Ads by Google X

رواية حكاية قمر الفصل التاسع عشر والأخير - ياسمين علي

الصفحة الرئيسية

رواية حكاية قمر البارت التاسع عشر والأخير بقلم ياسمين علي.. ملحوظة اكتب في جوجل "رواية حكاية قمر دليل الروايات" لكي يظهر لك جميع فصول الرواية كاملة عبر مدونتنا.

رواية حكاية قمر كاملة

رواية حكاية قمر الفصل التاسع عشر والأخير

نسترجع اخر احداث الجزء اللي فات مع بعض .. 
قمر وصلت ع المكان .. لقيت انه بيت شبه قديم .. فضولها خلها تدخل .. اول لما دخلت شافت سليم ع الارض متكتف 
قمر بصدمة : سليييم !!! 
اتضربت ع دماغها من ورا .. وقعت ع الارض 
_______________________________
ليل بتتمطع : صباح الخير 
هدي مش مركزة معاها  ومردتش 
ليل راحتلها : بقول صباااح الخيرر 
هدي : صباح النور ياحبيبتي.. 
ليل : ايه اللي واخد عقلك يادودو
هدي : مافيش حاجة ياليل ..الفطار هتلقي عندك ف التلاجة جاهز هتحطيه بس ع السفرة وصحي تونة تفطر معاكي 
ليل : مالك يادودو .. وفين قمر صح تفطر معانا 
هدي : اختك نزلت بقالها اربع ساعات ومقالتش رايحة فين  .. لا حس ولا خبر  وبتصل عليها مش بترد 
ليل : طيب اهدي يمكن  راحت تشوف البيت انتي عارفة خلاص فاضل ايام ع افتتاح المشغل وتلقيها بتشوف لو في حاجة ناقصة تعملها 
هدي : كلمت عربي وراح ملقهاش هناك .. انا مش مرتاحة حاسة ان في حاجة قلقاني
ليل : ان شاءالله مافيش حاجة ياماما 
الجرس رن 
ليل : اهي زمانها جت اهي 
" هدي نطت بسرعة تروح تفتح .. لقيت زين ومعاه بوكية ورد حسيت بخيبة امل  "
ليل : زين اتفضل 
هدي :   مطلعتش قمر اهي ياليل .. قولتلك انا قلبي مش مرتاح ياليل مسمعتيش كلامي 
ليل : ماما اهدي شوية .. ممكن الغايب حجته معاه .. اصبري وهتلقيها داخلة علينا دلوقتي .. 
زين بقلق : ليه هي قمر فين !! 
ليل : متقلقش يازين هي راحت مشوار وجاية .. انت كنت جاي علشانها 
زين : اه بصراحة .. كنت جاي ارجعها الشغل .. المهم هي فين 
هدي : نزلت بدري اوي قالت عندي مشوار مهم  ومفطرتش حتي .. ومجتش لحد دلوقتي  ..  وبتصل مبتردش عليا 
زين : انا كمان  اتصلت مبتردش عليا .. بس انا فكرت انها نايمة  .. طيب مقالتلكيش ايه هو المشوار 
هدي : لا 
زين : طيب عربي وصلها 
هدي : لا بردك راحت لوحدها .. انا قلقانة اوي عليها 
زين : طيب اهدي وانا هتصرف .. خرج موبايله 
زين : الو ياحازم .. انت فين  ..
حازم بنوم : انا في البيت 
زين : طيب قوم يلا عاوزك ضروري
حازم : خير يازين في حاجة
زين : قمر مختفية بقالها اربع ساعات ومش عارفين فينها 
حازم : يعني انت مصحيني من النوم ف اجازتي علشان تقولي قمر مختفية بقالها اربع ساعات .. متلقيها في مشوار يا زين ..  روح ياحبيبي شوف شغلك وانا هكمل نوم  وهي زمانها جاية 
زين بعصبية : في مشوار ومبتردش ع مكالماتنا ليه .. انا لجاتلك انت ياحازم بس علشان صاحبي بس لو مش هتساعدني .. انا هتصرف بمعرفتي 
حازم : طيب اهدا بس .. اكيد هساعدك .. انت فين طيب وانا هلبس وهجيلك  .. تمام .. تمام انا جاي 
كنزي : في ايه ياحازم .. انت رايح فين انت مش قولت واخد اجازة انهاردة 
حازم : معلش ياحبيبتي .. زين اتصل وقلقان ع قمر بيقول مختفية من الصبح ومش بترد .. هروح اشوفه وهاجي تاني 
كنزي بخضة : قمر .. ليه راحت فين
حازم : متقلقيش ان شاءالله خير
كنزي : طيب انا كمان هلبس وجاية معاك 
حازم : تيجي فين ياكنزي .. انا هروح وهبقا اطمنك .. 
كنزي : لا ياحازم لازم اروح وابقا مع ليل وطنط هدي .. خدني ياحازم ونبي 
حازم : كنزي علشان خاطري افهمي .. انتي لسه ف الاول وغلط عليكي الحركة كتير .. انا والله هبقا اطمنك وهكلم مامتك تيجيلك ماشي 
كنزي : ماشي .. ربنا يستر
________________________________
سليم متكتف وقمر متكتفه جنبه وبيحاول يوصلها مش عارف : قمر .. قمر انتي كويسة 
قمر بتفتح عينها وبتتوجع   : ااااه  .. انا فين .. 
سليم : مش عارف .. المهم انتي ايه اللي جابك هنا 
قمر :  مش فاكرة .. هو ايه اللي حصل ... ااااه انا رأسي وجعاني اوييي .. و مين ربطني كدا 
سليم : احنا مخطوفين يا قمر 
قمر : اييه .. مين خطفنا 
سهر دخلت  : انا ياحبيبتي .. كويس انك فوقتي 
قمر فاقت : سهر !!
_________________________________
زين : انت متأكد انهم هيعرفوا مكانها 
حازم : اه طلما الخط مفتوح هنوصلها متقلقش 
زين : ان شاءالله خير 
عادل  دخل :  دا المكان اللي موجود فيه الرقم اللي ادتهوني ياحازم 
حازم : متشكر اوي  ياعادل ..  اهو يازين دا المكان اللي قمر فيه .. انت تعرف المكان دا 
زين :  المكان دا بعيد اوي عن هنا  .. ايه يوديها هناك   ..
حازم : طب اتصل ب والدتها يمكن ليهم قرايب هناك 
زين  بعصبية : انا لسه هتصل .. يلا بينا بسرعة انا متاكد ان مالهاش قرايب
عادل  : اهدي يا استاذ زين وكلمهم الاول نتأكد .. ولو طلع محدش يعرفوا هنطلع كلنا معاك 
زين : ماشي  
___________________________________
عزيز : في مفاجأة ليكي انهاردة 
صافي : مفاجأة ايه 
عزيز : اخرجي هتلقيها 
صافي طلعت تجري ع برا شافت سائر وفاروق قاعد ع كرسي ومبتسم  ليها ..  اتصدمت من حالة ابوها  وطلعت تجري عليه حضنته 
صافي : بابا ايه اللي حصلك  .. ( بتبص لسائر ورجعت بصيت لابوها وعيطت ) .. انا السبب صح .. 
" فاروق هز رأسه بالرفض ودمع هو كمان ونفسه يحضن بنته بس مش عارف للاسف"
صافي : انا اسفة يابابا .. انا اللي خليتك كدا حقك عليا .. ايه اللي حصله ياسائر 
سائر : متقلقيش ياصافي .. بابا هيتحسن وان شاءالله  يرجع زي الاول 
صافي : مقولتليش ليه .. كنت بتكدب عليا وتقولي ف الشغل .. وهو .. ياحبيبي يابابا 
عزيز : انا اللي كنت منعه انه يقولك اي حاجة ف الفترة اللي فاتت .. مكنتيش هتستحملي وكل اللي عملناه كان هيروح ع الفاضي .. ولما لقيت انك الحمدالله  وصلتي لمرحلة كويسة كلمته يجيبوا تشوفيه علشان المقابلة دي هتحسن من حالته وحالتك 
صافي : انا عاوزة اخرج ياسائر انا مش عاوزة افضل هنا خلاص .. انا خفيت  عاوزة ارجع مع بابا 
عزيز : مينفعش دلوقتي ياصافي .. انتي لسه جلسات علاجك مخلصتش 
صافي بترجي : علشان خاطري ياعزيز اعمل حاجة .. انا عاوزو ارجع مع بابا .. سائر قولو حاجة ..  
سائر : طيب ياعزيز الجلسات دي مينفعش تتعمل ف البيت 
صافي : قول اه ياعزيز .. وافق 
عزيز : ينفع .. بس مش انا اللي المفروض اوافق ع خروجها من هنا .. بس هحاول حاضر ..  بس مش انهاردة اكيد 
صافي : طيب امتا 
عزيز : قريب ان شاءالله 
سائر : معلش ياصافي استحملي شوية كمان 
صافي : حاضر 
موبايل سائر رن 
سائر : دي نور .. 
صافي : سلملي عليها  وبوسهالي ها ( غمزتله )
سائر ضحك  : حاضر 
سائر : الو ياحبيبتي .. عاملة ايه 
نور  : انت فين ياسائر 
سائر : انا عند صافي زي ماقولتلك  .. انتي في حاجة .. مال صوتك 
نور : قمر  مختفية من الصبح .. وزين وصل للمكان والمكان طلع بعيد ورايحينه دلوقتي 
سائر : دا حصل امتا الكلام دا .. وانتي فين 
نور : انا عند ليل اهو مستنين اي خبر
عزيز : في ايه يا سائر مالك 
سائر :  طب هما  فين دلوقتي ..  ولقوا قمر موجودة فين 
نور : في مكان اسمه .... ...... 
