قصة رسالة الواتس كاملة جميع الفصول من الفصل الأول إلى الأخير بقلم الكاتب المصري المبدع محمد السبكي، وهي قصة مقتبسة من الواقع ومايحدث على تطبيق الواتساب الشهير، قصة رسالة الواتس كاملة وحصرياً عبر مدونة دليل الروايات للقراءة والتحميل Pdf.
قصة رسالة الواتس الفصل الأول
عمري ما كنت اتخيل ان رساله علي الواتساب ممكن تغير حياتي وتهد بيتي الي قعدت سنين ابنيه.....
انا هند وعندي ٣٣ سنه متجوزة قصدي يعني كنت متجوزة وانفصلت ....
عندي ولد وبنت صغيريين ....
انا عارفه ان قرار الانفصال دا كان صعب لكن انا كان لازم أخده مكنش ينفع اكمل بعد كل الي حصل دا....
الموضوع حصل من سنه تقريبا ....
قبل السنه دي عمري ما حسيت ان ابو اولادي ممكن يقدر يخوني او يتخلي عن بيته بالسهولة دي ....
عمره ما حسسني اني ناقصني حاجه بالعكس كان بيقولي اني احلي ست شافها في حياته وكل يوم يفاجئني بكلام حلو اكتر من الي قبله....
لحد ما فيوم كان راجع من الشغل ودخل ياخد دش كا عادته وانا عمري ما كنت متعودة امسك تليفونه او افتش فيه ....
كنت واثقه فيه ثقه عمياء....
لحد ما ابني مسك التليفون عاوز يلعب بيه راحت جاتله رساله واتساب وابني فتحها غصب عنه وانا جمبه...
الرساله كانت بتقول...
_ ها يا حبيبي روحت ولا اتصل بيك....
انا جسمي كله اتشل وفنفس الوقت طلع من الحمام من قبل ما اخد الرقم لكن انا محسستوش ب اي حاجه...
وبعد ما ابني خلص لعب مسك هو تليفونه واكيد شاف الرساله انها اتقرت وكان طول اليوم مش علي بعضه....
وانا كنت هموت بمعني الكلمه وهموت اكتر واعرف مين الي بيكلمها عليا وايه الي بينهم.....
لحد ما جاتلي فكرة اعرف بيها مين الي بيكلمها.....
انا هراقب الواتس بتاعه علي تليفوني....
استنيت لما نام بليل ومسكت تليفونه وصورت الشفرة عندي وبكده كل الرسايل الي بتوصله بتوصلني انا كمان.....
صحي الصبح وراح الشغل كا عادته وانا كل دا مش محسساه ب اي حاجه نهائي بالعكس انا اهتميت بيه اكتر من الاول عشان ميشكش لحظه اني عرفت حاجه..
اول ما نزل فتحت تليفوني بسرعه مستنيه اي رساله تتبعت او حد يبعتله عشان اعرف مين وبالي يرتاح ...
بقيت اقول يارب اطلع ظلماه والي شوفته دا يكون كابوس....
بس الي كان مشككني اكتر اني لما فتحت الواتس علي تليفونه بليل لقيت الرساله اتمسحت من عنده يعني اكيد في حاجه غلط بتحصل......
فضلت مستنيه ساعه لحد ما لقيته بعت لرقم....
_ حبيبتي انا وصلت الشغل....
هنا اتأكدت من ان فعلا مش بيتهيألي .....
خدت الرقم بسرعه ورحت اشوفه متسجل ب اسم مين علي التروكولر وكانت الصدمه..
الفصل الثاني
كتبت الرقم والصدمة انه لقيته متسجل ب اسم جوزي ....
بقيت محتارة ياتري هو جايب الخط ده ب اسمه ومديه لمين ومين دي الي بيكلمها عليا وشاريلها خط ....
قررت اني هسكت خالص وهحاول اراقبه من بعيد....
والرقم دا انا مش هحاول اتصل بيه عشان ميحسش ب حاجه او اني عرفت ...
اليوم دا جوزي رجع مدايق جدا من برة وبسأله مالك...
_ مفيش شويه مشاكل بس فالشغل....
انا متأكده انه مش الشغل اعدت اواسيه وقولت هحاول اخليه ينسي الي بيكلمها جايز كانت نزوة ويتغير ويرجع ل عقلة وبيته وعياله
وفي عز ما احنا بنتكلم جاتله رساله عالواتس جري بسرعه عالتليفون وانا كمان مسكت التليفون اراقبه من عندي وعملت نفسي فاتحه الفيسبوك عادي...
لقيت الرقم ده باعتله ...
_ انت لسه زعلان مني خلاص بقي...
_ ايوة زعلان انتي ازاي تسيبيني واقف كل ده فالشارع مستنيكي ومتجيش.....
_ والله مقدرتش انزل خالص ماما كانت تعبانه وبابا كان مش فالبيت ومعرفتش اكلمك....
_ بس كنتي حتي ابعتيلي متسبنيش واقف كل ده انا كنت هتجنن عليكي افتكرت حصلك حاجه وبعدين انتي وحشتيني اوي بقالي يومين مشوفتكيش...
_ وانت كمان وحشتني...
_ خلاص انا بكرة مش هروح الشغل وهقضي اليوم معاكي هستناكي...
_ ماشي ياحبيبي...
