رواية غيرة بنات كاملة جميع الفصول بقلم الكاتبة آية علي عبر دليل الروايات (deliil.com)
رواية غيرة بنات البارت الأول
قصتنا هتحكي عن شاب جميل ووسيم جدا وأي بنت تشوفه تعجب بيه وتبقي نفسها بس يكلمها كلمة أو يبصلها بنظرة من عيونه بس هو عادي مش بيشغل باله بواحده منهم لانه شايفهم مش مناسبين ليه هو في باله وفي خياله فتاة أحلامه اللي بيتمناها وبيدور عليها وفيها الصفات المعينة اللي هو عاوزها وليه أخته الكبيرة أكبر منه بسنتين فقط وقريبة منه ولقلبه كتير وهو كذلك الأمر بيحبها أكتر وحبها لأخوها ده بيوصلها لغيرتها عليه من البنات اللي بتحبه وبتكون مستعدة تموت البنت اللي بس بتبصله ولاحتي تفكر تتكلم معاه .....
ونتعرف علي أبطال قصتنا وأحداثها :
---
_هشام :هو الشاب الجميل الوسيم بطل قصتنا حبيب البنات ومدوخهم كلهم ومجريهم ومحيرهم وراه وهو يدرس في كلية ليسانس أداب ....
_شيماء :أخت هشام الكبيرة تدرس في كلية التجارة والحقوق "كلية الشعب "دفعة رابعة أخر سنة ليها ...
_نرمين : صاحبة شيماء في الكلية الروح بالروح معاها في نفس الدفعة ومن دورها وبتحب هشام وبتموت فيه وحلمها يتقدملها وتتجوزه وبترفض كل العرسان اللي بيتقدموا ليها علشانه لأنها علشان عايشة علي أمل إنو يحبها ويتقدم ليها في يوم من الأيام ..
....وبكده إتعرفنا علي بعض أبطال نوفيلتنا ندخل بقي في الأحداث وإن شاءالله نتعرف على باقي الأبطال في بارتاتها القادمة لسه الأبطال كتير بس هنعرفهم من خلال سرد قصتنا وأحداثها .....
---
...في كلية التجارة والحقوق في مدرج الجامعة كانت شيماء وصديقتها نرمين جنب بعض في نفس الديسك والمدرج في محاضرة الدكتور بيشرحلهم الحسابات والمعادلات وكانت شيماء تسمع للدكتور ونرمين بتكلمها ومش مركزة خالص في الشرح وبتسألها عن أخوها هشام لأنها أول ماشافته اتهوست بيه وإتجننت عليه من أول مرة شافته فيها ....
_نرمين :بت ياشيماء خليكي معايا سايباني اكلم نفسي كده قال يعني من شطارتك وفلاحتك أوي دي تجارة مش طب يعني ياختي هنخلص ونقعد في البيت .....
_شيماء :هاااااا يازفتة عاوزة ايه هو مش بيحلا الكلام غير في المحاضرات يعني وبعدين ياختي من امتي الصحوبية دي ده احنا لسه صحاب بقالنا شهور واحنا من تلاتة سنين مع بعضنا في نفس الدفعة والمدرج ولالينا دعوة ببعض عادي يعني ايه اللي حصل فجأة كده .......
_نرمين :وايه يعني ياحبييتي يامحاسن الصدف بقي مش لما أنتي تعبتي وأغمي عليكي واخدتك أنا والبنات المستشفي ووداناكي وفضلنا معاكي لحد مابقيتي كويسة وبعظها وصلناكي البيت حبيتك واتصاحبت عليكي وبقيت صاحبتك كده ابقي غلطانة ....
_شيماء :هههههه لا وأنتي الصادقة ده أنتي أول ماشوفتي أخويا هشام دوختي من جماله وحلاوته واتهوستي بيه وبقيتي تتقربي مني كل يوم عن اليوم اللي قبله علشان تشوفيه وتلفتي نظره ليكي وتجيني تذاكري عندي علشان هو يشوفك فاكراني يابت هبلة ولاعبيطة ولا مش فاهمة حاجة أه فعلا أنا كنت مغمي عليا وكل حاجة بس اما فوقت وشوفتك وأنتي عينك منه وهتطلع عليه وهو كان حنين عليا وخايف عليا ماأنا أخته حبيبته بقي وأنتي ايه عقلك راح وراه ونسيتي نفسك خلاص وبقيتي تتقربي مني وتجيلي البيت دائما بحجة المذاكرة ولو ناقصك حاجة تكمليها مني وتبقي معايا بتذاكري وعينك بتلف وتدور في الشقة علشانه صح يابت ولاايه ....
