Ads by Google X

رواية كحل عرب الفصل السابع والعشرون 27 للكاتبة زينب ماجد

الصفحة الرئيسية

  رواية كحل عرب الحلقة السابع والعشرون 27 بقلم زينب ماجد

رواية كحل عرب كاملة

رواية كحل عرب الحلقة السابع والعشرون 27 (زواج سرحان)

اوحنت 
وعادة المحب لو يحن يطلب حبيبه
يالتريدين الولف .. ولف الجفاچ منين اجيبه 
درت ليه متعجب ... ردت احجي سبكني شيخ ال مطشر و اهو يكول : احاجي عمامها و يصير خير . 
ظلوا يحجون .. و انا تيهيت .. 
كمت كوة اجرن النفس .. ما عوليت على الله ينهون الحجي و نطلع ... اول ما طلعنا كضيت ابوي : انت شنهو العملته 
- ما اسمع منك ولا حرف 
- شنهي ما تسمع ، بويه انا كوة جريت جدامي و اجيت وياك لجل ما اكسر جلمتك .. تكسرني جدام الشيخ و تكله طالبك . 
- انا شرطت اعليك يو وديت طارش و شريت النهوة و ما رضوا ، ترضى بخطبتي ليك . 
-انا ما كتلك اعرس ، كتلك اجوزن من الموضوع ، تروح تحطني جدام الوادم بهالموقف انا شسوي هسه . 
- تشوف حياتك و تعرس و تنسى سالفة بت حاكم ما اريدنها تنذكر مرت الاخرى . 
- العرس هاذ ما يصير ولا راح يصير ولا ارضى بيه . 
- موش اعلى كيفك ، تعرس و جدمك فوك راسك ، بسك لاهي روحك بسوالف ما منها نفع، بعد يومين يو متت تشيخ اعلى الوادم بعنادك هاذ . 
عفته ومشيت و دمي يفور .. مشيت للشط و انا موجر .. احط الجكارة اعلى شفافي و اجرن نفس منها واحسن كلبي اليشتعل موش راس الجكارة . 
بيا طريقة اخذنها و شسوي ، الوادم رايدتها و انا ما بيدي شي اسوي ، انهبها و اشرد و اخلف العار لهلها و هلي .
طبايعي موش طبايع رديه و لا ارضى بيها . 
ثلث تيام ما شايفها .. و ال ثجيل ردوة الشروة .. و ابوي ءيخطبلي .. يا نار التبرد بدلالي . 
خنجر : انت هنا وانا ادورنك 
- كلبي موجر يخنجر 
- جا شكال البهلول 
- لا تلوم ... ولا اريدن اسمع جلمات العتب واللوم من عبن كلبي ما كمت اهيسنه.  
- انا اخر واحد يلومك ، حالي مثل حالك و اردى ، مورط روحي بعشك ما احصلنه بس باحلامي . 
- ال ثجيل رفضوا الشروة 
- معروفه 
- و ناصر يريد البت لابنه ، و ابوي يخطبلي بنص الشيوخ هههههههههههههههههههههههه تعاين حالي ولك يو لاله .. 
غوركن دموعي و همت ايدي تفرك عيوني 
-كوي كلبك 
- جا غير يو اهيسنه ، هتا موش كلب يخنجر البصدري جمرة  روحي موجره منه . 
- سرحان انت تعرف البت ما منها تالي و تاخذها ، هد البت و خلها تروح بحال سبيلها والوكت جفيل و ينسيك . 
- واعدتها . 
- مو كل الوعود تصح . 
- ان ما صح وعدي ليها ما اريدن غيرها ... ابوي فوك خنكتي جاي يزيدها .. رايدلي ديرة ما بيها احد يخنجر. 
- ليمتها هالحال يسرحان ؟ .. انت تظل بلا عرس و هي نفس الحال .. شناطر وواكف بقسمتها . 
- لا تحرك افادي و تكلي قسمتها ، قسمتها ما تصير ويا غيري . 
- تصير .. ويو ما صارت اليوم تصير باجر . 
