رواية كحل عرب الفصل الثاني والعشرون 22 للكاتبة زينب ماجد

الصفحة الرئيسية

 رواية كحل عرب الحلقة الثاني والعشرون 22  بقلم زينب ماجد

لحظة قبل البدأ عند البحث عن الرواية في جوجل أكتب " رواية كحل العرب دليل الروايات" لكي يظهر لك جميع فصول الرواية..

رواية كحل عرب كاملة

رواية كحل عرب الحلقة الثاني والعشرون 22 (اعلان العصيان) 

آآآآه يا هواهم بأول أيامه شكثر دللنا 
ومن وصل طينتها الظهر كلها تبرت منه!
(عريان سيد خلف) 
هدية: صرخت يسرى بكل علو صوتها 
فزينا كلنا و كمنا ليها  ، فكينا الباب و لكيناها كاضة بشعرها و تصرخ (اااااااااااااااااااا) ، تكرب ابوي منها : ها بويه شمالج ، ولج يسرى ... خايبين ماااااي 
ركضت اجيبن ماي و امي حبوبتي و ستار كلهم التموا اعليها ، اركض و اهيس احد يركض وراي ويلهط مثل واحد سمين كوة يراكض . 
انداريت بساع مامش احد !!
معكوله البيت صكد مسكون و هاذ طنطل يراكض وراي ! ... ارتفع صوت ( هديوووووووة الماي ) 
ياااع نسيت الماي ، فتحت الحِب و اخذت طاسة ماي ، و جن عثرة اتصير جدامي و انجبح انا و الماي اعلى وجهي ، صرخت : بوووووويه اجاني اطنطل اجااااااااااني . 
ركضت امي : شمالج يمه ، هديوه عاينيلي 
- يمه و علي اهيس وحيد يراكض وراي ، انا سمعيته و العباس سمعيته . 
حاكم : ها بويه هدوة 
كواغد : حويكم فروخي راح يتسودنون شلون بيه ، ذيج تصارخ و هاي تهيس  احد يركض وراها ، جا هسه شنسوي 
علي صوت القران و خلينا نكعد بمجان واحد من كونه السيد كال وكت المغرب لحد يراكض وقللو صياح و حركة 
كومتني امي و كعدنا ، و ستير راد يجي يكعد يمنا ، كاله ابوي : جا مرتك بالضيم يا حالها و انت جاي تكعد.يمنا دمش يمها 
- بويه و علي اخافنها منها 
كواغد : شمالك ويا وليدي جا هو هم يتضعضع من هالامور شلكيته علي ابن ابي طالب و يوجب بوجه الجن ، تعال يمه تعال يوليدي 
حاطين الجمرية جدامنا وواحد ملتف بالأخر ، وصوت القرأن عالي ، ضحكت ايمان عاينت اعليها اديها تتراجف 
- بويه اتنوع
- انا اغلام ابوي كضها ابو عبيد ، دخيلك يا علي
كامت تضحك بصوت عالي (هيييييييييييييييي) وتعاين علينا ، حجت امي : اكلكم هاي شو بس تضحك عليش 
حاكم : خل تهد و تعرفين عليش 
زادت ايمان بالضحك ، حجت امي : يا شوف الحظ و الوعد جا هو حتى الطنطل اليكضها فطير مثلها . 
ضحكت حبوبتي : فلشج يكويغد ، خايبة اقري القران يا واسكتي 
- شقره يا عمة جا غير صرت اطبك الحمد و الاخلاص بأيه وحدة و مدري ياهي منهن صح . 
صرخت ايمان : ااااااااااااااا 
صرخت امي : يمه ءهلا اجاااااااانا 
كام ابوي كضها و هو يقرا عليها ، و هي تكله : هذا هذا 
و ستار يعاين وراه، صرخت يسرى ، حجه ستار : يمه انا اروحن لجدي . 
حاكم : خايب انت عليش اغم ، دكوم شوف مرتك شمالها تصارخ دكوم 
- وعلي يو تموت هم اكومن 
هدية : يمه امشيلنا لبيت جدي 
- دكعدوا يا بويه ، شمااااالكم ماكو شي 
ايمان : هذا هذا اجاني 
جرها ابوي و حط راسها على رجله و كام يقرا و هي تبجي بقوة ، حجت جمارة : بويه انا شفت واحد مر من الباب 
- يتخايلج بويه ، هاذ القران يشتغل ماكو شي . 
كواغد : جا هسه شلون الفروخ راح تتسودن 
حاكم : انا ادري يا كواغد منين اجتنا هالطلابة هاي ، من يوم سالفتج سالفة الطنطل ما فكتنا هالطركاعة 
- ياااع جا انا اجيبن طناطل ؟ 
- جا موش انت الفزعتيها ليلة عرسها يو لا 
- انا شلي غرض بالطنطل شو انت تريدلك حجة تهد اعليه ؟
ام حاكم : جا وكتكم ؟ 
حاكم : جا كاغد بعد بس تريدلها طلابه خاطر تهوبز بيها . 
