Ads by Google X

رواية ست الحسن الفصل الواحد والعشرون والأخير بقلم نعمة حسن

 رواية ست الحسن الفصل الواحد والعشرون والأخير بقلم نعمة حسن

رواية ست الحسن الفصل الواحد والعشرون والأخير بقلم نعمة حسن

الواحد والعشرون والاخير والخاتمة 
،،ست الحسن،،
البارت الواحد و العشرين بقلمي،،نعمه حسن،،

بعد مرور ستة أشهـــــــــــــــر.....
و بعد أن استقر الحال بين رشيده و حسناء حسناء:لازم تروحي تطمني ي رشيده..انتي مش شايفه وشك أصفر إزاي!!
رشيده بتعب فشلت في إخفاؤه:هي الانيميا اللي عامله كده..هاخد العلاج و هبجا كويسه..متخافيش.
ثم أكملت بشفاه ملتويه:.ده لو خايفه يعني.
حسناء بغيظ:تصدقي بالله انتي خساره فيكي المعروف..خليكي كده تعبانه انتي حره.

غادرتها ونزلت للأسفل حيث يجلس زوجهما فقال متسائلا:هاا..مفيش فايده بردو؟!
_زهقت معاها..مصممه متروحش تكشف.
=والله انا حاسس انك مخوفه نفسك عالفاضي..عادي يعني ما أي واحده حامل بتتعب كده.
_لا طبعا مش عالفاضي..و مش اي واحده حامل بتتعب كده..منا كنت حامل و شوفت كتير غيري حوامل مكانش بيحصللهم زي رشيدة ليه؟! 

"مالها رشيدة يجماعه مكبرين الموضوع ليه؟!"
تفوهت رشيدة بتلك الكلمات و هي تهبط الدرج فأجاب العمده: يعني غلطانين اننا خايفين عليكي؟! 
_ لا يخويا مش غلطانين ولا حاجه..اذا كنتوا مصممين هروح بكره..الا جوليلي ي حسونه يختي..
=همممم..اشجيني ي رشيده.
_يعني بما انك عندك فكره عن الاطفال وكده..شوري عليا أسمي المولود ايه؟!
اعتدلت حسناء في جلستها بحماس ثم قالت:الله..احنا ممكن نسميه"تيم"
_تيم ايه يختي و متيمش إيه؟!احنا عايزين نسميه إسم كده له هيبه زي إسم أبوه "العمده داود".
=ييييه..داود تاني..و بعدين ي ماما أبوه إسمه محمد مش إسمه داود.
العمده:ما تمسكوا ف شعور بعض أحسن..داود مين و محمد مين دلوجتي؟! ثم أكمل بخيلاء: لما ييجي ان شاءلله بالسلامه أبجي أسميه.
حسناء بحنق:بقولكوا ايه..ابنكوا و انتوا حرين فيه..ان شالله تسموه"باللو"..تصبحوا علي خير.
رشيده بغيظ:باللو؟؟!ان شالله يجيلك باللو ف نافوخك ي ام باللو انتي..جال باللو جال!!
العمده ضاحكا:متسبجيش الأحداث ي رشيده و سيبيها لساعتها..لما ييجي بالسلامه إسمه هييجي معاه..يلا نطلع ننام عشان هاخدك الصبح و نروح للدكتور.

        🌷🌷🌷🌷🌷🌷🌷🌷🌷🌷🌷
أمام مركز دكتور"ياسر هنداوي"طبيب نساء و توليد.

_اتفضل ي عمده..ازيك اليومين دول ي مدام رشيده.
=تعبانه ي دكتور..دايما معايا دوخه و هبطانه و بحس بألم شديد زي ما يكون ف جلبي.
=همممم..آلام متقطعه بتروح و تيجي ولا ثابته؟!
_أيوة بتروح و تيجي.
=تماام..بصي ي مدام رشيده الأعراض اللي بتشتكي منها دي ليها علاقه بمشكله ف القلب..ف مش هنعرف نتكلم دلوقتي قبل ما تعملي أشعة موجات صوتيه و تروحي لدكتور قلب و أوعيه دمويه و تشوفي كلامه و بعدين ترجعيلي.