كمت من مكاني و صرخت : انت جاي تواسيني يو تزيدها اعليه . 
- انا جاي احطنك جدام الواقع خاطر ما تنصدم بيه و تنكسر ، كتلي العشك ينرادله زلم و انا كتلك عاداتنا و تقاليدنا كصت روس ازلام يابو ازلم خاطر هي تعيش، احفظ روحك يسرحان و اتلاحكلها . 
- انا رايح اخذ جديل و اطلع بر. 
- مصيرك ترد 
مشيت واني مشدوه البال .. خنجر ما فاركني .. لحكني للقطعة الاحطن بيها احصاني .. خذيته .. و هو كال ( وياك ) جريت احصان كريم و اطيته ليه و اخذناهنا و طلعنا .. مشيت لقصر كتله : خل الحصان يمك اروحن اجيبن كسريه الك و الي خاطر نطلع.  
دشيت للبيت الشيخ كاعد .. درت ليه : مفتاح المخزن مالت السلاح وينه ؟ 
- شرايد بيه ؟ 
- رايد الكسريه اخذنها 
- شتعمل بيها . 
- طالع بر 
- ما الك طلع . 
- اكعد يسرحان هد عشكك يسرحان عرس يسرحان طب اطلع روح ارجع ... ليمتها تظل حاط سيفك اعلى زردومي و حاكمني .. الردت اعيشن ابغداد ما رضيت و الكعدت وياك كضيت خوانيكي ... شرايد مني، هدني رحمة للعباس ابو فاضل. 
الخاتون: سرحان 
- نعلت روح سرحان لا تصيحوني بهالأسم لا تصيحوني ، تضكر مرتك شسمتني ... غريب غررررريب انا غريب ابوسطكم موش سرحان . 
الشيخ : انت شمالك تسودنت ولك انا رايد مصلحتك .. ال ثجيل ما يرحمونك . 
- المصلحة ما اريدها و العباس ما اريدها . 
- تصيح بوجه ابوك 
هاذ راسك احبنه ... كربت ليه و حبيته و كتله : بس هدنيييي 
الخاتون : المفتاح اذا عندك انطيه إياه ديروح .. لا تقيده خلي يرتاح . 
الشيخ : يومين و ترد و يو تأخرت غيرهن الك وياك حجي ثاني . 
طلع المفتاح و انطاني خذيته .. ومشيت طلعت كسريه وحدة اليه و الثانيه لخنجر .. و طلعيت من البيت . 
طلعنا بر لجن الجو جان حيل بارد .. 
لا صدنا ولا تهنينا ولا صفالنا بال .. نصبنا خيمة لجن جمدنا ما اتهنينا بالكعدة ... بعدها ليل كتله خنجر كوم 
- خايب وين نتخم بعد .. لا صدنالنه طير حر ولا كعدنا من البرد خلها تطلع الشمس و نطلع 
- ما اكدر 
- وين تريد 
- للشط 
- خايب شيودينا بهالليل نتيه
- انا ما اتيه و اندل الدرب امش . 
- خايب صكن اعضاي من الله لا يطيك جا هو صوجي انا الرضيت اجي وياك هالماحصليت غير الرجيف . 
- دمش يمعود امش .. 
ركبنا الخيل و انطلقنا لجن صكينا من البرد 
وصلت الشط توها طالعة الشمس، انا هديت حصاني و نزلت ع الشط اكعد و هاذ يصيح : اشتعل ابيك بنار و نفط كون و ندفى اعليه .. خايب صكيت من البرد و جايبني للشط . 
- جا ياهو الكاضك ما تروح لبيتك 
- من عوينة ابيك و ابيي من كون تبعتك و اجيت وياك . 
هداني و مشى و انا ظليت جويعد اعلى الشط .. حتى يو اعرف ما تجي .. لجن كتي هنا احسن انا جريب منها و موش بعيد و كلبي يرتع بهالمچان. 
كعدت ليما طلعت الشمس والناس كامت تجي .. كمت و رحت للبيت ، حطيت راسي و نمت .. كعديت العصر ما كابلت احد طلعت للمعمل اخلص الشغل . 
