Ads by Google X

رواية كحل عرب الفصل السادس والعشرون 26 - زينب ماجد

الصفحة الرئيسية

  رواية كحل عرب الحلقة السادس والعشرون 26 بقلم زينب ماجد

رواية كحل عرب كاملة

رواية كحل عرب الحلقة السادس والعشرون 26 (ما لم يكن بالحسبان) 

وتكلي...تغيرت؟؟؟
شو مو رسومك ذيج
تمنيتك تحبني وتنچوي بناري
وكبالي اكعدك عاشك ومعشوك
واحجيلك بحال شصار وجاري
واغنيلك غنة ..بهداي بهداي
اعلة خيبتنة
وسفنة الراحت....
وية الروج حداري 
(عريان السيد خلف ) 
كواغد:  شعدج ويا سرحان ولج ؟ 
- ما عدي شي 
تكربت و كضتني من زندي حيل و لوت ايدي - شفتج بعيني لا تنكرين ، من تنكرين راسج هاذ اكصنه ، احجي ياله ، شعدج وياه وياه . 
- يمه هيج بس نشدني اعلى علومنا . 
لاويه ايدي و دمغتني : والينشد يحبج براسج ولج ، تحجين لا و علي هسه اكلل لبوج و اخليه هو وستير يتاوبون اعليج و يكتلونج ، تريدين تزلين روسنا ولج ، واكولن بتي نادرة تكعد كبل الكل تجيب المية و تزهب الريوك ، طلعتي مصخمة وجوهناااااا ولج . 
تحجي و تكرص بيه و تلوي بذاعي حيل هيسيت ايدي اجت بيدها و انمتنت كمت اصيحن :- يمه عليج العباس هديني ، ما اطلع بعد والله . 
- ما اهدج لا ما تكليلي شعدج وياه وشسولفتو وشصخمتي ، يمصخمه ما خفتي على سمعة ابوج (دمغة )  ما خفتي كلتي يو سمع اخوي ، يالنمرة ما فكرت بحد ولج . 
تحجي و ادمغ براسي . 
جرتني للمطبخ و انا اتوسل بيها تهدني و ابجي، و تخزرني و تكلي : هس وعلي يو هيسيت حسج لحز زردومج وافتك منج يالمدهورة . 
كضتني ووجرت النار : صرخت لاويمه عليج العباس لا ، يممممه لا 
- هشششس يو دروا اخوج وابوج يكصون راسج 
لفت وصله و حمتها وعطبتها و حطتها بأيدي ، احتركت ايدي كمت ابجي و اجر بيها ، دفعتني و دفرتني منها و كامت صمت حلكي و تكلي : حطيت العطاب بيدج خاطر يو طلعتي و فكيتي الباب مرت الأخرة تعاينين ايدج و تضكرين الچوية و يو عدتيها وعلي لاسوي الأكير منها فهمتي يو لا ؟ 
-انكث بيدي من الوجع و اشهك و اعاينلها و اهز براسي و الدموع تجري، و هي تغلط و ادفر بيه و تحجيييييي : انا الاكولن بتي العاقلة هيج اطلعين ولج ، تواعدين من ورانا ولج ، انا اعرف شمسوي بيج ، شعامل بحالج ، شغارج شماخ منج ، شسوي وياج هسه كليلييييي . 
هيست رجلين .. كامت من مجانها بسرعة و مشت للكتلي تحطة، انا زحفت من مكاني للحايط و ابجي و كاضة بيدي، وكفت كبالنا حبوبتي : ها صباح الخير 
كواغد : اصباح النور 
- شمالها هدوة ؟ شمالج حبوبه شبلاج ؟ 
كواغد : كومي غسلي ايدج ، غبرة اتظل هالبت غبره ، اجت تحضر الريوك و انجوت بالنار ، كوووومي ياله . 
- ياااع كومي حبوبه كومي ، خل ادهنه الج بدهن حر هسه يطيب 
كواغد : ما تعتاز ، كومي انت غسلي ايدج ياله . 
- شمالج وياها تسودنتي . 
- شمالني تسودنت ، شفتيني امزك بزياكي ، بيتي واريدنها تصير مدبرة موش تبجي وتضعضع من چوية . 
كمت منهن و عفتهن يحجن و يترادمن ، صبيت ماي بيدي وحدة ، و اجر بخشمي و ابجي ، مدري اعلى حالي مدرية اعلى سرحان البعد ما اشوفنه مدري من الجوية . 
