Ads by Google X

رواية حبه عنيف الفصل الاول بقلم ضي القمر

الصفحة الرئيسية

 رواية حبه عنيف الفصل الاول بقلم ضي القمر

رواية حبه عنيف الفصل الاول بقلم ضي القمر

المقدمه...والفصل والاول

 ♥️🌺

دفع الباب بعنف بالغ و دخل رغم السكيرتيرة التي تحاول منعه و لكنه دخل، بل و أمسك ذاك القابع على مكتبه من مقدمة ملابسه صائحًا بعنف:
 - فين بنتي يا ضرغام؟..أنا متأكد إن إنت إللي خطفتها.
 أبعد ضرغام يديه عن قميصه ببرود و نظر إلى السكيرتيرة قائلًا:
 - روحي إنتي على شغلك دلوقتي.
  ما إن خرجت السكيرتيرة حتى صاح مجددًا:
 - بقولك فين بنتي؟
 - بنتك بخير.
  قالها ببرود و كأنه لم يفرق فتاة عن أهلها و يسبب لهم الرعب و الذعر بينما خاب أمل محمد الأخير بأن يكون ضرغام ليس الفاعل و جُن جنونه من بروده قائلًا:
   إنت إية؟..معندكش إحساس؟!...إسمع..البنت ترجع البيت فاهم؟
    استدار ضرغام ينظر عبر ذلك الحائط الزجاجي الذي ينظر منه دائماً و قال:
  - بنتك في بيتها أصلًا.
  - إية؟...إزاي يعني؟
  قالها محمد بدهشة بينما استدار له ضرغام مجددًا قائلًا بابتسامة باردة:
 - إطمن يا عم محمد...بنتك في بيت جوزها.
  صاح محمد غاضبًا و هو يعيد إمساكه من مقدمة قميصه:
  عملت إللي في دماغك و إتجوزتها؟
 هذه المرة أزاح ضرغام يديه بحدة و قد تخلى عن بروده و صاح:
 - متعملش نفسك مش واخد بالك إني بحبها...رفضتني لما إتقدمتلها و كنت هتجوزها بسرعة لأقرب عريس كويس إتقدم علشان تحميها مني مش كدا؟
 لم ينطق محمد بأي شئ فهو لا يستطيع إنكار ما قاله بينما ابتسم له ضرغام بانتصار.

#الفصل_الأول 

  🌺 🌺 🌺 🌺 🌺 🌺 🌺 🌺                                                

 كان يقف أمام ذلك الحائط الزجاجي كالعادة في السادسة مساءًا يراقب تلك الفتاة عادية الملامح و لكنها جميلة في عينية بشكل لا يوصف.
لكم يهيم بها عشقًا تلك الفتاة!
يحبها بشكل لا يوصف و لا يجد مبررًا لهذا الحب حتى الآن.

                              

فقط يحب رقتها، صوتها الناعم، ملامحها العادية، طيبتها، ملابسها المحتشمة.
هو باختصار يحب كل شئ بها و لكنه يكتفي بالمراقبة من بعيد.
ابتسم بمرارة قائلًا في نفسه:
- هي فين و أنا فين.

                              

راقب خروج أباها من الشركة و رحيلهما معًا.
تحرك بثقل ليجلس على كرسي مكتبه الوثير.
منذ عام تقريبًا و هو يراقبها من بعيد فهو يحبها بجنون و لكنه لم يحاول الإقتراب فهو مختلف عنها كثيرًا.

                              

والدها يعمل بشركته فهو محاسب مجتهد و علم من مصادره الخاصة أن تلك الفتاة تسمى ياسمين...تخرجت من كلية الصيدلة منذ عام و تعمل في شركة أدوية قريبة بعض الشئ من شركته التي يعمل بها والدها.

                              

تنهد مرجعًا رأسه إلى الخلف بإرهاق...حبها يرهقه و يثقل قلبه كحامل الهم.
طُرق الباب و دلف شخص إلى الداخل و لكنه لم يتحرك من مكانه و لم يفتح عينيه المغمضة حتى فهو يعرف هوية الطارق فمن ذا الذي يجرؤ أن يدلف إلى مكتبه أو أن يطرق بابه حتى قبل السادسة و النصف مساءًا إلا إذا كان صديقه المقرب سليم.

                              

منذ أن وقع صريع حبها و هو يحرم على الجميع دخول مكتبه من السادسة حتى السادسة و النصف و ذلك حتى لا يرى أحد نقطة ضعفه...حبه المؤلم.
قال سليم و هو يراه متألمًا مثل المعتاد:
- ضرغام...إنت لازم تحط حد للموضوع دا بقى.