_نرمين :صح ياشوشو بس نفسي هو كمان يأخد باله مني ويحبني زي ماأنا بحبه كده بس أول ماببصله بينزل عينه علي طول في الأرض مش بيديني فرصة أشوفه ولاأملي عيني منه ولما أكلمه واسلم عليه يسلم وخلاص ويستكفي بكده مش واخد باله مني خالص ليه هو أنا فيا ايه مااتحبش عليه طب ده أنا كل شباب الجامعة عندنا هيموتو عليا وبيعاكسوني في الرايحة وفي الجاية وبيتمنوا إشارة واحدة مني بس إنما أنا مش بحب غير هشام وبس هموووت عليه يابت حسي بيا بقي شوية ...
_شيماء:ههههههه حاسة بيكي والله وأنا بقي هساعدك لو مش بس أنتي غالية عندي وشايفاكي واقعة لشوشتك في حبك للوأد .....
_نرمين :باستها بجد ياشوشو هتساعديني طب إزاي قوليلي هااااا هموت وأعرف .....
_شيماء :طب لما المحاضرة تخلص نركز بس الأول أحسن الدكتور لوشافنا كده هيطردنا بره المحاضرة...
....وبالفعل شافهم الدكتور الاتنين وهما بيتكلموا مع بعضهم وبصوت عالي رجولي وخشن زعئق وقال :
أنتي يابنت أنتي وهي شغالين كلام في محاضرتي ومش عاملين حساب لوجودي خالص قومي اوقفي منك ليها ووقفوا الاتنين شيماء ونرمين .....
_الدكتور لنرمين :هااااا كنت بتكلم واشرح في ايه .....
_نرمين :امممم مش فاكرة والله يادكتور .....
_الدكتور:أه ماأنتي ليكي حق ماتبقيش فاكرة حاجة أنتي هتركزي في المحاضرة ولاهتركزي في الكلام والرغي مع اللي جنبك اتفضلي بره ياهانم علشان بعد كده تبقي تفتكري كويس وتركزي معايا .....
_نرمين :خلاص أسفة يادكتور المرة دي ....
_الدكتور :لا قولتلك اتفضلي بره ....
....وبالفعل خرجت نرمين بره المحاضرة وبقت في قمة خجلها وإحراجها من اللي حصل وشيماء بقت في نفسها فرحانة فيها وبتضحك عليها ....
_الدكتور لشيماء :وأنتي حضرتك فاكرة أنا كنت بقول وبشرح ايه ولابرضه كنتي زيها ومش فاكرة ....
_شيماء :لا طبعاً فاكرة يادكتور كنا بنتكلم في الحسابات والمعادلات وإزاي حلها وفهمها ....
_الدكتور:الله ينور عليكي أيوة كده اقعدي .....
...وقعدت شيماء وبقت فرحانة ومبسوطة في نفسها وبتقول جواها :
"أحسن يانرمين تستاهلي بقي أنا يابت اقبل أخويا يتجوزك برضه عمري ماهخلي أخويا يتجوز أي حد غير اللي تبقي علي مزاجي ده لو أنا سمحت لبنت أصلا تدخل مزاجي وتفكر بس تحط هشام في بالها أنا مافيش بنت هتأخد أخويا حبيبي مني أبدأ غير لما تكون حبيبتي وبحبها لأن حبها هيبقي من حبي لأخويا بس أنا هساعدك برضه علشان اعشمك وفي الأخر اجيبك علي وشك ارفعك من سابع سما وانزلك فجأة علي جدور رقبتك لسابع أرض وكده كده أنا عارفة إن أخويا أصلا مش عاوزك ولاملتفت ليكي ولاأنتي تعجبيه من الأساس لانو مش بيعجبو النوع ولا الصنف ده من البنات اللي زيك كده "
..وفي أخر اليوم إنتهت المحاضرات والكل مروحين لبيتهم وفضلت نرمين تحت في الكافتيريا منتظرة شيماء علشان تتكلم معاها وتعرف منها إزاي تساعدها في إن أخوها هشام يحبها ويأخد باله منها ويخطبها ويتجوزها وبالفعل نزلت شيماء وشافت نرمين قدامها اعدة عالكافتيريا بتلعب في الفون وبتقرأ في مجلات لون الشعر والبشرة والميكيب والكلام ده لأنها دائما ميكيب ولبس ضيق وعايشة عيشة غير عيشة أهلها وهما ناس غلابة وعلي قد حالهم بس هي بقي بتعمل كده علشان تلفت نظر الشباب في الجامعة ليها ولما شافت هشام وحبته بقت عاوزة تلفت نظره ليها أكتر وأكتر ......
