رواية معزوفتي السرمدية البارت الثالث عشر 13 بقلم لارا عبدالقادر
رواية معزوفتي السرمدية الفصل الثالث عشر 13
وبغرفة الطوارئ كانت إكرام عم تبكي بحرقة والبنت يلي عم تجهزها عم تتأفف بصوت أقرب للجنون وهي تقلها بنفاذ صبر : كرمال الله يا خانوم خليني كمل شغلي بطلي بكى صرلي ساعة عم أمسح الميكاب وارجع أرسمو هيك ما منخلص عالوقت وأكيد فريدة خانوم رح تعصب
إكرام : مابدي كرمال الله فكيني خليني أطلع ما بقول لحدا
وبين كل كلمة وكلمة كانت تشهق وترجع تبكي وتخرب مكياجها من أول وجديد ،،،،لحتى سكتت أول ما سمعت صوت موبايلها بيرن ،، كانت نسيانتو من كتر مو مقهورة ،، وقفت بكى واتطلعت بالصبية بترجي وقالت : بترجاكي عطيني الموبايل والله ما بقول لأمي أمانة حبابة انتي
راحت البنت لعند الشنتاية وقرأت أسم المتصل بصوت عالي : أسيل عم تتصل !
قالت اكرام والامل عم يشع بعيونها : اعطيني لأحكي معها بترجاكي
كسرت بقلبها وفتحت الخط وسمحت لاكرام تحكي معها وقبل ما تنطق اكرام حرف كانت أسيل بالطرف التاني عم تصرخ وهي معصبة منها ومن مواعيدها الزفت
أسيل : وينك ياخانوم يا برنسيسة كم ساعة لازم نستنى جنابك خبريني وين صرتي لأفرشلك الأرض سجاد أحمر وجهزلك أكليل الورد..
قطعت كلامها وقت سمعت صوت إكرام عم تبكي وتشهق ومو قادرة تنطق حرف ..
أسيل : إكرام شبك شوفي وقعتي قلبي شو صاير معك
خطف يزن الموبايل من اسيل اول ما شاف الخوف اعتلى ملامحها وفتح سبيكر ليسمع منيح شو صاير معها
إكرام : كرمال الله يا أسيل تعالو ساعدوني انا محبوسة بالشركة عند أمي ومربطتني بالكرسي وما عم تخليني أطلع وبدها احضر الحفلة غصب من عني
بلعت ريقها وكملت كلامها بصعوبة: وفوق هيك بدها تفصلني من المدرسة وتاخدني معها على فرنسا بترجاكن كل احلامي رح تدمر ومستقبلي كلو رح يخرب بترجاكن تعالو خدوني من هون
أسيل : أهدي إكرام وعطينا عنوان الشركة ومسافة الطريق منكون عندك حاج تبكي حرقتي قلبي
اكرام : موقع الشركة ***** بشارع****
اسيل: اي تمام ديري بالك على حالك لنوصل
صرخت اكرام فجأة : قصي قصي قصي
استغربت أسيل والبقية وقصي انصدم وفتح عيونو ع آخرهن ،، قالت أسيل : شبو قصي
وقبل ما ترد سكرت اكرام الخط وتركتهن محتارين وخايفين بنفس الوقت..
بعد ما تداركوا صدمتهن قال يزن وهو أول حدا بيكسر حاجز الصمت : يلا شباب شكلنا عنا مغامرة جديدة لإنقاذ الأميرة بس الله يستر شو رح يصير فينا تحت أيدين الملكة الشريرة الله يرحمنا سلف
ردت عليه أسيل : ماتتحمس كتير ياطرزان شكلنا رح نوقع بمصيبة
مشي يزن عند سيارتو واشرلهن ليركبوا معو وانطلقوا ....
........
متل المجانين كان محاوط راسو بإيديه وعم بمشي بالغرفة وهو عم يصرخ ،، وكل شوي يوقف يسعل وكأنو روحو عم تطلع عالبطيء ويرجع ياخد نفس بصعوبة ويرجع يسعل من جديد ...