سائر وشه قلب : ايييه ؟؟ انتي متأكدة انها موجودة هناك 
نور : اه  زين لسه مكلمنا وقال كدا .. انت تعرفه 
سائر :  اه .. دا المكان اللي كانت عايشة فيه والدة سهر ..
نور :  نعم .. ازاي  .. طب ايه الي هيودي قمر هناك 
سائر  :  مش عارف  .. اقفلي وانا هكلم زين اعرفوا  .. متقوليش حاجة للي عندك لحد مانتأكد 
نور : حاضر حاضر 
عزيز : مالك ياسائر ..  خير في حاجة حصلت 
سائر : سهر شكلها   ناوية ع مصيبة تاني 
عزيز : ايه اللي بتقولو دا عملت ايه تاني 
سائر : مش وقته دلوقتي .. انا لازم امشي .. خليك مع صافي وبابا ومتحسسهمش بحاجة  لحد مااشوف الكارثة الجديدة 
" سائر كلم زين وحكاله "
زين : ايييه .. انت متأكد ياسائر ان سهر اللي عملت كل دا 
سائر : ايوة يازين متأكد .. انا مكنتش حابب اتكلم واقول اللي عملتوا ف ابويا واختي .. بس طلما وصلت للخطف والانتقام هيطول الكل يبقا لازم اتكلم .. البيت اللي انتو لقيتوا قمر فيه دا بيت ام سهر الله يرحمها .. هي كانت عايشة هناك 
حازم : انا مش مصدق كل دا يطلع من سهر 
 عادل : مش وقته دلوقتي الكلام دا  .. احنا هنتحرك دلوقتي
زين : طيب اقفل دلوقتي ياسائر وهبقا اكلمك 
زين بيرن ع موبايل قمر لقي مقفول  .. اتعصب : الموبايل اتقفللل 
حازم : متقلقش ان شاءالله متكونش غيرت مكانها .. يلا بينا بسرعة 
زين : يلااا
________________________________
 قمر : انتي اللي جبتيني هنا 
سهر : انا مجبتكيش انتي اللي جيتي بنفسك 
قمر : بعتي الرسالة من موبايل سليم .. علشان اجي ..  انتي عاوزة ايه مني 
سهر : عاوزة حقي منك .. ومنه 
سليم : قمر معملتلكيش حاجة .. اللي كان  بيني وبينك قمر مالهاش علاقة بيه
سهر : مالهاش علاقة .. اومال مين اللي لفت عليك وبعدتك عني 
سليم : انا بعدت عنك من زمان اووووي .. بس انتي اللي مش واخدة بالك .. بعدت عنك من عمايلك .. من شرك وآذيتك لغيرك .. وياريتك بتآذي حد غريب .. دانتي بتآذي اخوكي اللي من لحمك ودمك .. عاوزني انا اطمن علي نفسي معاكي ازاي 
" قمر  بتسمع ومش فاهمة حاجة "
سهر : اه آذيت اخويا .. اه انا السبب  في اللي وصله .. وانا السبب ف دخول صافي المستشفي وجنانها .. انا االي عملت كل دا .. 
سليم : ليييه .. ذنبها ايه .. دي كانت بتثق فيكي 
"قمر اتصدمت من كلامها "
سهر :  ذنبها انها بنت فاروق .. فاروق اللي زرع  القسوة فيا من وقت ماخدني من حضن امي ومرحمنيش .. انا  اللي اتحرمت من اهلي .. اتيتمت وانا امي عايشة .. انا اللي اتحرمت من كل حاجة كان نفسي فيها .. اقل حقوقي مكنتش باخدها كنت بتعامل زي الخدامة .. انا استحملت اللي محدش استحملوا .. دا حتي مسبنيش اختار اللي هتجوزوا ورفضك .. وخد بنتي مني ..  حتي دي مسبهاليش  !!! .. كان لازم ادوقه كل اللي دوقهوني .. انا كل لما بفكر وبحاول اندم ع اللي عملتوا فيه .. بلقيني عاوزة انتقم منه اكتر واكتر .. وبالرغم كل الكرهه اللي جوايا دا بس حبيتك .. مختارتش غيرك .. وانت بعدت عني .. مش علشان انتقامي .. علشان انت محبتنيش زي مانا حبيتك .. انت حبيتها هي .. 
سليم : انا حبيتك وكان عندي امل اغييرك .. بس انتي اللي مكنتيش بتبطلي تفكير ف الانتقام .. وانا مكنتش قادر استحمل كدا 
سهر : تفتكر بعد كل اللي قولتوا واللي حصل فيا  كنت بسهولة هعرف اتغير .. (بصيت لقمر ) .. فضلتها هي عني علشان هي الكويسة الجدعة .. انما انا الشريرة اللي مينفعش تعيش معاها .. هي مشافتش اللي انا شوفتوا  ولا عاشت اللي عاشته انا 
قمر : مين قالك اني مشوفتش اللي شوفتيه ؟ انا كمان اتحرمت من اهلي وهما عايشين .. من صغري كنت بشقي ..  حرمت نفسي من كل حاجة علشان خاطر اربي اخواتي بس كنت بحمد ربنا كل يوم وراضية بحياتي .. لما جت الفرصة اسامح اهلي .. سامحتهم علشان هما اهلي ومقدرتش اكرههم .. اخوكي اللي انتي انتقمتي منه دا كان سبب ف حرماني من امي زيك بالظبط .. بس انا اللي لا من لحمه ولا من دمه سيبت حقي عند ربنا .. مفكرتش آذيي زيك .. مش عارفة انتي ازاي عملتي كدا ف اخوكي .. ( سهر بتسمعها وبصلها بغيظ )  كل اللي حصلك كانت اختبارات من ربنا ليكي .. بس انتي الي شوفتيها بطريقة غلط ف متجيش تقولي اني مشوفتش اللي شوفتيه ..  متبرريش اللي عملتي باللي حصلك .. انتي اللي عملتي في نفسك كدا محدش غيرك .. 
سهر  بتسقف وضحكت  استهزاق بكلام قمر .. : احيكي بجد .. قد ايه انتي انسانة  مثالية مافيش زيك .. بس للاسف كلامك مأثرش فيا .. مش هيخليني اتراجع عن اللي ف دماغي ..  وبما اني  انتقمت من اخويا اللي من لحمي ودمي ف انتو مش هتصعبوا عليا  ... خرجت 
قمر وسليم بصوا لبعض .. دخلت تاني ومعاها چركن بنزين كبير 
سليم : انتي هتعملي اييه ؟؟ 
سهر ضحكت  : هتشوف دلوقتي .. راحت عند قمر وقلبت حواليها ..  و قمر عينها اتملت دموع وخايفة وبتحاول تبعد وتفك نفسها 
سليم بعصبية :  .. انتي بتعمليييي ايه .. انتي اتجننتي 
سهر : هولع فيها قدام عينيك .. هحرق قلبك زي ماحرقت قلبي .. 
سليم : قمر مالهاش ذنب .. سبيها .. عاوزة تنتقمي انتقمي مني انا هي مالهاش ذنب 
سهر : خوفك عليها دا .. مش هيخليني ارحمها
قمر دموعها غلبتها  وعيطت 
سهر ضحكت : ايه يا قمر مالك خايفة كدا ليه .. اومال فين قمر الشجاعة اللي مبتخافش من اي حاجة .. 
قمر بصلها ومش بتتكلم  
سليم :  سهر طيب اهدي .. لو عاوزني ارجعلك .. هرجع بس قمر مالهاش ذنب .. خليها تمشي 
سهر : ومين قالك اننا مش هنرجع ياحبيبي .. دانا حتي حجزت ليا انا وانت تذاكر سفر برا مصر .. بس لازم اخلص منها الاول .. واوعدك هنسافر ونكمل بقيت حياتنا ف سعادة وحب .. 
قمر : انتي مجنوونةةة .. مجنونة 
سليم مش مستوعب كلامها  .. ومش عارف يوقفها ازاي  .. وعينه عليها   .. وهي  مسكت الولاعة وراحة عند قمر خلاص وقمر مرعوبة 
سليم : بنتك مامتتش ياسهر 
سهر بصتله : انت قولت  ايه ؟ 
سليم : بنتك مامتتش بنتك عايشة .. انا عارف مكانها .. 
سهر : بنتي عايشة ! ازاي 
سليم : سيبي قمر تمشي وهقولك 
سهر : انت كداب .. انا بنتي ماتت من زمان .. فاروق موتها .. انت بتقول كدا علشان تخليني اسيبها .. بس دا مش هيحصل 
سليم :  استنني .. والله بنتك عايشة .. خلي قمر تمشي .. بلاش تعملي كدا .. لو بتحبيني هي مالهاش ذنب .. فاروق مالهوش علاقة ببنتك وميعرفش عنها حاجة .. انا اللي خدتها من المستشفي و قولت للممرضة تقول فاروق علشان متحاوليش تدوري ع بنتك .. 
سهر : عملت كدا ليييه .. خدتها وبعدتها عني لييه 
سليم : مكنتش عايز بنتي تتربي ف وسط الشر اللي حواليكي .. مكنتش عاوزها تكون شبهك .. سلمتها للي يستحقها .. للي هيعرف يحافظ ع بنتي ويربيها كويس 
سهر : بنتي .. بنتي فين وتبقا مين .. انطققق 
سليم : بنتك تبقا ..... 
الباب اتهبد وعادل مسك سهر وزين طلع يجري ع قمر  وحازم راح يفك سليم 
زين بيفكها  : انتي كويسة .. حصلك حاجة 
قمر بتعيط وبتترعش   : زين .. زين متسبنيش .. كانت عايزة تموتني .. 
زين : اهدي اهدي محدش هيعملك حاجة خلاص 
 سليم : انا اسف ياقمر ..
زين بعصبية : انت تخرس خالص انت فاهم .. 
