رواية معزوفتي السرمدية البارت الرابع بقلم لارا عبدالقادر
رواية معزوفتي السرمدية الفصل الرابع
بتاني نهار 7:30 الصبح
صوت هديل الحمام ، ونسمات الهوا الي عم تضرب الشباك بقوة ، وصوت انثوي عم ينده باسمه بنبرة عالية ، حاول يتجاهل كل هالازعاج بالمخدة يلي حطها فوق راسو ، اخد نفس طويل قبل ما يغوص بالفراش من جديد ....
ظهر مقدم البرنامج من بين الاربع مشتركين ، عم يمشي بطريقة مستفزة بتخلي الواحد على اعصابو وهرمون الحماس عندو يرتفع ، ابتسم للجمهور ورجع لف وابتسم للمشتركين يلي معالم وجوههن كانت مزيج من الخوف والامل والتحدي ، قرب المايكروفون لتمو وصار يحكي بطريقة بطيئة مع التشديد على كل حرف ، بطريقة بتخليي الواحد يهز رجليه ويفرك ايديه بقوة ليعرف شو بدو يحكي هالمقدم
مقدم البرنامج: ثواني معدودة بتفصلنا عن اعلان نتيجة المسابقة ، ثوانيي معدودة لنعرف مين هو الحاصل على لقب اجمل صوت ، ثواني معدودة لنعرف مين هو صاحب الحنجرة الذهبية يلي لقى اعلى نسبة تصويت من المشاهدين والحكام
اقترب لعندو واحد واعطاه ظرف ابيض مرسوم عليه ميكروفون مع نوتات موسيقية ، استلم المقدم الظرف بين ايديه والتفت للمشتركين وبكل اعصاب باردة قال:جاهزين لتعرفو مين الفائز والحاصل على اعلى نسبة تصويت
ابتسم ذات الابتسامة المستفزة للجمهور وقال :وانتو جاهزين لتعرفو مين افضل صوت لعام 2020
تعالى صوت صراخ وتصفير وتسفيق الجمهور وكل واحد صار يصرخ باسم مشتركو المفضل او حامل لوحة باسمو او صورتو
فتح المقدم الظرف ببطئ ليحمس الكل ، قرأ اسم الفائر بعيونو ، ظهرو سنانو كلهن من عرض ابتسامتو
مقدم البرنامج: الفائز لهاد العام هو او هي ..
سكت ورجع اخد جولة بنظراتو للجمهور يلي قاعد على اعصابو ، التفت وهو عم يصرخ بصوت عالي :مبروووك لقب افضل صووت للمشترك رقم 23 علي العابد
فتح علي عيونو على الاخر وفتح تمو مصدوم وما عم يصدق ، بدأت دموع الفرح تنمزج مع ابتسامة النصر والفوز ، توجهت جميع الانظار والكاميرات لعلي
....: علي خبرنا شو شعورك بعد ما فزت?
....:علي لمين بتهدي هالفوز?
....:يا ريت تخبرنا مين اول حدا رح تتصل عليه بعد ما سمعت خبر فوزك ?
ابتسم علي للصحافة واعتذر منهم ووعدهم انو حيجاوب على جميع اسئلتهم بلقاء اخر ، رجع عند الثلاث مشتركين يلي كانو معو ، واحد عم يبكي ، والتاني عم يلطم ، والتالتة قاعدة بالارض ورافضة تقوم لاي سبب
علي بمجاكرة واستفزاز : شو يا استاز الكيميا مفكر رح تغلبني بصوت التفاعلات والاحتباس الحراري? وانت يا استاز الرياضيات فكرك رح تغلبني بحنجرتك يلي ما بتعرف شي غير لعنة اللوغريتمات عليك ، الله ياخدك يا مركز دائرة المصائب ? وانت استازة الانجليزي Hello how are you? بعد خبر خسارتك ? هههههههههه
فيقو من حلمو صوت دقات الباب الحادة الي عم تخزق اذنيه ، قام من فراشو وهو عم يتأفف ، نظرو عم يغبش وهو عم يجر بحالو ليوصل للباب ويفتحو ويوقف صوت الدقات ، حس الطريق ما بين التخت والباب متل الطريق مابين الجبل والوادي ، فتح الباب وهو مغمض عيونو ...