عفت الماي وكعدت بالكاع و انهديت بالبجي وراسي بحضني ، و اشهك بصوت عالي، فات ابوي و شافني ابجي وجويعده بالحوش : ها بويه هدوة شمالج 
فزيت عاينت ليه ، و زاد البجى يمن شفت ابوي، يامن يسكتني، كمت اشهك من كل حيلي، وهو تسودن : هااه بويه ، هدوة شجالج بويه ، عاينيلي شمالج 
- احتركت ايدي . 
- اهاه ، شو اشوفنها ، اياااااااابه ، سوده ابوچي يابويه، شلون احتركتي ؟. 
- بالكيتلي 
- متعيني، كومي كومي . 
اجت امي : هدها ما بيها شي ، كومي ياله كشي الكاع 
- تكش الكاع شنهي البت اديتها محتركه 
- ما بيها شي هاي واكفه جنها احصانه ، تمشين يو اجيج . 
- لا اكومن اكومن والله . 
ردت امشي كضني ابوي و عاين لكواغد : شنهي حجايتج علي يكاغد ، البت محتركة ايدها كعدي بويه 
- جا اعشم ياهو و ينظفلي، احشم الغربة يو اتنخى نسوان الديرة يجن يعاونني، غير بتي شنهي تريد تكوي راسها اعليه . 
- توني كاعد وخلك ما براسي، ميلي عني و هدي البت . 
حجاها و هو يزمخ بيه : اكعدي . 
وامي تهز راسها و تتحلفلي ، كعدت لجن الدموع ما نشفت من عيني من الخوف ،لشتي كلها ترجف ساعة الاعاين لمي . 
كعد ابوي و هو يصيح على جمارة تجيب العلاكة مالت العلاج بالجارة مالت الكومدي ، ركضت جمارة جابت العلاكة و اجت ، حطت امي الريوك و ابوي داير عنها ويدور بالعلاكة العصارة مالت الحرك 
كعدت حبوبتي و امي و ستار اجا، و ابوي شال المرهم و كام يدهن بيدي، و امي تخوزر : تتريك يو لاله ؟ 
- اطي صبر 
- ما تموت لا تخاف اعليها 
لفها و كاله : ياله بويه اكومي اكليلج لكيمة . 
- ما اريدن 
- دكومي يا بويه ، هو كله ياله حركة زغيرونه، كومي . 
كربيت و تمي عاكدة الحواجب، حجت جمارة : ايمان وين بويه ؟ 
- نايمة 
كواغد : جا ما تشوف بس وكت الأجل تكبل ، من عبن ذيج متوثه نوم و حملك اعلينه . 
طر الخبزة و زمخ : دنعل عشايرج شنهي انت تعايريني 
- انا موش اعايرك لجن ذيج لا دفع ولا نفع 
- وانت شلج غرض بيها ، منخمدة ابيتها و انت ابيتج وانا وين ما يحط اعللى بالي اركد .. حتى الزاد وياج نقمة 
دفع الصينية منه و كام ، حجت حبوبتي : شنهي الا تسممينه شمالج ؟ .
كواغد : اكومن اودي البت المدرستها اخيرلي . 
كامت و صاحت : اهديوة 
فزيت من مجاني و تبعتها ، حجت بصوت ناصي : اردن الكا البيت مثل حرحارة ايدي ويو خطى جدمج عتبة الباب هذا الله كاتبه اعليج ، فهمتي . 
هزيت راسي ، نترت : والله ياله ، ما ناكصني غير تورطني ويا الشيوخ عدالها يعاينولها يو ياخذونها الغبرة . 
صاحت على جمرة و ذيج تبعتها ، مشيت لحجرة امي كعدت بجيت بجيت ليما خوى راسي و كمت اعلى حيلي اشتغل . 
(المضيف) 
سرحان : شلنا اسلاحنا و سحبنا اقسام و صاح الصيح : البيه زود يگرب 
- ااطنا البت يشيخ . 
- امش ويو لفيت امرعدكم والله ، تمش و تصيح اوادمك غير هيج مالك بت يمنا، البنية ادخيلة بكاعنا و بس الردي يرد دخيله . 
اندار على النسوان ، لفنها بيناتهن و صاح : سرحان ، حميد رافكو النساوين للقصر و انا موجب هنا . 
خليت حميد يمشي كبالهن من كونه غريب وانا مشيت عكبهن و اسلاحنا اعلى سواعدنا .. وصلناهن للقصر و دشت ويا النسوان، نشدت : البت منين ؟ 
حميد : حسب ما عرفت العمام من ال مطشر 
- ذول موش الفصلناهم كبل ؟ 
- اي كبل سبع اسنين اخذنا منهظ فصلية و اطيناها لاهل المجني اعليه . 