يومين و انا ما مكابل احد ولا شايف احد و روحي احتامت اعلى شوفتها و كل ما يمر بيه الوكت يزيد الشوك ما انسى ، اتنطر الملكى مناطر و هي مامش . 
هذاك آنه.... الكطعتي الماي عنه ..
وعاش باحزانه
هذاك آنه ..الشراع الماكسر نوماس سفانه
اعت روحي .. ويعتها الشوك ..
واشتلها على بيبانه
ابصبر .. بلجن يمرها الطيف ..
ياخذها على جنحانه
يوديها لولف مامون ..
تغفه ابطيب ريحانه
هذاك آنه ....الونينه ايدلي المتيهين .. 
لو ضيعو عنوانه
وعذابه ولا عذاب ايوب ..
مر مره على بيبانه
وهذاك آنه...هرش لو شح عليه الماي ..
كوه ايعيش باحزانه
كوه ايعيش باحزانه 
.... هدية ما جان وضعها اقل من وضع سرحان .. اعلى نفس الشوك و الحسرة و الاه و تمنى الشوف .. وتداري الاه بالاه .. و يلالي الدمع بعيونها .
سرحان اعتزل اهله لا كام يلفي للمضيف ولا يوصل القصر ولا يوكف ويا احد .. حد للمعمل ويرد و فجرية مناطر عد الشط ..
الخبر وصل من ال مطشر و هو ما داري .. و عمام البت رضوا بالعرس خاطر يتجفون حجي الناس و السمعه اللفتهم .. خصوصا التاخذه بت شيخ يعني الجلمه ما تلفيهم 
الشيخ شما يحاول يحظى بسرحان سرحان يتهرب و ما يرضى يجابله .. و الشيخ اطه جلمه و لزوم ياخذ البت . 
مر اسبوع و سرحان اعلى هالحال و الشيخ طك .. مشاله للمعمل .. و سرحان راسه و الف سيف ما يريد يعرس ... شما يحاول وياه الشيخ باللين و العيني و اغاتي و القوة و الغصب .. سرحان ما يتنازل عن موقفه . 
بيوم ٢٢/١٢/١٩٧٧ 
على لسان هدية تكول .. يمكني انسى كلشي و يغيب عن بالي جثير تواريخ ما اذكرنها لجن هاليوم و ان كونه عده لجن لهيبه و ناره اتضكره و جنه اليوم . 
كاعدة و يا اهلي اعلى العشا .. وهم يحجون وانا حسي ما يطلع عبن اصياح كلبي عالي حسه . 
يحجون و يسولفون و انا مدنجة ... شلت راسي لابوي يما نشد امي : تمشين باجر يو لاله ؟ 
- وين 
- لبيت الشيخ موش عدهم عرس . 
- عرس منهو ؟ 
-عرس سرحان 
نشغت من كل كلبي جدامهم .. انتبهولي اثنينهم .. 
خزرتني امي و ردت اعلى ابوي : بالعافيه بس عليش ما ندري عنه ؟ 
- والله انا هم ما ادري كبل شواي اجا حميد و كالي معزوم انت و الاهل . 
كمت من مجاني بساع ، طلعت برا .. اعصابي كلها اتشنجت .. كامت الدموع يهملن لوحيدهن بلا ما اهيسهن . 
شبت بضلوعي النار و الصرخة وكفت ابلعومي لا اكدر اصرخ و ابجي اعليه ولا النار بيه تطفى .
فكيت الباب و طلعت دشيت ابيت ايمان،  و سركيت الباب حيل .. و دشيت داخل و كمت ابجي حيل ، طلعت ايمان : هااااا 
- ولج لحكي اعليييييييه 
- شبيج ، وج فهميني . 
- عرس ولج عرس كليلي شعمل بحالي انا ... 
- عرس منو مفتهمت 
- سرحااااان ولج سرحان باجر عرسه ولج النار شبت بيه ولج راح اموووووتن ...ااااخ يا نار كلبي
ولج يواعدني و يبني بكلبي امال، يثاري اماله رمله و هدهن اعليه . 