وقف قبال المراية المكسورة من كل الجهات الموجودة بالمحجر وهو عم يصرخ بصوت عالي : الله يلعنني الله يلعنني دمرررت حياتي بسبب غلطة غلللطططةة غلللطططةةةةةةة
ضم ايدو وضربها بقوة بالمراية لتنزل شقف عالارض ملونة بدمو ،، اتطلع على ايدو يلي كانت عم تغرق بالدم ورجع يصرخ ويبكي مع بعض وهو يقول : الله لا يرحم روحك يا ايمان الله لا يرحم روحك دمرتي حياتييي
سقط عالارض منهار وهو عم يتزكر تفاصيل كلشي صار معو ...
فلاش باك قبل ٤ سنوات ..
كانت نايمة عالتخت وهي لابسة قميص نوم أبيض شفاف وضامة شرشف التخت على حالها وعم تبكي بحرقة
ايمان : شو يعني هالحكي سيد ياسر !! شو يعني مرتك عرفت عنا !
ياسر: اشكري ربك انها ما بتعرف اننا متزوجين وصلي كمان لأنها ما بتعرف انو عنا بنت ولا كان دفنتنا ونحنا عايشين
ايمان: وشو يعني هالحكي وين الغلط
ياسر: ايمان لا تجلطيني بقلك سارة عرفت بتعرفي شو يعني سارة وبتعرفي شو يعني عرفت
ايمان: انا عارفة انها عرفت بس انت على شو عم تلمح؟؟ اعتبرني جاهلة وما بفهم واحكيلي على شو عم تلمح؟
ياسر: بكل بساطة بدك تنكري انو نحنا متزوجين وتاخدي بنتك وتسافري لبرا وما عاد بدي اشوف وجهك
شالت الشرشف عن حالها وقامت عن التخت بفزع وقالت وهي عم تلبس الروب : عفوا عفوا عفوا؟؟ بنتك !! وكأنها مو بنتك كمان
ياسر : ازا الموضوع تعقد كتير فبتصير اي مو بنتي ما بعترف فيها عادي أساساً وجودها اكبر غلطة وانتي عارفة اني تزوجتك عشان حضرتك كنتي حامل وما خبرتيني
صرخت بوجهو وهي مصدومة من كلامو : ياسر انت صاحي على حالك شو عم تحكي ؟؟؟؟
ياسر: انا أساساً هلا صحيت على حالي
حطت ايديها على ذانها وصارت تصرخ بعصبية متل المجانين : خلص خلص اخرااااس ياسر اخراااس ما بدي اسمع اهانة تانية من تمك
حط ايدو على تمو عم يمثل الصمت وقال : هي سكتت بس يلا جهزي تيابك وتياب ياسمين لأحجزلكن طيارة بسرعة
ايمان : هههههههههههه انت مصدق اني رح ارد عليك ؟ ياسر انا رح افضحك ياسمين بنتك عم تفهم بنتكك ورح اخلي كل العالم تعرف هالكلام
ياسر : ما عم اناقشك ايمان انا بعمل هيك لمصلحتك ومصلحة ياسمين أساساً انتي عارفة انو سارة بتقدر تدعس عليكي وكانها بتدعس على حشرة
نهارت عالارض وهي تبكي : حراااام عليييك حراااام علييييك
ياسر: قومي جهزي حالك هلأ عندك وقت طويل تبكي فيه بعد ما تسافري
ايمان : والله رح ادعي عليك من قلبي يا ياسر الله لا يسامحك الله يحرق قلبك متل ما حرقت قلبي وكسرتني
ياسر : ادعي على يلي كان السبب انا ما دخلني
ايمان : انت ما دخلك ،، هه ازا انت ما دخلك مين السبب لكان
قال ياسر وهو عم يشد عسنانو بعصبية : يااارا بنت الكلب هي عبت براس سارة هي يلي قالتلها كلشي هي يلي فضحتنا
ايمان: يارا رفيقة اختي امال ما غيرها ؟
ياسر: هي بذاتها ،، يلا جهزي حالك واسبقيني على فندق نجمة البحر انا هناك بلاقيكي
كانت ايمان عم تضب تيابها بالشنطة وهي عم تبكي على حالها وعلى بنتها يلي عمرها لسا ما تجاوز ال٤ سنين ،،وكل شوي تصفن بالخزانة وتسب على يارا بحقد وتكمل ضب التياب ..