حازم : اهدي يازين  
زين : اهدي ايه .. الي حصلها كله كان بسببه 
سليم : انا عارف اني السبب انا اسف ليكم كلكم 
حازم : مش وقته دلوقتي هات قمر وتعالي ورايا ___________________________________________________
اسر بفرحة   : بتتكلم جد يازين  .. طب هي عاملة ايه 
ليل مسكة ف دراعه : قالك ايه قولل .. لقوا قمر ولا ايه انطق 
هدي : طمنا يابني بنتي كويسة 
اسر : اه لقوها الحمدالله وهي كويسة وهيجبها وجايين ع هنا 
تونة : هيييييييه .. قمر جاية 
هدي : الحمدالله يارب الحمدالله .. انا عاوزة اروح اشوفها 
اسر : لا تروحي فين .. هو جاي بيها متقلقيش 
_______________________________ 
قمر واقفة  مش مستوعبة اللي حصلها وزين  بيكلم ف الموبايل وواقف بعيد شوية وسليم  واقف عينه ع قمر وزعلان من اللي حصلها بسببه .. سهر واقفة بعيد شايفهم وعادل ماسكها  بس كان مركز في الموبايل بيكلم والدته يطمنها استغلت الفرصة  .. بصيت ع السلاح اللي ف جيبوا ورجعت بصيت تاني ع قمر اللي واقفة لوحدها .. 
*في حركة سرعة*  
شدت السلاح وزقيت عادل  ..وراحت ناحية قمر و  زين شافها جري ناحية قمر وبيصرخ بينادي ع قمر ..   اللي واقفة بتبص لسهر ومبتتحركش  ..   سهر وقفت ووجهت المسدس ع قمر 
سهر : مش هسيبك تتهني لحظة ياقمررر .. ضغطت ع الزناد ...  سليم شد قمر زقها بعيد  والرصاص جه فيه هو .. 
سهربصدمة  رميت المسدس : سليم  لااا 
عادل وحازم مسكوها وخدوا السلاح وركبوها العربية غصب وهي بتحاول تبعد وتروح لسليم 
"سليم ع الارض غرقان ف دمه .. قمر وزين جروا ع سليم " 
قمر  بتعيط : سليم  .. سليم رد عليا .. 
زين : سليم انت كويس .. رد 
سليم 
سليم بيحاول يتكلم بصعوبة : ف .. فت .. ون 
قمر : فتون .. مالها ياسليم 
سليم :  ب .. بنتي .. ف تون  .. 
زين بعدم فهم : اييه 
قمر حاولت تستوعب كلامه اللي قالوا ل سهر و كلامه دلوقتي والجمييل اللي قالها عليه .. فهمت 
قمر : فتون تبقا بنتك انت وسهر !!! 
سليم هز رأسه  : خا... ليي. . ب. الك .. م ..نها 
قمر بتعيط  : حاضر والله حاضر   .. سليم ( غمض عينه ) 
قمر بخوف  :  سليم ..  سليم رد عليا ... زين هو مبيردش ليه  .. سليم   قول حاجة .. سلييييم 
_______________________________
عدت فترة ع اللي حصل .. ووصلنا ليوم افتتاح المشغل .. وقمر وليل وهدي وتونة واقفين ف وسط الحارة  والناس والطبل الصعيدي والاغاني شغالة .. وتونة واقفة بترقص مع عربي .. والكل فرحان 
ام سهير  : الف مبروك يا ست قمر وربنا يزيدك كمان وكمان 
قمر :   الله يبارك فيكي ياام سهير .. ومتنسيش من بكرا القيكي هنا انتي اول واحدة هتشتغل  
ام سهير : بجد ياست قمر .. ربنا يجبر بخاطرك ويفرحك يارب ويسعدك مع ابن الحلال اللي يستاهلك  .. 
هدي بصيت لقمر  : يارب بقا 
3 عربيات ورا بعض وقفت قصادهم 
" الاولي نزل منها زين ومعاه بوكية ورد و معاه كريم واحمد  واسر  والتانية نزل منها سائر ونور  
والتالتة نزل منها حازم و كنزي ونوجة وفريال "
نجلاء : مبروك ياقمر
كنزي طالعة تجري تحضن قمر : الف مبروك  ياحبيبتي .. 
نجلاء : ..  براحة يابت بقا وانا هفضل ماشية وراكي اخد بالي منك .. ماتشوف مراتك 
حازم :  تعبت من الكلام معاها والله مكنتش هجيبها هي صممت 
كنزي : شايفة ياقمر مكنوش عاوزين اجيلك واكون معاكي ف اليوم دا 
قمر : هما خايفين عليكي 
ياحبيبتي  
كنزي : وانا عملت حاجة هو انا بخرج اصلا دول حبسني 
نجلاء : ماهو علشان اللي ف بطنك ياحبيبتي .. قوليلها حاجة يافريال علشان انا تعبت مع البت دي 
فريال : ياختي سبيها ع ربنا وخليها تفرح شوية هي مبتنزلش خالص 
كنزي حضنت فريال  : ياحبيبتي ياماما يانصفاني
نجلاء : بقا كدا ماشي ماشي 
نور حضنت قمر : مبروك يا روحيي 
سائر  : مبروك ياقمر وعقبال كدا مايكبر ويبقا مصنع 
قمر : يارب  .. وعقبالك انت ونور ماتفرحونا بيكم بقا 
سائر : قريب ان شاءالله 
كريم :, مبروك ياقمر 
قمر : الله يبارك فيك ياكيمو 
تونة شدت كريم : تعالي نرقص يلا 
كريم : نرقص ف الشارع ! 
تونة : اه يلا يلا 
احمد : مبروك يابنتي .. متتصوريش فرحتي بيكي عاملة ازاي ..
قمر : الله يبارك فيك يااستاذ احمد .. انت عارف لولا وقفتك جنبي مكنتش وصلت للي انا فيه دا 
  احمد : انا معملتش حاجة جنب اللي عملتي مع نور وكريم ..  واذا كان ع الفلوس ف دا حقك وامانة ابوكي كان شيلها معايا .. زمان والدك دلوقتي مرتاح وهو شايفك فرحانة ومتجمعة انتي وعيلتك كدا .. 
قمر : الله يرحمه ويسامحه  .. 
احمد : وانتي سامحتيه 
قمر ابتسمت  : سامحته يااستاذ احمد  .. 
  زين عطاها البوكية : مبروك ياقمر 
قمر : الله يبارك فيك يازين .. حلو الورد
زين : عجبك 
قمر  ابتسمت : اه 
ذكية قطعت كلامهم  : ياستشي قمر ياستشي قمرررر الف مبروك ياستشي قمر 
قمر : الله يبارك فيكي ياذكية 
ذكية : اوعي لتشكوني زعلانة مني من اخر مرة .. لما البتش تشونة فتشحتش ديماغ الولا ابني .. 
زين باستغراب : تشونة !! 
ليل : دي اللي لفتتش نظرك بس الباقي عادي
اسر :دا في كمية تش تش ف الموضوع رهيبة  
قمر ضحكت  : لا ياحبيبتي مش زعلانة
 ذكية : حبيبتشي حبيبتشي  والنعمة .. الاه هو مين البهاواتش دولن 
ليل : وانتشي مالك  ياستشي انتشي .. 
ذكية : خلاص ياستشي ليل مش عاوزة نعرف .. المهم ياستشي قمر هتيخلينا نشتغل في البتشاعة دهيي امتشا
قمر : انتي هتشتغلي ف المشغل وهتسيبي العجل 
ذكية : لا طشبعا انا لا ممكن اسيب شغلنتشي العجل تي اابدا .. بس انا لقيت الكل هيشتغل قولت مجتشي عليكي يابت ياذكية  وعلشان  اكون مع ستاتشي الحارة كلنا مع بعضيتنا كدهو .. ولا انتشي بقا هتشكسفيني ومش هتشغليني معاكي 
قمر : لا مش هكسفك .. انا هكلم عربي واخلي يشغلك معاهم 
ذكية : ياحبيبتشي ياستشي قمر ... لولولولولييييي .. الف الف مبروكككك 
ليل بتضحك : الستشي دي مسخرة ..  ايه دا .. انا لساني حصله ايه .. يخربيتشها عدتيني 
زين : خلصتشي ولا لسه 
قمر ضحكت : انت كمان اتعديت 
زين : تقريبا .. المهم انا كنت عاوز اعرف انتي هترجعي الشغل امتا ..
قمر باستعباط : شغل ايه 
زين : لا والله .. لحقتي تنسي 
قمر : اااه قصدك الشركة .. لا مانا خلاص قدمت ف شركة تانية  واكيد هتقبل
زين : اكيد هتتقبلي .. دا ع اساس انك متعرفيش انك متقبلتيش اصلا 
" الكل واقف يتفرج عليهم "
قمر رفعت حاجبها : وانت عرفت منين بقا .. اه تلقيك انت السبب .. انا كنت حاسة ان في أن ف الموضوع 
زين : اه انا اللي كلمت صاحب الشركة وخليته ميقبلكيش .. وكل لما هتقدمي ف شركة هخليهم يرفضوكي .. وهتلفي تلفي وترجعي تشتغلي معايا بردك 
" حازم و اسر  مسكوا وكنزي  وليل مسكت   قمر  ووقفوا قصاد بعض "
قمر بعصبية  : طب ايه رايك بقا اني مش هشتغل معاك .. ومش هشتغل اصلا .. ولا اقولك انا هفتح شركة لنفسي ووريني بقا هتعمل ايه 
زين بعصبية  : هكسرها فوق دماغك ومش هتشتغلي  غير ف شركتنا ياقمر ها بقا 
حازم : استهدوا بالله ياجماعة .. 
