رواية يا أنا يا هي الفصل الرابع عشر 14 بقلم هاجر عبد الرحيم

الصفحة الرئيسية

       رواية يا أنا يا هي الفصل الرابع عشر بقلم هاجر عبد الرحيم


رواية يا أنا يا هي الفصل الرابع عشر 

أميرة خرجت الصالة لقت حسين قاعد ع سجادة الصلاه وماسك السبحة ف ايدو ومغمض عنيه وبيذكر الله ضيقت عنيها بأستغراب هى من ساعة م فتحت عنيها ع الدنيا عمرها م شافت حسين قاعد بيصلى بمنتهى الخشوع دا لقيت نفسها بتمشى براحة وعنيها عليه فى مغناطيس بيحسبها او خلينا نقول طاقة نور بتشدها عشان تشوف حسين من جواه بقا عامل ازاي؟ لفت نظرها دموع بتنزل منو وقام جاب مصحف وقعد تاني وبدا يقرا بصوت لمس أميرة وخلى جسمها كلو يترعش بلذة خفيقة قعدت تسمعو وهى مأخوذة بشكل مش طبيعي ضحكت بهدوء وبدات تكرر الايات معاه بعد م خلص قام لف نفسو لقاها بتبصلو بحيرة وتعب تنهد هو الاخر هو مش عايز يشوف النظرة دي ف عنيها عايز يتكلم معاها ف حاجات كتير بس هو متاكد انها مش هتديلو الفرصة دي ف يصبر عليها احسن واللى ربنا كتبو هيشوفو بص ع الساعة لقاها واحدة ودا ميعاد الدورس اللى بيديها للاطفال ف لازم يمشى حالا كام خطوة بس كلمتها ليه خليته يقف
أميرة..وياترى انت بتعمل كدا من زمان ولا لما شوفتنى بس؟
حسين ضيق عنيه وقال..بمعني؟
اميرة..انت فاهم قصدي كويس انت منافق ع فكرة تعرف ليه عشان انت عارف كويس اني لما اشوفك وانت ف الحالة دي هتشد ليك واقول حرام دا اتغير ومبقاش حسين الودني اللى كلمة توديه وتجيبو وصوته مش من دماغو والعصبية بتعمى عنيه وبتخليه مش عارف الحق من الباطل دلوقت بقا شخص جديد فاهم دينو وعلاقته بربنا كوبسة يعنى مش هيأذيكي تاني وياخد بأيدك للجنة ليه تففى قصادو م تسامحيه انتي كمان بس لا ياحسين انا مش هسامحك ومن انهردة انت ملكش اي حقوق عندي حتى لو مراتك انا رافضة العلاقة دي من زمان ولو عندك دم طلقنى انا غلط لما وافقت بس مكنش قدامى حل تاني
حسين..بس انا مش هطلقك وممكن نقفل ع السيرة دي
أميرة..بس انت مش هتاخد مني حاجة غصب عني
حسين..وانا مش حيوان عشان اقرب من واحدة مش عايزانى حتى لو مراتى.. جايز زمان كنت قدرت اعمل كدا دلوقت لا
أميرة..انت متغيرتش لسة حيوان زي م انت انا معرفش بتكلم معاك ليه اصلا انا داخلة اصلي وياريت لما اخرج الاقي الشقة بقت تتنفس اصل وجودك بصراحة ساحب الهوا من الشقة كلها
حسين..اول مرة اكتشف انه اللى حصلك خلاكي تعرفى تردي كويس ولسانك طول كمان
أميرة..البركة فيك بقا واي حاجة جديدة جوايا انت متعرفش عنها حاجة هطلعها عليك انت
حسين جاي يقرب منها بس هي خافت منو وجريت الاوضة وقفلت الباب ع نفسها جامد
الباب خبط وحسين فتح لقاها عشق
عشق..مساء الخير اسفة ع الازعاج بس كنت عايزة أميرة عشان ننزل نشترى حبة حاجات ليها