- معقول ، لا مستحيل سرحان ميسويها 
- انا سمعت ابوي و لج انا سمعته 
وكمت اصرخ و اضرب اعلى راسي و هي تكلي 
- بس على كيفج خل نفهم الموضوع بالاول 
- يكلي دروبنا طويله لا تهدين ايدي يهدوة و هو راح و حط ايده بيدين غيري و عافني .. اااااخ ولج يمه .
ولج يحلفلي  بالعباس يحبني  ... و يهدني ويروح لغيري ... شيطفي النار البكلبي كليلي .. و لج شسوي انا ..  ولج رااااح اطكن واموووووتن . 
مسلمتك بيد العباس الياخذ حوبة كلبي منك يسرحان ، وينك يالعباس دخيلتك انا .. 
ظليت ابجي و ادكن اعلى راسي من سالفة عرسه .. و بلعومي مجرح بعبرته ..
سمعيت الباب تندك ..  فزيت من امچيني و كتلها : ولج ضميني كن كون يو شاف عيوني ابوي ينشدني اعلى ضيمهن ... ضميني 
- امشي و نامي بهالغرفه .. امشي .
ركضت للحجرة و هي ركضت للباب وابوي يدك : شنهي السالفة عليش مسرگه الباب 
- هدوة السركته مو اني 
- جا هدوة هنا 
- اي متضايقة بالبيت وحدها و اجت يمي نسولف . 
دش : جا وينها 
- بالغرفة نامت 
- جاية يمج تسولف يو تنام ؟ 
- ما ادري هي دخلت تسولف وياية و نعست كالت بس اخذلي غفوة . 
- جا خليها نايمه ، انا هم اعضاي بايده وبردان رايد انام . 
- تمام 
مشى ابوي و انا حدر البطانية و صامه حلكي بيدي وخاف لا يطلع صوت البچى . 
اهيس الكاع شوك ما يهنالي بال و اتمدد اعليها ، روحي مزوهره و ما اعرف وين اوديها بهالليل .. ظلت بس الدموع اواسي ارويحتي . 
شوي و اجت امي دكت الباب ، طلعت ليها ايمان : هدية يمج 
- اي نايمة 
- موش نايمه ، ميلي عني اشوفنها . 
دفعت ايمان و دشت و اجت ليه ، انا غطيت راسي خاطر ومثلت النوم .. كعدت يم راسي ما شالت البطانية عني ولا حجت لجن شهكتي التطلع من كل كلبي هي الفضحتني .. من كوني بجيت هواي .. حاولت اضمن الشهكة لجن بلا ووعي تطلع . 
كواغد : يسوى هالشهكة الشاكة صدرج يهديوة يمه 
بس حجت هيج دمعيت وكمت اجرن بخشمي و كوة احاول اضم الشهكة ... ردت حجت : جويت ايدج ييمه و انا غلطانه من كون كلبج اللازم اجويه و اجوي مجانه ... خاطر لا يحن ويود ناس موش ثوبنا . 
حجت هيج انهديت بالبجي بقوة ... رفعت البطانية و كالت : كومي 
طحت بحضنا و دفنت راسي عدها و كمت اصرخ : ولج يمممممه 
- لا تبجين يبنيتي وكوي كلبج بعدج زغيرة والف من يتمناج . 
- يمه نار بكلبي ما تطفى يمه . 
- العشك بارود و اليحط رويحته بنص بارود لاون تحترك روحه .. عليش حركاي ارويحتج يمه .. جا انا ما وصيت ما كلت لا تخلين احد يكربج ... 
الگربه موش كضت ثوب ولا وحيد يگرب ليج .. الگربة كربة گلب يو گرب احد ليه .. جيبي اليبعده . 
كمت ابجي بحضنها و اكللها طفيني يمه راح اموتن و هي لامتني بحضنها . 
اندارت اعلى يسرتها شافت ايمان واكفه و تبجي ... حجت : لا توكفين امشي غاد شوفي ابوها يو كرب علي صوتج خاطر ناخذ حذرنه . 
