رواية بنت أصول الفصل الثالث 3 - بقلم ملك محمد

الصفحة الرئيسية

رواية بنت أصول البارت الثالث 3 بقلم ملك محمد

رواية بنت أصول كاملة

رواية بنت أصول الفصل الثالث 3

"نهار يوم جديد"
الباب بيخبط جامد معاذ عرف ان احمد قدم الوصل للنيابه واتعمله محضر 
اتنهد وراح علشان يفتح الباب لقى والدته ف وشه قال بتعجب
: ماما 
والدته زقته ودخلت وهي بتقول
: ايوا امك هيكون مين يعني بقالي ساعه بخبط اي النوم دا كله احنا بقينا الضهر
معاذ بتعجب : ضهر اي ! هو انتي كنتي فين أساساً
والدته وهي بتخلع طرحتها وبتحطها ع الكرسي 
: كنت بشوف المصيبه ال انت عاملها يااستاذ 
وبعدين قعدت ع الركنه وقالت
: بس الحمدلله كل حاجه اتحلت
معاذ بتعجب وصدمه: هو اي داه ال اتحل انتي كنتي فين فهميني 
: كنت بودي الفلوس لأحمد قبل مايقل بأصله معانا
معاذ قرب منها بصدمه وقال : وانتي جبتي الفلوس منين 
والدته حطت ايدها ع جمبها وقالت بوجع : هات بس بوء مايه اشربه اصل جمبي تعبني جامد
كانت رنا بتسمع الحوار من بعيد اول لما سمعت ان امها دفعت الفلوس وبصت لقتها حاطه ايدها ع جمبها جريت عليها وقالت ببكاء 
: بعتي كليتك ليه ياماما ليه عملتي كدا دا كله علشان واحد ميسواش 
معاذ بصدمه : كليه! كلية اي ال اتباعت
طلع مروان من اوضته ع صوتهم وهو بيقول
: في اي ياجماعه 
رنا ببكاء: امك باعت كليتها يامروان علشان تنقذ الحيوان داه 
والدتها زقتها لبعيد وقالت : كلية اي يابنت الهبله ال بعتها هو في حد بيشتري كليه خربانه
معاذ بتوتر : ماما انطقي وفهميني اي ال حصل
والدته : محصلش حاجه وديت الفلوس لأحمد امال اسيبهم يخدوك يعني
مروان : وديتي الفلوس ازاي
رنا : باعت كليتها انا عارفه 
والدتها : بس بقى يابت انتي وبعدين بصت لمعاذ وقالتله
استلفتهم من حماتك ياحبيبي
كلهم ف نفس واحد : حماته !
والدتهم : ايوا حماته
رنا بصدمه: نوال ام علا المقشفه اديتك 20الف جنيه
مروان : انتي بتهزري ياماما ولا بتتكلمي جد
معاذ الوحيد ال كان فاهم دماغ والدته وقال
: وادتهملك عادي
والدته : اه يااخويا ناس زي العسل دي حتى مخلتنيش امضي على اي وصلات امانه ونعم النسب فعلاً بس انت ربنا يهديك
معاذ بضحكه خبيثه : دانتي دماغك فله اوي فعلاً
رنا بصت لمروان وقالت : هما بيتكلموا عن طنط منال ولا انا بيتهيألي
مروان بضيق : لا يااختي دول بيتكلموا عن مرات هاني بيه حمات اخوكي الجديده 
رنا بصدمه : يابنت الأيه ياماما ضحكتي ع الوليه
والدتها : وضحكت عليها ان شاء الله دي فلوس سلف نفك بيها كرب اخوكي وهترجعلها ف اقرب وقت 
وبعدين بصت لمعاذ وقالت الا يعني لو بقينا نسايب اكيد حما اخوكي مش هيرضى ياخد منه حاجه زي كدا 
معاذ بدأ الموضوع يعجبه وفضل ساكت يفكر 
مروان بعصبيه : انا قولت ال بتعملوه داه غلط افهموا بقى وسيبوا بنت الناس ف حالها 
والدته : وماله اخوك مش ابن ناس ولا اي
مروان بص لمعاذ بغضب وقال
: البنت دي متربيه ومحترمه انما ابنك عايز واحده شبهه سبيه يتجوز علا هانم اهي عامله زيه
معاذ اتعصب وعروقه كانت هتفرقع من وشه لما مروان جاب سيرة علا قام ومسكه من لياقة قميصه
: مالها علا يا مروان ويعني اي شبهي ها عايز تقول اي
والدتهم شدتهم من بعض وقالت 
: بس بقى جتكوا القرف مروان روح شوف مذاكرتك يلا وانتي يابت روحي شوفي مذاكرتك انتي كمان انتي ناسيه انك ف ثانويه عامه 
 دخلوا اواضهم ومعاذ قعد مع والدته يتكلموا
______بقلم ملك محمد____
في منزل مريم
: معقوله ياماما اديتيها الفلوس كدا عادي
والدتها وهي بتعمل أكل ف المطبخ 