_شيماء :يخربيتك يابت أنتي لسه هنا من ساعتها طب ماروحتيش ليه ولاطلعتي وحضرتي باقة المحاضرات ليه بعد الدكتور اللي طردك ماخلص محاضرته ومشي ....
_نرمين :ماليش نفس احضر حاجة وبعدين بيني وبينك بقي أحسن اديني اعدة في الكافتيريا في الهوا الطلق اشرب ولا أكل حاجة اقرأ شوية في مجلة ولاحاجة من اللي أنا بحبها وبعدين كنت مستنياكي ياحلوة علشان تقوليلي هتساعديني إزاي في إن هشام يحبني ويأخد باله مني ....
_شيماء :هههههه لدرجاتي ماشي ياستي بس تدفعي كام ......
_نرمين :اللي أنتي عاوزاه ياقلبي ....
_شيماء:هههههههه عالحب وسنينه لدرجاتي يابت بتحبيه ده الحب حلوووو أوي وأنا ماأعرفش لا بقي ده أنا شكلي هحب أنا كمان يابت أما أشوف الحب ده هيعمل فيا ايه ....
_نرمين :ساعديني بس أنا الأول وبعدين ابقي حبي ياختي ولااتنيلي زي ماأنا اتنيلت حتي تجربي اللي أنا جربته ووقتها تعذريني .....
_شيماء :ماشي أول حاجة هديكي رقم فون أخويا رني عليه وكلميه واتعرفي عليه وخودي وادي معاه في الكلام كده وجاريه يابت اشغليه بيكي وحببيه فيكي أنا برضه اللي هقولك ده أنتي حتي خبرة .....
_نرمين : والله في بالي اعمل كده بس ما أنا كنت ببصله والاغيه لما باجي عندك وهو مش بيديني وش خالص وكنت ببقي عاوزة اخد رقم فونه منه وكده بس هو ماكانش بيديني الفرصة دي وخايفة اتصل عليه فعلا واكلمه هو يحرجني وكمان مااتعودتش إني اكلم حد كلهم هما اللي بيكلموني وأنا بقي اكلمهم واجاريهم واعيش اليومين بتوعي كده وخلاص قصة غرامية وتروح لحالها لكن أخوكي ده أحلي وأجمل قصة حب في حياتي حصلتلي ياشوشو ....
_شيماء :طب مستنية ايه يابت خودي رقمه اهوه وكلميه واهو بتجربي وتحاولي وتعملي اللي عليكي وخلاص وأنتي يعني تأكليه في الكلام وتوقعيه في دباديبك من أول مكالمة علي طول ده أنتي ايووووة عليكي يعني موزة موزة عالأخر وبتاعة كلام ....
_نرمين :يعني خلاص ده أخر كلام عندك شايفة إن ده الصح ......
_شيماء : طبعاً شايفة صح الصح كمان جمدي قلبك كده يابت اتفضلي الرقم اهوه .....
...وبالفعل اخدت نرمين الرقم وسجلته عندها علي فونها وحضنت شيماء وباستها وقالتلها اموووووة حبيبتي ياشوشو والله مش عارفة أشكرك إزاي واستاذنت منها وروحت جري عالبيت طايرة من الفرحة ومستنية الوقت الفاضي والرايق اللي يكونوا أهلها فيه مثلا نايمين أو مشغولين بيعملوا حاجة أو في مشوار بيقضوه وتكلم هشام ....