مشت و ردت ليه : عليش تفتحين كلبج لمرت ابوج و تحجين اسرارج الها . 
- كمت من حضنها : ما الي احد احجيله غيرها 
- جا وانا وين رحت 
- سكتت 
- لاشتج و كالتلج الله و يا حلاة عشكج .. و شتاليتج يهدوة ... انا يو كايلتلي يمكني اصيحن بيج و اكتلنج من كوني كلب والدة و ايدي اعليكم محنة ..  جا انا يو داريه عنج ارضى احط اكليبج بهالنار ... اتبع المبجيك ولا تتبع اليضحك. 
- شسوي يمه 
- ما تسوين شي ، عدي مجلس باجر الصبح امشي وياي و دموعج هاي ابجيهن بمجلس ابا عبد الله و بجاهه يبرد كلبج و يمحي اثامهم من افادج . 
رديت لحضنها و هي لامتني ليما خويت و نمت اعلى رجليها ، حطت راسي اعلى الوسادة و ردت لبيتها . 
لجن من حطت راسي فزيت ورديت لضنوني 
ساعة اصدن و اكول سرحان ما يسويها و ساعه وسواس كلبي يطحن بيه و اكول مالهم امان .. ابوي الجان يعشك امي بليلة ويوم جابله بت و حباها و هجر امي و ما عاينلها ... بس لا موش سرحان .. سرحان الاعرفنه ما يسويها .. هو الكال و العباس احبنج .. 
الليل كله .. حاطة ايدي اعلى خدي و كاعدة ساعة الاغفه و ساعة لارد ابجي و الوم بروحي . 
كعديت الفجر .. امي موجودة ما اكدر اطلع للشط .. ولا ايدي التاخذ شغل و الهي ارويحتي ، لايبة و لا كاع تلمني ولا بال يهنالي و انا اعرف اليوم عرسه . 
تانيت تطلع امي و تاخذ جمرة للمدسة لجن شفتها مترهية و كعدة اتسولف ويا حبوبتي، سألت جمرة : جا انت اليوم ما عدج مدرسة 
- لا اليوم جمعة . 
جريت حسرة و تنهدت بحركة .. شلون ربي شلون بيه . 
(القصر ) 
الشيخ : ها ام سرحان اصباح الخير 
- اصباح النور 
- سرحان وين 
- طلع من الفجر 
- للشط 
- ما يروح لغيرها 
- اليوم جمعة و مامش معمل . 
- والله اعرف هو يكضي وكته بهالمعمل و ما يرد منه الا المغرب . 
- يو رد كليله ابوك رايدك . 
جاي يحجي اجا سرحان من الشط : خلصن صفناتك يو بعدهن . 
- هلا بويه 
- عايفني وحدي بالمضيف، شنهي انت ما تستحي 
- البركة بخواني زناد و كريم ، لجن اعذرني هاليومين خلك ما عدي.
- مامش عذر ، حضر روحك اليوم عدنا جعدة مهمة والزوم انت بيها . 
- كعدت شنهي ؟ 
- جا غير يو تجابل المضيف خاطر تعرف طلايب عشيرتك شنهي، ما عدك غير مجايل الشط و متاني طرت بت حويكم ، ما تستحي اعلى روحك انت ، شيكولون ابن الشيخ كاعد اعلى الشط يتنطر نسوان .. بت تمر مرة تترس ولك شيبتني كعدتك شنهي . 
- انا اطلع كبل الفجر و يو الناس اجبلت انا امش 
- الظهر اريدنك .. وكونك ما تجي . 
مشى ،درت لمي: شنهي القضية . 
- والله ييمه ما ادري 
خل اطبن انامن شويه ما نايم الليل ويو صار الضحى كعديني . 
مشى سرحان و امه كضت عباتها و طرت البستان تجيب حطب توجر ... خاطر يدفى البيت .. 
لاكت صبيحة بالبيت : ها يم سرحان شو هنا 
- جا وين اروحن كلت اجيبن جم خشيبة احطنها اعلى الجمرية . 