زين : انت مش شايف مبتسمعش الكلام ازاي 
قمر بتشد نفسها  :   وانا اسمع كلامك ليه اصلا .. لا اله الا الله ..  وانت ماللك 
كنزي : براحة ياقمر هقع منك 
احمد : عجبك انت وهي الناس كلها بتتفرج عليكم كدا 
" قمر وزين بصوا حواليهم لقوا الحارة كلها واقفة اتكسفوا "
زين :  ..  انا اسف 
قمر : وانا كمان اسفة 
زين : بس انتي بردك اللي عصبتيني 
قمر : تاني تاني !! 
زين ابتسم : لا خلاص انا مش زعلان  
قمر :  وانا كمان مش زعلانة  
زين : طب انا بحبك 
قمر بتلقائية : وانا كمان بح .. ( بصتله )  ايه قولت ايه ! 
زين  :  انا بحبكك  ياقمر .. تتجوزيني ! 
( قمر واقفة متنحة )
نور  : اخيراا  بقا 
كنزي نطت وسقفت جامد 
حازم : يخربيتك اثبتي 
ليل : ماتردي ع الراجل يابنتي .. وخلينا نفرح بقا 
اسر : ماتخلينا نفرح احنا كمان  
ليل : لا داا لسسسسه بدررررررررييييييي اوي 
اسر : يلهوووي 
زين :  ها قولتي ايه 
قمر بصة لهدي اللي عينها اتملت دموع من الفرح .. ورجعت بصت ل زين  وابتسمت : انا موافقة 
تونة : هييييييييه 
نجلاء : لولولولولولولييي .. وستات الحارة زرغطوا وراها 
والكل واقف  فرحان  . 
هدي حضنت قمر : مبروك ياحبيبتي مبروك 
احمد  : اخيرا يااخي هتنزح من ع قلبي بقا ..  ( حضنه جامد ) مبروك ياحبيبي
والكل بيحضن ويبارك لقمر .. زين شد قمر : مش خلصتي مباركات .. يلا بينا بقا 
قمر باستغراب : يلا بينا ع فين 
زين : انتي مش وافقتي .. يبقا يلا بينا نطلع ع المأذون
 قمر : دلوقتي !!!! 
اسر : احنا ف عصر السرعة 
زين شدها  : اه دلوقتي  يلا بينا.. ركبوا ع العربية والكل وراهم و الزراغيط والطبل مالي المكان .. والكل فرحان .. والحمدالله  واخيرا اتجوزوا
___________________________________________
 بعد مرور ست  سنين ❤️
ليل واسر اتخرجوا واشتغلوا ف شركة الالفي مع بعض .. ولحد دلوقتي ليل مطلعة عين اسر وملففه وراها ولسه  مش عاوزة تفرحوا هو كمان ياعيني عليك يااسر ..  وسائر ونور اتجوزوا من تلت سنين  ..  بس لسه ربنا مكرمهمش ادعولهم بقا ...  وهما الاتنين ماسكين شركات فاروق ومعاهم صافي .. اه صحيح صافي كمان اتعالجت وبقيت احسن بكتير من الاول .. وبقيت كويسة مع ليل واسر وبقوا قريبين من بعض وبتاخد رايهم ف كل حاجة .. و اتجوزت الدكتور عزيز  بعد ماوقعته ف حبها من اول يوم شافها ف المستشفي  ودلوقتي حامل ادعولها .. وفاروق حالته اتحسنت و بقا شخص كويس وندم ع اللي عملوا ف اخته  بس فات اوان الندم خلاص .. سهر مستحملتش موت سليم وكل اللي حصل فيها واللي وصلتله وانتحرت ف السجن قبل مايتحكم  عليها  .. وكنزي وحازم جابوا فارس زي ما كانوا متفقين  .. وبقا معاها لي لي كمان لسه بيبي   .... وبنسبة لتونة ف هي كبرت وبقيت ف المدرسة مع كريم هي ف اعدادي وهو ف ثانوي ومبتفارقهوش لحظة لا ف المدرسة ولا في البيت .. واحنا   كلنا بقينا عايشين في الفيلا مع بعض .. اما بقا بالنسبالي انا وزين  اتجوزنا .. وجبنا بنتين توأم { تالا ❤️ تالين} .. وربنا كرمني وفتحت مصنع كمان جمب المشغل بس المشغل هو الاساس .. وكمان ..
زين : قمر ... قمر انتي بتعملي ايه 
قمر : في ايه يازين بحكي للناس حكايتي 
زين : ناس مين بس ركزي معايا شوية .. عاوزك ف موضوع 
قمر :  طيب هكملكم الحكاية بعدين ها .. ( بصيت لزين )  .. يلا احكي سمعاك 
زين :  بصي ياستي انا قررت افتح شركة تانية  ايه رايك
قمر : وماله ياحبيبي  .. حاجة كويسة وانا اكيد مش هعترض 
زين : بس الشركة دي هتكون بعيدة عن شركات بابا .. بفلوسي انا يعني 
قمر : وطبعا انت هتمسكها وتسيب شركات الالفي 
زين : اه 
قمر : لا انا مش موافقة طبعا .. ليه متكنش من ضمنهم .. وكمان بابا كدا ممكن يزعل .. انت عارف يازين ان هو بيعتمد عليك ف كل حاجة ف الشغل دلوقتي بعد ماتعب ومبقاش يشتغل كتير  .. عاوز تسيبوا وتروح تشتغل لوحدك 
زين : ياقمر افهمي  انا مش هسيب شركات بابا بشكل كلي .. انا هقسم وقتي بين الاتنين منها هكبر الشركة بتاعتي ومنها هكون موجود ف شركتنا .. وبعدين  اسر وليل هما موجودين كمان .. يعني مش سايب الشركة فاضية 
قمر : لا بردك ياا زين  .. انا مش عاوزة بابا يزعل منك 
زين : طيب لو جبتلك موافقة بابا هتوافقي انتي كمان 
قمر : لو وافق وكان راضي ومبسوط انا هوافق 
زين : يبقا اتفقنا .. انتي مش راحة المصنع انهاردة 
قمر : لا انا واخدة اجازة وكلمت عربي  وطمني ان كله تمام هناك 
زين : حلو وانا كمان انهاردة اجازة .. ايه رايك لو نخرج 
قمر : لا ماهو انا واخدة اجازة علشان ارتاح ف البيت شوية مش علشان انزل 
زين : تصدقي انا غلطان خليكي 
_____________________________________
* في المدرسة * 
كريم ف الفصل وتونة جت حطت ايدها ع عينه 
تونة : انا مين 
كريم : تونة مافيش غيرك 
تونة : ماهو مينفعش يكون في غيري  اصلا ..   
كريم : طبعا .. المهم انتي عملتي ايه في الماث 
تونة : ولا اي حاجة ومش فاهمة اي حاجة 
كريم : ازاي يعني هو انا مش لسه مذاكرهولك امبارح 
تونة : طار كله 
كريم : يخربيتك هو لحق .. دا الميدتيرم الاسبوع الجاي 
تونة : اعمل ايه انا قولتلكم مبحبش المذاكرة  ووجع الدماغ وماث ومش عارفة ايه .. 
كريم : لا ياتونة لازم تتعلمي  .. 
تونة : حاضر 
كريم : ويلا ع فصلك بقا علشان البريك خلص خلاص 
تونة  :  حاااااااضر 
مشيت سرحانة وخبطت ف شلة بنات 
البنت : مش تحاسبي 
تونة : لامؤخذة ياختي مخدتش بالي 
البنت بصتلها باستحقار ومشيت 
تونة بتكلم نفسها : مالها دي ..  ياخبرر انا نسيت اقول لكريم اني هتأخر انهاردة .. الحق اروح اقولو قبل المستر مايدخل 
في الفصل .. كريم قاعد وشلة البنات راحتله  وفيهم واحدة مبتسماله  وماسكة اسكتش
داليا  : اتفضل ياكريم ..  ميرسي اوي  
كريم : العفو .. نقلتي الحاجة 
داليا : اه .. انا مش عارفة اشكرك ازاي والله .. مش عارفة من غيرك كنت هعمل ايه 
تونة دخلت شافتها قريبة منه : ينهاركو اسود .. مين دي ياكريم 
داليا بصتلها من فوق لتحت  : انتي اللي مين 
تونة : وانتي مالك انا مين .. انتي اللي تطلعي ايه يابتاعة انتي .. وايه موقفك مع كريم 
داليا : انتي ازاي تكلميني بالاسلوب دا .. 
تونة : انتي لسه شوفتي اسلوب دانا كل دا محترمة معاكي 
كريم :  اهدي ياتونة دي زميلتي وكانت واخدة الاسكتش بتنقل منه حاجة ورجعتهولي ..  محصلش حاجة يعني 
تونة : ياحنييين .. وهو مافيش غيرك تنقل منه .. ( شدت الاسكتش من ايد  داليا ) .. وريني كدا ياحبيبتي الاسكتش دا .. فتحت لقيت مكتوب من جوا .. (بحبك ياكيمو ) .. ينهارررر ابوكي اسوود  ( بصيت لكريم  ) .. هو دااا. االي محصلش حاجة 
كريم بخوف : والله مااعرف والله معملتش حاجة 
تونة بعصبية : انت تخرص خاااالص .. دانت حسابك معايا بعدين .. 