---
البارت خلص أتمني يكون عجبكم وانتظروني البارت اللي جاي إن شاءالله تفاعلكم معايا وتشجيعكم ليا دائما وعاوزة تفاعل ورأيكم بكل صراحة تعليقات من غير تم ولاإيموشنات ....
البارت الثاني
في البيت عند نرمين روحت بيتها عالعصر كده علي مااتغدت وغيرت هدومها وكانوا كل أهلها وإخواتها الصغيرين في البيت فاهي مش عارفة تتكلم في الفون قدامهم فبتحاول بقدر إمكانها تبعد عنهم بأي طريقة علشان تعرف تكلم هشام ودخلت واتحججت بإنها تعبانة ومصدعة شوية من ضغط المحاضرات واشترطت عليهم ماحدش منهم يخبط الباب ولايدخل عليها يصحيها غير لما هي تصحي براحتها طبعاً علشان ماحدش يسمعها بتكلمه وأبوها راجل شديد ومحترم جدا مش هيسمح بكده ولاهيسكت علي كده ودخلت نرمين وقفلت باب أوضتها عليها وقعدت علي سريرها وطلبت رقم هشام ورنت عليه.....
_هشام :ألووووو مين ....
_نرمين :ازيك يا هشام ماتعرفنيش ولاايه ماتعرفش صوتي ياهش ياعسل أنتا ....
_هشام :لا والله مش واخد بالي مين أنتي قوليلي ....
_نرمين :أنا نرمين زميلة شيماء أختك .......
_هشام :خير يانرمين عاوزة حاجة بترني ليه وعرفتي رقم فوني إزاي .....
_نرمين : ههههههه حيلك حيلك عاوز تعرف كل ده مرة واحدة كده طب إهدي علي نفسك شوية ياهش وعموما هجاوبك علي أسئلتك ياسيدي ولاتزعل ....
..أولا :برن عليك لاني معجبة بيك وبحبك من أول مرة شوفتك فيها وأنا اتهوست بيك ومابقتش شايفة حد قدامي غيرك ياهشام ونفسي تحبني أنتا كمان زي مابحبك كده وتبادلني مشاعري وأحاسيسي ياهش ...
.. ثانياً بقي :رقم فونك اخدته من أختك شيماء ياعيني لما لقتني بحبك وهموت عليك وبحاول أقرب منك وأنتا بعيد عني حست بيا وباللي جوايا من غير ماأقولها وأنتا ماحستش بيا لحظة بالرغم إن كل اللي في قلبي ده وجوايا ليك أنتا يعني أنتا السبب فيه فصعبت عليها وقررت تساعدني إزاي أقربك مني واحببك فيا فاقترحت عليا إنها تديني رقم فونك واكلمك وتتكلم معايا هاااا ارتاحت بقي ياحبيبي يااريت تحس بيا بقي وتقدر تعبي ده علشان أوصلك ريحني وريح قلبي ياهشام ..
_هشام :نرمين كده مايصحش إلا أنتي بتعمليه ده.
.. أولا: أنتي أكبر مني بسنتين أنا هتجوز برضه واحدة أكبر مني أنتي بتتكلمي إزاي .....
.. ثانياً :أنتي زميلة أختي وبتيجي دائما تذاكري معاها وأنا بعتبرك أختي زيك زيها بالظبط ...
..ثالثا:أنا شاب وبدرس دلوقتي ومش حاطط الكلام ده في دماغي خالص غير لما اخلص دراستي واتخرج وأكون نفسي وأقدر افتح بيت وأسرة وأقدر علي تحمل وشيل المسئولية كاملة ....
_نرمين :حبيبي أنا مستعدة استناك العمر كله لو بعد ميت سنة بس والنبي قرب مني ياهشام وادي لنفسك فرصة تعرفني فيها وتعرف ايه اللي جوايا والله هتحبني أوي ومش هتندم لحظة ياحبيبي ....
