رواية اللطيم البارت العاشر 10 بقلم هنا سلامة
رواية اللطيم الفصل العاشر 10
دخل ليو من البلكونه و طلع يلعب في الشقه، لقى الباب مفتوح و هو متعود أن الباب بتاع الشقه دايماً مقفول جري على ليل و بدأ يلحس في وشه و يهوهو كتير لحد ما ليل صحى أخيراً
ليل بنعاس : ليو ادخل عشان سيلين يا ليو بتخاف
الكلب نباحه زاد
فتح ليل عينه و لقى المخدة في حضنه مش سيلين !
الكلب نباحه زاد و هو بيجري على برا، قام ليل وراه بسرعه و اتفاجأ أن باب الشقة مفتوح !!!
طلع للسلم و قال بصوت عالي : يا محمد اقفل باب العماره شكل كان في حرامي في شقتي، يا سيلين يا سيلين
ندى على سيلين و دور عليها في الشقة كلها مش موجوده ! نزل جري على السلم و معاه ليو لشقه جدته، لقى سيلين مرمية على الأرض و جدته مربوطه
نزل على الأرض و هو بيملس على وشها و بيقول بخوف : ايه الي حصل ! فوقي يا سيلين فوقي
جدته رفصته برجلها من تحت فالتفت ليها و شال اللزق من على بوقها
جدته بعصبيه : يا ابن ال *** بتجري على مراتك و سايبني دي آخره تربيتي
بدأ يفكها و قال : ايه الي حصل ؟؟ مين دول ؟؟ سيلين مالها ؟؟
جدته بعصبيه و هي بتدلك ايديها مكان الحبل : يا أخي اهدى عليا عشروميه سؤال في الثانيه، إلى انا شوفته أن سيلين جريت على المطبخ و اخدت سكينه و مسمعتش أيه الحديث بس في واحد منهم قرب منها و اخد السكينة و إدالها حقنة في كتفها ..
بدأ سيلين تفوق و قالت : امممم.. اممم.. عامر.. عامر يا حبيبي.. ليل .. ليل ..
شالها و قال : متخفيش يا تيته هجيب عساكر للعماره بس اطمن على سيلين
جدته : ماشي يا ابني ماشي ..
طلع على شقتهم و بدأ يفوقها، اول ما فاقت انهارت في العياط و قالت بشحتفه : ليل .. دول.. دول إلى قتلوا اخويا... ااااااه يا قلبي ااااه.. يا ليل دول إلى قتلوه يا عاااااامر تعالى انا تعباانه يا عاااااامر
كانت بتقول اسم اخوها بحرقه و بصوت عالي، اخدها ليل في حضنه و قال بحزن : اهدي يا حبيبتي اهدي، حق عامر هيتجاب و الله
سيلين بعياط : هو.. هو انا ليه محضرتش دفنته ؟؟
ليل بحزن : دخلتك تنامي اول امبارح عشان اروح الدفنة الصبح لوحدي و نبهت على تيته متنزلكيش و رجعت قبل ما تصحي عشان كده صحيت لوحدي لاني منمتش لما رجعت من الدفنة اصلاً
سيلين بعياط : عشان خاطر ربنا وديني قبره عاوزه اكلمه يا حبيبي عشان خاطر سيلين
ليل بحزن : حاضر يا حبيبتي و الله حاضر، المهم عرفتي منين انهم إلى قتلوه طيب ؟
سيلين بعياط : الراجل قالي و هو بيخدرني انهم زي ما قتلوا عامر هيقتلوك ! هيقتلوا جوزي يا رب يا رب !
ليل بهدوء : اهدي خالص محدش يعرف يلمس شعره مني و لا منك بعد كده، كل حاجه هتبقى كويسه اوعدك يا حبيبتي، قومي البسي نروح لعامر ..
سيلين بتعب و هي بتمسح دموعها : طيب ..
