكنش الوقت اتأخر كنت أخدتك من ايدك ووديتك لحد عنده . مفيش ادامك غير انك تستنى للصبح واول ما يطلع النهار تروحيله مفيش حاجة تصلح اللى حصل غير انه على ما يصحى تكونى ادامه هو ده اللى ينسيه اللى حصل

ندى : دادة سيدة صباح الخير

 انا زعلانه منك ايه اللى خلاكى ما ترجعيش مع رفعت خلتيه مش طايق نفسه



ندى : طب هو فين

فى أوضته مش عارفة بقه صاحى ولا نايم مرضتش اقرب منه من امبارح

كده طب انا حطلعله وربنا يستر

دخلت غرفته لتجده مستغرق فى النوم فكانت فى يدها وردة قطفتها من الجنينة فأخذت تمررها على وجهه لتوقظه ففتح عينيه ليجدها امامه فقالت على الفور بابتسامه وهى تقدم له الوردة

صباح الخير يا رفعت بيه

لم يأخذ منها الوردة وقال لها بعبوس : انتى ايه اللى جابك

اصل أبيه شوقى طردنى وملقتش حته اروحها

ليه عندك شقتك تقعدى فيها

كده يعنى انت كمان بتطردنى ومش عاوز تاخد وردتى طب خلاص انا ماشية ولا اقولك انا حقعد هنا غصب عنك ومش حمشى دا اصلا بيتى ولو مش عجبك ممكن يعنى عادى تدورلك على مكان تانى تسكن فيه



فأمسك رفعت أبتسامة كانت ستبدو على وجهه

عاوز تضحك والله عاوز تضحك طب ماسك نفسك ليه طب

ممكن اعرف الهبل اللى عملتيه امبارح ده كان ليه

اقولك بس ما تغلطش فيا 

قولى وبعدين اقرر

لا قول انك مش حتغلط الاول

طيب مش حغلط قولى بقه

فقصت عليه كل شىء وحديثها مع أختها وزوجها الذى جعلها تتفهم الموقف بالشكل الصحيح وبمجرد ان انهت حديثها قال بغضب

عشان تعرفى انك غبية والله العظيم غبية

رفعت انت قولت مش حتغلط

مش حغلط دا انا هاين عليا دلوقت اقوم ارنك حتت علقة

قالت بفزع: رفعت انت ممكن تعمل معايا كده فى يوم من الايام

تذكر رفعت تجربتها السابقة مع شاكر فقال على الفور: ندى انا متربى فى بيت عمرى ما شوفت ابويا بيتعامل مع امى غير بكل حب 


واحترام ومش متخيل ابدا ان فى راجل بيحب مراته ويمد ايده عليها باى سوء

ندى بابتسامه عذبه : ابيه شوقى بقه كان عنده حق

عنده حق فى ايه بالظبط !!!!

يعنى وهو بيفهمنى موضوع الشبكة ده قالى ان رفعت بيه راجل متربى كويس ومش ممكن يفكر فى حاجة وحشه

راجل بيفهم مش ال------

ما خلاص بقه انت حتسوق فيها مش كفاية نبيلة واللى عملته فيا

تستهلى أحسن

كده بقه فرحان فيا تصدق انا غلطانه انى جيت عشان اصلحك

رفعت : يعنى انتى دلوقتى عوزة تصلحينى

أمال انا جيت ليه

فقال بخبث : خلاص عوزة تصلحينى بوسينى

نعععععععععععم مش حتلمسنى فأكمل معها على الفور الا بعد كتب الكتاب

وانفجر الاثنان فى الضحك



نادرة وشهيرة فى صوت واحد : صباح الخير يا دادة

صباح الخير يا ولاد ايه اللى جايبكم بدرى اوى كده

شهيرة بصوت واطى : رفعت فين

رفعت راح لاستاذ شادى عشان يرتب معاه كل شىء

نادرة : حلو اوى طب وفين ندى

ندى قاعدة فى الفرندة

شهيرة : كده طيب

ودلفا الاثنان الى الفرندة وفاجأها فى صوت واحد : صباح الخير يا عروسة

ندى : صباح النور حرام عليكم خضتونى ايه ده انتوا جيتوا بدرى اوى عن معادكم ليه

شهيرة بمكر : احنا جينا نخطفك والحمد لله ان رفعت مش هنا عشان الخطة تمشى زى ما رسمناها

ندى : خطة ايه انتوا نوين تعملوا فيا ايه

نادرة بصوت واطى : ناوين نخليكى احلى عروسة فى حفلة كتب الكتاب

شهيرة بصوت عالى : انتى لسه حتقعدى يلا بسرعة غيرى هدومك وتعالى معانا

لم تجد ندى أمامها الا الانصياع لهما فصعدت وابدلت ملابسها ثم عادت اليهم فأخذوها معهم وانصرفوا

ايه يا واد يا شادى الجمال ده البدلة حتاكل منك حته امال ليلة الفرح حتلبس ايه

فأجاب شادى : لاااا انهاردة البدلة الرمادى الفرح بقه البدلة السودا المحترمة مقولتليش انت بقه حتلبس ايه انهارده ولا حتيجى بالفانلة والشورط

