رواية في غيابة الجُب الفصل السادس بقلم نعمة حسن
رواية في غيابة الجُب الفصل السادس
إيه الحكاية؟! هو إنتي سيبتي مامي و إستلمتي الراجل الغلبان ده..ربنا يصبرك يا بابي.. مش هتسكت النهارده.
تحدثت "لينا" بتلك الكلمات تمازح والدها و صديقتها التي قالت:
_مامي مين و الناس نايمين.. ده أنا يا دوب قعدت معاها ساعه.. ساعه واحده.. و عماله أدردش كده دردشه خفيفه يعني منتي عارفاني مليش في اللوك لوك.. و دي قامت ماسكه دماغها و فضلت تنفخ و تقوللي إرحميني.. قام عمو جمال العسليه قاللي تعالي يبنتي معايا بدل ما انتي مضطهده كده و مش لاقيه حد يسمعك.
ضحك "جمال"قائلاً: كان يتقطع لساني.
ثم وجه حديثه لإبنته وهو ينهض عن مقعده و قال:
_الله يكون في عونك يا بنتي والله دي مبتفصلش..حكتلي حكايات من أيام العصر الحجري.
ضحكت"لينا"بشدة و جلست بجوارها بينما إنصرف والدها مغادراً.
نظرت"لينا" إلي "حنين" و قالت:
_هاا..الإجتماع المغلق ده وراه إيه؟!
نظرت"حنين"لها بيأس و قالت:
=بصي..بما إن كده كده مش هعرف أكدب فـ أنا هاجيلك دوغري..الحج جمال كان بيشتكيلي منك.
_آااه هو الموضوع كده.
=أه الموضوع كده..بذمتك "نادر" ده العريس رقم كام اللي ترفضيه؟!يبنتي حرام عليكي ده انتي بتضيعي من إيديكي فرص ذهبيه.. كلهم فرز أول منك لله مش كده.. أخرتها هتعنسي و بكرة تقولي "حنين" قالت.
_و إيه يعني لما أعنس.. و بعدين المصطلح ده متقولوش غير واحده جاهله.. قال أعنس قال؟!
=ماشي يستي أنا جاهله و ماله.. بس بردو هتعنسي!
إلتفتت لها "لينا" و جلست بأريحية أكثر مما جعل فستانها يكشف عن ساقيها بـكرم و قالت بصوت حاد مرتفع:
_يا متخلفه.. مفيش حاجه إسمها عانس و الهبل ده.. دي أرزاق ممكن تيجي و ممكن لأ و ممكن تيجي متأخر و لو مجتش ربنا بيعوض بحاجه تانيه.. مفيش حد كامل.
إبتسم "رزق" الذي يتابع حديثهما و إستمع لما قالت فتمتم هو مبتسماً: يسلم فمك يا ست البنات!
ثم إستطرد حديثه حانقاً و قال:
_بس لو تقفلي الفستان ده كنتي هتبقي فل.. منك لله يا جمال بيه.. ده لو دي تخصني كنت حبستها في قمقم ولا حد يشوفها خالص.
_رزق!
جذبت إنتباهه و حواسه كلياًّ عندما نادته بصوتها العذب فهرول إليها مسرعاً يقول:
=أؤمري يا آنسه لينا؟!
رفعت سوداويتيها البرّاقه إليهوعي تبتسم فقالت:
_بعد إذنك يا "رزق" في بنتين صحابي واقفين بره قدام الكومباوند.. ممكن تخرج تجيبهم؟!
=أوامرك طبعاً.. عن إذنك.
خرج "رزق" و إصطحب صديقتيها للداخل وهو ينظر في أثرهم متمتماً:
_والله منا عارف الأشكال دي بتعمل إيه هنا؟!
أوصلهما إلي حيث تجلس "لينا"فجلسا بجوارها ودار بينهم حديث أنثوي كعادتهم.
إستل"رزق" هاتفه من جيبه عندما إستمع إلي رنينه و أجاب:
_أيوة يا جمال بيه؟!
=إنت فين يا رزق؟!
_أنا واقف بره.. في حاجه سعادتك؟!
=أيوة بلغ"لينا" إن في ضيوف عايزين يسلموا عليها.. خليها تيجي.
_تحت أمرك حاضر.
أنهي المكالمة و ذهب إلي حيث تجلس"لينا"برفقة صديقاتها و حمحم قائلاً:
_آنسه لينا.. الباشا كان عايزك.
أومأت "لينا" و قالت:ثواني يا بنات هشوف بابي و جايه.
سارت نحو الداخل برفقته فقالت:
_بابي مقالش عايزني في إيه؟!
=بيقول في ضيوف عايزين يسلموا عليكي!!