ميسم :بدك سنة لتفتح الباب
علي :ليش انتي بتخلي حدا ينام ويتهني بنومو واحلامو
ميسم : بلا لعي فاضيي خلصني تحمم وبدل تيابك لبين ما اجهز الفطور ما ضل كتير وبيرن جرس المدرسة
علي : ويرن ويرن وين المشكلةة حدا فهمك اني بدي اصير انشاتان
ميسم :شو اسمو?
علي:انشيتون اشاتان مدري شو اسمو هاد الساحر الدجال الغبي ما بدي صير متلوو لك افهمي بقى امي انو انا بدرس لارضيكي بس... انا حلمي اكون مغني مشهور
سرح بعيونو يلي صارو على شكل قلوب 😍 وهو يتخيل بحالو عم يغني على مسارح مشهورة ، أو عم يوقع باسمو لجمهورو وفانزاتو
علي : مغني ها مو دكتور ولا مهندس !
ميسم : ييي عليي وعلى خلفتي خلص جهز حالك وانزل افطر
اخد دوش سريع وطلع من الحمام وهو رابط المنشفة على خصرو ، كان عم يدندن بكلمات اغنية بيعشقها على المراية ، غرز اصابعو بشعرو المبلل ورجعهم لورا بحركة عفوية، غمز لنفسو بالمراية باعجاب ، سقط نظرو على سلسلة نوران ، اخدها وحطها جوا الخزانة باهمال ، اخد نظرة أخيرة على حالو بالمراية :لكك يقبرنيي صاحب احلى صوت الف مبارك الفوز يا غالي
لبس تياب المدرسة يلي هنن عبارة عن بنطلون كحلي غامق قريب للاسود مع قميص ازرق فاتح وكرافة بنفس لون البنطلون ، مسك المشط ليسرح شعرو ، صفن بالمشط ثانيتين وبعدا عمل المشط مايكروفون وصار يغني....
قاطع عليه لحظاتو صوت امو عم تصرخ باسمو
علي:ليكنيي جيييتت
سرح شعرو بسرعة ورش من عطرو ولبس ساعتو واخد شنتايتو ونزل عم يركض وهو عم يفرك عيونو من النعس ، قال وهو عم يتثائب بكسل : صباح الخير للجميع
الكل: صباح النور
ميسم : تعال افطر بسرعة عشان يوصلك مراد عالمدرسة قبل ما يطلع على شغلو
صفن مراد بأمو وهو حاطط اللقمة بتمو وزور فيها وصار يكح ، ناولتو لانا كاسة مي بسرعة وصارت تدق على ضهرو
مراد: ما الي يوم واصل البلد بدك تخليني شوفير لحضرتو
ميسم : بطريقك وانت رايح عالشغل بتوصلو عالمدرسة وين المشكلة
مراد:شو شغل ما شغل ما لقيت شغل لهلأ
ميسم : ومكتب المحاماة لمين يا بعدي؟
جاوب مراد بصوت صارم: وكإنا ما حكينا بهالموضوع من قبل مكتب المحاماة ما عاد بدي ياه
ميسم قاطعته : لا تقول بدك تبيعو ..من ريحة ابوك هالمكتب
مراد : لا ما ببيعه بتركو لعلي لما يكبر ويدرس محاماة بستلمو
علي:لا طبعا بدي اكون مغني شو بدي بالمحاماة يا بني ادم
ميسم: لكان شو رح تشتغل استاز مراد
مراد : بدبرلي شغل من رفقاتي
ميسم : وتعبك ودراستك وحلمك لتكون محامي كبير متل ابوك وين راح؟
ضرب مراد ايديه بقوة على طاولة الاكل وهو يصرخ : انا حر هالمصلحة كلها ما عاد بدي ياها والمكتب لو اموت ما بدخلوو .. دايمة عالاكل
حمل مراد حالو وطلع على الصالة وهو معصب ..
علي : خلص امي لا تضغطي عليه هو حر بمصلحتو
لانا باستغراب : ليش يعني شو صاير لحتى رافض المكتب كل هالقد
ميسم بضجر : كلو بسبب هديك السكرتيرة دخلت على حياة ابني و...