ستار : انا اروحن بويه 
- اكعد و استجن بمچينك لا و الحسين اكومن اكص اجدامك ، بدل ما ظال اتراجف يمنا كوم شوف مرتك شصار وياها 
- كام من مكانه متضايك ، عاين عليها ، كاله :صافنة 
عاين لأيمان هدت و القران مستمر يقرأ ، ظلينا جويعدين وكل واحد يطلع اله سالفة ، حجة امي : اكلك حاكم انا اريدن اسجل جمارة بالمدرسة 
- شعدها بالمدرسها 
- تدرس اخير ما تظل ترعى بالحلال ويا عمتي . 
- بت هي شعدها بالمدرس ، تصير دكتوره .. تالي تعرس و تكعد عد رجلها عوفيها 
- جا الدختورات البالمستشفى موش بنات ؟  شنهي اخير منها هن؟ ، شو بتي شحلاتها و عويناتها جنهن صكر عليش ما تدرس 
- الديرة ما بيها غير مدرسة وحدة و كلها ولد مامش مدرسة مالت بنات ، وين اتسجلينها ؟ 
- لا المدرس موش بس للولد بيها جم بنية 
- جم وحدة ثنين ثلاث و الباكي كلهم ولد وتجيبين البت و تخليها بنص الولد ، خاطر اصيرن كوا*** انا مو ؟ 
- خو انت يو ردت اطمبر سالفة ظليت تفشر اعلى روحك خاطر نسكت ، انا اريدن جمارة بالمدرسة مالي غرض 
- وين علي اليكضج طنطل و يسودنج ، بسج عني . 
- الطنطل ما يجيني من كوني انا صايمة مصلية وانعى اعلى الحسين موش ملتهي .. اححححح الويلاد منا جا حجيت و طلعيت البكلبي . 
هدية : يمه انا جعت 
- جا ما تاكلين كاضتج 
- هدو المناكر وعلي ملينا بس تتناكرون بسكم . 
كواغد : خايبة اتكومين عني لا اشيل طناطل المتيريسه هاي الحاطها اعلى رجله و اخلهم براسج 
عاين حاكم لأيمان : هاا 
- راسي يوجعني كلش دايخة 
- تكومين لحجرتج تنامين 
كواغد : لوليلها فد مرة عليش جويعد هيج ، يو تريدني انا الولي ما عدي مانع 
- بسج عني يزي عاد. 
كواغد ، امشي لحجرتي انامن اخيرلي من هالكعدة الما منها بس مناكر و طناطل . 
مشت امي و جمارة تبعتها ، و ابوي اخذ ايمان وراح للغرفة ، ظلينا انا و حبوبتي و ستار : جا انت ما تروح يم مرتك موش سكتت 
- مالج غرض 
- خواف 
- منين اخاف لجن ما اريدن امش للحجرة رايد اظلن يم حبوبتي 
- وعلي تخاف ، عود زلمه و معرسيله . 
- هديوة تسكتين عني لا و العباس اكومن ليج ادوس بمصرانج . 
- جا ما اتروح ادوس بمصران مرتك الكاضها الطنطل . 
ام خاكم :   جا خلصنا من الخلفوكم طلعتونا انتم اتناكرون شمالكم 
- حبوبه اكللها ما اخاف و ظل تعلس بالحجي 
- لا حبوبه انت ما تخاف سبع، اسكتي انت ام السانين و من يكضج وينعنعج تروحين تتمصرنين يم ابيج و تعال ليه. 
طلعت يسرى : ستار 
فز ستار و كض بحبوبتي : يا خايب شمالك موش تكولن سبع من جيرة و خفت 
دنجيت اضحك اعليه ، تكربت يسرى و هي تكله : شمالك تخاف مني 
- عليج العباس راكبج طنطل يو لا 
- شمالك ستوري انا حرمتك يا طنطل دكوم . 
انا اضحك اعليه ، عاين علي ، جر النعال و طرني بيه ، ذبيته و ظليت اضحك بقوة، كام من مجانه خاطر يكتلني لبدت بسد حبوبتي : حبووووووووبه 
- وجعة امي موش كتلج كضي السانج 
ستار : وعلي يو ضحكتي مرت الاخرى الا افلش راسج 
كضته يسرى و هي تسحب بأيده ، مشى و هو يخوزر اعليه عود زلمه ، و هو لابد بكتار حبوبتي 
كمت انا جبت فريشي و فريش حبوبتي مديتهن و انجطلنا ، انا من التعب ما هيسيت روحي الا اشوخر ، شويه و تندهني جدتي :اهديوة ، خايبة اهديووووه دكعدي شمالج 
- ها حبوبه ها 
-خايبة انت الجنتي تحجين يم راسي وانا نايمة يو يتخايلي 
- يتخايلج حبوبه بس نامي 
- خايبين اجاني وعلي ، وينك يحويكم يمه تعال ليه . 