- منين اجتنا هالسالفة . 
- الله كريم . 
شويه و اكبل علينا الشيخ : البت داخل ؟ 
- اي دشت ويا النسوان 
- دام البت داخل ، انت و زناد و كريم اطلعوا منه و خلوه للحريم ،  حدكم للديوان و بس ، لا ادشون داخل . 
- امرك يابه 
- سرحان 
- ها بويه 
- تعال وياي . 
مشيت وياه : شنهو الراي 
-امشنا اعلى ال منعم ، ناخذ الشيخ ويانا و نمش اعلى ال مطشر . 
- ياله 
تمشينا اعلى ال منعم دشينا اعليهم سلمنا ، و حجيناله ، و صار الشيخ منعم هو الوسيط بين الشيوخ ، كال : امشوا براية الله و انا رايح ليهم احجي وياهم . 
ردينا للمضيف و ازلامنا كلها كاضة تفكها و متحضرة ، زناد و كريم و عمامي وكبار العشيرة بالمضيف كاعدين . 
كعدنا واحنا نداول بالموضوع و نحجي ، جويعد بنصهم و بالي ويا هدوة و دموعها ، من اتذكرهن اهيس النار توجر بدلالي . 
اندار ابوي و هو يكلي : سرحان انت تروح ؟ 
فزيت : شنهو ؟ 
عاين عمي : الزلمة باله مو يمنه 
زناد : الظاهر اخونا عاشك ومضيع صول جعابه . 
الشيخ : عكلك وين يسرحان 
- انا هديت امي ما الها خلك ، و لزوم اروحن ليها خاطر اشوفنها، من رخصتكم . 
كام الشيخ وانا طلعت ، صاح وراي : سرحان 
- امر بويه 
- العشك موهدن احوالك ، كض روحك و حكم عكلك . 
- يا عكل هاذ اليكول ارضى اهدن بت معلكه امالها بيه و ارضى اطيها للناهين اعليها . 
- الناهين اعليها عمامها 
- انا واعدها 
- لا تطي وعد انت موش حمله . 
هزيت راسي بس اريد انهي الحديث و امشي ، طلعيت منا و رحت للجول ، خنجر و جماعته جويعدين ، سلمت اعليهم وكعدت ، عاينت جاي يشربون : انت كلت راح اتوبن ساعة الأشتغل وياج 
- جا اتوبن من الخاوات موش من الشرب . 
- هالسوالف كلها ما اريدنها ، الزوم تشد حيلك ما اريدن اتلوحني الجلمة اعلى سوالفك 
- شمالك شو موش اعلى طبايعك . 
عايت للولد و ودرت وجهي، اندار للولد و هو يكللهم : امشوا ياله ، خلصت الجعدة ولو . 
كاموا و هم يتضاحكون، اندار ليه : شمالك 
- عمام هدوة جايين امس 
- اي ؟ 
-شنهو اي حاجين بموضوعها 
- ووين الغريب بالموضوع ما هي معروفه البت منهي اعليها . 
- وانا 
- انت الرضيت الروحك تتوهدن بعشك تعرف تاليه . 
- ما جنت اظنن يفتحون السالفة بساعه . 
- البت ما تعرس ليما هي توافك ، انت بهالوكت شوف الطريكة التناسبك . 
- انا شلون الكا وابوي سادها من كل البيبان اعليه ، اكله اشريها ما يرضى اكله اودي طارش ما يرضى ، ما حاط بعكله غير اهد هالسالفة و اجوزن منها . 
- انا و ان جنت رفيجك لجن اشوفن الشيخ حكه 
- يا حك هااااذ 
- سرحان انت عشت ابغداد و ما تورجت اعلى الطلايب البين ال ثجيل و ال ضاحي ، ذول يو بعد ١٠٠ سنه ما ينبتلهم عود اعلى عود ويتوالمون . 
- انا عاشك البت و خلصت ، كل هالامور موش بتفكيري وانا جاي اجاريهم و امشي وياهم ، خاطر اعرف دربي وياهم ، بس البت موش حمل صبر ، سنه و كامت تصيح الغوث اخذني . 
- هن هيج النسوان بالهن موش طويل، اخذلك مجعه و انسى يمعود . 
- ميلي عني انت الثاني . 
كمت منه و رديت للبيت ، شفت امي جويعدة وصافنه : ها الله يساعدج يمه 
- هلا يمه 
- شنهي الحال ؟ 
- سمعيت دخيله بالقصر داشه 
- اي جنت حاضر، شصار ، ما اجو عمامها بعد ؟ 
- ما ادري عنهم لجن تحلف و تتكفر التعدى اعليها ما تعرفه ، بس شردت منه وما خلته يواطيها . 