جحر علي بامو وقاطعها عن الحكي : امي خلص لا تفتحي وراق الماضي
لانا : شو عم تخبو عني وكإني غريبة بينكن
علي : اعوذ بالله مرة اخي انتي منا وفينا
لانا : لكان شو عم تخبو عني
علي : كل القصة انو في سكرتيرة كانت تشتغل بمكتب مراد ونتحرت لانها كانت تعاني من اكتئاب وحالات نفسية بس مراد مو مصدق هالشي وعم يقول انو في حدا قتلها لهيك .. ممم لهيك
توتر علي وما عرف شو يكمل خصوصا وقت نظرتلو لانا نظرات تعجب ، تابع علي بسرعة : لهيك هو خايف يفتح المكتب يعني خايف حدا يقتلو ، لدرجة انو بعد الحادثة كان يتبول على فراشو كل يوم
فتحت لانا عيونها مصدومة وفطرت ضحك : ههههههههه يا ربيي حاسة اني رح اولد هالكم يوم من ورا نهفاتك يا علي هههههههههه
مسحت لانا دموعها على قد ما ضحكت وفجأة حطت ايدها على تمها وراحت تركض عالحمام ، قام علي عن الكرسي بدو يلحقها وقفتو امو : لا تخاف عادي بصير هيك مع اي حامل
علي بخوف : بس يا امي
ميسم بحدة : قلتلك هاد شي عادي
علي : اي متل ما بدك انتي ادرى بشغل النسوان
ميسم : وملاحظة تانية لا ترش بهار كتير عالمواضيع ماشي يا امي؟
نزلت عن الدرج ركض لعندو ، حضنتو من رجلو وهي مفتحة عين ومغمضة التانية من النعس ..
يارا بزعل : بوبو
نزل لعندها ، رفع شعرها عن وجهها وهو عم يضحك على تصرفها البريء
علي : متى صحيتي
يارا : نوو معك
علي: شو معي؟
يارا : انا معك
علي: تيجي معي؟
هزت راسها بابتسامة : يسسس
علي : لما ارجع من المدرسة بنلعب انا وانتي وعد (قرب على خدها وباسها)
ميسم : مع مين رح تروح ؟
علي: بميل على قصي بنروح سوا
مشي بدو يطلع من الباب ، تزكر شغلة ولف لعند امو
علي : حاولي ما تقولي للانا شي بلا ما يفضحنا مراد ماشي امي؟
ميسم بضحكة : على المدرسة ولاااك
مشي علي برا البيت وهو عم يودع يارا ويضحك ، سكر باب البيت واول ما لف وجهو للباب انصدم بقصي واقف قبالو بالضبط لدرجة وجوههن تلاقت سوا
علي : استغفر الله شو حركات الرومنسية على هالصبح
قصي : اخرااس انت الي ما عم تشوف قدامك
علي: هههههه امشي امشي بلا ما يعلقنا المدير من رجلينا على باب المدرسة
&&&&
ميرا(اخت اسيل) : متأكدة بدك تداومي اليوم؟
اسيل: ليش شبني حتى ما اداوم ناقصني ايد ولا رجل؟
ميرا: مو هيك بس بلا ما تتعبي
اسيل: لا تخافي ما بتعب
قامت ميرا عن سريرها ورفعت راس اسيل يلي كانت عم ترتب بشنتتها المدرسة ..
ميرا : اسيل انتي قوية بتعرفي هالشي صح !
ضمت وجه اختها بكفوف ايديها وهي عم تتبسملها ابتسامة دافية : بعرف
ميرا : لا تخافي الدكتور حكى لبابا انو رح يحددلك موعد عملية بأقرب وقت ورح ترجعي متل اول واحسن
لبست شنطتها واطلعت نظرة أخيرة على حالها بالمراية : إن شاء الله اختي يلا باي
ميرا : والفطور؟
اسيل : باخد معي شي اكلو بالطريق لان تأخرت كتير
ميرا : ماشي روحي موفقة
ابتسمت لأختها وطلعت من الغرفة لعند أهلها بالصالة كانو عم يفطرو
اسيل: امي اعمليلي سندويشة اكلها وانا بالطريق
ام اسيل : ليش مستعجلة بنتي افطري معنا
اسيل : لا تأخرت كتير وما لازم اتأخر اكتر من هيك
ام اسيل : مافي طلعة من البيت افطري يلا
اسيل : هففف اي تمام بس لالبس البوت اول
لبست اسيل البوت تبعها وقعدت على طاولة السفرة مع اهلها ، كل شوي ابوها يسرق نظرة عليها ويشوف حركات وجهها وتصرفاتها وردود فعلها ، كانت هادية تماما وبتاكل بشكل طبيعي ولا كإنو صار معها شي ، يمكن تعودت على الوجع والخذلان او يمكن في نار جواها بتحرق فيها بس هي الها بالمرصاد وعم تحاول تصدها على طول
اسيل : يلا امي هيك بكفي جد تأخرت
ام اسيل:بالتوفيق حبيبتي
ابو اسيل : استني اوصلك بنتي
اسيل وهي عم تفتح بالباب : مافي داعي حابة امشي واتنشط يومكم سعيد باي
ابو اسيل وامها : الله معك
سكرت باب البيت وحطت أيدها على جبينها وهي تطلع عالشمس يلي كانت تصب أشعتها بعيون اسيل السود وكإن النهار أتحد مع الليل بصورة وحدة...