: يامريم ياحبيبتي رسولنا صل الله عليه وسلم قال 
مَنْ نَفَّسَ عَنْ مُؤْمِنٍ كُرْبَةً مِنْ كُرَبِ الدُّنْيَا نَفَّسَ اللَّهُ عَنْهُ كُرْبَةً مِنْ كُرَبِ يَوْمِ الْقِيَامَةِ، وَمَنْ يَسَّرَ عَلَى مُعْسِرٍ، يَسَّرَ اللَّهُ عَلَيْهِ فِي الدُّنْيَا وَالْآخِرَةِ، وَمَنْ سَتَرَ مُسْلِما سَتَرَهُ اللهُ فِي الدُّنْيَا وَالْآخِرَةِ، وَاَللَّهُ فِي عَوْنِ الْعَبْدِ مَا كَانَ الْعَبْدُ فِي عَوْنِ أَخِيهِ
طالما ربنا رازقنا من فضله الحمدلله ليه نسيب الناس مكروبه طالما لجأتلنا دا يابنتي لما حد يجليك وقاصدك ف حاجه تقضيهاله دا خير ليكي انتي احنا عايزين اي من الدنيا
: انا معاكي ف كل داه بس ال 20الف مش مبلغ قليل يعني ودي واحده متعرفهاش دا ال اقصده 
: بصي والله انا ابوكي طول عمره يقول طيابتك دي ال مودياكي ف داهيه بس هعمل اي انا ربنا خلقني كدا طالما معايا مقدرش احوش عن غيري ابدا وبعدين الست دي محترمه دي الوحيده ال رحبت بروجعنا من السفر وبعتت بنتها بطبق حلويات ولا نسيتي 
: اه صحيح هي مش كانت بتقول تعبانه ومبتقدرش تتحرك جاتلك ازاي بقى
: معرفش يمكن خفت احنا ال علينا نحسن الظن بالناس هنقعد ندور ورا كل واحد احنا لينا الظاهر وبس النوايا دي عند ربنا
: طيب ياماما براحتك بس يارب فعلاً تكون ثقه وترجعلك الفلوس زي ماوعدتك
: هتروح مننا فين يعني ماهي متأجره عندنا وياستي طالما ربنا موسع ع الواحد اعتبريهم لوجه الله لما اخدهم حسنات يوم القيامه افضل مااخدهم فلوس دلوقتي 
: يااه ياماما انتي جميله اوي بجد دانا اعرف ناس ممكن تذل الواحد على خمسين جنيه او حاجه بسيطه سلفها لحد ومقدرش يرجعاله
: ولي كل داه الدنيا مش مستاهله نقعد نذل ف بعض يابخت ال سامح وعفا وساب رصيد للأخره يلاقيه هناك 
قربت من امها وباست ع راسها وهي بتقول
: انا كل يوم بتعلم منك حاجه جديده يابختي بيكي فعلاً 
والدتها : ربنا يباركلي فيكي ياحبيبتي واشوفك احلى عروسه 
مريم بضحكة حزن : لسه بردو عندك أمل 
والدتها : ربنا كبير ثم ان ال بيتقدملك كتير بس انتي توافقي
مريم بحزن : اوافق اي بس ياماما انا ال بيتقدملي بيصعب عليا يعني الراجل عايز يكون اسره وبيت واولاد يتجوز واحده متخلفش يعمل بيها اي
: بردو لسه مصدقه كلام الدكاتره يابنتي ال خلق الدكاتره دا ربنا وقادر ع كل شئ 
: ونعم بالله ياحبيبتي انا هروح اصلي العصر شكله أذن
خرجت مريم ووالدتها قالت لنفسها
: كل مانجيب سيرة الموضوع داه تتهربي مني كدا ربنا يرزقك ب إبن الحلال ال يصونك يابنتي يارب 
___بقلم ملك محمد _______
في منزل معاذ 
قاعد مع والدته بيتكلموا
: ها قولت اي هتفكك من الزفته ال اسمها علا وتسمع كلامي ولا لا صدقني الفلوس هتبقى تحت رجلك
معاذ بتفكير : بصي علشان نبقى على نور علا هتجوزها دلوقتي بعدين هتجوزها دي حاجه مش هنتكلم فيها كدا كدا الشرع محللي اربعه هتجوز ال اسمها مريم دي ولما الاقي الفلوس لعبت ف ايدي هشتري لعلا شقه بعيد واتجوزها من غير مريم ماتعرف
والدته بضحكة خبث : بقيت بتفكر صح اهوه
معاذ : قوليلي بس هخلي ابوها يوافق اني اتقدم ازاي
والدته : ابوها بيصلي كل الفروض حاضر ف مسجد عمر بن العاص ال ف الشارع ال ورانا انت كل ال عليك تدوام ع الصلاه معاه لمدة اسبوع بحيث يشوفك ف المسجد كتير 
: تفتكري هيوافق ع واحد زي
: هيوافق انا سألت وعرفت كل حاجه هو كل همه يلاقي راجل يصون بنته ومش مهم عنده معاه اي ولا الكلام داه هو عاوز واحد ملتزم يتقي ربنا فيها وبس بس المشكله ان البت بيتقدملها عرسان كتير ومبتوافقش ومحدش عارف السبب 