أمام مركز دكتور"محمد عبدالمولي"قلب و أوعيه دمويه....
_اتفضلوا.. 
=حضرتك انا حامل ف الشهر السادس و تعبت جداا و دايما معايا دوخه و هبوط و دكتور النسا اللي متابعه معاه جاللي نيجي لحضرتك.
_طب اتفضلي ي مدام رشيده علي الجهاز نعمل اشعة موجات صوتيه.
فحصها الطبيب بدقه تحت أنظار زوجها القلقه المضطربه ثم قال
_انتي كنتي تعرفي إنك مريضة قلب قبل ما تحملي ي مدام رشيدة؟
رشيده بدهشه:لااا..لا مكنتش أعرف.
الطبيب بعمليه: امممم..اتفضلي "ثم ناولها منديلا لتزيل بقايا الجل المستخدم لعمل الأشعه و اتجه إلي مكتبه ثم قال:
الحمل بيضغط علي القلب و علي جهاز الدورة الدمويه بشكل عام..لأن حجم الدم بيزيد من 30ل 50٪ لتغذية الطفل و مضخات دمك بالدم كل دقيقه.. و كمان ضربات قلبك بتزيد.. ف طبعاً المخاض و الولاده عبء كبير علي القلب. 
و اللي حضرتك متعرفيهوش انك عندك تشوه طفيف في صمامات القلب.. و ده طبعا بيؤدي إلي زيادة خطر حدوث مضاعفات أثناء الحمل لو الصمامات مشتغلتش بشكل كويس.. و ممكن نواجه مشكله في تحمل زيادة تدفق الدم أثناء فترة الحمل.
العمده. بحزن بااالغ و تيه: معلش ي دكتور انا اغلب الكلام مش مستوعبه.. بس اي العمل يعني.. اي اللي المفروض يتعمل. 
الطبيب: هي ان شاءلله حاجه بسيطه لأن التشوه مش بنسبه كبيره زي ما قولت.. فانا هكتبلها علي علاج دلوقتي هتمشي عليه مع المتابعه مع دكتور النسا بردو لان العلاج اللي بتاخديه لازم بيأثر علي الطفل.. ف دكتور النسا هو بيحدد الجرعه المناسبه. 
العمده: يعني حضرتك مفيش خطر عليها؟! 
_طول ما هي بتاخد الدوا ان شاءلله خير.. أهم حاجه ي مدام رشيده متوقفيش الدوا أو تعدلي الجرعه من نفسك.. و إن شاءلله هطمن عليكي بعد أسبوعين عشان نعمل فحص تاني.
=ان شاءلله.. بعد اذنك. 
_اتفضل.. مع السلامه. 

             ♕♕♕♕♕♕♕♕♕

عند عودتهم إلي المنزل قابلتهم حسناء بقلق حقيقي: ايه اتأخرتوا كده ليه.. طمنوني عملتوا ايه؟! 
لا رد... 
_مبتردوش عليا ليه؟! الدكتور قال ايه ي محمد؟! 
العمده بحزن: اتأخرنا لأننا روحنا لدكتور النسا بعتنا علي دكتور أوعية دمويه و رجعنا لدكتور النسا تاني. 
_طيب قالكوا ايه؟! 
=رشيده عندها تشوه في صمامات الجلب.. عطانا علاج اهو و ربنا الشافي. 
حسناء بحزن لم تصطنعه: ي حبيبتي ي رشيده.. متقلقيش.. ان شاءلله مع العلاج هتكوني زي الفل. 
رشيده ببرود علي عكس ما يعتمل بداخلها: انا مش جلجانه ي حسونه.. متجلجيش انتي.. انا مش هموت و اسيبلك العمده لوحدك. 

نظرت لها حسناء بأعين متسعه ثم قالت: بقا ده تفكيرك ي رشيده؟! عالعموم مش هرد عليكي.. سلامتك الف سلامة.. لو احتاجتي حاجه ناديني.. 
_أنا صمامات جلبي متشوهه يختي مش مشلوله.. لو احتاجت حاجه هعملها لنفسي. 
نظرت لها حسناء بتعجب لحدتها ثم قالت: تصدقي بالله.. انا اللي غلطانه.. انتي خساره فيكي اني اكلمك حلو.. عايزة نبقا ناقر و نقير طول الوقت.. 
_الله يخليكي ي حسونه بلا ناجر و نجير بلا منكر و نكير.. اطلعي يختي وريحينا. 
=طالعه ي رشيده.. تصبحوا على خير. 