رنت الساعة يلي بإيدها لتخبرها انو الساعة صارت 8:00
اسيل:لاااا تأخرت كتيييير الحصة الأولى بلشت
اخدت نفس وركضت بسرعة عالية ....
بصف الباكلوريا ..
دق..دق..دق
استاز الرياضيات : ادخل
فتح علي الباب وهو راسم على وجهو ابتسامة عريضة وبحدو كان قصي عم يهز برجليه ، اطلع استاز الرياضيات على ساعتو وبعدين اطلع عليهم : كإنو جايين بكير كتير
علي: اي لانو نحنا بنحب النشاط
قرص قصي علي من ذراعو ونحنح بصوت عالي بمعنى اخرس يا علي
علي : قصدي انو اي بعرف متأخرين بس ظروف والله ظروف خلتنا نتأخر
استاز الرياضيات : بدون كزب استاز علي
علي: انت الاستاز يا استاز
استاز الرياضيات : عفواا؟
علي: العفو منك انا ما عم اشتمك انا عم قلك انت الاستاز انا طالب
قصي بتأفف: اللهم صبرني ، استاز انسى كلامو هالغبي تسمحلنا ندخل؟
استاز الرياضيات : بتصدق يا قصي اني كتير بستغرب كيف انسان عاقل بين شلة مجانين ابني طلاع من شلتهم انت بتعرف انو الموجب يلي متلك ازا ضربناه بسالب متلهم بصير سالب
قصي : هههههه لا يعني صح هني مجانين بس والله قلبهم طيب
علي : زعلت منك استاز
استاز الرياضيات بنفاذ صبر : ادخلو هلأ ادخلو
دخلو قصي وعلي الصف وهني يدوروا بعيونهم على يزن واسيل ..
علي: لك وينهم؟
قصي: ما بعرف علمي علمك !
اخد الاستاز ورقة وصار يذكر بأسماء الطلاب الموجودين واحد ورا التاني ليشوف الحضور والغياب ..
استاز الرياضيات: مايا؟
مايا: موجودة استاز
استاز الرياضيات: مجد؟
مجد: موجود استاز
استاز الرياضيات: اسيل؟
رفع راسو يدور عليها وهو عم يكرر الاسم : اسيييل؟
رجع اطلع عالورقة واخد قلم وحط علامة ايكس جنب اسمها وتابع ، : يزن؟ برضو مو موجود اي يالله شو عليي اصفار اصفار
اطلعو قصي وعلي ببعض وصاروا يتهامسوا بصوت واطي ليلاقوا طريقة ينقذوا فيها اسيل ويزن من العقاب
علي بصوت واطي: اكزب كزبة يصدقها الاستاز
رد عليه قصي : حبيبي انا ما بتراجع عن مبادئي بالحياة الا على موتي انت شاطر بالكزب تفضل ابهرنا
علي: هلأ هيك صار الحكي يا ابو مبادئ
رفع علي راسو وقال : تسمحلي احكي استاز
استاز الرياضيات: ازا شي مهم تفضل
علي: يزن واسيل اجو عالمدرسة بكير قبلي وقبلك بس يزن نسي شنتايتو ورجع عالبيت يجيبها واسيل راحت معو وهي كل القصة
ضرب قصي وجهو بأيدو أما استاز الرياضيات اطلع على علي وهو رافع حاجبه : رح تكون محامي فاشل بالمستقبل
علي: ما بدي اصير محامي شبكم عليي من الصبح محامي محامي محاميي قلت الف مرة بدي اصير مغنييي
بالطريق كانت أسيل عم تمشي بطريقها للمدرسة وقت حست بتعب عم يسري بجسمها وبطلت قادرة تكمل مشي أرتكت ع جذع شجرة وحاولت تنظم نفسها قد ما بتقدر فجأة حست وكإنو الأوكسجين نقطع عنها وغبشت الدنيا حوليها وفقدت توازنها ووعيها ووقعت بالأرض...
