Ads by Google X

رواية فجر جديد الفصل السابع عشر 17 - بقلم إيمــــان

الصفحة الرئيسية

    رواية فجر جديد الفصل السابع عشر 17 - بقلم إيمــــان

رواية فجر جديد  - بقلم إيمــــان

*    رواية فجر جديد الفصل السابع عشر


احنا عندنا معاد مع الحاج فتحى

نقوله مين يا فندم 

قوليه ذكى ومعاه الاستاذ شادى

ايوة دا منبه عليا اول لما توصل تدخله على طول

شعر شادى بأهمية ذكى لدى فتحى وإستبشر خير ، دلف الاثنان الى مكتب فتحى وبمجرد ان وقع نظر فتحى على ذكى هب واقفا وسلم عليه بحفاوه شديدة ثم سلم على شادى واشار لهم بالجلوس

فينك ياذكى محدش بيشوفك ليه

ما خلاص بقه يا حج توبنا والحمد لله عن السكه اياها

يعنى خلاص تقطع صلتك بيا نهائى لا تسأل ولا تطمن حتى دا احنا ياما اكلنا عيش وملح سوا

فى دى عندك حق بس والله مشغول ع الاخر فى تظبيط تجارتى الجديدة نفسى اقف على رجلى واعوض البنات وامهم عن اللى شفوه

ماشى يا ذكى بس ماتنساش حبايبك القدام

انت تامر يا حاج . المهم اعرفك

الاستاذ شادى عبد المجيد المحامى الراجل ده يا حاج له فى رقبتى جميل ونفسى اردهوله دا ياما وقف جنبى انا وعيالى وانا فى السجن وعشمان فى خدمة صغيرة منك تخلينى اسدد جزء من دينه اللى فى ذمتى

قال شادى على الفور : ماتقولش كده ياعم ذكى لوله ان انت كنت فعلا عاوز تتوب مكنش ربنا سخرنى ليك عشان اقف جنبك

المهم احكى يا شادى بيه للحاج عن الموضوع اللى قصدينه فيه

قال فتحى على الفور : خير يا شادى  بيه

خير ان شاء الله حضرتك تعرف أمير الناجولى

ايوة عمل لحضرتك حاجة زعلك فى شىء اصل الواد ده بتاع مشاكل وانا لو كنت اعرف كده من الاول مكنتش خليته من رجالتى لكن ملحوقة

شوف يا حاج هو مش عامل مشكلة معايا هو الحقيقة وحدة قربتى كانت متجوزة أخوة

المرحوم شاكر

بالظبط وهى اتطلقت منه قبل ما يموت وكل واحد راح لحاله

طب فين المشكلة

المشكلة انه بعد لما مات طلع عامل وصية بجزء من ميراثه لها بشرط تتجوز اخوه ولما امير ده عرفها بالوصية اداها فرصة تفكر فهى ما ردتش عليه على اساس انه يفهم من نفسه ان عرضه مرفوض لكن الحقيقة تقريبا ما فهمش او بيستهبل وعمال يطاردها فى كل مكان 

اه رامى جتته عليها يعنى

ايووووة بالظبط كده

طب والمطلوب منى ايه ؟؟؟

حضرتك يعنى لو تتكرم وتفهمه ان عرضه مرفوض بالاضافة كمان انك تمنعه يتعرض ليها هو او اى حد من عيلته ابقه متشكر ليك جدا

بس كده دى بسيطة اوى اوى دا انا فكرت الموضوع كبير ثانية وحدة

تناول فتحى هاتفه وطلب أمير فرد عليه على الفور ففتح فتحى الاسبيكر ليسمع شادى الحوار التالى

مساء الخير يا حاج فتحى

مساء الخير ياسى أمير مشكلك كترت اوى ومش عارف الم وراك ايه ولا ايه

مشاكل ايه بس ياحاج

انت اخوك كان عامل وصية لوحدة من مرتاته بجزء من ثروته بشرط تتجوزك

ايوة يا حاج عرفت منين

مش مهم عرفت منين ولا ازاى المهم تعرف ان عرضك انت والمرحوم اخوك ده مرفوض والست دى تنساها وتمسحها من ذاكرتك نهائى ولو سمعت انك اتعرضتلها انت او اى حد من اهلك مش حيحصلك طيب انت سمعنى