بااااك عودة للواقع..
رجع يصرخ ياسر والندم عم يفتك فيه : كنت عايش متل الملك انا دمررت حاليي انا دمرت حالي الله يلعني ويلعن روحك يا ايمان دمرتيني ...
..........
وبجو من السعادة المزيفة والمظاهر الخداعة كانت الحفلة اشبه بشي خرافي ما بقرب للحقيقي ابدا ،، كل شي موجود بيحلف انو فريدة خانوم هي ست من عمل مناسبات وحفلات،،،،، وعطول أي شي بيكون بيحمل أسم مؤسساتها او شركاتها بيكون كامل متكامل متلها بنظر العالم الها بس بنظر بنتها هي أبعد ما يكون عن إتقان دور الأم او حتى الصديقة او المديرة لحياة اكرام يلي كانت قاعدة بالحفلة وعم تنظر لأمها بتشفي وبضحكة صفرا حاملة غل وقهر كل السنين يلي كانت فيها متل لعبة الماريونت بين إيديها...
قربت فريدة ناحها وهي مستغربة من ردت فعلها بعد صراخها وبكاها يلي عبى الشركة قبل كم ساعة ،، سالتها باستغراب: شو إكرام طق عقلك لحتى عم تضحكي لحالك متل المجانين
قالت إكرام وهي عم تحكي بصوت عالي لتجاكر أمها : شو ليكون الضحك كمان ممنوع وبيخلي صورتك بمجتمعك المخملي مهزوزة وبيشرشحك قدام الطبقة الراقية
حطت فريدة إيدها ع تم إكرام كرمال تسكت وما تفضحها قدام المعازيم وهمست ب إذنها : خرسي ما بدي أسمع نفس منك فاهمة
ابعدت عنها وهي عم تطلع عليها بطرف عينها وتابعت : أكيد مانك عم تحضري شي مصيبة تخليكي تندمي كل عمرك عليها صح ؟
هزت إكرام راسها بالنفي وهي محافظة على ضحكتها المستفزة وراحت ناح شباك قاعة الأحتفالات وهي عم تقول بقليها : مصيبة كبيرة ورح تخلي حفلتك مهضومة وفيها روح
ضحكت لما تذكرت شو عملت قبل كم ساعة ....
....فلاش باك ....
أول ما طلعت الميكب أرتيست من عندها خطرت ببالها فكرة جهنمية بتنقذها من بين ايدين امها .. اخدت موبايلها يلي سرقتو من بين ايدين الميكب ارتيست وبعتت فويس مسج ل أسيل وهي عم تبكي عم تحكي فيه : ما تجو هلأ ما تجو امي ما رح تسمح لحدا يدخل ،، تعالو بعد التسعة بكون الحفل بلش رح اكون بالطابق التاني بقاعة الاحتفالات امانة ما تتركوني هون لحالي تعالو خدوني امانة بترجاكن
عالساعة تسعة تماما وصلو الشباب والصبايا عالشركة وهنن لابسين تياب مناسبة لهيك مناسبة إجتماعية وهيك مجتمع راقي ومتل ما قالت إكرام الحراسة كانت قليلة لأنو أغلب الحراس كانو مستنفرين حوالين فريدة والقاعة كرمال يكونوا متل ظلها لإكرام وما تفكر مجرد تفكير بالهرب ....
عمل يزن حركة بسيطة ل يلفت نظر الحراس عالباب والبقية طلعوا عالحفلة واول ما وصلوا وشافتهن اكرام ضحكو عيونها وعطول حضنت إكرام قصي وهو مصدوم بعد ثواني تداركت موقفها وابعطت عن قصي وحضنت أسيل وهي عم تلعن غبائها وقلبها يلي بيخليها تعمل شغلات مو منطقية..