                              

لم يجبه ضرغام و لم تتغير حالته...تنهد سليم جالسًا على أحد الكرسيان أمام مكتبه قائلًا:
- طب فهمني لية مش عايز تاخد خطوة؟
اعتدل ضرغام في جلسته مبتسمًا بسخرية قائلًا:
- لو إتقدمتلها هترفضني.
- إنت إية إللي مخليك متأكد أوي كدا أنها هترفضك يعني؟

                              

نهص ضرغام واقفًا أمام الحائط الزجاجي من جديد يراقب الشارع قائلًا:
- البنت دي متدينة جدًا يا سليم...إية إللي هيخليها تقبل بواحد زيي؟
نهض سليم واقفًا أمامه قائلًا بجدية:
- إسمع يا ضرغام...إنت قولتلي قبل كدا إن البنت بيجلها عرسان..يعني ممكن تضيع من إيدك..لو إنت عايزها بجد لازم تاخد خطوة..يا إما تغض النظر عنها بقى.

                              

قال ضرغام و هو مازال يراقب الشارع بشرود:
- مش هينفع...مش هينفع أتقدملها و مش هينفع أغض النظر عنها.
- أيوة و بعدين يعني ما لازم الموضوع دا يكون ليه آخر.
أكمل سليم بغير اقتناع:
- البنات بتموت فيك و نفسهم في نظرة منك...إشمعنا دي يعني إللي هترفضك؟

                              

التفت ضرغام له قائلًا بجدية:
- عارف محمد عبد الكريم المحاسب؟
رد سليم سريعًا:
- اه طبعًا أعرفه..و هو في حد ميعرفوش في الشركة..دا راجل فريد من نوعه.
- أهي البنت دي بقى تربيته.

                                          

                    

تنهد سليم بسؤم قائلًا:
- خلاص بقى يا ضرغام هو مفيش غيرها..على فكرة في بنات حلوة و محترمة و كل حاجة..إدي نفسك فرصة تبص برة.
تنفس ضرغام بعمق محاولًا كبح عصبيته:
- سليم.
- نعم.

- إطلع برة عشان متغباش عليك.
- حاضر.
قالها سليم بطاعة فهو لا يود إغضابه على كل حال فضرغام من الشخصيات العصبية نوعًا ما و رغم أنه يسطر على عصبيته و لكنه أحيانًا يعميه غضبه و حاليًا لا يريد سليم لوجهه الوسيم أن يتشوة.

●○●○●○●○●○●○●○●○●○●

وصلت ياسمين إلى منزلها مع والدها محمد و كالعادة استقبلتهما أختها ريم بمرحها الدائم.
ياسمين فتاة رقيقة للغاية...كل ما بها رقيق..صوتها الناعم...شعرها البني الطويل نسبيًا..عينيها البنيتن...و رغم أنها لا تعد جميلة إلا أن ملامحها أيضًا رقيقة على عكس أختها الصغرى تمامًا.

ريم أختها الصغرى...حاليًا هي في السنة الثانية بكلية الألسن...شرسة بعض الشئ و رغم تشابه ملامحها مع ملامح أختها إلا أن ملامحها تبدو قوية ليست رقيقة كما هي أختها.

- سمسمة يلا غيري هدومك و تعالي...عملتلك البيتزا إللي بتحبيها.
كانت ريم هي من قالت تلك الكلمات فردت عليها ياسمين سريعًا:
- حاضر...هغير بسرعة و جاية حالًا.
ذهبت ياسمين لتبدل ملابسها سريعًا بينما سُعدت ريم لسعادة أختها.

جاءت ياسمين بسرعة قائلة:
- يلا..أنا جعانة موت.
خرجت والدة ياسمين المدعوة منيرة من المطبخ قائلة لياسمين باستنكار:
- مش كنتي أكلتي حاجة تنفعك عشان الأنيميا إللي عندك يا ياسمين.
رد زوجها محمد:
- خلاص يا منيرة سبيها تاكلها مرة من نفسها.

ابتسمت ياسمين لوالدها برقة و شرعت في الأكل بينما تنهد محمد ناظرًا إليها بعدم ارتياح و قلق...يعلم أن رقتها تلك تجذب الشباب إليها حتى و إن كانت عادية الملامح و قصيرة القامة نسبيًا...حتى و إن كان وزنها أقل من المفترض أن يكون عليه فهي نحيفة نسبيًا و تعاني من أنيميا و ينخفض ضغط الدم لديها في بعض الأحيان.

يقلق عليها بقدر كبير..حتى أنه لا يقلق على ريم بذلك القدر فريم شرسة..قوية تجيد الدفاع عن نفسها وقت الحاجة لذلك على عكس ياسمين الرقيقة.
أفاق من دوامة أفكاره على صوت زوجته منيرة:
- مالك يا محمد؟..مش بتاكل لية؟
أجاب سريعًا حتى لا ينتابها الشك فقلبها الأمومي سيذعر إن علمت بما يفكر به:
- باكل أهو.

●○●○●○●○●○●○●○●○●○●○●

كان ضرغام غارقًا بالعمل حين دخل سليم إلى مكتبه قائلًا:
- ضرغام...مش يلا بقى.
- طب انا هروح أعمل إية يعني؟
قال سليم جالسًا بإرهاق:
- ترتاح شوية يا بني.
ثم أكمل و هو يتثائب:
- و أنا كمان عايز أرتاح و أنام شوية.