- جا وكتها 
- عليش ؟ 
- موش اليوم عرس سرحان 
- يااااع يا عرس هاذ 
- اسكتي ديه ، الخاتون جاي اتفور من القهر من كون الشيخ موصي الكل ما يحجي لسرحان ، امس بالليل بلغنا و عزم الوادم .. 
- يو دره يطك ويموت و علي ، عليش هيج شد وياه ، وليد ما يرد عرس زور لو كوة هي . 
- الحجي بيناتنا دام ملوك وراه ما يطول اغطاه ، هالمرة هاي حاطة سرحان ابالها و ما جاي تهده 
- اكلله هسه يو شلون 
- الشيخ الظهر يكله . 
- يمه يحال كليبه ، من دون هالطلابه و هو غادي نار اعلى هالبت و فراكها و ادور يزيدها اعليه شيظل بيه كليلي ديه . 
- الله يعين كلبه الشيخ مدري شبلاه اعلى هالولد ، اترخص يديه الشغل ليفوك راسي . 
ردت ام سرحان و الحيرة تاخذ بيها يمنه و يسرى  وما تعرف تكله لو لا ..  تعاين ليه نايم بمان الله و ما داري بالمتاني شنهو . 
للضحى كلتله : سرحان يمه ، تكعد صار الضحى 
- اي يمه صحيت 
- ابوك وده اعليك 
- اعلى الكعدة غير 
- اي و جابوا هاذ العكال و العباية تلبسهن 
- شني هاي الدور 
اندرت ليها .. شني ناوي يحطني شيخ 
- سرحان يمه ارد اوصيك 
- ابوك لزوم اطاوعه 
- اطاوعه بكلشي الا بسالفة هدوة .. ما اكدر يمه هالبت محفورة بكلبي مثل الحفرة اعلى الجلمود . 
- البت ماله رجيه .. عمامها ناهين اعليها و ما راضين يطوها هاي للغريب جا يو درو الرايدها ابن مطر شيسوون . 
- هلبت فرج من الله ويفضها 
- لا تترجى الهلبت و تخسر ابوك ، طاوعه و لا تشمت عدوينك بيك 
اندكت الباب .. راحت امي تفتح ، طلعت الخاتون ، كربيت ليها بست راسها: هلا يمه 
- وينك يسرحان 
- اعذريني و علي مالي خلك دشت القصر ولا الي شوفتهم .. مكصر وياج 
صبيحة : انا اروحن يخاتون 
كضيت ايد الخاتون و دخلتها و كلامها مثل كلام امي توصيني ما اعصي ابوي ضحكت : شمالكم ما تكلولي شجاكم اليوم 
الخاتون : مصلحتك يماما فوك كلشي ، البكلبك بكلبك و الألك ميروح لغيرك . 
- انت الكتيلي اوكف بوجه هالتقاليد جاي تكليلي انسى 
- اني ما كتلك انسى ولا دا اكولك لتوكف ، بس مو بوجه ابوك لإنو هالأمر مو بمصلحتك . 
- الله كريم .  انا ساكت و ناطر فرج الله لجن خلكي ضايك ، بس عرس لا يفكر بيها ولا يحطها اباله . 
تنهدت الخاتون وامي تفرك بيدها و تعاين غاد : شمالكم هكو شي ؟ 
- اخذني و كوم دنرجع للقصر . 
- تاني بس البس الملابس .. 
سبحت اعلى السريع و لبست هدومي و العكال و العباية الموديهن الشيخ، كضيت ايد الخاتون وامي لحكتني ... دشينا للقصر وكت الغدا .. 
شفت القصر عاج بالوادم .. 
ناس تكلي مبروك و ناس تكلي شايف خير .. 
شكيت بس كلت لا مستحيل .. ما ترهم .
سلمت الخاتون بيد امي و انسحبت من كون القصر مملي نسوان ، طلعت للمضيف غاد الزلم جاي تتغده . 