داليا مسكت ايد كريم : انت ازاي سكت كدا للمتخلفة دي  ياكوكي  
تونة : كوكك !! انتي لسه واقفة  عندك ..  مجرتيش يعني  .. دانتي ليلتك سودة 
صاحبة داليا : انتي مجنونة انتي متعرفيش دي مين .. دي بنت المديرة 
تونة : دا انا هفتح دماغها هي والمديرة دلوقتي ( مسكت داليا من شعرها ) ...  تعاليلييي بقااااا ياحبيبتي اعرفك انا مين 
الفصل كله اتقلب وصحاب داليا بيحاولو يخلصوا داليا من ايد تونة .. وتونة بتزق اي حد يقرب منها 
كريم : فوقي ياتونة ايه اللي بتعمليه دا 
تونة : ابعد عن وشاااي 
المدرس دخل  :  اييه اللي بيحصل هنا .. كلكم قدامي ع المديرة يلااا 
_________________________________
تالا جاية بتجري : بابي .. بابي الحقني 
زين وقمر : مالك ياحبيبتي 
تالين جاية  وراها بطوبة .. زين لمحها مسكها بسرعة 
تالا : شايف يابابي .. عاوزة تحدف عليا ايه 
قمر : ايه اللي انتي ماسكة دا ياتالين .. وبتجري ورا اختك ليه 
زين :  هي جابت الطوبة دي منين اصلا 
تالين : هفتح دماغها  علشان مش  عاوزة تلعب معايا 
قمر حطت ايدها ع صدرها  : يلاهوووي 
زين : دا يلاهوووين مش يلاهوووي واحدة .. 
تالا : شايف يابابي شايفة يامامي .. دي لا يمكن تكون ماي سيستر ابدا .. 
تالين : والله ماهسيبك يابت انتي
 تالا استخبت ورا زين : الحقني يابابي 
قمر مسكت تالين : تعالي هنا .. ايه الطريقة اللي بتكلمي بيها اختك دي .. وجبتي الطوبة دي منين 
تالين بعصبية: ماهي بتك مش عاوزة تلعب معايا 
 قمر : ماهي ! 
زين : وبتك .. وانتي يابتها مش عاوزة تلعبي مع اختك ليه 
تالا : يابابي دي عاوزنا ننزل الجاردن ونلعب ف الارض ونمسك التراب بايدينا  .. وانا نيڤر اني العب ف الحاجات دي واوسخ هدومي .. انا بحب العب بباربي والعابي الجميلة ف اوضتي .. مش زيها 
تالين : ومالي انا بقا يابت يامسهوكة .. دانا هقطع شعرك ف ايدي 
زين بجدية : ايه الكلام والطريقة دي ياتالين !! ازاي تكلمي اختك كدا ومين علمك الكلام  دا .. اومال مدارس ايه اللي بتروحيها 
تالين عيطت : انا عاوزها تلعب معايا 
قمر : براحة عليها يازين .. متعيطيش ياحبيبتي .. قوليلي جبتي منين الكلام دا 
تالين : من خالتي تونة 
زين : اللللله .. وانا اللي مستغرب .. مافيش غير مصيبتنا الكبيرة .. عوجت لسان البنت .. 
قمر ضحكت 
زين : انتي بتضحكي فرحانة .. اهي بنتك هتفتح دماغ اختها .. هو دا اللي استاذة فتون علمتهولك ياحبيبتي
تالين : لا يابابا  خالتي تونة قالتلي اللي يزعلك يابت ياتالين  افتحي دماغه بطوبة بس كدا  .. مقالتليش اختك 
زين : لا ياشيخةة .. قمرر من انهاردة تالين متخطلتش ب تونة ابدا لحد مانظبطلها  لسانها دا .. وتنسا  كلام تونة 
تالين : لا بقا انا بحب خالتي تونة 
زين : وانا قولت مافيش تونة .. وروحي ع اوضتك يلا 
تالين مشيت وهي بتدبدب ع الارض برجلها  : يووووووة  ..  
زين  : تاللييين .. تعالي هنا
تالين : عاوز ايه ياجدع انت مني
تالا : اوههه ماي جاد 
زين بذهول : جدع انت وعاوز ايه !! 
قمر مقضيها ضحك 
زين بعصبية : انتي بتضحكي 
قمر بتحاول متضحكش : عيب كدا يا تالين .. دا بابي بردك وضحكت تاني 
زين : دانا هنفخك انتي وبنتك 
قمر : وانا مالي انا 
زين : اصبري عليا. .. وانتي متخرجيش من اوضتك طول ما فتون موجودة ولا تروحلها .. واياكي اشوفك ماسكة طوبة ف ايدك او بتلعبي ف التراب فاهمة 
تالين مشيت بعصبية : ماشي ماشي .. والله لافتح دماغكم كلكم اصبروا عليا 
زين : شايفة بتقول ايه .. قمر ركزي مع البنات شوية .. ولما تيجي كمان الزفتة تونة دي .. هتدمرلي البنت  ..( قمر بتضحك )  انتي بتضحكي لسه عجبك اللي تونة عملتو  
قمر : مالها تونة دي عسل .. وبعدين انت زعقت لواحدة وسايب التانية 
تالا : انا معملتش حاجة يابابي 
قمر : انتي .. دانتي سوسة .. هو مش هيزعقلك انا هزعقلك .. تاني مرة متعامليش اختك كدا .. ومتزعلهاش والعبي معاها 
تالا : مش بحب العب  ف التراب انا
قمر : خلاص ياحبيبتي ابقي لعبيها معاكي  باللي بتحبيه مفهوم 
تالا : اوكيه 
زين : قمر ركزي مع البنات لو سمحتي 
قمر :  حاضر
 عايدة جاية تجري : ياست قمر .. ياست قمر الحقي 
قمر : في ايه ياعايدة 
عايدة : المدرسة كلمتني وقالتلي  انهم عايزينك ضروري .. 
قمر : عايزيني ضروري .. خير ايه حصل تونة جرالها حاجة 
عايدة : بيقولو انها اتعاركت وهي عند المدير  وعاوزين ولي امرها  .. 
زين : الللله اكبرررر 
قمر : اتعاركت ليييه 
عايدة : والله معرف ياست قمر .. روحي بنفسك وشوفي 
قمر : طيب انا هلبس بسرعة وراحة 
زين : استني هنا هتروحي فين 
قمر : هروح اشوف فتون يازين 
زين : انا مش لسه قايلك خلي بالك من بناتك .. هتمشي وتسبيهم كدا 
قمر : وفتون بردك بنتي زيها زيهم وانت عارف كدا كويس  يازين
زين : طيب اهدي  .. انا هروح اشوفها وخليكي انتي مع البنات 
قمر : ماشي بس طمني  ليكون حصلها حاجة 
زين : حاضر 
________________________________________ 
 المديرة : ممكن افهم ايه اللي حصل 
المدرس : حضرتك انا دخلت الفصل لقيتهم بيضربوا بعض ومعرفش ايه السبب 
المديرة : انتي مين
تونة : انا فتون 
المديرة : في سنة كام انتي 
تونة : في 2 اعدادي 
المديرة : وايه اللي خلاكي تروحي عند ثانوي .. وكمان تمدي ايدك عليهم  
تونة : البت دي متربتش وانا كنت بربيها 
المديرة : اخرسي بنت قليلة الادب .. ازاي تقولي ع بنتي كدا .. 
تونة : ماهي كلمة الحق بتزعل 
المديرة : ايه اللي حصل ياداليا اتكلمي 
داليا بتتصنع العياط : انا معملتش حاجة ياماما .. انا كنت واخدة اسكتش كريم انقل منه وبرجعهولوا .. لقيتها هي اتهجمت عليا ضربتني من غير سبب 
تونة : لا ياشيخة اتهجمت عليكي من غير سبب .. انطقي يابت بدل مااجيبك من شعرك تاني وامك اللي هناك دي مش هتعرف تخلصك من ايدي
داليا : شايفة ياماما بتقول ايه 
المديرة ضربت ع المكتب بايديها : بس انتي وهي .. وانتي ايه الاسلوب والطريقة البلدي اللي بتتكلمي بيها دي ..  ازاي طالبة ف مدرستي بالاسلوب دا .. 
تونة : هنسيب بقا الموضوع الاساسي ونمسك في اسلوبي .. 
المديرة : وهو فين الموضوع اصلا .. البنت خدت من زميلها الكشكول بتاعه .. انتي بتدخلي ليه 
تونة : ماتشوفي ياابلة بتك كاتبة ايه لكريم ف الاسكتش  وبعدين اتكلمي 
المديرة فتحت الاسكتش وبصيت لبنتها .. : ماله مافيهوش حاجة .. 
تونة بعصبية : ازاي يعني انا متاكدة ان فيه وكانت كاتبة بحبك ياكيمو .. هاتي وانا اوريكي
 المديرة : وانا قولت مافيش حاجة مكتوبة .. خدي الكشكول دا يامِس رحاب  .. 
كريم : بس فتون مبتكذبش وكان مكتوب فعلا
المديرة : كريم ياحبيبي انت ايه موقفك هنا .. اطلع ع فصلك 
كريم : انا مش هسيب فتون 
المديرة : مالهاش لازمة وقفتك هنا.. انا هخليها لحد مايجي ولي امرها ..  داليا ياحبيبتي خدي صحابك وكريم و روحي ع فصلك ..
تونة بعصبية : اااه دانتو مطبخينها  بقا ... طب والله لافتحلك دماغ بنتك ولسه بتهجم علي داليا كريم مسك تونة والمديرة وقفت قصاد بنتها 
المديرة : انتي اتجننتي ايه اللي بتعمليه دا  .. فين ولي امرها .. انا هرفضك ومش هخليكي تدخليها تاني .. 
تونة : يعني هترفضيني من البيت الابيض ..  اوعا ياكريم والله ماهسيبهم 
المديرة : اخررررسي قولت .. انتي  شكلك مالكيش اهل و مشوفتيش تربية ف حياتك كلها ..( تونة الكلام وجعها ودمعت هي فعلا مالهاش اهل )  .. وانا هوريكي ازاي تعملي كدا ف بنتي 
السكرتيرة : زين بيه  .. ولسه بتكمل  كان زين دخل ع صوت المديرة .. 