حسين..اكيد يامدام عشق مش محتاجة تستأذنى خالص انا كدة كدة كنت نازل هجيب شنطة هدومي من البيت وهاجى ع هنا تاني
عشق..طب واهلك هتعرفهم بجوازك من أميرة؟
حسين..اكيد طبعا هعرفهم بس مش دلوقت ع الاقل لما احس ان أميرة عندها القدرة انها تواجه وتبقى صامدة قدامهم هى هشة اوي حاليا واي كلمة هتأثر عليها وانا مش حابب دا ف الافضل استنى شوية لحد م تتاقلم ع قعدتى معاها واني خلاص بقيت جوزها ساعتها هكلم بابا وعمى وهطالب بحقها واي خطر انا كفيل اني اقفلو انا افدي اميرة بروحى مش هعزها عنها
عشق خدت بالها انه أميرة قاعدا بتسمع ابتسمت بخبث وقالت..شكلك بتحبها ياحسين؟
حسين..بس حبي ليها دمرها
عشق..انت كنت ضحية زيها اللى عملو فيكو كدا ربنا هيحاسبو وبعدين انت ملكش ذنب ف حاجة اللى حصل كان غصب عنك
حسين بعصبية..لا مش غصب عنى محدش كان يعرف انى هوديها الشقة واغتصبها هناك ومحدش شربنى حاجة اصفرة وخلاني مش واعي للى بعملو انا كنت عارف كويس انا بعمل اي؟ ومحدش ضربنى ع ايدي وخلانى اطاوع ابويا وارميها ف الشارع لمستقبل مجهول لولا رحمة ربنا بيها كان زمانها ماتت من زمان انا اللى كنت جبان ومقدرتش ابقى راجل واتحمل نتيجة غلطتى ومحدش قفل ع عقلى وخلاني مسمعلهاش لما طلبت منى نروح الدكتور كأنى مصدقت اني امسك عليها حاجة سيبتها تواجه كل دا لوحدها وجاى دلوقت بكل بساطة اقولها انا جوزك واجبرها تعبش معايا واخد حقى منها كمان انا ندل اوي بجد وشتايم الدنيا قليلة عليا انا مستاهلهاش ابدا
عشق بشفقة وحزن ع حالو..بس انت اكيد حاولت تكفر عن اللى عملتو معاها
حسين..مهما اعمل بردو قليل انا حيوان يامدام عشق انا هستحمل كل حاجة تعملها معايا وهحاول ارضيها بشتى الطرق انا لسة بحبها وهصبر حتى السنين مهما تجرى بينا وبقيت عجوز ولسة انا وهى عند نفس النقطة متحركناش هفضل عندي امل انها تسامحنى مش عايز اي حاجة غير رضاها حتى لو منعت نفسها عنى وبصتلى بكره وفضلت كل شوية تفكرنى باللحظة السودا اللى هدت كل حاجة بينا يكفينى بس انى اشوفها والله دا كتير عليا
عشق..انت بتحبها اوي ع فكرة باين اوي من كلامك مفيش حد بيأنب نفسه بالطريقة دي ومستعد يتحاسب سنين وميشتكيش
حسين بقهرة..دي بنتى واللى ربيتها ع ايدي كبرت قدام عينى عايزانى محبهاش؟
عشق..بس اللى اعتب عليك فيه ازاي قدرت تكتب عليها غيابي انت عارف كويس انها كدا مش حلالك مهما عملت
حسين..عارف بس كنت عايز احس انها معايا حتى لو بمجرد ورقة وكنت بدعي ربنا انها توافق تكمل معايا عشان ساعتها العقد مش هيبقى باطل ولا حاجة وفعلا هى بقت معايا ومراتي كمان انا بجد بشكر عمى ممدوح انه اقنعها جوزك بقا كان مصمم يحبسنى وانا كنت متاكد انه هيقدر يعملها بس الحمد الله الموضوع عدا ع خير