- جا عمامها شلون عرفوا ؟ 
- وحدة من بنات عمها فاتنه اعليها ومهيجه الوادم . 
-وايدين جتلته 
- اي اظنن السالفة سالفة نسوان من كون تشكي من نسوان عمها جثير. 
- الله كريم 
حجيتها و انا افرك بوجهي : شمالك يوليدي 
- ما بيه شي 
- انا من كون ما ربيتك لجن امك و كلبي يحس بيك و انا كلبي حاسني انت موش اعلى مرامك . 
- يمه انا رايد بت حاكم . 
- اعرف و ابوك حجه وياي و كال احجي ويا ابنج و حطي عكله براسه ما بينا حيل طلايب سبة سوالف عشك ما منها نفع . 
- ابوي ما جاي يفهم اعليه ، يعني يو ردت اتصرف بهالموضوع ما جدامي غير احط ابوي ورا ظهري. 
- عدوينك جثيرين لا تطهم اللزمه اعليك 
- انا لا همني عدوين ولا عمام ولا خوال ولا عشاير السماوة بخويطها ، انا التهمني هدوة ، دموعها ما جاي يفاركني . 
ظليت اشكي لمي و فاتحلها كلبي .. واسولف الها ، ليما تعبت هي و هيسيت نعست سكتت خاطر تهود و تنام . 
ظليت الليل بطوله اشرب بهالجكاير و افكر واداور الموضوع هلبت الكالي حل و اطلع بيه ، بس مامش فايدة ، ليما كرب الفجر غمضن اعيوني ونمت . 
ساعة و كمت اخذت حصاني و مشيت للشط كبل لا تطلع الشمس ، كعديت اتنطر جيتها و عيني تربي اعلى الدرب ، لجن ما مرت . 
ضاك صدري .. وينها 
شنهي معكول غصبوها ؟ .. لا حاكم اعرفنه ما يغصب بت اعلى الزواج ، جا ليش ما اجت .. يمكنها سهرانه و ما نايمة الليل !
اي انا هم سهران .. يمكنها مثلي. 
لا هدوة ما ياخذها النوم من يوم العشكتها ولليوم ما اخذها النوم عن شوفتي، لزوم الها اسبابها ..  
هسه انا شلون اعرف علومها ، امشي اعلى بيتهم .. 
لا شمشي ، انا شبيه توهدنت ... 
احجي وي روحي و اجدامي خذتني لدارها . 
وكفت ما سمعت حس ، مشيت غاد عن البيت ، خافنها مريضة ؟ .. بس تمرضت كبل مرة و ما تهاونت بالجية و اجت و هي مريضة ، جا شلون هسه . 
طلعت كواغد وبتها الزغيرة وياها ، سويت روحي ما من العجد ، و سلمت اعليها : هااا ام ستار شلونج 
عاينت اعليه بوجه مجفي و كالت : هلا هلا ، ياله امشي انت . 
تعجبت!
هاذ مو اسلوب كواغد وياي ، هي تحترمني ، شنهو الصاير .. معكول دروا بيها ؟ زين خافنهم مأذينها. 
ما دريت بروخي وانا افكر بيها اجدامي تمشي وانا بلا وعي،  انتبهت انا اعلى الشارع العام .. جا حصاني وين ؟ 
عاينت بكتاري .. نسيت حصاني يم النهر !
درت و امشي امشي لينا وصلت لكيته بمجانه ما ماشي ، اخذته ورديت . 
كعدوا الزلم و انا موجود و حجوا و انا موش صاحي اعلى شي، وفشله عيب من الوادم الكاعدة يو احد انا صافن يكولون اعليه اغم .. بس مو بالكيف ، عكلي ما جاي اوازننه و اركز ويا احد . 
تعوذت من الشيطان و قريت الحمد خاطر اركز .. 
انتهت الكعدة بعمامها عازمين اعلى جتلتها من كونها فضحتهم بين العشاير ، و الشيخ ما يطيها .. 
طلعوا ، شفت حاكم كرب ، جن فز كلبي ليه من كون ملامح ولفي بيه .. سلم اعليه و كعد اخذته و رحنا للمعمل و احنا نسولف بسالفة الدخيلة . 
درت ليه : اكلك سمعت ال ثجيل كبل جم يوم يمك 
- ناصر . 
- شعده 
- هيج سالفة اعلى بتهم . 