- حبوبه نامي مامش احد 
- خايبة شلون انامن و انا اهيس بزون تنافخ اعلى راسي ويو صكيت عيوني احسن وادم تحجي 
- حبوبة دنامي وعلي نعسانة 
حجيتها و انا اندار و اجرن العطا ليفوك راسي و هي دكول : من دهر الدهرج كون جا هسه شلون بيه يربي. 
نمت ما هيسيت الا الفجر ... 
مامش احد جويعد ، عليت وجيعي و لفيت شيلتي و كضيت قبوط ابوي و شيلها للشط . 
رحت مستعجله كبل لا الوادم تكعد و تجي للشط تترس، و انا اريدن اشوفنه و احجي وياه من كون الشوف وحدة ما يبرد الكلب و بالقصر حسرة اعليه الحجاية اخافن لا احد يشوفنا. 
وصلت غاد لكيته جاي كبلي ، من شافني تبسم 
وانا روحي تغدي زبد وتموع اعلى ضحكته يو شفتها . 
- اصباح الخير يهدوة 
- من امس و انا ما شايفج ، كلبي ولهان اعليج 
- انا اشتاكيتلك جثير 
- اخ يا يابة يابوية و علي كلبي يوكف من تحجين هيج 
- اخافن لا احد يشوفنا 
- جا ما شفتج مرة لا ما كلتي اخافن ، شمالج 
- من كون يو دروا اهلي يجتلوني 
- يجتلونج وانا موجود ؟!
- امي يو طكن عدها ما تكوم تفرزن احد تكضني تنعنع اعضامي 
ضحك ، هدوة انا بعد ما بيه اصبر الساعات بلياج ما يمشن كتلني . 
- جا انا شبيدي 
- رايد اخطبنج بأسرع وكت، بس عيب من الخاتون. 
- انطر انا مستعدة انطرنك ليه اخر عمري لجن ما اكدر بلياك يوم . 
- اخ اعلى كلبي من يسمع هالجلمات شيظل بيه 
- انا اروحن 
- ظلي بعد وكت 
- اخافن لا احد يجي 
- بعد الشمس ما طالعة ، شلونكم ايمان شلون صارت 
- ايمان كواكة احسن من اول امس لجن يسرى هم حول بيها 
- جني هاذ يو ابو خريان شنهي يعدي ؟ 
- اندري ؟ اكللك صكد 
- كولي يبعد اهلي كلهم واحد واحد 
ضحكت : لا تحجي هيج وعلي اكومن اتيه و ما اعرف احجي 
- جا راح اسكت 
- انت صكد تحجي لسليمة كلش ، انا خفت حيل من عرفت بيها تدري بينا 
- تدري بينا شني ، ديري بالج تسولفين الها شي ، ديري بالج كلش. 
- جا انت موش تسولف الها كلش 
- انا ما اطيك شوفتها شتحجين انت 
- موش هي تكلي سرحان يسولفلي كلشي ورادتني احجيلها شصار ابيناتنا ابغداد 
- عليج العباس ؟ 
- والامام علي 
- هاي تريد تجر السانج ، كون حجيتيلها شي ؟ 
- لا انا اخافن من كون تسمع امي منها تكطم اذاناتي . 
- انا الها ، لجن خلج حذرة ولا تسولفين الها اي شي 
- خوش ، امش هسه اهيس احد گرب 
- راح اظلن جويعد غاد اعاينلج ليما تخلصين امش وراج 
- اي اي امش بساع 
مشى هو ، وانا دنجيت اترس ، اجت يسرى : ها اصباح الخير 
جفلت : شجابج 
- كلت اشوفنج شو تأخرتي ، من كون شفتج ساعة الطلعتي .
- اي باردة وجدمي طمست 
- ذاك ياهو ؟ 
- منوه ؟ 
- ذاك 
اشرت اعلى سرحان 
- واحد من السلف ما اعرفنه ، ياله امشي 
مشيت وهي حذاي لجن خفت لا سرحان يتبعنا و هي وياي ، بس الحمد لله ما تبعنا ، حرك حصانه و طلع من ذيج الجيهة ، يظهر انه استلمها . 
ردينا للبيت و دشينا ، كالت : اريدن الماي اتغوسل 
غسلت انا وجهي و مشطيت راسي وسويت كصيبة طلعت امي : ها اصباح الخير 
- اصباح النور ، نمش يو ننطر ابوي يكعد 
- امشي مالي خلك اشوفن احد . 