عشق..ربنا يهدي سرك معاها
حسين..اللهم امين ادخليلها بقا واقعدي معاها شوية انا همشى دلوقت اصلا
عشق كانت هتدخل بس سمعت جاسر بينادي عليها بصوت عالى خافت منو وجريت تشوفه بس وقفت مرة واحدة وبصت لحسين وقالتلو..خليها تلبس وانا نصاية وهطلعلها تاني بس بلغها اني هاخدها اشتريلها شوية حاجات قبل م اروح الشغل
حسين..حاضر
ف شقة جاسر
جاسر بعصبية..وانتي تتكلمى معاه ليه اصلا؟
عشق..فى اي ياجاسر احنا كنا بنتكلم عادي مش بنقول حاجة عيب ولا حرام مالك بقا متعصب كدا ليه؟
جاسر بعصبية..عشان انا لحد دلوقت مش مطمن للجدع دا مهما يعمل هيفضل هو اللى اغتصب بنت عمو واللى حبها تفتكرى بقا ممكن يعمل معاكي اي مش بعيد يبصبلك بصة مش حلوة وساعتها هشرب من دمو ومن دمك انتي كمان تجنبيه خالص والا متلوميش غير نفسك فاهمة ولا اعيد كلامى تاني وخدي هنا انتى قولتيلى انك طالعة؟
عشق حطت ايدها حوالين رقبتو وقالت..ياحبيبى منا لقيتك نايم
جاسر..صحينى عادي دا مش مبرر خالص انتى مش عايزة تطلعي نفسك غلطانة افرضي حد كان نازل وشافك واقفة معاه وبعدين متدين اي بقا وسامح لنفسو يكلم واحدة مش حلالو مش فاهم؟
عشق..لا ظالمو والله دا وهو بيكلمنى عنيه كانت ف الارض وكلامو كلو معايا كان ع اميرة تحس ضميرو مش سايبو وبيفضل يلوم نفسو ومستعد يواجه اي حاجة عشانها حتى لو فضل يتعذب عمرو كلو وبعدين انا اللى ابتديت معاه كلام عشان شوفت اميرة بتسمعنا كنت عايزة اثبتلها انه بيحبها بجد
جاسر..طب منا بحبك تفتكرى ممكن اعمل اللى عملو اتهمك ف شرفك من غير دليل لمجرد انه حد قالى مفكرتش حتى اتأكد دا مريض ياعشق
عشق..انا اللى طلعت عشان كنت عايزة أميرة تنزل معايا نشترى حبة حاجات ليها دي عروسة بردو
جاسر تنهد بتعب وقال..طب عايزة فلوس؟
عشق..لا ياحبييى معايا تسلملي انا هاخدها معايا كلمت صحبتى تجهزلنا حبة مجموعات تحفة هنروح ناخدها وساعتبن بالكتير هتكون أميرة هنا هروح بقا الشغل وهاجى ع بليل
جاسر باس راسها وقال..بحبك بس بعد كدا متعمليش حاجة من غير م تعرفينى عشان بجد بتضايق
عشق بحب..حاضر ياحبيبى مش هعمل اي حاجة تضايقك تانى ابدا صحيح اخبار عطية اي؟
جاسر..اللى اعرفو انه خرج من القسم
عشق..بس كدا معرفش ليه حاسة انك مخبى عليا حاجة بعرف ع فكرة من عيونك
جاسر بحزن..منا خايف اقولك بصراحة ممكن ف لحظة غضب ولا سهو منك تودينا ف داهية مش ناسى انا ساعة م جيتى وقولتى لأميرة كل حاجة عن حياتها ربنا نجاها والموضوع عدا بس كان ممكن حالتها تسوء ومنعرفش نلجمها
عشق بحزن..فكرتنى ليه انا من ساعتها وانا بحاول اكفر عن ذنبى معاها
جاسر..منا مش عايز اقولك حاجة عن عطية عشان عارفك وخايف منك ومش قصدي افكرك هو الكلام جابنا لكدا