زفرت بغضب جامح و قالت:
_مش هنخلص إحنا.. طب بص يا "رزق" بليز إدخل قولله إنك ملقيتنيش و لو سألك قولله إني مشيت مع صحابي.
إبتسم بحرج و قال: متأخذنيش يا آنسه لينا بس أنا عمري ما كدبت علي البيه و مبحبش أكدب.
أمسكت بيديه و قالت بنبرة مستعطفه:
_بليز يا "رزق" المرة دي و بس.. وحياتي!
إضطربت نبضات قلبه إثر لمستها العفويه و لم يستطع إلا أن يقول:
_عنيا ليكي حاضر.. بس المرة دي و بسسسس!
قال الأخيرة ممازحاً فإبتسمت هي بسعادة و قالت:
_ميرسي يا "رزق" إنت جميل خالص.
تركته و ذهبت إلي صديقاتها مرة و أخري بينما مضي هو قدماً يتمتم:
_والله ما شوفت في جمال أمك.. فُلّه بصحيح!
ذهب إلي حيث يقف "جمال" و أصحابه و حمحم قائلاً:
_لا مؤاخذه يا جمال بيه.. الآنسه لينا مش بره.
نظر "جمال" إلي صديقه "مروان" و ولده "نادر" ثم قال بصوت خفيض:
_أومال راحت فين؟!
=سألت الأمن قالولي مشيت مع صحباتها من شوية.
أومأ *جمال"موافقاً و بداخله تشتعل براكين الغضب ثم حدّثهم قائلاً:
_دلوقتي تيجي.. تعالوا نقعد نشرب حاجه علي ما تيجي.
ثم حدّث "رزق" قائلاً: كلمها و قوللها ترجع دلوقتي حالاً.
أومأ "رزق" موافقاً ثم إنصرف للخارج.
قام بالإتصال بها و قال:
_أيوة يا آنسه لينا.
=هاا يا رزق عملت إيه؟!
_عملت اللي طلبتيه مني بس هو قاللي كلمها و قوللها ترجع دلوقتي حالاً!
=أوكي يا رزق ميرسي.. لو كلمك تاني قولله إنك كلمتني و الموبايل مقفول.. معلش يا "رزق" آخر كدبة.
رفع كتفيه و قال بقلة حيلة: أوامرك!
أنهت الإتصال و أغلقت هاتفها ثم أطلقت زفيراً حاراً فقالت "حنين":
_بالراحه يا عم الديناصور.. هتحرقنا مش كده.
نظرت لها" لينا" و قالت:
=مفيش فايدة.. مش عارفه ليه مصمم المرة دي علي "نادر" ده.. حاجة زفت بجد.
_و أنا مش عارفه والله ماله "نادر" ده زينة الشباب.
=زينة الشباب إتجوزيه إنتي.. و أهو أبقا ضربت عصفورين بحجر.
_ياريت والله يتقدملي واحد ربع"نادر"بس و انا أكتب عليه في يومها.
ضحكت "لينا" ضحكه مرتفعه و قالت:
_إنتي اللي هتكتبي عليه؟! والله إنك مجنونة.. و بعدين يا بنتي أنا معدتي بتقلب من الرجاله البيضا الملونه دي.. حاجه يع أوي.
ثم تابعت بحالمية: نفسي كده أتجوز واحد طول بعرض و أسمر و صوته خشن.. ياااي بجد أهي دي الرجاله ولا بلاش.. مش تقوليلي "نادر"!!
ثم تابعت مستنكرة: ده أنا أطول منه!
_خليكي كده بصي للشكليات و التفاهات و سيبي الجوهر.
=جوهر في عينك.. ده لا جوهر ولا منظر.
قاطعهما رنين هاتف"حنين" التي قالت:
_دي البومه أختي.. أستر يا رب..أيوة يا حنان!
جاء صوت "حنان" حاداً: إنتي هتباتي عندك ولا إيه؟!
أجابت "حنين"بإستفزاز:لأ مجيبتش هدوم معايا.
إزدادت حدة"حنان"و قالت:يا باردة..تعالي إخلصي عشان بابا تعبان و الدكتور عنده.
نهضت"حنين"بفزع و قالت:
_بتتكلمي جد ولا بتهزري؟!
=وهو ده وقت هزار؟!إخلصي.
_جايه حالاً مسافة السكه..سلام.
تحدثت"لينا":مالك يا حنين في إيه؟!
_حنان بتقول بابا تعبان و الدكتور عنده..أنا همشي يا لينا.
=طيب إستني أنا جايه معاكي.
_لا تيجي فين؟!بلاش عشان المواصلات دلوقتي صعبه و مش هتعرفي ترجعي.