نطرت خارج و هواي ناس جاي .. كرب ليه زناد و كال : شايف الف خير يخوي 
- تعال فهمني شنهي السالفة اليوم ياهو الجابلني و كالي شايف الف خير ؟ 
- عرسك اليوم يسرحان 
- انت شجاي تحجي 
ضحك : لونه عرس سريع لجن ابوي ما كصر و عزم الكل 
وكف الشيخ : ها يسرحان 
- شنهو الراي يشيخ 
- الراي كلته و ماله رده 
- موش انا الانحط بهيج موضع 
هميت ارد امشي و كض ايدي 
- يو طلعت و فشلتني جدام هالوادم هاي ، و علي اتبرى منك و اطردك و انفيك من الديرة كلها 
- حيل گسيت وياي بويه ، شرايد مني 
- رايدك تظل شديد ، موش ابن ال مطر التكسر ظهره مره ، خلك كدها و بيض وجهي جدام الوادم . 
جاي احجي ، جابوا زلمه و ذبوه حدر اجدامي ، عاينت للشيخ : هاذ التعرض للبت و صدع بسمعتها ، انا ما راح احكم بيه ... الحكم الك يولد يبني . 
تنهد و اهيس راسي دخن ، فتحت دكمة الدشداشه و هميت للعكال انزعنه ...كض ايدي الشيخ 
- اطي حكمك يسرحان 
- هدني بويه 
- اطي حكمك يسرحان 
كضيت روحي ، ارد اسيطر اعلى اعضاي ما اكدر ، فركت وجهي و تعدلت وصحت : بسم الله و محمد و اهل بيته و راية العباس .. ينربط بذيال الفرس و ينسحل بنواحي الديرة ليما مخه يبان من راسه ... و هاذ حال اليتعدى اعلى بنات الديرة. 
صاح الشيخ : ارفعوا الاصوات بالصلاة على محمد و ال محمد .. 
صاحوا الزلم ... الللهم صل على محمد وال محمد 
كام يكض بهدومي و يطلب العفو ويحبحب بالجدام ، جريت اهدومي منا و ابتعدت عن المكان كله .. لحكني ابوي حميد و تلكاني خنجر .. 
نزعت العكال من راسي .. كضني حميد.: اوجب بويه ، احجي وياك سرحان 
- كلكم افتريتو علي ، بس هين 
- سرحاااان 
- هدني بويه 
- لا تهدم كلشي اعلى لحظة غضب ، رد و طاوع ابوك 
- انا كتله ما اريد و حطته هاي اهانه اليه ، شنهي انا بعينه و يستحكرني هيج 
.- ابوك ما مستحكرك وهالطاك الحكم الك .. لجن رايد مصلحتك 
- يا مصلحة هااااااااااي التحجي عنها 
- سرحاااان ، بس اوجف بويه احجس وياك 
خنجر : سرحان بس اوكف شمالك 
- انت بالخصوص ما تدخل 
- وعلي ابن ابي طالب ما دريت الا الضحى حميد كالي ، انا يو داري اضمن عنك وانا صويحبك ؟ 
- ميلوووو عني هدووووني 
- الزلم تريد تمش وين نهدك 
- تمش لجهنم عسنها .. 
- لا تفشل ابوك يسرحان ، احجيييييي وياااااااك شمالك 
- موش انت بحسبة ابوي موش انا الرابي ابيتك 
- الشيخ شرط عليك و انت وافكت .. 
- انا ما وافكت 
- انت تحايلت لجن الشرط جان واضح يسرحان .. و التحايل موش رباة زلم ، اوجب و اكف جدام ابوك 
سرحاااااان. 
( بيت حاكم ) 
لبس ابوي و طلع للمضيف و انا النار تلوب بدلالي .. لا اكدر اكعد ولا اوكف بمچان .. حايرة و ظاله اروح وارد 
كرب الظهر و امي و حبوبتي يسولفن 
: جا ما تروحين بعرس سرحان 
- سنة ابوي ما طالعة و احضر عرس شمالني تسودنت ، عود وره العرس واروحن اوصلهم و اباركلهم ، جا انت ليش ما تروحين . 
- اليوم باردة و اجدامي عيب يشيلني .. خليها عود نروح انا وياج سوه . 