- ؤدت انشد اكثر لجن خفت يشك .. مدري انا اهيس هيج عبن احس عشكي فاضحني ، اندار ليه : شمالك ؟ 
- شكو ؟ 
- موش اعلى مرامك 
- ما نايم ، وراسي يوجعني . 
- مبين اعليك حيل تعبان، امش وانا اكضي امور المعمل . 
- ان شاءالله 
ترخصت منه ورحت للمضمد كتله : اطيني منوم ما اريدن اكعد ليباجر . 
اطاني حبوب اخذتهن ورديت للبيت ، شربت وياهن ماي و حطيت الوسادة و انجطلت و شردت بروحي للنوم هلبت افتح عيني وباجر جاي واطلع للشط و تجي. 
نمت نومة كبل المغرب ما هيست الا الفجر بعده الضوا ما طالع ، اخذت حصاني ومشيت .. و يا خيبة كلبي من انطرها و ما تجي ... اهيس راح اتسودن ، شجرالها هيح و ما تجي . 
لا ما احمل لزوم اخذ راديون و اجيبنها اعلى بيت حاكم خاطر تعرف شنهي علومها ، طريت الدرب بحصاني للقصر ، وصلت غاد حطيت الالجام بيد الحرس و دشيت للقصر . 
فتت داخل صحت : راديون ... راديووون . 
- ها خوية 
- رايد منج شغيلة . 
- شنهي 
اجت ملوك : انت شلون ادش للقصر ؟ 
- من كون لازم اخذ الاذن منج ياله ادش قصري و بيت ابوي ؟ 
تنهدت و مشت عني ، انداريت لراديون .. لبسي عباتج و امشي وياي 
- وين 
- هدوة يومين ما هي لزوم بيها شي وانا خايف متأذيه 
- مشتاكتلها انا 
- جا امشي ليها و طمني كلب اخوج . 
- تامر يخوي ، دكايك و انا يمك . 
دشت لبست و طلعت وياي . 
ملوك : شعدها ملوك مشت ويا سرحان 
سليمة : هو اجا اعليها ومشا.  
-اندهيلي اعلى الشيخ بساع 
راحت بلغت الحارس ، و الحارس نده للشيخ ، اجا بساع : ها يم زناد 
- شنهي شصار 
- انا قررت اودي اعلى الجدة تفحص البت نفحصها خاطر يو طلعت بريه نكعد و نتفاهم ويا العمام .. هاذ هم سترهم وحكهم يو كبت شعايرهم . 
- انت الاعرف يشيخ لجن انا رايد اشكيلك 
- عليش 
- انت منعت الولد يدشون للقصر دام البت بيه و كتلهم حدكم للديوان . 
- وياهمو المنهم دش 
- سرحان لجن موش بس دش  و اتجاوز اعليه انا ما ازعل منه ، لجن اخذ اخيته راديون وطلع 
- وين اخذها ؟ 
- ما اعرف والله ، لجن اظنن لبيت حاكم . 
- يو صكد و سواه الا جنا اعلى روحه . 
طلع و هو واكف بالباب يتنطر سرحان . 
( بيت حاكم ) 
هدية : اندكت الباب ،امي جان عدها مجلس و موش هنا ، فكيت الباب راديون جدامي 
من شفتها جن ردت روحي وانا اشوف وحيد من اهله ، هليت بيها و رحبت و دخلتها و كعدنا ، و نشدتني اعلى علومي .  فكيت ايدي وراويتها .. 
- يااااا شني هاي ؟ 
- امي درت و شافتني وياه و جتلتني و حركت ايدي ومنعت اعليه الطلعة . 
- وابوج و اخوج كون درو 
- لا بس امي لجن صارلها ثلث تيام و اهي ما تعاين بوجهي، ومراويتني الويل . 
- سرحان مشدوه اعليج و باله تايه من كون ما جايته ، يو شايفته اشلون جلي هام اعليه و يطلب مني اشوفنج . 
بجيت : يا شمالج 
- مشتاكتله 
- هو هم مشتاكلج وعلي ، لا تبجين خايبة راح تبجيني وياج. 
- كليلي شلون بيه يراديون 
- اصبري ليما الله يفرجها جا شسوين . 
- وكلبي يتفتت من الشوك اعليه ، ما اصبر ، لا ليلي ليل ولا نهاري نهار، الساعة التمر كوة اجرعها
- هو مثل حالج و اتعس و علي .. الله يكتبلكم القسمة ان شاءالله ، ياله انا اكومن خليني اطمنه اعلى اعلومج عبنه طاير كلبه . 
- سلميلي اعليه.  
- الله يسلمج . 