قال علي : يلا الجو هون خنقة خلينا نمشي بلا ما نلوث الجو المعقم والمنمق يلي عم يطير بكل أطراف القاعة
قبل ما يطلعو من القاعة عين فريدة مسكتهن فورا واعطت أوامر بتسكير كل بواب الشركة ،، ركضوا وكأنو عزرائيل لأحقن وبدو يقبض روحن ...
كان فستان اكرام وكعبها مانعها تركض منيح لهيك سحبها قصي لجنب بعد ما اشر لعلي واسيل يكملو ركض لعند يزن وهو نزل لعند رجلها يشلحها الكعب ورفعلها فستانها لتمسكوا بايدها وتعرف تركض ،، واول ما اكرام مسكت الفستان شرطتو بايديها ليصير اقل من ما كان عليه بكتير
اكرام : والله امي لتشرط راسي متل ما شرطتو
ضحك قصي واشرلها بيعنو ليكملو ركض لعند الباقيين ،، بس ما يقدرو يوصلوا لعندهن لانو الحارس مسكهن وثبتهن وسحبهن لتحت بامر من فريدة ،، واول ما وصلوا لقو الباقي ممسوكين متلهن تماما متل كأنهن عصابة ونمسكت بالجرم المشهود ..
وبهالثانية وصلت فريدة وهي حاملة كاس مشروب وعم تقول بصوت وبنبرة مستهزءة : برافو إكرام خانوم يابنت الحسب والنسب هدول رفقاتك الشراشيح يلي بايعة الدنيا وشاريتيهن
التفت علي بخفة من الحارس ورمى كاس المشروب ع فريدة وهي جن جنانها وصارت تصرخ عليه وبعدها وجهت صراخها وعيونها يلي عم يطلقوا شرار لعند اكرام وتابعت : مبسوطة بهدول الهمج والله لخليكي تبكي دم وتطلبي الرحمة وما تلاقيها رح تندمي وربي لندمك
هون يزن ما تحمل عقلو ورد عليها بكل سفاقة وقلة أدب : الندم رح يمص دمك وانتي ختيارة كركمة قاعدة بزاوية الغرفة ومافي لا فرو ثعلب رح يدفي روحك ولا مصاري رح تكون جنبك وتحن عليكي يا مدام يلي لقب أم أربعة أربعين كتير عليكي مو أم وتحت رجليكي الجنة أنتي جهنم بذات نفسها
فتحت فريدة عيونها ع آخرن والكل عم يضحكوا من رد يزن عليها وهي شاعلة النار فيها من ردو السوقي وبتقلو: أنت بلا ترباية وبلا أخلاق مارح أحكي أكتر من هيك ،، لانو الحكي كتير عليك
ورجعت نظرها لعند إكرام وبتقلها بصوت مافيه حياة وبارد متلها : إكرام أنتي بدك تطلعي من هون وتروحي معهن؟
هزت إكرام راسها بمعنى إي وبعدين بتبلع غصة بقلبها وبتكررها بعد ما تطلعت ب قصي وحطت أيدها ع قلبها وهي عم تقول بينها وبين حالها : بليز ما تخذلني رح بيع الدنيا كرمالك كون سندي متل ما كنت زمان
رفعت راسها وجاوبت بصوت عالي : اي فريدة خانوم بدي اروح معهن
ردت فريدة بنفس النبرة : بس طلعتي من هون اعتبري حالك يتيمة ومارح تطولي مني فرنك واحد وأبقي نامي بالشارع وكلي من الزبالة .
انصدمت إكرام بكلام امها يلي متل السيف واحد كمان ،، قسوة قلبها يلي ما في متلها بالكون خلت اكرام ترجع بذاكرتها لسنين قديمة مع أمها وكأنو الذكريات اتفقو مع فريدة ليكون هاد أسوء يوم بحياتها
..... فلاش باااااك.....
كانت اكرام عم تغني بالمطبخ والمربية تبعتها عم تسمعها وعيونها عم يدمعو من بحة صوتها ودفى إحساسها ...