- الله كريم 
حجت و علينت اعليه .. انا افتر بالبيت مثل وحدة تطلك .. لوني صدك حبلى لجن حبلى بعشك ما منه غير القهر . 
وصلت للباب ، كابليته و دموعي تهمل ... صكد عود يعرس وينساني ، صكد سواها سرحان و ما نشد عني .. اخ يا روحي الغريبة ... اخ يهمي و قهري .
كمت من مجاني والوبن .. الدموع زادت و كل ما يمشي الوكت صدري يضيك .. واهيس الدنيا تصك بيبانها اعلى ادين عشكي .. 
ما حسيت بروحي الا وانا فاتحه الباب وجدمي خطى العتبة و انشد روحي ( صكد سويتها وطلعت ) حطيت رجلي و مشيت اطر للقصر .. و يا دموع العين صبي ، حالي حال ام و فاكد ادور ولدها .. هيج اطر بالعجد . 
وصلت للقصر .. ما اكدر ادشن و عيوني مورمه و حالي موش حال وحدة تحضر عرس ولا اريدلي الفضيحة.  
ظليت موچبه بحذا حيطان القصر و اتنوع من ابعيد و الدموع لوحيدهن يجرن . 
نص ساعة اعلى وكفتي ولا مل كلبي الوكفه من كونه ناطر شوفت هواه .. ولونه خاين . 
ما اهيس الا وواحد كضني ... فزيت 
درت .. شفتها امي : حركت ايدج بعطاب و ما فاد وياج ، شعمل بحالج بعد و تبطل ايدج تفك البااااب. 
- يمه نار البكلبي ما اهيس ايدي منه ، ولج يمه جاي احترك يمه . 
- ردي وياي ياله كبل لا ننفضح 
- بس اشوفنه اعليج العباس يمه ، بروح جدي شمخي يمه بس اشوفنه 
- خايبة شتشوفين اعلى ضيمج اعلى فكرج، تزيدين بنار كلبج علييييش 
- يمه بس اشوفنه اعليج العباس 
- صبرج يالزهرة الزجية ... ااااخ ناخيتج يم الحسن تبردين كلب هالبت هاي الطاير كلبها . 
شويه و تكربت الهوسة و اجو الناس ووكفت سيارة اباب القصر .. نزل منها سرحان و النسوان اتناوشن للسيارة و نزلن العروس و يهوسون و يركصون .
اعاين اعليه .. لابس عكال ولبس شيوخ وواكف ... سواها الولف و جفاني .. 
عفت امي وركضت ، و هي ظلت تصرخ وراي مشيت للبستان .. لكيت باب البيت مالهم بس مضروب سركي ، فتحته و دشيت و سركيت الباب وراي و تكربت لغرفة سرحان . 
ردت افتحها .. سمعت صبيحة و بتها يعدلن بيها .. 
وكفت و ما تعديت .. ظليت اراوح بمچاني .
امي ادك بالباب مناك .. و انا روحي تلوب و اسمع الهوسات التجي من القصر تشب النار بيه 
كعدت بمچاني ابجي من كل حيلي، طرى اعلى مسامعي صوت سرحان بالحجرة مالته دش و يكل للنسوان : اطلعن و هدني .. بسااااع ياااااااله 
وسمعت الباب انضربت حيل .. 
كمت من مكاني .. فكيت سركي الباب اعلى كيفي ، امي زادت بالدك .. سويت فتحه بالباب .. و هو كبالي ينزع بالعكال و كعدت اعلى القريوله 
فكيتها .... و دشيت : مرتاح ضميرك مرتااااااح كلي 
فز من كعدته ، من شافني كام اعلى حيله : هدددوة 
- لا تنطك اسمي ... ولا تحجي بيه 
- مشتاكلج والعباس مشتاكلج . 
- لا تحلف بالعباس و انت ظالمني ... شسويتلك انا وهيج تكسرني ..كلييييي 
حط ايه اعلى حلكي بعدته مني وصرخت : الله يطيييييييك ..... يتبع الحلقة 28 اضغط هنا
google-playkhamsatmostaqltradent