العمده: في ايه ي رشيده مش طيجالها كلمه ليه؟! 
_ايه ده!؟ هو انت هنا ي عمده؟! اومال مسمعتش صوتك ليه الا دلوجتي؟! 
=سايبكوا تاكلوا ف بعض كيف البوم.. مفييش دماغ ليكوا. 
_انا هجوم انام و انت اطلع لشاكيرا اللي مستنياك فوج دي..ثم تمتمت بسخريه: ربنا يعينك ي حبة عيني..

         ♕♕♕♕♕♕♕♕♕♕

داخل غرفتهم..يجلس و يجلسها أمامه بين قدميه..يصفف لها شعرها بحب لم تعهده من قبل ثم قال:سرحانه ف ايه يست الناس؟!
_عاوزه اكشف ي محمد..المره الجايه ورشيده رايحه عندالدكتور هروح معاها.
قال بلهفه:ليه انتي فيكي ايه بيوجعك.
_لا متقلقش مش دكتور القلب..دكتور النسا.
=اشمعنا؟!
_هو ايه اللي اشمعنا!!؟؟عاوزه اعرف مبحملش ليه؟!
=مستعجله ليه يست الناس؟!متشغليش بالك ان شاءلله لو نصيبنا فيه هييجي.
قالت بعقل مغيب:ااه طبعا مشغلش بالي..مهو انت كمان مش شاغل بالك..منتا جايلك ولي العهد طبعا هتشغل بالك بيا ولا بعيل مني ليه؟!
زفر في نفاذ صبر ثم قال:انا نفسي افهم دماغك..انتي كل ساعه بحال يبنتي؟!و ايه تفكيرك المتخلف ده؟!
انا مش شاغل بالي بعيل منك؟؟!!أنا؟؟!ده انا بدعي ربنا ليل نهار إني أخلف منك دسته.
نظرت له في شك فأمسك وجنتيها بين كفيه ثم نظر بداخل عينيها قائلا:حسناء افهميني..انا محبيتش ف حياتي حد زي ما حبيتك انتي، و عمري ما اتمنيت حد زي ما اتمنيتك انتي،و مبتبسطش مع حد زي ما بتبسط معاكي انتي،،ثم قال بقلة حيله:و متمنيتش اخلف من رشيدة زي مااتمنيت أخلف منك انتي..انتي بتجري ف دمي اكتر من دمي نفسه..وانتي عارفه غلاوتك عندي و عارفه اني همووت علي عيل منك 
ثم لثم شفتيها في قبله خاطفه حنونه و أكمل:و عارف انك متأكده من كلامي ده بس بتجولي كده عشان اطمنك.
نظرت له في تفاجئ فأكمل:و أنا كلي تحت أمرك..و طول منا عايش هتفضلي مطمنه معايا..اتفجنا ي ست الحسن و الجمال؟!
لا رد.....
_اتفجنا ي حسونه؟!
نظرت له في غيظ ثم ضربته في صدره قائله:حسونه في عينك انت و هي.
ضحك هو بشده و قال:حسونه دي هي اللي بتظبطك
 ثم قبل رأسها و ضمها إلي صدره حيث ملجأها الاول والاخير.

            🌸🌸🌸🌸🌸🌸🌸🌸🌸🌸

بعد مرور ثلاثة أشهــــــــــــــر..

العمده:اجمدي ي رشيده..هانت.
رشيده ببكاء لاا خلاااص جلبي هيجف ي داود..مش جادره استحمل.