خلصت اكرام الغنية وقالت وهي عم تنطر رأي المربية وقالت : شو قليلي كيف صوتي حلو او لأ امانة
بهالثانية دخلت فريدة وجاوبتها بكل قسوة : صوتك بيجيب الضغط وبيوجع الراس ياريت تنكتمي لبقية حياتك او تحطي شي هدف براسك أحسن من هاد الجعير يلي مفكرتيه غناء روحي أقرأي شي كتاب عن إدارة الأعمال احسن من هاد العلاك المصدي شو أخرتو رح تشتغلي بشي كابريه تغني للسكرانين والعالم وهنن عم ياكلو انتي بنت أكابر لاقي شي هواية كلاس مو شي بلا فايدة
خلصت فريدة كلامها وطلعت ولا كأنها عملت شي ولا كأنها كسرت شي ببنتها ما ممكن يتصلح ،،، كانت الدموع عم تنزل ع خدود إكرام بدون صوت كسرتها وكسرت فرحتها
....باااك عودة للواقع....
نزلت دمعة من عيون اكرام وقالت وهي توجه عيونها لامها بتحدي: رح اسكن مع قصي وما بدي منك شي لأنك بالأصل ما عطيتيني شي يا أمي.
تفاجئ قصي بكلامها بس ما حب يكسرها لانو يلي عملتو فيها امها كان بكفيها ،، مسك ايدها وقال بصوت معبى تحدي : أهلا وسهلا بتنوري بيتي بيتك وعحسابك البيت وصاحبو .
سحبها معو لبرا ولحقوهن الباقي وطلعو برا الشركة وقبل ما يوصلو الباب قالت فريدة بصوت عالي : رح ترجعي يا إكرام ووعد مني لخليكي تقضي حياتك عم تعضي أصابعك ندم ..
قال يزن وهو عم يفتح باب السيارة : اكرام تسمحيلي اسبها لامك ؟
مسك قصي معصم ايدو ليزن وقال وهو عم يجحر فيه : اخراس يزن
.......
بتاني نهار وبيت نوران كانو الكل مجتمعين حولين طاولة الفطور وناطرين فاطمة لتجيب الخبز ويبلشو أكل ،، وصلت فاطمة وهي حاملة بايدها الخبز وقالت وهي عم تطلع على آمال وياسمين ونوران : يلا بسم الله بلشو
كلهم بلشو بالأكل الا نوران يلي كانت صافنة وهي حاطة ايدها تحت خدها مسكت ستها أيدها وقالتلها بصوت حنون : شبك يا بنتي ما تاكلي هلأ ببتأخري عالمدرسة
تلبكت نوران وابتسمتلها بحب وهي من جوا محتارة ومو عارفة كيف بدها تنفذ يلي ببالها تنهدت وكأنو هموم الدنيا كلها على راسها وقالت : مافي شي ياروحي يلا ليكني رح بلش بس بدي قلك أني مو راجعة اليوم بعد المدرسة معزومة عند رفيقي عالبيت
عقدت فاطمة حواجبها وهي عم تركز بملامح نوران وتقرأ تعابير وشها المو واضحة أساسا وردت : طيب يابنتي انا ما رح آسر حريتك بس انتبهي عحالك ما بدي مسلسل يارا يتكرر ونعيد نفس المآساة قلبي ما بيتحمل
باست نوران راس ستها وقالتلتها : لاتخافي ستي
قالت آمال وهي حاطة قناع البراءة : وانا كمان عندي محاضرات كتير وبدي اتأخر فيني خلي ياسمين عندك
ابتسمت فاطمة وقالت وهي عم تطلع على ياسمين : معناها اليوم رح نعمل انا وياسمين اطيب كيكة
طلعوا نوران وآمال كل وحدة ل وجهتها وضلت فاطمة لترتب البيت وتهتم ب ياسمين فجأة بتلمح شنتاية آمال عالكرسي بتضرب أيدها ع صدرها وبتقول ل ياسمين : شكلها خالتك نسيت شنتايتها رح ألحقها اكيد رح تكون بحاجتها وانتي كوني عاقلة واهتمي بحالك من هون لأرجع ماشي؟
هزت ياسمين براسها بمعنى أي ..