لم تجيبها"لينا" و نادت قائلة:رزق.
أسرع يلبي نداؤها قائلاً: أوامرك يا آنسه لينا؟!.
_عربيتك معاك؟!
=أيوة واقفه بره..ليه؟!
_ممكن معلش توصلنا لبيت "حنين".. مش عايزة حد من الشوفيرات يكلم بابي يعرفه.
=تحت أمرك..إتفضلوا.
مشوا للأمام خطوتين فأوقفهما قائلاً:
_لا مؤاخذه يا آنسه لينا..هتروحي هناك باللبس ده؟!
هزت رأسها بتساؤل و قالت:ماله؟!
_ماله إيه؟!مينفعش حضرتك دي منطقة شعبيه..هتدخلي كده إزاي؟!
قامت بالإتصال بـ"موانا"و قالت:
_" موانا" هاتيلي بنطلون و تيشرت بسرعه عند الحمام اللي عند الـ pool.بسرعة.
قامت بتبديل ملابسها و ذهبت مع "حنين" برفقة "رزق".
بعد حوالي ساعة توقف"رزق"بسيارته أمام منزل"حنين" التي أسرعت بالركض للأعلي فقال:
_أنا هستناكي في العربيه بس يا ريت متتأخريش عشان لو جمال بيه إكتشف إني مشيت هيخرب بيتي.
أومأت بموافقة و صعدت خلف "حنين".
ـــــــــــــــــــــــــــــــــــــــــــــــــــــــــــــــ
فتحت"حنان"الباب فوجدت"حنين" و برفقتها "لينا" التي تبغضها كثيراً فأفسحت لهم الطريق علي مضض.
تحدث "حنين" بلوعة: بابا ماله؟!
_ضغطه عِلِي فجأه و وقع في الأرض.. بس الدكتور عطاه علاج و بدأ يفوق الحمد لله.
تنهدت براحه و قالت:الحمدلله..أنا هدخل أشوفه لو صاحي هندهلك يا "لينا".
دخلت إلي غرفة والدها فوجدت والدتها تجلس بجانبه و تحادثه بصوت خفيض كعادتهما فقالت:
_ماشاءالله..يعني تخضني عليك و تجيبني علي ملا وشي و إنتوا هنا عاملين فيها عصافير الحب.
تحدث العم"بكري"بصوت متعب قليلاً و قال:
_والله أنا قولت لأختك بلاش تقلقيها و سيبيها مع صاحبتها بس هي صممت تكلمك.
=طبعاً وهي أستاذه حنان تتوصي؟!يلا أهي فرصه عشان"لينا"تشوفك.
_بجد"لينا"معاكي؟!طب دخليها بسرعة.
طرقت"لينا"الباب و دخلت بعد أن إستمعت إلي نداء"حنين".
ذهبت إلي حيث يرقد العم"بكري" و جلست بجانبه بعد أن صافحته قائلة:
_ألف سلامه عليك يا عمو..ربنا يشفيك يارب.
إبتسم "بكري"بـ ود بالغ و قال:الله يسلمك يا حبيبة عمو..فينك يا بت يا نصابه من زمان؟!
_موجوده أهو..بس مش بخرج كتير.
"و مفيش بوسه ولا حضن كده لمرات عمو..ماشي"
تحدثت زوجة "بكري"بحزن مصطنع فقالت"لينا":
_ياا خبر..أنا آسفه يا طنط بس لهفتي علي عمو بكري خليتني مخدش بالي.
نهضت و صافحتها محتضنه إيّاها ثم جلست مرة أخري.
_كل سنه و إنتي طيبه يا لولو..إن شاءالله أبقا كويس بس و هديتك عندي.
=حبيبي يا عمو و إنت طيب..و هديتك وصلت من غير أي حاجة..ربنا ميحرمناش منك.
دخلت"حنان"بنزق ووضعت صينيه عليها كوبان من الشاي و قالت: هتشربي شاي يا لينا ولا نجيبلك عصير؟!
_لا ميرسي يا حنان مش عايزة حاجة..أنا هنزل عشان"رزق"مستنيني تحت.
تحدثت"سماح" زوجة"بكري"قائلة:لااا ورحمة النبي ما تحصل أبداً ده إنتي مش هتمشي قبل ما تتعشي معانا و هو كمان هناديه يطلع يتعشي معانا.
_لا والله يا طنط معلش مش هينفع..خليها مرة تانيه.
=لا والله ده انا حلفت..هتوقعي يميني؟!
_طيب أنتي بتلبسي و رايحه فين؟!
=نازله أنادي الجدع اللي مستني تحت ده!!
_خلاص خليكي و أنا هكلمه في الموبايل.