سلمت و طلعت ، هو موجف غاد عني : ها بشري د
- شبشر ، البت حاركين ايدها 
انتفض : ياهو الحاركها ؟ 
- امها من كونها شايفتك وياها و محرمه اعليه الطلعة 
كام يتنهد و يفرك بوجه و يمش منا و محتار بكاع : هسه شنهي 
- امشي اردج ، و اليوم افضنها . 
- شتسوي .. 
- امشي 
اخذت راديون و طلعت للبيت ، اول ما وصلنا لاكاني الشيخ ، حجه : وين جنتي يراديون . 
- بويه سيرت اعلى صويحبتي لشوفنها مليت من كعدت القصر . 
- ياهي صويحبتج 
- هدية بت حاكم 
- سرحان الخذاج .
- انا اطلبت منه و هو ما كصر زتني ليها 
- دشي داخل 
يحجيها و هو يخزر بسرحان ، و هاذ يفور بمكانه ، اشرله يفوت جدامه .. دخلوا اثنينهم . 
اول ما شد و كضاه الشيخ من هدومه : انت شنهي ولك ما تستحيييييييييييي 
صرخت وانا ادشن بيناتهم .. بويه بوووووويه 
سرحان : رايدها بالحلال عليش واكف بطريكي ، اريدنها افهم اريدنهااااااا 
ضربه جف : وتصرخ بوجهي 
صرخ سرحان : لهنا و بسك اتحمليت ووصلت لهامتي بسكمممممممم عني . 
- اسمع وووووولك 
- لا اسمع ولا اشوف و خلها ابالك ، انا رايح من ساعتي اخطبها ، تريد تجي ما تجي راجعلك .
- روح اخطبها وعلي ما اوكف بوجهك ، لجن لو سويتها وحك ابو فاضل العباس اتبرى منك واكتب بيك سند و اذبنك من العشيرة ولا انا ابوك ولا اعرفنك . 
- ارد افتهم انت ليش هيج موجف وياي ، انا راح اتسودن البت حاركينها حاااااااركينها 
- و عساها ببو زايد 
- انت ليش تفت بفادي ، انا ما اتنازل عنها يو على كص ركبتي . 
- و انا اعلى عهدي ، يو خطيت جدمك و خطبتها بري منك و مالك عدي شي ، و يخلفني زناد و انت برا القصر  و البيت . 
- بالعافية اعليك و على زناد 
راديون : سرحااان ، سرحااان تعال جاي . 
طلع سرحان من البيت ، و الشيخ فارت روحه ، كض حميد و كاله امش وراه و عكله و خله يرد وامنعه من دشت ال ثجيل . 
طلع حميد و مشى ورا سرحان . 
- سرحان 
- يابه رحمة للعباس هدني . 
- خايب شهدك وين رايح و عايف ابوك مغضب . 
- ابوي موش ناوي يفهم اعليه . 
- ابوك ما رايد غير مصلحتك 
- يا مصلحه هاي وانا موجر ، يشوفني احترك جدامه و هو يدفى اعليه ، هدوني بحالي يرحم والديك 
- شناوي ؟ 
- يريد يتبرى مني ، خله يتبرى ، اذبن جرش ويا ال ثجيل و اصيرن منهم . 
- شمالك انت تسودنت ؟ 
- شيرني انا راح اتسودن ، عكل ما ظل براسي . 
-ال ثجيل ما يتامنون ، خايب يكرهونك و يكرهون جدك و يكرهون ابوك . 
- وعساهم لا حبوني ، انا ما رايد غير اشتري النهوة منهم . 
- موش هيج ، دمش وياي ووعد اعليه اوجف وياك واعاوننك و اقنعنه اعلى الشروة لجن لخاطري بويه لا تخلي ايوك يغضب اعليك من كون يو غضب الله و ملايكته يغضبون اعليك و يلعنونك ، وكتها وعلي ما تتوفك و تعثر بيهم و اطيح بشارتهم . 
ظل حميد يحجي ويا سرحان و يهدي بيه .. 
رد وياه ، و مشى حميد و هو يقنع الشيخ يودي طارش لال ثجيل يبلغهم بشروة النهوة 
الشيخ : وانا اخذ من ال ثجيل ؟ 
- شيخنا الزلمه عاشك البت و حويكم منا وبينا و نعرفه، و يستاهل نشري نهوة بته ، خلنا نفض الامور و نخطها ، الرضو خير اعلى خير .. و ان ما رضوا .. خاطر هو يقنع و ما يوكف بوجهك .. امله و اماله معلكها بهالشروة ، خلنه نخطي هالخطوة و نفضها، عليش ظال انت ووليدك تلوبجون ويوميه معارك و مواجه بينك و بينه و هو زلمه و اعليه العتماد لجن الزلمه يو عشك ما يوجد دربه بعد و سرحان عاشك يشيخ . 