بهاد الوقت كانت سيارة يزن جاية من نفس الشارع خفف الشوفير سرعة السيارة حتى وقفها على جنب بعد ما لمح بنت مرمية ع الرصيف الشي يلي نبه يزن وسأل الشوفير : ليش وقفت لسى ما وصلنا للمدرسة
جاوبو وهو مخطوف لونو : سيد يزن في بنت وقعانة ع الأرض
مد راسو من الشباك وشاف أسيل نزل بسرعة من السيارة وقلو للشوفير يجيب مي رفعلا راسها وبلش يشربها على مهلو ويطبطبلا ع خدها وينادي بأسمها لحتى بلشت تصحى وترجع لوعيها...
مدلا أيدو ورفعها شوي شوي وساعدها لتركب السيارة وقال للشوفير : بسرعة ع أقرب مشفى
همستلو أسيل: مافي داعي انا صرت منيحة عالاغلب صار معي هبوط من قلة النوم وقلة الأكل خلينا نكمل عالمدرسة
مسكلها أيدها وأجت عينو بعينها رجف قلبها وحست بالنار رح تطلع من خدودها سحبت أيدها من أيدو بسرعة ووضمت أيديها ع صدرها وكأنها بهالحركة عم تحفظ لمسة أيدو بقلبها وبروحها ،، تمنت بهاللحظة أنها تموت آلف موتة ولا تكون قريبة لهدرجة منو وتتعذب بحب من طرف واحد ،،
قطعلها شرودها صوتو وقت قال: أسيل متأكدة أنك منيحة!!
حط أيدو ع خدها ليتأكد أنو حرارتها مو طالعة او عليها سخونة الشي يلي خلاها تنتفض وتحاول قد مافيها تبين طبيعية,,
جاوبتو وهي عم تأتئ : أنا صرت متل الحصان ومافيني شي أذا بدك نزلني وبكمل مشي كمان وشوف كيف بسبق سيارتك
ضحك بصوت عالي وهو عم يقول : هههههههه هلأ أتاكدت انك صرتي بخير لسانك هاد بدو قص وبتكون الدنيا بآلف خير والكوكب بيرتاح من لسانك الطويل
ضحكة بحرقة قلب مخباية ،، بتعرف كتير منيح كيف تورجي الكل أنها قوية وقد حالها وضلت طول الطريق للمدرسة تتصنع القوة وهي أبعد مايكون عنها ..
دخلو يزن واسيل على المدرسة كانت الحصة الأولى منتهية والطلاب مجتمعين بباحة المدرسة ، اطلعو يزن واسيل على بعض باستغراب وكملو مشي ناح قصي ويزن
اسيل: صباح الخير
علي: اي خير ست اسيل؟؟ ليش متأخرين كل هالقد ! عندك علم انك انتي والسيد (اشر على يزن) خسرتو علامات بالرياضيات لانو تأخرتو وما حضرتو الحصة
يزن: ما لقيت كزبة تكزبها تدبرلنا هالقصة
علي: ما مشيت عليه كرة البولينج
اسيل : هلأ المهم ليش مانكم بالصف؟
قصي: الحصة التانية عنا موسيقى والاستاز برضو ما اجى اليوم لهيك طلعونا عالباحة
اسيل: ايواا
على قبالهم كانت رنا قاعدة ع المنصة هي ورفقاتها وعيونها عم تطلع نار وعم تقول بينا وبين حالها ونظرات الحقد والكره متوجهة لمكان مو واقف يزن ورفقاتو : ههههه يا حرام شو مبين الذل بوجهو
بنفس الوقت التقت عيونها بعيونو وكانت نظرتو لألها سودة بكل ماتعنيه الكلمة من معنى وكأنو عم يقلها : أنا تمرمطيني بالمخافر وصير فرجة ل يلي بيسوى وما بيسوى
وهمس بصوت مسموع وهو عم يكز على اسنانو: والله لخليكي تحرمي تطلعي بوشي طالما أنا عايش وعم اتنفس لخلي راسك تحت صرمايتي
سمع قصي كلامو وقلو: أهدى يايزن ماتنسى أنك كاتب ع حالك تعهد وأي غلطة رح تشرف ع المخفر ويضيع مستقبلك كبر عقلك وشيلك منها بتضل بنت يااخي
علي : أما شو بنت عليي الحلال احقر من مرة ابوها لساندريلا
بلع ريقو وتابع بصوت واطي : بس والله حلوة كتير بتنحب يعني الي بشوف شكلها مستحيل يصدق افعالها
ضربتو أسيل ع راسو خلتو يبلع بقيت كلامو وهي عم تقول : حبك برص وعشرة خرس أستاذ علي وليش ليحبها بقى مو شايفها كيف رافعة مناخيرها متل كأنها شامة ريحة مو حلوة لعمى اذا فيك نظر
رد عليها علي: من غيرتك عم تحكي هيك كل بنت بتشوف بنت أحلى منها بتطلع فيها القطط الفطسانة وبتدور ع عيوب من تحت أضافيرها كأنو هلأ طلعتها من مختبر العلوم قسم التيلسكوب او الميكرسكوب ع قد ما بتكون مستخدمة بفحصها عيونها بدقة خرافية
ردت عليه أسيل بعصبية : انا بدي غار من هي فشرت بنص عينها غار منها لما بيغار الواحد لازم يغار من شي عليه القيمة
تأفف قصي واطلع عليهم تنيناتهم باستياء: ما بدكم تسكتو انتو الجوز؟
اسيل : انا عم دافع على يزن مو متل هالغبي (واشرت على علي) عم يتغزل بهالكلبة
قصي: على سيرة يزن وين اختفى !!