وطلعت فاطمة عالجامعة وبس وصلت سألت المسؤول ع آمال الماهر وانها عم تدرس تخصص هندسة
رد المسؤول وهو عم يفقد بالاسماء : مافي طالبة بهالأسم
ردت : تأكد الله يخليك
رجع المسؤول يدور بالارشيف وقال : أي صح خالة كانت موجودة بجامعتنا وبطلت من سنين
قالت بذعر : اه ء اي تمام شكرا غلبتك
طلعت من الجامعة والأرض عم تفتل فيها ومصدومة ومو عارفة شو تعمل كانت عم تمشي وهي عم تضرب اخماس بأسداس مين هالبنت ؟ وليش عم تكذب أنهاطالبة جامعة ؟ أنا مين مسكنة ببيتي ؟ ياربي لازم أعرف كلشي عنها .
وصلت عالبيت ولقيت آمال بوشها وقالتلها وهي عم تناولها الشنطة: نسيتيها قلت ألحقك واعطيكي ياها
بوستها آمال وقالتلها : تقبريني ما اطيبك وانا رجعت لآخدها يلا تأخرت عالمحاضرة باي
راحت آمال وبعد دقايق قررت فاطمة تلحقها لتشوف وين رايحة وكيف عم تقضي وقتها يلي مفروض أنها بالجامعة،،، ضلت فاطمة عم تمشي وراها لحتى شافتها عم تدخل عالمحجر وبتعانق بشب يلي هو علاء وبتبوسو
انصدمت فاطمة بزيادة وما عادت قادرة تفهم شي ،، دخلو امال وعلاء وهي لحقتهن لجوا دغري وبتسمع همسون وبتقرب أكتر لحتى تسمع شو عم يصير
آمال عم تقول لياسر وهي مغطية وشها بالقناع : والله لندمك وخليك عبرة لمن اعتبر وساوي منك شقف ونتف وخلي اكبر قطعة منك قد راس العصفور وخليك تلحق يارا وأقتلك بنفس الطريقة البشعة وحزير شو رح تتسجل الجريمة كمان ضد مجهول وانك نتحرت انتحار هههههههههههههههه
تلبكت فاطمة وصارت ضربات قلبها فوق المليون ،، ما عرفت شو تتصرف اخدت شهيق وزفير لتحاول تخفف من التوتر يلي صابها ومن جسمها يلي صار يرجف كأنها طفل عم يشوف كوابيس ،، اول شي خطر على بالها انها تروح تخبر الشرطة ،، مشيت بدها تركض بس ما قدرت تسيطر على جسمها ووقعت بالارض وانتبهلها علاء ودغري نادى على آمال
آمال : شو شوفي ليش عم تصرخ علا___
قطعت كلامها وقت شافت فاطمة ،، تلبكت وحاولت تدارك الموقف
قالت آمال وهي عم تأشر على علاء : خالة فاطمة انا انا جيت لهون لسلم على رفيقي
قامت فاطمة عن الارض وتفت بوجه آمال ,, غمضت آمال عيونها بعصبية ورجعت فتحتهن من جديد وكأنو نقلبت خلقتها وطالعت الشيطان يلي فيها : يعني سمعتي كلشي يا ختيارة الجن !
فاطمة : والله لبلغ عنك الشرطة وخليكي تعفني بالحبوس
قالت آمال وهي عم تضحك بشر وحقد الدنيا : خدها علاء ربطها ولحشها ببيتك ألها عازة بلكي مناخد كمان مصاري يارا وهيك منكون حصلنا ع كلشي وبعدها بناخدها برحلة مجانية عند المرحومة ...
.......
بالمدرسة كانت نوران قاعدة لحالها وماسكة بين ايديها دفتر وقلم كانها بتخطط لشي ،، وعلي على قبالها كان قاعد مع شلتو عم يحكو بخصوص المسابقة بس هو ما كان متبع معهم بنوب وكل نظراتو وعقلو مع نوران وبس ،،
سأل حالو : يا ترى هالبنت شو عم تعمل ولشو عم تخطط وعلى شو ناوية ؟؟
تركهن بعد ما الفضول اجبرو يروح لعندها ،، سحب الدفتر من بين ايديها وتطلع عليه ،، كانت راسمة شي بيشبه فندق نجمة البحر وعلى طول فهم نيتها وفهم انها بدها تروح عليه وتدخل غرفة يارا واضح انو هالبنت ما رح تكن الا لما تعرف كلشي
قاللها بنبرة عتاب : ما بدك تكني ولا تهدي ؟ مو قلتلك انا رح اثبتلك انو اخي ما الو ايد بموت اختك !