المديرة عدلت من نفسها : زين بيه اتفضل .. اهلا وسهلا .. ليه كلفت نفسك وجيت .. كريم معملش حاجة دي هي البنت دي .. ومتقلقش انا خليتهم يبلغوا ولي امرها وزمانه جاي دلوقتي 
زين : انا ولي امرها 
المديرة بصدمة : حضرتك ولي امرها ! 
زين : اه انا ولي امرها .. فتون عملت ايه 
المديرة : لا معملتش دا سوء تفاهم بس .. 
زين : وسوء التفاهم دا يستدعي ان حضرتك تقوليلها مالكيش اهل ومشوفتيش تربية !! 
المديرة : استاذ زين .. البنت اسلوبها وحش و ..  
زين : دا ميدكيش الحق انك تعاملي طالبة بشكل دا .. وحضرتك كلمتينا  يبقا تستني لحد مانيجي وتعرفينا واحنا نعاقبها العقاب اللي تستحقه مش تهينيها انتي .. 
المديرة : طيب يااستاذ زين مش تفهم الاول اللي حصل .. البنت ضربت زميلتها قدام الفصل كله و 
زين : ضربتها ليه بقا 
المديرة : من غير سبب 
تونه : دي بتكدب يازين والله وبتداري ع بنتها 
المديرة : شايف الاسلوب يااستاذ زين 
زين  بص لفتون :  ممكن متتكلميش طول مانا واقف 
تونة : حاضر
زين :  كريم احكي اللي حصل
"كريم حكي كل اللي حصل" 
المديرة : بس انا شوفت بنفسي يااستاذ زين ومكنش في حاجة مكتوبة 
زين : طيب انا عاوز اشوف انا كمان ايه اللي في الاسكتش 
المديرة اتوترت : مش موجود .. انا عطيته للمس 
زين : بسيطة خلي المس تيجي وتجيب الاسكتش ونشوف مين غلطان .. ولو فتون لوحدها غلطت انا هسييك تعاقبيها وانا كمان هعاقبها .. بس لو الاتنين غلطانين بنت حضرتك كمان هتتعاقب 
المديرة :  المس مشيت خلاص  
زين : جميل  .. انا بقا عاوز اسحب ورق كريم وفتون دلوقتي .. 
____________________________________
 صافي : انتي يابنتي هنا وانا قالبة عليكي الدنيا 
ليل : انتي ايه اللي نزلك مش الدكتور  قالك بلاش حركة كتير 
صافي : اسر كلمني وع اخره منك .. انتي ايه يابنتي جبلة ماترحمي الولد بقا  عاوز يفرح
ليل : هو اشتكالك مني .. طيب مافيش   حاجة بقا قبل سنتين بس كدا 
صافي : يلااااهوي لا حرام عليكي والله هولد بسببك 
ليل بتضحك : انا مش فاهمة انتو مستعجلين ع ايه بس 
صافي : مستعجلين ع ايه ؟؟ فوقي يا ليل انتو داخلين ف 6 سنين مخطوبين .. 
ليل : وايه يعني مانكملهم 10 
اسر دخل : نعععم ..  ( صافي اتخضت ومسكت بطنها كأنها هتولد وليل استخبت وراها ) .. عشر ايه .. انا سمعت صح .. قالت 10 سنين  
صافي : لالا انت سمعت غلط .. دي بتقول 10 شهور 
اسر بعصبية : ولا 10 ايام حتي
ليل : يعني ايه يعني هتتجوزني غصب 
اسر : بقولك ايه متجننيش عليكي .. 6 سنين يامفترية وف الاخر تقوليلي غصب .. 
صافي : هولد هولد 
ليل : صلي ع النبي دانا بهزار معاك .. انت  بقيت قفوش ليه كدا 
اسر : دانا كان زمان معايا علي و ملك  دلوقتي 
ليل : مش للدرجادي 
اسر بعصبية : انا رايح دلوقتي ابلغهم ان الفرح بكرا .. ويويلك لو سمعت منك اي اعتراض انتي فاهمة 
ليل بخوف  : فاهمة فاهمة ( اسر مشي ) 
ليل استوعبت : ايه دا هو قال بكرا ؟ 
صافي : اه 
ليل : بكرا .. بكرا يعني ..  استنا يااااسرررررر  نتفاهم طبببب 
______________________________________
 قمر : تونة  ياحبيبتي .. ايه حصل .. حد عملك حاجة .. 
زين : ودي حد يعمل معاها حاجة دي .. دي ضاربة بنت المديرة واصحابها شوية كانت هتضرب المديرة نفسها 
تونة : كان نفسي والله 
قمر : ليه كل دا 
زين شاور ع كريم : علشان خاطر  البيه  .. بس متقلقيش هي المديرة لما عرفت ان فتون تبعي اتعدلت .. وحلينا الموضوع ف الاخر .. لو كنتي انتي روحتي كان زمانها طردت تونة 
قمر : في ستين داهية وادخلها مدرسة احسن منها 
كريم : لا بس انا مكنتش اعرف ان تونة بتغير عليا اوي كدا 
تونة قامت زي المجنونة : اااااه فكرتني .. تعالالي بقا انت   كمان .. 
كريم استخبي ورا زين : ايه في ايه والله ما عملت حاجة 
تونة : بتدييها الاسكتش ليه ... انا مش مفهماك انك متقربش لواحده علشان مولعش فيك وفيها 
كريم : حصل 
تونة  : اووومال مبتسمعش الكلااام ليييه 
قمر : صلي ع النبي ياتونة ياحبيبتي .. معلش سامحيه 
تونة : هههاييي اسامحه .. دا يومه ازرق .. بقا البت تقولك ياكوكي وبحبك ياكيمو .. 
زين بص لكريم : هي البت قالتلك كدا بجد
كريم : اه 
زين : ياواد ياكريم انت يامدوب قلوب البنات 
كريم  ضحك : اومال انت فاكر ايه .. دانا اعجبك اوي 
زين : حبيب اخوك 
تونة  مسكت طبق كان قدامه :  طب تعالالي بقا ياحبيب اخوك انت واخوك 
كريم : والله بهزار بهزار
زين : دي هتفتح دماغنا احنا الاتنين دي ولا ايه  .. لا انا عندي بنات عايز اربيها 
قمر مسكتها : اهدي خلاص ياتونة علشان خاطري انا .. انتي هتاخدي ع كلامهم .. اطلعي ياحبيبتي غيري هدومك 
زين : اه ونبي وانزلي لما اللي عليكي دا ينصرف .. 
تونة : مااشي ماااشي .. ( حدفت الطبق ع الارض ناحية رجل كريم وكريم نط علشان ميجيش فيه )
زين : اخويا حبيبي حصلك حاجة 
كريم : لا الحمدالله سليمة سليمة 
قمر : وانت وهو ممكن تخفوا ع البت شوية بقا 
كريم : والله ماعملتلها حاجة انا ف حالي 
قمر : لا ياولا .. وايه حكاية كوكي دي 
كريم : انا متفجأ زيكم والله  .. عن اذنكم بقا اما الحق اروح اصالحها 
زين : يخربيتك انت رايح فين .. دانا مصدقت انقذتك منها .. هتروح للموت برجليك 
كريم : انا لو مروحتش وراها خلال خمس دقايق .. احتمال تولع فيا وفيكم وف البيت كله 
زين : لا إذا كان كدا .. ف اتكل ع الله انت .. هتوحشني والله يااخويا
اسر : فين بابا 
زين : بابا ف اوضته .. خير في حاجة 
اسر : اه انا هتجوز بكرا 
قمر وزين : نعععععم !!!!! 
__________________________________ 
كريم : تونة استني 
تونة : ايه اللي جابك ورايا .. مش انا مجنونة  ووحشة وبتستخبي ورا زين مني .. عاوز ايه 
كريم : انا بهزار ياتونة .. هو انتي في زيك .. اي نعم مجنونة فعلا .. بس ع قلبي زي العسل .. وبعدين مانا دافعت عنك   قدام المديرة .. ودا اكبر دليل اني ماليش علاقة بداليا 
تونة : انت بتذكر اسمها قدامي تاني 
كريم : لا خلاص بقا متزعليش ياستي ها .. يلا دورك انتي بقا صالحيني ع الاهانة اللي اهانتهالي قدام زميلي اللي ف المدرسة وقدام زين وقمر 
تونة : والله  انا اصالحك .. طيب غمض عينك كدا ياحبيبي 
كريم :  دي شكلها هتبقا مصالحة حلوة اوي .. 
تونة : اوي اوي ياحبيبي 
كريم غمض عينه : ها يلا 
تونة زقته ف البسين : ايه رايك بقا 
كريم : يخربيت جنانك 
تونة : ايه رايك ف المصالحة دي .. ابقا خلي داليا تيجي تطلعك .. ياكوكييي 
__________________________________
 كنزي : ايه دا حازم  .. ايه رجعك بدري كدا 
حازم : حضري نفسك علشان نازلين نشتري حاجات الفرح 
كنزي : فرح مين 
حازم : اسر وليل فرحهم بكرا 
كنزي : بتهزاررر 
فارس : هييييييه .. يعني هشوف تالين بكرا 
كنزي: روح يافارس كمل الهوم ورك بتاعك وسبني اتكلم مع بابا 
حازم : هوم ورك ايه .. مافيش وقت يلا اللبسي انتي وهو علشان نلحق 
كنزي : نلحق ايه انا مش فاهمة حاجة 
حازم : يلا بس وانا هفهمك ف الطريق .. بسرعةةة 
كنزي : حاضر 
________________________________
نور داخلة الفيلا :  ايه اللي سمعتوا دا .. اسر هيتجوز بكرا 
قمر : اه 
نور : دا بيهزارو  ..  طب مقالوش من بدري ليه 
قمر : لسه القرار طالع انهاردة 
نور : لا دول مجانين 
قمر : اخوكي مجنون لوحده هو اللي قرار .. انا اختي معملتش حاجة 
نور : طب بابا قال ايه .. وهنلحق نعزم الناس امتا .. ولا نحضر نفسنا احنا .. والقاعة وكل دا هيترتب امتا
قمر : هو قال كل واحد يركز ع نفسه وبس وهو عامل حساب كل حاجة .. 