قامت بالإتصال بـ"رزق"الذي أجاب مسرعاً:
_أيوة يا آنسه لينا!!نزلتي؟!
=لأ يا رزق..مامت حنين مصممه إننا نتعشي قبل ما نمشي و حلفت و أنا مش عارفه أعمل إيه؟!
_طيب إتعشي معاهم بس عالسريع ربنا يخليكي.
=لأ ما هي مصممه إنك تطلع إنت كمان تتعشي!
_لاا لااا لااا..مينفعش أطلع و أسيب العربيه كده ده أنا أنزل ألاقي العيال قالبينها عربية كارو..إتعشي أنتي بألف هنا و أنا مستني.
إلتقطت "سماح"الهاتف من"لينا" و حادثته:
_هو إحنا هنتحايل عليك يبني ولا إيه ولا إحنا مش قد المقام؟!
=لأ العفو يا فندم بس.....
_مبسش..و أنا مش فندم..أنا خالتك أم خالد..هتطلع ولا أنزل لك؟!
=أمري لله..هطلع حاضر.
صعد "رزق" إلي شقتهم و طرق الباب ففتحت "حنان" التي شردت به لوهلة و قالت:نعم؟!
أشاح بوجهه بحرج فظهرت والدتها تقول:
_نعم إيه..وسعي للراجل خليه يدخل..إتفضل يبني.
حمحم عالياً و ألقي تحيةالسلام ثم دخل.
_تعالي يبني إتفضل.."لينا" جوه مع الحج.
إلتقط بعين خبيرة نظرات "حنان"المتفحصه فأطرق رأسه أرضاً و دخل الغرفه بعد أن ناداه والدها:
_إتفضل يبني..البيت بيتك.
صافحه قائلاً:ألف سلامة علي حضرتك..أجر و عافيه إن شاءالله.
_الله يسلمك يبني..إتفضل أقعد.
جلس هو علي المقعد المقابل للفراش و سرعان ما دخلت"سماح"تحمل صينية كبيره عليها الكثير و الكثير من أصناف الطعام فنهض"رزق" علي الفور و إلتقط من بين يديها الصينيه حتي وضعت طاوله صغيرة فوضع الطعام عليها.
_يلا يبني مد إيدك..يلا يا لولو.
تحدث "بكري" إليهم بـ ود و بساطه ثم بدأ الجميع بتناول الطعام.
بدأ "بكري" الحديث متسائلاً:
_بقالك كتير شغال مع جمال بيه يا رزق؟!
=بقالي 4سنين..من و أنا عندي 25سنه تقريبا.
_و قبل كده كنت شغال إيه؟!
=يوووه يا عم بكري..متعدش..إشتغلت حاجات كتير جداً و آخرها جرسون في مطعم من مطاعم البيه و هو شافني هناك أول مرة و زي ما تقول كده إستخسرني في الشغلانه..جربني معاه في كذا مصلحه و لما لقاني ييجي مني خلاني دراعه اليمين زي ما بيقولوا.
_شكلك شقيت كتير يا رزق يبني..أنا و أنا في سنك كده إشتغلت و إتبهدلت..لفيت مصر القديمه حته حته و شارع شارع بسأل علي شغل لحد ما عينوني خفير علي حاره متطرفه كده..قعدت في الشغلانه دل لحد ما اتجوزت و خلفت عيالي الأربعه و كبروا كمان و بعدها سيبنا مصر و جينا إسكندريه.. بس تعرف؟! كانت أحلي أيام والله.
=طيب و ليه سيبت الحارة دي طالما كنتوا مرتاحين هناك؟!
_الله يسامحهم العيال بقا..قال بيقولك يا سيدي الحارة كانت مسكونه بالعفاريت..تصدق؟!
إبتسم "رزق"قائلاً:ما عفريت إلا بني آدم.
_قوللهم يسيدي..كل ده عشان طلعت بنت صغيرة من البير كانت أمها و العياذ بالله رمياها و بعدها بيومين لقينا عيل تاني جمب نفس البير بس ميت!! أهل الحارة كلهم قالولك إيه.. ده البير مسكون وهو اللي بيموت العيال.
سعل"رزق"بشدة و أصابه التوتر ثم توقف عن الطعام فجأةً و قال:
_آحنا لازم نمشي..إتأخرنا جداً و جمال بيه هيعمل مشكله!
=طيب كمل أكلك..ده انت مكلتش حاجه!
_معلش إعذرني يا عم"بكري" لازم نمشي.
مع إصراره وافق العم بكري فأخذ "لينا" و إنصرف.
يتبع الفصل السابع اضغط هنا
- الفهرس يحتوي على جميع فصول الرواية كاملة :"رواية في غيابة الجُب" اضغط على اسم الرواية