خلاص يا حاج

خلاص ايه

اعتبرنى اصلا ما قبلتهاش فى حياتى لا انا ولا اى حد من عيلتى

الله ينور عليك يلا غور

وقفل معه واتجه لشادى مبسوط يا شادى بيه

ربنا يكرمك يا حاج طب نستأذن بقه وكفاية عطلناك عن شغلك

لا ابدا كفايه ان ذكى عرفنى بشخص محترم زى حضرتك دى معرفت الناس كنوز 

ربنا يخليك

طب مفيش كارت بقه عشان لو احتاجنا لحضرتك

بس كده اتفضل

شكرا وبقه اسأل عليا ياذكى ماتنسانيش كده

من عينية الاتنين يا حاج

وسلموا عليه وتركوه وانصرفوا

عرض شادى على ذكى ان يوصله فى طريقه فاخبره ان لديه مشوار فى غير وجهته فسلم عليه شادى وشكره كثيرا ثم تركه لينصرف وتوجه هو لرفعت

واثناء تبادل رفعت للحديث مع ندى وجد عم راشد يهرول ليفتح البوابة فقال

دا اكيد شادى

يا رب يكون فى اخبار كويسة وشعرت بنبضات قلبها تتسارع

نزل شادى من سيارته وتوجه اليهم على الفور

فبادره رفعت  هااا ايه الاخبار



مش حقول حاجة الا لما تأكلونى الاول انا حقع من الجوع

قول بقه يا شادى بلاش بواخه

وربنا ما انا قايل الا لما تعشونى عشوة معتبره ومن ايد ندى

قالت على الفور حاضر والله حعمل كل اللى حضرتك عوزة بس طمنى

مالك كده يابنتى وشك مخطوف والدم هربان منك خلاص صعبتى عليا خلاص حقولك الموجز وبعد العشوة المعتبره حقولك بالتفصيل الممل

موافقه يلا

بصى ياستى انا وصلت لناس كلمتهم امر على اللى اسمه امير ده كلموه ادامى وحذروه انه يتعرضلك هو او اى حد من اهله من الاخر كده خلوه يشطبك من ذاكرته نهائى يعنى مش حتشوفيه تانى ولا حتى فى الاحلام حلو كده

ربنا يخليك انا متشكرة جدا جدا

لا مش عاوز شكر انا عاوز اكل

حالا ححضرلك احلى عشا

ودخلت تجرى على المطبخ لا بل تطير من الفرح بعد ان هدء بالها

هااا ياسى شادى مش وزعتهااحكى بقه 

يخربيت دماغك دى انت دايما فاقسنى كده

هى عشرة يوم يلا قول قبل ما ترجع



ماشى ياسى رفعت صل ع النبى

عليه الصلاة والسلام

حكى شادى كل ما سمعه من عم فرج عن حياة ندى مع شاكر الى ان تم الطلاق ثم اخبره عن ذكى وكيف عرفه على فتحى الذى أنهى المشكلة بمجرد مكالمه تليفونية

بس ياسيدى مبسوط كده

يااااااه أست كتير عشان كده كانت حتنهار اول لما ظهر فى حياتها تانى

طبعا ليها حق 

طبعا انت مش حتقولها الجزء بتاع عم فرج صح

تصدق انت ذكى ما انا لوكنت عاوز اقول الموضوع  كله على بعضه كنت بوزعها ليه الجزء بتاع عم فرج ده كان خاص بينا عشان نطمن ان الموضوع صح ولما نتدخل ما نلبسش فى الحيط

ماشى يا عم الحويط

طبعا شغلتى علمتنى اعمل حساب الصغيرة قبل الكبيرةمن كتر البلاوى اللى بتورد عليا الله مش حتعشونى بقه ولا اروح بتنا

اصبر ياعم المفجوع اكيد ندى بتفننلك بعد الخبر الحلو ده

اه فى حاجة او اقتراح عاوز اقولك عليه

يا دادة فى فلفل اخضر هنا

ايوة يا بنتى ثوانى اجبهولك

وفى ثوانى كانت ندى تحضر السفرة داداة ياريت تقوللهم ان العشا جاهز

قال شادى وهو يدخل ايه الريحة اللى انا شممها دى معقول اللى فى بالى

قالت كبدة اسكندرانى وسلطة طحينه ومكرونه اسباجتى وبطاطس محمرة



فندفع شادى سريعا للسفرة وجذب كرسى وجلس وهو يقول مش عاوز صوت ولا نفس سبونى اغوص

طيب يا مفجوع

وفاجأة تذكر رفعت شىء فنده لندى وحادثها بصوت منخفض قريب من الوشوشة فردت : خلاص تمام

فنتبه شادى فى هذه اللحظة لما يدور حوله وقال لرفعت بشك : ايه بتدبروا ايه فى السر كده ناوين تخلصوا عليا وتقلبونى انت وهى ولا ايه ما خلاص خلصت حاجتى من جارتى