صدمتي كانت كبيرة فيك يا آدم معقولة الكلام دا بتقوله لحد غيري ومين دي الي انت بتكلمها انا اتأكدت انها مش متجوزه عشان عايشه مع اهلها ياترا متفقين عالجواز كمان ورايح تقضي معاها اليوم فين بكرة ولا يمكن اصلا تكونوا متجوزيين
فضلت سرحانه وانا مش واخده بالي لقيته بيندهلي..
_ هند ...هند .. مالك سرحانة في ايه ....
_ لا ابدا اصلي دوخت شويه هدخل اريح....
_ تعرفي انك حلوة اوي النهاردة...
ابتسمتله ومردتش عليه ودخلت الاوضه بتاعتي اعدت ابص فالمرايا ياتري انا ناقصني ايه ليه يكلم واحده عليا انا لازم انهي الموضوع دا انا مش هفضل ساكته كتير
قررت اني خلاص هنزل بكرة واراقبه عشان اعرف مين الي بيقابلها دي ...
كلمت سواق اتفقت معاه يجيلي بكرة من بدري يستناني في شارع جمب البيت وقولتله اني هديله المبلغ الي هو عاوزه بس يسكت وميقولش لحد ....
جوزي دخل الاوضه عملت نفسي اني جالي دور برد وتعبانه جدا عشان يتطمن اني هبقي نايمه وقولتله اني هعمل تليفوني سايلنت عشان اعرف انام ....
ونزلت ابليكيشن عندي وهو كان فالحمام عملتله موافقه من تليفونه يعرفني هو فين بظبط والموقع بتاعه ...
لبس ونزل ومتشيك طبعا عشان يقابل الهانم وانا قومت بسرعه لبست عباية بتاعه والدتي الله يرحمها عشان متأخرش ونزلت وفضلت ماشيه وراه عن طريق التليفون لحد مالقيت عربيته راكنه عند كافيه كبير في المعادي....
قولت للسواق يستناني هنا لحظه نزلت وببص من بعيد كانت صدمه حياتي لما لقيت جوزي قاعد وماسك ايد..
الفصل الثالث
قربت عالكافيه وبصيت من بعيد لقيته قاعد وماسك ايد بنت عمي....ايوة بنت عمي الي زي اختي ....
انا الي دخلتها بيتي ب ايدي ....
كانت اي مشكلة تحصل اكلمها احكيلها واخليها تكلمه تصلح بينا وانا كمان الي كنت بخليه يروح يوصلها للجامعه بتاعتها في طريقه ولما عزلوا من بيتهم انا الي قولتله يشطبلهم بيتهم الجديد لانه بيشتغل مهندس و دا شغله ....
انا الي عملت كل دا في نفسي وانا الي هتحمل نتيجته....
طلعت تليفوني بسرعه وصورتهم
وبعدها
جريت علي السواق قبل ما حد يشوفني خليته روحني عالبيت بسرعه عشان افكر هعمل ايه....
صدمتي فيهم هما ال ٢ كانت كبيرة ازاي هو يعمل فيا كده وبعد كل ال عملته معاها دا جزاتي....
انا لازم اندمهم ندم عمرهم هما الاتنين علي الي عملوه فيا ده....
اول حاجه عملتها كلمت محامي واتفقت معاه اني عاوزه ارفع قضيه خلع بس ميجبش اي سيرة ل جوزي دلوقتي لما الإجرائات تخلص....
وقررت اني هتعامل عادي جدا عشان انا ناويه اندمه علي انه فكر لحظه انه يخونني....
رجع الاستاذ عالبيت وهو في غاية السعادة ....
_ ها يا حبيبتي لسه تعبانه....
_، لا اتحسنت شوية لما شوفتك...
بس انت اتأخرت ليه كده النهارده....
_ الشغل كان كتير مش ملاحق عليه....
حتي اتغديت بره...
_ طيب ياحبيبي روح غير هدومك وتعالا نعد مع بعض....
_ لا انا هنام عشان عندي ارهاق من الشغل...
_ ماشي زي ما تحب....
رحت اتصلت ب بنت عمي اول ما سمعني جري يشوفني بقولها ايه...؟؟؟؟!!!
_ ازيك ياسارة عاملة ايه وحشتيني
_ الحمد لله ياهند انتي وحشتيني اكتر...
_ فينك مختفيه فين ولا بتسألي ولا بتيجي...
_ معلش مشغوله شوية فالبيت...
_ طيب ايه رأيك تيجي بكرة تقضي معايا اليوم هنا فالبيت ونتغدي سوا...
_ ماشي ياحبيبتي هجيلك بكرة ان شاء الله...
قفلت التليفون ولقيته بيقولي ....
_ اشمعنا يعني عزمتي سارة عندنا بكرة....
_ ابدآ اصلها وحشتني اوي بقالي كتير مشوفتهاش....
راحت بعتاله رساله عالواتس...
_ هند عزمتني عندكم بكرة....
_ اه منا عرفت كويس اهو بالمرة اشوفك اصل انتي وحشاني اوي...
_ مانت لسه كنت معايا النهارده...
_ انتي بتوحشيني وانا معاكي اصلا...
كل دا وانا شايفه الكلام وساكته وكاتمه في قلبي وهموت من القهرة علي نفسي وعلي ولادي ....
رحت دخلت نمت عشان ميحسش بحاجه ....
وجه اليوم الموعود الي اخيرا هواجههم بالكلام وكل شيء هينكشف ويبان .. يتبع الفصل الرابع والأخير اضغط هنا