وقفت قدامو واخدت الدفتر من بين ايديه بدفاشة وقالت : وانا رح اثبتلك العكس تماماً ممكن تتركني لحالي وترجع عند رفقاتك؟
رد عليها بعد ما ندم انو حكى معها بعصبية : نوران انا اسف ازا حكيت معك بطريقة بشعة بس صدقيني انا خايف عليكي
نوران : انت ابعد عني وانا بكون بخير
رد عليها : مستحيل اسمحلك تدمري حالك بسبب عناد راسك المهم ما قلتيلي ايمتى رايحة عالفندق؟؟
قالت نوران بتهكم : ليش يا بعدي؟
حضن ايديها بايديه وقال : معك عالموت
ابعدت عنو وردت : انا بدي تتركني لحالي وبس
ابتسملها رغم كل زعلو منها وشكها وشبه تاكدها انو مراد الي قتل يارا ،، ورجع هو وياها يقعدوا مع الشلة ..
.......
رن الجرس ليعلن عن بدء حصة الموسيقى وهي الحصة المفضلة عند الفرقة ما عدا اليوم كانت اسوء حصة ...
قال قصي وهنن ماشين بالممر للصف : رح يسألنا عن التدريب
اسيل: شو نحكيلوا؟
قصي: بنحكي الحقيقة طبعاً
اتلبكت اكرام وقالت : يعني رح تقولوا انكن ما اتدربتوا بسببي؟
ضحك قصي بخفة وقال : لا رح نقلوا اننا ما تدربنا وبس
رد يزن وهو عم يفتح باب الصف : ابو ضمير انا ما ناقصني بهادل على ساعة هالصبح
الاستاز كرم : صباح الخير
الكل : صباح الخير استاز
الاستاز كرم : يلا تفضلوا ادخلوا عندي خبرية الكن
دخلوا على صف الموسيقى وكل واحد فيهم راح قعد جنب آلة الموسيقى تبعوا ،، قال الاستاز : شو كيف كان تدريبكن مبارح؟
عم السكوت وكلهم اتطلعوا بعيون بعض عم ينتظروا حدا يجاوب ..
الاستاز كرم: اي؟
توجهت كل العيون لعلي يلي همسلو يزن : يلا علي اشتغل وظيفتك
الاستاز كرم : لك شبكن جاوبوا؟؟؟
علي: ءي ءي استاز نعم صحيح تدربنا كتير منيح حتى اكرام بحد ذاتها لما تدربنا انا وياها عالاغنية قالتلي بما انو صوتي احلى من صوتها انا رح اغني اكتر منها وهي رح تغني مقاطع بسيطة بس
صفنت اكرام بصدمة وحقد بعلي يلي ردلها نظرتها بنظرة اطمئنان وتابع : حتى انا اقترحت عليها هي تعيد الكلام من وراي بس وهي وافقت وقالت ما في مشكلة يا صاحب احلى صوت بالدنيا كلا ،، اما بالنسبة ليزن فالمسكين اصابعوا نشلوا هو والمسكينة اسيل على قد ما عزفوا على البيانو لو تطلع على اصابعهم رح تلاقيها حمرا كتير ،، وقصي كمان يا استاز ما فيني اوصفلك قديش تعب وهو عم يعزف على الجيتار حتى انو الجيتار نطق وقلو ببوس ايدك ارحمني وحاج تمعط بخيطاني
قال الاستاز كرم وهو مو مصدق : ممم واضح انو تعبتوا كتير
علي : اي والله يا استاز شايف قديش نحنا متفوقين ومجتهدين
رد عليه الاستاز كرم : يا سيدي هاد كلو رح يبين مع العرض يلي رح تورجوني ياه هلأ
اعتلت الصدمة ووجوهن وكل واحد فيهن بلع ريقو بتوتر ،، اما القنبلة يلي صدمتهم اكتر واكتر كانت لما قال الاستاز كرم : لانهم قدموا موعد المسابقة وصار الاسبوع الجاي
صرخوا كلهم بصوت واحد: الاسبوع الجاي؟؟؟
قال الاستاز كرم: تماماً متل ما سمعتوا ،، وطالما انتوا متدربين كويس فما عليكم خوف
رجع بخطواتو لورا وقعد على الكرسي قبالهن وقال : يلا ما لازم نضيع وقت ورجوني ابداعكن ..