بجانبها في المقعد الخلفي للسياره تجلس حسناء ممسكه بكلتا يديها فقالت:معلش ي رشيده استحملي ي حبيبتي هاانت خلاص قربنا.
_هموووت ي حسناء..أنا حاسه اني همووت خلاص.
حسناء ببكاء:لاا بعد الشرعليكي..و تسيبيني ي رشيده؟! دنتي بقيتي أهلي ي رشيده.
_ابجي سمي المولود "تيم" زي ما كنتي عايزة.ثم أكملت بمزاح خفيف: نا اينعم هبجا نايمه ف تربتي مش مرتاحه للإسم بس زي بعضه 
=لا ي رشيده بعد الشر..ان شاءلله هتبقي كويسه و تقومي بالسلامه..خلااص وصلنا اهوو.
نزلوا سريعاً و دلفوا إلي المشفي و منها إلي طابق الولاده..
ذهبت برفقة الممرضات إلي غرفة العمليات.
وفي الخارج..يقف تائها..هل ستنجو أم سيصيبها مكروة..هل سيفرح بمجئ المولود أم لا..
أجفل قلبه عندما استمع إلي صوت بكاء الطفل فنظر إلي حسناء نظره بمعني:"أيعقل" فاحتضنته بحب و فرحه و لكن قاطع فرحتهم مجئ الممرضه قائله:انتو اللي مع الحاله الاخيره اللي جت؟!
فأجاب بلهفه:ايوة احنا هي اخبارها ايه دلوجتي؟!
_شدوا حيلكوا..البقاء لله.
.... "" ست الحســــــــن"".... 
الخاتمه بقلمي♡نعمه حسن♡

بعد مرور 10سنوااااات..... 
تقف حسناء مناديه: تيم.. يا تيم.. هات اخواتك و تعالي عشان تتغدوا. 
أقبل تيم عليها بعصبيه ثم قال: بصي بجا يست الناس.. انتي تشوفيلك حل مع بناتك دول.. والا و كتاب الله ما هيخرجوا من البيت تاني. 
حسناء: في ايه بس يا تيتو طول بالك علي اخواتك شويه. 

"تيتو تاني ياللي تنشكي في لسانك؟! انتي يبت انتي مش انا وانتي عملنا اتفاجيه.. انك متجوليش ي تيتو وانا هبطل اجوللك ي حسونه؟!" 

Flash Back. 

_البقاء لله.. شدوا حيلكوا. 
العمده بإنهيار: ازااي يعني.. انتو عملتوا فيها ايه؟! طب انا مش عايز عيال خدوه و رجعولي رشيده. 
حسناء بانهيار مماثل: طب مش هي ولدت.. حصلها ايه؟! 
الممرضه: رشيده مين ي حضرت؟! المتوفيه اسمها "غاليه". 
نظر العمده و حسناء لبعضهما البعض ثم اتخذا طريقهما إلي الأعلي ركضا... 

أمام غرفة العمليات.. 
العمده مخاطبا الممرضه: رشيده داود. 
الممرضه علي عجاله: لسه خارجه حالا.. ف عنبر الولاده. 
ذهبوا سريعا إلي عنبر الولاده.. فور ان التقطت عيناه رشيده و طفله حتي خر ساجداً شكراً لله. 
جرت إليها حسناء ثم قبلت رأسها قائله بفرحه حقيقيه: الحمدلله.. الحمدلله.. الف حمد الله على سلامتك ي رشيده. 
رشيده بتعب: الله يسلمك ي حسناء.. بتعيطي ليه؟! 
حسناء: قلقنا عليكي.. الحمدلله انك بخير. 
رشيده بمزاح: تجلجيش يختي.. جيمالك ارازي فيكي.. مين هيخلي لعيشتك طعم غيري؟! 
حسناء بضحك و بكاء في آن واحد: محدش ي رشيده..ثم نظرت إلي المولود بجانبها قائله: الله.. بسم الله ماشاء الله.. ايه العسل ده. 
ثم أخذته و اتجهت به نحو زوجها الذي يقف شاردا و قالت: تيم محمد داود.. سمّي و شيله عشان تكبر له. 

نظر إلي الطفل بيديها ثم انفجر في البكاء متمتماً: اللهم لك الحمد.. اللهم لك الحمد. 
ثم أذن له في أذنه اليمني و أقام الآذان في اليسري.

نظرت لحالته تلك فبكت معه أيضا.. أخذه من يدها ثم ضمه إليه بحب و شوق بالغ و تمتم بصوت خفيض: يااااه ي تيم.. استنيتك سنين و سنين.. مكنتش أتخيل إن حضنك حلو أوي كده.. 
ثم أكمل بهمس: أحلي من حضن ست الناس كمان.. بس سر بيناتنا ده الا لو عرفت هتنكد عليا.. 
ثم تبدلت حالته من البكاء إلي الضحك قائلا: ااه يبن الكلب طالع شبه أبوك.. هتدوب جلوب البنات. 