اسيل: يووه لك هلأ كاان هون
علي: انا بقول الحقوه قبل لا يعمل شي غبي متلو
كان رح يتحركوا يدوروا على يزن قبل لا يستوقفهم صوتوا عم ياكل شيبس بصوت مستفز ...
قصي: نحنا خايفين عليك وانت رايح تشتري شيبس!
اسيل: وانا الغبية يلي فكرتك هلأ حابس رنا بشي غرفة وعم تفصل اعضاءها عن جسمها
يزن: قلتلكم لما بدي انتقم من رنا ما بنتقم منها بالمدرسة
قصي:يعني حضرتنا لازم نصير عندك كاميرات مراقبة عشان نراقب غباءك لننقذك منو
يزن: وانتوا شو دخلكم ولوو
اسيل: عفواا؟ شو قصدك بشو دخلنا !! ازا ما خفنا عليك على مين نخاف
علي: ما بلزم نخاف عليه عندو امو بتحرك العالم كلو بإصبع واحد
يزن: ههه امي هي الام والاب وجيش الدفاع والحماية
علي باستفهام : ابوك لهلأ ما رجع!
يزن: ولو رجع ما رح اعترف فيه ، تركني وترك امي من ٤ سنين وسافر برا البلد ما عاد يلزمنا
علي: وشو بإكدلك انو تركك
يزن: كلشي بتقولو امي صح
.
بهاد الوقت وصلت نوران على باب المدرسة وهي متوترة اطلعت على ستها والدمعة مغرغرة بعيونها وهي عم تتذكر كيف يارا كانت بتتمنى دائمآ تشوفها متفوقة ومن الاوائل
دخلت هي وستها على باحة المدرسة لمحت نوران علي عم يضحك مع رفقاتو شدت على قبضة أيدها كان بنفسها تروح تمعط شعراتو شعرة شعرة
نوران : ستي هيو هاد الحقير السراق الحرامي يلي اخد السلسة تبعي
فاطمة: لا تقولي بدك تبهدليه هلأ
نوران: لا طبعا البهدلة شي قليل بحقو بدي اضربو بوكس يكسر عظامو
فاطمة: أقل ما فيها انطري لاسجلك بالمدرسة مو قبل ما تسجلي تعملي مشكلة ووقتها يقولو هالبنت مشكلجية ما بدنا ياها
نوران: امشي ستي على غرفة المدير بسرعة ازا بضل هالغبي قدام عيوني بفقد السيطرة على حالي
راحوا لعند إدارة المدرسة .. دق .دق ..دق
المدير : تفضل
فاطمة: يعطيك العافية حضرة المدير انا يلي حكيت معك على الموبايل امبارح
المدير: اي عرفتك تفضلي ارتاحي
ابتسمت فاطمة وقعدت على الكرسي يلي قبال مكتب المدير وبحدها قعدت نوران يلي كان كل تفكيرها محصور بعلي والسلسلة
فاطمة: تفضل هي كل الأوراق يلي طلبتهم مني
نوران عم تحكي بينها وبين نفسها : معقول السلسة ما تكون مع هداك الغبي وتكون ضايعة لا يربي لاا والله بنتحر ، خلص خلص ما رح افكر بطريقة تشاؤمية أنا متأكدة انو الحرامي هداك سرقها اكييد هيك ورح يرجعلي ياها غصب عنو والا بطلع بروحو وبرسلو للسما السابعة
ابتسم المدير : ومن هلأ فيكِ تبلشي أنسة نوران ، دوامك رح يكون بشعبة الباكلوريا
فاقت نوران من سرحتها وقالت : ها ؟ بعتزر شو كنت عم تقول ما سمعت
المدير: دوامك حيكون بشعبة الباكلوريا
نوران: اي تمام شكرا استاز وين صفي بكون؟
المدير: موجودين هلأ بالباحة لأن استاز الموسيقى غايب انزلي عندهن اتعرفي عليهن
فاطمة : شكرآ كتير ألك وان شاء الله نوران حتكون عند حسن ظنك