مشت وهيسيتها متضايكة من كون جانت ليلتها وابوي كضاها عد ايمان ما اجاها بالليل ، مشت و هي تنافخ 
- اكلج 
- ها يمه 
- هي من ساعة الاجت و ليجاي ما شفتها لحكت (حاضت) 
- ياهي ؟ 
- ايمان اشمالج 
- ما ادري يمه 
- ولج خافنها حامل . 
- ما ادري 
- خو كضيتيها عليّ ما ادري و ما ادري. 
مشينا للقصر .. وفضينا الريوك بساع و انا عويناتي ما فاركن هواي ، من كون اسنح اعلى شوفة المهيوب. 
خلصت شغلي و اجت صبيحة كعدت يم الخاتون ، انا تسرسحت لراديون و طلعنا كعدنا بالحديقة و هي تحجي و تبجي اعلى حظها ، ينكسر خاطري اعليها .
اجت امي ليه وانا بالحديقة : ها هديوة يمه 
عاينت لراديون : جا شمالها تبجي 
- لا عمة ما ابجي لجن هيج عيوني يتحسسن 
- اي يعمة جا كلنا وكت التضيج بينا الوسيعة العين تكوم تهمل ونكول تحسس ، عفية دنيا حتى المدلل و نكول اعليه مترهي اموهدنته بضيمها لا خلصان منها غني ولا مضيوم. 
- لا تزيدين اعليها يمه ، عيفيها 
- وانا هم عايفتجن ، طلبت من الشيخة سويعتين و ارد ، عينج اعلى الخاتون ، و خفة ييمه ما اريدنها ، منكون الخفة موش زينة للبت 
- جا يمه انا شمسوية 
- اوصيج انا يبنيتي موش الومنج. 
- خوش يمه 
- يالله العافية عدج حبيبة يمه ردونه . 
- هلا بيج خالة 
عفتهن و مشيت و انا مدوهنه ، من كون احسن بهالمتيريسه حبلة ، جا هي ما عدها فرخ و حويكم يعاين لحلكها يو حبلت شلون ، ييمكني اسيس و ما يشوفني ، ثلث تيام و انت يمها جا ما عرفيت امس تجي يمي ، شنهي ما احسن ما تكول مرة وافادها ينكطع يو درت عنها ، ما فالح وياي غير بالشتايم والمناكر . 
اااااخ منين اجتني يربي جان الزلمة اشحلاته وياي 
من كونه ابغداد لجن يرد ملهوف اعليه وذاك الحجي و ذيج السوالف الحلوة ، من يوم العرس و الزلمة اتغيرن اعلومة . 
ما هيسيت الا و انا اعلى باب اهلي 
كلبي مشتاك لمي وابوي ، ردت ادشن ، لجن كلت خل اخذلي مصغول لوليدات اخوتي الصغار مت عيني عليهم يو دشيت يتلاكفون عباتي عمه عمه و يحبحبون بيه ويو انطيتهم مصغوله ، جا عدهم العيد . 
اخذت ١٥ مصغوله وخليتهن بجيبي . 
دكيت الباب و فتحته ابهيه : هلاااا كويغد عاش من شافج شنهي وين هالغطة 
- غاطه بنص الخير 
حبيتها و سلمت اعليها ، سمعو بيه و كلها طلعت الفروخ ( عمه عمه عمه ) و احبحب بيها ، وشل حلكي وهم ما مخلصين : شنعي ولجن كل عالفروخ مخلفاتها من دهر الدهرجن كون 
- ياااع جا صلي اعلى محمد 
- اللهم صل على محمد وال محمد 
وزعيت المصغول يو صارت حرب هاذ يصيح اريدن الحمرة و ذاك يصيح اريدن الصفرة ، درت عنهم :جا امي وين ؟ 
- طلعت تسير اعلى بيت صلاح و كالت تمر عليج غاد 
- يا مت عيني و انا اجيت ليها، وابوي وينه ؟ 
- ابوج و ابنج ستير بالكاع يشتغلون . 
خلني امشي امرن اعليه ، ياله اودعناكم 
- جا شنهي جيتج بس اعلى اهلج كعدي انشوفج 
- انا الجمعة امرن ليكم لجن الساعة ماخذة رخصة ولزوم اردن 
- هاااه ، جا معذورة ، بس لا تتخرين 
- شنهي صاير شي 
- من يوم الطلعت خليدة بيت ولليوم ما جن عافتنا بحالنا تتسرسح اعلينا العصرية و تكعد تحرمص بينا اعلى بيتها ، امس عليوي ومرته غدوا دماية تكله اريدن بيت شنهي كاعدة انا وفروخي ال١٠ بحجرة . 