_هشام :هو أنتي بتفهمي ولامش بتفهمي يانرمين وكل اللي أنا قولته ده ايه لسه مش واصلك لحد دلوقتي وبعدين قبل وأهم من كل ده أنتي ماتناسبنيش ولاتنفعيني لانك ولمؤاخذة يعني لبسك غير محترم وطريقة إستعمالك في الميكيب كلها مظهرة كدابة ده غير إنك معروفة إنك بنت مش تمام وكل يوم ماشية مع شاب شكل علشان يصرف عليكي ويجبلك طلباتك ويشحنلك بتنفضيه يعني واهو بتتسلي وتضيعي وقت وتعيش قصص حب وغرام وخلاص فربما تكوني عاوزاني زيهم أنا كمان هي جات عليا أنا يعني فاطمني احنا ناس حالتنا علي قدنا وغلابة ومكفين نفسنا بستر ربنا وبمرتب أبويا يعني ابعدي عني وريحي دماغك وروحي شوفيلك حد زيك تضحكي عليه وتنفضيه أول بأول ....
_نرمين :أنتا عرفت الكلام ده منين ....
_هشام :بشوفك ياماما أوقات وبسمع كده الحاجات دي مش بتستخبا أصلا ومن أول ماكانت شيماء أختي أغمي عليها وتعبانة وأنتي جيتي البيت أنتي وصحابك جايبنها من المستشفي كنتي هتأكليني بعينيكي اللي عاوزة تندب فيها رصاصة دي وكل صحابك كانوا محترمين وعينهم في الأرض عادي اطمنو علي أختي ومشيوا وأنتي اللي كنتي مش مظبوطة معايا ولاعلي بعضك كده وبعدها بقيتي تيجي تذاكري مع أختي وتتقربي منها دائما علشاني ونظراتك بقي والكلام ده فاكراني اهبل ولاايه ولاعيل صغير بس أنا شاب محترم بقي عارف الحلو وعارف الوحش الحلو أقرب منه والوحش ابعد عنه وعلي طول بحذر أختي شيماء منك لانك دائما فارضة نفسك عليها وممكن تفسديها وتفسدي أخلاقها بس هي برضه أحسن منك مهما إن صاحبت حتي لو ميت بنت من صنفك هي مش صغيرة وعارفة ايه الصح وايه الغلط سلام ويااريت تمسحي رقمي من عندك وماتفكريش بس إنك ترني عليه تاني ....
...وقفل هشام الفون في وش نرمين وهي بعد كل الكلام اللي سمعته ده الدم بقي يغلي في عروقها ومش عارفة تعمل ايه ورزعت الفون جنبها علي سريرها وشوية كده واخدته تكلم شيماء وتقولها اللي حصل ......
_شيماء :ألوووو يانرمين عاوزة ايه ....
_نرمين :عاجبك كده ياست شيماء أخوكي بكلمه سمعني كلام زبالة وزي الزفت .....
_شيماء :خير يابنتي بس براحة كده ماتيأسيش اصبري شوية وحاولي يابت توقعيه في شباكك واحدة واحدة هتلاقيه جالك هو لحد عندك ومسلم إيديه ليكي وبيقولك شبيك لبيك هشام ملكك وبين إيديكي يانونة ياحبييتي ....
_نرمين :بجد ياشوشو هو أنا يابنتي لحقئت أقوله حاجة ده بمجرد بس ماكلمته كام كلمة اداني موشح بيشتمني ويغلط فيا وفي أخلاقي هو غبي مش عارف إن الشباب أحلي وأجمل منه هيموتوا عليا ويتمنوا نظرة واحدة من عيوني بس لو شاورت ليهم كده هيجوني لحد عندي مش أخوكي الجربوع ده هو ايه يكون بين الشباب ياروحي ...
_شيماء :لا لحد كده واتلمي يابت أنتي هتقلي أدبك وتنسي نفسك ولاايه ده أنتي اللي هبطانة وهتموتي عالوأد وبعدين ده أخويا وماتغلطيش فيه حسك عينك تقولي عنه أي كلمة تزعلني بس مش هتعرفي أنا هعمل فيكي ايه ومالكيش دعوة بيا ولابيه تاني فاهمة يابت ....
_نرمين : حبيبتي ياشوشو أسفة والله بس غصب عني اعذريني أخوكي برضه كلامه كان جارح وقاسي عليا أوي وده غصب عني سامحيني ياحبي والنبي وساعديني اقربه مني إزاي .....