ابتسم المدير واشرلهن بايده ليتفضلو , طلعت نوران وستها من غرفة المدير على الباحة ودعت نوران ستها يلي رجعت عالبيت وهي توجهت لعند علي وهي تحكي بعقلها : طلعت بصفي كمان والله والله لاندمك على اليوم الي خلقت فيه ورح رجع الشي الوحيد يلي تركتلي ياه يارا من بين عيونك
وبينما هي عم تحكي مع حالها وتسب عليه شافتو من بعيد قاعد وعم يشوبر بإيديه ويحكي وهو يقلهن لرفقاتو: شفتوا كيف بقدر أقرأ العيون أي لكن أنا المعلم
نوران فرطت ضحك عليه وهي تتزكر شكلو وقت كان معلق على شباك بيتها ويحلفلها بالغالي والنفيس انها بدها مساعدتو ،، بعدين رفعت راسها وحطت العقدة بين عيونها وركضت لعندو
علي مندمج : وهلأ أنا متأكد أنو أنت مخبي شي عني ليكني شايف شايف
ما لحق يكمل الجملة إلا حدا شاحطو من بين الكل وهو مصدم مو فاهم شو عم يصير ، شحطتو نوران لمكان بعيد عن العجقة اطلعت بعيونو بكل ثبات وقوة وبلشت تصرخ بوجهو
نوران : أنت كيف بتسمح لنفسك تاخد شي مو ألك لك أنت شو اه ، بتعرف أنك شخص قليل ذوق و حرامي
علي لساتو بحالة الصدمة وهي عم تصرخ اطلعت فيه وبلشت تلوحلو بإيدها الصغار : هيي أنت عم احكي معك يا أخ
صحي علي على حالو بس تزكر وين شافها لنوران ..
علي : لك أنتي كيف بتسمحي لحالك تحكي معي هييك وتحكي عني سراق قدام رفقاتي شو عملتلك بالله؟؟
نوران : أنت أخدت السلسة تبعي وهربت
علي : أنا ما أخدت شي أنتي رميتي السلسة عليي أصلآ انا لازم عصب كيف بترميها بوجهي
صفن علي شوي وبعدين تابع : بعدين انتي مو كنتي مكسورة ؟
فقدت نوران أعصابها وضربتو كف خماسي الابعاد على رقبتو : أنا هلأ بدي السلسة هلأ يلا أحسن ماجبلك الشرطة
حط علي ايدو مكان الضربة وقال : ما بسمحلك تضربني لك هاد فوق ما كنت بدي ساعدك هداك اليوم اصلا سلسلتك ما بعرف وينها وما بهمني وينها
نوران بصدمة : شووووووو ما بتعرف وين السلسة!
وقعت نوران على ركبها وهي تبكي وتقول : وينها بترجاك هي أخر شي ضللي من اختي
زعل علي على حالة نوران وصلح الموقف فورا : امبلا هي معي بس مو هون بالبيت بكرا بجبلك ياها
قامت نوران عن الأرض ومسحت دموعها وقالت : مو مشكلة برجع انا معك عالبيت وباخدها منك اليوم لاني سجلت بهالمدرسة
علي: اي خلص لكان اتفقنا
رن جرس الحصة التالتة وطلعوا الطلاب على الصف يستعدوا لحصة اللغة الإنجليزية ...
دخلت الانسة عالصف بعد ما صبحت على الطلاب
الانسة : صباح الخير للجميع
الطلاب: صباح النور
أشرت الانسة على نوران وقالت باستفهام :طالبة جديدة؟
نوران بابتسامة: اي
الانسة: اهلا فيكي يلا طلاب جهزو كتبكن وافتحوا على درسنا
فجأة طالب من غير صف بيدق ع الباب وبيقول : فرقة النجم الساطع مطلوبين للإدارة فورا
وقفو الشباب وأسيل وطلبو إذن من الانسة وطلعو برا الصف ، وهني عم يمشو وقف قصي قبالهم وقال : استنو شو المصيبة يلي عاملينها هالمرة
اطلعو يزن واسيل ببعض وبعدها اطلعو مرة وحدة بعلي لأنو معروف أبو المصايب وأمها ...