نظرت حسناء له بشفه مرتفعه دلاله علي إعتراضها ثم قالت: مش وقت حكاية أمجاد و بطولات دلوقتى ي سي روميو. 
أعطاها الولد ثم اتجه إلي حيث ترقد رشيده.. انحني بجزعه عليها ثم قبّل رأسها و يديها قائلا: الف حمد الله على السلامة ي رشيده.. يتربي في عزنا ان شاءلله. 
  
        
BACK,,, 

_وهو تيتو وحش ي رشيده؟! في ايه منا بدلعه. 
=و تدلعيه ليه هو بت؟! عندك البناات يختي دلعي و هشتكي فيهم براحتك. 
تيم بحنق: انا ف ايه و انتوا ف ايه؟! 
ثم وجه حديثه إلي حسناء: انا مش كل مره هضربلي عيلين بسببهم.. لبسيهم كويس. 
رشيدة: ييييييه.. موال كل يوم.. يبني ي حبيبي.. اخواتك صغيرين لسه.. هنخنجهم من دلوجتي ليييه؟! 
كانت حسناء تنظر له بقلة حيله فقالت: ي تيم ارحمني.. ثم صرخت به قائله: مش انتوا رديتوا علي ابوكوا يبني و قال يلبسوا زي ما هما عاوزين دول لسه 6سنين.. اومال لما يبقوا 16ولا 20سنه هتعمل فيهم ايه؟! 
تيم بتلقائيه: مش هيخرجوا من البيت خالص. 
حسناء: لاااا... دنتا واخد العند بالوراثه.. انا تعبت معاك. 

"صباح الخير ي آل داود" تفوه العمده بتلك الكلمات بإبتسامه بشوشه كعادته منذ أن رزقه الله بالأولاد. 
ردوا جميعهم تحية الصباح فسبقهم "تيم" قائلا: 
دلوجتي ي بابا انا كلمتك كتير ف نفس الموضوع و مفيش فايده. 
العمده بتريث: خير ي تيم؟! 
تيم بحنق: بناتك. 
قبّل فتاتاه اللتان تجلسان علي قدميه ثم قال: جولتلك لما تيجي تتكلم عنهم جول اخواتي او "تالا" و "تالين" ماسمهاش بناتك. 
تيم بسخط و نفاذ صبر: ااه الست تالا و الست تالين.. كل يوم دمي بيتحرج بسببهم. 
_ليه.. بيعملوا ايه. 
=مبيعملوش.. المشكله انهم مبيعملوش.. ست الناس اللي بتعمل. 
_مالها ست الناس كمان؟! دي شكوي جماعيه شكلها. 
=زهجت اجوللها و اجوللكوا كلكوا يلبسوا وااسع. 
هز العمده رأسه في يأس ثم قال: لا حول ولاقوة الابالله.. يبني احنا مش اتكلمنا ف الموضوع ده بدل المره عشره؟! عايز ايه تاني؟! 
_يووه و طول ما لبسهم مش عاجبني هتكلم و هتكلم.. يجدعان محدش فاهمني ليه؟! دول لحمي أسيب حد يبص للحمي ازااااي!! 
ابتسم العمده علي غيرة و رجولة ابنه الذي لم يتعدي عمره ال 10سنوات.. 
قالت رشيده: ي حبيبي لحمك مجولناش حاجه.. بس متضيجش عليهم طول الوجت كده.. الرحمه ي بابا. 
حسناء بغيظ: و بعدين ي استاذ تيم الجو حر.. و هما مبيطيقوش الحر و جسمهم بيفور.. اموتهم من الحر يعني عشان سيادتك بتغير؟! 
_أيوة بغير.. أيوة بغير.. 
لا انا نجصان ولا ضعفان 
ولا مسطول ولا سكران
ولا زايغ من عيني الضي
ولا حد احسن مني ف شي 
بس بغير؛؛؛
واللي جالولك غيرة الراجل قلة ثقه 
أو جلة فهم.. خلج حمير.. 
ضحكت حسناء بشده ثم احتضنته قائله: خلاص ي تيتو.. كلو يهون عشان خاطر هشام الجخ بس. 
قال لها في همس: شوفتي؟! حفظتها عشانك دي.. عشان عارف ان ابويا كان بيجولهالك.. 
بادلته الهمس قائله: شاطر ي تيتو احفظ بقيتها بقا. 
رشيده بصوت عالي أفزعهم: واخده الواد تحت باطك و بتتهامسوا بتجولوا ايه ي حسونه؟! 
همت حسناء بالكلام و لكن قاطعها "تيم" ساخطاً يقول: اي يااماا وخداه تحت باطها ده؟! في الفاظ احسن من كده الواحد يجولها. 
حسناء: لاااا.. مع نفسك انت و امك.. انا هولد ف الرابع بسبب نقاركو اللي مبيخلصش ده..انا طالعه اكلم صبا اشوفها اتأخرت ليه؟!