- جا هم حكها لجن منين يجيب ؟ بس انا الج يخليدة امرن بيهم الجمعة ان شالله اباركلها و ادبج بمصرانها ، ياله اودعناكم 
ضحكن و سلمن و طلعت منهن . 
طلعت للكاع ، شفت ستار يشتغل وابوي كاعد يدخن تتن : ها بويه الله يساعدك 
- هله هله كاغد كلبي بويه 
وكام اعلى حيله عمت عيني ،ركضت ليه : لا تكوم بويه انا احبن راسك و اكعد يمك 
حبيته وكعدت : شلونك يعزيز كلبي ؟ 
- والله انشد اعلى اعلومج مشتاكلج من كون ارد اشوفنج وما الاكيج بالبيت 
-اردن من وره الغروب والله يابوية ما اطول سويعة وانامن من التعب ، مشتاكة روحي لشوفتك ، شنهي ما شنهي . 
وكعد يحجيلي اعلى اخوتي و على عركة اعليوي ومرته و يكلي ما بيدي شي انا كوة مدبر جعدتهم ابيتي (جا شسوي)
- ما يطلع لبغداد غاد ويشتغل جا هنا مامش شغل 
- وانا اطي ولدي لبغداد بويه 
-شعليهم بويه يشتغلون غاد و يدبرون عويلهم 
- لا بويه اخافن اعليهم ، بغداد اليطبها يتيه.
ظليت احجي وياه ، شويه و اجت امي عمت عيني اعليها حبيتها و حطيتها اعلى كلبي من كون مشتاكة لشوفتها ، وكعدت اعلى سوالفنه 
شويه و كلت الهم : ياله انا اترخص 
شمخي : توج جيتي 
- لا بويه  لزوم اردن للقصر  من كون اخذت سويعه خاطر اشوفنكم. 
- هلا بيج بويه . 
تمشيت للبيت ، دشيت مامش احد بس يسرى و ايمان بحجرتها : جا وين عمج ؟ 
- طلع للمضيف 
- اكلج انت ما تحسين بهاي المتروسه حبله ؟ 
-عمه هاي حية وكاعدة تحفر ليج 
- عليش ؟ 
- انا ما اريدن اوزنج اعليها لجن عمه خبيثة ، سمعيتها الصبح و هي تكله العمي انت شلون حامل كواغد كل هالسنين كل فطر برجلها ينام بيه الجريدي و الوجه اسود وفحطانة النهار كله لا تعدلك روحها لا تحط ديرم و تتسوك ، جن ماخذلك زلمة . 
- وانا اكولن امس ما اجاني من كونها هي التحش براسه اعليه ؟ 
- يا عمه شكلج انا مكسور خاطري اعليج ما تستاهليج لجن هالبغدادي خذت زلمتج و يو حبلت حسبي عمي راح من اديج . 
طلعت ايمان من الحجرة : هلوو اجيتي ؟ 
- جا اخذ رخصة منج ياله اجي 
- شوفي هاي الجفية حلوة ؟ 
- شنهاي ؟ 
- اني طرزتها دا اسويها شكل وردة حمرة لحاكم يخليها بجيبها . 
-طريتها من ايدي .. اي يستاهل حويكم جا الليل كله مكابلج عليش ما تسويله وريدة . 
- اسويلج ؟ 
- مشكوة و جزاج الله الف خير ما اريدن ، الا انشدنج ، انت صارلج شكثر ما لاحكة ؟ 
- شنو ؟ 
- خايبة لاحكة يعني تجيج هاي التجي للنسوان بنهاية الشهر 
- هااا فهمت .. ما اعرف 
- شنهو الفهمتي و شنهو الما تعرفينه 
- يعني مجايتني صار كومة 
عاينت اعلى يسرى سوت حركة بحلكها وصمت ايدها لبطنها : الا اكللج هاذ الطنطل بعده يجيج بالليل 
ضحكت يسرى و ايمان ردت : لا عفيه لتكولين اسمه اني اخاف 
- خايبة يجيج يو لا 
- من اشوفه بودي اموت 
- لا جا انت من هالناحية تطمني احريشي ما يطكج ما تموتين  
- يعني شنو ؟ 
- تريدين تخلصين من الطنطل ؟ 
- اي السيد انطاني هاي الكلادة و كال كل يوم سبت اروحلة مرة لخ 
- جذاب جذاب ، خليني اعلمنج درب ما تكومين تشوفين طنطل ولا تهيسينة 
- شلون 
- دبجي وياي 
دبجت اعلى الكاع وتضرب ايدها ابط ( احنا الخاوينه وبس المالح نمشي وياه ) احا احا احا 
جا ما تدبجين شماااالج 
- ما اعرف 
- دبچييييي خاطر يفك عنج الطنطل دبجي 
- يعني يروح 
- اي ياله 
كامت تدبج وياها بس ما تعرف اطك ابط ... بس تنكز 
- خايبة انا شلون بالفاهية ، حيل حيل 
ويسرى تضحك بصوت عالي .. 