نور : دا شكله مخطط من زمان .. وهيزنقنا احنا بقا .. بس والله فرحت .. اخيرا المجانين دول هيتجوزوا .. 
قمر : الحمدالله علشان نخلص من زن اسر بقا 
نور : المهم دلوقتي .. انا جاية اخدك انتي وتالا وتالين  وطنط هدي  وتونة علشان ننزل نشتري الفساتين مع بعض.. يلا اطلعي اللبسي وقوليلهم
قمر : حاضر
__________________________________
 اسر : انتي قعدة بتعملي ايه 
ليل : افندم عاوز ايه تاني .. مش عملت اللي انت عايزه وانا معترضتش 
اسر : قدامي علشان نجيب فستانك 
ليل : مش عاوزة انا هحضر كدا 
اسر : بالبيجاما 
ليل : اه بالبيجاما
اسر : ليل متعصبنيش  ويلا اللبسي 
ليل : فستان ايه دا اللي هختاره ف يوم مش فاهمة .. دا استحالة القي الفستان اللي بحلم بيه ف الساعات دول انت عاوز تكروتني بقا 
اسر : تعالي بس وانا هجبلك اللي انتي عايزة وبتحلمي بيه حتي لو ف اخر الدنيا .. وعمري ماافكر اكروتك وبكرا هيكون احلي من مليون فرح اتمنتيه 
ليل ابتسمت : ماشي اخرج علشان اغير هدومي 
اسر : استني طيب اقعدي لما نكلم وليد 
ليل : اااه صح وليد .. دا مش هيلحق يجي .. انا بقول نأجلها احسن 
اسر : دا ف المشمش هتتأجل .. اترزعي هنا نكلموا متتحججيش 
ليل : حااااضر 
فتحوا الكاميرا 
وليد :   واحشنييي   اوي والله العظيم ..  عامل ايه  
اسر : وانت والله واحشني ياصاحبي
ليل بتشاور بايديها : هاااي وليد عامل ايه 
وليد :  وليل كمان  موجودة ..  
اسر : اه ماحنا مكلمينك علشان نبلغك ان فرحنا بكرا 
وليد بفرحة : بتتكلموا بجد .. اخيرا بقا  قررتوا  .. 
ليل : والله هو اللي قرار لوحده
اسر : عقبالك انت كمان ماتقرر 
وليد : لا انا خلاص كدا  تمام .. مرضي الحمدالله 
ليل واسر بصوا لبعض بزعل : الله يرحمها 
وليد  : يارب ( حاول يغير الموضوع ) ... المهم ..  طبعا انتو هتعذروني اني مش هقدر احضر بس اوعدكم هنزل قريب وهجلكم 
اسر : انا فاهم ياصاحبي متقلقش .. تيجي بالسلامة .. ان شاءالله 
وليد : الله يسلمك .. طب اسيبكم انا بقا علشان اكيد وراكم حاجات كتير .. يلا سلام 
اسر وليل شاورلوا بايديهم : بااااي 
__________________________________
 قمر بتخبط ع باب اوضة تونة : ممكن ادخل 
تونة : لو كريم بعتك ف انسي .. انا مش عاوزة اكلموا خالص 
قمر : من غير ماتتعصبي كريم مش بعتني .. انا جيالك ف حاجة تانية خالص 
تونة : خلاص طلما مش كريم يبقا ادخلي .. 
قمر : كنت عاوزة اطلب منك طلب صغير خالص 
تونة : ايه هو ؟
قمر : بصي بصراحة كدا سائر كلمني و. .  
تونة : من غير ماتكملي مش موافقة 
قمر : مش لما تعرفي الاول 
تونة : عارفة ياقمر .. الموضوع اللي بتكلميني عليه بقالك سنين ..وبردك مش بوافق عليه .. مش فاهمة بتفتحي تاني ليه
قمر : علشان دا حقك ياحبيبتي 
تونة : لا دا مش حقي ياقمر 
قمر : لا حقك ياتونة .. افهمي خالك عاوز يكفر عن اللي عمله ف اخته ويديكي كل نصيبها ويعوضك اللي معملهوش مع اخته 
تونة : يكفر عن ذنبه بعيد عني .. انا ماليش علاقة لا بيه ولا باخته 
قمر : ازاي مالكيش علاقة يا تونة .. انتي بنتها ياحبيبتي 
تونة بعصبية  : انا مش بنت الست دي ياقمر .. ومتقوليش كدا تاني .. لا يمكن اقبل الست دي تكون امي .. ( دمعت ) انا من وقت مافتحت عيني مشوفتش غيرك انتي وليل ومعرفش غيركم ومش عاوزة اعرف حد غيركم ..  انا مش بنت الناس دي .. انا شهادة ميلادي مكتوب فيها فتون عبدالحميد صالح وامي اسمها غادة .. يعني انا اختكم وبنتكم انتو مش هما 
قمر حضنتها : طيب اهدي متعيطيش .. والله ياتونة انا بعمل كل دا علشانك انتي .. الفلوس دي حقك 
تونة : مش عاوزة من وشهم حاجة .. انا عاوزة افضل بنتكم انتو بس  
قمر  : خلاص متزعليش مني .. انا اسفة مش هتكلم ف الموضوع دا تاني .. يلا نامي دلوقتي علشان ورانا مواال بكرا 
تونة مسحت دموعها : ماشي تصبحي ع خير 
قمر : وانتي من اهله ياروحي 
__________________________________
زين : البنات ناموا 
قمر : اه  تعبوا من المشوار و اكلوا وناموا 
زين : مالك انتي شكلك  زعلان
قمر :  مافيش .. لسه جاية من عند تونة وكنت بكلمها ع حوار ورث امها .. بس هي اتضيقت وعيطت .. وانا زعلت اني ضايقتها 
زين : ماتكبري دماغك ياقمر من الموضوع دا .. خلاص هي مش عاوزة متجبرهاش 
قمر : والله مابجبرها بس دا حقها 
زين : وهي مش عاوزة يبقا خلاص .. وبعدين هي ممكن تفهم اصرارك دا بمعني تاني 
قمر : معني ايه ؟
زين : انك مش عاوزة تصرفي عليها مثلا 
قمر : لا والله دا مش قصدي خالص .. دي لو فهمت كدا تبقا عبيطة .. يعني انا كنت متحملة مسئوليتها وقت مكان معيش فلوس وهاجي دلوقتي لما ربنا كرمني وارميها .. دا كله الا تونة .. انت عارف دي بعتبرها بنتي 
زين : ياحنين انت .. ماتدينا شوية حنية من اللي بتوزعها ع الناس كلها دي 
قمر : ليه وانا بقا مش حنينة معاك ولا ايه 
زين :  لا 
قمر : احسن بردك .. ( بتتاوب ) يلا بقا انا هنام 
زين : انتي رايحة فين استني .. 
قمر : افندم 
زين :  انتي مش بتقولي البنات نامت وكله نام 
قمر : اه 
زين : طب ايه بقا ..( بيغني )  الجو هادي خالص والدنيا هص هص .. وانا وانت ياحبيبي ياحبيبي .. ونجوم الليل وبس
قمر : خلصت  فقرتك .. تصبح ع خير 
زين : استني انتي راحة فين ..  انا مش بكلمك 
قمر : بكرا الفرح وهنصحا بدري .. 
زين : وانا مالي ومال الفرح 
قمر :  اتمسي ياحبيبي .. اتمسي ونام الله يهديك 
زين : اتمسي ! 
قمر بتتاوب تاني : يلا تصبح ع خير يازين 
زين : وانتي من اهله .. دانتي وش فقر 
قمر : بتقول حاجة ياحبيبي 
زين : لا بكح بكح 
قمر :  لا الف سلامة .. اتخمد بقا 
زين : حاضررر
_____________________________________
 " يوم الفرح " 👰🤵
هدي واحمد واقفين يستقبلوا الناس 
احمد : اهلا اهلا فاروق بيه ..  منور والله اتفضل 
فاروق :  المكان منور باصحابه .. مبروك ياهدي 
هدي : الله يبارك فيك يافاروق 
صافي  جاية تجري : ماما عاملة ايه 
هدي :  ع مهلك ياحبيبتي .. انتي عاملة ايه وحشتيني 
صافي : وانتي كمان والله 
عزيز : مبروك  
هدي : الله يبارك فيك ياحبيبي .. اتفضلوا اتفضلوا 
زين : اهلاااا .. باشا مصر تعالي 
حازم سلم عليه : حبيبي عامل ايه .. بقا دي عاملة اخوك يعملها بردك كدا تفجأونا 
زين : والله احنا نفسنا اتفجأنا 
هدي : كنزي عاملة ايه ياروحي .. ولي لي عاملة ايه 
كنزي : الحمدالله كويسة .. لي لي مزهقاني والله مبنامش منها 
هدي : ياحبيبتي ربنا يخليهالك .. منورة والله يافريال 
فريال : بنورك ياحبيبتي .. مبروك وعقبال ماتفرحي بعوضها 
فارس : فين تالين ياطنط هدي  
 هدي : تالين وتالا  جوا ياحبيبي روح العب معاهم  
كنزي : ليل خلصت ولا لسه 
هدي : لا لسه فوق  نور وقمر  عندها .. تعالي نطلعلهم 
فريال : طيب اطلعوا انتو وانا هدور ع نجلاء .. خلي لي لي معايا ياكنزي 
كنزي : ماشي ياماما .. خليبالك منها 
فريال : دي ف عنيا حبيبت تيتا 
_________________________________
ليل لابسة فستان رقيق اوي ب  كوم تل   ومن تحت  منفوش وطويل اوي من ورا .. ولابسه تاج شبه الاميرات بالظبط .. قمر واقفة قدامها والاتنين بيبصوا لبعض ومدمعين  
قمر : عاوزة اخدك ف حضني .. بس خايفة ع الحاجات الجميلة دي تبوظ
ليل حضنتها :  فداكي الف حاجة ياقمر 
قمر بتعيط : ياحبيبتي  الحمدالله عشت وشوفتك وانتي بالابيض .. جميلة ياحبيبتي 
 .. (ليل هي كمان عيطت) .. مش مصدقة والله .. بقا ليل  اللي كنت بعملها ضفاير وهي صغيرة واكلها .. كبرت وبقيت عروسة .. لا وايه أجمل عروسة ف الدنيا .. انا مشوفتش حد ف حلاوتك دي .. يابخته اسر بيكي  
نور : انتو هتخلوني اعيط انا كمان ليه بقا .. 