عقد علي حواجبو وقال: شبكن عم تطلعو فيني مو ناقص غير تدبحوني او تعلقو مشنقتي كل الوقت معكن منين ياحسرة المشاكل ناشفة القصص عالأخير ليل نهار عم أدعي الله يبعتلي مشكلة أعملها او شي مقلب اتبلى فيه ع خلق رب العالمين ماكانت تظبط معي
رد عليه يزن وقلو : أمشو خلونا نشوف المدير أحسن من كل هالعلاك المصدي حاكم انت بس تفتح تمك لتردح فشر استاز الرياضيات قدامك
تابعو طريقهم ودخلو ع غرفة المدير بعد ما استأذنو ،رحب فيهون وقال: اتفضلو ارتاحو رح فوت بالموضوع دغري اي شباب حكولي كنتو عم تتدربو بالعطلة منيح او لا ؟
قصي : انا ليل نهار حاضن جيتاري وعم اتدرب ومستواي صار ممتاز
علي: انا بدك تجي تسكن ببيتنا كم يوم تانيات بيهجو اهل البيت والحي او بيحطولي سم فيران او بتلاقيني مربط بشي زاوية ومسكر تمي ومكتوب ع صدري ممنوع الغناء حتى إشعارٍ آخر لأن صاحب هالصوت ما عم يسكت ابدا
المدير: اي برافو وانت يزن؟
يزن: بتصدق والله نسيت كم زر أبيض وأسود بالبيانو صرلي زمان ما أتدربت
أسيل: وأنا نفس الشي كنت تعبانة وما قدرت أتدرب أبدا
المدير:طيب يلي رح يصير أنو رح تكثفو تدريبكون لأنو في مسابقة دولية والأستاذ تغير وأجى بدالو استاذ تاني والشي التاني أنو في شب هلأ ناطركون بغرفة الموسيقى هو عازف كمان ورح ينضم لفرقتكون ورجوني إبداعكون بدي المدرسة تاخد المركز الأول يلا موفقين ياشباب
طلعو من غرفة المدير ويزن عم يقول : لك علي كنت أطلوب من ربك شي مليون ليرة هي أجت لعندك أحلى خناقة تطفيش للشب الكيوت عازف الكمان
ضحك علي ضحكة صفرا وقصي ضرب ع راسو وقال : أنو شو مشانكن انتو مارح تبطلو مشاكل هي عأساس أنتو فنانين ولازم تكونو حساسين ومرهفين المشاعر والله ماعندكن جنس الإحساس
ضحكت أسيل ضحكة ناعمة وقالت: دخيل أحساسك سيد قصي يلا شباب خلونا نطفشو عالسريع ونبلش تمرين حاكم فرقتنا ما بتوسع الا ٤
دخلو ع غرفة الموسيقى ولاقو شب شعرو ناعم طويل وكلو شبر ونص بلش علي فيه : شو يابطة سمعنا أنك عازف كمان
شدلو شعرو بقوة ورماه لعند يزن ، ويزن قرب عليه وسحبو من أيدو وحطلو ياها ورا ضهرو وقاللو : كلمتين أحسن من عشرة بتحمل حالك وبتنسحب مو بس من الفرقة لأ من المدرسة كلها وإلا رح عيشك عالشوربة شهر وحرمك تستعمل أيدك مو لتعزف بس لاااا لتحك أنفك فيها حتى شو قلت؟
رد الشب وهو عم يتأتئ : أمرك كل كلامك مسموع بس أتروك أيدي عم توجعني حرام عليك
دفشو يزن ووقعو عالأرض ، حمل الشب كمانو وغراضو وطلع ركض من المدرسة وهو عم يتلفت حوليه من خوفو يكونو عم يلحقوه والشباب وأسيل فارطين ضحك عليه وقصي عم يضرب كف ب كف ويقول : مافي أمل منكن ، بحياتكن مارح تصيرو عاقلين منه العوض وعليه العوض ..
تابع الفصل التالي عبر الرابط: "رواية معزوفتي السرمدية" اضغط على أسم الرواية