كالت الها : بعد شغيلة 
- شنو ؟ 
- نراكض انا وياج و اليوصل اسرع بعد ما يكربه الطنطل 
- بس هو الطنطل يجي بس بالليل 
- اي جا لزوم تركضين بالنهار خاطر يخاف منج وبعد ما يكربج 
ندستني يسرى - عمه جا  انت شرايدة منها ؟ 
- خايبة انا اريدن تنزل اعليها هاي  خاطر لا تحبل 
- و يو طلعت حامل 
- جا يسويها حظي 
ركضي ياله 
وركضتها وذيج تركض بكل سرعتها مصدكة لو ركضت حيل ما تشوف الطنطل . 
دشت ام حاكم : هاااه شمالجن 
- عمه من كون انا سمعيت من السيد يو احد ركض حيل ما يكصه الطنطل 
- اعليج العباس 
- ابلا حلفان من كون الطنطل يكره الرسول واهل بيته 
- يااااع صكد يكرهم عوينة ابيه، اكلج كويغد جا هسه انا يو ركضت وياجن بعد ما اسمعنه بالليل ولا اهيس احد ؟ 
- اي اي 
وزرة عباتها وشدها اعلى خصرها و طكتها ركضه ، وركضن كلهن داير ما داير الهول وحدة تركض وره الاخرى . 
دش حاكم : عوينة ابو اصلهم هااااااا 
كواغد : انا اتأخرت لزوم اردن للقصر 
- تعااااي جاي وين ، شعدج مركضتها 
- يااااع جا انا شعلي ، غير هن ركضن انا اروحن اروحن . 
وطتها ركضة ظن البيت طلعت و حاكم يصيح : خايبة انت شعدج تراكضين 
ايمان : حتى يروح الطنطن 
- طنطنو اهلج كوووون اكعدييييي ، و انت يمه شمالج ، عاي نكول بلا عكل انت الجبيرة كاضتهن و تركضين ، جا مو الليل كله تونين من اجدامج 
- يمه اجدامي ولا اطنطل 
- جا ياهو الكالج اليركض ما يجيه
- غير كويغد 
- جا كويغد سيد وتكلج 
- لا اعليه العباس هي تكول سمعت السيد كال
- وصكدتيها ؟ 
- يااااع اتجذب اعلينا 
يسرى :عمي الحجي بيناتنا عمتي سوت هيج عدالها ايمان حامل و تريد تنزل الولد . 
- هاذ ياهو الكالج ؟ 
- هي كالتلي والله 
اندار على ايمان : وانت يم عكل الذبانة تراكضين جنج ثور ما كلتي فرخ ابطني . 
- مو اخاف من الطنطل و هي كالت يروح معبالي دا تجذب . 
يسرى : عيب اعليج تكولين تجذب عمتي ما تجذب جانت تتكشمر وياج ، عليش هيج تحجين اعليها جدام عمي 
صاح حاكم : بسجن ، امشي انت صبيلي غده، و ركضة بعد لا تراكضين ولا كل الحجه وياج تصدكينه ، تره ذوله يشوفونج منصبه و يضحكون اعليج 
- منصبه يعني شنو ؟ 
- دشوف الحظ تعال فهمها شني منصبه ، دروحي بويه صبيلي غده ومالج غرض . 
كعد و هو يستغفر و امه تون من رجليها : يمه جدامي انشلن وعلي 
- جا ياهو الكالج يم عكل الجبير تصدكين كويغد 
- اكضنها يو لا وعلي الا شعمل بحالها
- عوفيني من كاغد ، انا رحت و دوريت كاع النا 
- شنهي تريد تشيل 
- لزوم اشيلن ، جا اظل مكابل هالطناطل ليما يتسودنون اعيال بيتي 
- جا وين تشيل 
- اليوم رحت و اخذت قطعة ارض وراح ابنيها 
- منيلك و انت مديون اعلى عرسك؟ 
- من فلوس الورث مالت ايمان 
- وتمد ايدك اعليهن 
- جا اخير من كعدتها هاي و الطناطل مسودنتها ، عودينه لما ادبر اموري الله كريم اردنها الفليسات ليها 
- حجيت وياها 
- اي حجينا امس و كالت الفلوس انا ما اعرف اتصرف بيهن انت شنو تسوي سوي. 
- جا طلعت خوش بت من كونها اطتك ورثها من ابوها 
- موش اطتني لجن هي بوصايتي ليما تقبط ال١٨ سنة ذيج الساعة هي تتحكم بفليساتها. 