رفعت بضحكه مجلجله : اه يا شادى حاجى بالفانلة والشورط

لالا بجد حتلبس بدله لونها ايه 



أمممممممم انا والله كنت محضر انا كمان بدله رمادى لكن دلوقتى حضطر اغيرها

بجد لا لا يا رفعت خلينا كده زى بعض ولا كأننا رايحين المدرسة الاعدادى

وانفجر الاثنان فى الضحك ثم قال رفعت : كده طب والله ما انا مكسر كلمتك وخليها إعدادى إعدادى ومالوا حلو برضو المهم انت مرتب كل شىء اطمن يعنى

ايوة يابنى من يوم ما أجبرتك انا وسيدة انك تعترف وانا روحت وحجزت ووضبت كل حاجة

ما تفكرنيش باليوم ده أحسنلك

بقه كده دا كان أجمل يوم فى حياتك هو انت ابتديت تعيش معانا فى الدنيا غير بعد اليوم ده

اى والله عندك حق يا شادى دا انا كنت دافن نفسى بالحياة

ادعيلى بقه

ربنا ما يحرمنى منك ويخليك ليا وسبنى بقه عشان اروح احضر نفسى انا كمان

تحضر نفسك ياشقى ولا تقعد مع المزة شوية

ريح نفسك يا خويا فكرنى هايص عشان قاعدين فى بيت واحد أقسم بالله ما لمستها لحد دلوقتى وكل لما اقرب بس منها تقلب وشها وتكشر عن انيابها وتقولى مش حتلمسنى غير بعد كتب الكتاب

تقلب وشها وتكشر عن انيابها ايه يابنى انت حتتجوز سلعوة 

سلعوة فى عينك ما تقولش كده على مراتى

لسه يا خويا بعد المغرب ان شاء الله حتكون مراتك

انا بعتبرها مراتى من يوم ما صرحتها بكل شىء وهى وفقت تتجوزنى



ماشى يا عم الرومانسى يلا روح بيتكم متشكرين على خدماتك

كده طيب ياشادي تصدق انا غلطان انى عبرتك

ندى ندى ندااااااا

سيدة : انت جيت يا بنى

فين ندى يا دادة

شهيرة ونادرة جم خدوها ومشيوا

الله الله والهانم تخرج كده من غير ماتقولى

يابنى هما مش اتصلوا بيكم امبارح وقالوا انهم حيجوا يخدوها عشان يجهزوها لكتب الكتاب

ايوة صحيح بس قالوا حيخدوها على العصر مش من بدرى كده

انا ايش عرفنى بقه

خلاص خلاص انا حتصل بيهم واعرف ايه الموضوع ايه ده موبايل نادرة وشهيرة مقفول لما اجرب ندى لالا فى حاجة مش طبيعية حتى ندى موبايلها مقفول

طب مقلوش ريحين فين ولا حيكونوا عند مين فيهم قبل ما يخرجوا



ابدا يابنى

كده طب انا حروح اشوفهم هما فين

ذهب رفعت الى بيت نادرة فلم يجدهم بعدها ذهب الى بيت شهيرة ولم يجدهم هناك أيضا

فتصل بأدهم زوج نادرة : ازيك يا أدهومه

اهلا ازيك يا عريس معلش ياحبييى كان المفروض اكون جنبك انهاردة بس حضرتك لانك سايب عليا كل الشغل ما قدرتش

بقولك ايه يا ادهم نادرة والولاد فين هما وشهيرة وندى اختفوا

ااااه انت بتكلم عشان تسأل عليهم وحياتك عندى ماعرف المدام فين الست هانم بعتت لى رسالة على الموبايل انها اخدت العيال وانى مقلقش عليهم وانها حتكون موجودة فى كتب الكتاب 

كده طيب بس لما اشوفهم

ما تقلقش اكيد يعنى بيجهزوا العروسة وعوزين يعملولك مفاجأة

طيب ماشى يا أدهم سلام



عاد رفعت الى البيت فى منتهى العصبية فتفاجأ برسالة على موبايله من شهيرة

ما تقلقش على المزة بتعتك يا عريس جهز انت بس نفسك وحتلاقى النص الحلو ادام عينيك فى كتب الكتاب.

ماشى يا زفته اكيد دى افكارك السودا ما انا عرفك طول عمرك تحبى المفاجأت الله يكون فى عونك يا رأفت بس اما اشوف وشك

سيدة : هاا وصلت لهم

لا بس ودينى لما أشوف وشهم هما التلاته

طب وندى ذنبها ايه

عشان سمعت كلمهم وخلتنى فى القلق اللى انا فيه ده

يابنى قلق ايه بس انت مكبر الموضوع ليه هما بيوضبهالك عشان هى تفرح وانت كمان تنبسط يلا يلا روح حضر نفسك انت كمان لحسن الوقت بيجرى



* يتـبـــــــــــــــــــــــع الفصل الحادي والثلاثون اضغــــــــط هنا

* الفهرس يحتوي على جميع فصول الرواية " رواية فجر جديد " اضغط على اسم الرواية


author-img
DoOoBy

تعليقات

ليست هناك تعليقات
إرسال تعليق
    google-playkhamsatmostaqltradent