عشق.والله م هقول لأميرة حاجة بس طمنى عطية جرالو اي؟
جاسر مسح دمعة فرت من عينه بس عشق لحظتها ومعلقتش واستنيت جاسر يتكلم وصدمها بجملة
عطية انتحر ياعشق
ف شقة حسين
حسين..هتخرجى؟
أميرة..ايوة خلاص عندك مانع؟
حسين..اكيد مش عندي انتى تخرجي ف اي وقت بس متتاخريش
أميرة بعصبية..مش من حقك تؤمرنى
حسين..انا خايف بس عليكي
أميرة.لا متخفش عليا انا مش لوحدي هبقى مع عشق وياريت بقا تتجنب الكلام معايا عشان مزعلكش منى
حسين..دا تهديد؟
اميرة..اعتبرو زي م انت عايز براحتك بقا مش هتفرق
جاية تمشى بس حسين وقفها وقالها..استنى طيب هقولك ع حاجة
أميرة بعصبية..لا انت مش طبيعي يبنى ف مرة همد ايدي عليك انا بحاول اتجنبك عشان والله م هرحمك انا لما بشوفك بحس انه فى عفريت لبسنى وهاين عليا اجيب سكينة واقتلك اي كل شوية اميرة اميرة اميرة فى اي زهقت اميرة واللي جابو اميرة انت شكلك كدا عايز تزعل قولى والله وانا تحت امرك ف مرة هندمك بجد وبعدين انت
كانت هتكمل وصلة شتايم ملهاش اخر بس حسين حط ايده ع بقها وقال..اسكتى انا حاسس انه فى بلاعة شتايم هتتفتح ف وشى انت يابت قريبة عبدو موتة اي اندمك دي؟
أميرة كانت بتبصلو بغيظ وهو سرح ف عنيها ومبقاش حاسس باي حاجة وفضل متسمر ف مكانو وعنيه بتفحص كل حتة ف وشها بلهفة وشوق بنته كبرت واحلويت اوي
هى سرحت ف عنيو مرة واحدة وشافت فيهم اول حب ف حياتها بكل الحلو اللى فيه
جسمها اتنفض برعشة مخيفة جديدة عليها لما حسين لعب ع اوتار قلبها بتلك الكلمات كأنو ببعبرلها عن شوقو اللى كان بيقتلو كل يوم من ساعة م فارقتو
لانك حبيتي وحلمى اللي غاب
قلبى بيرفض يبطل عذاب
وكل اللي غايب
تملي بينسا
ودايما بيفكرنى بيكي الغياب
ودايما بيفكرني بيكي الغياب
بدا يلمس شفايفها برحة وهى مأخوذة مع كلماتو
كل م بقدر يوم انساكي
برجع ادور واستناكي
حابب تعبي لانه عشان
راضي بغلبي لانو معاكي
باس كف ايدها براحة وهى بعدت عنه بهدوء وبتحاول تمسك دموعها بالعافية وقلبها بيدق بعنف مش طبيعي ازاي لسة بتحبو بعد كل اللى عملو فيها هى للدرجادي رخيصة ومعندهاش كرامة؟ لا لازم تبعد عنو استحالة تسامحو بالسهولة دي؟ جريت برة الشقة وهو ضحك براحة انه اخيرا عرف انه لسة قلبها بيكن ليه مشاعر هى بس مش قادرة تحس معاه بالامان وخايفة منو وهو دوره ف الفترا الجاية يخلق الاحساس دا جواها ومش هيستسلم ابدا
ف عربية عشق
عشق..هو عمل فيكي اي؟
أميرة..هو مين؟
عشق..كدة ياأميرة بتخبى عليا دا انا افرحلك ع فكرة؟
اميرة..انا اقسم بالله م فاهمة انت تقصدي اي؟
عشق..يعني سرحانة وكل شوية تمسكى قلبك وحساكي بتاخدي نفسك بالعافية وعقلك شغال مش سايبك احكيلي يمكن اريحك