........
وبعد ما خلصوا كل الحصص وبطريق الرجعة عالبيت كانو قصي واسيل وعلي ماشين سوا ..
قصي: صحيح ما كان اداءنا ممتاز كتير بس بالنسبة لأنو مو متدربين فهو بالنسبة الي بجنن
اسيل: اي معك حق
قال قصي وهو عم يتطلع على علي : شو يا سيد الكزابين سمعنا صوتك؟
كان علي عم بتلفت يمين شمال يدور بعيونوا على نوران ومو متبع معهم ابدا ،،
كرر قصي كلامو وقال :علي؟؟
علي: اي اي معك انا
قال قصي وهو عم ياشر على راسو : انت معنا بس هاد مو معنا
رد علي وهو متوتر أول ما لمح نوران عم تركب بتكسي : ارجعوا بدوني باي
قال هالكلمتين وراح عم يركض وركب بنفس التكسي الي دخلت فيه نوران ،، اطلعوا اسيل وقصي ببعض وقالت اسيل : شبو هاد؟ وضعو هالايام مو عاجبني
قصي: عندو شوية مشاكل بالبيت
اسيل: ايوا
من وراهم كانت اكرام عم تنادي على قصي بصوت مكسور الخاطر : قصي قصي
لف لعندها وقال باستفهام: اكرام؟ شبك؟
اكرام: ااه الواضح انك نسيت اني ببقى معك بالبيت عكلن صدقني قعدتي ببيتك ما رح تطول فترة زمن لأصير بالعمر القانوني لأستأجر بيت
ضرب قصي راسو وقال بندم: لا تواخذيني والله نسيت
رسمت على وجهها ابتسامة مصطنعة ومشيت معاه للبيت اما اسيل فضلت واقفة بمكانها ...
قصي: يلا اسيل شبك وقفتي؟
اسيل: ارجع مع اكرام انت أساساً بيتي من غير طريق
هز راسو بتفهم وضل ماشي مع اكرام بعد ما لوحوا لأسيل ،، كانت ماشية بالشارع وهي عم تغطي راسها بايديها من اشعة وشمس وفجأة اجى حدا من وراها وغمض عيونها بأيديه ،، ارتعش جسمها وقالت وهي عم تبلع ريقها بخوف : ممميين؟؟؟
قال وهو عم يضحك : شو رأيك انتي
اول ما سمعت الصوت تطمن قلبها وشالت ايديه وبسرعة لفت لجهتو وهي عاقدة حواجبها : يزن خوفتنييي
يزن: انتي جبانة
اسيل: اخراس بعدين ليش ما راجع عالبيت لهلأ
يزن: السيارة بالتصليح وما حبيت اروح بتكسي قلت بمشي معك
ابتسمت وضحك قلبها من جوا ،، تابع يزن : شو رأيك تيجي عندي عالبيت تنكدي علي عيشتي ؟ اشتقت لهديك اللحظات
ضربتو على كتفو وقالت: لا تفكر انك قلت نكتة
قال: بمزح بمزح شبك عصبتي تعالي عندي بنتغدا سوا وبنتدرب بما انو المسابقة قربت كتير وبناخد راحتنا اكتر بلا تنظير قصي وتفاهة علي ومشاكل اكرام
قالت وهي عم تهز اكتافها بفرحة: هههه اوكييه
تابع الفصل التالي عبر الرابط: "رواية معزوفتي السرمدية" اضغط على أسم الرواية