_شيماء :ماشي سماح المرة دي أما نشوف و والله تقربيه منك دي بتاعتك بقي لحد كده ودوري إنتهي وجه دورك أنتي سيبيه كام يوم كده وابقي ارجعي كلميه وشوفيه هيعمل معاكي ايه وخليكي وراه لحد ماتوقعيه فيكي ياستي ....
_ نرمين : والله هحاول وهعمل كل حاجة مش هيأس أبدأ ولاهتعب ولاهزهق ياشوشو وتخليه يحبني ويموت فيا .....
_شيماء :أيوة كده يامعلم كده انتي شوشو الجامدة اللي أنا أعرفها ....
_نرمين :طب يلا سلام بقي اقوم اخد دش واشرب فنجان قهوه يروق دمي وأعصابي كده اللي أخوكي حرقهالي دي بس مش مشكلة فداه كلي فداه قلبي وروحي وعقلي وعمري كله ....
_شيماء :ههههههه سلام يابت الله يسهله ياعم .....
...وقفلوا الفون مع بعضهم وشيماء بقت مستحقرة نرمين بس اهي بتلعب بيها غيرانة منها علشان بتلبس إستايل وكل الشباب بتجري وراها ويعملولها اللي هي عاوزاه وهي شيماء بتبقي نفسها تعمل كده وتحس نفسها مرغوبة من كل واحد وتشوفه ميت عليها بس خايفة من أبوها وأمها وأخوها يعرفوا وماهيسكتوا ليها وكمان هي عارفة إن هشام مش هيبص لنرمين فعاوزة تعشمها وفي الأخر تصدمها وتديها المقلب لأنها عارفة إن هشام مش بيحبها ولاهيقبل بيها وتبقي ماجاتش منها هي يبقي اسمها هو ماعازهاش وتشوف كسرة قلب نرمين قدامها ......
....وفجأة دخل عليها هشام متعصب بيقول :
ايه ده ياشيماء أنتي إزاي تدي لنرمين زميلتك رقم فوني تكلمني أنتي عارفة إن أنا ليا في السكة دي برضه ..
_شيماء :اعمل ايه بس ياحبييي البت بتحبك من أول ماشافتك وهتموت عليك وبتحايلني كتير والصراحة صعبت عليا ياهشام البت واقعة عالأخر راضيها يأخي وخلاص ماتزعلهاش وريحها ...
_هشام :أراضيها إزاي وأريحها ياشيماء ....
_شيماء :يعني بتكلمك كلمها قولها كلام حلو اضحك عليها يأخي ومشي حالك وخلاص وبعد كده ابقي سيبها لما تزهق منها واتحججلها بأي حجة ايه هي كيمياء يعني .....
_هشام :أنتي بتقولي ايه ياشيماء هو أنتي تعرفي عني برضه إني كده أنا قبل مااعمل كده أخاف عليكي وأفكر فيكي قبل أي حاجة علشان لو عملت كده مع بنت وعشمتها ورجعت كسرتها ربنا هيعاقبني فيكي وهيوعدني قبلك بواحد يعمل فيكي كده وأكتر فلازم نخاف ربنا في كل شئ ياشيماء مهما يكون بسيط بس بيكون عند ربنا كبير .....
_شيماء :ماتشغلش بالك بيا ياهشام أختك بميت راجل ولابيهمني أي حد مش زي البت السايبة دي ..
_هشام :مالناش دعوة سايبة ولامش سايبة علي نفسها ياستي ومع غيري أنا لا وياريت زي ماخلتيها تعمل كده خليها تشيلني من دماغها وتبعد عني ....
...وخرج هشام وسابها في الأوضة وشيماء عادي ولاشغلت بالها باللي حصل واللي قاله ليها هشام ولاأثر فيها بأي شئ بس بقت فرحانة في نرمين عالبهدلة اللي اخدتها من هشام من أول مرة وقالت يلا اشبعي ياست نرمين ياللي عاملة نفسك حلوة وجميلة وعايشالي فيها دور العاشقة الولهانة ياعيني هههه ...