- انا موافك لجن بشرط 
- شنهو 
- انده اعليه و اكللك .. 
نده لسرحان و جابه ، حب راس ابوه و كعد عده : ابوك حميد اجا و حجه وياي و انا موافك اعلى الشروة . 
فز بفرحة : صكد بويه؟ 
- لجن بشرط 
- شنهو الشرط ؟ 
- يو رفضوا .. تحط تحت شوراي وتوافك اعلى البت الاخطبها الك وما تحجي . 
- انا ما اكدر اخذ غيرها .
- جا انسى سالفة الشروة 
حميد : سرحان بويه شمالك ، تراه ابوك و لزوم اطاوعه ، الزلمه جاي يكلك انا شراي لنهوة هواك ، يو وافكو ياخذها و يزوجها الك بيده ، بس يو ما وافقكو حكه يخطبلك من كون الخطوة التخطيها عكبها تروح  ركبتك وركبة البت و حاكم يتأذى و يكب الثار اعلى عشيرتك .. و انت ما ترضها فغصبا عنك .. ترضى بشرط ابوك . 
- اخطي وزت طارش ويو ما رضوا اجوزن من الموضوع لجن لا تكلي عرس ، انا يو رفضو الشروة ما اريدن عكبها شي ارضى اكضي عمري مفرد . 
الشيخ : انا اعلى شرطي 
حميد : شيخ اخذها مني ، هسه عليش نسبك الاحداث ، خلنا ندز و نشوف هلبت ينغرون بالفلوس ويرضون . 
على بركة الله ... 
ملوك : هه و ياخذها و يتصالح ويا ابوه وانا و ابني نمسح ادينه بالحايط .. لا والله يبن ردحه لا تظن اخليك . 
سليمة تمشين لكاطع و تكليله الشيخ موصيتك . 
- امرج يشيخة . 
راحت الكاطع بلغته .. و كاطع فهم .. مشى وطلب نعمة ابن ال سلطان ... 
-ها يكاطع شنهو الراي ؟  
- راح يجيكم طارش (شخص مرسال) 
-وشعده ويانا هالطارش 
- جاي و شاري نهوة بت حاكم .. 
- شنهو ؟ 
- مثل ما اكللك .. ناوين اعلى الشروة و الطارش لمطر من كون وحيد من اولاد مطر عاشك بت حاكم . 
- كول سرحان . 
- هو 
- هيج الحجي ، هههههههههه انطر يمطر و شوف ال ثجيل شيعملون بحالك و بحال ولدك .
واصل يكاطع و جزاك الله خير 
- اودعناكم .  
- الله وياك 
سلطان : شنهو الراي ؟ 
- وليد ال ضاحي طاح 
- شلون 
- عاشك بت من ال ثجيل . 
- ياهي ؟ 
- بت حاكم 
- من كون صفته ويانه هاي غايتها 
- مامش غيرها . 
- سرحان ذكي ، اذا جان ابوه يتجنبنا و يتجنب المشاكل ، هاذ ياكل ويانا و يتصيد بماينا و ما نهيسه . 
- جده ضاحي ساعة الحفر حفر ليما طيح ثجيل و لم الوراه و الجواه بدون ماحد يهيس و طلع جدي من العشيرة . 
- هالنار موجرة بدلالي و ما تطفى الا بثاري من ال ضاحي ، وسرحان جابها . 
كلشي يهدأ الا الحقد المزروع بين ال ثجيل و ضاحي ما يهدا  .. واحدهم ما يود الاخر و متجانفين .. و ضحية هالحقد ناس جثيرة و كلوب مالها ذنب باجدادها .
سرحان ملى كلبه الامل و جان اباله ينغرون بالفلوس يو حط الفلوس جثيرة و يحصل هدوة كلبه .. 
اتفق الشيخ ويا واحد غريب و كاله تمش لال ثجيل و تكعد ويا سلطان و تطرح اعليه الشروة .. بدون ما يعرفون ياهو الشراي ... 
مشى الطارش و الشيخ توجه للدخيلة .. 
اخذها هو و الشيخة و طلعوا للولاية و دخلوها مستشفى ورادوا فحص طبي يثبت هي بت .. كشفت عليها الدكتورة بالمستشفى .. و طلعت مثل ما كالت بريه وبت بيوت . 
