رواية جوز الحرباية كاملة جميع الفصول، وهي حكاية من سلسلة حكاوي عامية من حياتنا اليومية بقلم الكاتبة المميزة نسمة مالك عبر دليل الروايات للقراءة والتحميل (deliil.com)
حكاية جوز الحرباية الفصل الأول
..صباح الخير عليكم،انا حنان 24سنه،خريجه كلية تربيه،
ربة منزل و زوجه من 5سنين ولسه ربنا مرزقنيش بأطفال،
والحمد لله صابره وراضيه رغم ان العيب مش منى،
من جوزى،بس كل اهلنا قولنلهم انه منى انا،
ودى كانت رغبتى اللى اصريت عليها علشان مشوفش نظرة أنكسار فى عين جوزى،
وبقيت جنبه فى رحلة علاجه اللى مش عارفين هتستمر لحد امتى بس املنا فى الله كبير..
طول فترة جوازى وانا الزوجه المطيعه الخدومه لكل طلبات جوزى وحماتى اللى قاعده معايا فى الشقه رغم ان ليها بيت بس مهانتش علينا نسبها لوحدها بعد ما اخوات جوزى البنات اتجوزو،
هى طيبه جدا وانا شيلها جوه عنيا،وبعاملها زى امى،وعمرى ما زعلتها ودايما هى بتدعيلى،
وكانت حياتى كويسه جداا وجوزى ونعمه الزوج الخلوق،
بيحبنى ودايما بيحاول يراضينى،لحد ما الحال أتبدل وجوزى بقى واحد غريب عنى انا معرفوش،
بقى دايما سرحان،وبيتجنب وجدنا لوحدنا،ومبقتش احس انه ملهوف عليا زى الاول،ودا خلانى اتحول وابقى واحده تانيه بشخصيه تانى انا نفسى اتفاجأت بيها،وبقيت اتلون على كل لون زى الحربايه علشان اقدر اوصل للون اللى هيريح جوزى ويخليه يرجعلى زى الاول،خلينى اقولكم الحكايه من البدايه..
الحكايه بدات لما خالت جوزى الصغيره توفت من ست شهور،وجت بنتها رقيه اللى فى اولى كليه زراعه تعيش معانا فى شقتى لأن والدها هو كمان متوفى وهى بنت وحيده مينفعش تعيش لوحدها،فى الاول صعبت عليا جدا واعتبرتها زى بنتى مش بس اختى،وبقيت أحضرلها كل طلباتها بنفسى وشلتها على كفوف الراحه لغاية ما فى يوم قلقت بعد نص الليل وقومت مفزوعه،سميت وقريت قرأن وقولت هقوم اتوضى وأصلى قيام الليل على ما الفجر يأذن،
فتحت باب أوضتى وخرجت لقيت صوت جوزى جاى من اوضة رقيه اللى بابها مفتوح،
كدبت ودانى وقولت انا جوزى اول ما بيجى من شغله بيدخل عليا أنا قبل مامته،وبيخلينى أستأذن مامته علشان يدخل يطمن عليها،مشيت براحه وقربت من أوضتها علشان اسمع كويس لقيت فعلا جوزى معها جوه،
فى لحظه بقى جسمى كله يرتعش ودموعى غرقت وشى وانا سمعها بتقوله بدلع وسهوكة بنات..
"أبيه كريم خليك معايا لحد ما انام انا خايفه يجيلى كابوس تانى"..بصيت بعين واحده أشوف جوزى بيعمل ايه بالظبط لقيته قاعد جنبها على السرير والبجحه نايمه على صدره من غير حجاب ولا خشا ولا حيا وهى عارفه انه يجوزلها،
جوزى طبطب على شعرها واتكلم بطيبته اللى انا حفظاها..
"يا بنتى نامى ومتخافيش انا شغلتلك قرأن جنبك هنا،وانتى اتعودى تقرأى ورد من القرأن الكريم قبل ما تنامى يكون حصن ليكى"..
عنيا وسعت على اخرها وفتحت بوقى لحد ما قرب يوصل للأرض لما شوفت رقيه بتتمسح بوشها فى صدره وتهمهم بصوت مايع وبتقوله..
بقلم نسمة مالك
"اممممم ريحتك تجنن يا ابيه"..رفعت ايدها حطتها على وشه.."انت احسن ابيه كريم فى الدنيا"..غمضت عنيها ورفعت وشها شويه ومدت بوزها اللى عايز يتكسر علشان تبوس جوزى وقتها محستش بنفسى غير وانا بجرى بكل سرعتى ونطيت عليهم هما الأتنين وبقيت فى وسطهم لدرجه ان البوسه اللى المفروض كانت هتبقى على خد او بوق جوزى جت على خدى انا😁،طبعا هما أتسرعو ولقيت رقيه بتتكلم بغل وغيظ بتقولى..
"ايييييه دا حد يدخل على حد كده يا حنان"..
صحيح اللى اختشو ماتو،عيزانى اخبط عليها هى وجوزى قبل ما ادخل يا حلولى،بصيت لكريم باشا جوزى بحاجب مرفوع وضحكه صفره علشان يتكلم،بصتى ليه كانت كفيله تخليه ينتفض من على السرير بتاع السنيوره ويخرج على اوضتنا جرى وهو بيقولى..
"كويس انك صحيتى يا حنون خليكى مع رقيه بقى علشان خايفه يجلها كابوس تانى"..
لقيت رقيه بتزوقنى من على سريرها وبتتكلم بقرف لاول مره.."لا تخليها فين خدها معاك يا ابيه"..
وطت صوتها وكملت فى سرها بس انا سمعتها كويس وهى بتقول..
"الله يعينك على ما بلاك"..
بقى كده يا رقيه دى جزاتى بعد ما اعتبرتك أختى وعاملتك بما يرضى الله،طيب انا بقى هوريكى اللى بتقولى عليها بلى دى هتعمل فيكى ايه،و؟؟