قامت و لبست اسود في اسود لتالت مره في حياتها، راحت ناحية ليل إلى كان حاطط راسه بين ايديه
سيلين بحنيه : ليل .. ليل
رفع رأسه ليها و ابتسم بكسره : عارفه، كنت خايف اموت و ملاقيش حد يعيط عليا غير جدتي و اختي ! انا طول عمري لطيم و وحيد حتى صحابي مليش غير حسام و عامر الله يرحمه، تيته كانت مهتمه ب هاله اكتر مني بكتير، كنت بغير و لحد دلوقتي بغير، انا ملقتش الاهتمام و لا الحنيه من حد، انا كنت خايف اموت وحيد، بس انت دلوقتي موجودة، لو موت ازعلي يا حبيبتي، ازعلي و عيطي بس هو اسبوع، اسبوع يا سيلين و ارجعي قويه، بس أقرايلي قرآن دايما و ادعيلي يا سيلين، انا عارف انه مش وقته الكلام ده بس انا كان لازم اطلعه عشان ارتاح
كانت بتسمع الكلام و هي بتعيط و بتتشحتف، قعدت على ركبها قدامه و حاوطت وشه بايديها و قالت بحنان و شحتفه : متقولش كده يا ليل عشان خاطر ربنا، انت عارف انا بحبك ازاي و لو انت موت أو بعدت عني قلبي هيوجعني زي ما هو بيوجعني دلوقتي على عياطك ده، ابوس ايدك خليك ليل القوي إلى اعرفه، قويني يا ليل و النبي، و لو على الوحده هجيبلك عيال، عيال كتير اوي يا ليل، لاني بعشقك و مش عوزاك تحس بالوحدة أبداً، هيسندوك و يقفوا جنبك زي امهم
اخدها في حضنه و قال بحب : رغم اني معرفش حاجات كتير عنك بس الي اعرفه انك رقيقه و جميله و احسن ست في الدنيا و ست البنات كلهم، إلى اعرفه انك ساكنه قلبي يا حبيبتي، سكناه دايماً 💛
بعدت عن حضنه و نزلم عشان يروحوا لقبر عامر
* اللهم ارحم موتانا وموتى المسلمين أجمعين *
في بيت حسام و هاله
الدكتورة : مبروك يا حسام بيه المدام حامل
حسام بفرحه : بجد ؟؟
الدكتورة : اه و الله يا حسام بيه، مبروك يا مدام
هاله بصدمه : انت متأكده ؟؟
الدكتوره : ايوه يا هانم متأكده، بعد اذنكم
خرجت الدكتورة و فضل حمزه يطنطت و يقول : هيح ماما في بطنها نونووووو هيبقى عندي اخ يا بابي
حسام بسعاده : أو أخت يا حبيبي شبه مامي، جميله زيها، حبيبتي يا هاله مبروك
حضنها بقوه و قال بفرحه : كنت مستني عيل منك يا هاله، علاقتنا هتقوى بيهم، لو تعبت يسندوني، لما نموت يسندوا بعض و يونسوا بعض يا لولو
هاله بانهيار و عياط : اطلع براااا براااا انت و حمزه براااا، اااه يا قلبي هو انا ناقصه وجع قلب يا حسام ؟؟
حسام بعصبيه : انت هتموتيني بالحياء يا هاااله !
حمزه بصلهم بخوف و حزن، هاله لحظت أن الولد مرعوب فقالت بهدوء : بره انت و حمزه عاوزه انام
بصتله بعتاب و بعدين بصت على ابنها، لاحظ هو كمان رعب حمزه و اخده بهدوء و طلع و قفل عليها الباب، قامت من على السرير و هي حاطه ايديها على بطنها و بتقول بعياط : اخاف حسام يحصله حاجه و ابقى انا لوحدي، عارفه ان ممكن تفكيري يكون غلط، بس انه يتيتم ده ظلم للطفل إلى جاي !
مسكت شنطتها و طلعت كارت منها، بصت لبطنها بحزن و للكارت و قالت بانهيار : انا اسفه ليك، اسفه يا حبيب ماما انا اسفه
طلعت فونها و قالت بتماسك : الو .. الو لو سمحت عاوزه ميعاد مع الدكتور، لا انا عاوزه اعمل .. اعمل ...
عيطت اكتر و بعدين قالت : الو معلش بس تعبانه شويه عاوزه اعمل
قاطعتها الممرضة و قالت : //////// ؟
هاله بعياط و هي بتبص على صوره حسام : ا... ايوة .. تمام.. تمام .. سلام
في المقابر
ليل بحزن : يلا يا حبيبتي، بقالنا ساعتين هنا
سيلين قفلت المصحف و قالت بحزن : هو مرتاح يا ليل و لا لا ؟ عامر بيخاف من الضلمه يا ليل...
ليل بابتسامه : كان حافظ سورة المُلك إلى بتنور القبر يا حبيبتي، و بعدين عامر ميت شهيد يا حبيبتي يعني رايح الجنه و مرتاح في قبره عشان عمره ما أذى حد و لا كدب على حد
غمضت عينيها بحزن و افتكرت من سنه ...
فلاش __________________
سيلين بعصبيه : يعني تبقى عارف ان ابو صاحبك عايش و انه عايش مع ناس مش اهله و تفضل ساكت ؟؟
عامر بعصبيه : رحيم ده واصل و قالي انه ممكن يقطع عيشي يا سيلين
سيلين بعصبيه : و صاحبك ؟؟ ده ليل زي اخوك ! ازاي تقبل ان ابوه يكون عايش و هو ميعرفش ! ازاي اصلاً رحيم ده وداه الملجأ بايديه ! ده راجل جاحد أوي !
عامر بعصبيه : سيلين خلاص ! انا كل الي قهرني أن ليل بيحس بالوحدة كتير و هو عنده عيله كبيره زي عيله رحيم
سيلين بعصبيه : يعني بيتعذب و انت ساكت ؟؟
عامر بعصبيه : و اتاذي في شغلي ؟؟ ده الراجل ممكن يقتل إلى يقول لليل ! و بعدين ده جوز امك فاحنا مش قده !
باك _____________________
سيلين بانهيار : ليل
ليل بصدمه من انهيارها المفاجا ده : ايه يا روحي في ايه ؟
سيلين بارتجاف : انا انا .. انا عاوزه اقولك.. اقولك حاجه
ليل بخوف عليها : قولي يا حبيبي قولي
سيلين بعياط : انت ... انت متأكد انك...
- تابع الفصل التالي عبر الرابط: "رواية اللطيم" اضغط على أسم الرواية