- جا اشتري ييمه عليش تبني 
- يمه بيوت السلف دمار ولا بيت براسه حظ ، كلت ابني و بيت كون طراز بغدادي حلو، و اكصمنه بالنص ، نص لكواغد و فروخها و نص تكعدين بيه انت وايمان . 
- جا وستير ومرته 
- جا ستار موش من فروخ كواغد ، حجرة اله و حجرة لامه . 
- الله كريم اخيرلنا من هاذ البيت 
- انا اريدن ايمان ترتاح من كونها امانة و الامانة ثكيلة يا يمه 
- والله يمه انا ساعة الشفته اول مرة كلت هاي ملعبة و الله يستر منها لجن طلعت طينة كلشي ماكو 
- مكرودة يمه ما شافت هنى بحياتها من اجدادها لهلها ليجاي ، خلصتها دمغات . 
.. حاول حاكم يشتري البيت ويبني بأسرع وكت 
بس كل ما جال البيت يزيد وضعه ، ويزيدون بشوفتهم لأشياء غريبة تصير بالبيت حتى هو نفسه كام يلاحظ اشياء غريبة 
ما بطل كل سبت ياخذ ايمان للنجف خاطر يقرا عليها وبدت تتشافى ، احسن من قبل و هي من خوفها تتمسك بالحرز و الايات القرأنية اللي يوصيها بيها السيد و ٢٤ساعة حاطة المسجل و مخليه القران يقرأ بغرفتها 
الا يسرى ما فكت من ايمان من كون الكل يطلع ، الا هي تظل مكابلتها ومقيدتها ويوميها شايفتها بشكل، و ذيج ترعد من الخوف  
مرت ثلث تشهر  والبيت بعده ما كامل بنائه ... 
ستار كلش تضايق من الأشياء الزادت بشوفها اله ، من خوفه كام حتى ما يلفي للبيت يظل ويا جده ،، ينام بحجرة اجداده. 
اما سرحان فبدا بأعمار المعمل مالته و خله خنجر اليوكف اعلى تشييد المعمل ، رغم لوم و حجي الشيخ بس سرحان ظل متمسك بخنجر خاطر يخلي يترك شغل الخاوات و يسترزق برزقة حلال . 
كواغد حطت ابالها تسجل جمارة بالمدرسة ، بعد ما تتزحزح عن قرارها ، و بالفعل زينت لجمارة صفرة و لبستها دشداشة بازة حالها حال الولد و سجلتها ، و بس  مدير المدرسة و المعلم يعرفون هاي بت ، الكل عدالهم ولد من كون كواغد وصت المدير و كالتله : ابوها عيب يرضى تسجل بنص الويلاد.
ومشو اعليها اسم (جلجول ) من كون اسمها مالت الولد اسمه (جليل)  .. كل البالمدرسه يسميها بهالاسم ، و ما ردت يوم لا ما كاتلتلها واحد وهاده اعليهم و مسويتلها عصابة مال ولد  وشحده اليكرب جلجول . 
يوم فاشخة واحد بطابوكة 
ويوم عاضة واحد من راسه 
ويوم ساحلة واحد بالطينة 
ويومية جايين شكاية للمدير من وره جلجول.
زناد اخذ بت كاطع و عرس اعليها وبعد عرسه بأسبوع رجع مرته للبيت ، والشيخة ملوك صافة ويا بت اخوها ، و المشاكل ما تخلص 
، الا راديون اعلى حالها يوم عن يوم تذبل وما ترضى احد يتقرب ويسألها شبيها ولو جابوا طاري الزواج تبجي و تون و ما ترضى بأحد . 
اما الشيخ وشكوكه ما بطلهن و هو يشوف ابنه يومية كبل طلعت الشمس ياخذ حصانه و يطلع ، ظلت اباله : سرحان وين جاي يغبش يومية ؟ 
وصى ابن حميد عبيس ، خاطر يراقب سرحان ، بس عبيس اخو سرحان بالرضاعة ، شافه يلتقي ويا هدية من الصبح . 
رد و كال للشيخ : ما شفت اعليه شيخ ، راقبته و ظليت وراه لجن ما شفته غير يفتر بالسلف بس !
لجن ما اكتفى اعبيس ، روح و گل لسرحان : دير بالك انا شفتك تلتكي ويا بت حاكم بس الشيخ شاك بيك و طلب مني اراقبك، لا تطلع بعد الصبح خاف يكلف غيري ويكشفك . 
سرحان : جا انا ما خايف ، وناطر الوكت المناسب خاطر اكلله و اخطبنها منه 
- بالمبارك ، لجن احذر من كون زناد ما يوفر فرصة الا ويحشها براس الشيخ عليك ، اخذ بالك يخوي 
- ان شاءالله 
سرحان ما رد .. و ثاني يوم مشى مثل كل يوم الصبح ياخذ حصانه و يطر بيه للشط . 