أنهى حديثه ناظرًا لضرغام فوجده لا يسمعه من الأساس فهو قد غرق بالعمل من جديد.
قال سليم باستنكار و هو ينهض:
- انا ماشي...خليك إنت كدا.
رحل سليم و ظل ضرغام على حاله لعدة ساعات أخرى.

●○●○●○●○●○●○●○●○●○●○●

في الصباح كانت ياسمين تستعد للذهاب للعمل عندما قالت منيرة:
- إبقي كُلي حاجة يا ياسمين بدل ما تدوخي في نص اليوم.
قال ياسمين بملل:
- حاضر يا ماما.

خرجت ياسمين من المنزل ذاهبة إلى عملها...وصلت إلى الشركة أخيرًا و ذهبت مباشرة إلى مكتبها المجاور إلى مكتب صديقتها سلمى قائلة:
- السلام عليكم.
ردت سلمى السلام مرحبة بياسمين قبل أن تقول:
- عرفتي إن صاحب الشركة عرضها للبيع؟

اندهشت ياسمين و قالت برجاء:
- لا متهزريش.
- و الله عرضها للبيع.
جلست ياسمين على الكرسي الذي خلف مكتبها بخيبة أمل قائلة:
- في ناس كتير هتتأذى من الموضوع دا.

ردت سلمى بتفكير:
- لو إللي هيشتري الشركة مش هيقفلها ولا هيغير الموظفين يبقى محدش هيتأذى.
- و لو غيروا الموظفين؟
- هنتأذى كلنا...تفتكري إية إللي هيحصل؟
ردت ياسمين بتنهيدة:
- مش عارفة...الله أعلم.

●○●○●○●○●○●○●○●○●○●

حمل سليم بعض الأوراق متجهًا إلى مكتب ضرغام.
طرق الباب و فتحه دالفًا إلى الداخل...كان ضرغام يقف أمام الشرفة يراقب الشارع فقال سليم:
- خير...واقف عندك من دلوقتي لية؟
لم يجبه ضرغام فاقترب سليم منه قائلًا:
- إنت جيت إمتى؟

أجاب ضرغام و هو مازال يراقب الشارع:
- انا مروحتش أصلًا.
تنهد سليم بقلة حيلة...فهذا ليس جديد على ضرغام.
- نفسي أعرف مبتروحش لية...هو إنت ملكش بيت؟
تنهد ضرغام بثقل قائلًا:
- لا ليا...بس فاضي.

ثم أكمل بمرارة:
- عارف إن أنا شخصية غريبة بس مبحبش الوحدة...أنا هروح البيت هعمل إية يعني...هاكل و أنام علشان أجي تاني الصبح...طب ما أنا بعمل كدا هنا...باكل و بنام في الأوضة إللي جنب المكتب.
استدار ينظر لسليم قائلًا:
- عارف إمتى هيكون في سبب بجد يخليني ارجع البيت؟

كان سليم في انتظار ما سيقوله عندما قال ضرغام بتمني:
- لما أتجوز ياسمين.
تحرك ضرغام جالسًا خلف مكتبه بينما زفر سليم بضيق ثم قال:
- طب بقولك إية...ما تحاول تلفت نظرها ليك.

قال ضرغام بدهشة:
- ألفت نظرها؟!
جلس سليم أمام المكتب قائلًا بجدية:
- أيوة تلفت نظرها.
- إزاي؟
- كل إللي عليك تعمله إنك تنزل الساعة ستة تركب العربية و تمشي و تكون بس متشيك كدا و مسرح شعرك حلو.

صاح به ضرغام بحدة:
- إنت أهبل يا بني...قولتلك دي غير..مش هتبصلي علشان لابس شيك و وسيم و شعري حلو.
قال سليم سريعًا:
- يا بني إفهم...لية ميكونش عم محمد لما بيروح بيحكي عن شغله شوية و أكيد جاب سيرتك في مرة فممكن هي يكون عندها فضول تعرف الراجل دا شكله إية.

قال ضرغام بتفكير:
- و لو مطلعش عندها فضول؟
رد سليم ببساطة:
- يبقى مخسرتش حاجة...بص إنت شكلك ملفت للإنتباة أصلًا..مش عشان وسيم ولا كدا لأ..بس إنت عندك هيبة كدا بتلفت النظر...كل إللي انا عايزك تعمله بس إنك تنزل الساعة ستة تعدي من قدامها كدة و تركب العربية و تمشي..بس مش أكتر..كإنك بتقولها أنا موجود..بس.

فكر ضرغام قليلًا ثم قال:
- و لو ملفتش نظرها؟
- يبقى مش مكتوبالك بقى..أعملك إية؟
- خلاص موافق.
قالها ضرغام بحماس فهو أخيرًا يأخذ خطوة تجاهها...تجاه من يعشقها قلبه بشده .

ياترى هيحصل اي؟؟
وياترى ضرغام هيقدر يلفت نظرها له ولا هيحصل شئ اخر؟؟
احداث مشوقه هنعرفها ف الفصل القادم
يتبع الفصل الثاني اضغط هنا
الفهرس يحتوي على جميع فصول الرواية "رواية حبه عنيف"اضغط على اسم الرواية


google-playkhamsatmostaqltradent