: بترفض ليه يعني مش فاهم
: محدش عارف بس ياخبر النهارده ببلاش بكرا يبقى بفلوس
معاذ : هي مش كانت العكس بردو
: معرفش قوم وبطل تفاهه ابدأ ف ال قولتلك عليه
: لا ابدأ انا الأول هروح اتكلم مع علا وافهمها كل حاجه 
___________
ف غرفة رنا 
قاعده بتذاكر عادي فجأه موبايلها رن مسكته لقت ادهم 
اتعدلت ف قعدتها وردت عليه بسعاده
ادهم : وحشتيني اوي
رنا بكسوف : وانت كمان
ادهم : اخوكي عمل اي طمنيني
: الحمدلله ماما حلت المشكله
: طب كويس معنى كدا اني هشوفك واظن مبقاش ليكي حجه
بتردد : نتقابل ماشي انا عندي درس النهارده ممكن ازوغ ونتقابل ف اي كافيه
بسعاده : اشطا اوي 
اتفقوا ع المكان ال هيتقابلوا فيه وكل حاجه بقت تمام
رنا قفلت معاه وحضنت الفون بفرح وبعدين فتحت اكونت الفيس بتاعها وهي بتقلب جالها بوست ف جروب من جروبات البنات المعروفه مكتوب فيه
: اول مسكة ايد يابنات ادعولنا نبقى مع بعض قريب
وبوست تاني 
: خطبني يابنات بعد 7 سنين حب (تقصد 7سنين علاقه محرمه)
وبوست تاني
: فضلت وراه لحد ماشقطته يابنات باركولي مرتبطين بقالنا 3 شهور 
كانت بتقرأ البوستات ومبهوره والتعليقات كلها كانت عباره مبروك عقبالي انا كمان 
قررت تنزل بوست وتكتب فيه 
اول مقابله يابنات تفتكروا ألبس اي 
طبعاً جالها تعليقات كتير البسي كذا والبسي كذا وبنات بتبارك 
لدرجة انها قبل ماتنزل البوست كانت حاسه انها بتعمل حاجه غلط لما نزلت البوست وشافت تعليقات البنات  بقت مبسوطه وفخوره بالي هي بتعمله 
وال متعرفهوش ان كل بنت علقت وشجعتها على معصيه هتبقى شريكه معاها ف الأثم وكل حاجه هتحصل لرنا بعد المقابله دي هتبقى ف صحيفة كل بنت 
بدأت رنا تقرا التعليقات بسعاده اتفاجئت بتعليق غريب من بنت بتقولها 
( مينفعش تقابلي واحد مفيش بينكوا عقد شرعي انتي كدا ف علاقه محرمه )
البنت كانت بتنصحها عادي لكن البنات مسبوهاش وقاموا بالواجب 
منهم ال قالتلها لمي جناحتك شويه ياست الشيخه 
وواحده تانيه قالتلها
خليكي ف حالك لما حد يطلب رأيك ابقى قولي 
رنا اتبسطت جداً من ردود البنات وحست بالفخر أكتر 
(البنات بتاعت الجروبات دي هما شياطين الإنس مبيعملوش حاجه ف حياتهم غير  انهم يضلوا اي بنت زي مايكون البنت بتبقى عارفه انها بتعمل حاجه غلط فبتقرر تجر رجل باقي البنات معاها علشان متكونش رخيصه لوحدها بيعلموا البنت الفجور وازاي تبقى سلعه رخيصه تحت مسمى to be lady 
قال الله تعالى
إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ ۚ وَاللَّهُ يَعْلَمُ وَأَنتُمْ لَا تَعْلَمُونَ )
رنا خلاص خدت قرار ولبست افخم طقم عندها وخرجت م الأوضه
كانت بتتسحب علشان امها متشوفهاش وخرجت ع أساس انها رايحه الدرس 
___________
ف الكافيه
معاذ قرر يقابل علا يفهمها على كل حاجه
علا : يامسهل الحال بقالنا حوالي ساعه وحضرتك متردد تقول انت عايز اي
معاذ اخد نفس وقال : بصراحه يعني انا هتجوز
علا بضحكة استهزاء: اي هتتقدملي من ورايا يعني ولا اي 
معاذ بخوف : لا مش هتجوزك انتي 
علا بسخريه: بطل هزار بقى يامعاذ 
معاذ : انا بتكلم بجد انا هتجوز 
علا من الصدمه مكنتش بتتكلم مسكت كوباية المايه ودلقتها ف وشه وهي بتقول
: معاذ انت مش مركز انت بتقول اي صح
معاذ مسح المايه من ع وشه وقال بتنهيده 
: لا مركز اسمعيني بس وانتي تفهمي كل حاجه انا مش هسيبك
رواية بنت أصول الفصل الثالث 3 - بقلم ملك محمد
روايات حصرية

تعليقات

ليست هناك تعليقات
إرسال تعليق
    google-playkhamsatmostaqltradent