أميرة..تايهة ياعشق مش عارفة مالي بس انا مش قادرة احدد مشاعرى ناحية حسين متلغبطة اوي فاكرا اللحظة اللى اغتصبنى فيها كأنها امبارح ولما شوفته مقدرتش اسيطر ع قلبى كان بيدق بسرعة اوي وعينى كانت مليانة حنين ليه غريب وروحى كانت مفتقداه اوي بس جسمى خايف منو مبقتش متحملة لمستو ليا ببقل عايزة اسامحو بس بتيجى اللحظة ف دماغى بتقولى فوقي انتى خلاص بطلتى تحسى معاه بالامان اكرهيه واتمنيلو الموت باجي بدعي عليه لسانى مش عارف ينطقها ببقى مبسوطة وانا بجرحه بالكلام ونفسى اطلع عليه غلبي كلو انا جوايا نار مش عايزة تنطفى انا مجروحة منو اوي ياعشق حتى لو عايزة اسامحو مش هعرف انا هاجى ع نفسى اوي عايزة لما اسامحو ابقى فعلا حساها وابقى متاكدة انه يستاهل دا لكن لسة علاقتنا مش مستقرة مش بعيد ف لحظة ممكن تلاقينا اتفصلنا وممكن تلاقينا مكملين وممكن تلاقينا حبينا بعض وممكن لا مهما نعمل هيفصل فى حيطة سد بينا صعب نتخلص منها ادعيلي ياعشق ربنا ينور بصيرتي
عشق..انا مش هقولك غير حاجة واحدة اللى قلبك يقولك عليه اعمليه وانتى مغمضة ومتخليش الماضى يقف بينكو وبصى لقدام مش ورا اللى راح خلاص مش هيرجع تانى وصعب يتصلح لكن المستقبل نقدر نبيه باللى يسعدنا
أميرة..بس انا فيا حاجات كتير اتكسرت واللى اتكسر مش بيتصلح لا بيترمي خالص
عشق..مين قال كدا هاتيه ورجعيه من تاني جايز مش هيبقى زي الاول وممكن تلاقيه احسن محدش عارف الخير فين؟
أميرة بتعب..ربنا يقدم اللى ف الخير
ف شقة عبدالرحمن
عبدالرحمن بزعيق .الواد دا هيجنني
يوسف..انت عايز منو اي؟
عبدالرحمن..فى نصيبة يايوسف وهنروح ف ستين داهية بسببها
يوسف..حصل اي قولى انا اعصابى باظت انت عمال بتزعق بكلام ملوش فايدة هو حسين قالك حاجة؟
عبدالرحمن..لا مقاليش بس انا عرفت واتاكد احنا لازم نتصرف وناخد الفلوس ونهرب قبل م الكلب دا يبلغ البوليس ويقولهم ان احنا اللى قتلنا اخونا وساعتها حبل المشنقة هيتلف حوالين رقبينا
يوسف بصدمة..وانت عرفت منين مش احنا اتصرفنا ساعتها وخبينا الجرعات دي ف الدولاب عندو واثبتو انه فعلا كان بياخد الادوية بدون معرفة حد محدش هيعرف يثبت علينا حاجة ولو حصل أميرة هى اللى هتتحبس مش احنا
عبدالرحمن بخوف.. لا يايوسف انت غلطان كل اللى عملناه راح ف الارض حسين سمعنا واحنا بنتكلم ف الموضوع دا وسجل كل حاجة وعرف المحامي بيها كمان بس لحد دلوقت لسة مبلغش البوليس كأنو مستني وقت معين او هبساومنى مش عارف بس انا استحالة م اخدش فلوس اخويا انا عملت كل دا عشان كدا اقوم اطلع من المولد بلا حمص لا انا مش هسكت وممكن ادوس ع الكل
يوسف بخوف..انت تقصد انه ممكن يساومك بالفلوس؟
عبدالرحمن..هو خايف ع اميرة مننا ف انا بجد مش عارف هو بيفكر ف اي بس لو اتحطيت ف موقف اني اخلص منهم هما الاتنين هعمل كدا لا الموضوع دا مفيش فيه هزار بقولك المشنقة هتتلف حوالين رقبينا