اخذها ورد بالسيارة و ردوا .. حجت الشيخة : تظن ال ثجيل يرضون بالشروة 
- انا اعرف ما يرضون بس وافكت خاطر لا اخسر اوليدي و اخليه يعرف انا موش ضده انا بس ما رايد اوهدنه ويا ال ثجيل و اطيحه بين اديهم . 
- ويو ما رضوا .. 
- ازوجنه و غصبا عنه . 
- سرحان ما راح يرضى 
- موش اعلى كيفه ، انا ما اخلي وليدي لال ثجيل .. لزوم انهي السالفة واوكفنه عد حده ، هو موش اول واحد عشك وعاف محبوبته. 
- انا عدي راي لون ترضى 
- شنهو الراي 
- البت الويانا مظلومه ويتيمه ابوها ما صاله سنه من ميت وعمامها متولينها،، و البت حلوة و زغيرة و ما ناكصها شي ، وموهدنين حالها ، انا اكولن يو ما وافكوا بيت ال ثجيل اخطبها ليه 
- البت ادخيله ، شلون اخطبنها 
- ما كلت هسه ، ساعة الترد و تسلمها لاهلها بسلامة  اخطبها ليه . 
نشوف الطارش .. والله كريم 
رد ...و سرحان على نار يروح ويرد و خنجر كاعد يمه : خايب استجن اندار راسي وعلي 
- خايب ادعي عسى كون يوافكون و يرتاح كلبي 
- اخافن ادعي والوصنها اعليك من كون دعوتي تنلزك بكصتي يو دعيت ما تصعد شبر ليفوك 
- موش وكت تصنيفك يخنجر 
- خايب جا شسوي ، دطي صبر .. 
-اظنن وصلوا هسه . 
مشى للديوان : ها بويه رد الطارش 
- لا والله بويه 
- و الشيخ وينه ؟ 
- طلع هو و الشيخ ، اجو عمام البت كبل شوي و شلنا التفك .. و ساعة الردنا نتفاشخ ، خلوا وراحو .. و اظننهم شواي و يردون 
- احجيلي بالطارش ، صاله ثلث ساعات من راح ما طلعت كعدة 
- انطر . 
-اعصابي ادمرت 
اجا الطارش .. اي هاذ 
كام اعلى حيله سرحان .. و هو يجر نفس و اديه وره ظهره و مغمض و يدعي ربه ... وصل ليهم الطارش فك عيونه سرحان و عاين : ها 
- مشيت ليهم و كعدت وياهم 
- اي ؟ 
- سلطان كال موش احنا النبيع قيمنا ومبادئنه و نهوتنا نهوة كماط ما تنشري ... رد للوداك و كله لا يعاود . 
- شبت النار بجسمي اهيس وجيت .. كمت افرك بوجهي و عيوني حومرن من القهر .. تنهد و مشيت ما تحملت اظلن بالمكان . 
اجا الشيخ : ها حميد 
- مثل ما ظنيت يشيخ ، ال ثجيل ردوا الطارش وكالوله كل للوداك لا يعاود 
- وسرحان سمع ؟ 
- اي عرف ومشى بساع . 
- صيحه كله ابوك يريدك .. 
- انا اكولن يو تهده ...... قاطعه 
- صيحه 
مشى حميد : ميخالف بويه ، كول يا الله و كوم وياي .. 
- هدني وحدي يابه رحمة لوالديك 
- الشيخ رايدك 
- وانا ما اريد اشوفن احد 
- ابوك ولزوم اطاوعه و هو ما يريد يشوفك هيج منكسر رايد ياخذك وياه خاطر لا تظل متكدر 
- هدوني وليرحم والديكم ... 
الشيخ : كوم سرحان 
- شيخ 
- هششش ولا نفس ، كوم وياي ، اكللك كوووووم 
كام و هو يتنهد قهر و عيونه يتلامعن و حممممممر ، مشى وياه و اخذ البت الدخيله و مشى بيها لشيخ ال مطشر .. 
دش سلموا اعليه .. 
: انا جاي و شارتي عدك يال مطشر ... انا تكفلت البت و اثبتت بريتها ورايتها بيضة ان شالله و جاي اسلمنها بيدك و انت شيخهم . 
- البت  بامان الله .. 
- طلعت مني و صارت عدك و اهي يتيمه .. رضينا اخلاقها و عرفناها ... ويو رضيت انه جاي اخطبنها لابني سرحان اعلى سنة الله ورسوله . 
اندار سرحان  بساع و اهو متعجب و كل علامات الأستغراب بانت بوجهه.. يتبع الحلقة 27 اضغط هنا
google-playkhamsatmostaqltradent