تركتهم و انصرفت و بقوا يتناوشون.. و علي الجانب الآخر يجلس ذلك المتيم يحمل حبيباته علي قدميه. 

        ♕♕♕♕♕♕♕♕♕♕♕

بعد مرور 15سنه.........

_ي بابا انت مش شايف انهم كبروا علي الدلع ده؟! دي الأبله "تالا"خطوبتها الأسبوع الجاي.
العمده:بس ي بأف انت..ولحد ما يتجوزوا و يخلفوا كمان هيفضلوا يتدلعوا.
_والله ده حراام..يعني انت اللي يشوفك كده يجول مخلفتش غير تالا و تالين مع ان في تيم و في انا الوحيد المظلوم ف البيت ده..بلاش التفرقه العنصريه دي.
تالا بضحك:والله ي تامر انت اكتر واحد واخد حقه ف البيت ده..بس هو مسكنه و خلاص.
لترد عليها تالين موجهه حديثها لوالدها قائله:فاكر ي بابا يوم ما تامر ضرب الواد زميله عشان بيعاكس ماما..ثم انفجرت ف الضحك.
العمده بضحك:ااه و يومها اجولله بتضربه ليه ي تامر يجوللي و الشهامه وخداه جووي:انا امي متتعاكسش ف السن ده.
انفجروا جميعهم في الضحك ثم أكمل والده بسخريه:
يعني لو صغيره متفرجش يااك؟!!

"السلام عليكم ي آل داود"
تفوهت بها "صبا"مقاطعه حديثهم فالتفوا جميهم حولها يستقبلوها بحفاوة.
تامر:احباب الرحمن بتوعك فين ي بوبا؟!
صبا بضحك:متقلقش..داخلين اهم.
تامر:أجري أنا بجا أخبي كتبي و حاجاتي بدل ما يعملوهم طيارات و مراكب زي المره اللي فاتت.
العمده:هو ده اللي هاجي اجضي معاكو اجازة الصيف ي ست صبا؟!
صبا:والله يا عمو محمد ما بعرف اخرج بسبب الولاد..
و يمكن لولا خطوبة تالا كمان مكنتش عرفت اجي..مبروك ي توتا.
تالا:الله يبارك فيكي ي بوب..همتك معانا بقا لسه مش مجهزه أي حاجة..مستنيينك لما تيجي.
صبا بمزاح ساخر: ده يوم الهنا يوم المني..عقبال شق الشقايق.
تالين بحالميه:هيييييه..ياارب بقا ي صبا انا زهقت..انا و الواد اتعفننا من كتر الانتظار.

"لاا و تتعفني ليه ي عفنه انتي وهو؟!جابليني بيه وانا اخلصلكو الموضوع خاالص"قالها" تيم" و هو يضربها خلف رأسها بغضب فانتفضت صارخه تقول بفزع: ايه ي تيتوو دخلة ظباط الشرطه دوول؟!
نظر لها بطرف عينه نظره أخرستها و لم يجيبها ثم قال موجها حديثه لصبا:حمدالله علي السلامه ي ام زين.
صبا:الله يسلمك ي تيتوو..ظابطهم انت العيال دي..ظابط ظابط يعني.
تيم بخيلاء:اه اومال ايه انا هنا الكل في الكل.