---
..في المساء في شقة جميلة في فيصل في البيت عند ياسمين ومامتها وباباها :
...ياسمين في أوضتها بتذاكر ومشغولة جدا وهي بتذاكر عايشة في قمة سعادتها وراحتها النفسية لأنها بتحب المذاكرة جدا وبتعشقها وبتلاقي نفسها فيها ..
...وفجأة خبط عليها والدها الباب يطمن عليها ....
_ياسمين :حبيبي يابابا اتفضل وحشتني والله .....
_الأب : الحمدلله يابنتي أنتي اللي عاملة ايه وأخبار المذاكرة معاكي ايه شايفك مشغولة أوي كده ...
_ياسمين :أيوة والله يابابا ورايا مذاكرة كتير أوي بس علشان خاطرك ابطل دلوقتي حالا واخليني معاك ياحبيبي هو أنا عندي أعز ولا أغلي منك في الدنيا دي أبدأ ......
_الأب:بصي يابنتي أحمد بن عمتك كلمني تاني هو وعمتك وبيقولولك فكري كمان مرة في الموضوع ....
_ياسمين :لا طبعاً يابابا أولا أنا بعتبره أخويا ...
ثانيا :إزاي عاوز يتجوزني علي طول كده في الأجازة طب وكليتي اكمل تعليمي إزاي يعني ولاهو بقي علشان مخلص كليته وحاله وشغال ومظبط نفسه وأحواله ماشية تمام فعاوز يتجوز وخلاص ومش شاغله مستقبلي ....
_الأب :ماهو يابنتي قالك هيخليكي تكملي عنده ومش هيحرمك من حاجة ....
_ياسمين :ده كلام يابابا لازم يقوله علي ماالجوازة تتم وبعدين هما راحو إتقدموا لكذا بنت وماتوافقشي بيه أنا اللي هوافق بيه ومن إمتي وعمتو بتحبني يعني أنا ولا ماما لا يابابا أنا مش مرتحالو ولاعاوزاه .
_الأب :يعني خلاص يابنتي ده أخر كلام عندك ....
_ياسمين :أيوة يابابا أخر كلام عندي وربنا يرزقه باللي أحسن مني وأنا ربنا يوفقني وادخل الكلية اللي أنا بحلم بيها وأكون مدرسة رياض أطفال والله ده حلمي يابابا نفسي ادرس للأطفال كده وأعلمهم وافهمهم كل حاجة وابقي أنا اللي مأسساهم ...
_الأب :ربنا يابنتي يحققلك كل أحلامك ويفرحك ويفرح قلبك ياارب ويكتبلك السعادة كلها ......
_ياسمين :حبيبي يابابا تسلملي ياارب ويخليك ليا ..
_الأب :بس سؤال يابنتي وتجاوبيني عليه بكل صراحة علشان مانفتحش الموضوع ده تاني لامعاكي ولامع عمتك وابنها ويتقفل الموضوع علي كده ...
_ياسمين :اتفضل يابابا .....
_الأب :أنتي ليه مش قابلة ابن عمتك وكمان حكمتي عليه إن ماحدش بيوافق بيه فيبقي فيه عيب ....
_ياسمين :لا مش قصدي يابابا والله بس زي ماأنتا شايف كده شايل هو وعمتو في العظمة وفاكرين نفسهم أحسن من كل الناس ومافيش حد بيعجبهم مغرورين يعني وهما زيهم زينا عادي فأنا بعتبره أخويا مش أكتر....
_الأب :تمام يابنتي ربنا يبعتلك ابن الحلال اللي يسعدك ويهنيكي ....
_ياسمين :ربنا يخليك ليا ياارب يابابا ياحبيبي بس قبل أي حاجة دراستي وتعليمي أهم وأول شئ في حياتي.....
_الأب :أكيد طبعاً ياحبيبتي اسيبك بقي تكملي مذاكرتك وتنامي ....
...وقام الأب وساب بنته تكمل مذاكرتها وحالها ......
__ياسمين :بنت جميلة ورقيقة ومنتهي الأدب والأخلاق والإحترام ومتفوقة جدا في دراستها وطالبة في أخر سنة ليها في الثانوية العامة وحلمها تتخرج وتدخل كلية تربية طفولة قسم رياض الاطفال لانها بتحب الأطفال جدا ونفسها تدرس ليهم وتعلمهم وتأسسهم هي وهي من النوع الرقيق الجميل والقلب الطيب المرهف الإحساس .....