فاطمة سمعت كل الكلام ولطمت ع خدها لما عبدالرحمن قال انه عندو استعداد يقتل ابنو قصاد الفلوس لحد هنا وكفايا سكتت كتير مش هتسكت تاني ولازم تعمل حاجة
عند عشق وأميرة
اميرة بخجل..ايدة؟
عشق بأنبهار..اي رايك مجموعة قمصان نوم تهبل صح انا بفكر ناخدهم كلهم اي رايك هيطلعو فظاع عليكي حاجة كدة فخمة من الاخر
أميرة..بس انا مش عروسة ياعشق عشان اجيب كل دا اليوم اللى دخلت فيه مع حسين ف شقة واحدة كأنو بالظبط اليوم اللى دخلت فيه قبرى انا مش هلبس للقمصان دي قدامو
عشق..بس دا جوزك
أميرة..ايوة بس اجبرنى ع الجوازة دي كنت عايزانى اعمل اي منا لو رفضت الله اعلم كان اي اللي هيحصل؟
عشق..مش عايزين نتكلم ف اللى فات ياأميرة عارفة لو ماما كانت عايشة وشافة الحب اللى ف عيون حسين ليكى كانت هتوافق وهى مغمضة
أميرة..بس هو مطلبش حقو
عشق..عشان انتي رفضاه
أميرة بسخرية...هو فعلا ابن اصول وعندو ذوق انتى هتقوليلي
عشق..انتى كدة بتتعبى نفسك مش كل م النصيب يقربكو من بعض تيجى انتى وتبعدي
اميرة..عشق انا مش هاخد القمصان دي
عشق..لا هتاخديها
أميرة..اي الرخامة دي بقولك مش هاخدها هى عافية🙂
عشق..حتى لو ملبستهاش قدامو خديها وخليها عندك ف الدولاب خسرانة اي يعني متخافيش مش هاجى البسهالك بالعافية انا متاكدة هييجى اليوم وتعمليها بمزاجك
أميرة..عشق حتى لو حسين ندم انا مش هسامحو اهمدي بقا
عشق.براحتك بس خليكي منشفة دماغك لحد م تيجى واحدة تخطفه منك وتدلعو عنك وتقولو يابييى وياحبيبى وترقصلو شرقي ع واحدة ونص كمان منشفاها ع الراجل منك لله دا الواد بيغض بصرو عن الكل ومقرب من ربنا شكلك انتى اللى هتخليه ينحرف منك لله
اميرة بغيرة مش عارفة جت منين شدت القميص من عشق وبصت عليه بخجل شديد.هلبسو ازاي انا يالهوي عليا؟ خلاص هاخدهم ارتحتي
عشق بأبتسامة واسعة..جداااااااا
وحضنتها بحب شديد وخدو الحاجة عشق وصلت اميرة البيت وراحت شغلها
ف شقة حسين
حسين بعصبية..يعني اي الكلام دا انت بتهزر مش انا اتفقت معاك اني هأجر المكان عشان خاطر الدروس اوديهم فين بقا دلوقت؟
المتصل..ياحسين وديهم ف اي حتة تانية مش مشكلة يعنى
حسين..م انت عارف انه مينفعش اجيبهم هنا ف الشقة أميرة هتتضايق وتقول عليا منافق وبجيبهم عشان اخليها تحبنى والكلام دا وبصراحة انا مش هستحمل انا بقالى سنين من ساعة م هى مشيت وانا بعمل الموضوع دا لله تكفير ذنب ومختش فيه جنيه مش هستحمل كل اللى عملتو يروح لما تشوفنى بدرسلهم انا خايفة ابقى فعلا منافق وانا مش حاسس؟
المتصل..يبنى انت ليك ربنا وهو اللى عالم بنيتك وقلبك
حسين..منا هفرح لما تشوفنى بديهم دروس