حمحم والده فقال:بعد الحج طبعا ده البركه بتاعتنا.
العمده:طيب ياخويا..حضر نفسك انت واخواتك عشان مزورناش ستك من زمان.
تمتم الجميع:الله يرحمها.

        🌷🌷🌷🌷🌷🌷🌷🌷🌷🌷
يوم الخطوبه.....

يقف بفخر و زهو يستقبل المدعوين لحفل خطوبة ابنته..يلتف حوله أولاده .
تقف حسناء علي يمينه و علي شماله تقف رشيده..
تيم هامسا في أذنه:ده أبوها ي بابا..كلمه بقا بالله عليك قبل ما يوافق علي العريس التاني.
بادله الهمس قائلا:و يعني ي تيم كل ده مستني و جاي تطلبها لما اتجدملها عرسان..كنت فين جبل كده.
_منا مكنتش حاسب ان ده يحصل..ها هتكلمه ولا لا.
=هكلمه طبعا بس مش دلوجتي.روح انت استجبل صحابك.
تامر:بابااااا.
_همممم..خير ي سي تامر.
=انا عاوز اعرفك علي أبو البت اللي انا هخطبها.
_ليه و تعرفني ليه؟!ابجا اعزمني عالفرح وخلاص.
=متركزش معايا يا والدي..يلا جبل ما يمشي.
_متركزش معايا انت يا تامر الله لا يسيئك و سيبني النهارده انا مش فايجلك.
=كده؟؟ماااشي..بت ي تالين.
تالين:بت اما تبتك ي بأف..انا اكبر منك ب 7سنين يلااا..خليك محترم.
_بأف؟!أنا بأف؟!طب والله لأجول لأبوكي ع الواد...
قاطعته مكممه فمه بكف يدها قائله:صلي على النبي اوومال..عاوز ايه؟!
=تقنعي بابا ييجي معايا لأبو "لينا".
_بسسس كده..من عيوني.

       💛💛💛💛💛💛💛💛💛💛
رشيده بسخط:ما تبطلي بكبكه ي حزينه..دي خطوبه لسه اومال ف الفرح هتعملي ايه لما تسيبك و تمشي؟
حسناء ببكاء:مش متخيله ي رشيده..يتجوزوا و يسيبوني؟!
_سنة الحياة يااما..منتي اتجوزتي و سيبتي بيت ابوكي و جيتي رازيتي في اللي جابونا..قالت الأخيره بضحك فضحكت حسناء ثم قالت:حد كان يصدق اننا نبقا زي دلوقتي كده؟! دنتي بقيتي اختي ي رشيده..
_وانتي كمان ي حسونه ربنا يعلم بحبك جد ايه؟!
العمده:كلتوا دماغي انتو الجوز..ما تشوفولكوا حته حبوا بعض فيها بعيد عني..ياا بااااي.

"اي كابلز عاوزين يرقصوا مع العريس و العروسه يطلعوا معانا ع الاستيتج"...

   في كفه الناس وهي لوحدها في كفه
   وقعت خلاص وقلبي بعدها استكفي
   دي فوق الراس وست الحسن والعفه
    يا ضحتكها ورقتها بكل ما فيها وخداني
    انا بيتها ودنيتها انا معاها واحد تاني
    وحبتها يا غلاوتها وهي معايا وحشاني

    يا ماليه العين يانور بيحلي ايامي
    ياحلم سنين وفاجاه لقيته قدامي
    بقينا اتنين خلاص حققت احلامي

،،،،تمت بحمد الله،،،،،


رواية ست الحسن الفصل الواحد والعشرون والأخير بقلم نعمة حسن
Menna Mohamed

تعليقات

تعليق واحد
إرسال تعليق
  • Unknown photo
    Unknown16 يوليو 2021 في 4:14 م

    رواية رائعة و الله تخيلتها مسلسلا و قد اخترت لكل شخصية ممثلا او ممثلة و رايتها امامي و كانني اشاهدها على التلفاز
    حقيقة برافو على هذا الخيال الرائع
    امتعتيني بها رغم انني قرات الكثير من الروايات في هذا الموقع
    شكرا

    حذف التعليق
    google-playkhamsatmostaqltradent