---
...في المساء في بيت عزة زميلة شيماء هي اعدة في أوضتها مع نفسها بتتخيل هشام معاها ونامت علي سريرها وحلمت بيه إنها معاه في الكوشة وبيتجوزوا وبتحاول تقرب من شيماء علشان تقربله هو بس هي أهلها محافظين زيادة عن اللزوم وليها أخ كبير شديد وطبعه وحش ومش بيخليها تخرج غير من البيت للكلية ومن الكلية للبيت وبيحاسبها علي كل صغيرة وكبيرة لأنهم أصلهم صعايدة بس لزوم شغلهم وحالهم اتنقلوا من الصعيد للقاهرة فعزة بتقرب من شيماء علشان تعرف عنه كل حاجة لأنها في يوم كانوا راجعين هي وشيماء من الكلية صحوبية عادية فاليوم ده كان هشام رايح مشوار من نفس الطريق وبالمرة راح يجيب شيماء في ميعاد خروجها من الكلية وسلم عليهم لما لقا عزة معاه سلم بكل أدب وذوق وإحترام بس عزة أعجبت بيه وبقت هتموت وتتجنن عليه وبقت اليوم اللي تشوفه فيه صدفة بتبقي هتطير من الفرحة وعينها مش بتتشال من عليه بس مش قادرة تتجرأ ولاتصارح شيماء وتقولها بس شيماء فاهمة وعارفة وبتلعب عالوشين مع الاتنين شوية مع عزة وشوية مع نرمين وعاملة عليهم كأنها بتجبيلهم العريس يعني وتعشم فيهم وكل واحدة فيهم متصاحبة علي شيماء علشان كده بس هما الاتنين مش يعرفوا بعضهم لاعزة تعرف نرمين ولانرمين تعرفها واهي شيماء بتلعب عالجنبين
وتلعب بيهم لأنها من طبعها غيرانة منهم ومن عزة كمان لأنها بنت شياكة وجميلة وأهلها ناس مبسوطين وهي كل طلباتها مجابة وكمان صغيرة عنها وكانت جاتلها الفرصة لحد عندها لما لقيتهم بيحبوا هشام فقررت تسويهم علي نار هادية ولأنها عارفة إن هشام مش هيوافق من الأصل بواحدة فيهم وهي أصلا مش عاوزة هشام يخطب ولايتجوز خالص علشان يفضل مهتم بيها هي وماينشغلش مع خطيبته ولامراته بتحب أخوها حب إمتلاك ومش بتتمناله الخير عاوزاه يعملها هي كل حاجة وبس ......
__عزة:صاحبة شيماء في الكلية معاها بس هي دفعة تالتة أصغر منها بسنة يعني وهي بتموت في هشام ونفسها يتقدملها وتتجوزه هي كمان زي نرمين بالظبط وهما الأتنين متصاحبين علي شيماء علشان يعرفوا كل حاجة عن أخوها ويقربوا منه أكتر وأكتر ويلفتوا نظره ليهم بس كل بنت فيهم ماتعرفش إن زميلتها بتحبه لكن شيماء مش هبلة ولاعبيطة وفاهمة كل الحكاية بس اهي بتلعب عليهم ومش سامحة إن أي بنت في الدنيا تأخد أخوها منها علشان يفضل معاها يحبها هو ويهتم بيها وتبقي هي دلوعة البيت اللي عالحجر دائما ويهتم بيها وبحياتها وطبعاً إنه لوجاب أي بنت واتجوزها هتبقي مراته وحبيبته وأم لولاده وأهلها هيكونوا فرحانين بعيال ابنهم الوحيد فهي إنسانة أنانية مش بتحب غير نفسها وشبه مريضة نفسياً مش بتتمني لحد الخير حتي أخوها وأهلها......
---
البارت خلص أتمني يكون عجبكم وانتظروني في البارت اللي جاي وكل بارت هتتفاجئوا بأحداث وأبطال كتير تفاعلكم معايا وتشجيعكم ليا دائما من غير تم ولا إيموشنات ...