المتصل..طب واي المشكلة م طبيعي انك تفرح مش بعيد دا يبقى سبب انها تسامحك متستبعدش حاجة وجايز اللى حصل دا نصيب عشان تجيب العيال عندك وتشوفهم وتعرف اد اي انت اتغيرت
حسين بحيرة.لا انا مش هجيبهم انا خايف بصراحة وبعدين
قطعته اميرة وهى بتقول..مساء الخير
حسين برق عنيه وبص للتليفون وقفل السكة ف وش اللى كان بيكلمو وبصلها وقال..انتى هنا من امتى؟
أميرة بصة ف عنيه جامد كأنها عايزة تقرا فيهم حاجة
أميرة..من شوية وسمعت كل حاجة هو انت بتدي دروس اي؟
حسين..لازم تعرفي يعني؟
اميرة..ايوة لو مش حابب خلاص بس يهمني اوي اعرف انت مين؟
حسين..انا بدي دروس تحفيظ قرءان وتفسير وفقه حاجة كدة ع ادي يعنى عملتها لله عشان ربنا يجمعني بيكى تانى وتسامحينى ونبدا من جديد عملته من امتى بقا؟ من اليوم اللى مشيتى فيه وانا بحاول اكفر عن الذنب دا وربنا كان معايا وكل م الوقت بيعدي بحس اني بقرب منك اكتر والمحامى وقف حمبي وساعدنى اني الاقيكي ومن يومها بتابعك من بعيد عشان لو حد من اهلى اتعرضلك اعرف احميكي بس ربنا كان معاكي زيي تمام مكنتش عامل حسابي انه الوقت اللى انسى انى اشوفك فيه كنت ع طول بحاول ومش بيحصل نصبب قولت استنى ربنا يأذن ويجمعنا صدفة وحصل ف المستشفى مقدرتش امنع نفسى وجيتلك البيت ع طول اميرة انا لسة بحبك وممكن
قطعته وقالت..انا محتاجة وقت ياحسين
حسين مسك ايدها وقال..انا معاكي ومش هسيبك
أميرة..طيب انت ممكن تجيب العيال هنا عادي
حسين..بجد؟
اميرة..ايوة ع الاقل المكان هيبقى فيه بركة والملايكة هتخشو وانت فضلت سنين بتعمل العمل دا مينفعش تقف خالص
حسين جاي يبوس راسها بس هى بعدت عنو بتوتر ودخلت تتوضى بعديها دخلت الاوضة
وقفلت ع نفسها بالمفتاح وحطت ايدها ع قلبها تهدي دقاته العنيفة لبست الاسدال بتاعها وصليت فرضها وفضلت تدعى ربنا يصلحلها الحال وينور بصيرتها فضلت تعيط ع حالها بس جالها احساس راحة ف قلبها فجاه خلاها تبطل عياط خلصت صلاه وحست انها عايزة تنام ونامت وهى ع السجادة
شافت رؤية
انها ماشية هى وحسين وايدهم ف ايد بعض وباين عليهم مبسوطين
فجاه وقعو ف حفرة سودا ومش شايفين بعض كل واحد خد ركن ف الحفرة بعديها حصلت خناقة كبيرة اوي ما بينهم واتخاصمو شوية فى بصيص نور جى وشافو سلم معرفش جى منين طلعو واخيرا من الحفرة بس سابو ايد بعض وكل واحد فيهم راح ف طريق فضلت تجرى وهى نايهة مش عارفة هي فين ابتدا الخوف يعرف طريقه لقلبها بس لسة مكملة جري وهى بتعيط فجاه شافت حسين بيضحك وفاتح دراعاته ليها فرحت وجريت ترمى نفسها ف حضنو وهو استقبلها ورفع جسمها كلو من الارض وكان شادد عليها جامد كأنو خدها بعد تعب
أميرة..بحبك ياحسين بحبك اوي