الشيخ متاكد سرحان عده سالفة ، من كونه ابنه و يعرفه يو رد الصبح عكله طاير ومو على طبايعه . 
ثاني يوم ظل مناطر طلعت سرحان ، ويا ما طلع ، هو لف شماغك اعلى وجهك و اطلع .. 
شافه اخذ حصانه ووكف اعلى الشط ، والجو اظلم و الشمس بعدها ما طالعه ، وكف و هو ينطر يعرف سالفت ابنه شنهي ، مسودن عاقل كاعد هالوكت و حاط اعلى الشط !
شوية و اجت هدية .. 
سرحان عاف احصانه و تكرب ليها ، وكفوا اعلى الشط و الضحك ماخذه و هو يحجي وياها . 
ما حجه ولا كال ، رد للبيت طبيعي 
وردت هدية ورد سرحان و تريكوا .. و هو يراقب . 
لما راد يطلع من البيت حجه ويا ملوك كال الها: عينج اعلى القصر عدل لا تخلين للعيون تزيغ 
ملوك : القصر انا مسيطرة اعليه لجن لو زاغت العين غاد منه انا شلي بيه 
- شتقصدين 
- انا ما اريدن احجي واطلع مو خوش لجن سرحان صار ما ينكض و كلما نحجي ويا واريدن ادليه ما يرضاها مني ويكلي اول و تالي القصر الي و انتم برا ، ويعايرني ، لجن يبو زناد يو ما كضيته ووعيته اعلى زمانه يضيع 
- انا موش كاصد هاذ كلامه ،  لجن عينج اعلى البنيات اليشتغلن هنا 
ضحكت : وانا فاهمه قصدك اذا اعلى سالفة هدية ، فردحة هي الجاي تطي المجال لابنها ويومية تودي اعليها للبيت حجة تعاونها و ينجمعون ، وانا مكروهه يو حجيت هالتشوفني ساكته 
- منا وغاد هدسة ممنوع تمشي لبيت ردحة ، خلي اي وحدة منهن بس لا تكربين النار من البنفط 
- كرب ووجو يشيخ ، لجن حتى يو امرت ، سرحان ما يرد و يجي يصيح بالقصر اذا ما خلينها تعاون امه 
- انا احجي ويا سرحان . 
طلع و هو يوصي الحارس يندهله سرحان و يكله (ابوك طالبك بالمضيف) 
- نعم بويه طلبتني ؟ 
- اكعد 
- شنهي ؟ 
- انا قررت ازوجنك يسرحان 
ابتسم ... بيها الخير 
-رايد اخذلك بت عمك جاسم
- انا جاسم ما اطيقنه تطيني بته 
- عمك هاذ احترم 
- السموحة يشيخ لجن انا لاكي البت و مترايدين و طالبها ان شاءالله اعلى سنة الله ورسوله 
كام الشيخ : بت حاكم تشيلها من راسك يسرحان 
وكف سرحان مستغرب : من كونك تعرف انا رايد بت حاكم ، عليش رافض ؟ 
- بت ثجيل تحرم اعلى ابن ضاحي 
- وامي بت ثجيل شنهو الصار ؟ 
- الصار فصلية و اعلى ما خلفتك انردت لهلها 
- وانت ليمتها تظل موجف اعلى هاي الطلابة ، ثجيل خوالي وانا طالبها منهم 
- هدية منهي اعليها يسرحااااان 
- ان جان اعلى نهوتها انا شرايه
- عمامها طلابين دم و متعطشين لدمي و دمك ، و الكرابه البينك وبينهم ما تشفعلك و تظل بعيونهم ابن ال ضاحي، يعذبونك و يذلونك و ما يطوها الك 
هالموضوع ما اريدنه ينعاد و يو سمعتك عدته ما تلوم ال روحك يسرحان 
- السموحة يشيخ ، لجن انا كتلك رايد البت 
- اطلع الظهرية و عاين بالسما ووجد بيها عدل يو شفت بيها نجمة وكتها اعرف هاي النجمة اكرب ليك من بت حاكم 
- انت عليش رافض ومحسب كل هالحساب ، انا طالبها و شراي نهوتها ، جرب و اخطبها ليه . 
- هدية ما تصير مرة بقصر ال ضاحي يسرحااااان 
- شيخ انا عمري ما عصيتلك جلمه .. لجن اسمع هالجلمتين مني، وعلي هدوة يو ما صارتلي مرة اعلن العصيان 
ويا ما نطقها و الشيخ جابه بجف ....يتبع .. يتبع الفصل 23 اضغط هنا
google-playkhamsatmostaqltradent