تالا : كفاية بقا يامامي .. كدا هتبوظيلها الميكاب بتاعها
قمر مسحت دموع ليل بايدها  : لالا مافيش عياط انهاردة فرح بس  .. (بعد مامسحت دموعها عيطت تاني ) .. لا مش قادرة .. هتوحشيني اوي 
ليل : وانتي كمان والله 
نور :  هي هتهاجر يا قمر .. دي هتتجوز ... تعالي ياطنط هدي الحقيهم 
هدي دخلت : بسم الله مشاءالله والله اكبر ( دمعت ) ياحبيبتي ايه الحلاوة دي  (حضنت ليل )
نور : انا جيباكي تلحقيهم ولا تعيطي 
كنزي : خلاص ياجماعة هتخلوني اعيط انا كمان والله وانا مابصدق اتفتح انتو عارفين 
قمر مسحت دموعها : لالا خلاص مش هنعيط .. وانتي كمان ياليل متعيطيش خلاص ياحبيبتي 
ليل : مش قادرة .. مش متخيلة اني هسيبكم خلاص .. والله الغي الموضوع 
اسر : احم احمم .. بتقولي حاجة 
"ليل استخبت قبل مايشوفها"
نور : لا مبتقولش .. انت ايه جابك محدش بعتلك 
اسر : مانا لقيتكم مبعتوليش قولت اجي انا بنفسي اتفرج .. هي فين  
كنزي : هربت 
اسر : للاسف مش هتعرف مكهرب سور الڤيلا كله وحطتلها اسلاك شائكة ..  تعالييي يابتت هنا 
قمر. : ايه دا ايه دا انت بتزعق لاختي وانا واقفة .. مافيش احترام ليا خالص .. طب احترم حماتك طب .. لالا الجوازة دي مش عجباني .. احنا نلغيها 
اسر : نااااعم تلغي ايه دانا مصدقت 
نور : خلاص بقا ياقمر معلش 
قمر : لا يانور لما بيزعق لاختي دلوقتي .. بكرا تجيلي مضروبة بقا 
اسر : والله مااقدر 
نور : خلاص ياقمر هو اعترف بغلطته مش هيعمل كدا تاني 
كنزي : معلش ياقمر  حرام خليه يفرح 
قمر : ان مكنتش تحلفوا .. خلاص هعديهالك 
اسر : الله يكرمك ياشيخة .. روحي الله يستر عرضك 
نور : خلاص يا اسر انت هتشحت 
اسر :  ماتخرجي بقا يا ختي هنلعب استغميا من دلوقتي 
قمر : بتقولها ماتخرجي يا ايه ؟
اسر : ياليل ياحبيبتي .. ياحبيبت قلبي 
قمر : اه بحسب .. تعالي يالولو ياحبيبتي علشان منتأخرش ع الناس 
ليل ظهرت واسر تنح :  ايه القمر دا .. يخربيت جمالك 
ليل اتكسفت ونزلت وشها ف الارض 
اسر : انتي مكسوفة   
قمر : اه بنتنا خجولة ف المواقف اللي زي دي 
اسر : لا بس طلعت نينچا ف فستان الفرح .. ماهو انا مكنتش مستعجل من شوية بردك ( مسك ايد ليل وباسها ) ايه الحلاوة دي .. ( مسك ايدها التانية ) ايه الجمال دا .. ( لسه بيقرب عند وشها ) ايه ال 
قمر شدته : تعالي ياحبيبي رايح فين .. هي هيصة ولا ايه (الكل واقف بيضحك) 
اسر : في ايه ياقمر مش مراتي وبراحتي .. ماتشهدوا ياجماعة 
قمر : لسه الكتب كتاب يا حبيبي 
اسر : اه صح ..  وانا اقول ناسي ايه  .. طب احنا مستنين ايه  يلا بينا 
قمر : قدامي 
اسر : حماتي حماتي يعني مش هزار 
نزلوا وكتبوا الكتاب   و بيرقصوا سلو والكل حواليهم فرحان 
وكريم واقف جنب تونة وهي بتبعد عنه وهو بيروح وراها 
تونة : ايه الغلاسة دي .. ايه موقفك جنبي 
كريم : الجو جميل اوي هنا 
تونه : لا والله 
كريم : بس مقولتليش بقا ايه الحلاوة دي
تونة : ممكن متتكلمش معايا 
كريم : حاضر .. بس مقولتليش بقا ياجو ايه الحلاوة دي 
تونة ضحكت 
كريم : ايوة بقا ياجو يابو ضحكة حلوة انت 
تونة قلبت وشها : اقف وانت ساكت بقا 
كريم : حاضر 
" رقصة السلو خلصت واشتغلت اغنية تانية اسر كان بيهديها لليل  الاغنية بدءت "
اسر بيغني معاها وبيبص لليل : 
تعالا بس قرب اقوللك كلمتين
 .. قلبي مشتاق اليك .. قلبي مشغول عليك .. ( غمز لليل ) .. قلبي من حبه فيك على طول سهران ( ليل واقفة بتضحك ع الي اسر بيعملوا وفرحانة ف نفس الوقت والكل واقف حواليهم بيرقص  ) 
زين بص لقمر : نسيتك قولت اجرب لقيت زاد الحنين .. فيا لعب الهوى .. بيا وانا في الحاجات ديا .. ( اتصنع العياط ) غلبان اوي والنبي غلبان .. وحياتي تيجي بقى وتكملني.. وكفاية كده بقى هتجنني .. ايه الحكاية بقى ما تفهمني .. قوللي بتحبني ولا انت نسيت زمان
كريم بص لتونة : امانة عليك تميل وتسأل عامل ايه  
مالي ! ( تونة رفعتله حاجبها )
في البعد ايه جرالي
والله انشغل بالي
دايما كده مش مدي امان
بختي معاك قليل عملت لقلبك ايه
قوللي ! 
يرضيك ده يحصللي
اه من هواك يللي
خلتني مش مرتاح في مكان ( تونة ضحكت وبدءت ترقص مع كريم بمعني انها اتصالحت  ) ..  وحياتي تيجي بقى وتكلمني
وكفاية كده بقى هتجنني
ايه الحكاية بقى ما تفهمني
قوللي بتحبني ولا انت نسيت زمان .. 
قمر بعدت عن الرقص والاغاني شوية : وكدا ياحلوين تبقا حكايتي خلصت بنهاية سعيدة ع الكل .. ويارب حكايتكم كلكم  تكون مليانة سعادة وفرح .. وتفضلوا مع الناس اللي بتحبوهم دايما ...  مبسوطة انكم تابعتوا حكايتي .. 
زين : قمرر ياقمر   ... تعالي بندور عليكي 
قمر : بكلم الناس يازين .. في ايه 
زين : ناس مين انتي اتجننتي 
قمر : الناس الي بتتابع حكايتي .. اهم سلم عليهم .. دا زين جوزي طبعا عارفينه
زين : مش وقته دلوقتي  يلا علشان هنتصور كلنا 
قمر : عيب كدا يازين الناس تزعل منك 
زين : لا مش هيزعلوا مني .. مش انتو مش هتزعلوا ؟ 
اهو قالوا اه يلا 
قمر : ماشي .. يلا سلام بقا علشان ارجع الفرح .. هتوحشوني 
قمر : فين ماما 
هدي : انا جيت اهو ياقمر 
قمر : تونة واقفة 
تونة : اه موجودة اهو 
قمر : عايدة فين نسيتوا عايدة 
عايدة : انا اهو ياست قمر 
ليل : خلصي ياقمر واثبتي  عاوزين نتصور بقا 
قمر : ماشي ماشي يلا 
الكل واقف جنب بعض 
ليل واسر ف النص جنب ليل هدي و قمر  وزين وجنبهم حازم شايل لي لي وجنبه كنزي ونجلاء وفريال وسامح وعايدة  وجنب اسر احمد وجنبه نور وجنبها سائر وفاروق وصافي وعزيز  وقدامهم  عربي و تونة وكريم وفارس واقف بين تالا وتالين  .. 
الكل ضحك والصورة اتلقطت .. ووصلنا للنهاية .. واتمني تكون  الرواية عجبتكم ..  باي باي ❤️
تمت الرواية كاملة من البداية اضغط هنا ولقراءة رواية جديدة اضغط هنا عبر دليل الروايات للقراءة والتحميل.
رواية حكاية قمر الفصل التاسع عشر والأخير - ياسمين علي
أيمن محمد

تعليقات

تعليق واحد
إرسال تعليق
  • Unknown photo
    Unknown1 أبريل 2021 في 7:33 م

    من اجمل الروايات إللي شوفتها في حياتى بجد يعني حلوه اوي⁦♥️⁩⁦♥️⁩

    حذف التعليق
    google-playkhamsatmostaqltradent