فاقت اميرة وهى قلبها بيدق جامد حست انها عطشانة خرجت تشرب لقيت حسين بيتفرج ع الماتش بلعت ريقها ودخلت المطبخ تشرب فتحت لقيت التلاجة مليانة اكل بصت بلهفة عليها لقيت فيه مربي النوتيلا صرخت بفرحة وفضلت تتنطت وخدتها وقعدت جمب حسين وفضلت تاكل بنهم شديد اوي
حسين كان متابع اللي بيحصل وعارف انها هتنسى نفسى لمجرد م تشوف النوتيلا ضحك بحب وعمل نفسو بيتفرج ع الماتش
أميرة..الله بجد طعمها حلو اوي
حسين..م تجيبى حتة؟
اميرة..لا دي بتاعتى روح هات واحدة فى كتير ف التلاجة
حسين..بس انا جيبت علبة واحدة هتاكليها كلها؟
أميرة..انت هتعد عليا هاكل اد اي متقول اللهم بارك لحسن ادخل ارجعهم ف الحمام شكلك عينك فيها
حسين...ترجعيهم ف الحمام ....ابو شكلك ياشيخة🤦
أميرة..اتكلم عدل معايا ...بس اصبر عليا لما اخلص هوريك هعمل اي؟
حسين..لا وع اي انا عايز اعرف اصل بصراحة متشوق اوي
وشد العلبة من ايدها زمت شفتيها بضيق ونسيت نفسها اصلا وقامت تاخده منه وهو ببرفع ايده ف الهوا بشقاوة وهى مفيش ع لسانها غير كلمة هاتها بقا حرام انا بحبها عشان خاطرة ياحسين هاتها
حسين بحب..قولى حسين كدا كمان مرة؟
أميرة..حسين حسين حسين حسيييييييييين
صرخت ف ودانه جامد وهو صرخ بردو بس ضحك ف الاخر عشان حس انها بنهزر معاه ودا اللي كان عايزو
حسين..خلاص يخرببتك خدي وداني انفجرت
اميرة خدتها منو وطلعت لسانها ليه وقالت..كسبتك وبردو هاكلها من غيرك بس كدا ها
وجريت الاوضة تاكل النوتيلا لوحدها وهو ضحك بصوت عالي وحمد ربنا ف سرو وقام يقرا قراءن شوية قبل م يخرج
اميرة لما خلصت اكل سرحت فجاه ف اللى حصلها مع حسين ف الصالة عضت ع شفايفها باحراج وكسوف
أميرة.يقول عليا اي دلوقت عيلة عيب والله انا معرفش نسيت نفسى كدا ليه لما شوفت النوتيلا فضلت اتكلم معاه وناسية هو عمل اي🙂
انسى ياأميرة وعيشى حياتك عاقبيه براحتك بس سيبى النصيب يقربكو من بعض
دا كان كلام عشق ليها قبل م تسيبها وتروح الشغل
امبرة تنهدت وقررت تاخد خطوة جادة ف علاقتهم بس هطلع عينو لحد م يقول حقى برقبتى
وقررت تلعب ع اوتار قلبو وفتحت الدولاب تختار قميص نوم كويس ترددت ف البداية بس ف الاخر قررت تبدا اولى خططها ف ترويض ابن عمها❤️
نهاية الحلقة
ياريت ياجماعة ناقشونى ونبى بلاش ملصقات وتم دي الاحداث متجددة خليكو معايا
اسفة عشان بقالي فترة مركزة مع حسين ونسيت عطية
كان لازم اعمل كدا عشان حسين ياخد حقو ف الرواية عشان تحكمو عليه صح
وبالنسبة لعطية هعرفكو اي اللى حصل 


يتبع الفصل الخامس عشر اضغط هنا 
رواية يا أنا يا هي الفصل الرابع عشر 14 بقلم هاجر عبد الرحيم
rana elhady

تعليقات

تعليق واحد
إرسال تعليق
  • Unknown photo
    Unknown23 سبتمبر 2021 في 12:49 ص

    نفسى اميره تتزوج جاسر الروايه هتبقا جميله بكدا

    حذف التعليق
    google-playkhamsatmostaqltradent