نقلبك وانت حيلتك حاجة يا شيخ اتنيل

اتنيل انا اتبعزقت ع الاخر ما هو اخر خدمة الغز علقه

بقولك ايه ما تقلش فى الاكل ده عشان عندى ليك مفاجأه

مفاجأة ايه دى

وهو انا لوقولتها تبقه مفاجأة ازاى

طب ع العموم يبقه كفايه كده انا اكلت نص بطن

فانفجر رفعت بالضحك وقال خلصت تقريبا اكتر من تلات تربع الاكل وتقولى نص بطن

فنده شادى بصوت مسموع على ندى فجأته على عجل

ايوة فى ايه

عجبك رفعت بيه بيبص لي فى الاكل ويقولى اكلت تلات تربع الاكل 

لا ابدا رفعت بيه بيهزر بس مع حضرتك

لا مش بهزر معاه دا ناقص ياكلنا

فضحكت ثم قالت طب ايه اجيب اللى حضرتك قولت عليه ولا ايه



اه هاتيه عشان يملا نص بطنه التالت

فانفجرت ضاحكه وهى تقول ازاى يعنى نص بطنه التالت هى مش نصين ولا ايه

لا دا بالنسبة لينا اما شادى بقه فبسم الله ما شاء الله بطنه دى اربع انصص

فنطق شادى على الفور : الله أكبر ربنا ما يجعل لينا جار وله عنين

فتركتهم ندى ثم عادت بطبق مغطى ووضعته امام شادى وابتعدت

شادى : اوعوا تكونوا حطين لى قنبلة افتح تنفجر فيا

رفعت : هو فعلا قنبلة بس مش بتنفجر سمى كده وافتح

فمد شادى يده وبدء يزيح الغطاء عن الطبق وهو يقول افتح يا سمسم وفاجأة امسك قلبه وقال قلبى قلبى قلبى ايه ده مش ممكن عشقى وحبيبى

انا متشكر ليك اوى يا رفعت ياحبيبى على المفاجأة الحلوة دى كسكسى باللبن والمكسرات دا ايه الهنا دا كله

لا ما تشكرنيش انا اشكر ندى اللى فجأتنى انا وانت المفاجأة الحلوة دى انهارده

ندى معقول

مش مغقول ليه يا شادى بيه

اصل بصراحة بنات اليومين دول ملهمش فى الحاجات دى



عندك حق بس انا بقه هوايتى الطبيخ وخصوصا الاكلات بتاعت امهاتنا زمان

كده لااااا يبقه اعمل حسابى انك تغدينى معاكى مالشقه قصاد الشقة والنبى وصى على سابع جار

فنظرت له ولرفعت بعدم فهم وقالت شقه ايه اللى ادام الشقه

فقال رفعت موضحا بصى ياندى انتى من بكرة حتسيبى البيت اللى كنتى فيه وحتسكنى فى بيت شادى الشقة اللى قصادة كمان عشان تكونى مطمنه واحنا كمان كلنا نطمن عليكى

فنظرت لهما فى شك وقالت ليه هو مش الاستاذ شادى قال ان موضوع أمير خلاص اتقفل نهائى ولا كان بيطمنى وخلاص

قال شادى على الفور ليمحوا اى شك بداخلها ابدا والله امير ده اعتبريه مات زى اخوه هو وعيلته ولما ححكى لك دلوقتى بالتفصيل حتتاكدى من ده

طب امال ايه حكاية نقلى من بيتى دى

فرد رفعت وبنبره كلها حنان احنا بس عوزين نكون دايما حوليكى وقريبين منك عشان انتى تعيشى فى أمان واحنا كمان نكون مطمنين عليكى هااا قولتى ايه 

مش حقول راى الا لما استاذ شادى يحكى لى كل حاجة

طيب ياستى روح يارفعت اعملنا كوبايتين شاى

بتقول ايه ياض انت 

لالا اقصد قول لدادة سيدة يعنى تعملنا الشاى

ايوة كده اتعدل



يلا بقه مش وقت مشاغبات دلوقتى احكى بقه يا  استاذ شادى

حاضر شوفى بقه ياستى

وقص عليها شادى كل شىء

الحمد لله انا متشكرة اوى اوى يا استاذ شادى 

طب يلا انا حروح بقه كفايه كده ولا حتبيتونى عندكم ولا ايه 

رفعت : ياريت البيت واسع ويساع من الحبايب الف

مش بعرف انام غير فى سريرى

نجبلك سريرك يا شادى بيه

وحتحكيلى حدوته قبل النوم وتغسلى رجليه

امشى ياض روح بيتك

ماشى يلا سلام تصبحوا على خير

* يتـبـــــــــــــــــــــــع الفصل الثامن عشر اضغــــــــط هنا

* الفهرس يحتوي على جميع فصول الرواية " رواية فجر جديد " اضغط على اسم الرواية


google-playkhamsatmostaqltradent